കുന്നത്തുനാട് താലൂക്കില്‍ നടന്ന കരുതലും കെെത്താങ്ങും അദാലത്തില്‍ കുന്നത്തുനാട് മണ്ഡലത്തിലെ വിവിധ വില്ലേജുകളില്‍ നിന്നായി എത്ര അപേക്ഷകള്‍ ലഭിച്ചിരുന്നുവെന്ന് വില്ലേജ് തിരിച്ച് കണക്കുകള്‍ ലഭ്യമാക്കാമോ;

ഇതില്‍ എത്ര അപേക്ഷകള്‍ ‍‍‍തീര്‍പ്പാക്കിയിട്ടുണ്ടെന്നും ഇനി എത്ര അപേക്ഷകളില്‍ തീരുമാനമെടുക്കാനുണ്ടെന്നും വില്ലേജ് തിരിച്ചുള്ള കണക്കുകള്‍ ലഭ്യമാക്കാമോ;

അദാലത്തില്‍ ലഭിച്ച അപേക്ഷകളില്‍ ഇനിയും തീരുമാനമെടുക്കാനുള്ളവ എന്നത്തേയ്ക്ക് തീര്‍പ്പാക്കാനാവുമെന്ന് വ്യക്തമാക്കാമോ;

പ്രസ്തുത അപേക്ഷകള്‍ വേഗത്തില്‍ തീര്‍പ്പാക്കാനുള്ള നടപടി സ്വീകരിക്കുമോ; വിശദമാക്കാമോ?

റവന്യു വകുപ്പില്‍ വിവിധ തസ്തികകളില്‍ നിര്‍ബന്ധിത വില്ലേജ് ഓഫീസ് സേവനം നടപ്പിലാക്കാന്‍ തീരുമാനം എടുത്തിട്ടുണ്ടോ; വിശദമാക്കാമോ;

വില്ലേജ് ഓഫീസുകളില്‍ വില്ലേജ് ഓഫീസര്‍ ഉള്‍പ്പെടെയുള്ള വിവിധ തസ്തികകളില്‍ ഒരേ ഓഫീസില്‍ സേവനം അനുഷ്ഠിക്കുന്നതിന് മിനിമം കാലാവധി നിശ്ചയിച്ചിട്ടുണ്ടോ; എങ്കില്‍ പ്രസ്തുത കാലാവധിക്ക് ശേഷവും വിവിധ തസ്തികകളില്‍ ഒരേ ഓഫീസില്‍ ജീവനക്കാര്‍ തുടരുന്നത് ശ്രദ്ധയില്‍പ്പെട്ടിട്ടുണ്ടോയെന്ന് വ്യക്തമാക്കാമോ?

മുൻ സർക്കാരിന്റെ കാലത്ത് ചേലക്കര മണ്ഡലത്തിലെ ഏതെല്ലാം വില്ലേജുകളിലാണ് സ്മാര്‍ട്ട് വില്ലേജ് ഓഫീസ് പദ്ധതിയില്‍ ഉള്‍പ്പെടുത്തി കെട്ടിടം പണി പൂര്‍ത്തീകരിച്ചിട്ടുള്ളത്; വില്ലേജ് ഓഫീസുകളുടെ പേരുവിവരം വ്യക്തമാക്കാമോ;

ഈ സർക്കാരിന്റെ കാലത്ത് മണ്ഡലത്തിലെ ഏതെല്ലാം വില്ലേജ് ഓഫീസ് കെട്ടിടങ്ങളാണ് പ്രസ്തുത പദ്ധതിയില്‍ ഉള്‍പ്പെടുത്തി കെട്ടിടം പണി പൂര്‍ത്തീകരിച്ചത്; പേരുവിവരം വ്യക്തമാക്കാമോ; ഏതിനൊക്കെയാണ് തുക അനുവദിച്ച് കെട്ടിടം പണി ആരംഭിക്കാനുള്ളത്; വിശദാംശം വ്യക്തമാക്കാമോ?

സംസ്ഥാനത്ത് പുതിയ വില്ലേജുകൾ രൂപീകരിക്കുന്നതിനുള്ള മാനദണ്ഡങ്ങൾ എന്തെല്ലാമാണെന്ന് വിശദമാക്കാമോ;

ഈ സർക്കാർ അധികാരത്തിൽ വന്നതിനുശേഷം പുതുതായി എത്ര വില്ലേജുകൾ രൂപീകരിച്ചിട്ടുണ്ട്; ഇനിയും പുതിയ വില്ലേജുകൾ രൂപീകരിക്കാൻ ഉദ്ദേശിക്കുന്നുണ്ടോ; വിശദാംശം ലഭ്യമാക്കാമോ?

മലപ്പുറം ജില്ലയിൽ ഇ.എസ്.ഐ. ആശുപത്രി സ്ഥാപിക്കുന്നതിന് അഞ്ചേക്കർ സ്ഥലം ആവശ്യപ്പെട്ട് ഇൻഷുറൻസ് മെഡിക്കൽ സർവീസസ് ഡയക്ടർ ജില്ലാ കളക്ടറോട് റിപ്പോർട്ട് തേടിയിരുന്നോ; വ്യക്തമാക്കുമോ;

ഇത് സംബന്ധിച്ച് എല്ലാ താലൂക്ക് തഹസിൽദാർമാരോടും റിപ്പോർട്ട് തേടി വിവരം ഇൻഷുറൻസ് മെഡിക്കൽ സർവീസസ് ഡയക്ടർക്ക് നൽകിയിട്ടുണ്ടോയെന്ന് അറിയിക്കാമോ;

ഇതിനായി അനുയോജ്യമായ സ്ഥലം കണ്ടെത്തിയിട്ടുണ്ടോ; മലപ്പുറം ജില്ലയിൽ ഇ.എസ്.ഐ. ആശുപത്രി സ്ഥാപിക്കുന്നതിന് സ്ഥലം അനുവദിക്കുമോയെന്ന് വ്യക്തമാക്കാമോ?

കേരള നെല്‍വയല്‍ തണ്ണീര്‍ത്തട സംരക്ഷണ നിയമ പ്രകാരം ജലസംരക്ഷണത്തിനായി മാറ്റിവെക്കുന്ന ഭൂമിക്ക് ഫീസ്‌ ഈടാക്കേണ്ടതില്ലെന്ന പൊതു നിര്‍ദ്ദേശം ഉണ്ടായിട്ടും അത്തരം ഭൂമിക്ക് ഫീസ്‌ ഈടാക്കി വരുന്നതായ പരാതി ശ്രദ്ധയില്‍പ്പെട്ടിട്ടുണ്ടോ; വിശദമാക്കുമോ;

ഇത്തരം പരാതികള്‍ പരിഹരിക്കുന്നതിന് സ്വീകരിച്ചുവരുന്ന നടപടികള്‍ എന്തൊക്കെയാണെന്ന് വ്യക്തമാക്കുമോ;

ശ്രീ. മഹമൂദ് എം.പി., മാവുള്ള പറമ്പത്ത്, തൂവ്വക്കുന്ന് എന്നയാളില്‍ നിന്നും തെറ്റായി ഈടാക്കിയ തുക തിരിച്ചു നല്‍കാന്‍ റവന്യൂ വകുപ്പിന്റെ 22-12-2023 തീയതിയിലെ REV-P1/156/2022-REV നമ്പര്‍ സര്‍ക്കുലർ പ്രകാരവും 01-01-2024 തീയതിയിലെ REV-P1/156/2022-REV നമ്പര്‍ കത്ത് പ്രകാരവും നിര്‍ദ്ദേശമുണ്ടായിട്ടും ഒരു വര്‍ഷത്തിലധികമായി പ്രസ്തുത തുക നല്‍കാത്തതിന്റെ കാരണം വിശദമാക്കുമോ;

01-01-2024 തീയതിയിലെ REV-P1/156/2022-REV നമ്പര്‍ കത്ത് പ്രകാരം ആവശ്യപ്പെട്ട റിപ്പോര്‍ട്ട് ലഭ്യമായിട്ടുണ്ടോ; ഉണ്ടെങ്കില്‍ ആയതിന്റെ പകര്‍പ്പ് ലഭ്യമാക്കുമോ; ഇല്ലെങ്കില്‍ ഒരു വര്‍ഷവും രണ്ട് മാസവുമായിട്ടും പ്രസ്തുത റിപ്പോര്‍ട്ട് ലഭ്യമാകാത്തതിന്റെ കാരണം വ്യക്തമാക്കുമോ;

പ്രസ്തുത വിഷയവുമായി ബന്ധപ്പെട്ട് ശ്രീ. മഹമൂദ് എം.പി., മാവുള്ള പറമ്പത്ത്, തൂവ്വക്കുന്ന് എന്നയാളുടെ അപേക്ഷയില്‍ സ്വീകരിച്ച നടപടികളുടെ വിശദാംശങ്ങള്‍ ലഭ്യമാക്കുമോ;

പ്രസ്തുത തുക റീഫണ്ട് ചെയ്യുന്നതിന് തടസ്സങ്ങള്‍ നിലവിലുണ്ടോ; ഇല്ലെങ്കില്‍ തുക എപ്പോള്‍ നല്‍കാനാവുമെന്ന് വ്യക്തമാക്കുമോ?

വാമനപുരം മണ്ഡലത്തില്‍നിന്ന് ഭൂമി തരംമാറ്റലിനായി ഇതുവരെ എത്ര അപേക്ഷകള്‍ നേരിട്ടും ഓണ്‍ലൈനായും ലഭിച്ചിട്ടുണ്ടെന്നും അവയില്‍ എത്ര അപേക്ഷകള്‍ ഇതുവരെ തീര്‍പ്പാക്കിയിട്ടുണ്ടെന്നും ഉള്ള വിവരങ്ങൾ വില്ലേജ് തിരിച്ച് വിശദമാക്കാമോ?

സംസ്ഥാനത്ത് ഡിജിറ്റല്‍ സര്‍വ്വേ നടപ്പാക്കുന്നത് വഴി ഭൂമിയുടെ പൂർണ്ണ വിവരങ്ങൾ ഓൺലൈൻ സംവിധാനത്തിലൂടെ ലഭ്യമാക്കുന്നതിന് കഴിയുമോ; വിശദീകരിക്കുമോ;

ഭൂമി സംബന്ധമായ സേവനങ്ങൾ സുതാര്യവും കാര്യക്ഷമവുമാക്കുന്നതിനോടൊപ്പം ഡാറ്റാ പ്രൈവസി ഉറപ്പുവരുത്തുന്നതിനും നടപടി സ്വീകരിച്ചിട്ടുണ്ടോ; വിശദീകരിക്കുമോ;

ഇന്റഗ്രേറ്റഡ് ലാൻഡ് ഇൻഫോർമേഷൻ മാനേജ്മെന്റ് സംവിധാനം നിലവിൽ വരുന്നത് ഭൂരേഖ പരിപാലനം സമഗ്രമാക്കുന്നതിന് സഹായിക്കുമോ; വിശദീകരിക്കുമോ?

സംസ്ഥാനത്ത് എത്ര വില്ലേജ് ഓഫീസുകളില്‍ റീ-സര്‍വ്വെ ജോലി പൂര്‍ത്തീകരിച്ചിട്ടുണ്ട്;

ഇനി എത്ര വില്ലേജ് ഓഫീസുകളില്‍ റീ-സര്‍വ്വെ ജോലി പൂര്‍ത്തീകരിക്കാനുണ്ട്;

സംസ്ഥാനത്തെ മുഴുവന്‍ വില്ലേജ് ഓഫീസുകളിലും റീ-സര്‍വ്വെ പൂര്‍ത്തീകരിക്കുന്നതിന് എന്തെല്ലാം നടപടികളാണ് ഇതിനകം ചെയ്തിട്ടുള്ളത്; ഇത് സംബന്ധിച്ച വിശദാംശം വ്യക്തമാക്കുമോ?

അരൂര്‍ മണ്ഡലത്തിലെ പാേലീസ് സ്റ്റേഷന്‍ നിര്‍മ്മാണവുമായി ബന്ധപ്പെട്ട ഭൂമി കെെമാറ്റ നടപടികളുടെ ഫയൽ നിലവില്‍ ആരുടെ കെെവശമാണെന്നും ആയതിന്റെ ഫയല്‍ നമ്പര്‍ എത്രയാണെന്നും വിശദമാക്കാമാേ?

കണ്ണൂര്‍ എ.ഡി.എം. ആയിരുന്ന നവീന്‍ ബാബുവിന്റെ യാത്രയയപ്പ് ചടങ്ങ് ചിത്രീകരിക്കാൻ കണ്ണൂർ കളക്ടറേറ്റിൽ നിന്നും ക്യാമറാമാനെ ഏർപ്പാടാക്കിയിരുന്നോയെന്ന് വ്യക്തമാക്കാമോ;

നവീന്‍ ബാബുവിന്റെ യാത്രയയപ്പ് പരിപാടി ചിത്രീകരിക്കാന്‍ പി.പി.ദിവ്യ ആവശ്യപ്പെട്ടുവെന്നും ചിത്രീകരിച്ച ദൃശ്യങ്ങള്‍ കൈപ്പറ്റിയെന്നും പ്രാദേശിക ചാനലായ കണ്ണൂര്‍വിഷന്‍ പ്രതിനിധികള്‍ ലാന്‍ഡ് റവന്യൂ ജോയിന്റ് കമ്മീഷണർക്ക് മൊഴിനൽകിയിട്ടുണ്ടോ; വിശദമാക്കുമോ;

റവന്യു വകുപ്പിന്റെ പരിപാടിയിൽ ജില്ലാ പഞ്ചായത്ത് മുൻ പ്രസിഡന്റ് ക്ഷണിക്കാതെ കയറി വന്ന് പരിപാടി ചിത്രീകരിക്കാൻ നടപടി സ്വീകരിച്ചത് നിയമവിരുദ്ധമല്ലേ എന്ന ആക്ഷേപം സംബന്ധിച്ച് വ്യക്തമാക്കുമോ?

