ഈ സര്‍ക്കാരിന്റെ കാലത്ത് സഹകരണ ബാങ്കുകളില്‍ നിന്നും വായ്പയെടുത്ത എത്ര പേര്‍ക്കെതിരെ റവന്യൂ റിക്കവറി നടപടി സ്വീകരിച്ചിട്ടുണ്ട്; ജില്ല തിരിച്ചുള്ള വിശദാംശം ലഭ്യമാക്കുമോ;

പ്രസ്തുത കാലയളവില്‍ സഹകരണ ബാങ്കുകളില്‍ നിന്ന് വായ്പയെടുത്ത് വീടോ സ്ഥലമോ ജപ്തി ചെയ്ത എത്ര കേസുകള്‍ നിലവിലുണ്ട്; വിശദാംശം ലഭ്യമാക്കുമോ;

സഹകരണ ബാങ്കില്‍ നിന്നുള്ള വായ്പ തിരിച്ചടവ് മുടങ്ങിയതിനെ തുടര്‍ന്ന് കുടിശ്ശികക്കാരന്‍ ആത്മഹത്യ ചെയ്ത സംഭവങ്ങള്‍ ഉണ്ടായിട്ടുണ്ടോ; എങ്കില്‍ വിശദാംശം ലഭ്യമാക്കുമോ?

കേന്ദ്രത്തിന്റെ പുതിയ സഹകരണ നയം സംബന്ധിച്ച് സംസ്ഥാനങ്ങളുടെ അഭിപ്രായം ആരാഞ്ഞിട്ടുണ്ടോ; പുതിയ ഉണ്ടെങ്കില്‍ സംസ്ഥാന സര്‍ക്കാര്‍ സ്വീകരിച്ച നിലപാട് വ്യക്തമാക്കാമോ;

കേന്ദ്ര നയത്തോടുള്ള സംസ്ഥാനത്തിന്റെ വിയോജിപ്പ് കേന്ദ്ര സർക്കാരിനെ അറിയിച്ചിട്ടുണ്ടോ;

ഇല്ലെങ്കില്‍ സംസ്ഥാനത്തിന്റെ ആശങ്കകള്‍ കേന്ദ്രത്തെ അറിയിക്കുവാന്‍ നടപടി സ്വീകരിക്കുമോ?

സഹകരണ ബാങ്കുകളിലും സംഘങ്ങളിലും ക്രമക്കേടുകള്‍ ആവര്‍ത്തിക്കുന്നതായ റിപ്പോര്‍ട്ടുകളുടെ അടിസ്ഥാനത്തില്‍ തുടര്‍ച്ചയായി രണ്ടു തവണയിലധികം ഒരാള്‍ക്ക് ഭരണ സമിതി അംഗമാകാനാകില്ല എന്ന വ്യവസ്ഥ ഉള്‍പ്പെടുത്തി നിയമഭേദഗതി വരുത്താന്‍ തീരുമാനിച്ചിട്ടുണ്ടോ;

സഹകരണ നിയമത്തില്‍ മറ്റ് എന്തെല്ലാം ഭേദഗതികള്‍ വരുത്തുന്നതിനാണ് ഉദ്ദേശിക്കുന്നത്;

ഇതിനായി സ്വീകരിച്ച നടപടികള്‍ വിശദമാക്കുമോ?

വിദ്യാതരംഗിണി പദ്ധതിയില്‍ ഉള്‍പ്പെടുത്തി സഹകരണ സംഘങ്ങള്‍ വഴി എത്ര പേര്‍ക്ക് വായ്പ നല്‍കിയിട്ടുണ്ട് എന്ന് അറിയിക്കാമോ?

കാസര്‍ഗോഡ് ജില്ലയിൽ കെയർ ഹോം പദ്ധതി പ്രകാരം നിർമിച്ച വീടുകളുടെ എണ്ണം മണ്ഡലം തിരിച്ച് വിശദമാക്കാമോ;

ഏതെല്ലാം സഹകരണ സ്ഥാപനങ്ങളാണ് ഇതിനായി ധനസഹായം നൽകിയതെന്ന് വ്യക്തമാക്കാമോ;

ഓരോ സ്ഥാപനവും എത്ര രൂപ വീതം നൽകിയെന്നും എത്ര വീടുകൾക്കാണ് അനുമതി നൽകിയതെന്നും വ്യക്തമാക്കാമോ?

ചങ്ങനാശ്ശേരി മണ്ഡലത്തില്‍ കെയര്‍ ഹോം പദ്ധതിയില്‍ ഉള്‍പ്പെടുത്തി എത്ര വീടുകള്‍ നിര്‍മ്മിച്ച് നല്‍കിയിട്ടുണ്ടെന്ന് വ്യക്തമാക്കുമോ; വിശദാംശം നല്‍കുമോ?

കെയര്‍ ഹോം പദ്ധതി 2.0 യുടെ പുരോഗതി അറിയിക്കാമോ;

പ്രസ്തുത പദ്ധതി സമയബന്ധിതമായി നടപ്പിലാക്കുന്നതിന് സ്വീകരിച്ച നടപടികള്‍ വിശദമാക്കാമോ?

സഹകരണ സ്ഥാപനങ്ങള്‍ പൊതുനന്മ ഫണ്ട് നീക്കി വെക്കുന്നതിന്റെ വിശദാംശങ്ങള്‍ അറിയിക്കാമോ; വാര്‍ഷിക ലാഭത്തിന്റെ എത്ര ശതമാനമാണ് പൊതുനന്മ ഫണ്ടായി മാറ്റി വെക്കുന്നതെന്ന് അറിയിക്കാമോ;

സഹകരണ സ്ഥാപനങ്ങള്‍ പൊതുനന്മ ഫണ്ട് ചെലവഴിക്കുന്നതിന്റെ മാനദണ്ഡങ്ങള്‍ അറിയിക്കാമോ; പ്രസ്തുത ഫണ്ട് ചെലവഴിക്കുന്നതിന് സഹകരണ വകുപ്പിന്റെ അനുമതി ആവശ്യമുണ്ടോ; പ്രസ്തുത ഫണ്ട് ചെലവഴിച്ചതിന്റെ വിവരങ്ങള്‍ ഓഡിറ്റ് ചെയ്യാറുണ്ടോ; വിശദമാക്കാമോ;

സഹകരണ സംഘങ്ങളുടെ ഭരണസമിതി തീരുമാനമില്ലാതെ പൊതുനന്മ ഫണ്ട് വ്യക്തികള്‍ക്കോ സ്ഥാപനങ്ങള്‍ക്കോ നല്‍കുന്നതിന് സാധിക്കുമോ; പ്രസ്തുത ഫണ്ട് അനുവദിക്കുന്നതിനു സഹകരണ സംഘം പ്രസിഡന്റുമാര്‍ക്കോ ചെയര്‍മാന്‍മാര്‍ക്കോ സഹകരണ നിയമപ്രകാരം പ്രത്യേക അധികാരമുണ്ടോ;

2001 മുതല്‍ 2005 വരെ മലപ്പുറം ജില്ലയിലെ നിലമ്പൂര്‍ സഹകരണ അര്‍ബന്‍ ബാങ്ക് പൊതുനന്മ ഫണ്ടില്‍ നിന്നും എത്ര രൂപയാണ് ചെലവഴിച്ചതെന്നും ഏതെല്ലാം വ്യക്തികള്‍ക്കും സ്ഥാപനങ്ങള്‍ക്കുമാണ് പ്രസ്തുത ഫണ്ട് നല്‍കിയതെന്നുമുള്ള വിവരങ്ങളും അനുവദിച്ച ഇനം ഉള്‍പ്പെടെയുള്ള വിശദാംശങ്ങളും ലഭ്യമാക്കാമോ;

സഹകരണ സംഘങ്ങളുടെ പൊതുനന്മ ഫണ്ട് സഹകരണ സ്ഥാപനങ്ങളുടെ ഭരണസമിതി അംഗങ്ങള്‍ക്കോ ഭരണസമിതി അംഗങ്ങള്‍ ഉള്‍പ്പെട്ട സ്ഥാപനങ്ങള്‍ക്കോ സഹകരണ നിയമപ്രകാരം അനുവദിക്കാനാവുമോ എന്ന് വ്യക്തമാക്കാമോ; ഇപ്രകാരം ഫണ്ട് നല്‍കുന്നത് അധികാര ദുര്‍വിനിയോഗത്തിലും സ്വജന പക്ഷപാതത്തിലും ഉള്‍പ്പെടുന്നതല്ലേ; വ്യക്തമാക്കാമോ?

'മുറ്റത്തെ മുല്ല' പദ്ധതി പ്രകാരം മണലൂര്‍ മണ്ഡലത്തിലെ വിവിധ കുടുംബശ്രീ യൂണിറ്റുകള്‍ക്കായി എത്ര രൂപയുടെ വായ്പ അനുവദിച്ചുവെന്നും എത്ര പേര്‍ക്ക് പ്രസ്തുത പദ്ധതിയുടെ പ്രയോജനം ലഭ്യമായെന്നും അറിയിക്കാമോ?

സഹകരണ മേഖലയുടെ ആഭിമുഖ്യത്തില്‍ കുട്ടനാട്ടില്‍ ടൂറിസം, വിദ്യാഭ്യാസം എന്നീ മേഖലകളില്‍ മുതല്‍ മുടക്കുന്നതിന് നടപടികള്‍ ഉണ്ടാകുമോ;

ആര്‍ ബ്ലോക്ക്‌ ഉള്‍പ്പെടെയുള്ള സ്ഥലങ്ങളില്‍ സഹകരണ കോളേജുകള്‍, ടൂറിസം പദ്ധതികള്‍, നാടന്‍ കലകളുടെ കേന്ദ്രം, കരകൗശല വസ്തുക്കളുടെ വിപണനം എന്നിവ നടപ്പിലാക്കാന്‍ നടപടികള്‍ സ്വീകരിക്കുമോ?

