14KLA-starred questions










	STARRED
	QUESTIONS
	AND
	ANSWERS

You are here: Business >14^th KLA >18^th Session>starred Questions and Answers

Answer Provided

Answer Not Yet Provided

FOURTEENTH KLA - 18^th SESSION
STARRED QUESTIONS AND ANSWERS
(To read Questions please enable Unicode-Malayalam in your system)
(To read answers Please CLICK on the Title of the Questions)

Questions and Answers

വാഹന പരിശോധന കര്‍ശനമാക്കുന്നതിന് നടപടി

*121.

ശ്രീമതി യു. പ്രതിഭ
ശ്രീ.കാരാട്ട് റസാഖ്
,, പി.കെ. ശശി
,, ജോണ്‍ ഫെര്‍ണാണ്ടസ് : താഴെ കാണുന്ന ചോദ്യങ്ങള്‍ക്ക് ഗതാഗത വകുപ്പ് മന്ത്രി സദയം മറുപടി നല്‍കുമോ:

(എ)	വാഹനപ്പെരുപ്പവും റോഡ് സംസ്കാരത്തിന്റെ അഭാവവും റോഡുകളുടെ അവസ്ഥയും കാരണം വാഹനാപകടം വര്‍ദ്ധിച്ചു വരികയും 2019 ല്‍ നാലായിരത്തിലധികം പേര്‍ക്ക് ജീവഹാനിയുണ്ടാകുകയും ചെയ്തതിന്റെ പശ്ചാത്തലത്തില്‍ ഗതാഗത നിയമലംഘന പരിശോധന കര്‍ശനമാക്കാനും വ്യാപിപ്പിക്കാനും മോട്ടോര്‍ വാഹന വകുപ്പ് നടപടിയെടുക്കുമോ;

(ബി)	ആധുനികോപകരണങ്ങള്‍ വാങ്ങാനും ജീവനക്കാരുടെ എണ്ണം വര്‍ദ്ധിപ്പിക്കുന്നതിനും പരിപാടിയുണ്ടോ; നിലവിലുള്ള നിരീക്ഷണ ക്യാമറകള്‍ പ്രവര്‍ത്തനസജ്ജമായി നിലനിര്‍ത്താന്‍ നടപടിയെടുത്തിട്ടുണ്ടോ;

(സി)	ഹെല്‍മറ്റ്, സീറ്റ് ബെല്‍റ്റ് പരിശോധനയ്ക്ക് പ്രാധാന്യം നല്‍കി വരുന്ന രീതി മാറ്റി അമിത വേഗതയും ഗതാഗത നിയമങ്ങള്‍ ലംഘിച്ചുകൊണ്ടുള്ള ഡ്രൈവിംഗും കര്‍ശനമായി തടയുന്ന തരത്തില്‍ പരിശോധന ഫലപ്രദമാക്കുന്നതിനും എന്നാല്‍ ഇത്തരത്തിലുള്ള പരിശോധന മാന്യമായ രീതിയില്‍ ആയിരിക്കുന്നതിനും വേണ്ട ഇടപെടല്‍ ഉണ്ടാകുമോ;

(ഡി)	കണ്ടെത്തിയിട്ടുള്ള ബ്ലാക്ക് സ്പോട്ടുകളില്‍ അപകടത്തിന്റെ കാരണം കണ്ടെത്തി അത് ഒഴിവാക്കുന്നതിന് നടപടി സ്വീകരിക്കുമോ എന്ന് വ്യക്തമാക്കാമോ?

അക്കാദമിക ഗുണമേന്മ വര്‍ദ്ധിപ്പിക്കുന്നതിനുള്ള പദ്ധതികള്‍

*122.

ശ്രീ.വി. ജോയി
,, എ. എന്‍. ഷംസീര്‍
,, ആന്റണി ജോണ്‍
പ്രൊഫ.കെ.യു. അരുണന്‍ : താഴെ കാണുന്ന ചോദ്യങ്ങള്‍ക്ക് ഉന്നതവിദ്യാഭ്യാസവും ന്യൂനപക്ഷക്ഷേമവും വഖഫ് ഹജ്ജ് തീര്‍ത്ഥാടനവും വകുപ്പുമന്ത്രി സദയം മറുപടി നല്‍കുമോ:

(എ)

കേന്ദ്രസര്‍ക്കാരിന്റെ കീഴിലുള്ള ഉന്നതവിദ്യാഭ്യാസ സ്ഥാപനങ്ങള്‍ ക്രമാതീതമായി ഫീസ് വര്‍ദ്ധിപ്പിച്ച് ഉന്നതവിദ്യാഭ്യാസം വരേണ്യവത്ക്കരിക്കുന്നതും അത് കൂടുതല്‍ ശക്തിപ്പെടുത്തുന്ന തരത്തില്‍ വിദ്യാഭ്യാസനയത്തിന്റെ കരട് രൂപീകരിക്കുകയും ചെയ്തതിന് ബദലായി സാമൂഹ്യവിമോചനത്തിനുതകുന്ന തരത്തില്‍ ഉന്നതവിദ്യാഭ്യാസരംഗം കൂടുതല്‍ ദൃഢീകരിക്കാന്‍ സര്‍ക്കാര്‍ നടത്തുന്ന പ്രവര്‍ത്തനങ്ങള്‍ വിശദമാക്കാമോ;

(ബി)	സംസ്ഥാനത്തെ സര്‍ക്കാര്‍ കോളേജുകളുടെയും സര്‍വ്വകലാശാലകളുടെയും അടിസ്ഥാനസൗകര്യവികസനത്തിനും അക്കാദമിക ഗുണമേന്മാവര്‍ദ്ധനവിനുമായി ആവിഷ്ക്കരിച്ചിട്ടുള്ള പദ്ധതികളെക്കുറിച്ച് അറിയിക്കാമോ;

(സി)	സര്‍വ്വകലാശാലകള്‍ എെകരൂപ്യത്തോടെ പരീക്ഷകള്‍ യഥാസമയം നടത്തുന്നതിനും പരീക്ഷാഫലം പ്രസിദ്ധീകരിക്കുന്നതിനും പാഠ്യപദ്ധതി കാലോചിതമായി പരിഷ്ക്കരിക്കുന്നതിനും വേണ്ട ഇടപെടല്‍ നടത്തുന്നുണ്ടോ എന്ന് വ്യക്തമാക്കാമോ?

തദ്ദേശഭരണ സ്ഥാപനങ്ങളിലെ വാര്‍ഡ് വിഭജനം

*123.

ശ്രീമതിഷാനിമോള്‍ ഉസ്മാന്‍
ശ്രീ.കെ.സി.ജോസഫ്
,, പി.ടി. തോമസ്
,, സണ്ണി ജോസഫ് : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	തദ്ദേശഭരണ സ്ഥാപനങ്ങളുടെ വാര്‍ഡുകളുടെ എണ്ണം കൂട്ടുന്നതിനുളള നിയമ ഭേദഗതിക്ക് ഓര്‍ഡിനന്‍സ് പുറപ്പെടുവിക്കാന്‍ മന്ത്രിസഭ ഗവര്‍ണറോട് ശിപാര്‍ശ ചെയ്തിരുന്നോ;

(ബി)	പ്രസ്തുത ഓര്‍ഡിനന്‍സിന് ഗവര്‍ണര്‍ അംഗീകാരം നല്‍കിയിട്ടുണ്ടോ; ഇല്ലെങ്കില്‍ എന്തുകൊണ്ടെന്ന് അറിയിച്ചിട്ടുണ്ടോ; വിശദമാക്കാമോ;

(സി)	2021-ല്‍ സെന്‍സസ് നടക്കാനിരിക്കെ 2019 ഡിസംബര്‍ 31-ന് ശേഷം വാര്‍ഡ് വിഭജനം പോലുളള ഭരണപരമായ മാറ്റങ്ങള്‍ നടത്തരുതെന്ന് കേന്ദ്രം നിര്‍ദ്ദേശിച്ചിരുന്നോ; എങ്കില്‍ അത്തരം ഒരു നിര്‍ദ്ദേശം നിലവി‌ലിരിക്കെ ജനുവരി 1-ന് ശേഷം അതിനായി ഒരു ഓര്‍ഡിനന്‍സ് പുറപ്പെടുവിക്കാന്‍ തീരുമാനിച്ചത് ഏത് സാഹചര്യത്തിലാണ്;

(ഡി)	പ്രസ്തുത ഓര്‍ഡിനന്‍സ് സംബന്ധിച്ച് ഗവര്‍ണര്‍ എന്തെങ്കിലും വിശദീകരണം ആരാഞ്ഞിരുന്നോ; എങ്കില്‍ എന്ത് വിശദീകരണമാണ് നല്‍കിയതെന്ന് അറിയിക്കാമോ?

