പൊതുവിദ്യാഭ്യാസ സംരക്ഷണ യ‍ജ്ഞത്തിന്റെ ഭാഗമായി ഇരവിപുരം നിയോജകമണ്ഡലത്തിലെ ഏതെല്ലാം വിദ്യാലയങ്ങള്‍ക്കാണ് ഫണ്ട് അനുവദിച്ചിട്ടുള്ളത്; സ്കൂളുകളുടെ പേരു വിവരങ്ങള്‍, അനുവദിച്ച തുക, പ്രവൃത്തികളുടെ നിലവിലെ അവസ്ഥ എന്നിവയുടെ വിശദാംശം ലഭ്യമാക്കാമോ;

പ്രസ്തുത മണ്ഡലത്തിലെ ഏതെല്ലാം സ്കൂളുകളുടെ പ്ലാനും എസ്റ്റിമേറ്റുമാണ് അംഗീകാരത്തിനായി പരിഗണനയിലുള്ളതെന്ന് വ്യക്തമാക്കാമോ?

മണലൂര്‍ മണ്ഡലത്തിലെ ഏതെല്ലം സ്കൂളുകള്‍ക്കാണ് പൊതുവിദ്യാഭ്യാസ സംരക്ഷണ യജ്ഞം പദ്ധതിയില്‍ ഉള്‍പ്പെടുത്തി കെട്ടിടം നിര്‍മ്മിക്കുന്നതെന്ന് അറിയിക്കാമോ;

പ്രസ്തുത പ്രവൃത്തിക്ക് ഓരോ സ്കൂളിനും അനുവദിച്ച തുകയും നിലവിലെ സ്ഥിതിയും വ്യക്തമാക്കാമോ?

പൊതുവിദ്യാഭ്യാസ ഡയറക്ടറേറ്റില്‍ തീര്‍പ്പാക്കാതെ കിടക്കുന്ന ഫയലുകള്‍/അപേക്ഷകള്‍ സമയബന്ധിതമായി തീര്‍പ്പാക്കാന്‍ വിദ്യാഭ്യാസ വകുപ്പ് സ്വീകരിച്ചു വരുന്ന നടപടികള്‍ വ്യക്തമാക്കുമോ;

പ്രസ്തുത ഡയറക്ടറേറ്റില്‍ ഫയലുകള്‍/അപേക്ഷകള്‍ പരമാവധി എത്ര സമയം ഒരു ഉദ്യോഗസ്ഥന്റെ പക്കല്‍ സൂക്ഷിക്കാം എന്നതു സംബന്ധിച്ച് നിബന്ധന ഏര്‍പ്പെടുത്തുവാന്‍ ആലോചിക്കുന്നുണ്ടോ; എങ്കില്‍ വിശദാംശം ലഭ്യമാക്കുമോ;

ഇല്ലിക്കല്‍ വി.വെെ.എല്‍.പി.എസ്. ലെ എല്‍.പി.എസ്.എ. ആയ ശ്രീ.ഷിജു. റ്റി.കെ. യുടെ പലിശ രഹിത ചികിത്സ വായ്പ സംബന്ധിച്ച പൊതുവിദ്യാഭ്യാസ ഡയറക്ടറേറ്റിലെ ഡി.ജി.ഇ./6492/2019-ആര്‍.2 നമ്പര്‍ ഫയലിന്റെ നിലവിലെ അവസ്ഥ വ്യക്തമാക്കുമോ;

പ്രസ്തുത ഫയല്‍ അടിയന്തരമായി തീര്‍പ്പാക്കി ടിയാന് പലിശ രഹിത ചികിത്സാ വായ്പ ലഭ്യമാക്കുവാന്‍ നടപടി സ്വീകരിക്കുമോ; വ്യക്തമാക്കുമോ?

2 ഡോസ് വാക്സിനേഷൻ പൂർത്തീകരിക്കാത്ത അദ്ധ്യാപക-അനദ്ധ്യാപക ജീവനക്കാരുള്ള വിദ്യാലയങ്ങളുടെ എണ്ണം വെളിപ്പെടുത്തുമോ;

ഷിഫ്റ്റ് അടിസ്ഥാനത്തില്‍ വിദ്യാലയങ്ങൾ പ്രവർത്തിക്കുമ്പോൾ ഓരോ ഷിഫ്റ്റിലും എത്തിച്ചേരേണ്ട വിദ്യാർത്ഥികളെ നിര്‍ണ്ണയിക്കുന്നതിനുള്ള മാനദണ്ഡം വിശദമാക്കാമോ;

രക്ഷിതാക്കളുടെ അഭിപ്രായത്തിന്റെ അടിസ്ഥാനത്തിലാണോ വിദ്യാർത്ഥികൾക്ക് ഷിഫ്റ്റ് ഏർപ്പെടുത്തുകയെന്ന് വ്യക്തമാക്കുമോ?

സംസ്ഥാനത്തെ സ്കൂളുകള്‍ തുറക്കുമ്പോള്‍ ഇത്രയും നാള്‍ സ്കൂള്‍ അടഞ്ഞ് കിടന്നതിനാൽ ഉണ്ടായ പരിസര മാലിന്യങ്ങളെ നീക്കം ചെയ്യുന്നതിന് എന്തെല്ലാം നടപടികള്‍ സര്‍ക്കാര്‍ തീരുമാനിച്ചിട്ടുണ്ട് എന്ന് വിശദമാക്കാമോ; ആയതിന് സന്നദ്ധസംഘടനകളോടോ മറ്റ് സര്‍വ്വീസ് സംഘടനകളോടോ ആഹ്വാനം നടത്തിയിട്ടുണ്ടോ;

സ്കൂളുകൾ മാലിന്യമുക്തമാക്കുന്നതിന് ഏതെങ്കിലും സംഘടനകള്‍ സ്വയമേവ മുന്നോട്ട് വന്നിട്ടുണ്ടോ; വിശദീകരണം നല്‍കാമോ?

സ്കൂൾ വിദ്യാർത്ഥികൾക്ക് സ്കൂൾ ഹെൽത്ത് പ്രോഗ്രാമിന്റെ ഭാഗമായി കാഴ്ച പരിശോധന നടത്തി കണ്ണടകൾ നൽകുന്ന സ്കീമിൽ 2016-17 മുതൽ 2019-20 വരെ എത്ര രൂപ വകയിരുത്തിയിരുന്നു എന്ന് വർഷം തിരിച്ച്‌ വ്യക്തമാക്കുമോ;

2016-17 മുതൽ 2019-20 വരെ സംസ്ഥാനത്ത് ഈ സ്കീമിൽ കാഴ്ച പരിമിതിയുള്ള എത്ര കുട്ടികളെ കണ്ടെത്താൻ സാധിച്ചു എന്ന് വർഷം തിരിച്ചു അറിയിക്കുമോ;

ഏജൻസിയെ ഏല്പിച്ചതിലൂടെ സംസ്ഥാനത്ത് കണ്ണട വിതരണത്തിന് കാലതാമസം വന്നത് ശ്രദ്ധയിൽപ്പെട്ടിട്ടുണ്ടോ എന്ന് അറിയിക്കുമോ; ഇത് പരിഹരിക്കുന്നതിനായി ജില്ലാതലത്തിൽ കണ്ണട വിതരണത്തിന് സൗകര്യം ഏർപ്പെടുത്തുമോ എന്ന് വ്യക്തമാക്കുമോ?

മലപ്പുറം ജില്ലയിൽ ഇക്കഴിഞ്ഞ എസ്.എസ്.എൽ.സി. പരീക്ഷയിൽ ഓരോ ഹൈ സ്കൂളുകളിലും എത്ര കുട്ടികൾ പരീക്ഷ എഴുതി; എത്ര കുട്ടികൾ വിജയിച്ചു; എത്ര കുട്ടികൾക്ക് എല്ലാ വിഷയങ്ങളിലും എ പ്ലസ് കിട്ടി എന്ന കണക്കുകൾ ലഭ്യമാക്കുമോ;

പ്രസ്തുത ജില്ലയിലെ ഏതെല്ലാം സ്കൂളുകളിൽ ഏതെല്ലാം ബാച്ചുകൾ ഹയർ സെക്കൻഡറിക്ക് ഉണ്ട് എന്ന് വിശദമാക്കുമോ;

മലപ്പുറം ജില്ലയിലെ സ്കൂളുകളില്‍ ഈ അധ്യായന വർഷം പത്താം ക്ലാസുകളിലേക്ക് പ്രവേശനം നേടിയ വിദ്യാർത്ഥികളുടെ കണക്കുകൾ ലഭ്യമാക്കുമോ?

സംസ്ഥാനത്ത് പ്ലസ് വൺ രണ്ടാംഘട്ട അലോട്ട്മെൻറ് പൂർത്തീകരിച്ചിട്ടുണ്ടോ;

നിലവിലത്തെ സാഹചര്യത്തിൽ 85,000 കുട്ടികൾക്ക് അഡ്മിഷൻ ലഭിച്ചിട്ടില്ല എന്നത് ശ്രദ്ധയില്‍പ്പെട്ടിട്ടുണ്ടോ;

എങ്കിൽ ഈ കുട്ടികൾക്ക് അഡ്മിഷൻ ലഭിക്കുന്നതിന് സർക്കാർ സ്വീകരിച്ച നടപടികൾ വ്യക്തമാക്കാമോ;

സംസ്ഥാനത്തെ പ്ലസ് വണിന് അപേക്ഷിച്ച അർഹരായ എല്ലാ വിദ്യാർത്ഥികൾക്കും സീറ്റ്‌ ലഭ്യമാക്കാൻ സർക്കാരിന് സാധിക്കും എന്ന് കരുതുന്നുണ്ടോ; വിശദമാക്കുമോ?

വടകര, ചോമ്പാൽ, തോടന്നൂർ എ.ഇ.ഒ.മാരുടെ കീഴിൽ വരുന്ന സ്കൂളുകളിൽ നിന്നും പത്താംക്ലാസ് പാസ്സായ വിദ്യാർത്ഥികളിൽ എത്ര പേരാണ് കഴിഞ്ഞ അഞ്ച് അധ്യയന വർഷങ്ങളിൽ ഓപ്പൺ സ്കൂളുകളിൽ അഡ്മിഷൻ നേടിയത് എന്ന് അറിയിക്കുമോ; ഓരോ വര്‍ഷവും അഡ്‌മിഷൻ ലഭിച്ച വിഷയം തിരിച്ചുള്ള കണക്ക് ലഭ്യമാക്കുമോ;

ഓരോ വർഷവും വർദ്ധിച്ചു വരുന്ന വിജയശതമാനത്തിനുസരിച്ച് പ്ലസ് വൺ സീറ്റുകൾ വർദ്ധിക്കാത്തതാണോ വിദ്യാർത്ഥികൾ ഓപ്പൺ സ്ക്കൂളുകളെ ആശ്രയിക്കുന്നതിന് കാരണം എന്ന് വ്യക്തമാക്കുമോ;

എങ്കിൽ പ്ലസ് വൺ സീറ്റുകൾ വർധിപ്പിക്കുന്നതിനായി പുതിയ ബാച്ചുകൾ അനുവദിക്കുന്ന കാര്യം സർക്കാർ പരിഗണനയിൽ ഉണ്ടോ ; വിശദാംശങ്ങൾ നൽകുമോ?

തിരൂരങ്ങാടി നിയോജക മണ്ഡലത്തിലെ കക്കാട് ജി.എം.യു.പി. സ്‌കൂളിന് കെട്ടിടം നിർമ്മിക്കുന്നതിന് കിഫ്‌ബി വഴി ഒരു കോടി രൂപ അനുവദിച്ചിരുന്നോ; വ്യക്തമാക്കുമോ;

പ്രസ്തുത പ്രവൃത്തി പൂർത്തീകരിക്കുന്നതിന് എന്തെങ്കിലും സാങ്കേതിക പ്രശ്നങ്ങളുണ്ടോ; വ്യക്തമാക്കുമോ?

തിരൂര്‍ നിയോജകമണ്ഡലത്തിലെ ഏതൊക്കെ സ്കൂളുകള്‍ക്കാണ് പൊതുവിദ്യാഭ്യാസ സംരക്ഷണത്തിന്റെ ഭാഗമായി കെട്ടിടം നിര്‍മ്മിക്കുന്നതിന് കിഫ്ബി അംഗീകാരം നല‍കിയതെന്ന് വ്യക്തമാക്കുമോ;

കെട്ടിടം നിര്‍മ്മിക്കുന്നതിനായി ഓരോ സ്കൂളിനും കിഫ്ബി അംഗീകാരം നല്‍കിയത് എന്നാണെന്നും എത്ര തുക വീതമാണെന്നും വ്യക്തമാക്കുമോ;

ഏതൊക്കെ സ്കൂളുകളിലെ നിര്‍മ്മാണങ്ങള്‍ പൂര്‍ത്തീകരിച്ചുവെന്നും പൂര്‍ത്തിയാക്കാനുള്ളത് ഏതെല്ലാമെന്നും പ്രവൃത്തികള്‍ നിലവില്‍ ഏത് ഘട്ടത്തിലാണെന്നും പ്രവൃത്തികള്‍ എറ്റെടുത്ത് നടത്താന്‍ ഏത് ഏജന്‍സിയെയാണ് ചുമതലപ്പെടുത്തിയതെന്നും വിശദമാക്കുമോ;

കിഫ്ബി ഫണ്ട് അനുവദിച്ച് നാളുകളായിട്ടും പ്രവൃത്തിചെയ്യുന്നതിന് പ്രാരംഭനടപടികള്‍ പോലും ആരംഭിക്കാത്തത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത പ്രവൃത്തികളുടെ പുരോഗതി വിലയിരുത്തുന്നതിനും നടപടികള്‍ സ്വീകരിക്കുന്നതിനും ഏതെങ്കിലും ഉദ്യോഗസ്ഥരെ ചുമതലപ്പെടുത്തിയിട്ടുണ്ടോ; എങ്കില്‍ ബന്ധപ്പെട്ട ഉദ്യോഗസ്ഥര്‍ സ്വീകരിച്ച നടപടികള്‍ എന്തൊക്കെയാണെന്ന് വിശദമാക്കുമോ;

സമയബന്ധിതമായി പൂര്‍ത്തിയാക്കേണ്ട പ്രസ്തുത പദ്ധതികള്‍ ആരംഭിക്കുന്നതിനും പൂര്‍ത്തിയാക്കുന്നതിനും അനിശ്ചിതമായി കാലതാമസം വരുത്തുന്നത് ഗുരുതരമായ വീഴ്ചയാണെന്നത് ശ്രദ്ധയില്‍പ്പെട്ടിട്ടുണ്ടോ; ഇതു സംബന്ധിച്ച് സ്വീകരിക്കാന്‍ ഉദ്ദേശിക്കുന്ന നടപടികള്‍ എന്തൊക്കെയെന്ന് വ്യക്തമാക്കുമോ?

