സംസ്ഥാനത്തിന്റെ സാമ്പത്തികപുരോഗതിയില്‍ തുറമുഖമേഖലയ്ക്കുള്ള അനിഷേധ്യ പ്രാധാന്യം സര്‍ക്കാര്‍ മനസ്സിലാക്കിയിട്ടുണ്ടോ;

അതിന്റെ അടിസ്ഥാനത്തില്‍ മുന്‍സര്‍ക്കാരിന്റെ കാലത്ത് ഈ മേഖലയുടെ വളര്‍ച്ചക്കായി ആവിഷ്കരിച്ച പദ്ധതികള്‍ എന്തൊക്കെയാണ്;

അഴീക്കല്‍ തുറമുഖം വഴി കണ്ടയ്നറുകളില്‍ കൂടിയുള്ള ചരക്ക് നീക്കം ആരംഭിച്ചിട്ടുണ്ടോ; എങ്കില്‍ കഴിഞ്ഞ സാമ്പത്തിക വര്‍ഷം എത്ര കണ്ടയ്നർ ചരക്കാണ് പ്രസ്തുത തുറമുഖം കൈകാര്യം ചെയ്തത് എന്ന് അറിയിക്കാമോ;

അഴീക്കല്‍ തുറമുഖം ഘട്ടംഘട്ടമായി വികസിപ്പിക്കുന്ന പദ്ധതി ആവിഷ്കരിച്ചിട്ടുണ്ടോ; എങ്കില്‍ ഏതൊക്കെ വികസനപ്രവര്‍ത്തനങ്ങളാണ് ഉദ്ദേശിച്ചിരുന്നത്; വ്യക്തമാക്കാമോ?

വിഴിഞ്ഞം അന്താരാഷ്ട്ര തുറമുഖ കരാറിലെ വ്യവസ്ഥകള്‍ പ്രകാരം പദ്ധതിയുടെ ആദ്യഘട്ട നിര്‍മ്മാണം പൂര്‍ത്തിയാക്കേണ്ട കാലാവധി എന്നായിരുന്നു; അറിയിക്കുമോ;

കണ്‍സ്ട്രക്ഷന്‍ കരാര്‍ വ്യവസ്ഥപ്രകാരം നിശ്ചിത സമയത്ത് പദ്ധതി പൂര്‍ത്തിയാക്കിയില്ലെങ്കില്‍ കമ്പനിയില്‍ നിന്നും പിഴ ഈടാക്കുന്നതിന് വ്യവസ്ഥയുണ്ടോ; എങ്കില്‍ ഇതിനകം കമ്പനിയില്‍ നിന്നും പിഴ ഇനത്തില്‍ എന്ത് തുകയാണ് ഈടാക്കിയത്; പിഴ ഈടാക്കിയില്ലെങ്കില്‍ അതിന്റെ കാരണമെന്താണെന്ന് വ്യക്തമാക്കുമോ?

വിഴിഞ്ഞം തുറമുഖ പദ്ധതിയുടെ ഇപ്പോഴത്തെ അവസ്ഥ എന്താണെന്ന് വ്യക്തമാക്കുമോ;

ഈ പദ്ധതി എന്നത്തേയ്ക്ക് പ്രവര്‍ത്തനസജ്ജമാകുമെന്ന് വ്യക്തമാക്കുമോ?

മുന്‍ യു.ഡി.എഫ്. സര്‍ക്കാരിന്റെ കാലയളവില്‍ നിര്‍മ്മാണ പ്രവര്‍ത്തനങ്ങള്‍ ഉദ്ഘാടനം ചെയ്ത വിഴിഞ്ഞം തുറമുഖ പദ്ധതി അഞ്ച് വര്‍ഷം കഴിഞ്ഞിട്ടും കമ്മീഷന്‍ ചെയ്യുവാന്‍ സാധിച്ചിട്ടില്ലായെന്നത് ഗൗരവമായി വിലയിരുത്തുമോ;

പദ്ധതിയുടെ പുരോഗതി വിലയിരുത്തി സര്‍ക്കാരിന് റിപ്പോര്‍ട്ട് ചെയ്യുന്നതിന് നിയുക്തരായിട്ടുള്ള സ്പെഷ്യല്‍ പ്രോജക്ട് ഡയറക്ടറുടെ റിപ്പോര്‍ട്ട് പ്രകാരം നിലവിലെ സ്ഥിതിയില്‍ പദ്ധതി എന്നത്തേക്ക് പൂര്‍ത്തിയാക്കുവാന്‍ കഴിയുമെന്നാണ് കരുതുന്നതെന്ന് അറിയിക്കുമോ;