കാര്‍ഷിക വിപണി സംവിധാനം കാര്യക്ഷമമാക്കുന്നതിന് പദ്ധതി

*124.

ശ്രീ.എസ്.രാജേന്ദ്രന്‍
,, കെ.സുരേഷ് കുറുപ്പ്
,, സജി ചെറിയാന്‍
,, കെ.കുഞ്ഞിരാമന്‍ : താഴെ കാണുന്ന ചോദ്യങ്ങള്‍ക്ക് കൃഷി വകുപ്പുമന്ത്രി സദയം മറുപടി നല്‍കുമോ:

(എ)	നെല്‍ സംഭരണത്തില്‍ നേരിടുന്ന പ്രശ്നങ്ങള്‍ പരിഹരിക്കാന്‍ പ്രഖ്യാപിച്ചിരിക്കുന്ന അന്തര്‍ദേശീയ നിലവാരത്തിലുള്ള റൈസ് പാര്‍ക്കുകള്‍ ആരംഭിക്കാന്‍ സ്വീകരിച്ചു വരുന്ന നടപടിയുടെ പുരോഗതി വ്യക്തമാക്കാമോ;

(ബി)	വിപണിയില്‍ അമിത വില നിലനില്‍ക്കുമ്പോഴും കര്‍ഷകര്‍ക്ക് തുച്ഛമായ വില മാത്രം ലഭിച്ചു വരുന്ന സ്ഥിതി പരിഹരിക്കാനായി സംസ്ഥാനത്ത് കാര്‍ഷിക വിപണി സംവിധാനം കാര്യക്ഷമമാക്കുന്നതിന് പദ്ധതിയുണ്ടോ; എങ്കിൽ വിശദമാക്കുമോ;

(സി)	സുസ്ഥിര കൃഷി വികസനത്തിനു വേണ്ട ഗുണമേന്മയുള്ള നടീല്‍ വസ്തുക്കള്‍, വളം, ജലസേചന സൗകര്യം തുടങ്ങിയ പശ്ചാത്തല സൗകര്യങ്ങള്‍ പര്യാപ്തമായ തോതില്‍ വര്‍ദ്ധിപ്പിക്കാന്‍ പരിപാടിയുണ്ടോ എന്ന് വിശദമാക്കുമോ?

കര്‍ഷകര്‍ നേരിടുന്ന പ്രതിസന്ധി

*125.

ശ്രീ.ഐ.സി.ബാലകൃഷ്ണന്‍
,, അനൂപ് ജേക്കബ്
,, എ.പി. അനില്‍ കുമാര്‍
,, തിരുവഞ്ചൂര്‍ രാധാകൃഷ്ണന്‍ : താഴെ കാണുന്ന ചോദ്യങ്ങള്‍ക്ക് കൃഷി വകുപ്പുമന്ത്രി സദയം മറുപടി നല്‍കുമോ:

(എ)	കേന്ദ്ര - സംസ്ഥാന സര്‍ക്കാരുകളുടെ നയം, വിലത്തകര്‍ച്ച, കൃഷി നാശം എന്നിവ കാരണം സംസ്ഥാനത്തെ കര്‍ഷകര്‍ നേരിടുന്ന പ്രതിസന്ധി ശ്രദ്ധയില്‍പ്പെട്ടിട്ടുണ്ടോ;

(ബി)	അടിക്കടി ഉണ്ടാകുന്ന പ്രകൃതിക്ഷോഭം മൂലം ബുദ്ധിമുട്ടിലായ കര്‍ഷകര്‍ക്ക് ആശ്വാസം നല്‍കുന്നതിന് സര്‍ക്കാര്‍ എന്തൊക്കെ നടപടികളാണ് സ്വീകരിച്ചത്; വ്യക്തമാക്കുമോ;

(സി)	റബ്ബര്‍ കര്‍ഷകര്‍ക്ക് സബ്സിഡി നല്‍കുന്നതിനുള്ള അപേക്ഷ സ്വീകരിക്കേണ്ട എന്ന് റബ്ബര്‍ ബോര്‍ഡ് തീരുമാനം എടുത്തതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ അതിനുള്ള സാഹചര്യമെന്താണെന്ന് അറിയുമോ; വെളിപ്പെടുത്തുമോ;

(ഡി)	വായ്പ ലഭിക്കുന്നതിന് ബാങ്കുകള്‍ കൊണ്ടുവന്നിട്ടുള്ള നിബന്ധന മൂലം ബുദ്ധിമുട്ടിലായ കര്‍ഷകരെ സഹായിക്കുന്നതിന് പ്രത്യേക പാക്കേജ് അനുവദിക്കുന്ന കാര്യം പരിഗണിക്കുമോ; വിശദവിവരം വെളിപ്പെടുത്തുമോ?

കെട്ടിടനിര്‍മ്മാണ ചട്ടം

*126.

ശ്രീമതി.പി. അയിഷാ പോറ്റി
ശ്രീ.കെ.ജെ. മാക്സി
,, വി. കെ. സി. മമ്മത് കോയ
,, എന്‍. വിജയന്‍ പിള്ള : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	സാധാരണക്കാരുടെ താല്പര്യം മുന്‍നിര്‍ത്തി കെട്ടിടനിര്‍മ്മാണ ചട്ടം ഉചിതമായി പരിഷ്കരിച്ചിട്ടുണ്ടോ;

(ബി)	അഴിമതിക്കുള്ള സാധ്യത കുറച്ച് കെട്ടിടനിര്‍മ്മാണ പെര്‍മിറ്റിനുള്ള അപേക്ഷകള്‍ ഓണ്‍ലൈനാക്കിയതിനുശേഷവും കാലതാമസം ഉണ്ടാകുന്നതായുള്ള ആക്ഷേപത്തെക്കുറിച്ച് പരിശോധിച്ചിട്ടുണ്ടോ;

(സി)	തീരദേശ നിയന്ത്രണ നിയമത്തില്‍ ഭേദഗതി വന്നിട്ടും ജില്ലാ കളക്ടര്‍മാര്‍ തീരദേശത്തു നിന്നും നൂറ് മീറ്ററിനുള്ളില്‍ സ്ഥിതി ചെയ്യുന്ന കെട്ടിടങ്ങളുടെ കണക്കെടുക്കാന്‍ നിര്‍ദ്ദേശിച്ചിരിക്കുന്നത് സൃഷ്ടിച്ചിട്ടുള്ള ആശങ്ക പരിഹരിക്കാന്‍ ആവശ്യമായ ഇടപെടല്‍ നടത്താന്‍ സാധിക്കുമോ;

(ഡി)	കേരള റിയല്‍ എസ്റ്റേറ്റ് റെഗുലേറ്ററി അതോറിറ്റി പ്രവര്‍ത്തനമാരംഭിച്ചിട്ടുണ്ടോയെന്ന് അറിയിക്കാമോ?

മാലിന്യ സംസ്കരണ സംവിധാനങ്ങള്‍

*127.

ശ്രീ.ജെയിംസ് മാത്യു
,, ബി.ഡി. ദേവസ്സി
,, വി. അബ്ദുറഹിമാന്‍
,, ബി.സത്യന്‍ : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	ഗ്രാമപ്രദേശങ്ങളിലും നഗരങ്ങളിലും ഉറവിട മാലിന്യ സംസ്കരണം വ്യാപകമാക്കുന്നതില്‍ അഭിനന്ദനാര്‍ഹമായ പുരോഗതി കൈവരിച്ചിട്ടുണ്ടെങ്കിലും പ്രശ്നത്തിന്റെ സമ്പൂര്‍ണ്ണ പരിഹാരത്തിനായി കേന്ദ്രീകൃത മാലിന്യ സംസ്കരണ സംവിധാനത്തിന്റെ അനിവാര്യത കണക്കിലെടുത്ത് അതിനായി പദ്ധതി രൂപീകരിച്ചിട്ടുണ്ടോ; വിശദമാക്കുമോ;

(ബി)	വീടുകളില്‍ നിന്നും അജൈവ മാലിന്യ ശേഖരണത്തിനായി ഏര്‍പ്പെടുത്തിയിട്ടുള്ള സംവിധാനം കാര്യക്ഷമമാണോ; അജൈവ മാലിന്യ സംസ്കരണത്തിന് ക്ലീന്‍ കേരള കമ്പനി നടത്തുന്ന പ്രവര്‍ത്തനങ്ങളെക്കുറിച്ച് അറിയിക്കാമോ;

(സി)	വേസ്റ്റ് ടു എനര്‍ജി പ്ലാന്റ് സ്ഥാപിക്കാനുള്ള പദ്ധതിയുടെ നിലവിലെ സ്ഥിതി അറിയിക്കാമോ; നഗരമാലിന്യ സംസ്കരണത്തിന് ലോക ബാങ്ക് സഹായത്തോടെ നടപ്പാക്കാനുദ്ദേശിക്കുന്ന പദ്ധതികളെക്കുറിച്ച് അറിയിക്കാമോ?