കണ്ണൂര്‍ എ.ഡി.എം. ആയിരുന്ന നവീന്‍ ബാബുവിനെ പരസ്യമായി അപമാനിക്കാന്‍ കണ്ണൂര്‍ ജില്ലാ പഞ്ചായത്ത് മുന്‍ അധ്യക്ഷ ആസൂത്രിതമായി നീക്കം നടത്തിയതായി ലാന്‍ഡ് റവന്യൂ ജോയിന്റ് കമ്മിഷണര്‍ മുൻപാകെ മൊഴികള്‍ ലഭിച്ചിട്ടുണ്ടോ; വിശദമാക്കുമോ;

യാത്രയയപ്പ് ചടങ്ങിലേക്ക് കണ്ണൂര്‍ ജില്ലാ പഞ്ചായത്ത് മുന്‍ അധ്യക്ഷ യാദൃച്ഛികമായി വന്നതാണെന്ന വാദങ്ങളെ തള്ളുന്ന എന്തൊക്കെ മൊഴികളാണ് ലാന്‍ഡ് റവന്യൂ ജോയിന്റ് കമ്മിഷണര്‍ മുൻപാകെ ലഭിച്ചതെന്ന് വിശദമാക്കുമോ;

ലാന്‍ഡ് റവന്യൂ ജോയിന്റ് കമ്മിഷണറുടെ റിപ്പോർട്ടിന്റെ അടിസ്ഥാനത്തിൽ നാളിതുവരെ സ്വീകരിച്ച നടപടികൾ അറിയിക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ചാലക്കുടി താലൂക്കില്‍‍ നാളിതുവരെ എത്ര പട്ടയങ്ങള്‍ വിതരണം ചെയ്തിട്ടുണ്ടെന്ന് വില്ലേജ് തിരിച്ചും ഇനം തിരിച്ചും വ്യക്തമാക്കുമോ;

പ്രസ്തുത പട്ടയങ്ങളിൽ 1964 ലെ കേരള ഭൂമി പതിവ് ചട്ടങ്ങള്‍, 1995 ലെ മുനിസിപ്പൽ/കോർപ്പറേഷൻ മേഖലകളിലെ ഭൂമി പതിവ് ചട്ടങ്ങൾ, 1993 ലെ പ്രത്യേക ഭൂമി പതിവ് ചട്ടങ്ങൾ എന്നിവ പ്രകാരം വിതരണം ചെയ്ത പട്ടയങ്ങളുണ്ടോ; എങ്കില്‍ ഗുണഭോക്താക്കളുടെ പേര് സഹിതം വില്ലേജ് തിരിച്ച് ലഭ്യമാക്കുമോ;

പ്രസ്തുത താലൂക്കില്‍‍ പട്ടയത്തിനായുള്ള അപേക്ഷകളില്‍ തീര്‍പ്പാക്കുവാനുള്ളവ എത്രയെന്ന് വില്ലേജ് തിരിച്ചും ഇനം തിരിച്ചും അപേക്ഷകരുടെ പേര് സഹിതം ലഭ്യമാക്കുമോ?

സംസ്ഥാനത്ത് എത്ര ഗ്രൂപ്പ് വില്ലേജുകള്‍ ഉണ്ടെന്ന് ജില്ല തിരിച്ച് വ്യക്തമാക്കാമോ;

ഈ സര്‍ക്കാര്‍ അധികാരത്തില്‍ വന്നതിനുശേഷം എത്ര ഗ്രൂപ്പ് വില്ലേജുകള്‍ വിഭജിച്ചിട്ടുണ്ടെന്നും അതിനുവേണ്ടി ചെലവഴിച്ച തുക എത്രയാണെന്നും ജില്ല തിരിച്ച് വ്യക്തമാക്കാമോ;

എറണാകുളം ജില്ലയില്‍ എത്ര ഗ്രൂപ്പ് വില്ലേജുകള്‍ ഉണ്ടെന്നും എത്രകാലമായി ഇങ്ങനെ തുടരുന്നുവെന്നും വ്യക്തമാക്കാമോ;

പ്രസ്തുത ജില്ലയില്‍ എപ്പോഴെങ്കിലും ഗ്രൂപ്പ് വില്ലേജുകളുടെ വിഭജനം നടന്നിട്ടുണ്ടോയെന്നും ഉണ്ടെങ്കില്‍ എപ്പോഴാണെന്നും ആയതിന് ചെലവായ തുക എത്രയാണെന്നും വ്യക്തമാക്കാമോ;

പ്രസ്തുത ജില്ലയില്‍ നിലവിലുള്ള ഗ്രൂപ്പ് വില്ലേജുകള്‍ വിഭജിക്കാന്‍ എത്ര ചെലവ് വേണ്ടി വരുമെന്നും ഈ തുക കണ്ടെത്താന്‍ എന്തെങ്കിലും നടപടി സ്വീകരിച്ചിട്ടുണ്ടോയെന്നും വ്യക്തമാക്കാമോ?

ഭൂമി തരംമാറ്റലിനായി സംസ്ഥാനത്തെ വിവിധ ആര്‍.ഡി. ഓഫീസുകളിൽ ലഭിച്ച അപേക്ഷകൾ വേഗത്തിൽ തീർപ്പാക്കുന്നതിന് എന്തെല്ലാം നടപടികള്‍ സ്വീകരിക്കുമെന്ന് അറിയിക്കുമോ?

തിരുവിതാംകൂര്‍ സംസ്ഥാനത്തിന്റെ ഭാഗമായിരുന്നതും വടക്കേക്കര വില്ലേജിലെ സര്‍വ്വേ നമ്പര്‍ 18/1-ല്‍ ഉള്‍പ്പെട്ടിരുന്നതും ഇപ്പോള്‍ കുഴുപ്പിള്ളി വില്ലേജില്‍പ്പെട്ടതും വഖഫ് ബോര്‍ഡ് അവകാശ വാദം ഉന്നയിക്കുന്നതുമായ വസ്തുവകകള്‍ അബ്ദുള്‍ സത്താര്‍ ഹാജി മൂസ സേട്ടിന് ലഭ്യമായത് എപ്പോഴാണെന്നും എങ്ങനെയാണെന്നും വിസ്തീര്‍ണ്ണം എത്രയായിരുന്നുവെന്നും വ്യക്തമാക്കാമോ;

കാര്‍ഷികാവശ്യത്തിന് നല്‍കിയ ഈ ഭൂമിയുടെ ഉടമസ്ഥാവകാശം അബ്ദുള്‍ സത്താര്‍ ഹാജി മൂസാ സേട്ടിനോ ടിയാളുടെ അനന്തര അവകാശികള്‍ക്കോ മുഹമ്മദ് സിദ്ദിഖ് സേട്ടിനോ ലഭ്യമായിട്ടുണ്ടോ; എങ്കില്‍ എങ്ങനെയെന്ന് വിശദമാക്കാമോ;

കാര്‍ഷിക ആവശ്യത്തിന് കെെമാറിയ പ്രസ്തുത ഭൂമിയ്ക്ക് പട്ടയം നല്‍കിയിട്ടുണ്ടോ; എങ്കില്‍ എന്നാണെന്നും ആരുടെ പേരിലാണെന്നും വ്യക്തമാക്കാമോ;

കാര്‍ഷിക ആവശ്യത്തിന് കെെമാറിയത് സംബന്ധിച്ച പാട്ടകരാറിന്റെ പകര്‍പ്പ് ലഭ്യമാക്കാമോ; പ്രസ്തുത ഭൂമിയുടെ പോക്കുവരവ് നടത്തിയിട്ടുണ്ടോ; എങ്കില്‍ എന്നാണ് പോക്കുവരവ് നടത്തിയതെന്നും ആരുടെ പേരിലാണ് പോക്കുവരവ് നടത്തിയതെന്നും വ്യക്തമാക്കാമോ;

വഖഫ് ബോര്‍ഡ് അവകാശ വാദമുന്നയിക്കുന്ന മുനമ്പത്തെ ഭൂമിയുടെ യഥാര്‍ത്ഥ കെെവശാവകാശത്തെ സംബന്ധിച്ച് റവന്യൂ വകുപ്പ് പരിശോധനയോ പഠനമോ നടത്തിയിട്ടുണ്ടോ; ഇല്ലെങ്കില്‍ ഈ പ്രദേശത്തെ സര്‍ക്കാര്‍ വക ഭൂമി സംബന്ധിച്ച് പരിശോധന നടത്തുവാന്‍ നടപടി സ്വീകരിക്കുമോ;

ഈ ഭൂമി വഖഫായി എഴുതി നല്‍കുമ്പോള്‍ എത്ര കുടുംബങ്ങള്‍ ഈ ഭൂമിയില്‍ താമസിച്ചിരുന്നെന്നും വഖഫായി എഴുതി നല്‍കിയതിന് ശേഷം നാളിതുവരെ എത്ര കുടുംബങ്ങള്‍ താമസിക്കുന്നെന്നും വ്യക്തമാക്കാമോ; കാര്‍ഷികാവശ്യത്തിന് കെെമാറിയ ഭൂമിയില്‍ നിന്നും കടലെടുത്ത ഭൂമി എത്രയെന്നും കടലെടുത്ത വര്‍ഷം ഏതെന്നും വ്യക്തമാക്കാമോ;

കാര്‍ഷികാവശ്യത്തിന് നല്‍കിയ ഭൂമി കടലെടുത്തതിന് ശേഷം ഈ പ്രദേശത്ത് കടല്‍ പിന്മാറിയതുമൂലം പിന്നീട് രൂപപ്പെട്ട ഭൂമിയുണ്ടോ; പ്രസ്തുത ഭൂമിയുടെ വിസ്തീര്‍ണ്ണം എത്രയാണെന്നും ഉടമസ്ഥാവകാശം ആര്‍ക്കാണെന്നും വ്യക്തമാക്കാമോ; നിലവില്‍ പ്രസ്തുത ഭൂമിയുടെ കെെവശക്കാർ ആരെല്ലാമാണെന്നും അവർക്ക് ആരാണ് എഴുതി നല്‍കിയതെന്നും വിശദമാക്കാമോ?

ഒറ്റപ്പാലം മണ്ഡലത്തിൽ കടമ്പഴിപ്പുറം-II വില്ലേജിനോട് ചേര്‍ന്നുളള 'മൂച്ചിത്തറ-വെട്ടംപറമ്പ്' റോഡ് നവീകരണത്തിന് വില്ലേജിനോട് ചേര്‍ന്ന റവന്യൂ വകുപ്പിന്റെ ഉടമസ്ഥതയിലുള്ള റോഡ് പാട്ടത്തിന് ലഭ്യമാക്കാൻ പാലക്കാട് ജില്ലാ കളക്ടര്‍ ശിപാർശ ചെയ്ത് ലാന്റ് റവന്യൂ കമ്മീഷണര്‍ക്ക് നല്‍കിയ കത്തിന്മേല്‍ എന്ത് നടപടിയാണ് സ്വീകരിച്ചിട്ടുളളത്; വ്യക്തമാക്കുമോ;

പ്രസ്തുത ഭൂമി പാട്ടത്തിന് നല്‍കാന്‍ അനുമതി നല്‍കിയിട്ടുണ്ടോ അതോ നിരസിച്ചോയെന്ന് അറിയിക്കുമോ; സ്വീകരിച്ച നടപടിയെ സംബന്ധിച്ചുള്ള ഉത്തരവിന്റെ പകര്‍പ്പ് ലഭ്യമാക്കാമോ?

ഗാര്‍ഹിക ആവശ്യത്തിനോ കച്ചവട വ്യവസായ ആവശ്യത്തിനോ മണ്ണ് ഖനനം നടത്തുന്നതിന് ലഭ്യമാക്കേണ്ട അനുമതികള്‍ എന്തൊക്കെയെന്ന് അറിയിക്കാമോ;

അനധികൃതമായി മണ്ണെടുക്കുന്ന പരാതി നല്‍കുന്നതിന് അപേക്ഷകന്‍ ഏതാെക്കെ ഓഫീസുകളെയാണ് സമീപിക്കേണ്ടത് എന്നറിയിക്കാമോ; ഇത്തരത്തില്‍ പരാതി ലഭിക്കുന്നപക്ഷം വകുപ്പുതലത്തില്‍ എന്താെക്കെ നടപടികളാണ് സ്വീകരിക്കുന്നതെന്നും പരാതി നല്‍കിയതിനുശേഷവും മണ്ണ് ഖനനം തുടരുന്ന സാഹചര്യത്തില്‍ അപേക്ഷകന് നീതി ലഭിക്കുന്നതിന് എന്തൊക്കെ വഴികളാണ് ഉളളതെന്നും അറിയിക്കാമോ;

മണ്ണ് ഖനനം നടത്തുമ്പോള്‍ അടുത്തുളള വീടുകള്‍ക്കും സ്വത്തിനും തകരാര്‍ ഇല്ലാതെ സംരക്ഷിക്കുന്നതിനായി എന്തെങ്കിലും മാനദണ്ഡങ്ങള്‍ ഉണ്ടോ; വിശദമാക്കാമോ;

വടകര താലൂക്കില്‍ മണ്ണ് ഖനനവുമായി ബന്ധപ്പെട്ട് ലഭിച്ചിട്ടുളള എത്ര അപേക്ഷകളില്‍ തീര്‍പ്പുകല്‍പ്പിക്കാന്‍ ബാക്കിയുണ്ടെന്നും ഈ അപേക്ഷകളില്‍ എന്നാണ് തീര്‍പ്പ് കല്‍പ്പിക്കുകയെന്നും വിശദമാക്കാമോ?