പദ്ധതിയുടെ പ്രധാന ഭാഗമായ പുലിമുട്ടിന്റെ ആകെ നീളം എത്ര മീറ്ററാണെന്ന് അറിയിക്കുമോ ; അതില്‍ ഇതിനകം എത്ര മീറ്റര്‍ പുലിമുട്ട് നിര്‍മ്മാണം പൂര്‍ത്തിയാക്കിയെന്ന് അറിയിക്കുമോ;

മേയ് മാസത്തില്‍ ഉണ്ടായ ടൗട്ടെ ചുഴലിക്കാറ്റിന്റെ ഭാഗമായി ഉണ്ടായ കടല്‍ക്ഷോഭത്തില്‍ പുലിമുട്ടിന് നാശനഷ്ടം ഉണ്ടായിട്ടുണ്ടോ; വിശദമാക്കുമോ;

നിര്‍മ്മാണ പ്രവര്‍ത്തികളുടെ ഭാഗമായുള്ള ഡ്രെഡ്ജിംഗ് ആന്റ് റിക്ലമേഷന്‍ പ്രവൃത്തികള്‍ മന്ദഗതിയിലാണോ മുന്നോട്ട് പോകുന്നതെന്ന് അറിയിക്കുമോ; എങ്കില്‍ അതിനുള്ള കാരണമെന്താണെന്ന് വ്യക്തമാക്കുമോ; നിലവില്‍ എത്ര ശതമാനം പ്രവര്‍ത്തികള്‍ പൂര്‍ത്തിയായെന്ന് അറിയിക്കുമോ?

കൊല്ലം തുറമുഖത്തിന്റെ വികസനവുമായി ബന്ധപ്പെട്ട് ഇപ്പോള്‍ സര്‍ക്കാര്‍ നടപ്പാക്കി കൊണ്ടിരിക്കുന്ന പദ്ധതികള്‍ എന്തൊക്കെയാണെന്ന് വിശദീകരിയ്ക്കാമോ;

പ്രസ്തുത തുറമുഖത്തിന്റെ വികസനത്തിനായി സര്‍ക്കാര്‍ ഭാവിയില്‍ നടപ്പാക്കാന്‍ ഉദ്ദേശിയ്ക്കുന്ന പദ്ധതികള്‍ എന്തൊക്കെയാണ്; വിശദമാക്കാമോ;

നിലവില്‍ കൊല്ലം തുറുഖത്തുളള സൗകര്യങ്ങള്‍ എന്തൊക്കെയാണെന്ന് വിശദമാക്കാമോ;

പ്രസ്തുത തുറമുഖത്തേയ്ക്ക് കൂടുതല്‍ കപ്പലുകളെ ആകര്‍ഷിയ്ക്കുന്നതിനായി സ്വീകരിക്കുവാന്‍ ഉദ്ദേശിയ്ക്കുന്ന നടപടികള്‍ എന്തൊക്കെയെന്ന് വിശദമാക്കാമോ?

കോഴിക്കോട് ജില്ലയില്‍ വടകര നിയോജകമണ്ഡലത്തിലെ കുര്യാടിയില്‍ ഒരു ഫിഷിംഗ് ഹാര്‍ബര്‍ നിര്‍മ്മിക്കുന്ന കാര്യം പരിഗണനയിലുണ്ടോയെന്ന് അറിയിക്കാമോ;

ഇതിനായുള്ള പ്രൊപ്പോസല്‍ വകുപ്പിന് ലഭിച്ചിട്ടുണ്ടോ; വിശദാംശങ്ങള്‍ ലഭ്യമാക്കുമോ;

ആയതിന്റെ എസ്റ്റിമേറ്റ് തയ്യാറാക്കിയിട്ടുണ്ടോ; എങ്കില്‍ എത്ര രൂപയാണ് ഇതിനായി ചെലവ് പ്രതീക്ഷിക്കുന്നത്; വ്യക്തമാക്കാമോ?

കേരളത്തിന്റെ തീരക്കടല്‍ വഴി യാത്രായാനങ്ങളുടെ സര്‍വ്വീസ് ആരംഭിക്കുമെന്ന മുന്‍ സര്‍ക്കാരിന്റെ പ്രഖ്യാപനം പ്രാവര്‍ത്തികമാക്കിയിട്ടുണ്ടോ; എങ്കില്‍ ഏതെല്ലാം സ്ഥലങ്ങളെ ബന്ധിപ്പിച്ചാണ് പ്രസ്തുത യാനങ്ങള്‍ സര്‍വ്വീസ് നടത്തുന്നതെന്ന് വ്യക്തമാക്കുമോ?