കുടുംബശ്രീ ശക്തിപ്പെടുത്താന്‍ നടപടി

*128.

ശ്രീ.കെ.കുഞ്ഞിരാമന്‍
ശ്രീമതി.പി. അയിഷാ പോറ്റി
ശ്രീ.പി. ഉണ്ണി : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	ഈ സർക്കാർ അധികാരത്തില്‍ വന്നതിനുശേഷം കുടുംബശ്രീ സംവിധാനം ശക്തിപ്പെടുത്തുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് അറിയിക്കാമോ;

(ബി)	ഇതിന്റെ ഭാഗമായി ഏതെല്ലാം വിഭാഗക്കാർക്കായിട്ടാണ് പ്രത്യേക അയല്‍ക്കൂട്ടങ്ങള്‍ രൂപീകരിച്ചിട്ടുള്ളത്;

(സി)	അയല്‍ക്കൂട്ടങ്ങളുടെ പ്രവർത്തനങ്ങള്‍ മെച്ചപ്പെടുത്തുന്നതിനും സ്വയം വിലയിരുത്തുന്നതിനുമായി വിപുലമായ നടപടികള്‍ സ്വീകരിച്ചിട്ടുണ്ടോ; വിശദമാക്കാമോ;

(ഡി)	വിനോദസഞ്ചാര മേഖലയില്‍ കുടുംബശ്രീയുടെ പ്രവർത്തനങ്ങള്‍ കൂടുതല്‍ വിപുലീകരിക്കാൻ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കാമോ?

നാളികേര കൃഷി പുനരുജ്ജീവിപ്പിക്കുന്നതിന് നടപടി

*129.

ശ്രീ.ഇ.കെ.വിജയന്‍
,, ചിറ്റയം ഗോപകുമാര്‍
,, ജി.എസ്.ജയലാല്‍
ശ്രീമതി സി.കെ. ആശ : താഴെ കാണുന്ന ചോദ്യങ്ങള്‍ക്ക് കൃഷി വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്ത് നാളികേര കൃഷി പുനരുജ്ജീവിപ്പിക്കുന്നതിന് സ്വീകരിച്ചു വരുന്ന നടപടികള്‍ വിശദമാക്കുമോ;

(ബി)	നാളികേര വികസന കൗണ്‍സിലിന്റെ ഉദ്ദേശ്യലക്ഷ്യങ്ങളും നാളികേര കൃഷി വികസനത്തില്‍ കൗണ്‍സില്‍ വഹിക്കുന്ന പങ്കിനെക്കുറിച്ചുള്ള വിവരങ്ങളും ലഭ്യമാക്കുമോ;

(സി)	തെങ്ങ് കൃഷിയുടെ വ്യാപനത്തിനും ഉല്പാദനക്ഷമത കുറഞ്ഞ തെങ്ങുകള്‍ മുറിച്ചുമാറ്റി പുതിയവ നടുന്നതിനും പദ്ധതികളുണ്ടോ; വ്യക്തമാക്കുമോ;

(ഡി)	തെങ്ങില്‍ നിന്നുള്ള പ്രധാന ഉല്പന്നങ്ങളായ ഉരുക്കെണ്ണ, വെളിച്ചെണ്ണ, നീര എന്നിവ ആരോഗ്യസംരക്ഷണത്തില്‍ വഹിക്കുന്ന പങ്കിനെക്കുറിച്ച് ക്ലിനിക്കല്‍ പഠനങ്ങള്‍ നടത്തുന്നുണ്ടോ; വ്യക്തമാക്കുമോ;

(ഇ)	തെങ്ങില്‍ നിന്നുള്ള മൂല്യവര്‍ദ്ധിത ഉല്പന്നങ്ങള്‍ പ്രോത്സാഹിപ്പിക്കുന്നതിന് ഈ സര്‍ക്കാര്‍ സ്വീകരിച്ച നടപടികള്‍ വിശദമാക്കുമോ?

സമ്പൂര്‍ണ്ണ പ്ലാസ്റ്റിക് നിരോധനം

*130.

ശ്രീ.വി. കെ. സി. മമ്മത് കോയ
,, ജോണ്‍ ഫെര്‍ണാണ്ടസ്
,, കെ.ഡി. പ്രസേനന്‍
,, എന്‍. വിജയന്‍ പിള്ള : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്ത് സമ്പൂര്‍ണ്ണ പ്ലാസ്റ്റിക് നിരോധനം കര്‍ശനമായി നടപ്പിലാക്കുന്നതിനായി എന്തെല്ലാം നിര്‍ദ്ദേശങ്ങളാണ് സര്‍ക്കാര്‍ നല്‍കിയിട്ടുള്ളതെന്ന് അറിയിക്കാമോ;

(ബി)	പ്ലാസ്റ്റിക്ക് മൂലമുളള പരിസ്ഥിതി പ്രശ്നങ്ങളെക്കുറിച്ചും അത് നിരോധിക്കേണ്ടതിന്റെ ആവശ്യകതയെക്കുറിച്ചും പൊതുജനങ്ങള്‍ക്ക് ശരിയായ രീതിയില്‍ അവബോധം നല്‍കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് അറിയിക്കാമോ;

(സി)	പ്ലാസ്റ്റിക് നിരോധനം മൂലം ചെറുകിട കച്ചവടക്കാര്‍ക്ക് താത്കാലികമായി മാത്രം ഉണ്ടാകുന്ന ബുദ്ധിമുട്ടുകള്‍ പരിഹരിക്കുന്നതിന് എന്തെല്ലാം നടപടികള്‍ സ്വീകരിക്കാന്‍ സാധിക്കുമെന്ന് പരിശോധിക്കാമോ?

മാലിന്യ സംസ്കരണത്തിനായുള്ള നൂതന പദ്ധതികള്‍

*131.

ശ്രീ.കെ.ജെ. മാക്സി
,, റ്റി.വി.രാജേഷ്
ശ്രീമതി യു. പ്രതിഭ
ശ്രീ.വി. ജോയി : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്ത് മാലിന്യ സംസ്കരണത്തിനായി ഈ സർക്കാർ നടപ്പിലാക്കി വരുന്ന നൂതന പദ്ധതികള്‍ ഏതൊക്കെയാണെന്ന് വിശദമാക്കാമോ;

(ബി)	തദ്ദേശസ്വയംഭരണ സ്ഥാപനങ്ങൾ സ്ഥാപിച്ചിട്ടുള്ള മെറ്റീരിയല്‍ കളക്ഷന്‍ ഫെസിലിറ്റേഷന്‍ സെന്ററുകളും റിസോഴ്സ് റിക്കവറി സെന്ററുകളും കാര്യക്ഷമമായി പ്രവര്‍ത്തിക്കുന്നുണ്ടോ; വെളിപ്പെടുത്താമോ;

(സി)	സംസ്ഥാനത്ത് വികേന്ദ്രീകൃത മാലിന്യ സംസ്കരണ മേഖലയില്‍ ഹരിത കര്‍മ്മസേനകളുടെ പ്രവര്‍ത്തനങ്ങള്‍ എന്തെല്ലാമെന്ന് വിശദമാക്കാമോ;

(ഡി)	രാജ്യത്തെ ഗ്രാമങ്ങളുടെ ശുചിത്വനിലവാരം വിലയിരുത്തുന്നതിന് കേന്ദ്ര സര്‍ക്കാര്‍ നടത്തിയ സര്‍വ്വെ പ്രകാരം കേരളത്തിന് സ്വച്ഛ് സര്‍വ്വേക്ഷന്‍ ഗ്രാമീണ്‍ പുരസ്കാരം ലഭിച്ചിട്ടുണ്ടോ; വിശദാംശം നല്‍കുമോ?