തിരൂരങ്ങാടി മണ്ഡലത്തിൽ സ്കൂൾ കെട്ടിട നിർമ്മാണത്തിന് കിഫ്ബി വഴി ഏതെല്ലാം സ്കൂളുകൾക്ക് എത്ര രൂപ വീതം അനുവദിച്ചുവെന്ന് വ്യക്തമാക്കുമോ;

പ്രസ്തുത കെട്ടിട നിർമ്മാണത്തിന്റെ പുരോഗതി വിശദമാക്കുമോ?

ഗുരുവായൂര്‍ നിയോജക മണ്ഡലത്തില്‍ ഏതൊക്കെ സ്കൂളുകളില്‍ നീന്തല്‍കുളം സജ്ജീകരിച്ചിട്ടുണ്ടെന്ന് വ്യക്തമാക്കാമോ;

നീന്തല്‍ പരിശീലനത്തിനായി വിദ്യാഭ്യാസ വകുപ്പ് നടപ്പിലാക്കുന്ന പദ്ധതികള്‍ സംബന്ധിച്ച് വിശദവിവരങ്ങള്‍ ലഭ്യമാക്കാമോ;

ഗുരുവായൂര്‍ നിയോജക മണ്ഡലത്തില്‍ ഏതൊക്കെ സ്കൂളുകളില്‍ കുളങ്ങള്‍ ഉണ്ടെന്നും ആയത് നീന്തല്‍ കുളമാക്കുന്നതിന് സ്വീകരിച്ചിട്ടുള്ള നടപടികളും വിശദീകരിക്കാമോ;

ഒരു സ്കൂളില്‍ ഒരു നീന്തല്‍കുളം പദ്ധതി സംബന്ധിച്ച് വിശദാംശങ്ങള്‍ ലഭ്യമാക്കാമോ?

പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി മഞ്ചേശ്വരം മണ്ഡലത്തിലെ ഏതെല്ലാം വിദ്യാലയങ്ങളിലാണ് കെട്ടിടമുൾപ്പെടെയുള്ള പ്രവൃത്തികൾ നടപ്പിലാക്കിവരുന്നതെന്ന് വ്യക്തമാക്കുമോ; ഓരോ വിദ്യാലയത്തിനും വകയിരുത്തിയ തുക എത്രയാണെന്ന് വിശദമാക്കുമോ;

പ്രസ്തുത വിദ്യാലയങ്ങളിലെ പ്രവൃത്തികൾ നിലവിൽ ഏത് ഘട്ടത്തിലാണെന്ന് വിശദമാക്കുമോ; ഓരോ പ്രവൃത്തിയുടെയും നിർവ്വഹണ ഏജൻസിയുടെ വിവരങ്ങൾ ലഭ്യമാക്കുമോ;

മേല്‍പ്പറഞ്ഞവയില്‍ ഏതൊക്കെ പ്രവൃത്തികളാണ് പൂർത്തീകരിച്ചിട്ടുള്ളതെന്ന് വിശദമാക്കുമോ;

ടെണ്ടർ നടപടികൾ പൂർത്തീകരിക്കാത്ത പ്രവൃത്തികളുടെ വിശദവിവരങ്ങൾ ലഭ്യമാക്കുമോ; ടെണ്ടർ നടപടി പൂർത്തീകരിച്ച് പ്രവൃത്തി എപ്പോൾ തുടങ്ങുമെന്ന് വ്യക്തമാക്കാമോ?

കാഞ്ഞങ്ങാട് മണ്ഡലത്തിലെ ഗവണ്‍മെന്റ് എച്ച്.എസ്.എസ്. പരപ്പ, ഡോ. അംബേദ്‌കർ മെമ്മോറിയൽ ഗവണ്‍മെന്റ് എച്ച്.എസ്. കോടോത്ത് എന്നീ സ്കൂളുകളുടെ കെട്ടിടനിർമ്മാണത്തിന് ഭരണാനുമതി ലഭ്യമായതിന്റെ വിശദാംശങ്ങൾ നൽകാമോ;

പ്രസ്തുത കെട്ടിടങ്ങളുടെ നിർമ്മാണത്തിന്റെ നിർവഹണ ഏജൻസി ആരെന്ന് വ്യക്തമാക്കാമോ;

പ്രസ്തുത കെട്ടിടങ്ങളുടെ നിർമ്മാണം എപ്പോള്‍ ആരംഭിക്കാൻ കഴിയുമെന്ന് വ്യക്തമാക്കാമോ?

നെന്മാറ നിയോജകമണ്ഡലത്തിലെ ഏതെല്ലാം സ്കൂളുകളുടെ നിര്‍മ്മാണപ്രവൃത്തികള്‍ക്കാണ് സര്‍ക്കാര്‍ ഫണ്ട് അനുവദിച്ചിട്ടുളളതെന്ന് വിശദമാക്കുമോ;

ഇതില്‍ ഓരോ പദ്ധതിക്കും എത്ര തുക വീതമാണ് അനുവദിച്ചിട്ടുളളതെന്നും ഓരോ പദ്ധതിയുടെയും നിലവിലെ പുരോഗതി സംബന്ധിച്ച വിശദാംശങ്ങളും വ്യക്തമാക്കുമോ?

കിഫ്ബിയില്‍ ഉള്‍പ്പെടുത്തി ഒരു കോടി രൂപയുടെ അംഗീകാരം ലഭിച്ച മാവേലിക്കര മണ്ഡലത്തിലെ സ്കൂളുകളിലെ നിര്‍മ്മാണ പ്രവൃത്തികളുടെ വിശദവിവരം ലഭ്യമാക്കുമോ?

കുന്ദമംഗലം നിയോജകമണ്ഡലത്തില്‍ കിഫ്ബിയില്‍ ഉള്‍പ്പെടുത്തി ഒരു കോടി രൂപ വീതം അനുവദിച്ച സ്കൂളുകളില്‍ ഇതുവരെയും പ്രവൃത്തി ആരംഭിക്കാന്‍ സാധിക്കാത്ത സ്കൂളുകള്‍ ഏതെല്ലാമാണെന്ന് വ്യക്തമാക്കാമോ; ഓരോന്നിന്റെയും നിലവിലുളള സ്ഥിതി അറിയിക്കാമോ;

ഇവയില്‍ ഏതെല്ലാം സ്കൂളുകളുടെ ഡി.പി.ആര്‍. ആണ് കിഫ്ബി അംഗീകരിച്ചിട്ടുളളത്; ഏതെല്ലാം സ്കൂള്‍ കെട്ടിടങ്ങളാണ് ടെണ്ടര്‍ ചെയ്തിട്ടുളളത്; വ്യക്തമാക്കുമോ;

മേല്‍പ്പറഞ്ഞവയില്‍ ഏതെങ്കിലും സ്കൂളിന്റെ ഡി.പി.ആര്‍. അംഗീകരിക്കുന്നതിന് നിലവില്‍ തടസ്സമുണ്ടോ; വിശദമാക്കാമോ?

കോട്ടയ്ക്കല്‍ നിയോജകമണ്ഡലത്തിലെ കുറ്റിപ്പുറം ഗവണ്‍മെന്‍റ് ഹയര്‍ സെക്കന്‍ററി സ്കൂള്‍, ഇരിമ്പിളിയം ഗവണ്‍മെന്‍റ് ഹയര്‍ സെക്കന്‍ററി സ്കൂള്‍ എന്നിവയുടെ കെട്ടിട നിര്‍മ്മാണ പ്രവൃത്തികള്‍ക്ക് വേണ്ടി ബഡ്ജറ്റില്‍ 3 കോടി രൂപ വകയിരുത്തിയതിന്റെ അടിസ്ഥാനത്തില്‍ വകുപ്പ് സ്വീകരിച്ച നടപടികള്‍ എന്തെല്ലാമെന്ന് അറിയിക്കുമോ;

പ്രസ്തുത പ്രവൃത്തികള്‍ നടത്തുന്നതിനായി ഏതെങ്കിലും നിര്‍വ്വഹണ ഏജന്‍സിയെ ഏല്‍പ്പിച്ചിട്ടുണ്ടോ; വിശദാംശം ലഭ്യമാക്കുമോ;

പ്രസ്തുത പ്രവൃത്തികള്‍ അടിയന്തരമായി ആരംഭിക്കുവാന്‍ നടപടി സ്വീകരിക്കുമോ?

സ്റ്റേറ്റ് കൗൺസിൽ ഫോർ ഓപ്പൺ ആന്റ് ലൈഫ് ലോങ്ങ് എഡ്യൂക്കേഷൻ-കേരളയുടെ പ്രവർത്തനങ്ങൾ സർക്കാർ പരിശോധിച്ചിട്ടുണ്ടോ;

കഴിഞ്ഞ അദ്ധ്യയന വർഷം വിദ്യാഭ്യാസ മേഖലയിൽ സ്കോള്‍ കേരള നടത്തിയ പ്രവർത്തനങ്ങൾ എന്തെല്ലാമായിരുന്നുവെന്ന് അറിയിക്കാമോ;

കോവിഡാനന്തരം വിദ്യാർത്ഥികൾക്ക് സ്കോള്‍ കേരള നൽകുവാനുദ്ദേശിക്കുന്ന പഠന പിന്തുണ പ്രവർത്തനങ്ങൾ എന്തെല്ലാമാണെന്ന് വ്യക്തമാക്കുമോ;

സ്വയം പഠന സഹായികൾ ഹയർ സെക്കൻഡറിയിലെ വിദ്യാർത്ഥികൾക്ക് കൂടി നൽകുന്നതിനും മൊഡ്യൂളുകൾ മലയാളത്തിലും ലഭ്യമാക്കുന്നതിനും നടപടി സ്വീകരിക്കുമോ;

ആകർഷകമായ പുതിയ കോഴ്സുകൾ ആരംഭിച്ച് കൂടുതൽ വിദ്യാർത്ഥികൾക്ക് ഉപരിപഠനാവസരം ഒരുക്കുന്നതിന് പ്രത്യേക പദ്ധതികൾ ആവിഷ്കരിച്ച് നടപ്പാക്കുമോ; വിശദമാക്കാമോ?

പൊതുവിദ്യാഭ്യാസ വകുപ്പിന്റെ നേതൃത്വത്തിൽ നടപ്പിലാക്കിവരുന്ന വീട് ഒരു വിദ്യാലയം പദ്ധതിയുടെ ഉദ്ദേശ്യ ലക്ഷ്യങ്ങൾ കൈവരിക്കാൻ സാധിച്ചിട്ടുണ്ടോ; വിശദമാക്കുമോ;

പ്രസ്തുത പദ്ധതി നടപ്പിലാക്കാൻ എന്തെല്ലാം നടപടികളാണ് സ്വീകരിച്ചിരിക്കുന്നത് എന്ന് വിശദമാക്കാമോ;

ഈ അധ്യയന വർഷം തന്നെ സംസ്ഥാനത്ത് പ്രസ്‌തുത പദ്ധതി പൂർണമായും നടപ്പിലാക്കാൻ സാധിക്കുമോ; അതിനായി എന്തെല്ലാം നടപടി സ്വീകരിക്കുമെന്ന് വിശദമാക്കാമോ?

സംസ്ഥാനത്ത് സ്കൂൾ വിദ്യാഭ്യാസം സർഗ്ഗാത്മകവും ചലനാത്മകവും ആക്കുന്നതിനും കാലാനുസൃതമായ മാറ്റങ്ങളെ അഭിസംബോധന ചെയ്യാൻ പ്രാപ്തമാക്കുന്നതിനും ഉതകുന്ന ഫലപ്രദമായ ഗവേഷണ പഠനങ്ങൾ നടത്തുന്നതിന് സർക്കാർ പദ്ധതിയുണ്ടോ; വിശദാംശങ്ങൾ നൽകുമോ;

പൊതുവിദ്യാലയങ്ങളിൽ പഠിക്കുന്ന ഭിന്നശേഷിക്കാരായ കുട്ടികൾക്ക് വിവേചനരഹിതമായി വിദ്യാഭ്യാസം ലഭ്യമാക്കുന്ന ഉള്‍ച്ചേര്‍ന്ന വിദ്യാഭ്യാസ പദ്ധതി സംസ്ഥാനത്ത് നടപ്പാക്കുന്നതിന് സർക്കാർ സ്വീകരിച്ച നടപടികള്‍ എന്തെല്ലാമാണ്;

ഇതുമായി ബന്ധപ്പെട്ട് ഗവേഷണ പഠനങ്ങൾ നടത്തിയിട്ടുണ്ടോ; വിശദാംശങ്ങൾ ലഭ്യമാക്കാമോ?

ഡിജിറ്റല്‍ പഠനത്തിന് ശേഷിയില്ലാത്ത കുട്ടികള്‍ക്ക് പഠനോപകരണങ്ങള്‍ നല്‍കാന്‍ ആവിഷ്കരിച്ച വിദ്യാകിരണം പദ്ധതിയുടെ ടെണ്ടറില്‍ കമ്പനികള്‍ ആവശ്യപ്പെട്ട തുക സര്‍ക്കാര്‍ നിശ്ചയിച്ച തുകയേക്കാള്‍ കൂടുതലാണോ; വ്യക്തമാക്കാമോ;

അധികമായി തുക കണ്ടത്തേണ്ട സാഹചര്യം എങ്ങനെ പരിഹരിക്കാനാണ് ഉദ്ദേശിക്കുന്നതെന്ന് വിശദമാക്കാമോ;

ടെക്നിക്കല്‍ കമ്മിറ്റിയടക്കം കൂടിനിശ്ചയിക്കുന്ന തുക വിപണി നിരക്കിനേക്കാള്‍ കുറവായ സാഹചര്യം വ്യക്തമാക്കാമോ?

സംസ്ഥാനത്തെ മുഴുവൻ നിരക്ഷരരെയും കണ്ടെത്തി സാക്ഷരരാക്കാൻ സാക്ഷരത മിഷൻ നടപ്പിലാക്കിയ അക്ഷരലക്ഷം പദ്ധതിയിലൂടെ പഠിച്ചവരുടെയും വിജയിച്ചവരുടെയും കണക്ക് ജില്ല തിരിച്ച് വ്യക്തമാക്കുമോ;

സാക്ഷരത മിഷന്റെ തുടർ വിദ്യാകേന്ദ്രങ്ങൾ സംസ്ഥാനത്തെ എത്ര വാർഡുകളിൽ പ്രവർത്തിക്കുന്നുവെന്ന് വ്യക്തമാക്കുമോ;

നിലവിലെ സാക്ഷരത മിഷൻ ഡയറക്ടർ സ്ഥാനം ഏറ്റെടുത്ത ശേഷം നാല്, ഏഴ്, പത്ത്, ഹയർസെക്കൻഡറി തുല്യത കോഴ്സുകൾക്ക് വിവിധ ജില്ലകളിൽ രജിസ്റ്റർ ചെയ്ത പഠിതാക്കളുടെ വിശദാംശങ്ങൾ ജില്ല തിരിച്ചും വർഷം തിരിച്ചും വ്യക്തമാക്കുമോ?