പാറശ്ശാല മണ്ഡലത്തില്‍ കെയര്‍ ഹോം പദ്ധതി പ്രകാരം നിര്‍മ്മിച്ച് നല്‍കിയ വീടുകളുടെ എണ്ണം അറിയിക്കാമോ; എത്ര വീടുകള്‍ നിര്‍മ്മിക്കുന്നതിനാണ് ലക്ഷ്യമിട്ടിട്ടുളളതെന്നും നിലവില്‍ എത്ര വീടുകളുടെ നിര്‍മ്മാണം പൂര്‍ത്തീകരിച്ചുവെന്നും പഞ്ചായത്ത് തിരിച്ചുള്ള കണക്കുകള്‍ അറിയിക്കാമോ;

പ്രസ്തുത മണ്ഡലത്തിലെ സഹകരണ സ്ഥാപനങ്ങള്‍ കെയര്‍ ഹോം പദ്ധതിയിലേക്ക് സംഭാവന നല്‍കിയിട്ടുണ്ടോ; എങ്കില്‍ സംഭാവന നല്‍കിയ സ്ഥാപനങ്ങളുടെ വിശദാംശവും നല്‍കിയ തുകയും ലഭ്യമാക്കാമോ?

വിദ്യാ തരംഗിണി വായ്പ എല്ലാ സഹകരണ സംഘങ്ങള്‍ വഴിയും നല്‍കുന്നുണ്ടോയെന്നും വായ്പയ്ക്ക് ജാമ്യ വ്യവസ്ഥകള്‍ ഉണ്ടായിരുന്നുവോയെന്നും വിശദമാക്കുമോ;

ഏറനാട് മണ്ഡലത്തില്‍ വിദ്യാ തരംഗിണി വായ്പയ്ക്കായി എത്ര അപേക്ഷകള്‍ ലഭിച്ചുവെന്നും എത്ര പേര്‍ക്ക് വായ്പ അനുവദിക്കാതിരുന്നുവെന്നും കാരണസഹിതം വ്യക്തമാക്കുമോ?

മുറ്റത്തെ മുല്ല പദ്ധതി വഴി ആലത്തൂര്‍ മണ്ഡലത്തിലെ എത്ര കുടുംബശ്രീ യൂണിറ്റുകളിലെ എത്ര പേര്‍ക്ക് എത്ര തുക വിതരണം നടത്തിയിട്ടുണ്ട്; വിശദമാക്കാമോ?

ഗുരുവായൂര്‍ മണ്ഡലത്തില്‍ കെയര്‍ ഹോം പദ്ധതി പ്രകാരം നിര്‍മ്മിച്ച വീടുകള്‍ എത്രയെന്നും അതില്‍ പൂര്‍ത്തീകരിച്ചതും അല്ലാത്തതുമായ വീടുകളുടെ വിശദാംശങ്ങളും അറിയിക്കുമോ;

സഹകരണ സംഘങ്ങള്‍ മുഖേന കുറഞ്ഞ പലിശ നിരക്കില്‍ ഭവന വായ്പ അനുവദിക്കുന്നതിന് നടപടി സ്വീകരിക്കുമോ?

വൈപ്പിന്‍ മണ്ഡലത്തില്‍ 2016 ജൂൺ 1 മുതൽ 2021 മെയ് 31 വരെ റിസ്ക് ഫണ്ട്, ക്ഷേമ വികസന പദ്ധതികൾ എന്നിവ പ്രകാരം സാമ്പത്തിക സഹായം ലഭിച്ചവരുടെ എണ്ണം, ആകെ അനുവദിച്ച തുക എന്നിവ വ്യക്തമാക്കാമോ;

പ്രസ്തുത പദ്ധതികൾ പ്രകാരം സാമ്പത്തിക സഹായം ലഭിച്ചവരുടെ പേരുവിവരങ്ങളും നൽകിയ തുകയും സഹകരണസംഘത്തിന്റെ പേരും പഞ്ചായത്ത് തിരിച്ച് ലഭ്യമാക്കാമോ;

വൈപ്പിന്‍ മണ്ഡലത്തിലെ ഓച്ചന്തുരുത്ത് കളത്തി വീട്ടിൽ ഷീല തോമസ് ഓച്ചന്തുരുത്ത് സർവ്വീസ് കോ-ഓപ്പറേറ്റീവ് ബാങ്കിൽ നിന്നെടുത്ത ലോൺ റിസ്ക് ഫണ്ടില്‍ ഉൾപ്പെടുത്തുന്നതിനായി സമർപ്പിച്ച അപേക്ഷയിൽ സ്വീകരിച്ച നടപടി വ്യക്തമാക്കാമോ?

വിദേശരാജ്യങ്ങളിലെ തൊഴില്‍ നിയമപരിഷ്കരണങ്ങള്‍ മൂലവും കോവിഡ് പശ്ചാത്തലത്തിലും തൊഴില്‍ നഷ്ടപ്പെട്ട് തിരിച്ചെത്തിയ പ്രവാസികള്‍ക്ക് പുനരധിവാസ പദ്ധതികള്‍ നടപ്പിലാക്കുന്നത് വകുപ്പിന്റെ പരിഗണനയിലുണ്ടോ; വിശദമാക്കാമോ;

പ്രവാസികള്‍ക്കായി സ്വീകരിക്കുന്ന പുനരധിവാസ പദ്ധതികള്‍ വിശദമാക്കാമോ?

കുന്നത്തുനാട് നിയോജകമണ്ഡലത്തില്‍ കെയര്‍ ഹോം പദ്ധതി പ്രകാരം എത്ര വീടുകള്‍ നിര്‍മ്മിക്കുന്നതിനാണ് അനുമതി നല്‍കിയിട്ടുള്ളതെന്ന് വ്യക്തമാക്കാമോ;

ഇതില്‍ പൂര്‍ത്തീകരിച്ച വീടുകളുടെ എണ്ണം, ബാക്കിയുള്ള വീടുകളുടെ നിലവിലെ സ്ഥിതി എന്നിവ വ്യക്തമാക്കാമോ?

കേരള ബാങ്ക് മുഖേന ഈ സാമ്പത്തിക വര്‍ഷം നാളിതുവരെ എത്ര കോടി രൂപയുടെ കാര്‍ഷിക വായ്പ ലഭ്യമാക്കാന്‍ കഴിഞ്ഞിട്ടുണ്ട്;

ത്രിതല സംവിധാനം ഒഴിവാക്കി കേരള ബാങ്കിന്റെ ദ്വിതീയ സംവിധാനം നടപ്പാക്കിയത് വഴി വായ്പയുടെ പലിശ നിരക്കില്‍ കുറവ് വരുത്താന്‍ കഴിഞ്ഞിട്ടുണ്ടോ; വിശദാംശങ്ങള്‍ ലഭ്യമാക്കാമോ;

കേരള ബാങ്കിന്റെ അംഗങ്ങളായ പ്രാഥമിക കാര്‍ഷിക വായ്പാ സഹകരണസംഘങ്ങള്‍, അര്‍ബന്‍ ബാങ്കുകള്‍ എന്നിവയുടെ അടിസ്ഥാന സൗകര്യ വികസനത്തിനായി പുതിയ വായ്പാ പദ്ധതി നടപ്പിലാക്കിയിട്ടുണ്ടോ; വിശദാംശങ്ങള്‍ ലഭ്യമാക്കാമോ?

കേരള ബാങ്കിന്റെ നിലവിലെ പ്രവര്‍ത്തനം വിശദമാക്കുമോ;

സംസ്ഥാന സഹകരണ ബാങ്കില്‍ നിന്ന് വിഭിന്നമായി കേരള ബാങ്കിനുണ്ടായിട്ടുള്ള പ്രധാന നേട്ടങ്ങള്‍ എന്തെല്ലാമെന്ന് വെളിപ്പെടുത്തുമോ;

കേരള ബാങ്കില്‍ ലയിക്കാത്ത എത്ര ജില്ലാ സഹകരണ ബാങ്കുകള്‍ ഉണ്ട്; ഇവയുടെ ലയനം സാധ്യമാക്കുന്നതിന് സ്വീകരിക്കുന്ന നടപടികള്‍ വിശദമാക്കുമോ;

കേരള ബാങ്കില്‍ നിലവിലുള്ള ജീവനക്കാരുടെ എണ്ണം തസ്തിക തിരിച്ച് വ്യക്തമാക്കുമോ;

ഒഴിവുള്ള തസ്തികയിലെ നിയമനത്തിനായി സ്വീകരിച്ചിട്ടുള്ള നടപടികള്‍ വ്യക്തമാക്കുമോ?

സഹകരണ പെൻഷൻ ബോർഡിന്റെ ഫണ്ട്‌ ജില്ലാസഹകരണ ബാങ്കുകളിൽ അല്ലാതെ പ്രാഥമിക സർവ്വീസ്‌ സഹകരണ ബാങ്കുകളിൽ നിക്ഷേപിച്ചിട്ടുണ്ടോ; എങ്കില്‍ ഏതെല്ലാമെന്ന് വിശദമാക്കാമോ;

പ്രാഥമിക സർവ്വീസ്‌ സഹകരണ ബാങ്കുകളിലേക്ക്‌ ഫണ്ട്‌ വകമാറ്റുന്നതിന് ഭരണസമിതിയുടെയും സർക്കാരിന്റെയും അനുവാദം വാങ്ങിയിരുന്നോ; എങ്കില്‍ അനുവാദം നൽകിയ തീയതിയും ഫണ്ട്‌ മാറ്റിയ തീയതിയും അറിയിക്കാമോ;

പെൻഷൻ ചട്ടത്തിന് വിരുദ്ധമായി ഫണ്ട്‌ വകമാറ്റിയതിന് സർക്കാരിന്റെ ഭാഗത്തുനിന്നുണ്ടായ നടപടി വിശദമാക്കാമോ?