തൊഴിലുറപ്പ് പദ്ധതി കാര്യക്ഷമമാക്കാനുള്ള നടപടികള്‍

*132.

ശ്രീ.സി.കെ. ഹരീന്ദ്രന്‍
,, സി.കൃഷ്ണന്‍
,, മുരളി പെരുനെല്ലി
,, കെ.വി.വിജയദാസ് : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	തൊഴിലുറപ്പ് പദ്ധതി സംസ്ഥാനത്ത് കാര്യക്ഷമമായി നടപ്പാക്കാന്‍ സ്വീകരിച്ചു വരുന്ന നടപടികള്‍ അറിയിക്കാമോ;

(ബി)	സംസ്ഥാനത്ത് പദ്ധതിയില്‍ രജിസ്റ്റര്‍ ചെയ്തിട്ടുള്ള കുടുംബങ്ങള്‍ എത്രയാണെന്നും തൊഴിലുറപ്പ് വേതനം രണ്ടാഴ്ചയ്ക്കുള്ളില്‍ നല്‍കണമെന്ന വ്യവസ്ഥ നടപ്പാകുന്നുണ്ടോയെന്നും അറിയിക്കാമോ;

(സി)	കേന്ദ്രസര്‍ക്കാരില്‍ നിന്നും എത്ര മാസത്തെ വേതന കുടിശ്ശിക ലഭിക്കാനുണ്ട്; സാമ്പത്തികമായി സമൂഹത്തില്‍ ഏറ്റവും പിന്നില്‍ നില്‍ക്കുന്ന ഗുണഭോക്താക്കളെ ദാരിദ്ര്യത്തിലേയ്ക്ക് നയിക്കാതെ അടിയന്തരമായി കുടിശ്ശിക നല്‍കാന്‍ കേന്ദ്ര സര്‍ക്കാരിനോട് ആവശ്യപ്പെട്ടിട്ടുണ്ടോ; വ്യക്തമാക്കാമോ;

(ഡി)	ദേശീയ ഗ്രാമീണ തൊഴിലുറപ്പ് പദ്ധതിയും സംസ്ഥാനത്തിന്റെ പദ്ധതിയായ അയ്യങ്കാളി നഗര തൊഴിലുറപ്പ് പദ്ധതിയും മനുഷ്യാധ്വാനം വിനിയോഗിച്ചുകൊണ്ട് ഉല്പാദന വര്‍ദ്ധനവും നാടിന്റെ വികസനവും സാധ്യമാക്കുന്ന തരത്തില്‍ കാര്യക്ഷമമാക്കുന്നതിന് കഴിഞ്ഞിട്ടുണ്ടോ; വ്യക്തമാക്കാമോ?

റോഡപകടങ്ങള്‍ കുറയ്ക്കുന്നതിന് നടപടി

*133.

ശ്രീ.എ. എന്‍. ഷംസീര്‍
,, ബി.സത്യന്‍
,, എ. പ്രദീപ്കുമാര്‍
,, ആന്റണി ജോണ്‍ : താഴെ കാണുന്ന ചോദ്യങ്ങള്‍ക്ക് ഗതാഗത വകുപ്പ് മന്ത്രി സദയം മറുപടി നല്‍കുമോ:

(എ)	സംസ്ഥാനത്ത് നിരത്തുകളില്‍ ഉണ്ടാകുന്ന അപകടങ്ങളും അതുമൂലമുണ്ടാകുന്ന മരണ നിരക്കും ഗണ്യമായി കുറയ്ക്കുന്നതിന് ഈ സര്‍ക്കാര്‍ ആവിഷ്കരിച്ച നൂതന പദ്ധതികള്‍ എന്തെല്ലാമാണ്;

(ബി)	ഇതിനായി സംസ്ഥാന റോഡ് സുരക്ഷാ അതോറിറ്റി നടത്തി വരുന്ന പ്രവര്‍ത്തനങ്ങള്‍ വിശദമാക്കാമോ;

(സി)	റോഡപകടങ്ങള്‍ ഒഴിവാക്കി റോഡ് സുരക്ഷ ഉറപ്പാക്കുന്നതിനായി കഴക്കൂട്ടം മുതല്‍ അടൂര്‍ വരെ നടപ്പാക്കി വരുന്ന 'മോഡല്‍ സേഫ് കോറി‍ഡോര്‍' പദ്ധതി സംസ്ഥാനത്ത് വ്യാപിപ്പിക്കാനുദ്ദേശിക്കുന്നുണ്ടോ; വിശദമാക്കാമോ;

(ഡി)	റോ‍ഡ് സുരക്ഷയുടെ ഭാഗമായി ഇരുപത്തിനാല് മണിക്കൂറും പട്രോളിംഗ് നടത്തുന്നതിനായി കൂടുതല്‍ എന്‍ഫോഴ്സ്മെന്റ് സ്ക്വാഡുകള്‍ രൂപീകരിക്കുന്നതിനും കണ്‍ട്രോള്‍ റൂമുകള്‍ സ്ഥാപിക്കുന്നതിനും നടപടി സ്വീകരിച്ചിട്ടുണ്ടോ; വിശദാംശം നല്കുമോ?

കര്‍ഷകരുടെ ക്ഷേമം ഉറപ്പുവരുത്തുന്നതിന് നടപടി

*134.

ശ്രീ.സി. കെ. ശശീന്ദ്രന്‍
,, എം. സ്വരാജ്
,, കെ. ബാബു
,, ജോര്‍ജ് എം. തോമസ് : താഴെ കാണുന്ന ചോദ്യങ്ങള്‍ക്ക് കൃഷി വകുപ്പുമന്ത്രി സദയം മറുപടി നല്‍കുമോ:

(എ)	രാജ്യത്ത് കര്‍ഷകരുടെ സ്ഥിതി ആത്മഹത്യയിലേയ്ക്ക് നയിക്കുന്ന തരത്തില്‍ പ്രതിസന്ധിയേറിയതാണെന്ന് കേന്ദ്ര കാര്‍ഷിക ഉപദേഷ്ടാവ് പോലും വിലയിരുത്തുന്ന സാഹചര്യത്തില്‍ സ്വര്‍ണ്ണപ്പണയത്തിന്മേലുളള വായ്പപോലും കര്‍ഷകന് നിഷേധിക്കുന്ന നിലപാട് തിരുത്താന്‍ കേന്ദ്രസര്‍ക്കാരിനോട് ആവശ്യപ്പെടുമോ;

(ബി)	മഴക്കെടുതി മൂലം കടക്കെണിയിലായ കര്‍ഷകരെ രക്ഷിക്കുന്നതിനും കാര്‍ഷിക മേഖലയുടെ പുനരുദ്ധാരണത്തിനും സംസ്ഥാന സര്‍ക്കാര്‍ ചെയ്ത കാര്യങ്ങള്‍ അറിയിക്കാമോ;

(സി)

കര്‍ഷകരുടെ താല്പര്യസംരക്ഷണാര്‍ത്ഥം സര്‍ക്കാര്‍ പുതുതായി പാസ്സാക്കിയ കേരള കര്‍ഷക ക്ഷേമനിധി നിയമവും കര്‍ഷക കടാശ്വാസ ആനുകൂല്യവര്‍ദ്ധനയും എത്ര മാത്രം പ്രയോജനപ്രദമാകുമെന്നാണ് പ്രതീക്ഷിക്കുന്നത്; കര്‍ഷകരെ സര്‍ഫെയ്സി നിയമത്തില്‍ കുരുക്കുന്ന ബാങ്കുകളുടെ നടപടി അവസാനിപ്പിക്കാന്‍ ഇടപെടൽ നടത്തുമോയെന്ന് വ്യക്തമാക്കുമോ;

(ഡി)	കര്‍ഷകരുടെ വരുമാനം വര്‍ദ്ധിപ്പിക്കുന്നതിനുതകുന്ന തരത്തിൽ മൂല്യവര്‍ദ്ധിതോല്പന്ന നിര്‍മ്മാണ വ്യവസായത്തിന് നല്‍കി വരുന്ന പ്രോത്സാഹനങ്ങള്‍ എന്തൊക്കെയെന്ന് അറിയിക്കാമോ?

കെ.എസ്.ആര്‍.ടി.സി. യെ കാര്യക്ഷമമാക്കാന്‍ നടപടി

*135.