സര്‍ക്കാരിന്റെ സൗജന്യ കൈത്തറി സ്കൂള്‍ യൂണിഫോം പദ്ധതിക്ക് അനുമതി നിഷേധിച്ചു കൊണ്ട് സര്‍വ ശിക്ഷാ കേരളയുടെ വര്‍ക്കിംഗ്‌ ഗ്രൂപ്പ്‌ യോഗം തീരുമാനിച്ചിട്ടുണ്ടോ; എങ്കില്‍ അതിനുള്ള കാരണങ്ങള്‍ വ്യക്തമാക്കാമോ;

കോവിഡാനന്തരം വിദ്യാലയങ്ങള്‍ തുറക്കുന്ന സാഹചര്യത്തില്‍ ഈ പദ്ധതി അവതാളത്തിലാകും എന്നതിനാൽ വിദ്യര്‍ത്ഥികള്‍ക്കും രക്ഷിതാക്കള്‍ക്കും ഉണ്ടാകുന്ന പ്രയാസങ്ങള്‍ ശ്രദ്ധയിൽപ്പെട്ടിട്ടുണ്ടോ; എങ്കില്‍ അടിയന്തിരമായി ഈ പ്രശ്നങ്ങള്‍ക്ക് പരിഹാരം കാണുമോ;

സൗജന്യ യൂണിഫോം പദ്ധതി നടപ്പാക്കുവാന്‍ മറ്റെന്തെങ്കിലും മാര്‍ഗ്ഗങ്ങള്‍ സര്‍ക്കാര്‍ സ്വീകരിച്ചിട്ടുണ്ടോ; എങ്കില്‍ വിശദാംശം നല്‍കുമോ?

2022-23 അധ്യയന വർഷം മുതൽ സ്കൂൾ പാഠ്യപദ്ധതി പരിഷ്ക്കരിക്കാൻ ഉദ്ദേശിക്കുന്നുണ്ടോ;

എങ്കില്‍ ഏതൊക്കെ ക്ലാസുകളിലെ ഏതെല്ലാം വിഷയങ്ങളിലെ പാഠ്യപദ്ധതികളാണ് പരിഷ്ക്കരിക്കുവാൻ ഉദ്ദേശിക്കുന്നത്; വിശദാംശം നല്‍കുമോ;

പ്രസ്തുത പരിഷ്ക്കരണത്തിനായി നാളിതുവരെ വകുപ്പ് സ്വീകരിച്ച നടപടികൾ വ്യക്തമാക്കുമോ;

പരിഷ്ക്കരിക്കുന്ന പാഠ്യപദ്ധതി ചട്ടക്കൂടിന്റെ കരട് എപ്പോള്‍ തയ്യാറാക്കുന്നതിനാണ് വകുപ്പ് നിർദ്ദേശം നല്‍കിയിട്ടുള്ളത്; വ്യക്തമാക്കുമോ;

പുതുതായി ഏതൊക്കെ വിഷയങ്ങൾ പരിഷ്ക്കരിക്കുന്ന പാഠ്യപദ്ധതിയുടെ ഭാഗമാക്കാനാണ് നിർദ്ദേശം നൽകിയിട്ടുള്ളത്; വ്യക്തമാക്കുമോ; അവസാനമായി പാഠ്യപദ്ധതി പരിഷ്കരിച്ചത് എപ്പോഴാണെന്ന് അറിയിക്കുമോ?

സംസ്ഥാനത്തിലെ പാഠ്യപദ്ധതി പരിഷ്ക്കരിക്കുന്നതിന് വല്ല മാര്‍ഗ്ഗനിര്‍ദ്ദേശങ്ങളും സമര്‍പ്പിച്ചിട്ടുണ്ടോ;

പാഠ്യപദ്ധതിയില്‍ 5-ാം ക്ലാസ് മുതല്‍ ഭരണഘടന വിഷയമാക്കാന്‍ തീരുമാനിക്കാമോ?

സംസ്ഥാന പാഠ്യപദ്ധതിയില്‍ കായിക വിദ്യാഭ്യാസം അഞ്ചാം ക്ലാസ് മുതല്‍ നിര്‍ബന്ധിത പാഠ്യ വിഷയമായി ഉള്‍പ്പെടുത്തുന്നതിനുള്ള നടപടി സ്വീകരിക്കാമോ;

കലാവിഷയങ്ങള്‍ നിര്‍ബന്ധിത പാഠ്യവിഷയങ്ങളായി ഉള്‍പ്പെടുത്തുന്നതിനുള്ള നടപടികള്‍ സ്വീകരിക്കുമോ?

പൊതുവിദ്യാഭ്യാസ വകുപ്പിന്റെ ഉടമസ്ഥതയിലുള്ള മാവേലിക്കര ടെക്സ്റ്റ് ബുക്ക് ഡിപ്പോ പ്രവര്‍ത്തിച്ചിരുന്ന സ്ഥലം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത ഡിപ്പോ മറ്റേതെങ്കിലും ആവശ്യങ്ങള്‍ക്ക് ഉപയോഗിക്കുവാന്‍ വിദ്യാഭ്യാസ വകുപ്പ് തീരുമാനിച്ചിട്ടുണ്ടോ;

സ്ഥലപരിമിതിമൂലം ബുദ്ധിമുട്ടുന്ന ഐ.എച്ച്.ആര്‍.ഡി കോളേജിന് പ്രസ്തുത സ്ഥലം വിട്ടുനല്‍കുന്ന കാര്യം പരിഗണനയിലുണ്ടോ; വിശദമാക്കുമോ?

തൊഴിലധിഷ്ഠിത വിദ്യാഭ്യാസത്തിന്റെ പ്രോത്സാഹനത്തിനായി സർക്കാർ സ്വീകരിച്ചിട്ടുള്ള നടപടികൾ എന്തൊക്കെയാണ്; വിശദാംശം അറിയിക്കാമോ;

സംസ്ഥാനത്തെ ഹയർസെക്കൻഡറി സ്കൂളുകളിൽ പുതിയ കോഴ്സുകൾ ആരംഭിക്കുന്നതിന് ആലോചനയുണ്ടോ; വിശദാംശം അറിയിക്കുമോ;

സ്കൂളുകളിൽ നീന്തൽ പരിശീലനത്തിനായി കഴിഞ്ഞ സർക്കാരിന്റെ കാലത്ത് നടപ്പിലാക്കാൻ ഉദ്ദേശിച്ച 'സ്കൂളിൽ ഒരു നീന്തൽ കുളം' എന്ന പദ്ധതിയിൽ ഉൾപ്പെടുത്തി തിരുവനന്തപുരം ജില്ലയിൽ തിരഞ്ഞെടുത്തിട്ടുള്ള സ്കൂളുകൾ ഏതൊക്കെയാണെന്ന് വ്യക്തമാക്കാമോ; പ്രവർത്തനത്തിന്റെ പുരോഗതി അറിയിക്കുമോ?

തിരൂരങ്ങാടി നിയോജകമണ്ഡലത്തിലെ കാളംതിരുത്തി ബദൽ സ്കൂൾ (എം.ജി.എൽ.സി.) എൽ.പി. സ്കൂൾ ആയി ഉയർത്തിയിട്ടുണ്ടോ; വിശദവിവരം ലഭ്യമാക്കുമോ?

സംസ്ഥാനത്ത് പ്രഥമാധ്യാപകർ ഇല്ലാതെ എത്ര സർക്കാർ പ്രൈമറി സ്കൂളുകളാണ് പ്രവർത്തിക്കുന്നതെന്ന് വ്യക്തമാക്കുമോ;

പ്രഥമാധ്യാപക തസ്തികയിലേക്ക് സ്ഥാനക്കയറ്റം നൽകാത്തത് മൂലം എത്ര അധ്യാപക ഒഴിവുകളാണ് പി.എസ്.സി.ക്ക് റിപ്പോർട്ട് ചെയ്യാൻ കഴിയാതെ മുടങ്ങിക്കിടക്കുന്നതെന്ന് വ്യക്തമാക്കുമോ; പ്രസ്തുത പ്രതിസന്ധി അടിയന്തരമായി പരിഹരിക്കുമോയെന്ന് അറിയിക്കുമോ?

സംസ്ഥാനത്തെ എയ്ഡഡ് പ്രൈമറി സ്കൂളുകളിൽ 2011 മുതൽ റെഗുലർ തസ്തികകളിൽ നിയമനം നേടുകയും കുട്ടികളുടെ എണ്ണം കുറവായതിനാൽ ശമ്പളവും മറ്റ് ആനുകൂല്യങ്ങളും നിഷേധിക്കപ്പെടുകയും ചെയ്ത അധ്യാപകർക്ക് യോഗ്യതകളുണ്ടായിട്ടും 10 വർഷം പിന്നിട്ട ശേഷവും നിയമനാംഗീകാരവും വേതനവും നൽകാൻ സാധിക്കാത്ത സാഹചര്യം ശ്രദ്ധയിൽപ്പെട്ടിട്ടുണ്ടോ;

പ്രസ്തുത പ്രതിസന്ധി പരിഹരിക്കുന്നതിനായി മേൽപ്പറഞ്ഞ അധ്യാപകർക്ക് ഒരു ക്ലാസിന് ഒരു അധ്യാപകൻ എന്ന നിലയിൽ നിയമനാംഗീകാരം നൽകുന്നതിനും ശമ്പളം അനുവദിക്കുന്നതിനും നടപടി സ്വീകരിക്കുമോ; വ്യക്തമാക്കുമോ?

സർക്കാർ മേഖലയിൽ പ്രീ പ്രൈമറി ജീവനക്കാർക്ക് നൽകി വരുന്ന ഓണറേറിയം എത്രയാണെന്ന് തസ്തിക തിരിച്ച് വ്യക്തമാക്കാമോ;

പ്രസ്തുത ജീവനക്കാരിൽ ആർക്കെങ്കിലും ഓണറേറിയം ഇനത്തിൽ കുടിശിക നൽകാനുണ്ടോ എന്ന് വ്യക്തമാക്കാമോ;ഉണ്ടെങ്കിൽ എത്ര പേർക്ക് നല്കാനുണ്ടെന്ന് അറിയിക്കാമോ;

കുടിശ്ശിക നല്കാനുള്ളത് സംബന്ധിച്ച് എത്ര പേരുടെ അപേക്ഷകളാണ് ഡെപ്യൂട്ടി ഡയറക്ടർ ഓഫീസ് വഴി തീർപ്പു കൽപ്പിക്കാനായി പൊതു വിദ്യാഭ്യാസ ഡയറക്ടറേറ്റിൽ ഉള്ളതെന്ന് അറിയിക്കാമോ;

ഓരോ അപേക്ഷയിന്മേലും എന്തൊക്കെ നടപടികളാണ് സ്വീകരിച്ചതെന്ന് വിശദമാക്കാമോ;

കുടിശ്ശിക തുക എപ്പോൾ നൽകാൻ കഴിയുമെന്ന് വ്യക്തമാക്കാമോ?

വൈപ്പിന്‍ മണ്ഡലത്തിലെ ഞാറക്കല്‍ പഞ്ചായത്തില്‍ പ്രവര്‍ത്തിക്കുന്ന ഗവണ്‍മെന്റ് ഫിഷറീസ് യു.പി. സ്കൂളിന്റെ ശോചനീയാവസ്ഥ പരിഹരിക്കാന്‍ നടപടികള്‍ സ്വീകരിച്ചിട്ടുണ്ടോ;

ഉണ്ടെങ്കില്‍ സ്വീകരിച്ചിട്ടുള്ള നടപടികള്‍ വ്യക്തമാക്കാമോ;

സ്കൂള്‍ കെട്ടിടത്തിന്റെ ജീര്‍ണ്ണാവസ്ഥയും അപര്യാപ്തതയും കണക്കിലെടുത്ത് പുതിയ കെട്ടിടം പണിയുന്നതിനായി തുക അനുവദിക്കുമോ?

സർക്കാർ സ്കൂളുകളിൽ എൻട്രൻസ് കോച്ചിംഗ് മാതൃകയിൽ പ്ലസ് ടു വിദ്യാർഥികൾക്ക് ക്ലാസുകൾ നൽകാൻ തയ്യാറാകുമോ; വിശദമാക്കുമോ;

അടുത്ത അധ്യയന വർഷം മുതൽ ഈ രീതി അവലംബിക്കാൻ നടപടി സ്വീകരിക്കുമോ; വ്യക്തമാക്കുമോ?

സംസ്ഥാനത്ത് ഹയർസെക്കൻഡറി വിഭാഗത്തിൽ കായികാദ്ധ്യാപക തസ്തികകൾ അനുവദിച്ച് നിയമനം നടത്തുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ;

സർക്കാർ വിദ്യാലയങ്ങളിലെ അദ്ധ്യാപകർക്കും പൊതുവിദ്യാഭ്യാസ വകുപ്പിന്റെ 07.09.2017-ലെ 111 /2017 നമ്പർ സംരക്ഷണ ഉത്തരവ് ബാധകമാക്കി സ്പഷ്ടീകരണം നടത്തുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

ഹയര്‍ സെക്കണ്ടറി സ്കൂളുകളിലെ ലൈബ്രേറിയന്‍ തസ്തികയില്‍ നിയമനം നടത്തുന്നത് സംബന്ധിച്ച് സ്പെഷ്യല്‍ റുള്‍സ് അംഗീകരിച്ചിട്ടുണ്ടോ; എങ്കില്‍ വിശദാംശം വ്യക്തമാക്കുമോ;

പ്രസ്തുത തസ്തികയില്‍ എന്നത്തേക്ക് നിയമനം നടത്താന്‍ കഴിയുമെന്നാണ് പ്രതീക്ഷിക്കുന്നതെന്ന് അറിയിക്കാമോ?

കണ്ണൂര്‍ ജില്ലയില്‍ 2020-21 അധ്യയന വര്‍ഷം പ്ലസ് വണ്‍ പ്രവേശനവുമായി ബന്ധപ്പെട്ട് സയന്‍സ്, ഹ്യുമാനിറ്റീസ്, കോമേഴ്സ് ഗ്രൂപ്പുകളില്‍ എത്ര സീറ്റുകള്‍ ഉണ്ടായിരുന്നു; എത്ര സീറ്റില്‍ ഒഴിവുണ്ടായിരുന്നു; വ്യക്തമാക്കുമോ;

കണ്ണൂര്‍ ജില്ലയില്‍ പ്ലസ് വണ്‍ അഡ്മിഷന് 2021-22 അധ്യയനവര്‍ഷം സയന്‍സ്, ഹ്യുമാനിറ്റീസ്, കോമേഴ്സ് ഗ്രൂപ്പുകളില്‍ ഒരോ ഗ്രൂപ്പിലും എത്ര സീറ്റാണ് നിലവിലുളളതെന്ന് അറിയിക്കാമോ; ഏറ്റവും കൂടുതല്‍ കുട്ടികള്‍ അപേക്ഷിക്കുന്നത് ഏത് ഗ്രൂപ്പിലേക്കാണ്; വ്യക്തമാക്കാമോ;

കണ്ണൂര്‍ ജില്ലയില്‍ ഈ അധ്യയനവര്‍ഷം പ്ലസ് വണ്‍ പ്രവേശനത്തിന് എത്ര വിദ്യാര്‍ത്ഥികള്‍ അപേക്ഷിച്ചിട്ടുണ്ട്; എത്ര വിദ്യാര്‍ത്ഥികള്‍ക്ക് അഡ്മിഷന്‍ ലഭിച്ചു; വിശദമാക്കാമോ?