കേരള സംസ്ഥാന സഹകരണ ബാങ്ക്/ജില്ലാ സഹകരണ ബാങ്ക് ജീവനക്കാരുടെ ശമ്പള പരിഷ്ക്കരണത്തില്‍ അപാകത സംഭവിച്ചതായി ശ്രദ്ധയില്‍പ്പെട്ടിട്ടുണ്ടോ;

ശമ്പള പരിഷ്ക്കരണത്തിലെ അപാകതകള്‍ സംബന്ധിച്ച് പരാതി ലഭിച്ചിട്ടുണ്ടോ; ഉണ്ടെങ്കില്‍ ആയത് പരിഹരിക്കാനുള്ള നടപടികള്‍ സ്വീകരിച്ചിട്ടുണ്ടോ?

പാര്‍ലമെന്റ് അംഗങ്ങള്‍, നിയമസഭാംഗങ്ങള്‍, തദ്ദേശ സ്വയംഭരണ പ്രതിനിധികള്‍, ബാങ്ക് ഭരണസമിതി പ്രതിനിധികള്‍, ബാങ്ക് ജീവനക്കാര്‍ തുടങ്ങിയവര്‍ പങ്കെടുക്കുന്ന സഹകരണ ബാങ്കുകളുടെ ഔദ്യോഗിക പരിപാടികളില്‍ പാലിക്കേണ്ട പ്രോട്ടോക്കോള്‍ സംബന്ധിച്ച് സര്‍ക്കാര്‍ ഉത്തരവുകള്‍/സര്‍ക്കുലറുകള്‍ നിലവിലുണ്ടോ; എങ്കില്‍ അതിന്റെ പകര്‍പ്പ് ലഭ്യമാക്കുമോ;

പ്രസ്തുത പ്രോട്ടോക്കോള്‍ സംബന്ധിച്ച് മാര്‍ഗ്ഗനിര്‍ദ്ദേശങ്ങള്‍ നിലവിലില്ലെങ്കില്‍ ആയത് പുറപ്പെടുവിക്കുന്നതിന് നടപടി സ്വീകരിക്കുമോ; പ്രോട്ടോക്കോള്‍ പ്രാബല്യത്തില്‍ കൊണ്ടുവരാത്തതിന് കാരണം വ്യക്തമാക്കുമോ?

മലപ്പുറം ജില്ല സഹകരണ ബാങ്കിന്റെ ഷെയർ ക്യാപിറ്റൽ നിക്ഷേപമായ 23.46 കോടി രൂപ സംസ്ഥാന സഹകരണ ബാങ്കിന്റെ മൂലധനമായി പരിഗണിച്ചിട്ടുണ്ടോ; വ്യക്തമാക്കാമോ;

കേരളാ ബാങ്ക് രൂപീകരണശേഷം സംസ്ഥാന സഹകരണ ബാങ്കിന്റെ ഓഡിറ്റ് റിപ്പോർട്ട് അംഗീകരിച്ച് പ്രസിദ്ധീകരിച്ചിട്ടുണ്ടോ; ഉണ്ടെങ്കിൽ എന്നുവരെയുള്ള റിപ്പോർട്ടാണ് പ്രസിദ്ധീകരിച്ചിട്ടുള്ളത്;

പ്രസ്തുത ഓഡിറ്റ് റിപ്പോർട്ട് പ്രകാരം സഞ്ചിത നഷ്ടം, നെറ്റ് പ്രോഫിറ്റ് എന്നിവ വിശദമാക്കാമോ;

കേരളബാങ്ക് രൂപീകരിച്ച ശേഷം അംഗ സംഘങ്ങൾക്ക് ഡിവിഡന്റ് നൽകിയിട്ടുണ്ടോ; ഉണ്ടെങ്കിൽ എത്ര ശതമാനം നൽകിയെന്നും ഇല്ലെങ്കിൽ എന്തുകൊണ്ടാണ് നൽകാത്തതെന്നും വിശദമാക്കാമോ?

പാലക്കാട് ജില്ലയിലെ തത്തമംഗലം സർവ്വീസ് സഹകരണ ബാങ്കിലെ ചെക്കിടപാടുകൾ ഉൾപ്പെടെയുള്ള ക്രമക്കേടുകൾ സംബന്ധിച്ച് വകുപ്പ് തലത്തിൽ അന്വേഷണം നടത്തിയിട്ടുണ്ടോ; അറിയിക്കുമോ;

ഉണ്ടെങ്കിൽ എന്തെല്ലാം ക്രമക്കേടുകളാണ് കണ്ടെത്തിയിട്ടുള്ളതെന്ന് വിശദമാക്കാമോ;

പ്രസ്തുത ക്രമക്കേടുമായി ബന്ധപ്പെട്ടവർക്കെതിരെ ക്രിമിനൽ കേസ് രജിസ്റ്റര്‍ ചെയ്യുന്നതിന് നടപടി സ്വീകരിച്ചിട്ടുണ്ടോ എന്ന് വ്യക്തമാക്കാമോ?

കരുവന്നൂർ സർവ്വീസ് സഹകരണ ബാങ്കിൽ 2016-21 കാലയളവിലെ ഏതെല്ലാം വർഷത്തെ ഓഡിറ്റാണ് സഹകരണ വകുപ്പ് ഓഡിറ്റർമാർ പൂർത്തീകരിച്ചതെന്ന് അറിയിക്കാമോ; ഏതെല്ലാം വർഷങ്ങളിൽ സ്പെഷ്യൽ റിപ്പോർട്ട് സമർപ്പിച്ചുവെന്ന് തീയതി സഹിതം വെളിപ്പെടുത്തുമോ;

സ്പെഷ്യൽ റിപ്പോർട്ട് സമർപ്പിച്ചിട്ടുണ്ടെങ്കിൽ അതിന്മേൽ ‌സ്വീകരിച്ച നടപടികള്‍ വിശദീകരിക്കുമോ;

കരുവന്നൂർ സർവ്വീസ് സഹകരണ ബാങ്കിൽ സഹകരണനിയമത്തിലെ വകുപ്പ് 65 പ്രകാരം അന്വേഷണം നടത്തുന്നതിന് ഉത്തരവ് പുറപ്പെടുവിച്ച തീയതി, അന്വേഷണ ഉദ്യോഗസ്ഥർ റിപ്പോർട്ട് സമർപ്പിച്ച തീയതി എന്നിവ അറിയിക്കുമോ;

പ്രസ്തുത റിപ്പോർട്ട് സമർപ്പിക്കുന്നതിന് ഉദ്യോഗസ്ഥര്‍ക്ക് അലംഭാവം ഉണ്ടായിട്ടുണ്ടോ; എങ്കിൽ അത്തരം ഉദ്യോഗസ്ഥർക്കെതിരെ അച്ചടക്ക നടപടി സ്വീകരിച്ചിട്ടുണ്ടോ;

റിപ്പോർട്ട് സമർപ്പിച്ചതിന് ശേഷം നടപടി സ്വീകരിക്കാതെ കാലതാമസം വരുത്തിയ ഉദ്യോഗസ്ഥർ ആരെല്ലാമെന്നും അവര്‍ക്കെതിരെ അച്ചടക്ക നടപടി സ്വീകരിച്ചിട്ടുണ്ടോയെന്നും വിശദമാക്കാമോ;

കരുവന്നൂർ സർവ്വീസ് സഹകരണ ബാങ്കിൽ വായ്പാക്രമക്കേട് സംബന്ധിച്ച് ലഭിച്ച പരാതികളും അതിന്മേല്‍ സഹകരണ വകുപ്പ് സ്വീകരിച്ച നടപടികളും വിശദമാക്കുമോ;

പ്രസ്തുത ബാങ്കിൽ നിന്ന് ക്രമക്കേട് നടത്തിയ തുക സമയബന്ധിതമായി വീണ്ടെടുക്കുന്നതിന് ഒരു സ്പെഷ്യൽ റിക്കവറി ഓഫീസറെ നിയമിക്കാന്‍ സർക്കാർ ഉദ്ദേശിക്കുന്നുണ്ടോ?

മലപ്പുറം എ.ആര്‍. നഗര്‍ സര്‍വ്വീസ് സഹകരണ ബാങ്കില്‍ കണ്ണൂര്‍ ജില്ലയിലെ ഒരു പൊതുപ്രവര്‍ത്തകന് കോടികളുടെ നിക്ഷപമുണ്ടെന്ന പത്രവാര്‍ത്ത സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ; വിശദാംശങ്ങള്‍ ലഭ്യമാക്കാമോ;

പ്രസ്തുത വ്യക്തി മരണപ്പെട്ട സാഹചര്യത്തില്‍ നിക്ഷേപത്തിന് അനന്തരാവകാശികളെ നിശ്ചയിച്ചിട്ടുണ്ടോയെന്ന് വ്യക്തമാക്കാമോ;

നിക്ഷേപകന്റെ കുടുംബത്തിന് പണം തിരികെ ലഭിക്കുന്നതിന് സ്വീകരിക്കാനുദ്ദേശിക്കുന്ന നടപടികള്‍ വിശദമാക്കാമോ?

കോതമംഗലം മണ്ഡലത്തിലെ സഹകരണ ബാങ്കുകളില്‍ നിന്ന് റിസ്ക് ഫണ്ട് ആനുകൂല്യത്തിനായി സഹകരണ ബോര്‍ഡില്‍ ലഭിച്ചിട്ടുള്ള അപേക്ഷകളുടെ എണ്ണം ബാങ്ക് തിരിച്ച് വ്യക്തമാക്കാമോ;

പ്രസ്തുത അപേക്ഷകളില്‍ എത്ര പേര്‍ക്ക് റിസ്ക് ഫണ്ട് ആനൂകൂല്യം ലഭ്യമാക്കിയെന്ന് ബാങ്ക് തിരിച്ചുള്ള വിവരം അറിയിക്കാമോ;

ഇതുവരെയും ആനുകൂല്യം അനുവദിച്ചുകിട്ടാത്ത അപേക്ഷകളില്‍ ആനുകൂല്യം ലഭ്യമാക്കാത്തത് എന്തുകൊണ്ടെന്ന് വ്യക്തമാക്കുമോ;

അര്‍ഹരായ എല്ലാവര്‍ക്കും റിസ്ക് ഫണ്ട് ആനൂകൂല്യം വേഗത്തില്‍ ലഭ്യമാക്കുന്നതിന് വേണ്ട നടപടി സ്വീകരിക്കുമോ; വിശദമാക്കാമോ?