2008-ലെ നെൽവയൽ തണ്ണീർത്തട സംരക്ഷണ നിയമം പ്രകാരം, ജോസഫ് പുതുക്കാട്ടുകാരൻ, പൈപ്പ് ലൈൻ റോഡ്, പാലാരിവട്ടം, കൊച്ചി ടിയാന്റെ വീടിരിക്കുന്ന എറണാകുളം ജില്ലയിലെ കണയന്നൂർ താലൂക്കിലെ ഇടപ്പള്ളി വില്ലേജിലെ സർവ്വേ നമ്പർ 129/15A-8 ൽപ്പെട്ട ഭൂമിയുടെ തരം മാറ്റത്തിനായി സമർപ്പിച്ച അപേക്ഷ (നം.1/2025/2340955)യിന്മേൽ സ്വീകരിച്ച നടപടികൾ വിശദമാക്കാമോ;

പ്രസ്തുത അപേക്ഷ നിലവിൽ ആരുടെ കൈവശമാണെന്നും എത്രയും വേഗം അപേക്ഷയിന്മേൽ തീർപ്പ് കൽപ്പിക്കുന്നതിന് നടപടി സ്വീകരിക്കുമോയെന്നും വ്യക്തമാക്കാമോ;

കണയന്നൂർ താലൂക്കിൽ 2024-25 സാമ്പത്തിക വർഷം എത്ര ഭൂമി തരംമാറ്റ അപേക്ഷകൾ ലഭിച്ചുവെന്നും അതിൽ എത്ര എണ്ണം തീർപ്പ് കൽപിച്ചുവെന്നും വിശദമാക്കാമോ; തീർപ്പ് കൽപ്പിക്കുവാനുള്ള അപേക്ഷകളിൽ സ്വീകരിച്ചുവരുന്ന നടപടികൾ വിശദീകരിക്കാമോ?

സർക്കാർ ഭൂമി പാട്ടത്തിന് നൽകിയ വകയിൽ വിവിധ സ്ഥാപനങ്ങളിൽ നിന്നായി പിരിഞ്ഞുകിട്ടാനുളള തുക ഈടാക്കുന്നതിന് എന്തെല്ലാം നടപടികളാണ് സ്വീകരിച്ചുവരുന്നതെന്ന് വ്യക്തമാക്കുമോ;

പാട്ട വ്യവസ്ഥകൾ ലംഘിച്ചവരിൽ നിന്നും സ്ഥലം ഏറ്റെടുക്കാൻ എന്തെങ്കിലും നടപടി സ്വീകരിക്കാൻ ഉദ്ദേശിക്കുന്നുണ്ടോ; വിശദമാക്കുമോ;

പാട്ടത്തുക കാലാനുസൃതമായി പുതുക്കുന്നതിന് നടപടി സ്വീകരിക്കാൻ ഉദ്ദേശിക്കുന്നുണ്ടോ; എങ്കിൽ എന്നുമുതൽ പുതുക്കാനാണ് ഉദ്ദേശിക്കുന്നതെന്ന് വ്യക്തമാക്കുമോ?

കടുത്തുരുത്തി മിനി സിവിൽ സ്റ്റേഷനിൽ വിവിധ സർക്കാർ ഓഫീസുകൾക്ക് സ്ഥലം അനുവദിക്കുന്നതിനുള്ള നടപടികള്‍ വിശദീകരിക്കാമോ;

സിവിൽ സ്റ്റേഷൻ കമ്മ്യൂണിറ്റി ഹാൾ ഗ്രാമപഞ്ചായത്തിന് കൈമാറുന്നത് സംബന്ധിച്ച് കൈക്കൊണ്ടിരിക്കുന്ന തീരുമാനം വ്യക്തമാക്കാമോ;

കടുത്തുരുത്തി വില്ലേജ് ഓഫീസ് മാറ്റി സ്ഥാപിക്കുന്നത് സംബന്ധിച്ചും സിവിൽ സ്റ്റേഷൻ പൂർണ്ണമായും പ്രവർത്തന സജ്ജമാക്കുന്നത് സംബന്ധിച്ചും അവ്യക്തത നിലനില്‍ക്കുന്നത് പരിഹരിക്കാന്‍ നടപടി സ്വീകരിക്കുമോ;

മിനി സിവില്‍ സ്റ്റേഷനില്‍ എം.എൽ.എ. ഓഫീസ് വാടകയ്ക്ക് പ്രവർത്തിക്കുന്നതിന് ബഹു. റവന്യൂ വകുപ്പ് മന്ത്രി നൽകിയ പ്രത്യേക ഉത്തരവ് നടപ്പാക്കുന്നത് സംബന്ധിച്ചും ഇക്കാര്യത്തില്‍ ജില്ലാകളക്ടറുടെ തീരുമാനം എന്താണെന്നും വിശദീകരിക്കാമോ;

കേന്ദ്രീയ വിദ്യാലയത്തിന്റെ കെട്ടിടം നിർമ്മിക്കാൻ കടുത്തുരുത്തി പോളിടെക്നിക് കോമ്പൗണ്ടിൽ സർക്കാർ നൽകിയ എട്ട് ഏക്കര്‍ സ്ഥലത്തെ നിർമ്മാണ അനുമതിയുടെ തടസ്സം പരിഹരിക്കുന്നതിന് സ്വീകരിച്ച നടപടി വ്യക്തമാക്കാമോ; പഞ്ചായത്ത് വിലയ്ക്ക് വാങ്ങിയ ഭൂമിയില്‍ പൊതു കെട്ടിടം പണിയുന്നതിനുള്ള തടസ്സം വിശദീകരിക്കാമോ;

അഗ്രികൾച്ചറൽ സ്റ്റേറ്റ് ലെവൽ കമ്മിറ്റി പ്രത്യേക അനുമതി നൽകിയ പ്രകാരം കടുത്തുരുത്തി പോളിടെക്നിക് കോമ്പൗണ്ടിലേക്ക് റോഡ് നിർമ്മിക്കുന്നതിനാവശ്യമായ ഭൂമി ഏറ്റെടുക്കുന്നതിന് സ്വീകരിച്ച നടപടികള്‍ വിശദീകരിക്കാമോ?

സംസ്ഥാനത്തെ വില്ലേജ് ഓഫീസുകളില്‍ നിന്ന് നല്‍കിവരുന്ന എല്ലാ സേവനങ്ങള്‍ക്കും ഓണ്‍ലൈന്‍ സംവിധാനം ഏര്‍പ്പെടുത്തിയിട്ടുണ്ടോ; ഇല്ലെങ്കില്‍ എല്ലാ സേവനങ്ങളും ഓണ്‍ലൈന്‍ ആക്കാന്‍ നടപടി സ്വീകരിക്കുമോ; വ്യക്തമാക്കുമോ;

ഓണ്‍ലൈന്‍ വഴി ലഭിക്കുന്ന അപേക്ഷകള്‍ മുന്‍ഗണനാ പ്രകാരമാണോ തീര്‍പ്പ് കല്പിക്കുന്നത്; അല്ലെങ്കില്‍ ആയതിന് നടപടി സ്വീകരിക്കുമോ;

നിലവില്‍ ഓണ്‍ലൈന്‍ സംവിധാനം ഇല്ലാത്ത സേവനങ്ങള്‍ ഏതൊക്കെയെന്ന് വിശദീകരിക്കാമോ; പ്രസ്തുത സേവനങ്ങള്‍ക്കുള്ള അപേക്ഷകള്‍ സമര്‍പ്പിക്കുമ്പോള്‍ കൈപ്പറ്റ് രസീത് നല്‍കുന്നുണ്ടോ; ആയവയ്ക്ക് മുന്‍ഗണനാ പ്രകാരമാണോ തീര്‍പ്പ് കല്പിക്കുന്നത്; വിശദമാക്കാമോ?

ആപ്പാഞ്ചിറ ജംഗ്ഷനിൽ റെയിൽവേയ്ക്കും ബൈപ്പാസിനോടും ചേർന്നുള്ള എക്സൈസ് വകുപ്പ് വക സ്ഥലം അളന്ന് തിട്ടപ്പെടുത്തിയിട്ടുണ്ടോ; വിശദമാക്കാമോ;

കടുത്തുരുത്തി വില്ലേജിൽ ബ്ലോക്ക് നമ്പർ 29 ൽ റിസർവേ നമ്പർ 121/20-ൽ പ്രസ്തുത സ്ഥലം പുറമ്പോക്കായി രേഖപ്പെടുത്തിയിട്ടുണ്ടോ; വിശദമാക്കാമോ;

പ്രസ്തുത സ്ഥലം അളന്ന് തിട്ടപ്പെടുത്തി അതിർത്തിയില്‍ കല്ലുകൾ സ്ഥാപിച്ചിട്ടുണ്ടോ; ആയതിന്റെ സർവ്വേ നമ്പർ വ്യക്തമാക്കാമോ;

റീസർവേ റിക്കോർഡുകളിൽ പ്രസ്തുത സ്ഥലം ഏതുതരത്തിലുള്ള ഭൂമിയായിട്ടാണ് കണക്കാക്കുന്നതെന്ന് വിശദമാക്കാമോ;

സ്ഥലം എത്രയുംവേഗം അളന്ന് തിട്ടപ്പെടുത്തി എക്സൈസ് വകുപ്പിന് കെട്ടിടം പണിയുന്നതിന് കൈമാറാന്‍ നടപടി സ്വീകരിക്കുമോ;

പ്രസ്തുത വില്ലേജില്‍ ബ്ലോക്ക് നമ്പര്‍ 29-ല്‍ റീസര്‍വ്വേ പ്രകാരം സര്‍വ്വേ നമ്പര്‍ 121/19, 121/20, 121/21 എന്നിവ അതിര്‍ത്തി തിരിച്ച് തിട്ടപ്പെടുത്തിയിട്ടുണ്ടോ; പ്രസ്തുത സര്‍വ്വേ നമ്പരുകള്‍ റവന്യൂ രേഖകള്‍ പ്രകാരം വില്ലേജ് രജിസ്റ്റര്‍ 1-ല്‍ പെട്ടതാണോ; അല്ലെങ്കില്‍ ഈ വസ്തു ആരുടെ കൈവശമാണെന്ന് വ്യക്തമാക്കുമോ?

ഭൂമി തരം മാറ്റൽ ഇപ്പോൾ അനുവദിക്കാറുണ്ടോ; എങ്കിൽ വിശദമാക്കാമോ;

കാസർഗോഡ്, കാഞ്ഞങ്ങാട് റവന്യൂ ഡിവിഷൻ ഓഫീസുകളിൽ ഇത്തരത്തിലുള്ള എത്ര അപേക്ഷകൾ ഉണ്ടെന്ന് മണ്ഡലം തിരിച്ച് വ്യക്തമാക്കാമോ;

ഈ അപേക്ഷകൾ എത്രകാലമായി തീരുമാനമാകാതെ കിടക്കുന്നുവെന്നും കാലവിളംബത്തിനുള്ള കാരണമെന്താണെന്നും വ്യക്തമാക്കാമോ?

എറണാകുളം മണ്ഡലത്തിൽ ഇളംകുളം വില്ലേജിലെ ദർശന നഗർ പുനരധിവാസ നടപടിക്രമങ്ങളുടെ നിലവിലെ സ്ഥിതി വിശദമാക്കുമോ?

റവന്യൂ വകുപ്പില്‍ നിന്നും എത്രതരം സര്‍ട്ടിഫിക്കറ്റുകളാണ് ഓണ്‍ലെെനായി വിതരണം ചെയ്തുവരുന്നത്; എത്ര സര്‍ട്ടിഫിക്കറ്റുകളാണ് ഓണ്‍ലെെനായി ഇതുവരെ നല്‍കിയിട്ടുളളത്; വ്യക്തമാക്കാമോ?

കണ്ണൂര്‍ ജില്ലയില്‍ സര്‍ക്കാരിന്റെ അധീനതയിലുള്ള ഭൂമിയുടെ കണക്ക് താലൂക്ക്, വില്ലേജ് തിരിച്ച് പട്ടികപ്പെടുത്തി നല്‍കാമോ;

നിലവില്‍ പ്രസ്തുത ഭൂമിയില്‍ എന്തെങ്കിലും പ്രവൃത്തികള്‍ നടത്തുന്നുണ്ടോ; വിശദാംശം നല്‍കാമോ?