പത്താംക്ലാസ് പാസ്സായ മുഴുവന്‍പേര്‍ക്കും പ്ലസ് വണ്‍ പ്രവേശനം ഉറപ്പുവരുത്താന്‍ സര്‍ക്കാര്‍ എയിഡഡ് മേഖലയില്‍ അധിക ബാച്ചുകള്‍ അനുവദിക്കാന്‍ നടപടി സ്വീകരിക്കുമോ?

യു.പി., എച്ച്.എസ്. കായികാധ്യാപക തസ്തിക നിർണയത്തിനുള്ള മാനദണ്ഡങ്ങൾ ശാസ്ത്രീയമായും കാലോചിതമായും പരിഷ്ക്കരിക്കുമോ;

ഹൈസ്കൂൾ കായികാധ്യാപകരുടെ യോഗ്യത എൻ.സി.ടി.ഇ. മാർഗ്ഗരേഖകൾ അനുസരിച്ച് പരിഷ്ക്കരിച്ച് പൊതു അധ്യാപകരായി പരിഗണിക്കുമോ; വ്യക്തമാക്കുമോ;

തുല്യ ജോലിക്ക് തുല്യ വേതനം എന്ന തത്വം പാലിച്ച് ഹൈസ്കൂൾ കായികാധ്യാപകർക്ക് ഹൈസ്കൂൾ അധ്യാപകരുടേതിന് തുല്യമായ ശമ്പളം അനുവദിക്കുമോ; വിശദമാക്കുമോ?

മാനന്തവാടി നിയോജകമണ്ഡലത്തില്‍ ക്ലാസ്റൂം അപര്യാപ്തത ഉള്ള ഏതെങ്കിലും സ്കൂളുകള്‍ ഉണ്ടോയെന്ന് അറിയിക്കുമോ;

ഉണ്ടെങ്കില്‍ സ്കൂളിന്റെ പേരും ക്ലാസ്റൂം അപര്യാപ്തതയുടെ കാരണവും വ്യക്തമാക്കാമോ;

പ്രസ്‌തുത അപര്യാപ്തത പരിഹരിക്കാന്‍ സ്വീകരിച്ച നടപടികള്‍ വ്യക്തമാക്കാമോ?

പൂഞ്ഞാർ നിയോജകമണ്ഡലത്തിലെ പാറത്തോട് പഞ്ചായത്തിലെ പതിനെട്ടാം വാർഡിലെ പഴുമല പി.ജി.ജി.എം. ഗവ. യു.പി. സ്കൂൾ കെട്ടിടം കാലപ്പഴക്കത്താൽ ജീര്‍ണാവസ്ഥയിലായിട്ടുള്ളത് ശ്രദ്ധയിൽപ്പെട്ടിട്ടുണ്ടോ;

പ്രസ്തുത സ്കൂള്‍ കെട്ടിടം പുതുക്കിപ്പണിയുന്നതിനാവശ്യമായ നടപടി സ്വീകരിക്കുമോയെന്ന് വ്യക്തമാക്കുമോ?

സംസ്ഥാന ബജറ്റിൽ പ്രഖ്യാപിക്കുകയും തുക വകയിരുത്തുകയും ചെയ്ത ചുണ്ടമ്പറ്റ ഹയർ സെക്കൻണ്ടറി സ്കൂൾ കെട്ടിടത്തിന്റെ നിർമ്മാണ പ്രവർത്തികൾ ആരംഭിക്കുന്നതിനുള്ള കാലതാമസം എന്തുകൊണ്ടാെണെന്നു വിശദമാക്കാമോ;

ഈ പദ്ധതിയുടെ ഭരണ- സാങ്കേതിക അനുമതികൾ ലഭ്യമായിട്ടുണ്ടോ; ഇല്ലെങ്കിൽ അതിനുള്ള കാലതാമസം എന്തുകൊണ്ടാെണെന്ന് വ്യക്തമാക്കാമോ;

നടപടികൾ പൂർത്തിയാക്കി അടിയന്തിരമായി പ്രവൃത്തികൾ ആരംഭിക്കുന്നതിനുള്ള നടപടി സ്വീകരിക്കുമോ എന്ന് അറിയിക്കുമോ?

പാറശ്ശാല നിയോജകമണ്ഡലത്തിലെ കള്ളിമുട്ടുകാണി ട്രൈബല്‍ എൽ.പി. സ്കൂളിന്റെ നിലവിലുള്ള കെട്ടിടവും സ്ഥലവും സർക്കാർ ഏറ്റെടുക്കുന്നതു സംബന്ധിച്ച് സ്വീകരിച്ച നടപടികൾ വിശദമാക്കാമോ;

സ്കൂൾ മാനേജ്മെന്റ് കമ്മിറ്റി അംഗങ്ങൾ എല്ലാവരും മരണപ്പെട്ടതിനാൽ പ്രസ്തുത സ്കൂൾ സർക്കാർ ഏറ്റെടുക്കണമെന്ന് കാണിച്ചുകൊണ്ട് നിലവിലെ അവകാശികൾ നൽകിയ നിവേദനത്തിൽ നടപടികൾ സ്വീകരിച്ചിട്ടുണ്ടോ; വിശദാംശം അറിയിക്കാമോ;

അവകാശികള്‍ ഇല്ലാത്ത മാനേജ്മെന്റ് സ്കൂളുകൾ, അവയുടെ ആസ്തി എന്നിവ സർക്കാർ ഏറ്റെടുക്കുന്നതിനുള്ള നടപടിക്രമങ്ങൾ എന്തൊക്കെയാണെന്ന് അറിയിക്കാമോ?

2020-21 ലെ അധ്യയനവർഷത്തിലെ ലാബ് നവീകരണവുമായി ബന്ധപ്പെട്ട് ശ്രീകണ്ഠപുരം ഗവൺമെൻറ് ഹയർ സെക്കൻഡറി സ്കൂളിന്റെ അപേക്ഷയിൽ എന്തൊക്കെ നടപടികൾ സ്വീകരിച്ചിട്ടുണ്ടെന്ന് വ്യക്തമാക്കാമോ;

ഹയർ സെക്കൻഡറി വിഭാഗത്തില്‍ ലാബ് നവീകരണവുമായി ബന്ധപ്പെട്ടുള്ള മുൻഗണന ലിസ്റ്റിൽ പ്രസ്തുത സ്കൂള്‍ ഉള്‍പ്പെട്ടിട്ടുണ്ടോ;

മുൻഗണനാക്രമം മറികടന്ന് സംസ്ഥാനത്തെ മറ്റ് സ്കൂളുകളിലെ ലാബുകള്‍ നവീകരിക്കുന്നതിന് അനുമതി നൽകിയിട്ടുണ്ടോ;

പ്രസ്തുത സ്കൂളിലെ ലാബ് നവീകരിക്കുന്നതിനുള്ള നടപടി സ്വീകരിക്കുമോ?

തിരുവനന്തപുരം, കൊല്ലം ജില്ലകളിൽ എച്ച്.എസ്.എ. ഇംഗ്ലീഷ് തസ്തികയിൽ 2014-15 അധ്യയന വർഷം മുതൽ നാളിതുവരെ എത്രവീതം ഒഴിവുകൾ റിപ്പോർട്ട് ചെയ്തിട്ടുണ്ടെന്ന് അധ്യയനവർഷാടിസ്ഥാനത്തിൽ വ്യക്തമാക്കുമോ;

നിലവിൽ തിരുവനന്തപുരം ജില്ലയിലെ എച്ച്.എസ്.എ. ഇംഗ്ലീഷ് തസ്തികയുടെയും എച്ച്.എസ്.എ. മലയാളം തസ്തികയുടെയും കേഡർ സ്ട്രെങ്ത് എത്രയാണെന്ന് അറിയിക്കാമോ;

മേല്പറഞ്ഞ ജില്ലകളില്‍ എച്ച്.എസ്.എ. ഇംഗ്ലീഷ് തസ്തികയിൽ എത്ര ഐ.ഡി.ടി. അധ്യാപകർ ജോലിചെയ്യുന്നുണ്ട്; ഇവരിൽ എത്രപേർ മാതൃ ജില്ലകളിൽ എച്ച്.എസ്.എ ഇംഗ്ലീഷ് തസ്തികയിലേക്ക് പ്രമോഷൻ വഴി നിയമിതരായ ശേഷം ട്രാൻസ്ഫർ ആയി തിരുവനന്തപുരം ജില്ലയിൽ ഐ.ഡി.ടി വഴി ജോലി ചെയ്യുന്നുവെന്ന് അറിയിക്കുമോ?

തിരൂരങ്ങാടി നിയോജകമണ്ഡലത്തിലെ പരപ്പനങ്ങാടി സ്പെഷ്യൽ സ്കൂൾ ടീച്ചേഴ്സ് ​ട്രെയിനിംഗ് സെന്ററിലെ ജീവനക്കാർക്ക് ശമ്പളം ലഭിക്കാത്ത വിവരം ശ്രദ്ധയിൽപ്പെട്ടിട്ടുണ്ടോ;

ഇവർക്ക് ശമ്പളം നൽകുന്നതിനുളള നടപടികൾ സ്വീകരിക്കുമോ; വിശദമാക്കുമോ?

അദ്ധ്യാപകർക്കായി നടത്തിവരുന്ന ടീച്ചേഴ്സ് എലിജിബിലിറ്റി ടെസ്റ്റ് സംസ്ഥാനത്ത് ആദ്യമായി നടത്തിയത് ഏത് വര്‍ഷത്തിലാണെന്നും എന്ന് മുതലാണ് നിര്‍ബന്ധമാക്കിയതെന്നും വ്യക്തമാക്കുമോ;

2016 വരെ ഏതെങ്കിലും വിഭാഗം അദ്ധ്യാപകരെ കെടെറ്റ് പാസ്സാകുന്നതില്‍ നിന്നും ഒഴിവാക്കിയിട്ടുണ്ടോ; ഉത്തരവിന്റെ പകര്‍പ്പ് അടക്കം വിശദാംശം നല്‍കുമോ;

കെടെറ്റ് നിര്‍ബന്ധമാക്കുന്നതിന് മുന്‍പും കെടെറ്റ് പരീക്ഷ നടക്കാത്ത കാലയളവിലും സര്‍വീസില്‍ നിയമിതരായ എയിഡഡ് സ്കൂള്‍ അദ്ധ്യാപകര്‍ക്ക് കെടെറ്റ് പാസ്സായില്ലായെന്ന കാരണത്താല്‍ ഇന്‍ക്രിമെന്‍റ്, ഗ്രേഡ്, പുതിയ ശമ്പളസ്‍കെയില്‍ എന്നിവ അനുവദിച്ച് നല്‍കുന്നില്ലായെന്നത് ശ്രദ്ധയില്‍പ്പെട്ടിട്ടുണ്ടോ;

എങ്കില്‍ 2012-16 കാലഘട്ടത്തിലെ ഒരു വിഭാഗം അദ്ധ്യാപകര്‍ക്ക് കെടെറ്റ് പരീക്ഷ പാസാകുന്നതില്‍ നിന്ന് ഒഴിവാക്കിയത് എയിഡഡ് സ്കൂള്‍ അദ്ധ്യാപകര്‍ക്ക് കൂടി ബാധകമാക്കുന്ന കാര്യം പരിഗണിക്കുമോ?

2020-21 വര്‍ഷം എല്ലാ യോഗ്യതയും നേടി എയ്ഡഡ് സ്കൂള്‍ അദ്ധ്യാപക നിയമനം ലഭിച്ചെങ്കിലും കോവിഡ് -19 കാരണം നിയമനാംഗീകാരം ലഭിക്കാതെ പോയ അദ്ധ്യാപകര്‍ക്ക്, ഉയര്‍ന്ന പ്രായപരിധിയായ നാല്‍പ്പത് വയസ്സ് പൂര്‍ത്തിയായി കഴിഞ്ഞതിനാല്‍ വയസ്സിളവ് നല്‍കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോ എന്ന് വ്യക്തമാക്കുമോ;

എങ്കില്‍ ഈ വിഷയത്തില്‍ സ്വീകരിച്ച നടപടികൾ വിശദമാക്കാമോ?

06/02/2021 ലെ സ.ഉ.(അ)4/21പൊ.വി.വ. പ്രകാരം 2016-17 മുതല്‍ 2019-20 വരെയുള്ള നിയമനങ്ങള്‍ അംഗീകരിക്കുന്നതിനായി മാനേജര്‍മാര്‍ ഭാവിയില്‍ ഉണ്ടാകുന്ന തസ്തികകള്‍ വിട്ടു നല്‍കാമെന്ന സത്യപ്രസ്താവന പ്രകാരം അത്രയും തസ്തികകള്‍ ഒഴിച്ചിട്ടതിനു ശേഷമാണോ 2021-22 വര്‍ഷം നിയമനം നടത്താന്‍ അനുമതി നല്‍കുന്നത്;

ഒഴിച്ചിടുന്ന പ്രസ്തുത ഒഴിവുകളില്‍ സംരക്ഷിത അദ്ധ്യാപകരെ നിയമിക്കാതിരിക്കുന്ന കാലയളവില്‍ അദ്ധ്യയനം മുടങ്ങാതിരിക്കാന്‍ ദിവസ വേതനാടിസ്ഥാനത്തില്‍ നിയമനം നടത്താന്‍ മാനേജര്‍മാര്‍ക്ക് അനുമതി നല്‍കുമോ;

മേല്‍ ഉത്തരവിലെ അവ്യക്തത ശ്രദ്ധയില്‍പ്പെട്ടിട്ടുണ്ടോ; എങ്കില്‍ വ്യക്തത വരുത്തുന്നതിനായി പൊതു വിദ്യാഭ്യാസ സെക്രട്ടറിക്ക് എന്തെങ്കിലും നിര്‍ദ്ദേശം നല്‍കിയിട്ടുണ്ടോ?

എയ്ഡഡ് സ്കൂളുകളില്‍ നിന്നും മന്ത്രിമാരുടെയും എം.എല്‍.എ.മാരുടെയും പേഴ്‌സണൽ സ്റ്റാഫിലേക്ക് നിയമിതരായവരുടെ ഒഴിവിലേക്ക് ദിവസ വേതന അടിസ്ഥാനത്തില്‍ നിയമനം നല്‍കാന്‍ നിലവില്‍ തടസ്സങ്ങള്‍ ഉണ്ടോ എന്ന് വ്യക്തമാക്കുമോ?