തൃശ്ശൂർ ജില്ലയിലെ താന്ന്യം പഞ്ചായത്ത് സഹകരണ ബാങ്കിന്റെ പെരിങ്ങോട്ടുകര ബ്രാഞ്ചിൽ നിന്നും പണയ സ്വർണം കളവ് പോയത് സംബന്ധിച്ച ക്രൈം ബ്രാഞ്ച് അന്വേഷണം പൂർത്തീകരിച്ചിട്ടുണ്ടോ; ഉണ്ടെങ്കില്‍ പ്രധാന കണ്ടെത്തലുകൾ എന്തൊക്കെയാണ്; കുറ്റവാളികൾക്കെതിരെ എന്തൊക്കെ നടപടികൾ സ്വീകരിച്ചിട്ടുണ്ട്; വ്യക്തമാക്കുമോ;

അന്വേഷണം പൂർത്തീകരിച്ചിട്ടില്ലെങ്കിൽ അന്വേഷണം നീണ്ടുപോകുന്നതിന്റെ കാരണം വ്യക്തമാക്കുമോ; സഹകരണ സ്ഥാപനങ്ങളിൽ നടക്കുന്ന അഴിമതിയും കളവുകളും അന്വേഷിക്കുന്നതിന് സ്വകാര്യ കുറ്റാന്വേഷണ ഏജൻസികളെ ചുമതലപ്പെടുത്തുന്നതിന് സർക്കാർ അനുമതി നൽകിയിട്ടുണ്ടോ;

ഇല്ലെങ്കിൽ മേൽപ്പറഞ്ഞ ബാങ്കിലെ പണയ സ്വർണം കളവുപോയ സംഭവത്തിൽ സ്വകാര്യ കുറ്റാന്വേഷണ ഏജൻസിയെക്കൊണ്ട് അന്വേഷണം നടത്തിയ സാഹചര്യം വ്യക്തമാക്കുമോ; പോലീസിൽ പരാതി നൽകാതെ സ്വകാര്യ അന്വേഷണ ഏജൻസിയെ നിയോഗിച്ച ബാങ്ക് ഭരണസമിതിക്കെതിരെ എന്തൊക്കെ നടപടി സ്വീകരിച്ചിട്ടുണ്ടെന്ന് വ്യക്തമാക്കുമോ?

മുറ്റത്തെ മുല്ല പദ്ധതി വഴി ചാത്തന്നൂർ മണ്ഡലത്തിലെ ഏതെല്ലാം സഹകരണ ബാങ്കുകൾ കുടുംബശ്രീ യൂണിറ്റുകൾക്ക് വായ്പ നൽകിയിട്ടുണ്ടെന്ന് വ്യക്തമാക്കാമോ;

പ്രസ്തുത പദ്ധതി വിപുലീകരിക്കുന്ന കാര്യം പരിഗണനയിലുണ്ടോ; ഉണ്ടെങ്കിൽ വിശദാംശംങ്ങൾ നല്‍കുമോ?

സഹകരണ സംഘങ്ങളുടെ മിച്ചഫണ്ട് ഉപയോഗിച്ച് ഗ്രാമീണ പശ്ചാത്തല സൗകര്യങ്ങള്‍ സൃഷ്ടിക്കാന്‍ പദ്ധതികള്‍ ആവിഷ്ക്കരിച്ചിട്ടുണ്ടോയെന്ന് വിശദമാക്കാമോ;

പ്രസ്തുത ഫണ്ടില്‍ നിന്ന് ലെെഫ് പദ്ധതിക്കായി വായ്പ ലഭ്യമാക്കുന്നതിനുളള നടപടികള്‍ സ്വീകരിക്കുമോയെന്ന് വ്യക്തമാക്കാമോ?

സംസ്ഥാനത്ത് പ്രവര്‍ത്തിക്കുന്ന മള്‍ട്ടി സ്റ്റേറ്റ് കോ-ഓപ്പറേറ്റീവ് സൊസെെറ്റികള്‍ എത്രയെന്നും അവ ഏതെല്ലാമെന്നും വിശദമാക്കുമോ?

സ്വകാര്യ ബസ് വ്യവസായ രംഗത്തെ സഹകരണ സംഘങ്ങള്‍ പ്രതിസന്ധി നേരിടുന്നുണ്ടോയെന്ന് അറിയിക്കാമോ;

അടിക്കടിയുണ്ടാവുന്ന ഇന്ധന വിലവര്‍ദ്ധനവും സ്പെയര്‍ പാര്‍ട്സുകളുടെ വില വര്‍ദ്ധനവും കാരണം സ്വകാര്യ ബസ് വ്യവസായ രംഗത്ത് നിന്ന് സഹകരണ സംഘങ്ങള്‍ പിന്‍മാറുന്ന സാഹചര്യം നിലവിലുണ്ടോ;

എങ്കില്‍ പ്രസ്തുത സംഘങ്ങളെ നിലനിര്‍ത്താനാവശ്യമായ നടപടി സ്വീകരിക്കുമോ?

തദ്ദേശസ്വയംഭരണ സ്ഥാപനങ്ങളുടെ പ്രോജക്ടുകള്‍ നടപ്പിലാക്കുന്നതിന് വായ്പാസഹകരണ സംഘങ്ങൾക്ക് അനുമതി ലഭ്യമാക്കിയിട്ടുണ്ടോ;

പ്രാഥമിക കാർഷിക സഹകരണ സംഘങ്ങളെ തദ്ദേശസ്വയംഭരണ സ്ഥാപനങ്ങളുടെ ഔദ്യോഗിക ബാങ്ക് ഇടപാടുകാരാക്കി മാറ്റാൻ നടപടികൾ സ്വീകരിക്കുമോ?

സഹകരണ പ്രസ്ഥാനങ്ങളെ കുടുംബശ്രീയുമായി സഹകരിപ്പിച്ച് ഡിസ്ട്രിബ്യൂഷൻ കണക്ഷൻ നെറ്റ്‌വർക്ക് സംവിധാനം ഏർപ്പെടുത്തിയിട്ടുണ്ടോ; വ്യക്തമാക്കാമോ?

പാലക്കാട് ജില്ലയില്‍ യുവ സഹകരണ സംഘങ്ങള്‍ രജിസ്റ്റര്‍ ചെയ്തിട്ടുണ്ടോ;

ഇവയുടെ പ്രവര്‍ത്തന പരിധി എവിടെയെല്ലാമാണെന്ന് വ്യക്തമാക്കാമോ?

പേരാവൂർ കോ-ഓപ്പറേറ്റീവ് ഹൗസ് ബിൽഡിംഗ് സൊസൈറ്റിയിൽ നടന്ന ചിട്ടി തട്ടിപ്പിൽ അസിസ്റ്റന്റ് രജിസ്ട്രാർ അന്വേഷണം നടത്തി റിപ്പോർട്ട് സമർപ്പിച്ചിട്ടുണ്ടോ; റിപ്പോർട്ടിലെ പ്രധാന കണ്ടെത്തലുകൾ വ്യക്തമാക്കാമോ;

പേരാവൂർ കോ-ഓപ്പറേറ്റീവ് ഹൗസ് ബിൽഡിംഗ് സൊസൈറ്റിക്ക് ചിട്ടി നടത്താൻ സഹകരണ വകുപ്പ് അംഗീകാരം നൽകിയിരുന്നോയെന്ന് വ്യക്തമാക്കാമോ;

പ്രസ്തുത സൊസൈറ്റിയിലെ ചിട്ടിയിൽ നിക്ഷേപിക്കപ്പെട്ട തുക വകമാറ്റി ചെലവഴിച്ചതായി സർക്കാരിന്റെ ശ്രദ്ധയിൽപ്പെട്ടിട്ടുണ്ടോ;

പ്രസ്തുത സൊസൈറ്റിയിൽ നടന്ന ചിട്ടി തട്ടിപ്പിൽ ഉൾപ്പെട്ടവരുടെ സ്വത്തുക്കൾ ക്രയവിക്രയം ചെയ്യാന്‍ അനുവദിക്കരുതെന്ന് ആവശ്യപ്പെട്ട് ജോയിന്റ് രജിസ്ട്രാര്‍, ജില്ലാ രജിസ്ട്രാര്‍ എന്നിവർക്ക് കത്ത് ലഭിച്ചിട്ടുണ്ടോ; ഉണ്ടെങ്കിൽ ഇതിൽ സ്വീകരിച്ച നടപടികൾ വിശദമാക്കാമോ?

കര്‍ഷകരില്‍ നിന്ന് ന്യായവിലയ്ക്ക് നെല്ല് സംഭരിച്ച് അരിയാക്കി വിപണനം നടത്തുന്നത് ലക്ഷ്യമിട്ട് സഹകരണ സംഘം രൂപീകരിച്ചിട്ടുണ്ടോ; ഈ മേഖലയില്‍ എന്തെല്ലാം പ്രവര്‍ത്തനങ്ങളാണ് സംഘം ആസൂത്രണം ചെയ്യുന്നത്;

സംസ്ഥാനത്തെ നെല്ല് സംസ്കരണത്തിന്റെ എത്ര ശതമാനം പ്രാതിനിധ്യമാണ് സംഘം ലക്ഷ്യമിടുന്നത്;വ്യക്തമാക്കാമോ?