വീടുവെക്കുന്നതിനും മറ്റാവശ്യങ്ങള്‍ക്കും വേണ്ടി ഭൂമി തരംമാറ്റുന്നതിനായി എത്ര അപേക്ഷകള്‍ കോഴിക്കോട് ജില്ലയില്‍ നിലവിലുണ്ടെന്ന് താലൂക്ക് തിരിച്ച് വ്യക്തമാക്കാമോ;

വീടുവെക്കുന്നതിനുളള അപേക്ഷകള്‍ അടിയന്തര പ്രാധാന്യത്തോടെ തീര്‍പ്പാക്കുന്നതിന് എന്തെല്ലാം നടപടികള്‍ സ്വീകരിച്ചിട്ടുണ്ട്;

പത്ത് സെന്റില്‍ കൂടുതല്‍ ഭൂമി കെെവശമുളളതും എന്നാല്‍ മറ്റ് ഭൂമി ഇല്ലാത്തതുമായ വീടില്ലാത്തവര്‍ക്ക് പത്ത് സെന്റിൽ മാത്രം വീട് വെക്കുന്നതിന് അനുവാദം ലഭ്യമാക്കുന്നതിന് നടപടി സ്വീകരിക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം അരുവിക്കര നിയോജകമണ്ഡലത്തില്‍ റവന്യൂ വകുപ്പ് മുഖേന നടപ്പിലാക്കിയ പദ്ധതികളുടെ വിശദാംശം അറിയിക്കാമോ?

ഭൂപരിപാലന രംഗത്ത് നടപ്പാക്കുന്ന പദ്ധതികളും പ്രവര്‍ത്തനങ്ങളും ലോകോത്തര മാതൃകകളായി അംഗീകരിക്കപ്പെടുന്നുണ്ടോ; വിശദമാക്കാമോ;

ഭൂപരിപാലന രംഗത്ത് 'നക്ഷ' പദ്ധതി നടപ്പിലാക്കുവാന്‍ തീരുമാനിച്ചിട്ടുണ്ടോ; വിശദാംശം നല്‍കുമോ;

പ്രസ്തുത പ്രവര്‍ത്തനങ്ങളില്‍ സംസ്ഥാനത്തിന്റെ നേട്ടങ്ങള്‍ പഠിക്കുന്നതിനായി വിവിധ സംസ്ഥാന സംഘങ്ങള്‍ ഇവിടേക്കെത്തുന്നുണ്ടോ; വിശദമാക്കുമോ;

പ്രവര്‍ത്തനങ്ങള്‍ അതിവേഗം പൂര്‍ത്തിയാക്കി സെറ്റില്‍മെന്റ് ആക്റ്റ് നടപ്പിലാക്കുവാന്‍ സര്‍ക്കാര്‍ നടത്തുന്ന പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; വ്യക്തമാക്കുമോ?

ലാൻഡ് റവന്യൂ കമ്മീഷണർ, റവന്യൂ പ്രിൻസിപ്പൽ സെക്രട്ടറി, റവന്യൂ മന്ത്രി എന്നിവർക്ക് അട്ടപ്പാടിയിലെ ആദിവാസികൾ നൽകിയ പരാതിയിൽ ചൂണ്ടിക്കാണിച്ച കാര്യങ്ങള്‍ എന്തെല്ലാമാണെന്ന് അറിയിക്കുമോ;

ഏതെല്ലാം ചാരിറ്റബിൾ സൊസൈറ്റികളുടെയും ഫാമുകളുടെയും പേരിൽ ആദിവാസി ഭൂമി കയ്യേറിയെന്നാണ് പരാതിയില്‍ പരാമര്‍ശിച്ചിട്ടുള്ളത്;

ചാരിറ്റബിൾ സൊസൈറ്റികളുടെയും ഫാമുകളുടെയും പേരിൽ ആധാരം ചമച്ചത് സംബന്ധിച്ച് അന്വേഷണ റിപ്പോർട്ട് ലഭിച്ചിട്ടുണ്ടോ; എങ്കിൽ പകർപ്പ് ലഭ്യമാക്കുമോ?

ഇടുക്കി പരുന്തുംപാറയിൽ സർക്കാർ ഭൂമി കയ്യേറി വൻകിട നിർമ്മാണങ്ങൾ നടത്തിയത് ഗൗരവത്തോടെ കാണുന്നുണ്ടോ; ഈ വിഷയത്തിന്മേൽ എന്തൊക്കെ തുടർനടപടികളാണ് സ്വീകരിച്ചതെന്ന് വിശദമാക്കുമോ;

പ്രസ്തുത കയ്യേറ്റം സംബന്ധിച്ച് റവന്യൂ വകുപ്പ് അന്വേഷണം നടത്തിയിട്ടുണ്ടോ; എങ്കിൽ കണ്ടെത്തലുകള്‍ എന്തൊക്കെയാണ്; റിപ്പോർട്ടിന്റെ പകർപ്പ് ലഭ്യമാക്കുമോ;

സർക്കാർ ഭൂമിയുടെ കയ്യേറ്റം തടയുന്നതിൽ വീഴ്ചവരുത്തിയ ഉദ്യോഗസ്ഥർക്കെതിരെ എന്തൊക്കെ നടപടി സ്വീകരിച്ചിട്ടുണ്ട്; വിശദാംശം നല്‍കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം നെന്മാറ മണ്ഡലത്തില്‍ എത്ര പട്ടയങ്ങളാണ് വിതരണം ചെയ്തിട്ടുളളതെന്ന് വിശദമാക്കുമോ;

പട്ടയങ്ങള്‍ക്കായി ലഭിച്ച അപേക്ഷകളില്‍ ഇനി എത്രയെണ്ണമാണ് തീര്‍പ്പാക്കാനുളളതെന്നും ആയത് എന്ന് തീര്‍പ്പാക്കാന്‍ കഴിയുമെന്നും വിശദമാക്കുമോ?

അഴീക്കോട് മണ്ഡലത്തിലെ പട്ടയത്തിനുള്ള അപേക്ഷകളില്‍ നിലവില്‍ ഏതിലെങ്കിലും തീര്‍പ്പ് കല്‍പ്പിക്കാനുണ്ടോ; വിശദമാക്കാമോ;

പ്രസ്തുത മണ്ഡലത്തിൽ പട്ടയ വിതരണവുമായി ബന്ധപ്പെട്ട് എന്തെങ്കിലും ബുദ്ധിമുട്ടുകൾ നിലനില്‍ക്കുന്നുണ്ടോ; വിശദമാക്കാമോ?

ചാലക്കുടി താലൂക്കിലെ കൊടകര വില്ലേജില്‍ നാടുകുന്ന് പ്രദേശത്ത് ഇരുപത്തിയഞ്ചോളം കുടുംബങ്ങള്‍ക്ക് കൈവശാവകാശം തെളിയിക്കുന്നതിന് പട്ടയരേഖകളോ പകര്‍പ്പോ ആധാരങ്ങളോ ഇല്ലാത്തതിനാല്‍ ബാങ്കുകളില്‍ നിന്നോ ധനകാര്യസ്ഥാപനങ്ങളില്‍ നിന്നോ വായ്പ എടുക്കാനാകാത്ത സാഹചര്യമുള്ളത് ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

നികുതി അടച്ച് കൈവശം വച്ച് അനുഭവിക്കുന്ന ഭൂമിക്ക് പട്ടയ രേഖകളോ പകര്‍പ്പോ കൈവശമില്ലാത്തതിനാല്‍ പ്രതിസന്ധിയിലായ ഈ കുടുംബങ്ങളുടെ പ്രശ്നം പരിഹരിക്കുന്നതിന് എന്തെങ്കിലും നടപടികള്‍ സ്വീകരിച്ചിട്ടുണ്ടോ; ഇല്ലെങ്കില്‍ എന്ത് നടപടികളാണ് സ്വീകരിക്കാന്‍ ഉദ്ദേശിക്കുന്നതെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം കുന്നത്തുനാട് മണ്ഡലത്തിലെ വിവിധ വില്ലേജുകളിലായി പട്ടയത്തിനുവേണ്ടി എത്ര അപേക്ഷകള്‍ ലഭിച്ചിട്ടുണ്ടെന്ന് വില്ലേജ് തിരിച്ചുള്ള കണക്കുകള്‍ ലഭ്യമാക്കുമോ;

ഇതില്‍ എത്ര അപേക്ഷകര്‍ക്ക് പട്ടയം നല്‍കിയെന്നും ഇനി എത്ര അപേക്ഷകളില്‍ പട്ടയം അനുവദിക്കാനുണ്ടെന്നും വില്ലേജ് തിരിച്ചുള്ള കണക്കുകള്‍ നല്‍കാമോ;

അര്‍ഹരായ മുഴുവന്‍ അപേക്ഷകര്‍ക്കും വേഗത്തില്‍ പട്ടയം ലഭ്യമാക്കുന്നതിന് വേണ്ട നടപടി സ്വീകരിക്കുമോ; വിശദമാക്കാമോ?

നെയ്യാറ്റിന്‍കര മണ്ഡലത്തില്‍ 2020-2021 മുതല്‍ 2024-2025 വരെ എത്ര പേര്‍ക്കാണ് പട്ടയം അനുവദിച്ചതെന്ന് വിശദമാക്കാമാേ;

മണ്ഡലത്തില്‍ പട്ടയം നല്‍കിയതിന്റെ വിശദാംശം നഗരസഭ, പഞ്ചായത്ത് എന്നിവ അടിസ്ഥാനത്തില്‍ വ്യക്തമാക്കാമാേ;

മണ്ഡലത്തില്‍ ഇനി എത്ര പേര്‍ക്കാണ് പട്ടയം നല്‍കാനുള്ളതെന്ന് പഞ്ചായത്ത്, നഗരസഭ അടിസ്ഥാനത്തില്‍ വിശദമാക്കാമാേ?

കഴിഞ്ഞ മണ്ഡലതല പട്ടയ അസംബ്ലിയില്‍ പട്ടയം ലഭിക്കാത്ത എത്ര പേരുടെ വിഷയമാണ് ഉയര്‍ന്ന് വന്നിരുന്നതെന്ന് വ്യക്തമാക്കാമോ; അവയിൽ താലൂക്ക്, ജില്ലാ തലത്തില്‍ എത്ര പേരുടെ വിഷയങ്ങള്‍ പരിഹരിച്ച് പട്ടയം വിതരണം ചെയ്തുവെന്ന് അറിയിക്കാമോ;

എത്ര പേരുടെ വിഷയം പട്ടയം ഡാഷ്ബോര്‍ഡില്‍ ഉള്‍പ്പെടുത്തിയിട്ടുണ്ട്; അതില്‍ ഇതുവരെയായി എത്രയെണ്ണം പരിഹരിച്ചു; ബാക്കിയുള്ളവ എപ്പോള്‍ പരിഹരിക്കാന്‍ കഴിയുമെന്ന് വ്യക്തമാക്കാമോ;

മണ്ഡല തലത്തില്‍ രണ്ടാം പട്ടയ അസംബ്ലി ചേരാന്‍ തീരുമാനിച്ചിട്ടുണ്ടോയെന്ന് അറിയിക്കാമോ?

തിരൂർ മണ്ഡലത്തിൽ 2021 മുതൽ നാളിതുവരെ പട്ടയത്തിനായി ലഭിച്ച അപേക്ഷകളുടെ എണ്ണം തദ്ദേശ സ്വയംഭരണ സ്ഥാപനങ്ങൾ തിരിച്ച് ലഭ്യമാക്കാമോ;

പ്രസ്തുത അപേക്ഷകളിൽ പട്ടയം ലഭിച്ച അപേക്ഷകരുടെ എണ്ണം തദ്ദേശ സ്വയംഭരണ സ്ഥാപനം തിരിച്ച് ലഭ്യമാക്കാമോ;

നിലവിൽ തീർപ്പാക്കാനുള്ള അപേക്ഷകൾ ആരുടെയെല്ലാമാണെന്ന വിവരം തദ്ദേശ സ്വയംഭരണ സ്ഥാപനം തിരിച്ച് ലഭ്യമാക്കാമോ;

പട്ടയം നിരസിച്ചവരുടെ വിവരം തദ്ദേശ സ്വയംഭരണ സ്ഥാപനം തിരിച്ച് ലഭ്യമാക്കാമോ;

പ്രസ്തുത അപേക്ഷകളിൽ സർക്കാർ ഭൂമി, ദേവസ്വം ഭൂമി, സ്വകാര്യ ഭൂമി എന്നിവയ്ക്കായി നൽകിയ എത്ര അപേക്ഷകൾ ഉണ്ടെന്നും അപേക്ഷകർ ആരെല്ലാമാണെന്നുമുളള വിവരം തദ്ദേശ സ്വയംഭരണ സ്ഥാപന അടിസ്ഥാനത്തിൽ ലഭ്യമാക്കാമോ?

എറണാകുളം മണ്ഡലത്തിലെ എറണാകുളം, ചിറ്റൂർ വില്ലേജുകളിൽ ഉൾപ്പെടുന്ന ഷൺമുഖപുരം പട്ടയം അനുവദിക്കുന്നതിനുള്ള നടപടിക്രമങ്ങങ്ങളുടെ പുരോഗതി വിശദമാക്കാമോ?