എയ്ഡഡ് സ്കൂളുകളിലെ ലീവ് വേക്കൻസിയിൽ നിലവിൽ എത് തരത്തിലുള്ള നിയമനമാണ് നടത്താൻ കഴിയുന്നതെന്ന് വിശദമാക്കുമോ;

5 വർഷത്തെ ലീവ് വേക്കൻസിയിൽ ഏത് തരത്തിലുള്ള നിയമനമാണ് നടത്താൻ കഴിയുന്നത് എന്ന് വ്യക്തമാക്കുമോ; ഇത് സംബന്ധിച്ചുള്ള ഉത്തരവിന്റെ പകർപ്പ് ലഭ്യമാക്കുമോ?

അറ്റകുറ്റപണികള്‍ക്കുള്ള സര്‍ക്കാര്‍ ഗ്രാന്റ് ലഭിക്കാത്തതിനാല്‍ എയ്ഡഡ് സ്കൂളുകള്‍ പ്രതിസന്ധിയിലായത് ശ്രദ്ധയില്‍പ്പെട്ടിട്ടുണ്ടോ; സ്കൂളുകള്‍ തുറക്കാന്‍ തീരുമാനിച്ചിരിക്കുന്ന ഈ സാഹചര്യത്തില്‍ ഗ്രാന്റ് അനുവദിക്കുന്നതിനുള്ള അടിയന്തര നടപടി സ്വീകരിക്കുമോ; വിശദമാക്കാമോ?

എയിഡഡ് വിദ്യാഭ്യാസസ്ഥാപനങ്ങളിലെ നിയമനങ്ങളിൽ ഭിന്നശേഷിക്കാർക്ക് നാലു ശതമാനം സംവരണം ഏർപ്പെടുത്തിയ ഉത്തരവ് പ്രൈമറി, സെക്കൻഡറി, ഹയർസെക്കൻഡറി തലങ്ങളിൽ നടപ്പാക്കുന്നതിനായി പൊതുവിദ്യാഭ്യാസ വകുപ്പ് പ്രത്യേക മാർഗരേഖ പ്രസിദ്ധീകരിച്ചിട്ടുണ്ടോ;

ഇല്ലെങ്കിൽ ആയത് അടിയന്തരമായി പ്രസിദ്ധീകരിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

06/02/21 ലെ സ.ഉ.(അച്ചടി)4/21/പൊ.വി.വ. പ്രകാരം 2016-17 മുതല്‍ 2019-20 വരെയുള്ള നിയമനങ്ങള്‍ അംഗീകരിക്കുന്നതിനായി സ്കൂള്‍ മാനേജര്‍മാര്‍ ഭാവിയില്‍ ഉണ്ടാകുന്ന തസ്തികകള്‍ സംരക്ഷിത അധ്യാപകരെ നിയമിക്കുന്നതിനായി വിട്ടു നല്‍കാമെന്ന സത്യപ്രസ്താവന നല്‍കേണ്ടതുണ്ടോ; എങ്കില്‍ 2021-22 വര്‍ഷം നിയമനം നടത്താന്‍ ഒഴിച്ചിടുന്ന പ്രസ്തുത ഒഴിവുകളില്‍ സംരക്ഷിത അധ്യാപകരെ നിയമിക്കുന്നകാലം വരെ അധ്യയനം മുടങ്ങാതിരിക്കാന്‍ ദിവസ വേതനത്തില്‍ അധ്യാപകരെ നിയമിക്കാന്‍ അനുമതി നല്‍കുമോ;

മേല്‍ ഉത്തരവിലെ അവ്യക്തത സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ; എങ്കില്‍ വ്യക്തത വരുത്തുന്നതിനായി പൊതു വിദ്യാഭ്യാസ സെക്രട്ടറിക്ക് നിര്‍ദ്ദേശം നല്‍കിയിട്ടുണ്ടോ; വ്യക്തമാക്കാമോ?

ഡിപ്ലോമ ഇൻ എലിമെന്ററി എജ്ജുക്കേഷൻ ( ഡി.ഇഎല്‍.ഇഡി.) പ്രവേശനത്തിനുള്ള വിജ്ഞാപനം വൈകുന്നതിനാൽ ആയിരക്കണക്കിന് വിദ്യാര്‍ത്ഥികള്‍ അദ്ധ്യായനവർഷം നഷ്ടപ്പെടുമോ എന്ന ആശങ്കയിലാണ് എന്നത് സര്‍ക്കാരിന്റെ ശ്രദ്ധയിൽപ്പെട്ടിട്ടുണ്ടോ എന്ന് വ്യക്തമാക്കാമോ;

ഏത് മാസത്തിലാണ് ഈ കോഴ്സിന്റെ വിജ്ഞാപനം പുറപ്പെടുവിച്ച് പ്രവേശനം നൽകാറുള്ളതെന്ന് വ്യക്തമാക്കാമോ;

ഇപ്രാവശ്യത്തെ വിജ്ഞാപനം പുറപ്പെടുവിക്കാൻ വൈകിയിട്ടുണ്ടോ; എങ്കിൽ കാരണമെന്താണെന്ന് വ്യക്തമാക്കാമോ;

ഡിപ്ലോമ ഇൻ എലിമെന്ററി എജ്ജുക്കേഷന് പ്രവേശനം കിട്ടാറുള്ളത് ആർക്കാണെന്നും ഇതിന് അപേക്ഷിക്കുന്നവർക്ക് ബിരുദത്തിനും അപേക്ഷിക്കാൻ കഴിയുമോയെന്നും വ്യക്തമാക്കാമോ?

തിരുവനന്തപുരം വിദ്യാഭ്യാസ ഡെപ്യൂട്ടി ഡയറക്ടര്‍ ഓഫീസ് നിലവില്‍ മാറ്റിയിരിക്കുന്ന കെട്ടിടത്തിലെ സ്ഥലപരിമിതി, ഓഫീസ് പ്രവര്‍ത്തനത്തെ ബാധിക്കുന്നതായി ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കുമോ;

സ്ഥലപരിമിതി മൂലം ഓഫീസിലെ ജീവനക്കാര്‍ക്ക് സാമൂഹിക അകലം പാലിക്കാനാവാത്ത സാഹചര്യം നിലവിലുണ്ടോ; വിശദമാക്കുമോ;

പ്രസ്തുത ഓഫീസിലെ സെക്ഷനുകള്‍ പാഠ പുസ്തക ആഫീസിലെ ഒഴിവുള്ള സ്ഥലത്തേക്ക് മാറ്റുന്നതിന് നടപടി സ്വീകരിക്കുമോ; വ്യക്തമാക്കുമോ?

ലോക്ക് ഡൗൺ നിബന്ധനകൾ മാറ്റിയിട്ടുള്ള സാഹചര്യത്തിൽ പാരലൽ കോളേജ് / ടൂഷ്യൻ മേഖലകൾ തുറക്കുന്നതിന് സർക്കാർ തീരുമാനം കൈക്കൊണ്ടിട്ടുണ്ടോ എന്ന് അറിയിക്കാമോ;

ഇല്ലായെങ്കിൽ സ്‌കൂളുകൾ തുറന്ന് പ്രവർത്തിപ്പിക്കുവാൻ സർക്കാർ തീരുമാനിച്ച സാഹചര്യത്തിൽ പ്രസ്തുത മേഖലയും തുറന്ന് പ്രവർത്തിപ്പിക്കുന്നതിന് വിദഗ്ധ സമിതിയുമായി കൂടിയാലോചന നടത്തി സർക്കാർ തീരുമാനം കൈക്കൊള്ളുമോ?

കണ്ണൂര്‍ ജില്ലയിലെ കല്ല്യാശ്ശേരി മണ്ഡലത്തില്‍ നിന്നും എത്ര സ്കൂളുകളാണ് നാളിതുവരെയായി ചാലഞ്ച് ഫണ്ട് അനുവദിക്കുന്നതിന് പ്രൊപ്പോസല്‍ സമര്‍പ്പിച്ചിട്ടുള്ളത്; വിശദമാക്കാമോ;

പ്രസ്തുത മണ്ഡലത്തിലെ എത്ര സ്കൂളുകള്‍ക്ക് ചാലഞ്ച് ഫണ്ട് അനുവദിച്ച് ഉത്തരവായിട്ടുണ്ടെന്നും ഇനി എത്ര സ്കൂളുകള്‍ക്ക് അനുവദിക്കാന്‍ ബാക്കിയുണ്ടെന്നും അറിയിക്കുമോ; വിശദമാക്കാമോ;

ഈ ഫണ്ട് അനുവദിച്ച് പ്രവൃത്തി പൂര്‍ത്തിയായ കല്ല്യാശ്ശേരി മണ്ഡലത്തിലെ സ്കൂളുകള്‍ ഏതൊക്കെയാണെന്നും എത്ര രൂപ വീതമാണ് ഓരോ സ്കൂളിനും ചാലഞ്ച് ഫണ്ടായി അനുവദിച്ചതെന്നും അറിയിക്കുമോ; വിശദമാക്കാമോ;

പൂര്‍ത്തിയായ പ്രവൃത്തികള്‍ക്ക് ചാലഞ്ച് ഫണ്ട് ഇനിയും നല്‍കാനുള്ള സ്കൂളുകള്‍ ഏതൊക്കെയാണെന്നും പ്രസ്തുത സ്കൂളുകള്‍ക്ക് ഫണ്ട് ലഭ്യമാക്കാന്‍ നടപടി സ്വീകരിച്ചിട്ടുണ്ടോയെന്നും അറിയിക്കുമോ?

ഹയര്‍ സെക്കൻഡറി, എസ്.എസ്.എല്‍.സി, കെ-ടെറ്റ്, സെറ്റ് പരീക്ഷകളുടെ സര്‍ട്ടിഫിക്കറ്റുകള്‍ തിരുത്തുന്നതിന് നല്‍കുന്ന അപേക്ഷകളിന്മേല്‍ താമസം വിനാ സര്‍ട്ടിഫിക്കറ്റുകള്‍ ലഭ്യമാക്കുന്നതിന് നടപടി സ്വീകരിച്ചിട്ടുണ്ടോ; വിശദാംശം ലഭ്യമാക്കാമോ?

സംസ്ഥാനത്ത് അഞ്ചോ അതിലതികമോ വര്‍ഷങ്ങളായി വിദൂര പ്രദേശങ്ങളിൽ അംഗീകാരം ലഭിക്കാതെ പ്രവര്‍ത്തിക്കുന്ന സ്കൂളുകള്‍ക്ക് അംഗീകാരം നല്കാന്‍ നടപടികള്‍ സ്വീകരിക്കുമോ;

അംഗീകാരം ലഭിക്കാത്തത് മൂലം നല്ല നിലയില്‍ ഗ്രാമ പ്രദേശങ്ങളില്‍ പ്രവര്‍ത്തിക്കുന്ന വിദ്യാലയങ്ങള്‍ക്ക് സുഗമമായി പ്രവര്‍ത്തിക്കാന്‍ കഴിയാത്തത് പരിഗണിച്ച് അംഗീകാരം നല്കാന്‍ എന്തൊക്കെ നടപടികള്‍ സ്വീകരിക്കുമെന്ന് വ്യക്തമാക്കുമോ;

അംഗീകാരം ഇല്ലാതെ സംസ്ഥാനത്ത് പ്രവര്‍ത്തിക്കുന്ന സ്കൂളുകളുടെ ജില്ല തിരിച്ചുള്ള പട്ടിക നല്‍കുമോ; ഇവ ഓരോന്നും എത്ര കൊല്ലമായി പ്രവര്‍ത്തിക്കുന്നുവെന്ന് വ്യക്തമാക്കുമോ?

ഹയര്‍ സെക്കന്‍ഡറി സര്‍ട്ടിഫിക്കറ്റുകളുടെ അച്ചടിയ്ക്കും വിതരണത്തിനും ഏര്‍പ്പെടുത്തിയ സംവിധാനങ്ങള്‍ എന്താണെന്ന് വിശദമാക്കുമോ?

ഈ സർക്കാർ അധികാരത്തിൽ വന്നതിനുശേഷം അടിസ്ഥാന സൗകര്യങ്ങൾ വർദ്ധിപ്പിക്കുന്നതിന് പ്ലാൻ ഫണ്ടിൽ നിന്നും ഏതെല്ലാം സ്കൂളുകൾക്ക് എത്ര രൂപ വീതം നൽകിയിട്ടുണ്ടെന്ന് ജില്ല തിരിച്ച് വ്യക്തമാക്കാമോ;

പ്ലാൻ ഫണ്ടിൽ നിന്ന് സ്കൂളുകൾക്ക് ഫണ്ട് അനുവദിക്കുന്നതിനുള്ള മാനദണ്ഡങ്ങൾ എന്തൊക്കെയാണെന്ന് വ്യക്തമാക്കാമോ;

വിദ്യാലയങ്ങളുടെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിന് പ്ലാൻ ഫണ്ടിൽ നിന്ന് തുക ലഭ്യമാക്കുന്നതിന് അപേക്ഷ സമർപ്പിക്കേണ്ടതുണ്ടോ; എങ്കിൽ അപേക്ഷ സമർപ്പിക്കേണ്ട രീതി വിശദമാക്കാമോ;

ഒരു വർഷം പ്ലാൻ ഫണ്ടിൽ നിന്ന് സ്കൂളുകൾക്ക് എത്ര തുകയാണ് അനുവദിക്കുന്നതെന്നും ഏതെല്ലാം ആവശ്യങ്ങൾക്കാണ് തുക വിനിയോഗിക്കേണ്ടതെന്നും വ്യക്തമാക്കാമോ?

28.02.2019 ലെ പൊതു വിദ്യാഭ്യാസ വകുപ്പിന്റെ സ.ഉ 03/2019/പൊ.വി.വ. പ്രകാരം നടപ്പിലാക്കിയ കെ.ഇ.ആർ ഭേദഗതികളുടെയും തുടര്‍ന്നുളള ഉത്തരവുകളുടെയും അടിസ്ഥാനത്തില്‍ കേരളത്തിലെ എയ്ഡഡ് സ്കൂളുകളില്‍ 2016-17 മുതല്‍ 2019-20 വരെ ഒഴിവ് വന്ന അധ്യാപക തസ്തികകളില്‍ എത്ര അധ്യാപക തസ്തികകള്‍ സര്‍ക്കാരിന് വിട്ടു നല്‍കിയിട്ടുണ്ട്; വ്യക്തമാക്കാമോ;

തസ്തിക തിരിച്ചുള്ള കണക്ക് ലഭ്യമാക്കാമോ;

ജില്ലാതലത്തിൽ ഇത് സംബന്ധിച്ച് ഒഴിവുകളുടെ എണ്ണം കണക്കാക്കിയിട്ടുണ്ടോ; വിശദമാക്കാമോ;

ഈ ഒഴിവുകളിൽ സംരക്ഷിത അധ്യാപകരുടെ പുനർവിന്യാസം നടത്തിയിട്ടുണ്ടോ;

സംരക്ഷിത അധ്യാപകരുടെ പുനർവിന്യാസത്തിനുശേഷവും തസ്തികകൾ ഒഴിഞ്ഞുകിടക്കുന്നുണ്ടോ; എങ്കിൽ പ്രസ്തുത തസ്തികകളിൽ അധ്യാപകരെ നിയമിക്കുന്നതിനുളള നടപടികൾ സ്വീകരിച്ചിട്ടുണ്ടോ; അധ്യയനം മുടങ്ങാതിരിക്കാൻ ദിവസവേതനാടിസ്ഥാനത്തിൽ നിയമനം നടത്താൻ മാനേജർമാർക്ക് അനുമതി നൽകി ഉത്തരവ് പുറപ്പെടുവിക്കുമോ; വ്യക്തമാക്കുമോ?