ശ്രീ.എം. മുകേഷ്
,, റ്റി.വി.രാജേഷ്
,, കെ. ദാസന്‍
,, പുരുഷന്‍ കടലുണ്ടി : താഴെ കാണുന്ന ചോദ്യങ്ങള്‍ക്ക് ഗതാഗത വകുപ്പ് മന്ത്രി സദയം മറുപടി നല്‍കുമോ:

(എ)

മുന്‍ സര്‍ക്കാരിന്റെ കാലത്ത് ദൈനംദിന വരവ് ചെലവില്‍ 450 ലക്ഷം രൂപയുടെ അന്തരമുണ്ടായിരുന്ന കെ.എസ്.ആര്‍.ടി.സി. ക്ക് ഈ സര്‍ക്കാരിന്റെ ആത്മാര്‍ത്ഥമായ ഇടപെടലിന്റെ ഫലമായി വരുമാന അന്തരം 66 ലക്ഷമാക്കി കുറയ്ക്കാന്‍ സാധ്യമായിട്ടുണ്ടോ; ശരാശരി പ്രതിദിന വരുമാനത്തിലുണ്ടായ വര്‍ദ്ധനവ് എത്രയാണ് എന്ന് അറിയിക്കാമോ; ഡീസലിന്റെ നിരന്തര വിലവര്‍ദ്ധനവ് കെ.എസ്.ആര്‍.ടി.സി.യെ എത്രമാത്രം പ്രതികൂലമായി ബാധിക്കുന്നുണ്ട് എന്ന് അറിയിക്കാമോ;

(ബി)

ഈ സ്ഥിതിയിലും ശമ്പളം യഥാസമയം ലഭ്യമാക്കാന്‍ സാധിക്കാതെ പോയത് പരിഹരിക്കാന്‍ സര്‍വീസുകള്‍ കാര്യക്ഷമമാക്കാന്‍ മാനേജ്‍മെന്റിന് വേണ്ട നിര്‍ദ്ദേശം നല്‍കിയിട്ടുണ്ടോ; പെര്‍മിറ്റില്ലാതെ സ്വകാര്യ ബസുകള്‍ക്ക് അന്തര്‍ സംസ്ഥാന സര്‍വീസുകള്‍ യഥേഷ്ടം നടത്താമെന്ന കേന്ദ്ര സര്‍ക്കാര്‍ തീരുമാനം കെ.എസ്.ആര്‍.ടി.സി. യെ എങ്ങനെ ബാധിക്കാനിടയുണ്ട് എന്ന് വിലയിരുത്തിയിട്ടുണ്ടോ; വിശദാംശങ്ങള്‍ നല്‍കാമോ;

(സി)	പുതിയ ബസുകള്‍ വാങ്ങാനും ബസ് ബോഡി നിര്‍മ്മാണം പുനരാരംഭിക്കാനും നടപടിയെടുക്കാന്‍ ഉദ്ദേശിക്കുന്നുണ്ടോ എന്ന് വ്യക്തമാക്കാമോ?

സ്വാശ്രയ എഞ്ചിനീയറിംഗ് കോളേജുകളുടെ നിലവാരം

*136.

ശ്രീമതി.വീണാ ജോര്‍ജ്ജ്
ശ്രീ.ആര്‍. രാജേഷ്
,, പി.ടി.എ. റഹീം
,, ഐ.ബി. സതീഷ് : താഴെ കാണുന്ന ചോദ്യങ്ങള്‍ക്ക് ഉന്നതവിദ്യാഭ്യാസവും ന്യൂനപക്ഷക്ഷേമവും വഖഫ് ഹജ്ജ് തീര്‍ത്ഥാടനവും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്തെ എഞ്ചിനീയറിംഗ് കോളേജുകളില്‍ നിന്ന് പഠിച്ചിറങ്ങുന്നവര്‍ പ്രതീക്ഷിത നിലവാരത്തിലുള്ള നൈപുണ്യ ശേഷി കൈവരിക്കുന്നുണ്ടെന്ന് ഉറപ്പാക്കുന്നതിന് കെ.ടി.യു. നടത്തുന്ന ഇടപെടലുകള്‍ അറിയിക്കാമോ;

(ബി)	സ്വാശ്രയ എഞ്ചിനീയറിംഗ് കോളേജുകളുടെ നിലവാരം പരിശോധിക്കുന്നതിന് അക്കാദമിക് ഓഡിറ്റിംഗ് നടത്തിയിരുന്നോ; അതിന്റെ വിവരം ലഭ്യമാക്കാമോ; എത്ര സ്വാശ്രയ എഞ്ചിനീയറിംഗ് കോളേജുകളിലെ കോഴ്സുകള്‍ക്ക് എന്‍.ബി.എ. അക്രെഡിറ്റേഷന്‍ ഉണ്ടെന്നറിയിക്കാമോ;

(സി)	സാങ്കേതിക ശാസ്ത്ര സര്‍വകലാശാലയുടെ പരീക്ഷാ നടത്തിപ്പും മൂല്യനിര്‍ണ്ണയവും കുറ്റമറ്റതാക്കാന്‍ വേണ്ട ഇടപെടല്‍ ഉണ്ടാകുമോ വ്യക്തമാക്കാമോ?

കാര്‍ഷികോല്പന്ന വിപണന പദ്ധതികള്‍

*137.

ശ്രീ.മുരളി പെരുനെല്ലി
,, പി.വി. അന്‍വര്‍
,, സി.കെ. ഹരീന്ദ്രന്‍ : താഴെ കാണുന്ന ചോദ്യങ്ങള്‍ക്ക് കൃഷി വകുപ്പുമന്ത്രി സദയം മറുപടി നല്‍കുമോ:

(എ)	നൂതനവും ഉത്തമവുമായ കൃഷിരീതികള്‍ സംബന്ധിച്ച് കര്‍ഷകര്‍ക്ക് ആവശ്യമായ നിര്‍ദ്ദേശങ്ങളും അവബോധവും നല്‍കുന്നതിന് എന്തെല്ലാം സംവിധാനങ്ങളാണ് ഏര്‍പ്പെടുത്തിയിട്ടുളളതെന്ന് വ്യക്തമാക്കാമോ;

(ബി)	കാര്‍ഷികോല്പന്നങ്ങളുടെ വിപണനവുമായി ബന്ധപ്പെട്ട എല്ലാ പ്രവര്‍ത്തനങ്ങളും ഏകോപിപ്പിക്കുന്നതിന് നടപ്പിലാക്കി വരുന്ന കര്‍ഷകമിത്ര പദ്ധതിയുടെ വിശദാംശം നല്‍കാമോ;

(സി)	കാര്‍ഷികോല്പന്നങ്ങള്‍ നേരിട്ട് ഉപഭോക്താക്കളിലേക്ക് എത്തിക്കാന്‍ കര്‍ഷകര്‍ക്ക് അവസരം നല്‍കുക വഴി ഇടനിലക്കാരുടെ ചൂഷണത്തില്‍ നിന്നും കര്‍ഷകരെ രക്ഷിക്കുന്നതിന് ആഴ്ചച്ചന്തകള്‍ സ്ഥാപിച്ചിട്ടുണ്ടോ; വിശദമാക്കാമോ?

വാഹനാപകടങ്ങളുടെ വര്‍ദ്ധനവ്

*138.

ശ്രീ.ടി.ജെ. വിനോദ്
,, എല്‍ദോസ് പി. കുന്നപ്പിള്ളില്‍
,, അന്‍വര്‍ സാദത്ത്
,, അനില്‍ അക്കര : താഴെ കാണുന്ന ചോദ്യങ്ങള്‍ക്ക് ഗതാഗത വകുപ്പ് മന്ത്രി സദയം മറുപടി നല്‍കുമോ:

(എ)	സംസ്ഥാനത്തെ റോഡുകള്‍ കുരുതിക്കളം ആകുന്നുവെന്ന വാര്‍ത്ത വസ്തുതാപരമാണോയെന്ന് പരിശോധിച്ചിട്ടുണ്ടോ;

(ബി)	2019-ല്‍ സംസ്ഥാനത്തുണ്ടായ റോഡപകടങ്ങളില്‍ മരണപ്പെട്ടവരുടെയും ഗുരുതരമായി പരിക്കുപറ്റിയവരുടെയും എണ്ണത്തില്‍ വര്‍ദ്ധനവ് വന്നിട്ടുണ്ടോ; വിശദാംശം നല്‍കുമോ;

(സി)	സംസ്ഥാനത്തെ റോഡുകളുടെ മോശപ്പെട്ട സ്ഥിതി അപകടങ്ങള്‍ വര്‍ദ്ധിക്കുന്നതിന് കാരണമായതായി വിലയിരുത്തുന്നുണ്ടോ;

(ഡി)	മോട്ടോര്‍ വാഹന നിയമലംഘനങ്ങള്‍ക്കുള്ള ശിക്ഷയും വാഹനപരിശോധനയും കര്‍ശനമാക്കി അപകടങ്ങളുടെ തോത് കുറയ്ക്കുന്നതിനുള്ള നടപടി കെെക്കൊള്ളുമോ; വ്യക്തമാക്കുമോ?