അക്രെഡിറ്റഡ് ഏജന്‍സികള്‍ അല്ലാത്ത ഏതൊക്കെ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റികള്‍ക്കാണ് ടെണ്ടര്‍ നടപടി ക്രമങ്ങളില്‍ ഇളവുകള്‍ നല്‍കിയിട്ടുള്ളത് എന്നറിയിക്കാമോ;

പ്രസ്തുത ലേബര്‍ കോണ്‍ട്രാക്ട് സൊസൈറ്റികളുടെ പ്രവൃത്തികളുടെ ഗുണനിലവാരം ഉറപ്പുവരുത്തുന്നതിന് സ്വീകരിക്കുന്ന നടപടികള്‍ വിശദമാക്കാമോ?

പേരാവൂർ ഹൗസ് ബിൽഡിംഗ് സൊസൈറ്റി നടത്തിയ ചിട്ടികളിൽ കേരള ചിട്ടി ഫണ്ട് റൂൾ പ്രകാരമുള്ള ഏതെല്ലാം ചട്ടങ്ങൾ ലംഘിച്ചിട്ടുണ്ട്; അതിലൂടെ സർക്കാരിനുണ്ടായ വരുമാനനഷ്ടം എത്രയെന്ന് വ്യക്തമാക്കാമോ;

കേന്ദ്ര ചിട്ടി നിയമവും കേരള ചിട്ടി ഫണ്ട് റൂൾസും പ്രകാരം പ്രസ്തുത ലംഘനങ്ങൾ പരിശോധിച്ച് പിഴ ഈടാക്കിയിട്ടുണ്ടോ; ഇല്ലെങ്കിൽ എന്തുകൊണ്ട് എന്നറിയിക്കാമോ; ഈ ചിട്ടികളിൽ നിന്ന് ജി.എസ്.ടി. ഈടാക്കുകയോ നോട്ടീസ് നൽകുകയോ ചെയ്തിട്ടുണ്ടോ;

മറ്റ് സൊസൈറ്റികളിലും ഇത്തരത്തിലുള്ള തട്ടിപ്പുകൾക്ക് സാധ്യതയുള്ളതിനാല്‍ എല്ലാ സൊസൈറ്റികളിലും ചിട്ടി രജിസ്റ്റർ പരിശോധന നടത്തി സർക്കാരിന് ലഭിക്കേണ്ട വരുമാനം നഷ്ടപ്പെടുന്നില്ലെന്ന് ഉറപ്പുവരുത്തുവാൻ നടപടികൾ സ്വീകരിക്കാമോ;

കേന്ദ്ര ചിട്ടി നിയമം, കേരള ചിട്ടി ഫണ്ട് റൂൾസ് എന്നിവ പ്രകാരം സംസ്ഥാനത്തെ സഹകരണ സ്ഥാപനങ്ങളിൽ ചിട്ടി നടത്തിപ്പിന് അനുമതി നൽകാനുള്ള അധികാരം ആർക്കാണെന്ന് വ്യക്തമാക്കാമോ?

പേരാവൂർ ഹൗസിംഗ് സഹകരണ സംഘത്തിന്റെ ചിട്ടി നടത്തിപ്പ് അവസാനിപ്പിക്കണമെന്നും നിക്ഷേപകർക്ക് പണം തിരികെ നൽകണമെന്നും സഹകരണ വകുപ്പ് നടത്തിയ ഓഡിറ്റ് റിപ്പോർട്ടിൽ നിർദേശിച്ചിരുന്നോ; എങ്കിൽ പ്രസ്തുത റിപ്പോർട്ടിന്റെ പകർപ്പ് ലഭ്യമാക്കാമോ?

പേരാവൂർ സഹകരണ ഹൗസ് ബിൽഡിംഗ് സൊസൈറ്റിയ്ക്ക് ചിട്ടി നടത്തിപ്പിന് വകുപ്പ് അനുമതി നൽകിയിരുന്നോ; എങ്കിൽ പ്രസ്തുത അനുമതിയുടെ പകർപ്പ് ലഭ്യമാക്കുമോ?

സഹകരണ ബാങ്കുകളിലേയും സഹകരണ സംഘങ്ങളിലേയും നിക്ഷേപങ്ങൾക്ക് മതിയായ സുരക്ഷ നൽകുന്നതിനും നിക്ഷേപിച്ച തുകയും പലിശയും യഥാസമയം തിരികെ നൽകുന്നതിനും ആവശ്യമായ വ്യവസ്ഥകൾക്ക് രൂപം നൽകിയിട്ടുണ്ടോ; വിശദമാക്കാമോ;

സാമ്പത്തിക തിരിമറിയുടെ ഭാഗമായി നടക്കുന്ന അന്വേഷണങ്ങളുടെ പേരിൽ നിക്ഷേപ തുകയും പലിശയും നിക്ഷേപകർക്ക് മടക്കി നൽകുന്നതിൽ കാലതാമസം നേരിടുന്നുണ്ടോ; ഉണ്ടെങ്കിൽ ആയത് ഒഴിവാക്കുന്നതിനായി എന്തൊക്കെ നടപടിയാണ് സ്വീകരിച്ചിട്ടുളളതെന്ന് വ്യക്തമാക്കാമോ?

ആലപ്പുഴ ജില്ലയിലെ ആലപ്പി സൈക്കിള്‍ അസംബ്ലിംഗ് വര്‍ക്കേഴ്സ് ഇന്‍ഡസ്ട്രിയല്‍ കോ-ഓപ്പറേറ്റീവ് സൊസൈറ്റിയുടെ നിലവിലെ സ്ഥിതി വിശദമാക്കാമോ;

പ്രസ്തുത സൊസൈറ്റി പ്രവര്‍ത്തിച്ചിരുന്ന സ്ഥലം സര്‍ക്കാര്‍ ഏറ്റെടുക്കണമെന്ന അപേക്ഷ ലഭിച്ചിട്ടുണ്ടോ; ഉണ്ടെങ്കില്‍ ഏറ്റെടുക്കുന്നതിനുള്ള നടപടി സ്വീകരിക്കുമോ?

സംസ്ഥാനത്തെ ഏതൊക്കെ സഹകരണ സ്ഥാപനങ്ങളിലെ അഴിമതിയെക്കുറിച്ചാണ് പരാതി ലഭിച്ചിട്ടുളളതെന്ന് വ്യക്തമാക്കാമോ; പരാതി ലഭിച്ചിട്ടുണ്ടെങ്കില്‍ പ്രസ്തുത സ്ഥാപനങ്ങള്‍ക്ക് എതിരായി എന്തൊക്കെ നടപടികളാണ് സ്വീകരിച്ചിട്ടുളളതെന്ന് വിശദമാക്കാമോ;

പ്രസ്തുത അഴിമതിയുമായി ബന്ധപ്പെട്ട് പ്രാഥമിക അന്വേഷണം നേരിട്ട എത്ര സഹകരണ സ്ഥാപനങ്ങള്‍ ഉണ്ടെന്ന് വ്യക്തമാക്കാമോ;

പ്രാഥമിക അന്വേഷണത്തില്‍ തന്നെ അഴിമതിയുണ്ട് എന്ന് ബോധ്യപ്പെട്ട എത്ര സഹകരണ സ്ഥാപനങ്ങള്‍ ഉണ്ട്; വ്യക്തമാക്കാമോ;

പ്രസ്തുത അന്വേഷണത്തിന്റെ അടിസ്ഥാനത്തില്‍ ഭരണസമിതി പിരിച്ച് വിട്ട് അഡ്മിനിസ്ട്രേറ്റീവ് സംവിധാനത്തിന്‍ കീഴില്‍ പ്രവര്‍ത്തിക്കുന്ന സഹകരണ സ്ഥാപനങ്ങള്‍ ഏതൊക്കെയാണെന്ന് വ്യക്തമാക്കാമോ?

സര്‍ക്കാരിന്റെ മരാമത്ത് പ്രവൃത്തികള്‍ കരാര്‍ ഏറ്റെടുത്ത് ചെയ്യുന്നതിന് സഹകരണ വകുപ്പില്‍ രജിസ്റ്റര്‍ ചെയ്ത് അനുമതി നല്‍കിയ എത്ര സഹകരണ സ്ഥാപനങ്ങള്‍ സംസ്ഥാനത്തുണ്ടെന്ന് വ്യക്തമാക്കാമോ;

തിരുവനന്തപുരം ജില്ലയില്‍ ഇത്തരത്തില്‍ രജിസ്റ്റര്‍ ചെയ്തിട്ടുള്ള സഹകരണ സ്ഥാപനങ്ങളുടെ പേരു വിവരങ്ങള്‍ വിശദമാക്കാമോ;

സ്ഥാപനങ്ങള്‍ ഏറ്റെടുക്കുന്ന പ്രവൃത്തികള്‍ യഥാസമയം പൂര്‍ത്തിയാക്കുന്നുണ്ടോയെന്നത് പരിശോധിക്കുന്നുണ്ടോ; വിശദമാക്കാമോ?

സംസ്ഥാനത്ത് സഞ്ചരിക്കുന്ന എത്ര ത്രിവേണി സ്റ്റോറുകള്‍ പ്രവര്‍ത്തിക്കുന്നുണ്ടെന്ന് വ്യക്തമാക്കാമോ;

പ്രസ്തുത സ്റ്റോറുകള്‍ ലാഭകരമായിട്ടാണോ പ്രവര്‍ത്തിക്കുന്നതെന്ന് വ്യക്തമാക്കാമോ;

സഞ്ചരിക്കുന്ന ത്രിവേണി സ്റ്റോറുകള്‍ ഓരോ സ്ഥലത്തും എത്തിച്ചേരുന്ന സമയവും വാഹനത്തില്‍ ലഭ്യമായ സാധനങ്ങള്‍ സംബന്ധിച്ച വിവരവും ഉപഭോക്താക്കളെ മുന്‍കൂട്ടി അറിയിക്കുന്നതിന് സാമൂഹിക മാധ്യമങ്ങള്‍ പ്രയോജനപ്പെടുത്തുവാൻ നടപടി സ്വീകരിക്കുമോ?