ഗുരുവായൂര്‍ മണ്ഡലത്തില്‍ സര്‍ക്കാര്‍ പ്രൈമറി സ്കൂള്‍, ഹൈസ്കൂള്‍, ഹയര്‍സെക്കണ്ടറി സ്കൂള്‍ എന്നിവയില്‍ ഒഴിവുള്ള അധ്യാപക തസ്തികകളുടെ വിവരങ്ങള്‍ ലഭ്യമാക്കാമോ;

അധ്യാപക തസ്തികകളിലെ ഒഴിവുകള്‍ നികത്തുന്നതിന് സ്വീകരിച്ചിട്ടുള്ള നടപടികള്‍ വ്യക്തമാക്കാമോ;

സ്കൂള്‍ തൂറക്കുന്നതിന് മുമ്പായി ഒഴിവുള്ള അധ്യാപക തസ്തികകളിലേയ്ക്ക് നിയമനം നടത്തുന്നതിന് നടപടി സ്വീകരിക്കുമോ?

പാലക്കാട് ജില്ലയില്‍ യു.പി.എസ്.എ. തസ്തികയില്‍ എത്ര ഒഴിവുകള്‍ നിലവിലുണ്ടെന്നും എത്ര ഒഴിവുകള്‍ പി.എസ്.സി.ക്ക് റിപ്പോര്‍ട്ട് ചെയ്തിട്ടുണ്ടെന്നും അറിയിക്കാമോ;

നിലവിലുള്ള ഒഴിവുകള്‍ ഏതെല്ലാം സ്കൂളുകളിലാണെന്ന് അറിയിക്കാമോ?

തിരൂരങ്ങാടി മണ്ഡലത്തിലെ ജി.എം.യു.പി. സ്കൂൾ, കൊടിഞ്ഞിയിൽ പ്രധാന അദ്ധ്യാപകർ ഉൾപ്പെടെ 11 അദ്ധ്യാപകരുടെ തസ്തികകൾ ഒഴിഞ്ഞു കിടക്കുന്നത് ശ്രദ്ധയിൽപ്പെട്ടിട്ടുണ്ടോ;

നവംബർ 1 ന് മുന്‍പ് പ്രസ്തുത തസ്തികകളിൽ സ്ഥിര നിയമനം നടത്തുന്നതിന് നടപടി സ്വീകരിക്കുമോ;

ഇല്ലെങ്കിൽ ദിവസവേതന അടിസ്ഥാനത്തിൽ അദ്ധ്യാപകരെ നിയമിക്കുന്നതിന് അനുമതി നൽകുമോ?

പൊതു വിദ്യാഭ്യാസ വകുപ്പില്‍ പത്തനംതിട്ട ജില്ലയിലെ എച്ച്.എസ്.എ മലയാളം അദ്ധ്യാപക തസ്തികയിൽ 01/11/2011 ന് ശേഷം അന്തര്‍ ജില്ലാ സ്ഥലമാറ്റം, ബൈപ്രമോഷന്‍ എന്നീ വിഭാഗങ്ങളില്‍ നിയമനം നടന്നിട്ടുണ്ടോ; വിശദമാക്കാമോ;

ഇത്തരത്തിൽ നിയമനം നടത്തിയിട്ടുണ്ടെങ്കിൽ എത്രപേർക്ക് വീതം നിയമനം നല്കി എന്ന് അറിയിക്കാമോ; ബന്ധപ്പെട്ട നിയമന ഉത്തരവുകളുടെ പകർപ്പ് ലഭ്യമാക്കാമോ;

പൊതു വിദ്യാഭ്യാസ വകുപ്പിന് കീഴില്‍ പത്തനംതിട്ട ജില്ലയില്‍ 01/11/2011 ന് ശേഷം നിയമിതരായ അദ്ധ്യാപകര്‍ക്ക് അന്തര്‍ ജില്ലാ സ്ഥലമാറ്റം അനുവദിച്ചിട്ടുണ്ടോ; വിശദമാക്കാമോ;

അന്തര്‍ ജില്ലാ സ്ഥലമാറ്റം അനുവദിച്ചിട്ടുണ്ടെങ്കില്‍ എത്രപേര്‍ക്ക് ഏതെല്ലാം ജില്ലകളിലേക്കാണ് സ്ഥലമാറ്റം അനുവദിച്ചത് എന്ന് വെളിപ്പെടുത്താമോ? സ്ഥലമാറ്റ ഉത്തരവുകളുടെ പകര്‍പ്പ് ലഭ്യമാക്കാമോ;

മേല്‍പ്പടി അന്തര്‍ ജില്ലാ സ്ഥലമാറ്റം അനുവദിച്ചതിനെത്തുടര്‍ന്ന് സംജാതമായ ഒഴിവുകള്‍ ഓരോന്നും ഏത് രീതിയിലാണ് നികത്തിയത് എന്ന് വെളിപ്പെടുത്താമോ; ഉത്തരവുകളുടെ പകർപ്പ് ലഭ്യമാക്കാമോ?

സര്‍ക്കാര്‍ സ്കൂളുകളില്‍ ഏതെല്ലാം തസ്തികകളില്‍ ഒഴിവുകള്‍ നിലവിലുണ്ടെന്ന് ജില്ല തിരിച്ച് വ്യക്തമാക്കാമോ;

ഒഴിവുകള്‍ നിലവിലുണ്ടെങ്കില്‍ അവയില്‍ നിയമനം നടത്തുന്നതിന് എന്തെല്ലാം നടപടികളാണ് സര്‍ക്കാര്‍ സ്വീകരിച്ചിട്ടുള്ളതെന്ന് വ്യക്തമാക്കാമോ?

കേരളത്തിലെ ഹൈസ്കൂളുകളിൽ ട്രാൻസ്ഫർ മുഖേനയും റിട്ടയർമെന്റ് മുഖേനയും ഉണ്ടായിട്ടുള്ള ഒഴിവുകളിൽ അധ്യാപകരെ നിയമിക്കാത്ത കാര്യം ശ്രദ്ധയിൽപ്പെട്ടിട്ടുണ്ടോ;

ഇപ്രകാരം ഒഴിവുകൾ നികത്താതെ ഇരിക്കുന്നത് വിദ്യാർത്ഥികളുടെ പഠനത്തെ ബാധിക്കുന്നതിനാൽ ഇത് പരിഹരിക്കാൻ അടിയന്തര നടപടി സ്വീകരിക്കുമോ; വ്യക്തമാക്കുമോ?

അസിസ്റ്റന്റ് ലേബർ ഓഫീസർ ഗ്രേഡ് II തസ്തികയിലേക്ക് പി.എസ്.സി. മുഖേന നേരിട്ടും തസ്തികമാറ്റം വഴിയും നിയമനം നടത്തുന്നതിന്റെ അനുപാതം വ്യക്തമാക്കാമോ;

ലേബർ ഓഫീസര്‍ ഗ്രേഡ് II കേഡർ സ്ട്രെങ്ത് വ്യക്തമാക്കാമോ;

ലേബർ ഓഫീസർ ഗ്രേഡ് II ആകെ തസ്തികകളിൽ പി.എസ്.സി. വഴി നേരിട്ടും തസ്തിക മാറ്റം വഴിയും നിയമനം ലഭിച്ചവരുടെ എണ്ണവും വിശദാംശങ്ങളും വ്യക്തമാക്കാമോ;

പ്രസ്തുത തസ്തികകളുടെ പി.എസ്.സി. വഴിയുള്ള നേരിട്ടുള്ള നിയമനവും തസ്തികമാറ്റം വഴിയുള്ള നിയമനവും തമ്മിലുള്ള അനുപാതം വ്യത്യാസപ്പെടുത്തുന്ന വിഷയം പരിഗണനയിൽ ഉണ്ടോ; വ്യക്തമാക്കാമോ?

സംസ്ഥാനത്ത് തൊഴിലാളികള്‍ക്ക് മിനിമം വേതനം ഉറപ്പാക്കാന്‍ കഴിഞ്ഞ സര്‍ക്കാര്‍ എന്തെല്ലാം കര്‍മ്മ പദ്ധതിയാണ് തയ്യാറാക്കിയത്; വിശദമാക്കുമോ;

എന്തെല്ലാം ലക്ഷ്യങ്ങളാണ് പ്രസ്തുത പദ്ധതി വഴി കൈവരിക്കാന്‍ ഉദ്ദേശിച്ചത്; വിശദാംശങ്ങള്‍ ലഭ്യമാക്കുമോ;

പ്രസ്തുത പദ്ധതി നടത്തിപ്പിന് എന്തെല്ലാം സംവിധാനങ്ങളാണ് ഒരുക്കിയിരിക്കുന്നത്; വിശദമാക്കുമോ;

ഈ പദ്ധതി നിര്‍വ്വഹണത്തില്‍ എന്തെല്ലാം ലക്ഷ്യങ്ങള്‍ കൈവരിച്ചിട്ടുണ്ട്; വിശദമാക്കുമോ?

സംസ്ഥാനത്ത് തൊഴിൽ നൈപുണ്യ വികസനത്തിനും പ്രോത്സാഹനത്തിനുമായി രൂപീകരിച്ച പദ്ധതികൾ വിശദമാക്കാമോ;

പ്രസ്തുത പദ്ധതികളുടെ പുരോഗതി വിലയിരുത്തിയിട്ടുണ്ടോ; എങ്കില്‍ വിശദവിവരം നല്‍കാമോ;

പ്രസ്തുത പദ്ധതികൾ വിഭാവനം ചെയ്ത പ്രകാരം തൊഴിൽ നല്കാൻ സാധിച്ചിട്ടുണ്ടോ; ഇല്ലെങ്കിൽ കാരണം വിശദമാക്കാമോ;

സർക്കാർ നിരവധി പദ്ധതികൾ പ്രഖ്യാപിച്ചിട്ടും രാജ്യത്തെ ഏറ്റവും കൂടുതൽ തൊഴിലില്ലായ്മ നിരക്കുള്ള സംസ്ഥാനമായി കേരളം നിലനില്ക്കുന്നതായ ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ കാരണം വ്യക്തമാക്കാമോ?

കോഴിക്കോട് ചക്കോരത്തുകുളം ഇ.എസ്.ഐ. കെട്ടിടം ഇടിഞ്ഞുവീണ് പ്രവര്‍ത്തനക്ഷമമല്ലാതായത് ശ്രദ്ധയില്‍പ്പെട്ടിട്ടുണ്ടോ; ഇത് പരിഹരിക്കുന്നതിന് പദ്ധതി തയ്യാറാക്കിയിട്ടുണ്ടോ; വിശദമാക്കുമോ;

പ്രസ്തുത വിഷയത്തില്‍ കേന്ദ്രസര്‍ക്കാരിന്റെ സഹായം ലഭ്യമാക്കുന്നതിന് നടപടി സ്വീകരിച്ചിട്ടുണ്ടോ; വ്യക്തമാക്കുമോ?

സംസ്ഥാന സര്‍ക്കാര്‍ നടപ്പിലാക്കിയ ശരണ്യ പദ്ധതിയുടെ വിശദാംശം ലഭ്യമാക്കാമോ;

പ്രസ്തുത പദ്ധതിയിലൂടെ എത്ര സ്ത്രീകള്‍ക്ക് പ്രയോജനം ലഭിച്ചുവെന്ന് വിശദീകരിക്കാമോ?

സര്‍ക്കാര്‍, അര്‍ദ്ധ സര്‍ക്കാര്‍, പൊതുമേഖല സ്ഥാപനങ്ങള്‍ എന്നിവയിലെ താല്‍ക്കാലിക നിയമനങ്ങള്‍ എംപ്ലോയ്‍മെന്റ് എക്സ്ചേ‍ഞ്ച് വഴി ആയിരിക്കണമെന്ന നിയമം നിലവിലുണ്ടോ;

സര്‍ക്കാര്‍ ഉത്തരവുകളുടെ അടിസ്ഥാനത്തില്‍ സര്‍ക്കാര്‍ സ്ഥാപനങ്ങളില്‍ താല്‍ക്കാലിക നിയമനങ്ങള്‍ നടത്തുന്നുണ്ടോ;

എല്ലാ താല്‍ക്കാലിക നിയമനങ്ങളും എംപ്ലോയ്‍മെന്റ് എക്സ്ചേഞ്ച് വഴിയാക്കുന്നതിന് പുതിയ നിയമം നിര്‍മ്മിക്കുവാന്‍ നടപടി സ്വീകരിക്കുമോ?

സംസ്ഥാനത്ത് തൊഴിലാളികളുടെ അവകാശങ്ങള്‍ കവര്‍ന്നെടുക്കുന്ന കേന്ദ്ര സര്‍ക്കാരിന്റെ പുതിയ ലേബർ കോഡിനെതിരെ എന്തെല്ലാം നടപടികളാണ് കൈക്കൊണ്ടിട്ടുള്ളതെന്ന് വിശദമാക്കാമോ;

പ്രസ്തുത നിയമം പ്രാബല്യത്തില്‍ വരുമ്പോൾ അത് സംസ്ഥാനത്തെ ഏതൊക്കെ രീതിയിലാണ് ബാധിക്കുകയെന്ന് വിശദമാക്കാമോ;

ഈ കോഡുകൾക്കെതിരെ സംസ്ഥാന സർക്കാർ കേന്ദ്രത്തിന് രേഖാമൂലം വിയോജിപ്പ് രേഖപ്പെടുത്തിയിട്ടുണ്ടോ എന്ന് വ്യക്തമാക്കാമോ?

സംസ്ഥാനത്ത് വിവിധ ക്ഷേമനിധി ബോര്‍ഡുകളില്‍ അംഗങ്ങളായിട്ടുള്ള തൊഴിലാളികളില്‍ കോവിഡ് ബാധിച്ചവര്‍ക്ക് ചികി‍ത്സ ധനസഹായവും മരണപ്പെട്ടവരുടെ ആശ്രിതര്‍ക്ക് മരണാനന്തര സഹായവും നല്‍കുന്നതിന് നടപടി സ്വീകരിക്കുമോ; വിശദമാക്കാമോ;

ഇതിനായി ഏതെങ്കിലും പദ്ധതി ആവിഷ്കരിച്ചിട്ടുണ്ടോ; വ്യക്തമാക്കാമോ;

സംസ്ഥാനത്ത് ക്ഷേമനിധി ബോര്‍ഡുകളില്‍ പരാതി പരിഹാര ഹെല്‍പ്പ് ലൈനുകള്‍ ആരംഭിക്കുന്നതിന് നടപടി സ്വീകരിക്കുമോ;

ക്ഷേമനിധി ബോര്‍ഡുകളില്‍ ഓണ്‍ലൈന്‍ സേവനങ്ങള്‍ ലഭ്യമാക്കുന്നതിന് നടപടി സ്വീകരിക്കുമോ; വിശദാംശം ലഭ്യമാക്കാമോ?