കെട്ടിട നിര്‍മ്മാണ ചട്ടങ്ങളിലെ മാറ്റങ്ങള്‍

*139.

ശ്രീ.ചിറ്റയം ഗോപകുമാര്‍
,, ഇ.ടി. ടൈസണ്‍ മാസ്റ്റര്‍
ശ്രീമതി ഗീതാ ഗോപി
ശ്രീ.വി.ആര്‍. സുനില്‍ കുമാര്‍ : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	കെട്ടിട നിര്‍മ്മാണ ചട്ടങ്ങളില്‍ വരുത്തുന്ന മാറ്റങ്ങള്‍ എന്തെല്ലാമാണെന്നും അവ സംസ്ഥാനത്തെ കെട്ടിടനിര്‍മ്മാണ മേഖലയെ ഏതൊക്കെ വിധത്തില്‍ ബാധിക്കുമെന്നും വിശദമാക്കുമോ;

(ബി)	സാധാരണക്കാരെ മുതല്‍ വന്‍കിട ഫ്ലാറ്റ് നിര്‍മ്മാതാക്കളെ വരെ ആശങ്കയിലാക്കുന്നതാണ് പുതിയ കെട്ടിട നിര്‍മ്മാണ ചട്ടങ്ങളിലെ വ്യവസ്ഥകള്‍ എന്നത് ശരിയാണോ; വ്യക്തമാക്കുമോ;

(സി)	കെട്ടിട നിര്‍മ്മാണത്തിന് നിലവില്‍ കിട്ടിയിരുന്ന ഫ്ലോര്‍ ഏരിയ റേഷ്യോ പുതിയ കെട്ടിടനിര്‍മ്മാണച്ചട്ടം നിലവില്‍ വരുന്നതോടെ ഇല്ലാതാകുമോ; അതിന്റെ ഫലമായി, നിര്‍മ്മിക്കുന്ന കെട്ടിടത്തിന്റെ വിസ്തൃതി കുറയ്ക്കേണ്ടതായി വരുമോ;

(ഡി)	കെട്ടിടങ്ങള്‍ക്ക്ചുറ്റിലും തുറസ്സായ സ്ഥലം (സെറ്റ് ബാക്ക്) കൂട്ടണമെന്ന പുതിയ വ്യവസ്ഥ മൂലം ചെറിയ സ്ഥലത്ത് നിര്‍മ്മാണം നടത്തുന്നവര്‍ക്ക് നഷ്ടസാദ്ധ്യത കൂടുന്നു എന്നുള്ള പരാതി പരിശോധിച്ചിട്ടുണ്ടോ;

(ഇ)	കെട്ടിട നിര്‍മ്മാണത്തിനൊപ്പം മഴവെള്ള സംഭരണിയും സെപ്റ്റി‍ക‍്‍ടാങ്കും മലിനജലം സംഭരിക്കുന്ന ടാങ്കും നിര്‍മ്മിക്കണമെന്നത് നിര്‍ബന്ധമാക്കിയിട്ടുണ്ടോ;

(എഫ്)

പുതുക്കിയ കെട്ടിട നിര്‍മ്മാണചട്ടത്തിന്റെ അടിസ്ഥാനത്തില്‍ കെട്ടിടത്തിന്റെ ഉയരം കണക്കാക്കുന്നതിനുള്ള മാനദണ്ഡം എന്താണെന്ന് വിശദമാക്കുമോ?

ടൂറിസ്റ്റ് ബസ്സുകള്‍ക്ക് പെര്‍മിറ്റില്ലാതെ സര്‍വ്വീസ് നടത്താന്‍ അനുമതി

*140.

ശ്രീ.അബ്ദുല്‍ ഹമീദ് പി.
പ്രൊഫ.ആബിദ് ഹുസൈന്‍ തങ്ങള്‍
ശ്രീ.പാറക്കല്‍ അബ്ദുല്ല
,, പി.ഉബൈദുള്ള : താഴെ കാണുന്ന ചോദ്യങ്ങള്‍ക്ക് ഗതാഗത വകുപ്പ് മന്ത്രി സദയം മറുപടി നല്‍കുമോ:

(എ)	ആഡംബര ടൂറിസ്റ്റ് ബസ്സുകള്‍ക്ക് പെര്‍മിറ്റില്ലാതെ സര്‍വ്വീസ് നടത്താന്‍ അനുമതി നല്‍കാനുള്ള കേന്ദ്ര നീക്കം ശ്രദ്ധയില്‍പ്പെട്ടിട്ടുണ്ടോ;

(ബി)	ഈ നടപടി കെ.എസ്.ആര്‍.ടി.സി.യെ എപ്രകാരം ബാധിക്കുമെന്നാണ് വിലയിരുത്തിയിട്ടുള്ളത്; വിശദമാക്കുമോ;

(സി)	കേന്ദ്ര നീക്കം ഗതാഗത, അനുബന്ധ മേഖലകളെ പ്രതികൂലമായി ബാധിക്കാതിരിക്കാന്‍ എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കുമോ?

ബിരുദ സര്‍ട്ടിഫിക്കറ്റുകള്‍ റദ്ദാക്കിയ നടപടി

*141.

ശ്രീ.വി.ഡി.സതീശന്‍
,, സണ്ണി ജോസഫ്
,, കെ.എസ്.ശബരീനാഥന്‍
,, ഷാഫി പറമ്പില്‍ : താഴെ കാണുന്ന ചോദ്യങ്ങള്‍ക്ക് ഉന്നതവിദ്യാഭ്യാസവും ന്യൂനപക്ഷക്ഷേമവും വഖഫ് ഹജ്ജ് തീര്‍ത്ഥാടനവും വകുപ്പുമന്ത്രി സദയം മറുപടി നല്‍കുമോ:

(എ)	എം.ജി. സര്‍വ്വകലാശാലയിലും കേരള സര്‍വ്വകലാശാലയിലും മാർക്ക് കൂട്ടി നല്‍കിയതിന്റെയും മോഡറേഷന്റെയും അടിസ്ഥാനത്തില്‍ നല്‍കിയ ബിരുദ സര്‍ട്ടിഫിക്കറ്റുകള്‍ റദ്ദ് ചെയ്യുന്നതിന് തീരുമാനിച്ചിട്ടുണ്ടോ;

(ബി)	എങ്കില്‍ ഏതൊക്കെ പരീക്ഷകളുടെ ബിരുദ സര്‍ട്ടിഫിക്കറ്റുകളാണ് ഇപ്രകാരം റദ്ദാക്കുന്നതെന്ന് അറിയിക്കാമോ;

(സി)	ബിരുദ സര്‍ട്ടിഫിക്കറ്റുകള്‍ റദ്ദാക്കുന്ന തീരുമാനമെടുക്കുന്നതിന് മുമ്പ് ചാൻസലറുടെ അംഗീകാരം തേടിയിട്ടുണ്ടോ; ഇല്ലെങ്കില്‍ എന്തുകൊണ്ടെന്ന് അറിയിക്കാമോ;

(ഡി)

നോര്‍ക്ക റൂട്ട്സില്‍ അറ്റസ്റ്റേഷന് സമര്‍പ്പിച്ചിട്ടുള്ള സര്‍ട്ടിഫിക്കറ്റുകളില്‍ റദ്ദാക്കുന്നവ ഉള്‍പ്പെട്ടിട്ടുണ്ടോ എന്ന കാര്യത്തില്‍ സ്പഷ്ടീകരണം ആവശ്യപ്പെട്ട് നോര്‍ക്ക റൂട്ട്സ് എം.ജി. സര്‍വ്വകലാശാലക്കും കേരള സര്‍വ്വകലാശാലക്കും കത്ത് നല്‍കിയിട്ടുണ്ടോ; ഉണ്ടെങ്കില്‍ ബന്ധപ്പെട്ട സര്‍വ്വകലാശാലകള്‍ അതിന് മറുപടി നല്‍കിയിട്ടുണ്ടോ;വിശദമാക്കാമോ?

സ്വാശ്രയ കോളേജുകളുടെ അക്രഡിറ്റേഷന്‍

*142.