കോവിഡ് 19-ന്റെ പശ്ചാത്തലത്തില്‍ കണ്‍സ്യൂമര്‍ഫെഡ് നടത്തിയിട്ടുള്ള പ്രവര്‍ത്തനങ്ങള്‍ വിശദമാക്കാമോ;

ഈ വര്‍ഷത്തെ ഓണവിപണിയില്‍ കണ്‍സ്യൂമര്‍ ഫെഡ് നടത്തിയ പ്രവര്‍ത്തനങ്ങള്‍ വിശദമാക്കാമോ?

സഹകരണ ബാങ്കുകളുടെ കീഴില്‍ പ്രവര്‍ത്തിക്കുന്ന നീതി ലാബുകളില്‍ ലാബ് അസിസ്റ്റന്റുമാരുടെ നിയമനം ഡിപ്പാര്‍ട്ട്മെന്റ് അംഗീകരിക്കാത്തത് വകുപ്പിന്റെ ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ആയത് പരിഹരിക്കുന്നതിനുവേണ്ടി സ്വീകരിച്ച നടപടികള്‍ വിശദമാക്കാമോ?

കാസര്‍ഗോഡ് ജില്ലയില്‍ ബേഡഡുക്ക പഞ്ചായത്തിലെ മുന്നാട് കേന്ദ്രമായി ഒരു സഹകരണ പരിശീലന കേന്ദ്രം പ്രവര്‍ത്തിക്കുന്നുണ്ടോ;

ഈ സ്ഥാപനം പ്രവര്‍ത്തനമാരംഭിച്ചിട്ട് എത്ര വര്‍ഷമായെന്ന വിശദാംശങ്ങള്‍ അറിയിക്കാമോ;

പ്രസ്തുത സ്ഥാപനത്തിന് സ്വന്തമായി കെട്ടിടം നിര്‍മ്മിക്കുന്നതിനായി എജ്യൂക്കേഷണല്‍ കോ ഓപ്പറേറ്റീവ് സൊസൈറ്റി 15 സെന്റ് സ്ഥലം സഹകരണ യൂണിയന് വിട്ടുനല്‍കിയിട്ടുണ്ടോ; വിശദാംശങ്ങള്‍ അറിയിക്കാമോ;

ഈ സ്ഥലത്ത് കെട്ടിടം നിര്‍മ്മിക്കുന്നതിന് എന്തെങ്കിലും തുടര്‍ നടപടി സ്വീകരിച്ചിട്ടുണ്ടോ; വിശദാംശങ്ങള്‍ അറിയിക്കാമോ;

2017 മേയ് മാസത്തില്‍ സ്വന്തമായി കെട്ടിടം നിര്‍മ്മിക്കാന്‍ തറക്കല്ലിട്ട ഈ സ്ഥാപനത്തിന്റെ കെട്ടിടം പണി തുടങ്ങാതിരിക്കാനുള്ള കാരണം വിശദമാക്കാമോ?

കാസര്‍ഗോഡ് ജില്ലാ കോ-ഓപ്പറേറ്റീവ് ഹോസ്പിറ്റല്‍ സൊസൈറ്റിയുടെ കീഴില്‍ കുമ്പള, ചെങ്കള എന്നീ സ്ഥലങ്ങളിലെ ആശുപത്രികള്‍ക്ക് അധിക തസ്തികകള്‍ അനുവദിക്കണമെന്നാവശ്യപ്പെട്ട് സംഘം നല്കിയ പ്രപ്പോസലില്‍ തീരുമാനമായിട്ടുണ്ടോ; വിശദാംശങ്ങള്‍ അറിയിക്കാമോ;

സര്‍ക്കാരിന് സാമ്പത്തിക ബാധ്യതയില്ലാത്ത പ്രസ്തുത സംഘത്തിന്റെ പ്രപ്പോസലില്‍ അനുമതി നല്‍കാനുള്ള കാലതാമസം എന്തുകൊണ്ടെന്ന് വിശദമാക്കാമോ?

ഏതൊക്കെ സഹകരണ ആശുപത്രികള്‍ക്കാണ് ഈ സാമ്പത്തിക വര്‍ഷം ധനസഹായം അനുവദിക്കുന്നതെന്ന് വ്യക്തമാക്കാമോ;

തുക നല്‍കുന്നതിന്റെ മാനദണ്ഡം എന്താണെന്ന് വ്യക്തമാക്കാമോ;

മലപ്പുറം ജില്ലാ സഹകരണ ആശുപത്രി സമര്‍പ്പിച്ച സാമ്പത്തിക സഹായത്തിനുള്ള അപേക്ഷയില്‍ എന്തു നടപടിയാണ് സ്വീകരിച്ചത്;

പ്രസ്തുത അപേക്ഷ പരിഗണിച്ച് സാമ്പത്തിക സഹായം നല്‍കാന്‍ നടപടി സ്വീകരിക്കുമോ?

സംസ്ഥാനത്തെ വിവിധ സഹകരണ സംഘങ്ങള്‍, ബാങ്കുകള്‍ എന്നിവയില്‍ 2016-21 കാലയളവില്‍ കര്‍ഷക കടാശ്വാസത്തിന് അര്‍ഹതയുണ്ടെന്ന് കണ്ടെത്തിയ വായ്പകളില്‍ കടാശ്വാസം വഴി എത്ര തുക എത്ര പേര്‍ക്ക് വിതരണം ചെയ്തിട്ടുണ്ടെന്ന് വ്യക്തമാക്കാമോ;

ഈ സര്‍ക്കാര്‍ അധികാരത്തില്‍ വന്ന ശേഷം പട്ടികജാതി,പട്ടികവര്‍ഗ്ഗ, പരിവര്‍ത്തിത ക്രൈസ്തവ വിഭാഗങ്ങളില്‍പ്പെട്ട ഗുണഭോക്താക്കള്‍ക്ക് കടാശ്വാസ പദ്ധതി പ്രകാരം 2020-21, 2021-22 എന്നീ സാമ്പത്തിക വര്‍ഷങ്ങളില്‍ വിതരണം ചെയ്ത തുക എത്രയെന്ന് വ്യക്തമാക്കുമോ;

സഹകരണ സ്ഥാപനങ്ങളില്‍ നിന്നും എടുത്തിട്ടുള്ള വായ്പകള്‍ക്ക് മത്സ്യത്തൊഴിലാളി കടാശ്വാസമായി 2020-21, 2021-22 എന്നീ സാമ്പത്തിക വര്‍ഷങ്ങളില്‍ എത്ര തുക എത്ര പേര്‍ക്ക് വിതരണം ചെയ്തിട്ടുണ്ടെന്ന് വിശദമാക്കാമോ?

സഹകരണ റിസ്ക് ഫണ്ട് പ്രകാരം ലഭിക്കുന്ന ആനുകൂല്യങ്ങള്‍ എന്താണെന്ന് വിശദമാക്കുമോ;

സഹകരണ റിസ്ക് ഫണ്ടിനുള്ള അപേക്ഷകള്‍ തീര്‍പ്പാക്കുന്നതിന് കാലതാമസം വരുന്നതെന്തുകൊണ്ടാണെന്ന് വ്യക്തമാക്കുമോ;

പ്രസ്തുത അപേക്ഷകള്‍ തീര്‍പ്പാക്കുന്നതിന് അടിയന്തര നടപടികള്‍ സ്വീകരിക്കുമോ?

മുന്‍ ജില്ലാ സഹകരണ ബാങ്കുകളിലെയും സംസ്ഥാന സഹകരണ ബാങ്കിലെയും ജീവനക്കാരുടെ സേവന വേതന വ്യവസ്ഥകള്‍ പരിഷ്കരിച്ചുകൊണ്ട് 09.02.2021 തീയതിയില്‍ ഇറങ്ങിയ ഉത്തരവ് പ്രകാരം പ്യൂണ്‍/വാച്ച്മാന്‍, ഡ്രെെവര്‍, ക്ലാര്‍ക്ക്/കാഷ്യര്‍, പബ്ലിക് റിലേഷന്‍ ഓഫീസര്‍, ശാഖ മാനേജര്‍ എന്നീ തസ്തികകളുടെ പുതിയ ശമ്പള സ്കെയില്‍ നിര്‍ണ്ണയിച്ചപ്പോള്‍ ശമ്പളം പുതുക്കി നിശ്ചയിക്കുന്നതിനുളള ഫോര്‍മുല ബാധകമാക്കാതിരിക്കാനുളള കാരണം വിശദമാക്കാമോ;

ശമ്പള പരിഷ്കരണ ഫോര്‍മുല മേല്‍ തസ്തികളുടെ ശമ്പള സ്കെയിലില്‍ ബാധകമാക്കാത്തതിനാല്‍ 01.04.2017-ന് ശേഷം നേരിട്ട് സര്‍വ്വീസില്‍ പ്രവേശിച്ച ജീവനക്കാര്‍ക്ക് ശമ്പള വര്‍ദ്ധനവ് ലഭിക്കാന്‍ നടപടി സ്വീകരിക്കുമോ;

ജീവനക്കാരുടെ സംഘടനകളുമായി ചര്‍ച്ച ചെയ്ത് തീരുമാനത്തിലെത്തിയ ശമ്പള പരിഷ്കരണ ഫോര്‍മുല എല്ലാ തസ്തികകളുടെ സ്കെയിലിലും ബാധകമാക്കിയിട്ടുണ്ടോ; ഇല്ലെങ്കില്‍ ആയതിന് പ്രത്യേക കാരണമുണ്ടോ; വ്യക്തമാക്കാമോ;

ഒരേ റാങ്ക് ലിസ്റ്റിലെ ഒരേ നിയമന ശുപാര്‍ശയില്‍ 01.04.2017-ന് മുന്‍പും ശേഷവും സര്‍വ്വീസില്‍ പ്രവേശിച്ച ജീവനക്കാര്‍ക്ക് വ്യത്യസ്ത നിരക്കില്‍ അടിസ്ഥാന ശമ്പളം നിര്‍ണ്ണയിക്കുന്നതുമൂലം അടിസ്ഥാന ശമ്പളത്തില്‍ വലിയ അന്തരം വരുന്നത് ശ്രദ്ധയില്‍പ്പെട്ടിട്ടുണ്ടോ?