നിയമപ്രശ്നങ്ങളാൽ പട്ടയം അനുവദിക്കാൻ കഴിയാതിരുന്ന കൈവശഭൂമികളിൽ കൈവശക്കാർക്ക് പട്ടയം അനുവദിക്കാനായി രൂപീകരിച്ച സംസ്ഥാന പട്ടയ മിഷന്റെ കീഴിലുള്ള 'ഓൺലൈൻ പട്ടയം ഡാഷ്ബോർഡിൽ' എത്ര കൈവശക്കാരുടെ അപേക്ഷകളുടെ വിവരങ്ങളാണ് ഉൾപ്പെടുത്തിയിരുന്നത്; പ്രസ്തുത അപേക്ഷകരുടെ ജില്ല തിരിച്ചുള്ള കണക്ക് ലഭ്യമാക്കാമോ;

ഡാഷ്ബോര്‍ഡിൽ ഉൾപ്പെടുത്തപ്പെട്ട കേസുകളിൽ പട്ടയം അനുവദിക്കുന്നതിന് എന്തെല്ലാം നടപടികളാണ് സ്വീകരിച്ചത്;

ഡാഷ്ബോർഡിൽ ഉൾപ്പെട്ട കേസുകളിന്മേൽ പട്ടയ മിഷൻ മുഖേന ലഭിച്ച ശിപാർശകളുടെ അടിസ്ഥാനത്തിൽ സർക്കാരിന്റെ സവിശേഷാധികാരം വിനിയോഗിച്ചുകൊണ്ട് എത്ര ഉത്തരവുകൾ/നിർദ്ദേശങ്ങൾ നാളിതുവരെയായി പുറപ്പെടുവിച്ചു; അതു വഴി എത്ര പട്ടയങ്ങൾ അനുവദിച്ചുവെന്ന ജില്ല തിരിച്ചുള്ള കണക്കുകൾ ലഭ്യമാക്കുമോ;

സർക്കാർ ഉത്തരവ്/നിർദ്ദേശം മുഖേനയല്ലാതെ മറ്റു തരത്തിൽ എത്ര കേസുകൾ പരിഹരിച്ചു; അതുവഴി എത്ര പട്ടയങ്ങൾ അനുവദിച്ചു; ഇനിയും പുതിയ കേസുകൾ ഡാഷ്ബോർഡിൽ ഉൾപ്പെടുത്തുന്നതിനായി അനുമതി നൽകുമോയെന്ന് വ്യക്തമാക്കാമോ;

പട്ടയ വിവരശേഖരണത്തിൽ സംസ്ഥാന തലത്തിൽ ലഭിച്ച അപേക്ഷകളുടെ എണ്ണം ജില്ലയും താലൂക്കും തിരിച്ച് ലഭ്യമാക്കുമോ?

പട്ടാമ്പി മണ്ഡലത്തിലെ തദ്ദേശ സ്വയംഭരണ സ്ഥാപനങ്ങളുടെ ഉടമസ്ഥതയിലുള്ള കുളം, റോഡ്‌, ആറ് ഉള്‍പ്പെടെയുള്ള പുറമ്പോക്ക് ഭൂമിയിൽ താമസിക്കുന്നവർക്ക് ചട്ടത്തിൽ ഇളവ് നൽകി പട്ടയം നൽകുന്നതുമായി ബന്ധപ്പെട്ട് റവന്യൂ വകുപ്പ് എന്തെങ്കിലും മാര്‍ഗ്ഗനിര്‍ദ്ദേശങ്ങള്‍ പുറത്തിറക്കിയിട്ടുണ്ടോ; എങ്കിൽ ആയതിന്റെ പകര്‍പ്പ് ലഭ്യമാക്കാമോ;

പ്രസ്തുത മാര്‍ഗ്ഗനിർദ്ദേശങ്ങളുമായി ബന്ധപ്പെട്ട് ജില്ലാതലത്തിൽ സമിതി രൂപീകരിക്കേണ്ടതുണ്ടോ; എങ്കില്‍ ആയതിന്റെ വിവരം ലഭ്യമാക്കാമോ; പാലക്കാട് ജില്ലയില്‍ പ്രസ്തുത സമിതി രൂപീകരിക്കുകയും മേൽ വിഷയത്തിൽ അപേക്ഷകള്‍ സ്വീകരിക്കുകയും ചെയ്തിട്ടുണ്ടോ; വിശദമാക്കാമോ?

ഈ സര്‍ക്കാരിന്റെ കാലത്ത് ഷൊര്‍ണ്ണൂര്‍ മണ്ഡലത്തില്‍ പട്ടയ അസംബ്ലിയില്‍ എത്ര അപേക്ഷകരെ കണ്ടെത്താന്‍ കഴിഞ്ഞിട്ടുണ്ടെന്ന് വിശദമാക്കാമോ;

അപേക്ഷകരില്‍ ഭൂമിയ്ക്ക് രേഖ ഇല്ലാത്ത എത്ര പേര്‍ക്ക് പട്ടയം നല്‍കുവാന്‍ കഴിഞ്ഞിട്ടുണ്ടെന്ന് വിശദമാക്കാമോ?

മുകുന്ദപുരം താലൂക്ക് തൊറവ് വില്ലേജ് ചാക്കോച്ചിറദേശം നിവാസികളുടെ പട്ടയ അപേക്ഷകളുടെ നടപടി ഏത് ഘട്ടത്തിലാണെന്നറിയിക്കാമോ; നടപടികള്‍ പൂര്‍ത്തീകരിച്ച് പട്ടയം നല്‍കുന്നതിനുള്ള അടിയന്തര നടപടി സ്വീകരിക്കുമോ; വ്യക്തമാക്കുമോ?

കോഴിക്കോട് ജില്ലയില്‍ പട്ടയം വിതരണം ചെയ്യുന്നതിനുള്ള നടപടികള്‍ ഏത് ഘട്ടത്തിലാണെന്ന് വിശദമാക്കുമോ;

പേരാമ്പ്ര മണ്ഡലത്തിലെ ചക്കിട്ടപാറ, ചെമ്പനോട, ചങ്ങരോത്ത്, നൊച്ചാട് വില്ലേജുകളിലെ പട്ടയ പ്രശ്നങ്ങള്‍ പരിഹരിക്കുന്നതിന് ഇതുവരെ എന്തൊക്കെ നടപടികള്‍ സ്വീകരിച്ചുവെന്ന് വ്യക്തമാക്കാമോ;

ഈ വില്ലേജുകളില്‍ നിന്നും എത്ര പട്ടയ അപേക്ഷകള്‍ ലഭിച്ചിട്ടുണ്ടെന്ന് വില്ലേജ് അടിസ്ഥാനത്തില്‍ വിശദമാക്കാമോ; പ്രസ്തുത അപേക്ഷകളില്‍ എന്തൊക്കെ നടപടികളാണ് സ്വീകരിച്ചതെന്ന് വിശദമാക്കാമോ;

ഈ സർക്കാർ അധികാരത്തിൽ വന്ന ശേഷം പേരാമ്പ്ര മണ്ഡലത്തില്‍ നൊച്ചാട് വില്ലേജില്‍ കൊടുത്ത പട്ടയത്തിന്റെ വിശദാംശം ലഭ്യമാക്കാമോ?

പെരിന്തല്‍മണ്ണ താലൂക്കിൽ 2016 മുതൽ നാളിതുവരെ വിതരണം ചെയ്ത പട്ടയങ്ങളുടെ വിശദവിവരം വില്ലേജ് അടിസ്ഥാനത്തിൽ അറിയിക്കാമോ;

മങ്കട മണ്ഡലത്തിലെ വിവിധ വില്ലേജുകളില്‍ പെന്‍ഡിംഗിലുള്ള പട്ടയ അപേക്ഷകളുടെ എണ്ണം എത്രയാണ്; ഏതെല്ലാം പ്രദേശങ്ങളിലാണ് പ്രധാനമായും പട്ടയ സംബന്ധമായ പ്രശ്നങ്ങള്‍ നിലനില്‍ക്കുന്നത്; പ്രസ്തുത പട്ടയങ്ങള്‍ വിതരണം ചെയ്യുന്നതിന് എന്തെല്ലാം നടപടികള്‍ സ്വീകരിച്ചിട്ടുണ്ട്; വ്യക്തമാക്കുമോ?

മുന്‍ കാലങ്ങളില്‍നിന്നും വ്യത്യസ്തമായി നദികളിലെ ജലസംഭരണ ശേഷി കുറഞ്ഞ് വരുന്നത് ശ്രദ്ധയില്‍പ്പെട്ടിട്ടുണ്ടോ;

2018, 2019 വര്‍ഷങ്ങളിലുണ്ടായ പ്രളയത്തിനും വെള്ളപ്പൊക്കത്തിനും ശേഷം മണ്ണും മണലും എക്കലും നിറ‍ഞ്ഞ് നദികളുടെ ആഴം കുറയുകയും ചെറിയ മഴയത്തുതന്നെ നിറഞ്ഞ് ഒഴുകുകയും പലപ്പോഴും കര കവിഞ്ഞ് ഒഴുകി വലിയ നാശനഷ്ടങ്ങള്‍ വരുത്തുന്നതും ചെയ്യുന്ന സാഹചര്യത്തില്‍ പുഴകളിലെ മണ്ണും മണലും കര്‍ശനമായ നിയന്ത്രണങ്ങളോടെ മാറ്റുന്നതിനുള്ള അനുമതി ലഭ്യമാക്കുന്നതിന് നടപടി സ്വീകരിക്കുമോ; വ്യക്തമാക്കുമോ?

റവന്യൂ വകുപ്പില്‍ രേഖകള്‍ ഡിജിറ്റലെെസ് ചെയ്യുന്നതിന്റെ പ്രധാന ലക്ഷ്യങ്ങള്‍ എന്തൊക്കെയാണെന്ന് വ്യക്തമാക്കുമോ;

ഡിജിറ്റലെെസേഷന്‍ പ്രവര്‍ത്തനങ്ങള്‍ ഏതൊക്കെ ഘട്ടങ്ങളായാണ് നടപ്പിലാക്കുന്നതെന്ന് അറിയിക്കുമോ;

ഡിജിറ്റലെെസ് ചെയ്ത രേഖകള്‍ എങ്ങനെയാണ് സൂക്ഷിക്കുന്നത്; അവയുടെ സുരക്ഷ ഉറപ്പാക്കുന്ന നടപടികള്‍ എന്തൊക്കെയെന്ന് വിശദമാക്കുമോ;

ഓണ്‍ലെെന്‍ പോര്‍ട്ടലിലൂടെ ലഭ്യമാകുന്ന സേവനങ്ങള്‍ ഏതാെക്കെയാണെന്ന് വ്യക്തമാക്കുമോ;

പ്രസ്തുത പദ്ധതി പൂര്‍ത്തിയാകുന്നതോടെ എന്തൊക്കെ മാറ്റങ്ങളാണുണ്ടാകുന്നതെന്ന് അറിയിക്കുമോ?

2018-ലെ കേരള നെൽവയൽ തണ്ണീർത്തട സംരക്ഷണ നിയമ ഭേദഗതി പ്രകാരം ഭൂമി തരം മാറ്റിയ ഇനത്തിൽ ലഭിച്ച ഫണ്ട് ഉപയോഗിച്ച് എന്തൊക്കെ പ്രവൃത്തികളാണ് നടപ്പിലാക്കിയിട്ടുള്ളതെന്ന് വ്യക്തമാക്കുമോ; ഈ ഫണ്ട് കാർഷിക അഭിവൃദ്ധിയ്ക്കായി ഉപയോഗിക്കണമെന്ന നിർദ്ദേശം ഉണ്ടായിട്ടുണ്ടോ; എങ്കിൽ പ്രസ്തുത നിർദ്ദേശ പ്രകാരം എന്തെല്ലാം പ്രവൃത്തികളാണ് നടപ്പിലാക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

ഭൂമിയുടെ തരംമാറ്റത്തിന് നല്‍കുന്ന അപേക്ഷകള്‍ കൃഷി ഓഫീസറുടെ നേതൃത്വത്തിലുള്ള സമിതി നിരസിക്കുന്ന പക്ഷം അപ്പീല്‍ സ്വീകരിച്ച് തീരുമാനം പുനഃപരിശോധിക്കുന്നതിന് ചുമതലപ്പെട്ട ഉദ്യോഗസ്ഥന്‍ ആരാണെന്നും ഇത്തരം അപേക്ഷകളില്‍ തീരുമാനം എടുക്കുന്നുണ്ടോയെന്നും അറിയിക്കുമോ?

തൃപ്രയാര്‍-കാഞ്ഞാണി-ചാവക്കാട് പാതയിലെ ഏനമാവ് ജംഗ്ഷന്‍ വികസിപ്പിക്കുന്നതിനായി സ്ഥലം ഏറ്റെടുക്കുന്നതിന് സ്വീകരിച്ച നടപടികള്‍ എന്തെല്ലാമെന്ന് വിശദമാക്കാമോ;

പ്രസ്തുത പ്രവൃത്തിക്ക് സ്ഥലം ഏറ്റെടുക്കുന്നത് സംബന്ധിച്ച് റവന്യു(ബി) വകുപ്പ് ഉത്തരവ് പുറപ്പെടുവിച്ചിട്ടുണ്ടോ; ഉണ്ടെങ്കില്‍ പ്രസ്തുത ഉത്തരവിന്റെ പകര്‍പ്പ് ലഭ്യമാക്കാമോ;

സ്ഥലം ഏറ്റെടുക്കല്‍ സംബന്ധിച്ച് തൃശൂര്‍ നിരത്തുകള്‍ വിഭാഗം എക്സിക്യൂട്ടീവ് എഞ്ചിനീയര്‍ ഭരണാനുമതിയും അലൈന്‍മെന്റ് സ്കെച്ചും ലഭ്യമാക്കിയിട്ടുണ്ടോ; വിശദാംശം നല്‍കാമോ;

പ്രസ്തുത പ്രവൃത്തിക്കുള്ള സ്ഥലം ഏറ്റെടുക്കുന്നതിന് ലാന്റ് അക്വിസിഷന്‍ ഓഫീസറെ നിയമിച്ചിട്ടുണ്ടോ; സ്ഥലം ഏറ്റെടുക്കുന്ന നടപടികള്‍ വേഗത്തിലാക്കാന്‍ വേണ്ട നടപടി സ്വീകരിക്കുമോ; വ്യക്തമാക്കുമോ?