ശ്രീ.മോന്‍സ്‌ ജോസഫ്
,, പി.ജെ.ജോസഫ്
,, സി.എഫ്.തോമസ് : താഴെ കാണുന്ന ചോദ്യങ്ങള്‍ക്ക് ഉന്നതവിദ്യാഭ്യാസവും ന്യൂനപക്ഷക്ഷേമവും വഖഫ് ഹജ്ജ് തീര്‍ത്ഥാടനവും വകുപ്പുമന്ത്രി സദയം മറുപടി നല്‍കുമോ:

(എ)	സ്വാശ്രയ കോളേജുകള്‍ക്ക് അക്രഡിറ്റേഷന്‍ നിര്‍ബന്ധമാക്കാന്‍ തീരുമാനിച്ചിട്ടുണ്ടോ; വിശദാംശങ്ങള്‍ വെളിപ്പെടുത്താമോ;

(ബി)	സംസ്ഥാനത്തെ സര്‍വ്വകലാശാലകളില്‍ തുല്യതാ സര്‍ട്ടിഫിക്കറ്റുകള്‍ നിര്‍ത്തലാക്കാന്‍ ആവശ്യമായവിധം സ്പെഷ്യല്‍ റൂള്‍ പരിഷ്കരിക്കുവാന്‍ നടപടി സ്വീകരിക്കുമോ;

(സി)	മറ്റ് സംസ്ഥാനങ്ങളിലേതുപോലെ സംസ്ഥാനത്തെ സര്‍വ്വകലാശാലകളിലും പഞ്ചവത്സര ഡിഗ്രി, പി.ജി കോഴ്സുകളും ഇവയോട് അനുബന്ധിച്ച് ബി.എഡും ആരംഭിക്കുവാന്‍ നടപടി സ്വീകരിക്കുമോ?

വോട്ടര്‍പട്ടിക പുതുക്കുന്ന നടപടി

*143.

ശ്രീ.മഞ്ഞളാംകുഴി അലി
ഡോ.എം. കെ. മുനീര്‍
ശ്രീ.എന്‍. ഷംസുദ്ദീന്‍
,, ടി. വി. ഇബ്രാഹിം : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	വരാനിരിക്കുന്ന പഞ്ചായത്ത്, മുനിസിപ്പല്‍ തെരഞ്ഞെടുപ്പിനുള്ള വോട്ടര്‍ പട്ടിക പുതുക്കാന്‍ ഉദ്ദേശിക്കുന്നുണ്ടോ; വ്യക്തമാക്കുമോ;

(ബി)	വോട്ടര്‍പട്ടിക പുതുക്കുന്നതിനുള്ള നടപടികള്‍ നിലവില്‍ ഏതു ഘട്ടത്തിലാണ് എന്നറിയിക്കാമോ;

(സി)	2019- ലെ ലോക് സഭ തെരഞ്ഞെടുപ്പിന്റെ വോട്ടര്‍പട്ടിക ആധാരമാക്കിയാണോ വോട്ടര്‍ പട്ടിക പുതുക്കുന്നത്; അല്ലെങ്കില്‍ ആയതിന്റെ കാരണം വ്യക്തമാക്കുമോ?

കെ.എസ്.ആര്‍.ടി.സി.യുടെ പുനരുദ്ധാരണ പ്രവര്‍ത്തനങ്ങള്‍

*144.

ശ്രീ.സി.കൃഷ്ണന്‍
,, കാരാട്ട് റസാഖ്
,, രാജു എബ്രഹാം
,, കെ.വി.അബ്ദുള്‍ ഖാദര്‍ : താഴെ കാണുന്ന ചോദ്യങ്ങള്‍ക്ക് ഗതാഗത വകുപ്പ് മന്ത്രി സദയം മറുപടി നല്‍കുമോ:

(എ)	സാമ്പത്തിക പ്രതിസന്ധി നേരിടുന്ന കെ.എസ്.ആര്‍.ടി.സി.യുടെ വരുമാന വര്‍ദ്ധനവിനും കാര്യക്ഷമമായ പ്രവര്‍ത്തനത്തിനും സമഗ്ര പുനരുദ്ധാരണത്തിനുമായി ഷെഡ്യൂളുകള്‍ പുന:ക്രമീകരിക്കുകയും ജീവനക്കാരെ അനുയോജ്യമായ രീതിയില്‍ വിന്യസിക്കുകയും ചെയ്തിട്ടുണ്ടോ; വിശദാംശം നല്‍കാമോ;

(ബി)	കെ.എസ്.ആര്‍.ടി.സി. യുടെ ഇന്ധന ഉപയോഗക്ഷമത ദേശീയ ശരാശരിക്ക് ഒപ്പമെത്തിക്കുന്നതിന് എന്തെല്ലാം പദ്ധതികളാണ് നടപ്പിലാക്കി വരുന്നത്;

(സി)	വര്‍ക്ക് ഷോപ്പുകളുടെ പ്രവര്‍ത്തനം, വാഹന ഉപയോഗനിരക്ക് തുടങ്ങിയവ കാര്യക്ഷമമാക്കുന്നതിന് നടപടി സ്വീകരിച്ചിട്ടുണ്ടോ;

(ഡി)	കെ.എസ്.ആര്‍.ടി.സി. യുടെ പുനരുദ്ധാരണ പ്രവര്‍ത്തനങ്ങളില്‍ ജീവനക്കാരുടെ സജീവ പങ്കാളിത്തം ഉറപ്പു വരുത്തുന്നതിന് സ്വീകരിച്ചിട്ടുള്ള നടപടികള്‍ വിശദമാക്കാമോ?

തദ്ദേശ സ്വയംഭരണ സ്ഥാപനങ്ങളിലെ ഖരമാലിന്യ സംസ്കരണം

*145.

ശ്രീ.റോജി എം. ജോണ്‍
,, വി.ടി.ബല്‍റാം
,, കെ.എസ്.ശബരീനാഥന്‍
,, വി.പി.സജീന്ദ്രന്‍ : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്തെ ഖരമാലിന്യ സംസ്കരണ രംഗത്ത് തദ്ദേശ സ്വയംഭരണ സ്ഥാപനങ്ങള്‍ക്ക് ഉണ്ടായ വീഴ്ചയുടെ പേരില്‍ മലിനീകരണ നിയന്ത്രണ ബോര്‍ഡ് തിരുവനന്തപുരം, തൃശൂര്‍ കോര്‍പ്പറേഷനുകള്‍ക്ക് പിഴ ചുമത്തിയ സാഹചര്യം സര്‍ക്കാര്‍ ഗൗരവമായി പരിഗണിച്ചിട്ടുണ്ടോ;

(ബി)	പ്രസ്തുത തദ്ദേശ സ്വയംഭരണ സ്ഥാപനങ്ങള്‍ക്ക് എന്തൊക്കെ വീഴ്ചകളാണ് ഉണ്ടായതെന്ന് കണ്ടെത്തി തിരുത്തൽ നടപടി സ്വീകരിച്ചോ; വിശദമാക്കാമോ;

(സി)	ജനീവയിലും ബോണിലും പ്രവര്‍ത്തിക്കുന്ന മാലിന്യ സംസ്കരണ സംവിധാനം കേരളത്തിൽ അനുയോജ്യമായ എല്ലാ ജില്ലകളിലും പ്രയോജനപ്പെടുത്തുവാൻ തീരുമാനിച്ചിട്ടുണ്ടോ;

(ഡി)	എങ്കിൽ ഇതിന്റെ അടിസ്ഥാനത്തിൽ ഇതിനകം സ്വീകരിച്ച നടപടികള്‍ വിശദമാക്കാമോ?

പൊതുസ്ഥലങ്ങളിലെ ഫ്ലക്സ് ബോര്‍ഡുകള്‍

*146.