സഹകരണ വകുപ്പില്‍ ഉദ്യോഗസ്ഥ പാറ്റേണ്‍ വര്‍ദ്ധിപ്പിക്കുവാനുള്ള നടപടി ഏത് ഘട്ടത്തിലാണെന്ന് വിശദമാക്കാമോ;

സഹകരണ വകുപ്പില്‍ പുതിയ ഓഡിറ്റര്‍/ഇന്‍സ്പെക്ടര്‍മാരുടെ എത്ര തസ്തിക സൃഷ്ടിക്കുവാനാണ് ഉദ്ദേശിക്കുന്നത്;

ഉദ്യോഗസ്ഥ പാറ്റേണ്‍ വര്‍ദ്ധിപ്പിക്കുന്നത് സംബന്ധിച്ച തീരുമാനം എടുക്കുന്നതിന് ഏതെങ്കിലും കമ്മിറ്റിയെ ചുമതലപ്പെടുത്തിയിട്ടുണ്ടോ; ഉണ്ടെങ്കില്‍ കമ്മിറ്റി റിപ്പോര്‍ട്ട് ലഭ്യമായിട്ടുണ്ടോ;

സഹകരണ വകുപ്പിലെ ജൂനിയര്‍ കോ-ഓപ്പറേറ്റീവ് ഇന്‍സ്പെക്ടര്‍മാരുടെ ഒഴിവുകള്‍ നികത്തുന്നതിനുള്ള നിലവിലെ അനുപാതമായ 40:40:20 എന്നത് മാറ്റാന്‍ ഉദ്ദേശിക്കുന്നുണ്ടോ; ഉണ്ടെങ്കില്‍ പുതിയ അനുപാതം എങ്ങനെയെന്ന് തീരുമാനിച്ചിട്ടുണ്ടോ?

സഹകരണ മേഖലയില്‍ 10000 പേര്‍ക്ക് പുതിയ തൊഴില്‍ നല്‍കുമെന്ന് പ്രഖ്യാപിച്ചിട്ടുണ്ടോ; ഉണ്ടെങ്കില്‍ പ്രസ്തുത പ്രഖ്യാപനത്തിന്മേല്‍ തൊഴില്‍ ലഭിച്ചവരുടെ എണ്ണം ജില്ല തിരിച്ച് ലഭ്യമാക്കാമോ?

കേന്ദ്ര സര്‍ക്കാര്‍ നടപ്പിലാക്കാന്‍ ഉദ്ദേശിക്കുന്ന പുതിയ സഹകരണ നയം സഹകരണമേഖലയെ എപ്രകാരം ബാധിക്കുമെന്ന് പരിശോധിച്ചിട്ടുണ്ടോ; വിശദമാക്കാമോ;

പ്രസ്തുത നയം മൂലമുണ്ടാകുന്ന ആശങ്ക കേന്ദ്രത്തെ അറിയിക്കാന്‍ നടപടികള്‍ സ്വീകരിച്ചിട്ടുണ്ടോ; വിശദമാക്കാമോ;

പുതിയ കേന്ദ്ര വിജ്ഞാപനം വന്നാല്‍ സഹകരണ സംഘങ്ങളിലെ നിയമനങ്ങളെ ബാധിക്കാന്‍ സാധ്യതയുണ്ടോ;

നൈറ്റ് വാച്ച്മാനായി സഹകരണ സംഘങ്ങളില്‍ വിമുക്ത ഭടന്മാരെ മാത്രമേ നിയമിക്കാവു എന്ന ചട്ടം മറികടന്ന് കഴിഞ്ഞ അഞ്ച് വര്‍ഷകാലയളവില്‍ എത്ര നിയമനം നടത്തിയിട്ടുണ്ട്; വിശദമാക്കാമോ?

നിഷ്ക്രിയ ആസ്തി വർദ്ധനവിന്റെ പേരിൽ അർബൻ ബാങ്കുകൾക്ക് റിസർവ് ബാങ്ക് കടുത്ത നിയന്ത്രണങ്ങൾ ഏർപ്പെടുത്തിയിരിക്കുന്നത് ശ്രദ്ധയിൽപ്പെട്ടിട്ടുണ്ടോ;

പ്രസ്തുത വിഷയത്തിൽ അർബൻ ബാങ്കുകളുടെ താല്പര്യം സംരക്ഷിക്കുന്നതിനായി എന്തൊക്കെ നടപടി സ്വീകരിച്ചിട്ടുണ്ടെന്ന് വ്യക്തമാക്കാമോ?

കെയര്‍ ഹോം പദ്ധതി പ്രകാരം ഇരിക്കൂര്‍ മണ്ഡലത്തില്‍ എത്ര വീടുകള്‍ നിര്‍മ്മിച്ചുവെന്ന് അറിയിക്കാമോ;

ഏതെല്ലാം സഹകരണ സ്ഥാപനങ്ങളാണ് പ്രസ്തുത പദ്ധതിയ്ക്കായി ധനസഹായം നല്‍കിയത്; ഓരോ സ്ഥാപനവും എത്ര രൂപ വീതം അനുവദിച്ചുവെന്ന് വ്യക്തമാക്കാമോ;

പ്രസ്തുത പദ്ധതി പ്രകാരം എത്ര വീടുകള്‍ക്കാണ് അനുമതി നല്‍കിയതെന്നും അവയില്‍ എത്രയെണ്ണം പൂര്‍ത്തീകരിച്ചുവെന്നും അറിയിക്കാമോ?

അർബൻ ബാങ്കുകളിൽ അംഗങ്ങൾക്ക് ഓഹരിയിൽ പണം നിക്ഷേപിക്കുന്നതിനും തിരിച്ചെടുക്കുന്നതിനും കമ്പനി മാതൃകയിൽ നിയമം കൊണ്ടുവന്നത് ശ്രദ്ധയിൽപ്പെട്ടിട്ടുണ്ടോ;

ഓഹരി തിരിച്ചു കൊടുക്കുന്നതിന് റിസർവ് ബാങ്കിന്റെ അനുമതി വേണമെന്ന് വ്യവസ്ഥ ചെയ്തിട്ടുണ്ടോ; ഇക്കാര്യത്തിൽ അർബൻ ബാങ്കുകളുടെ താല്പപര്യം സംരക്ഷിക്കുന്നതിനായി എന്തൊക്കെ നടപടി സ്വീകരിക്കുമെന്ന് വ്യക്തമാക്കുമോ?

കെയര്‍ ഹോം പദ്ധതി പ്രകാരം നാളിതുവരെ സംസ്ഥാനത്തു എത്ര വീടുകള്‍ പൂര്‍ത്തീകരിച്ചു എന്ന് അറിയിക്കാമോ;

എത്ര വീടുകള്‍ പൂര്‍ത്തീകരിക്കാനുണ്ടെന്ന് വ്യക്തമാക്കാമോ;

ഇത്തരത്തില്‍ വീട് ലഭിച്ചവരുടെ തുടര്‍ ക്ഷേമത്തിനായി ആവിഷ്കരിച്ച കെയര്‍ഗ്രേസ് പദ്ധതിയുടെ വിശദാംശം ലഭ്യമാക്കാമോ?

ലൈഫ് പദ്ധതിയില്‍ ഉള്‍പ്പെടുത്തി മാവേലിക്കര മണ്ഡലത്തിലെ തഴക്കരയില്‍ ഫ്ലാറ്റ് നിര്‍മ്മിക്കുവാന്‍ സഹകരണ വകുപ്പ് സ്വീകരിച്ച നടപടികള്‍ വിശദമാക്കുമോ;

പ്രസ്തുത ഫ്ലാറ്റിന്റെ നിര്‍മ്മാണം അടിയന്തരമായി ആരംഭിക്കുമോ; വ്യക്തമാക്കുമോ?

ആധാരം സംസ്ഥാനത്തെ ഏത് രജിസ്ട്രാര്‍ ഓഫീസിലും രജിസ്റ്റര്‍ ചെയ്യാവുന്ന പദ്ധതി നിലവില്‍ വന്ന ശേഷം നാളിതുവരെ രജിസ്റ്റര്‍ ചെയ്ത ആധാരങ്ങളുടെ കണക്ക് ജില്ല തിരിച്ച് വ്യക്തമാക്കാമോ;

സംസ്ഥാനത്ത് നിലവിലുള്ള സബ് രജിസ്ട്രാര്‍ ഓഫീസുകളുടെ ജില്ല തിരിച്ചുള്ള വിശദാംശങ്ങള്‍ ലഭ്യമാക്കാമോ;

സംസ്ഥാനത്ത് ഏതെങ്കിലും ജില്ലയില്‍ പുതിയതായി സബ് രജിസ്ട്രാര്‍ ഓഫീസ് അനുവദിയ്ക്കണമെന്ന നിര്‍ദ്ദേശം സര്‍ക്കാര്‍ മുമ്പാകെയുണ്ടോ; ഉണ്ടെങ്കില്‍ വിശദാംശങ്ങള്‍ നല്‍കാമോ?

ഭൂമിയുടെ അണ്ടര്‍വാല്യൂവേഷന്‍ കേസ്സുകളില്‍ തീര്‍പ്പുകല്‍പ്പിക്കുന്ന കോമ്പൗണ്ടിംഗ് പദ്ധതി ഈ സാമ്പത്തിക വര്‍ഷം നടപ്പിലാക്കാന്‍ ഉദ്ദേശിക്കുന്നുണ്ടോ;

പ്രസ്തുത പദ്ധതി വഴി കൈവരിക്കാനുദ്ദേശിക്കുന്ന ലക്ഷ്യങ്ങള്‍ വിശദമാക്കാമോ?