തീരദേശ പരിപാലന രൂപരേഖയുടെ കരട് സര്‍ക്കാര്‍ തയ്യാറാക്കിയിട്ടുണ്ടോ;

ഉണ്ടെങ്കില്‍ പ്രസ്തുത കരട് രൂപരേഖയിലെ ശിപാര്‍ശകള്‍ എന്തെല്ലാമാണെന്ന് വ്യക്തമാക്കാമോ;

ഇത് സംബന്ധിച്ച് പൊതുജനാഭിപ്രായം തേടിയിട്ടുണ്ടോ; വ്യക്തമാക്കാമോ?

ഹാര്‍ബര്‍ എഞ്ചിനീയറിംഗ് വകുപ്പിലെ സ്റ്റാഫ് പാറ്റേണ്‍ പരിഷ്കരിക്കുന്നത്/വര്‍ദ്ധിപ്പിക്കുന്നതുമായി ബന്ധപ്പെട്ട ഏതെങ്കിലും പ്രൊപ്പോസല്‍ പരിഗണനയില്‍ ഉണ്ടോയെന്ന് വ്യക്തമാക്കാമോ;

ഉണ്ടെങ്കില്‍ ആയതില്‍ ഉള്‍പ്പെട്ട തസ്തികകളുടെ വിവരങ്ങളും ബന്ധപ്പെട്ട ഫയലുകളുടെ നമ്പറും ലഭ്യമാക്കാമോ;

പ്രസ്തുത പ്രൊപ്പോസലുകളുടെ നിലവിലെ പുരോഗതി എന്താണെന്ന് വ്യക്തമാക്കാമോ?

ചവറ മണ്ഡലത്തിലെ നീണ്ടകരയില്‍ പ്രവര്‍ത്തിച്ചിരുന്ന മാരിടൈം ഇന്‍സ്റ്റിറ്റ്യൂട്ടില്‍ നിലവില്‍ ഏതെങ്കിലും കോഴ്സുകള്‍ നടക്കുന്നുണ്ടോ; ഉണ്ടെങ്കില്‍ ഏതൊക്കെ കോഴ്സുകളാണ് നടത്തുന്നതെന്ന് അറിയിക്കുമോ;

പ്രസ്തുത സ്ഥാപനത്തിന്റെ പുതിയ കെട്ടിടം പൂര്‍ത്തീകരണവുമായി ബന്ധപ്പെട്ട് എന്തെങ്കിലും തടസ്സങ്ങള്‍ ശ്രദ്ധയില്‍പ്പെട്ടിട്ടുണ്ടോ; കെട്ടിടം പൂര്‍ത്തീകരിയ്ക്കുന്നതിന് ആവശ്യമായ നടപടി സ്വീകരിയ്ക്കുമോ?

തിരൂര്‍ നിയോജകമണ്ഡലത്തില്‍ തുറമുഖ വകുപ്പിന്റെ കീഴില്‍ നടന്നുവരുന്ന പ്രവര്‍ത്തനങ്ങളുടെ വിശദവിവരം ലഭ്യമാക്കുമോ;

തുറമുഖ വകുപ്പ് സര്‍ക്കാരിന്റെ അനുമതിക്കായി നല്‍കിയ മണ്ഡലത്തിലെ പദ്ധതികളുടെ വിശദവിവരം അറിയിക്കുമോ?

സംസ്ഥാനത്ത് കേരള പ്രാചീന സ്മാരക പുരാവസ്തു സങ്കേത പുരാവശിഷ്ട നിയമപ്രകാരം കൂടുതല്‍ ചരിത്ര സ്മാരകങ്ങളെ കണ്ടെത്തുന്നതിനും അവയെ സംരക്ഷിത സ്മാരകങ്ങളുടെ പട്ടികയില്‍ ഉള്‍പ്പെടുത്തി സംരക്ഷിക്കുന്നതിനുമായി സ്വീകരിക്കുവാന്‍ ഉദ്ദേശിക്കുന്ന നടപടികള്‍ എന്തെല്ലാമാണെന്ന് അറിയിക്കാമോ;

പൈതൃക മ്യൂസിയങ്ങളുടെ സജ്ജീകരണം നിലവില്‍ ഏതെല്ലാം ജില്ലകളിലാണ് പുരോഗമിക്കുന്നതെന്ന് അറിയിക്കാമോ;

പുരാവസ്തുവകുപ്പിന്റെ കീഴില്‍ നിലവില്‍ നടന്നുകൊണ്ടിരിക്കുന്ന ഉദ്ഖനന പ്രവര്‍ത്തനങ്ങള്‍ എന്തൊക്കെയാണെന്ന് അറിയിക്കുമോ?