ബജറ്റില്‍ 7 കാേടി രൂപ വകയിരുത്തിയിട്ടുള്ളതും വെര്‍ട്ടിക്കല്‍ ക്ലിയറന്‍സില്‍ ഇളവ് ലഭ്യമായിട്ടുള്ളതുമായ വെെപ്പിന്‍ മണ്ഡലത്തിലെ മാലിപ്പുറം പാലത്തിന്റെ നിര്‍മ്മാണത്തിനായി എത്ര സെന്റ് സ്ഥലമാണ് ഏറ്റെടുക്കുന്നതെന്ന് വ്യക്തമാക്കുമോ;

പ്രസ്തുത സ്ഥലമെടുപ്പ് നടപടികളുടെ നിലവിലെ സ്ഥിതി വിശദമാക്കാമാേ?

കോതമംഗലം മണ്ഡലത്തില്‍ പല്ലാരിമംഗലം പഞ്ചായത്തിലെ മണിക്കിണര്‍ പാലത്തിന്റെ അപ്രോച്ച് റോഡിന് ഭൂമി ഏറ്റെടുക്കുന്നതുമായി ബന്ധപ്പെട്ട് ഇതുവരെ സ്വീകരിച്ച നടപടികള്‍ വ്യക്തമാക്കാമോ;

കാലതാമസം ഒഴിവാക്കി ഭൂമി ഏറ്റെടുക്കല്‍ നടപടികള്‍ അടിയന്തരമായി പൂര്‍ത്തീകരിക്കാന്‍ നടപടി സ്വീകരിക്കുമോ; വിശദമാക്കാമോ?

മലപ്പുറം ജില്ലയിലെ കൊണ്ടോട്ടി ബ്ലോക്ക് പഞ്ചായത്ത് തയ്യാറാക്കിയ ആരോഗ്യ ശുചിത്വ പരിപാലന പദ്ധതിക്ക് കണ്ടെത്തിയ ഭൂമി ലഭ്യമാക്കുന്നതുമായി ബന്ധപ്പെട്ട് റവന്യൂ വകുപ്പ് സ്വീകരിച്ച നടപടികള്‍ എന്തെല്ലാമാണെന്ന് വിശദമാക്കാമോ;

മേല്‍ വിഷയവുമായി ബന്ധപ്പെട്ട് ബ്ലോക്ക് പഞ്ചായത്ത് നല്‍കിയ കത്തിന്മേൽ റവന്യൂ വകുപ്പ് സ്വീകരിച്ച നടപടികളുടെ ഫയല്‍ പകര്‍പ്പ് ലഭ്യമാക്കാമോ;

ആരോഗ്യ ശുചിത്വ പരിപാലന പദ്ധതിക്ക് കണ്ടെത്തിയ ഭൂമി പ്രസ്തുത ആവശ്യത്തിന് വിട്ട് നല്‍കുന്നതിനുള്ള നടപടികള്‍ ത്വരിതപ്പെടുത്താമോ; വിശദമാക്കാമോ?

കരമന-വെള്ളറട റോഡ് നിർമ്മാണത്തിനായുള്ള ഭൂമി ഏറ്റെടുക്കൽ നടപടികളുടെ നിലവിലെ സ്ഥിതി അറിയിക്കാമോ; ഭൂമി ഏറ്റെടുക്കലിനായുള്ള തുക അനുവദിക്കുന്നതിന് വകുപ്പ് മുഖേന ആവശ്യപ്പെട്ടിട്ടുണ്ടോ; ആയതിന്റെ നിലവിലെ സ്ഥിതി വിശദമാക്കാമോ?

നിലവിലെ സര്‍ക്കാര്‍ അധികാരത്തില്‍ വന്നതിനുശേഷം വിവിധ പദ്ധതികള്‍ക്കായി എത്ര ഏക്കര്‍ ഭൂമിയാണ് റവന്യു വകുപ്പ് ഏറ്റെടുത്തിരിക്കുന്നത്; വ്യക്തമാക്കുമോ;

ഏറ്റെടുത്ത എത്ര ഏക്കര്‍ ഭൂമി ഇതുവരെ വിവിധ പദ്ധതികള്‍ക്കായി ഉപയോഗിച്ചിട്ടുണ്ടെന്ന് വിശദമാക്കുമോ;

ചില ജില്ലകളിൽ ഏറ്റെടുത്ത ഭൂമി പദ്ധതികൾക്ക് വിനിയോഗിക്കാൻ കഴിയാത്തതിന്റെ കാരണങ്ങൾ വിശദമാക്കാമോ;

നിലവിലെ സര്‍ക്കാര്‍ അധികാരത്തില്‍ വന്നതിനുശേഷം ഭൂരഹിതര്‍ക്ക് വിതരണം ചെയ്യുന്നതിനുവേണ്ടി എത്ര ഏക്കർ ഭൂമിയാണ് കണ്ടെത്തിയതെന്ന് വിശദമാക്കുമോ;

ഇതില്‍ നിന്നും എത്ര ഭൂരഹിതര്‍ക്ക് എത്ര ഭൂമി വീതം നല്‍കിയെന്ന് വ്യക്തമാക്കുമോ?

കണ്ണൂർ വിമാനത്താവള റൺവേ വികസനത്തിനായി സ്ഥലം ഏറ്റെടുക്കൽ വൈകുന്നതിന്റെ കാരണം വിശദമാക്കുമോ;

കീഴല്ലൂർ പഞ്ചായത്തിലെ കാനാട്, കോളിപ്പാലം, നല്ലാണി മേഖലകളിൽ സർക്കാർ വിജ്ഞാപനം ചെയ്ത ഭൂമി ഏറ്റെടുക്കൽ വൈകുന്നത് കാരണം നിരവധിപേര്‍ പ്രതിസന്ധിയിലായ കാര്യം ഗൗരവത്തോടെ കാണുന്നുണ്ടോ;

എങ്കിൽ വർഷങ്ങളായി നിലച്ചിരിക്കുന്ന സ്ഥലമേറ്റെടുക്കലിന് ഭൂമിയുടെ ഉടമകൾക്ക് കൂടി സ്വീകാര്യമായ നഷ്ടപരിഹാര പാക്കേജ് ഏർപ്പെടുത്തല്‍, പുനരധിവാസം ഉറപ്പാക്കല്‍ എന്നീ ആവശ്യങ്ങൾ പരിഗണിക്കാൻ തയ്യാറാകുമോ; വിശദമാക്കുമോ?

പാലക്കാട് ജില്ലയിലെ അതിദരിദ്രരില്‍പ്പെട്ട ഭൂരഹിതരെ കണ്ടെത്തി ഭുമി വിതരണം ചെയ്യുന്നതിന് സ്വീകരിച്ചിട്ടുള്ള നടപടികള്‍ എന്തെല്ലാമാണെന്ന് വിശദമാക്കാമോ;

പ്രസ്തുത ജില്ലയില്‍ നിലവില്‍ അതിദരിദ്രരില്‍പ്പെട്ട എത്ര പേര്‍ക്കാണ് ഭൂമി ലഭ്യമാക്കാന്‍ സാധിച്ചിട്ടുളളതെന്ന വിവരം താലൂക്കടിസ്ഥാനത്തില്‍ ലഭ്യമാക്കുമോ?

അരൂര്‍ മണ്ഡലത്തില്‍ അരൂര്‍ കുടുംബാരാേഗ്യ കേന്ദ്രത്തിനാേട് ചേര്‍ന്ന് കിടക്കുന്ന പുറംപാേക്ക് ഭൂമി ആരാേഗ്യവകുപ്പിന് കെെമാറുന്നതിനുവേണ്ടി നല്‍കിയ അപേക്ഷയില്‍ നാളിതുവരെ സ്വീകരിച്ച നടപടികള്‍ വിശദമാക്കാമാേ;

പ്രസ്തുത ഭൂമി കൈമാറ്റത്തിന് ഏതെങ്കിലും തരത്തിലുള്ള പ്രശ്നങ്ങള്‍ നിലവിലുണ്ടാേയെന്ന് വിശദമാക്കാമാേ?

മുകുന്ദപുരം താലൂക്കിലെ തൃശ്ശൂർ-കലൂർ വില്ലേജുകളില്‍ മലയോര കര്‍ഷകര്‍ക്ക് റബ്ബര്‍ കൃഷിക്കായി വര്‍ഷങ്ങള്‍ക്കുമുമ്പേ അനുവദിച്ചു കിട്ടിയ സ്ഥലം കൈമാറുന്നതിനോ ഭൂമിയുടെ ആര്‍.ഒ.ആര്‍. ചെയ്തു കിട്ടുന്നതിനോ സമീപ വര്‍ഷങ്ങളിലായി സാധിക്കാത്തതുമൂലം കര്‍ഷര്‍ക്കുണ്ടായിട്ടുള്ള വിഷമതകള്‍ ശ്രദ്ധയില്‍പ്പെട്ടിട്ടുണ്ടോ;

പ്രസ്തുത ഭൂമിയില്‍ പട്ടയ നിര്‍ദ്ദേശ പ്രകാരം ഇക്കാലമത്രയും റബ്ബര്‍ കൃഷി ചെയ്ത് പോന്നതും അന്നുമുതല്‍ ഇക്കാലയളവുവരെ കൈവശം വച്ചിട്ടുള്ളതുമായ ഭൂവുടമകള്‍ക്ക് ഭൂമി ക്രയവിക്രയം നടത്തുന്നതിനും ആയതിന്റെ പോക്ക് വരവ് ചെയ്തു കൊടുക്കുന്നതിനും ആവശ്യമായ നടപടികള്‍ സ്വീകരിക്കുമോ; വ്യക്തമാക്കുമോ?

ഒരു പഞ്ചായത്തില്‍ ഒരു കളിസ്ഥലം പദ്ധതി പ്രകാരം ഭരണാനുമതി ലഭിച്ച പുതുക്കാട് മണ്ഡലത്തിൽ പറപ്പൂക്കര ഗ്രാമപഞ്ചായത്തിലെ നന്തിക്കര ജി.വി.എച്ച്.എസ്.എസ്. വക സ്ഥലം കളിക്കളം നിര്‍മ്മാണത്തിനായി ഭൂമി തരം മാറ്റുന്നതിന് നല്‍കിയിട്ടുള്ള അപേക്ഷയില്‍ നടപടികള്‍ ഏത് ഘട്ടത്തിലാണ് എന്നറിയിക്കാമോ;

കായിക വകുപ്പിന്റെ 50 ലക്ഷം രൂപയും മണ്ഡലം ആസ്തി വികസന ഫണ്ടില്‍ നിന്ന് 50 ലക്ഷം രൂപയും ഉള്‍പ്പെടെ 1 കോടി രൂപ ചെലവില്‍ കളിസ്ഥലം നിര്‍മ്മിക്കുന്നതിന് അനുമതി ലഭിച്ചിട്ടുള്ള പ്രസ്തുത ഭൂമി തരം മാറ്റി നല്‍കുന്നതിന് അടിയന്തരമായി അനുമതി നല്‍കുന്നതിന് നടപടി സ്വീകരിക്കുമോ?

ബാലുശ്ശേരി മിനി സിവില്‍ സ്റ്റേഷന്‍ നിര്‍മ്മാണത്തിനായി ബാലുശ്ശേരി പറമ്പിന്‍ മുകളിലുള്ള വ്യവസായ വകുപ്പിന്റെ നിയന്ത്രണത്തിലുള്ള ഭൂമി ഏറ്റെടുക്കുന്ന നടപടി ഇപ്പാേള്‍ ഏതുഘട്ടത്തിലാണെന്ന് അറിയിക്കാമോ;

പ്രസ്തുത ഭൂമി ലഭിക്കാതെ മിനി സിവില്‍ സ്റ്റേഷന്റെ പാര്‍ക്കിംഗ് ഉള്‍പ്പെടെയുള്ള സൗകര്യങ്ങള്‍ ഒരുക്കാന്‍ കഴിയാത്ത സാഹചര്യമാണുള്ളതെന്ന കാര്യം ശ്രദ്ധയില്‍പ്പെട്ടിട്ടുണ്ടാേ;

വ്യവസായ വകുപ്പിന് പ്രസ്തുത ഭൂമിയുടെ കൈവശാവകാശം എപ്രകാരമാണ് ലഭിച്ചിട്ടുള്ളതെന്നും എന്നുമുതലാണ് ലഭിച്ചിട്ടുള്ളതെന്നുമുള്ള വിശദാംശം വകുപ്പില്‍ ലഭ്യമാണോ; ഉണ്ടങ്കില്‍ ആയത് ലഭ്യമാക്കാമാേ?

2003-ല്‍ ദേവികുളം താലൂക്കിലെ കുണ്ടള സാന്റോസ് പട്ടികജാതി കോളനിയിലെ 10 പട്ടികജാതി കുടുംബങ്ങളെ പുനരധിവസിപ്പിക്കുന്നതിന് നടപടി സ്വീകരിച്ചിരുന്നോയെന്ന് അറിയിക്കാമോ; എങ്കില്‍ ഇതുമായി ബന്ധപ്പെട്ട ഉത്തരവ് ലഭ്യമാക്കാമോ;

ഇതില്‍ എത്ര കുടുംബങ്ങള്‍ക്ക് ഭൂമി അനുവദിച്ചിട്ടുണ്ടെന്നും നല്‍കിയ ഭൂമിക്ക് പട്ടയം അനുവദിച്ചിട്ടുണ്ടോയെന്നും അറിയിക്കുമോ;

ഈ വിഷയത്തില്‍ ഇതുവരെ സ്വീകരിച്ച നടപടികള്‍ വിശദമാക്കാമോ?