വാഹനങ്ങളുടെ ടയർ സംബന്ധമായ ജോലികൾ ചെയ്യുന്ന തൊഴിലാളികൾക്ക് ഏതെങ്കിലും തൊഴിലാളി ക്ഷേമനിധി മുഖേന ആനുകൂല്യങ്ങൾ നൽകുന്നുണ്ടോ; ഇല്ലെങ്കിൽ ഇവരെ ക്ഷേമനിധിയിൽ ഉൾപ്പെടുത്താൻ നടപടി സ്വീകരിക്കുമോ;

കോവിഡ് നിയന്ത്രണങ്ങളുടെ പശ്ചാത്തലത്തിൽ അവശ്യ സർവ്വീസുകൾ നടത്തുന്ന വാഹനങ്ങളുടെ ടയർ സംബന്ധമായ ജോലികൾ നിർവ്വഹിക്കുന്ന പ്രസ്തുത തൊഴിൽമേഖലയെ അവശ്യ സർവ്വീസുകളുടെ പട്ടികയിൽ ഉൾപ്പെടുത്തുന്നതിന് നടപടി സ്വീകരിക്കുമോ; വ്യക്തമാക്കുമോ?

കര്‍ഷക താെഴിലാളി ക്ഷേമനിധിയില്‍ അംഗങ്ങളായവര്‍ക്ക് പെന്‍ഷന്‍ ആനുകൂല്യങ്ങള്‍ സമയബന്ധിതമായി നൽകുന്നതിന് എന്തെല്ലാം നടപടികളാണ് സ്വീകരിച്ചിട്ടുളളത് എന്ന് വിശദമാക്കുമോ;

അംഗങ്ങൾക്ക് ഏത് വര്‍ഷം വരെയുളള ആനുകൂല്യങ്ങളാണ് നിലവില്‍ നല്കിയിട്ടുളളതെന്ന് വിശദമാക്കുമോ?

കേരള ബാംബൂ ക്ഷേമനിധി ബോർഡിന്റെ ഒരു ഓഫീസ് തിരുവനന്തപുരം ജില്ലയിലെ ആര്യനാട് പ്രവർത്തനം ആരംഭിക്കുന്നതിനുള്ള നടപടികൾ പൂർത്തീകരിച്ചിട്ടുണ്ടോ; വിശദാംശം നൽകുമോ;

പനമ്പ് നെയ്ത്ത് തൊഴിലാളികൾക്ക് മിനിമം കൂലി അറുന്നൂറ് രൂപ ആക്കുന്നതിനും മുഴുവൻ പനമ്പ് നെയ്ത്ത് തൊഴിലാളികളെയും പ്രൊവിഡന്റ് ഫണ്ട് പദ്ധതിയിൽ ഉൾപ്പെടുത്തുന്നതിനും നടപടി സ്വീകരിക്കുമോ?

സംസ്ഥാനത്തെ ഗാര്‍ഹിക തൊഴിലാളികൾക്ക് തൊഴില്‍ നിയമ പരിരക്ഷയ്ക്ക് എന്തെല്ലാം സംവിധാനങ്ങള്‍ നിലവിലുണ്ട് എന്ന് വ്യക്തമാക്കുമോ;

ഇവര്‍ക്ക് മിനിമം കൂലിയും മറ്റു തൊഴില്‍ പരിരക്ഷയും ലഭിക്കുന്നുണ്ടോ; എങ്കില്‍ എന്തെല്ലാം എന്ന് വ്യക്തമാക്കുമോ;

ഇല്ലെങ്കില്‍ ഇവര്‍ക്ക് തൊഴില്‍ പരിരക്ഷ ഉറപ്പുവരുത്താന്‍ നടപടി സ്വീകരിക്കുമോ എന്ന് വിശദമാക്കുമോ;

സംസ്ഥാനത്ത് സ്ത്രീ തൊഴിലാളികള്‍ പ്രവര്‍ത്തിക്കുന്ന അസംഘടിത മേഖലകളിലെ തൊഴില്‍ ചൂഷണം, തൊഴില്‍ നിയമപരിരക്ഷ ലഭ്യതയില്ലായ്മ എന്നീ പ്രശ്നങ്ങള്‍ പരിഹരിക്കാൻ സ്വീകരിച്ച നടപടികൾ വിശദമാക്കാമോ?

സൂപ്പര്‍ മാര്‍ക്കറ്റുകളിലെയും ഷോപ്പിങ് മാളുകളിലെയും സമാന സ്ഥാപനങ്ങളിലെയും തൊഴിലാളികളുടെ സേവന വേതന വ്യവസ്ഥകള്‍ നിശ്ചയിച്ച് ഉത്തരവ് പുറപ്പെടുവിച്ചിട്ടുണ്ടോ; എങ്കില്‍ ഉത്തരവിന്റെ പകര്‍പ്പ് ലഭ്യമാക്കാമോ;

പ്രസ്തുത സ്ഥാപനങ്ങളില്‍ ജോലി ചെയ്യുന്ന തൊഴിലാളികള്‍ക്ക് അടിസ്ഥാന സൗകര്യം ഒരുക്കുന്നതിന് നടപടി സ്വീകരിച്ചിട്ടുണ്ടോയെന്ന് വ്യക്തമാക്കാമോ?

സംസ്ഥാനത്ത് ഇ.എസ്.ഐ. ഡിസ്‌പെൻസറികള്‍ അനുവദിച്ച് ഉത്തരവായിട്ടുണ്ടോ; എങ്കിൽ വിശദാശങ്ങൾ ലഭ്യമാക്കുമോ;

കൊണ്ടോട്ടിയിൽ ഇ.എസ്.ഐ. ഡിസ്‌പെൻസറി സ്ഥാപിക്കണമെന്ന ആവശ്യത്തിന്മേൽ സ്വീകരിച്ച നടപടി വിശദമാക്കുമോ?

അതിഥി തൊഴിലാളികളുടെ ക്ഷേമം ഉറപ്പുവരുത്തുന്നതിന് സ്വീകരിച്ചിട്ടുള്ള നടപടികള്‍ വ്യക്തമാക്കാമോ;

സംസ്ഥാനത്ത് എത്തുന്ന അതിഥി തൊഴിലാളികളുടെ എണ്ണം എത്രയെന്ന് നിശ്ചയിക്കുവാന്‍ സ്വീകരിച്ചിട്ടുള്ള നടപടികള്‍ എന്തെല്ലാമെന്ന് വിശദമാക്കാമോ?

കോവിഡ് പ്രതിസന്ധിക്ക് ശേഷം അതിഥി തൊഴിലാളികള്‍ തിരികെ വരുമ്പോള്‍ അവരുടെ വിശദാംശങ്ങള്‍ ശേഖരിക്കുന്നതിനും ആരോഗ്യ സുരക്ഷ സൗകര്യവും ക്വാറന്റെെന്‍ സൗകര്യവും നല്‍കുന്നതിനും സ്വീകരിച്ച നടപടികള്‍ വിശദമാക്കാമോ;

ഈ തൊഴിലാളികളെ സംബന്ധിക്കുന്ന വിശദമായ ഡാറ്റാ സര്‍ക്കാരിന്റെ പക്കല്‍ ഉണ്ടോ; വ്യക്തമാക്കുമോ;

സംസ്ഥാന തൊഴില്‍ വകുപ്പില്‍ മൊബെെല്‍ അപ്ലിക്കേഷന്‍ വികസിപ്പിച്ച് അതിഥി തൊഴിലാളികള്‍ സംസ്ഥാനത്തേക്ക് കുടിയേറുന്നതിന് മുമ്പ് തന്നെ രജിസ്റ്റര്‍ ചെയ്യുവാനും അതുവഴി സര്‍ക്കാരിന്റെ ആനുകൂല്യം ലഭിക്കുവാനും സാധിക്കുന്ന തരത്തിലുളള പദ്ധതി ആവിഷ്കരിക്കുവാന്‍ ഉദ്ദേശിക്കുന്നുണ്ടോ; വിശദമാക്കുമോ?

സംസ്ഥാനത്ത് ഏതെല്ലാം ജില്ലകളെ നിലവിൽ നോക്കുകൂലി വിമുക്ത ജില്ലകളായി പ്രഖ്യാപിച്ചിട്ടുണ്ട്; വിശദമാക്കാമോ?

ആലത്തൂര്‍ മണ്ഡലത്തില്‍ അനുവദിച്ച ഇ.എസ്.ഐ. ഡിസ്പെന്‍സറിയുടെ ഭരണാനുമതിയുടെ പകര്‍പ്പ് ലഭ്യമാക്കാമോ;

ഭരണാനുമതി ലഭിച്ച ശേഷം ഡിസ്പെന്‍സറി ആരംഭിക്കുന്നതിന് സ്വീകരിച്ച നടപടികള്‍ അറിയിക്കാമോ;

പ്രസ്തുത ഡിസ്പെന്‍സറി എന്ന് ആരംഭിക്കാന്‍ കഴിയുമെന്ന് വ്യക്തമാക്കാമോ?

ആലപ്പുഴ നിയോജകമണ്ഡലത്തില്‍ തൊഴില്‍ വകുപ്പ് മുഖേന നടപ്പിലാക്കുന്ന പ്രവൃത്തികളുടെ വിശദാംശം ലഭ്യമാക്കുമോ;

പ്രസ്തുത മണ്ഡലത്തില്‍ എംപ്ലോയ്മെന്റ് ഓഫീസ് മുഖേന കരിയര്‍ ഗൈഡന്‍സ് സെന്റര്‍ പ്രവര്‍ത്തിക്കുന്നുണ്ടോ; വിശദാംശം ലഭ്യമാക്കാമോ;

ആലപ്പുഴ മണ്ഡലത്തില്‍ തൊഴില്‍ നൈപുണ്യ പരിശീലനകേന്ദ്രം ആരംഭിക്കുന്നതിന് എന്തൊക്കെ നടപടികളാണ് സ്വീകരിച്ചിട്ടുള്ളത്; വ്യക്തമാക്കാമോ?

നോക്കുകൂലി നിർത്തലാക്കാൻ മുൻ സർക്കാർ എന്തെല്ലാം നടപടികളാണ് സ്വീകരിച്ചതെന്ന് വിശദമാക്കാമോ;

എന്തെല്ലാം ഉദ്ദേശ്യലക്ഷ്യങ്ങളാണ് പ്രസ്തുത നടപടികളിലൂടെ കൈവരിക്കാന്‍ ഉദ്ദേശിച്ചിരുന്നത്; ആയതിന്റെ വിശദാംശങ്ങള്‍ ലഭ്യമാക്കുമോ;

പ്രസ്തുത നടപടിയുടെ നടത്തിപ്പിന് എന്തെല്ലാം സംവിധാനങ്ങളാണ് ഒരുക്കിയിരുന്നതെന്ന് വിശദമാക്കാമോ;

ഈ നടപടികളുടെ നിര്‍വ്വഹണത്തില്‍ എന്തെല്ലാം ലക്ഷ്യങ്ങള്‍ കൈവരിച്ചിട്ടുണ്ട്; വിശദാംശങ്ങള്‍ വ്യക്തമാക്കാമോ?

ചാത്തന്നൂർ ഗവ. ഐ.ടി.ഐ.യിലെ നിലവിലുള്ള അടിസ്ഥാന സൗകര്യങ്ങൾ എന്തെല്ലാമെന്നുള്ള വിവരങ്ങൾ ലഭ്യമാക്കാമോ;Assembly;

പ്രസ്തുത ഐ.ടി.ഐ.യിൽ നിലവിലുള്ള ട്രേഡുകൾ ഏതൊക്കെയാണെന്നും ഓരോ ട്രേഡിലും എത്ര കുട്ടികൾക്ക് അഡ്മിഷൻ നൽകാനാകുമെന്നും അറിയിക്കാമോ;

ഐ.ടി.ഐ.യിലെ ഏതെല്ലാം ട്രേഡുകൾക്ക് എൻ.സി.വി.ടി. അംഗീകാരമുണ്ട് എന്ന് വ്യക്തമാക്കാമോ;

2016 മുതൽ 2021 വരെയുള്ള കാലയളവിൽ പുതുതായി ഏതെങ്കിലും ട്രേഡുകൾ ചാത്തന്നൂർ ഗവ. ഐ.ടി.ഐ.യിൽ ആരംഭിക്കുകയോ നിലവിലുള്ള ഏതെങ്കിലും ട്രേഡ് രണ്ട് യൂണിറ്റായി ഉയർത്തുകയോ ചെയ്തിട്ടുണ്ടോ; വിശദമാക്കാമോ?

കുറ്റ്യാടി മണ്ഡലത്തിലെ മണിയൂര്‍ (വടകര), വില്യാപ്പള്ളി ഐ.ടി.ഐ.കളുടെ കെട്ടിട നിര്‍മ്മാണത്തിനുള്ള എസ്റ്റിമേറ്റിന് സാങ്കേതിക അനുമതി ലഭ്യമായിട്ടുണ്ടോ എന്നറിയിക്കാമോ;

പ്രസ്‌തുത പ്രവൃത്തിയുടെ നിര്‍വ്വഹണം ഏതു ഏജന്‍സി മുഖേനയാണ് നടത്താന്‍ ഉദ്ദേശിക്കുന്നത് എന്നറിയിക്കാമോ;

കെട്ടിടത്തിന് ആധുനിക രീതിയില്‍ ആര്‍ക്കിടെക്ച്ചറല്‍ രൂപകല്പന നടത്താന്‍ ഉദ്ദേശിക്കുന്നുണ്ടോ എന്ന് വ്യക്തമാക്കുമോ?

വെള്ളമുണ്ട ഗവണ്‍മെന്റ് ഐ.ടി.ഐ. ക്ക് സ്വന്തമായി കെട്ടിടം നിര്‍മ്മിക്കുന്നതിന്റെ നിലവിലെ സ്ഥിതി അറിയിക്കാമോ;

നിലവില്‍ ഐ.ടി.ഐ. ക്ക് എത്ര സ്ഥലം സ്വന്തമായുണ്ട്; വ്യക്തമാക്കുമോ;

പ്രസ്തുത ഐ.ടി.ഐ. ക്ക് സ്വന്തമായി കെട്ടിടം നിര്‍മ്മിക്കുന്നതിന് തുക അനുവദിക്കുന്നതിനുള്ള നടപടി സ്വീകരിക്കുമോ?