ശ്രീ.ടി.എ.അഹമ്മദ് കബീര്‍
,, പി.ഉബൈദുള്ള
,, എം.ഉമ്മര്‍
,, എന്‍ .എ.നെല്ലിക്കുന്ന് : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	പൊതുസ്ഥലങ്ങളില്‍ അനധികൃതമായി ഫ്ലക്സ് ബോര്‍ഡുകളും കൊടിതോരണങ്ങളും ബാനറുകളും സ്ഥാപിക്കുന്നവര്‍ക്കെതിരെ റവന്യൂ റിക്കവറി നടപടികള്‍ സ്വീകരിക്കണമെന്ന ഹൈക്കോടതി ഉത്തരവിന്റെ പശ്ചാത്തലത്തില്‍ തദ്ദേശ സ്വയംഭരണ സ്ഥാപനങ്ങള്‍ സ്വീകരിച്ച നടപടികള്‍ വിശദീകരിക്കാമോ;

(ബി)	ആയതിന് പരസ്യ നികുതി, പിഴ എന്നിവ ഈടാക്കണമെന്ന ഹൈക്കോടതി വിധി കര്‍ശനമായി നടപ്പാക്കുന്നതിന് തദ്ദേശ സ്വയംഭരണ സ്ഥാപനങ്ങള്‍ സ്വീകരിച്ച നടപടികള്‍ വിശദീകരിക്കാമോ ;

(സി)	ഇത്തരം സ്ഥാപനങ്ങളുടെ ലൈസന്‍സുകള്‍ റദ്ദാക്കുവാന്‍ നടപടി സ്വീകരിച്ചിട്ടുണ്ടോ ; വിശദാംശം നല്‍കാമോ?

പ്രൊഫഷണല്‍ വിദ്യാഭ്യാസ മേഖലയില്‍ കാതലായ മാറ്റങ്ങള്‍

*147.

ശ്രീ.ആര്‍. രാജേഷ്
പ്രൊഫ.കെ.യു. അരുണന്‍
ശ്രീ.പി.ടി.എ. റഹീം
,, ഐ.ബി. സതീഷ് : താഴെ കാണുന്ന ചോദ്യങ്ങള്‍ക്ക് ഉന്നതവിദ്യാഭ്യാസവും ന്യൂനപക്ഷക്ഷേമവും വഖഫ് ഹജ്ജ് തീര്‍ത്ഥാടനവും വകുപ്പുമന്ത്രി സദയം മറുപടി നല്‍കുമോ:

(എ)	പ്രൊഫഷണല്‍ വിദ്യാഭ്യാസ മേഖലയില്‍ കാതലായ മാറ്റങ്ങള്‍ വരുത്തുവാന്‍ ഈ സര്‍ക്കാര്‍ എന്തെല്ലാം നടപടികളാണ് സ്വീകരിക്കാന്‍ ഉദ്ദേശിക്കുന്നത്;

(ബി)	ഈ മേഖലയിലെ അദ്ധ്യാപന രീതിയിലും അദ്ധ്യാപകയോഗ്യതയിലും കോഴ്സുകളുടെ ഘടനയിലും ഉള്ളടക്കത്തിലും സമൂലമായ മാറ്റങ്ങള്‍ വരുത്താന്‍ ഉദ്ദേശിക്കുന്നുണ്ടോ; വിശദാംശം നല്‍കുമോ;

(സി)	എ‍ഞ്ചിനീയറിംഗ് ഒഴികെയുള്ള പ്രൊഫഷണല്‍ കോഴ്സുകളിലേക്കുള്ള പ്രവേശന പരീക്ഷകള്‍ ഓണ്‍‌ലൈന്‍ ആക്കാന്‍ നടപടി സ്വീകരിച്ചിട്ടുണ്ടോ;

(ഡി)	പ്രൊഫഷണല്‍ വിദ്യാര്‍ത്ഥികളെ പങ്കെടുപ്പിച്ച് പ്രൊഫഷണല്‍ വിദ്യാര്‍ത്ഥി സംഗമം സംഘടിപ്പിച്ചിട്ടുണ്ടോ; വിശദാംശം നല്‍കുമോ?

തീരദേശ പരിപാലന നിയമം ലംഘിച്ച് പണിത കെട്ടിടങ്ങള്‍

*148.

ശ്രീ.എന്‍. ഷംസുദ്ദീന്‍
,, ടി. വി. ഇബ്രാഹിം
,, പി.കെ.ബഷീര്‍
,, വി.കെ.ഇബ്രാഹിം കുഞ്ഞ് : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	1991 ലെ തീരദേശ പരിപാലന നിയമം ലംഘിച്ച് പണിത കെട്ടിടങ്ങളുടെ പട്ടിക നല്‍കാൻ സുപ്രീംകോടതി ആവശ്യപ്പെട്ടിട്ടുണ്ടോ എന്നറിയിക്കാമോ;

(ബി)	ഈ കെട്ടിടങ്ങളുടെ പട്ടിക തയ്യാറാക്കിയിട്ടുണ്ടോ;

(സി)	എന്നത്തേക്ക് ഈ പട്ടിക കൈമാറാന്‍ കഴിയുമെന്നാണ് കരുതുന്നത്; വ്യക്തമാക്കാമോ?

തീരദേശ സംരക്ഷണ നിയമലംഘനം

*149.

ശ്രീ.സി.മമ്മൂട്ടി
,, പി.കെ.അബ്ദു റബ്ബ്
,, കെ.എം.ഷാജി
,, എം. സി. കമറുദ്ദീന്‍ : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	തീരദേശ സംരക്ഷണ നിയമം ലംഘിച്ച് മരടില്‍ ഫ്ലാറ്റ് നിര്‍മ്മിച്ച കേസ്സിനോടനുബന്ധിച്ച് സംസ്ഥാനത്തെ ഇത്തരത്തിലുള്ള മുഴുവന്‍ ചട്ടലംഘനങ്ങളുടെയും കണക്കെടുക്കുവാന്‍ സുപ്രീം കോടതി നിര്‍ദ്ദേശിച്ചിരുന്നുവോ;

(ബി)	ഇത്തരം കെട്ടിടങ്ങളുടെ പട്ടിക തയ്യാറാക്കാന്‍ ആരെയാണ് നിയോഗിച്ചതെന്ന് അറിയിക്കാമോ;

(സി)	കഴിഞ്ഞ വര്‍ഷത്തെ കേന്ദ്രസര്‍ക്കാര്‍ വിജ്ഞാപന പ്രകാരമുള്ള കോസ്റ്റല്‍ മാനേജ്‌മെന്റ് പ്ലാന്‍ സര്‍ക്കാര്‍ തയ്യാറാക്കിയിട്ടുണ്ടോ; വിശദാംശം അറിയിക്കുമോ?

ലൈഫ് പദ്ധതിയുടെ പൂര്‍ത്തീകരണം

*150.

ശ്രീ.കെ. ആന്‍സലന്‍
,, രാജു എബ്രഹാം
,, പി.വി. അന്‍വര്‍
,, കെ.ഡി. പ്രസേനന്‍ : താഴെ കാണുന്ന ചോദ്യങ്ങള്‍ക്ക് തദ്ദേശസ്വയംഭരണ വകുപ്പുമന്ത്രി സദയം മറുപടി നല്‍കുമോ:

(എ)	ഭവനരഹിതരില്ലാത്ത കേരളം എന്ന ലക്ഷ്യം പൂര്‍ത്തീകരിക്കുന്നതിന് ആവിഷ്കരിച്ച ലൈഫ് പദ്ധതിയുടെ ഒന്നും രണ്ടും ഘട്ടങ്ങളിലായി പൂര്‍ത്തിയായ ഭവനങ്ങളുടെ കണക്ക് ലഭ്യമാണോ; ഈ സാമ്പത്തികവര്‍ഷാവസാനത്തോടെ എത്ര വീടുകള്‍ കൂടി പൂര്‍ത്തീകരിക്കാനാണ് ലക്ഷ്യമിട്ടിരിക്കുന്നത്;

(ബി)	ഭൂരഹിതരായ ഭവനരഹിതര്‍ക്ക് വേണ്ടിയുള്ള ഫ്ലാറ്റ് നിര്‍മ്മാണത്തിന് തുടക്കം കുറിച്ചിട്ടുണ്ടോ; എങ്കില്‍ എവിടെയെല്ലാമെന്നും അതിന്റെ പുരോഗതിയും അറിയിക്കാമോ;

(സി)	വിവിധ ജില്ലകളിലായി ഭൂരഹിതരായ ഭവനരഹിതര്‍ എത്രയെന്ന് കണക്കാക്കിയിട്ടുണ്ടോ; ഫ്ലാറ്റ് പണിയുന്നതിനുള്ള സ്ഥലം കണ്ടെത്തിയിട്ടുണ്ടോ; ഇവയുടെ നിര്‍മ്മാണം എപ്പോള്‍ പൂര്‍ത്തിയാക്കാനാണ് ലക്ഷ്യമിട്ടിരിക്കുന്നതെന്ന് വ്യക്തമാക്കാമോ?

Website maintained by Information System Section, Kerala Legislative Assembly, Thiruvananthapuram.