തൃശൂര്‍ ജില്ലയില്‍ തലപ്പിള്ളി താലൂക്കിലെ വടക്കേക്കളം പ്ലാന്റേഷന്‍ മിച്ചഭൂമി കേസുമായി ബന്ധപ്പെട്ട കോടതി വ്യവഹാരങ്ങള്‍ ഒഴിവാക്കി പ്ലാന്റേഷന്‍ ഭൂമി ഏറ്റെടുക്കുന്ന നടപടികളുടെ നിലവിലെ സ്ഥിതി വ്യക്തമാക്കാമോ?

നിലവിലെ നിയമങ്ങളും ചട്ടങ്ങളും പ്രകാരം മിച്ചഭൂമിയായി പ്രഖ്യാപിച്ച ഭൂമി വിൽക്കാനോ കൈമാറ്റം ചെയ്യാനോ വ്യവസ്ഥയുണ്ടോ;

മിച്ചഭൂമി കേസ് നിലനിൽക്കെ വയനാട് ജില്ലയിലെ രാജഗിരി എസ്‌റ്റേറ്റ് ഇന്ത്യ-യുടെ കൈവശമുണ്ടായിരുന്ന ഭൂമി വിൽപ്പന നടത്തിയതിന് അടിസ്ഥാനമായ ചട്ടങ്ങളും വ്യവസ്ഥകളും ഏതെന്ന് വ്യക്തമാക്കുമോ; പ്രസ്തുത വിൽപ്പന സംബന്ധിച്ച് സർക്കാർ എന്തെങ്കിലും നടപടികള്‍ സ്വീകരിച്ചിട്ടുണ്ടോ; വ്യക്തമാക്കുമോ?

തിരുവമ്പാടി മണ്ഡലത്തിലെ ഈങ്ങാപ്പുഴ വില്ലേ‍ജ് ഓഫീസ് സ്മാർട്ട് വില്ലേജ് ഓഫീസ് ആക്കി മാറ്റുന്നതിന് സ്വീകരിച്ച നടപടികൾ വിശദമാക്കാമോ;

നിർമ്മാണ ഏജൻസി ആരാണെന്നും നിർമ്മാണം എപ്പോൾ ആരംഭിക്കാൻ കഴിയുമെന്നും വ്യക്തമാക്കാമോ?

നെന്മാറ മണ്ഡലത്തിൽ ഏതെല്ലാം സ്മാര്‍ട്ട് വില്ലേജ് ഓഫീസുകളുടെ പ്രവൃത്തികളാണ് നിലവില്‍ നടക്കുന്നതെന്ന് വിശദമാക്കുമോ;

ഉദ്ഘാടനം കഴിഞ്ഞിട്ടും പ്രവൃത്തി തുടങ്ങാത്ത എത്ര വില്ലേജ് ഓഫീസുകളാണ് മണ്ഡലത്തിൽ ഉളളതെന്ന് വിശദമാക്കുമോ;

ഇതില്‍ ഓരോ വില്ലേജ് ഓഫീസിന്റെയും പ്രവൃത്തികള്‍ എന്ന് പൂര്‍ത്തീകരിക്കാന്‍ കഴിയുമെന്ന് വിശദമാക്കുമോ?

കോഴിക്കോട് നോര്‍ത്ത് മണ്ഡലത്തിലെ പുതിയങ്ങാടി വില്ലേജ് ഓഫീസ് കെട്ടിടം നിര്‍മ്മിക്കുന്നതിന് ഭൂമി കണ്ടെത്തിയിട്ടുണ്ടോ; എങ്കില്‍ കെട്ടിടനിര്‍മ്മാണം അടക്കമുള്ള വിഷയങ്ങളില്‍ എന്തെല്ലാം നടപടികളാണ് സ്വീകരിച്ചിട്ടുള്ളത്;

ഇല്ലെങ്കില്‍ സ്ഥലം ലഭ്യമാക്കി പ്രസ്തുത കെട്ടിടം നിര്‍മ്മിക്കാന്‍ നടപടി സ്വീകരിക്കുമോ?

പാലാ മണ്ഡലത്തിലെ മീനച്ചില്‍ വില്ലേജ് ഓഫീസില്‍ മഴക്കാലത്ത് വെള്ളം കയറുന്നത് ശ്രദ്ധയില്‍പ്പെട്ടിട്ടുണ്ടോ; സ്വന്തമായി സ്ഥലമുള്ള പ്രസ്തുത ഓഫീസിന് പുതിയ കെട്ടിടം നിര്‍മ്മിച്ച് ജനങ്ങളുടെ ബുദ്ധിമുട്ട് പരിഹരിക്കുവാന്‍ നടപടി സ്വീകരിക്കുമോ; വിശദമാക്കാമോ?

മഞ്ചേശ്വരം താലൂക്കിൽ കഴിഞ്ഞ അഞ്ച് വർഷത്തിനിടെ അനുവദിച്ച സ്മാർട്ട് വില്ലേജ് ഓഫീസുകളുടെ വിശദവിവരം ലഭ്യമാക്കുമോ;

പ്രസ്തുത പ്രവൃത്തികൾ ഏത് ഏജൻസികൾ മുഖേനയാണ് നടപ്പിലാക്കുന്നതെന്ന് വിശദമാക്കുമോ;

പ്രവൃത്തികളുടെ നിലവിലെ സ്ഥിതി വിശദമാക്കുമോ?

ചേലക്കര മണ്ഡലത്തിലെ ഏതെല്ലാം വില്ലേജ് ഓഫീസുകളിലാണ് വില്ലേജ് ഓഫീസര്‍ തസ്തിക ഒഴിഞ്ഞുകിടക്കുന്നത്;

പ്രസ്തുത തസ്തികകളിലേക്ക് നിയമനം നടത്തുന്നതിന് മുന്തിയ പരിഗണന നല്‍കുമോ; വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം മലമ്പുഴ മണ്ഡലത്തിലെ ഏതെല്ലാം വില്ലേജ് ഓഫീസുകളെയാണ് സ്മാര്‍ട്ട് വില്ലേജ് ഓഫീസുകള്‍ ആക്കുന്നതിന് നടപടി സ്വീകരിച്ചിട്ടുള്ളതെന്ന് വ്യക്തമാക്കാമാേ;

പ്രസ്തുത പ്രവൃത്തിക്ക് അനുവദിച്ച തുക, പ്രവ‍ൃത്തിയുടെ നിലവിലെ സ്ഥിതി എന്നീ വിശദാംശങ്ങള്‍ ലഭ്യമാക്കാമാേ?

സംസ്ഥാനത്ത് വിസ്തൃതികൊണ്ടും ജനസംഖ്യകൊണ്ടും ജോലിഭാരം കൂടുതലുള്ള വില്ലേജുകൾ വിഭജിച്ച് ഭരണസൗകര്യാർത്ഥം പുതിയ വില്ലേജുകൾ രൂപീകരിക്കാൻ തയ്യാറാകുമോ; വിശദമാക്കുമോ;

മലപ്പുറം ജില്ലയിൽ മഞ്ചേരി മുനിസിപ്പാലിറ്റിയിലെ നറുകര വില്ലേജ് വിഭജിക്കാൻ ആവശ്യമായ നടപടി സ്വീകരിക്കുമോയെന്ന് വ്യക്തമാക്കാമോ?

അരുവിക്കര മണ്ഡലത്തിലെ മൂഴി-മെെലം പാലം നിര്‍മ്മാണവുമായി ബന്ധപ്പെട്ട ഭൂമി ഏറ്റെടുക്കല്‍ നടപടിയുടെ നിലവിലെ സ്ഥിതി അറിയിക്കുമാേ; ഭൂമി ഏറ്റെടുക്കല്‍ വേഗത്തിലാക്കുന്നതിന് സ്വീകരിച്ചിട്ടുള്ള നടപടികള്‍ വിശദമാക്കാമോ?

പാറമടകൾ ഉൾപ്പെടെയുളള ജലാശയങ്ങളിൽ അപകടത്തിൽപ്പെട്ട് മരണപ്പെടുന്നവരുടെ എണ്ണം വർദ്ധിച്ച് വരുന്നതായി ശ്രദ്ധയിൽപ്പെട്ടിട്ടുണ്ടോ;

അവയ്ക്ക് ആവശ്യമായ സംരക്ഷണ വേലി കെട്ടണമെന്ന നിർദ്ദേശം പാലിക്കപ്പെടുന്നുണ്ടോയെന്ന് പരിശോധിക്കാറുണ്ടോ; ഇക്കാര്യത്തിൽ അടിയന്തര നടപടി സ്വീകരിക്കുമോ; വ്യക്തമാക്കുമോ?

മലപ്പുറം നഗരസഭയും അതിനോട് ചേർന്നുള്ള ഏറനാട്, പെരിന്തൽമണ്ണ, തിരൂർ താലൂക്കുകളിലെ വില്ലേജുകളും ചേർത്ത് മലപ്പുറം ആസ്ഥാനമായി പുതിയ താലൂക്ക് രൂപീകരിക്കണമെന്ന ആവശ്യം ശ്രദ്ധയിൽപ്പെട്ടിട്ടുണ്ടോ; ഇക്കാര്യത്തിൽ നാളിതുവരെ സ്വീകരിച്ച നടപടികൾ വിശദമാക്കാമോ;

താലൂക്ക് പുനഃസംഘടന സംബന്ധിച്ച പഠന റിപ്പോർട്ട് റവന്യൂ കമ്മീഷണറേറ്റിലെ ജോയിന്റ് കമ്മീഷണറുടെ നേതൃത്വത്തിലുള്ള ടീം സർക്കാരിന് സമർപ്പിച്ചിട്ടുണ്ടോ; അതിന്മേൽ നടപടി സ്വീകരിച്ചിട്ടുണ്ടോ; വിശദമാക്കുമോ;

പ്രസ്തുത റിപ്പോർട്ടിന്റെ അടിസ്ഥാനത്തിൽ താലൂക്കുകളും വില്ലേജുകളും വിഭജിക്കുവാൻ തീരുമാനിച്ചിട്ടുണ്ടോ; വ്യക്തമാക്കുമോ;

മലപ്പുറം ആസ്ഥാനമായി പുതിയ താലൂക്ക് രൂപീകരിക്കുവാൻ സത്വര നടപടി സ്വീകരിക്കുമോയെന്ന് അറിയിക്കാമോ?

ഉദ്യോഗസ്ഥ ഭരണപരിഷ്കാര വകുപ്പിന്റെ 28.04.2018-ലെ ജി.ഒ.(പി)നം.7/2018/പി.&എ.ആര്‍.ഡി. ഉത്തരവ് പ്രകാരം കൊല്ലം ജില്ലയ്ക്ക് കീഴിലുള്ള താലൂക്കുകളില്‍ നിന്ന് 01.01.2019 മുതല്‍ 31.01.2025 വരെ സമാശ്വാസ തൊഴില്‍ ദാന പദ്ധതി പ്രകാരമുള്ള എത്ര അപേക്ഷകൾ ആശ്രിത സര്‍ട്ടിഫിക്കറ്റ് സഹിതം കളക്ടറേറ്റില്‍ സമര്‍പ്പിച്ചിട്ടുണ്ടെന്ന് വ്യക്തമാക്കുമോ;

അപേക്ഷകരുടെ പേരും മേല്‍വിലാസവും വില്ലേജ് തിരിച്ച് ലഭ്യമാക്കുമോ?

കണ്ണൂര്‍ എ.ഡി.എം. ആയിരുന്ന നവീന്‍ ബാബുവിന് പത്തനംതിട്ടയിലേക്ക് സ്ഥലംമാറ്റം ലഭിച്ചതിനെത്തുടര്‍ന്നുള്ള യാത്രയയപ്പ് ചടങ്ങിലേക്ക് കണ്ണൂര്‍ ജില്ലാ പഞ്ചായത്ത് പ്രസിഡന്റ് ആയിരുന്ന പി.പി. ദിവ്യയെ ക്ഷണിച്ചിരുന്നോയെന്ന് വ്യക്തമാക്കുമോ;

പ്രസ്തുത ചടങ്ങില്‍ പി.പി. ദിവ്യ നവീന്‍ ബാബുവിനെതിരെ ഗുരുതര അഴിമതി ആരോപണം ഉന്നയിച്ചശേഷം ആയതിന്റെ വീഡിയോ സാമൂഹ്യ മാധ്യമങ്ങളിൽ പ്രചരിപ്പിച്ച വിഷയം ശ്രദ്ധയിൽപ്പെട്ടിട്ടുണ്ടോ;

പ്രസ്തുത ചടങ്ങിന്റെ വീഡിയോ ചിത്രീകരിച്ചതിനെ റവന്യൂ ഉദ്യോഗസ്ഥരോ കളക്ടറോ തടയാഞ്ഞതിന്റെ കാരണം വിശദമാക്കാമോ; ആയത് വീഴ്ചയല്ലേ എന്ന് പരിശോധിച്ചിട്ടുണ്ടോ; വ്യക്തമാക്കുമോ?