കോവിഡ്-19 ന്റെ പശ്ചാത്തലത്തില്‍ രജിസ്ട്രേഷന്‍ പുതുക്കാന്‍ കഴിയാതിരുന്ന ചാരിറ്റബിള്‍ സൊസെെറ്റീസ് ആക്ട് പ്രകാരം രജിസ്റ്റര്‍ ചെയ്ത സംഘങ്ങള്‍ക്ക് പിഴ ഒഴിവാക്കിനല്‍കി രജിസ്ട്രേഷന്‍ പുതുക്കുന്ന കാര്യം പരിഗണനയിലുണ്ടോ?

സംസ്ഥാനത്ത് സൊസൈറ്റീസ് ആക്റ്റ് പ്രകാരം രജിസ്റ്റര്‍ ചെയ്യുന്ന സംഘടനകളുടെ കാര്യത്തില്‍ ബ്രിട്ടീഷ് കാലത്തുള്ള നിയമങ്ങളാണ് നിലനില്‍ക്കുന്നതെന്ന പരാതി ശ്രദ്ധയില്‍പ്പെട്ടിട്ടുണ്ടോ; എങ്കില്‍ നിയമ നിര്‍മ്മാണം വഴി ആയത് പരിഹരിക്കുന്നതിന് എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ;

പ്രസ്തുത സംഘടനകളുടെ രജിസ്ട്രേഷന്‍ ഒരു തവണ പുതുക്കി നല്‍കിയാല്‍ പ്രസ്തുത കാലാവധിക്കുള്ളില്‍ സംഘടനക്കെതിരെ വസ്തുതാപരമായ പരാതി ലഭിച്ചാലും സംഘടനകളുടെ രജിസ്ട്രേഷന്‍ റദ്ദ് ചെയ്യുന്നതിന് രജിസ്ട്രാര്‍ക്ക് അധികാരമില്ലെന്ന പരാതി ശ്രദ്ധയില്‍പ്പെട്ടിട്ടുണ്ടോ; എങ്കില്‍ നിയമ നിര്‍മ്മാണം വഴി ആയത് പരിഹരിക്കുന്നതിന് എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ;

പ്രസ്തുത ആക്റ്റ് പ്രകാരം രജിസ്റ്റര്‍ ചെയ്യുന്ന സംഘടനകളുടെ പ്രവര്‍ത്തനങ്ങള്‍ നിരീക്ഷിക്കുന്നതിനും, ഇടപെടുന്നതിനും നിയമം വഴി ജില്ലാ രജിസ്ട്രാര്‍ക്ക് അധികാരമുണ്ടോ; ഇല്ലെങ്കില്‍ നിയമത്തില്‍ ആവശ്യമായ ഭേദഗതി വരുത്തുന്നതിന് എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ;

രജിസ്ട്രാര്‍ പ്രസ്തുത സംഘടനകളുടെ പ്രവര്‍ത്തനം സൂക്ഷ്മമായി നിരീക്ഷിച്ച് നിജസ്ഥിതി ബോധ്യപ്പെട്ടതിനുശേഷം മാത്രമേ രജിസ്ട്രേഷന്‍ പുതുക്കാവൂ എന്ന വ്യവസ്ഥ നിലവിലുണ്ടോ; ഇല്ലെങ്കില്‍ നിയമ നിര്‍മ്മാണം വഴി ആയത് പരിഹരിക്കുന്നതിന് എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ?

രജിസ്ട്രേഷന്‍ വകുപ്പില്‍ കാലാനുസൃതമായ പരിഷ്ക്കാരങ്ങള്‍ വരുത്താന്‍ നടപടികള്‍ സ്വീകരിച്ചിട്ടുണ്ടോ; ഉണ്ടെങ്കില്‍ ഇതിന്റെ ഭാഗമായി സ്വീകരിച്ച നടപടികള്‍ വിശദമാക്കാമോ?

നിലവില്‍ സബ് രജിസ്ട്രാര്‍ ഓഫീസുകളില്‍ നിന്ന് ലഭിക്കുന്ന സര്‍ട്ടിഫിക്കറ്റുകള്‍ക്ക് ഓണ്‍ലൈനായി അപേക്ഷ നല്‍കി ഓണ്‍ലൈനായി പ്രിന്റ് എടുത്ത് ഉപയോഗിക്കാന്‍ സാധിക്കുന്നതുപോലെ ആധാരങ്ങളുടെ സാക്ഷ്യപ്പെടുത്തിയ പകര്‍പ്പുകളും ഓണ്‍ലൈനായി അപേക്ഷ സമര്‍പ്പിച്ച് പൊതുജനങ്ങള്‍ക്ക് ഡൗണ്‍ലോഡ് ചെയ്യാന്‍ സാധിക്കുന്ന പദ്ധതി രജിസ്ട്രേഷന്‍ വകുപ്പിന്റെ പരിഗണനയിലുണ്ടോ;

ഫയലിംഗ് ഷീറ്റിന്റെ കോപ്പിയല്ലാതെ അസ്സല്‍ ആധാരത്തിന്റെ ഡിജിറ്റലി സാക്ഷ്യപ്പെടുത്തിയ പകര്‍പ്പ് ഓണ്‍ലൈനായി പൊതുജനങ്ങള്‍ക്ക് ലഭ്യമാക്കാമോ?

സര്‍ക്കാര്‍ നിഷ്കര്‍ഷിച്ചിട്ടുള്ള രീതിയില്‍ വ്യക്തികള്‍ക്ക് സ്വന്തമായി ആധാരം തയ്യാറാക്കാനും രജിസ്റ്റര്‍ ചെയ്യാനുമുള്ള നടപടിക്രമങ്ങള്‍ എന്തൊക്കെയാണ്; വിശദമാക്കാമോ;

വിവിധ തരത്തിലുള്ള ആധാരങ്ങള്‍ തയ്യാറാക്കുന്നതിന് മാതൃക നിശ്ചയിച്ചിട്ടുണ്ടോ; ഉണ്ടെങ്കിൽ വിശദമാക്കാമോ;

സാധാരണക്കാര്‍ക്ക് പ്രസ്തുത സംവിധാനം ഉപയോഗപ്പെടുത്താന്‍ സാധിക്കുന്ന രീതിയിലുള്ള പ്രചാരണങ്ങള്‍ സര്‍ക്കാരിന്റെ ഭാഗത്തു നിന്നും നടപ്പിലാക്കുമോ; വിശദാംശങ്ങള്‍ ലഭ്യമാക്കാമോ?

വള്ളിക്കുന്ന് മണ്ഡലത്തിലെ തേഞ്ഞിപ്പാലം സബ് രജിസ്ട്രാര്‍ ഓഫീസ് വാടക കെട്ടിടത്തില്‍ പ്രവര്‍ത്തിച്ച ഇനത്തില്‍ നല്‍കേണ്ട വാടക അനുവദിച്ചിട്ടുണ്ടോയെന്ന് വ്യക്തമാക്കാമോ;

ഇതു സംബന്ധിച്ച് വകുപ്പിലോ സര്‍ക്കാരിലോ ഫയല്‍ പുരോഗമിക്കുന്നുണ്ടോ; ഉണ്ടെങ്കില്‍ പ്രസ്തുത ഫയലുകളിന്മേല്‍ സ്വീകരിച്ചു വരുന്ന നടപടികള്‍ വ്യക്തമാക്കാമോ?

സംസ്ഥാനത്തെ രജിസ്ട്രേഷന്‍ ഓഫീസുകളുടെ പ്രവര്‍ത്തനം കൂടുതല്‍ കാര്യക്ഷമമാക്കാന്‍ സ്വീകരിച്ചുവരുന്ന നടപടികള്‍ വ്യക്തമാക്കാമോ;

രജിസ്ട്രേഷന്‍ വകുപ്പിലെ ആധുനീകരണം പൂര്‍ത്തീകരിക്കാന്‍ സ്വീകരിക്കുന്ന നടപടികള്‍ വ്യക്തമാക്കാമോ?

വടക്കാഞ്ചേരി മണ്ഡലത്തിലെ സബ് രജിസ്ട്രാര്‍ ഓഫീസുകളുടെ നവീകരണവുമായി ബന്ധപ്പെട്ട് സ്വീകരിച്ച നടപടികളും അതിന്റെ പുരോഗതിയും വിശദമാക്കാമോ;

മണ്ഡലത്തിലെ ഏതെല്ലാം ഓഫീസുകളിലാണ് മോഡേണ്‍ റിക്കാര്‍ഡ് റൂം ആരംഭിക്കാനുദ്ദേശിക്കുന്നതെന്നും അവയുടെ നിര്‍മ്മാണ പുരോഗതി സംബന്ധിച്ചും വിശദാംശങ്ങള്‍ വ്യക്തമാക്കാമോ?

എറണാകുളം ജില്ലാ രജിസ്ട്രാറുടെ (ജനറൽ) ഓഫീസിൽ നിന്നും 31/05/2015 ന് ജൂനിയർ സൂപ്രണ്ടായി വിരമിച്ച ശശീന്ദ്രൻ വി.കെ. യുടെ പെൻഷനും മറ്റ് ആനുകൂല്യങ്ങളും കേരള അഡ്മിനിസ്ട്രേറ്റീവ് ട്രിബ്യൂണലിന്റെ 04/ഇ.കെ.എം./2150/2018 നമ്പർ വിധിപ്രകാരം പുതുക്കി നൽകുന്നതിന് സ്വീകരിച്ച നടപടികൾ വിശദമാക്കാമോ;

ഇത് സംബന്ധിച്ച് അദ്ദേഹം രജിസ്ട്രേഷന്‍ ഐ.ജി. ക്ക് നൽകിയ അപേക്ഷയിന്മേൽ നാളിതുവരെ സ്വീകരിച്ച നടപടികൾ വിശദമാക്കുമോ; പ്രസ്തുത വിധിപ്രകാരം പുതുക്കിയ ആനുകൂല്യങ്ങൾ എത്ര സമയ പരിധിക്കുള്ളിൽ ലഭ്യമാക്കുമെന്ന് വ്യക്തമാക്കുമോ?