തിരൂരങ്ങാടി നിയോജകമണ്ഡലത്തിലെ തിരൂരങ്ങാടി ഹജൂര്‍ കച്ചേരി പൈതൃക മ്യൂസിയത്തിന്റെ നിര്‍മ്മാണ പുരോഗതി വിശദമാക്കുമോ?

കണ്ണൂര്‍ ജില്ലയിലെ കടന്നപ്പള്ളി - പാണപ്പുഴ ഗ്രാമ പഞ്ചായത്തിലെ ചന്തപ്പുരയില്‍ 7.96 കോടി രൂപയുടെ ഭരണാനുമതി ലഭിച്ച തെയ്യം മ്യൂസിയത്തിന്റെ പ്രവൃത്തി എപ്പോള്‍ ആരംഭിക്കാന്‍ കഴിയുമെന്ന് വിശദമാക്കാമോ?

സംസ്ഥാനത്തെ ചരിത്രപ്രാധാന്യമുള്ള പൈതൃക സ്മാരകങ്ങളെയും പുരാവസ്തുക്കളെയും സംരക്ഷിക്കുന്നതിന് ആവിഷ്കരിക്കുവാന്‍ ഉദ്ദേശിക്കുന്ന പദ്ധതികള്‍ എന്തെല്ലാമാണെന്ന് അറിയിക്കാമോ;

ചരിത്രസ്മാരകങ്ങളെ സംരക്ഷിക്കുന്നതിനും അവയില്‍ കാലികമായ പരിശോധന നടത്തി ജീര്‍ണ്ണതയും കേടുപാടുകളും ബാധിച്ചവയെ പൂര്‍വ്വസ്ഥിതിയിലാക്കുന്നതിനും അവലംബിക്കുന്ന ശാസ്ത്രീയ മാര്‍ഗ്ഗങ്ങള്‍ എന്തെല്ലാമാണെന്ന് വ്യക്തമാക്കാമോ;

നാടിന്റെ ചരിത്രം, ചരിത്ര സൂക്ഷിപ്പുകള്‍ എന്നിവയുടെ പ്രാധാന്യം സംബന്ധിച്ച് യുവതലമുറയില്‍ അവബോധം സൃഷ്ടിക്കുന്നതിനായി സ്വീകരിക്കുവാന്‍ ഉദ്ദേശിക്കുന്ന നടപടികള്‍ എന്തെല്ലാമാണെന്ന് വിശദമാക്കാമോ?

ജി.ഒ(ആര്‍.റ്റി) 101/2020/സി.എ.ഡി പ്രകാരം ആലുവ നിയോജകമണ്ഡലത്തിലെ കാഞ്ഞൂര്‍ പഞ്ചായത്തിലെ വലിയ തമ്പുരാന്‍ കോവിലകം സംരക്ഷിത സ്മാരകമാക്കുന്നതിനുള്ള പ്രാഥമിക വിജ്ഞാപനം 2/02/2021 ല്‍ അഞ്ചാം നമ്പറായുള്ള സര്‍ക്കാര്‍ ഗസറ്റില്‍ പ്രസിദ്ധീകരിച്ചതിനുശേഷം അന്തിമ വിജ്ഞാപനത്തിനുള്ള എന്തെല്ലാം നടപടികളാണ് പുരാവസ്തു വകുപ്പ് സ്വീകരിച്ചിട്ടുള്ളതെന്ന് വ്യക്തമാക്കാമോ;

അന്തിമ വിജ്ഞാപനം ഉടന്‍ പുറപ്പെടുവിക്കുന്നതിനുള്ള നിര്‍ദ്ദേശം നല്‍കുമോ എന്ന് വ്യക്തമാക്കുമോ;

അന്തിമ വിജ്ഞാപനത്തിനായി എന്തെങ്കിലും തടസ്സം നിലവിലുണ്ടോ എന്ന് വ്യക്തമാക്കുമോ?