കണ്ണൂര്‍ ജില്ലയിലെ ഏതൊക്കെ വില്ലേജുകളില്‍ ഡിജിറ്റല്‍ സര്‍വ്വേ നടപടികള്‍ പൂര്‍ത്തീകരിച്ചിട്ടുണ്ടെന്ന് വ്യക്തമാക്കാമോ;

പ്രസ്തുത നടപടി ഏതൊക്കെ വില്ലേജുകളില്‍ പുരോഗമിക്കുന്നുവെന്നും, അടുത്തഘട്ടത്തിലേക്ക് തെരഞ്ഞെടുത്തിട്ടുളള വില്ലേജുകള്‍ ഏതൊക്കെയാണെന്നുമുള്ള വിവരം അറിയിക്കാമോ;

കണ്ണൂര്‍ ജില്ലയിലെ ഡിജിറ്റല്‍ സര്‍വ്വേ നടപടികള്‍ എപ്പോള്‍ പൂര്‍ത്തിയാകുമെന്ന് അറിയിക്കാമോ?

കോഴിക്കോട് ജില്ലയിലെ ഏതാെക്കെ വില്ലേജുകളിലാണ് ഡിജിറ്റല്‍ സര്‍വ്വേ പൂര്‍ത്തീകരിച്ചിട്ടുളളതെന്ന് വ്യക്തമാക്കാമോ;

ഡിജിറ്റല്‍ സര്‍വ്വേയില്‍ ഭൂമി കുറവുളളതായി കണ്ടവര്‍ക്ക് പുനഃപരിശോധന നടത്തുന്നതിന് അപേക്ഷ നല്‍കാന്‍ വ്യവസ്ഥയുണ്ടോ;

ഡിജിറ്റല്‍ സര്‍വ്വേയില്‍ അധികമായി കണ്ടെത്തിയ ഭൂമി കെെവശക്കാരന് നല്‍കാന്‍ വ്യവസ്ഥ ചെയ്തിട്ടുണ്ടോ; വിശദമാക്കാമോ;

ഡിജിറ്റല്‍ സര്‍വ്വേ പൂര്‍ത്തീകരിച്ച വില്ലേജുകളില്‍ പൗരന്മാര്‍ക്ക് എന്തൊക്കെ സൗകര്യങ്ങളാണ് പുതുതായി ലഭ്യമാവുക എന്നതു സംബന്ധിച്ച് വിശദീകരിക്കാമോ?

തിരൂർ മണ്ഡലത്തിൽ നിലവിൽ ഡിജിറ്റൽ സർവ്വെ പൂർത്തിയായ വില്ലേജുകൾ ഏതെല്ലാമാണെന്നും ബാക്കിയുള്ള വില്ലേജുകളിൽ എന്നത്തേക്ക് പൂർത്തിയാകുമെന്നും അറിയിക്കാമോ;

ഡിജിറ്റൽ സർവ്വെ പൂർത്തിയാക്കിയ വില്ലേജുകളിൽ അതുമായി ബന്ധപ്പെട്ട് ലഭിച്ചിട്ടുള്ള പരാതികളുടെ എണ്ണം വില്ലേജ് തിരിച്ച് ലഭ്യമാക്കാമോ;

പ്രസ്തുത പരാതികളിൽ ഇനി തീർപ്പാക്കാനുള്ളവയുടെ എണ്ണം വില്ലേജ് തിരിച്ച് ലഭ്യമാക്കാമോ?

റവന്യൂ വകുപ്പ് നടപ്പിലാക്കുന്ന ഡിജിറ്റല്‍ സര്‍വ്വേയുടെ ഭാഗമായി എന്തെല്ലാം സേവനങ്ങളും പദ്ധതികളുമാണ് നടപ്പിലാക്കുന്നതെന്ന് വ്യക്തമാക്കാമോ;

കുന്നത്തുനാട് മണ്ഡലത്തില്‍ ഏതെല്ലാം വില്ലേജുകളിലാണ് ഡിജിറ്റല്‍ സര്‍വ്വേ നടന്നുവരുന്നതെന്ന് വ്യക്തമാക്കാമോ;

ഇതില്‍ എത്ര വില്ലേജുകളില്‍ ഡിജിറ്റല്‍ സര്‍വ്വേ പൂര്‍ത്തിയായി എന്നും പൂര്‍ത്തിയാകാത്ത വില്ലേജുകളില്‍ എന്നത്തേയ്ക്ക് പൂര്‍ത്തീകരിക്കുവാന്‍ കഴിയുമെന്നും വ്യക്തമാക്കാമോ;

കുന്നത്തുനാട് മണ്ഡലത്തിലെ ഡിജിറ്റല്‍ സര്‍വ്വേ നടപടികള്‍ വേഗത്തില്‍ പൂര്‍ത്തീകരിക്കുന്നതിനാവശ്യമായ നടപടി സ്വീകരിക്കുമോ; വിശദമാക്കാമോ?

സംസ്ഥാനത്ത് ഡിജിറ്റല്‍ സര്‍വ്വേ നടപടികൾ പൂര്‍ത്തിയായ വില്ലേജുകളുടെ ജില്ല തിരിച്ചുള്ള കണക്ക് ലഭ്യമാക്കുമോ?

നെന്മാറ മണ്ഡലത്തിലെ ഏതെല്ലാം വില്ലേജുകളിലാണ് ഡിജിറ്റല്‍ സര്‍വ്വെ തുടങ്ങിയിട്ടുള്ളതെന്ന് വ്യക്തമാക്കുമോ;

നിലവില്‍ ഡിജിറ്റല്‍ സര്‍വ്വെയുമായി ബന്ധപ്പെട്ട് നടത്തിയ പ്രവര്‍ത്തനങ്ങള്‍ എന്തെല്ലാമാണെന്നും ആയത് എന്ന് പൂര്‍ത്തീകരിക്കാന്‍ കഴിയുമെന്നും വിശദമാക്കുമോ?

പൂഞ്ഞാർ മണ്ഡലത്തില്‍ ഉള്‍പ്പെടുന്ന വിവിധ വില്ലേജുകളില്‍ നടന്നുവരുന്ന ഡിജിറ്റല്‍ റീസര്‍വ്വെയുടെ നിലവിലെ സ്ഥിതി വിശദമാക്കുമോ?

മണലൂര്‍ മണ്ഡലത്തിലെ റീസര്‍വ്വെ നടപടികള്‍ ഏത് ഘട്ടത്തിലാണെന്ന് വിശദമാക്കാമോ;

പ്രസ്തുത മണ്ഡലത്തിലെ ഏതെല്ലാം വില്ലേജുകളില്‍ റീസര്‍വ്വെ നടപടികള്‍ പൂര്‍ത്തീകരിച്ചെന്ന് അറിയിക്കാമോ;

പ്രസ്തുത മണ്ഡലത്തിൽ നിലവില്‍ ഏതെല്ലാം വില്ലേജുകളില്‍ റീസര്‍വ്വെ നടപടികള്‍ പുരോഗമിക്കുന്നുവെന്നും പ്രസ്തുത സര്‍വ്വെ നടപടികള്‍ എന്നത്തേക്ക് പൂര്‍ത്തീകരിക്കാനാകുമെന്നും വ്യക്തമാക്കാമോ;

പ്രസ്തുത മണ്ഡലത്തിലെ ഏതെല്ലാം വില്ലേജുകളില്‍ റീസര്‍വ്വെ ആരംഭിക്കാനുണ്ടെന്നും മണ്ഡലത്തിലെ മുഴുവന്‍ റീസര്‍വ്വെ നടപടികളും എന്നത്തേക്ക് പൂര്‍ത്തീകരിക്കാനാണ് ലക്ഷ്യമിട്ടിരിക്കുന്നതെന്നും വ്യക്തമാക്കാമോ?

കണ്ണൂര്‍ ജില്ലയില്‍ എത്ര വില്ലേജുകളില്‍ ഡിജിറ്റല്‍ റീസര്‍വ്വേ പൂര്‍ത്തിയായിട്ടുണ്ട്;

പ്രസ്തുത ജില്ലയില്‍ ഇപ്പോള്‍ ഡിജിറ്റല്‍ റീസര്‍വ്വേ നടന്നുകൊണ്ടിരിക്കുന്ന വില്ലേജുകള്‍ ഏതൊക്കെയാണ്;

അടുത്ത ഘട്ടത്തില്‍ കണ്ണൂര്‍ ജില്ലയില്‍ ഡിജിറ്റല്‍ റീസര്‍വ്വേ ചെയ്യാന്‍ ഉദ്ദേശിക്കുന്ന വില്ലേജുകള്‍ ഏതൊക്കെയാണ്; വിശദമാക്കാമോ;

ഡിജിറ്റല്‍ റീസര്‍വ്വേ പൂര്‍ത്തിയായ വില്ലേജുകളിലെ പരാതികള്‍ പരിഹരിക്കുന്നതിന് എന്തൊക്കെ നടപടികളാണ് സര്‍ക്കാര്‍ സ്വീകരിച്ചിട്ടുളളതെന്ന് വിശദമാക്കാമോ?

കാസർഗോഡ് ജില്ലയിൽ ഏതൊക്കെ വില്ലേജുകളിലാണ് റീസർവ്വെ നടപടികൾ പൂർത്തിയായതെന്ന് വ്യക്തമാക്കാമോ;

റീസർവ്വെയിൽ വന്ന അപാകതകൾ പരിഹരിക്കുന്നതിന് കാലതാമസം എടുക്കുന്നുവെന്ന പരാതി ശ്രദ്ധയിൽപ്പെട്ടിട്ടുണ്ടോ; എങ്കിൽ ആയത് പരിഹരിക്കുന്നതിന് സ്വീകരിച്ച നടപടികൾ വിശദമാക്കാമോ?

ഗുരുവായൂർ മണ്ഡലത്തിൽ കടൽ പുറംപോക്കിൽ അൺസർവ്വേ ലാന്റിൽ എത്രപേർ താമസിക്കുന്നുണ്ടെന്ന് വില്ലേജ് അടിസ്ഥാനത്തിൽ വിശദമാക്കാമോ;

പ്രസ്തുത അൺസർവ്വേ ലാന്റിൽ താമസിക്കുന്ന എത്ര പേർ പട്ടയത്തിനായി അപേക്ഷ നൽകിയിട്ടുണ്ടെന്ന് വിശദമാക്കാമോ;

പ്രസ്തുത അൺസർവ്വേ ലാന്റിൽ താമസിക്കുന്നവർക്ക് പട്ടയം നൽകുന്നതിന് ഇതുവരെ സ്വീകരിച്ച നടപടികൾ വിശദമാക്കാമോ;

ഗുരുവായൂർ മണ്ഡലത്തിലെ കടൽ പുറമ്പോക്കിൽ അൺസർവ്വേ ലാന്റിൽ നിന്നും പൊതു ആവശ്യത്തിന് ഭൂമി ലഭിക്കുന്നതിന് തദ്ദേശസ്വയംഭരണ സ്ഥാപനങ്ങളും വിവിധ സർക്കാർ വകുപ്പുകളും അപേക്ഷ സമർപ്പിച്ചിട്ടുണ്ടോ; വിശദമാക്കാമോ?

ഹൗസിംഗ് ബോർഡിന്റെ ഉടമസ്ഥതയിലുള്ള സ്ഥാപനങ്ങളിലെ വാടക ഇനത്തിലും മറ്റ് കൺസൾട്ടൻസി ഇനത്തിലുള്ള തുകകൾ പിരിച്ചെടുക്കാത്തതിനാൽ നഷ്ടം നേരിടുന്നതായ സാഹചര്യമുണ്ടോ; വിശദമാക്കുമോ;

ഹൗസിംഗ് ബോർഡിന്റെ അധീനതയിലുള്ള സ്ഥലങ്ങളിൽ പെട്രോൾ, ഡീസൽ ഔട്ട് ലെറ്റുകൾ തുടങ്ങുന്ന പദ്ധതി നിലവിൽ ഏതുഘട്ടത്തിലാണ്; വ്യക്തമാക്കുമോ;

നിലവിൽ ബോർഡിന്റെ സഞ്ചിത നഷ്ടം എത്രയാണ്; ബോർഡ് ലാഭകരമാക്കുന്നതിന് സ്വീകരിച്ചിരിക്കുന്ന നടപടികളെയും, സ്വീകരിക്കാനുദ്ദേശിക്കുന്ന നടപടികളെയും സംബന്ധിച്ച് വിശദമാക്കുമോ?

ഭവന നിർമ്മാണ ബോർഡിൽ നിന്നും വിരമിച്ച ജീവനക്കാരുടെ പെൻഷൻ കുടിശ്ശിക തീർത്ത് വിതരണം ചെയ്തിട്ടുണ്ടോ; വിശദമാക്കുമോ; ഇല്ലെങ്കിൽ പെൻഷൻ ആനുകൂല്യങ്ങൾ കുടിശ്ശിക തീർത്ത് വിതരണം ചെയ്യുന്നതിന് അടിയന്തര നടപടി സ്വീകരിക്കുമോ; വ്യക്തമാക്കുമോ;

ഭവന നിർമ്മാണ ബോർഡില്‍നിന്നും വിരമിച്ച ജീവനക്കാർക്ക് പെൻഷൻ പരിഷ്കരണം അവസാനമായി നടപ്പാക്കിയത് എന്നാണ്; പതിനൊന്നാം ശമ്പള പരിഷ്കരണത്തിന്റെ ഭാഗമായുള്ള പെൻഷൻ പരിഷ്കരണം ഭവന നിർമ്മാണ ബോർഡിൽ നടപ്പാക്കിയിട്ടുണ്ടോ; ഇല്ലെങ്കിൽ ആയത് നടപ്പാക്കാൻ അടിയന്തര നടപടി സ്വീകരിക്കുമോ; വ്യക്തമാക്കുമോ?