സംസ്ഥാനത്ത് എസ്.എസ്.എല്‍.സി.മുതല്‍ ഉന്നത വിദ്യാഭ്യാസം വരെ നേടിയ തൊഴില്‍രഹിതരായ എത്ര പേര്‍ എംപ്ലോയ്മെന്റ് എക്സ്ചേഞ്ചില്‍ പേര് രജിസ്റ്റര്‍ ചെയ്തിട്ടുണ്ട്; മേല്‍പ്പറഞ്ഞവരില്‍ പുരുഷന്മാര്‍ എത്രയെന്നും സ്ത്രീകള്‍ എത്രയെന്നും വ്യക്തമാക്കുമോ;

മേല്‍പ്പറഞ്ഞവരില്‍ എസ്.എസ്.എല്‍.സി, ഹയര്‍ സെക്കന്ററി, പ്രൊഫഷണല്‍ (ഇനം തിരിച്ച്), ഡിഗ്രി, പി.ജി., പി.എച്ച്.ഡി. യോഗ്യതകളുള്ളവര്‍ എത്ര വീതമുണ്ടെന്ന അറിയിക്കിുമോ ;അതില്‍ സ്ത്രീകളും പുരുഷന്മാരും എത്ര വീതമെന്നും വ്യക്തമാക്കുമോ;

പ്രസ്തുത തൊഴിലന്വേഷകരുടെ എണ്ണം ഏറ്റവും കൂടുതലും കുറവും ഏത് ജില്ലകളിലാണെന്ന് വെളിപ്പെടുത്തുമോ;

എറണാകുളം ജില്ലയില്‍ എത്രപേരുണ്ടെന്ന് അറിയിക്കുമോ; വിശദാംശം നല്‍കുമോ?

സംസ്ഥാന സർക്കാരിന് കീഴിൽ വരുന്നതും എന്നാൽ പി.എസ്.സി. മുഖേന നിയമനം നടത്താത്തതുമായ എല്ലാ സ്ഥിരം, താൽക്കാലിക, കോൺട്രാക്ട്, ദിവസവേതന തസ്തികകളിലേക്കുള്ള നിയമനങ്ങൾ സംവരണവും മറ്റ് അംഗീകൃത മാനദണ്ഡങ്ങളും പാലിച്ച് എംപ്ലോയ്മെന്റ് എക്സ്ചേഞ്ച് വഴി നടത്തുന്നതിന് പര്യാപ്തമായ ഒരു നിയമം നിർമ്മിക്കുന്നത് പരിഗണനയിൽ ഉണ്ടോ;

ഇതുസംബന്ധിച്ച് എംപ്ലോയ്മെന്റ് ഡയറക്ടർ സർക്കാരിലേക്ക് പ്രൊപ്പോസൽ നൽകിയിട്ടുണ്ടോ; ഇതിന്റെ അടിസ്ഥാനത്തിൽ എന്ത് നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ;

തൊഴിൽ നേടുന്നതിനായി യോഗ്യതകൾ രജിസ്റ്റർ ചെയ്ത് വർഷങ്ങളായി കാത്തിരിക്കുന്ന സംവരണ വിഭാഗങ്ങൾ, അംഗപരിമിതർ തുടങ്ങിയ വിഭാഗം ഉദ്യോഗാർഥികൾക്ക് അർഹതപ്പെട്ട തൊഴിൽ അവസരങ്ങൾ ലഭ്യമാക്കുന്നതിനും സാമൂഹ്യനീതി ഉറപ്പാക്കുന്നതിനുമായി പ്രസ്തുത നിയമം അടിയന്തരമായി നടപ്പാക്കുന്നതിന് നടപടി സ്വീകരിക്കുമോ; വിശദാംശം നൽകുമോ?

മലപ്പുറം ജില്ലയിലെ വിവിധ എംപ്ലോയ്മെൻറ് എക്സ്ചേഞ്ചുകളിൽ പേര് രജിസ്റ്റർ ചെയ്തവരുടെ എണ്ണം എത്രയെന്ന് എക്സ്ചേഞ്ച് തിരിച്ച് വിവരം ലഭ്യമാക്കാമോ;

എംപ്ലോയ്മെൻറ് എക്സ്ചേഞ്ചുകൾ വഴി നികത്തുന്ന നിയമനങ്ങൾക്ക് ഒരു ഒഴിവിന് എത്ര വീതം അപേക്ഷകരെ ആണ് പരിഗണിക്കുക എന്ന് അറിയിക്കാമോ; ഓരോ ഒഴിവിലേക്കും പരിഗണിക്കുന്ന അപേക്ഷകരുടെ അനുപാതം എംപ്ലോയ്മെൻറ് എക്സ്ചേഞ്ചുകള്‍ തിരിച്ച് വിവരം ലഭ്യമാക്കാമോ;

നിലമ്പൂർ ടൗൺ എക്സ്ചേഞ്ചിൽ രജിസ്റ്റർ ചെയ്തവരുടെ എണ്ണം മലപ്പുറം ജില്ലയിലെ മറ്റു എക്സ്ചേഞ്ചുകളെ അപേക്ഷിച്ച് ഇരട്ടിയിലധികം ആയതിനാൽ ഓരോ ഒഴിവിലേക്കും ഒന്നിൽ കൂടുതൽ അപേക്ഷകരെ നിലമ്പൂർ എക്സ്ചേഞ്ചിൽ നിന്നും പരിഗണിക്കാൻ നടപടി സ്വീകരിക്കുമോ എന്ന് വ്യക്തമാക്കാമോ;

നിലമ്പൂർ ടൗൺ എംപ്ലോയ്മെൻറ് എക്സ്ചേഞ്ച് ഇപ്പോൾ പ്രവർത്തിക്കുന്ന കെട്ടിടത്തിന്റെ വിസ്തീർണം എത്ര ചതുരശ്ര അടി ആണെന്ന് അറിയിക്കാമോ; പുതുതായി ആരംഭിക്കുന്ന നിലമ്പൂർ മിനി സിവിൽ സ്റ്റേഷനിൽ പ്രസ്‌തുത എക്സ്ചേഞ്ചിനായി നീക്കിവെച്ച സ്ഥലത്തിന്റെ വിസ്തീർണ്ണമടക്കമുള്ള വിവരങ്ങൾ ലഭ്യമാക്കാമോ;

പ്രസ്‌തുത എക്സ്ചേഞ്ചിന് നിലവിലുള്ളതിനേക്കാൾ കുറഞ്ഞ വിസ്തീർണ്ണം ആണ് പുതിയ കെട്ടിടത്തിന് ലഭ്യമാവുന്നതെങ്കില്‍ ആയത് പരിഹരിച്ചില്ലെങ്കിൽ ഉദ്യോഗാർത്ഥികൾക്കും ഉദ്യോഗസ്ഥർക്കും പ്രയാസമുണ്ടാകും എന്ന കാര്യം ശ്രദ്ധയിൽപ്പെട്ടിട്ടുണ്ടോ; ഇക്കാര്യത്തിൽ എന്ത് നടപടി സ്വീകരിക്കും എന്ന് അറിയിക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം എംപ്ലോയ്മെന്റ് മുഖേന എത്ര പേര്‍ക്ക് നിയമനം നല്കിയിട്ടുണ്ടെന്ന് ജില്ല തിരിച്ച് വ്യക്തമാക്കാമോ;

പ്രസ്തുത നിയമനങ്ങളില്‍ പാര്‍ട്ട് ടൈം തസ്തികയിലുള്‍പ്പെടെ സ്ഥിരനിയമനം നല്കിയവ എത്രയെന്ന് വ്യക്തമാക്കാമോ?

16.8.1999 മുതൽ 2003 വരെയുള്ള കാലയളവിൽ എംപ്ലോയ്‌മെന്റ് എക്സ്ചേഞ്ച് മുഖേന താൽക്കാലിക നിയമനം ലഭിച്ച് 18.5.2013ലെ സ.ഉ(പി) 40/13/സാ. നീ. വ. ഉത്തരവുപ്രകാരം പുനർനിയമനം ലഭിച്ച് നിലവിൽ ജോലി ചെയ്യുന്ന ഭിന്നശേഷി ജീവനക്കാരുടെ എണ്ണവും അവരുടെ വിവരങ്ങളും അടങ്ങിയ പുതുക്കിയ ലിസ്റ്റ് ലഭ്യമാക്കുമോ?

സംസ്ഥാനത്ത് തൊഴില്‍ നെെപുണ്യ ആവശ്യകതക്കനുസരിച്ച് തൊഴിലധിഷ്ഠിത വിദ്യാഭ്യാസത്തിന്റെ ഘടനയിലും ഉളളടക്കത്തിലും മാറ്റം വരുത്തുന്നതിന് നടപടികള്‍ സ്വീകരിക്കാനുദ്ദേശിക്കുന്നുണ്ടോ; എങ്കില്‍ വിശദാംശങ്ങള്‍ ലഭ്യമാക്കാമോ;

വ്യത്യസ്ത വകുപ്പുകളെ ഏകോപിപ്പിച്ചുകൊണ്ട് നൂതന സാങ്കേതിക നെെപുണ്യ പരിശീലന പദ്ധതിക്ക് രൂപം നല്‍കിയിട്ടുണ്ടോ; വിശദാംശങ്ങള്‍ നല്‍കാമോ;

സാങ്കേതിക വിദ്യാഭ്യാസം ദേശീയ മാനദണ്ഡങ്ങള്‍ക്ക് അനുസൃതമായി സംവിധാനം ചെയ്യുന്നതിന് എന്തെല്ലാം നടപടികള്‍ സ്വീകരിച്ചു; വിശദമാക്കാമോ?

കോവളം ഇ.എസ്.ഐ. ഡിസ്പെൻസറിയിൽ ഗ്രേഡ് 2 അറ്റന്‍ഡറായ ജെ. അജയകുമാറിനെക്കുറിച്ച് തൊഴിൽ വകുപ്പിലുള്ള എഫ്2/164/2017/എല്‍.ബി.ആര്‍.ഡി. നമ്പർ ഫയലിൽ എന്ത് നടപടിയാണ് സ്വീകരിച്ചിട്ടുള്ളത്; ഇയാൾക്ക് ലഭിച്ച വികലാംഗ സർട്ടിഫിക്കറ്റിന്റെ അർഹതയെപ്പറ്റിയുള്ള പരാതി പരിശോധിച്ചിട്ടുണ്ടോ; ഇക്കാര്യത്തിൽ എന്ത് നടപടി സ്വീകരിച്ചിട്ടുണ്ട്; അറിയിക്കുമോ;

നെയ്യാറ്റിൻകര വികലാംഗ എംപ്ലോയ്മെന്റ് എക്സ്ചേഞ്ചിൽ നിന്നും മാനദണ്ഡങ്ങൾക്ക് വിരുദ്ധമായി ഇദ്ദേഹത്തിന് ഇന്റർവ്യൂ കാർഡ് അയച്ചത് സംബന്ധിച്ച പരാതി പരിശോധിച്ചിട്ടുണ്ടോ; വിശദാംശം നൽകുമോ;

മൂന്ന് വർഷമായി കോവളം ഡിസ്പെൻസറിയിൽ ജോലി ചെയ്യുന്ന ഈ വ്യക്തിയുടെ പോലീസ് വെരിഫിക്കേഷൻ പൂർത്തീകരിച്ചിട്ടുണ്ടോ; കേസിൽ പ്രതിയായ ഇയാൾ ഇപ്പോഴും ജോലിയിൽ തുടരുന്നത് ശ്രദ്ധയിൽപ്പെട്ടിട്ടുണ്ടോ;

അന്തർ ജില്ലാ വകുപ്പ് സ്ഥലം മാറ്റത്തിനായി ഇദ്ദേഹം നൽകിയ അപേക്ഷയിന്മേല്‍ പോലീസ് വെരിഫിക്കേഷൻ റിപ്പോർട്ട് പരിഗണിക്കാതെ മേലുദ്യോഗസ്ഥൻ ശിപാർശ ചെയ്ത നടപടി ശ്രദ്ധയിൽപ്പെട്ടിട്ടുണ്ടോ; വിശദാംശം ലഭ്യമാക്കുമോ?

ഇൻഷുറൻസ് മെഡിക്കൽ സർവ്വീസ് വിഭാഗത്തിലെ ഓപ്പറേഷൻ തീയേറ്റർ ടെക്നീഷ്യൻ ഗ്രേഡ്-2 തസ്തികയിലേക്ക് 2018-ൽ പ്രസിദ്ധീകരിച്ച റാങ്ക് ലിസ്റ്റിൽ നിന്നും നിയമനം നൽകിയവരുടെ എണ്ണം അറിയിക്കാമോ;

ഇ.എസ്.ഐ. ആശുപത്രികളിൽ ഓപ്പറേഷൻ തിയേറ്റർ ടെക്നീഷ്യൻമാരുടെ സേവനം ആവശ്യമായതിനാൽ കൂടുതൽ ആശുപത്രികളിൽ പ്രസ്തുത തസ്തിക സൃഷ്ടിക്കുന്നതിനു നടപടി സ്വീകരിക്കുമോയെന്ന് വ്യക്തമാക്കുമോ;

പ്രസ്തുത റാങ്ക് ലിസ്റ്റിലെ യോഗ്യരായ ഉദ്യോഗാർത്ഥികൾക്ക് അവസരം നഷ്ടപ്പെടാതിരിക്കാന്‍ തുടർ നടപടി സ്വീകരിക്കുമോ?

കണ്ണൂരില്‍ രണ്ട് വര്‍ഷത്തിലധികമായി ഡെപ്യുട്ടി ലേബര്‍ കമ്മീഷണറെ നിയമിക്കാത്തതിനാല്‍ ഗ്രാറ്റുവിറ്റി കണ്‍ട്രോളിംഗ് അതോറിറ്റി മുമ്പാകെയുള്ള തൊഴിലാളികളുടെ ഗ്രാറ്റുവിറ്റി കേസുകള്‍ തീര്‍പ്പാകാത്തത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയത് പരിഹരിക്കുന്നതിന് സ്വീകരിക്കുന്ന നടപടികള്‍ വിശദമാക്കുമോ;

രണ്ട് വര്‍ഷത്തിലധികമായി സ്ഥിരനിയമനം നടക്കാത്ത സാഹചര്യത്തില്‍ വിരമിച്ച പ്രായമായവരും രോഗികളും ഉള്‍പ്പെടെയുള്ള തൊഴിലാളികള്‍ക്ക് ലഭിക്കേണ്ട ഗ്രാറ്റുവിറ്റി ആനുകൂല്യങ്ങള്‍ നാലഞ്ച് വര്‍ഷങ്ങളായി കെട്ടിക്കിടക്കുന്നത് പാവപ്പെട്ട തൊഴിലാളികള്‍ക്ക് വളരെ പ്രയാസമുണ്ടാക്കുന്നതിനാല്‍ പ്രസ്തുത തസ്തികയില്‍ നിയമനം നടത്തി ഗ്രാറ്റുവിറ്റി കേസുകളുടെ നടപടിക്രമങ്ങള്‍ തുടരുന്നതിന് എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ?