ഈ സര്‍ക്കാര്‍ അധികാരത്തില്‍ വന്ന ശേഷം ചങ്ങനാശ്ശേരി നിയോജക മണ്ഡലത്തില്‍ വൈദ്യുതി വകുപ്പ് നടപ്പിലാക്കിയ പദ്ധതികളുടെ വിശദവിവരം നല്‍കുമോ;

ഓരോ പദ്ധതിയുടെയും നിലവിലെ സ്ഥിതി എന്താണെന്നും ഓരോ പദ്ധതിക്കും അനുവദിച്ച തുക എത്രയെന്നും വ്യക്തമാക്കുമോ?

സംസ്ഥാനത്ത് നിലവിൽ നിര്‍മ്മാണം പൂർത്തിയായി വരുന്ന വൈദ്യുത പദ്ധതികൾ ഏതെല്ലാമാണ്; ഇവയുടെ വിശദാംശം നൽകുമോ;

പ്രസ്തുത വൈദ്യുതി പദ്ധതികൾ പൂർത്തിയാകുമ്പോള്‍ സംസ്ഥാനത്തെ വൈദ്യുതി ഉല്പാദനത്തിൽ ഉണ്ടാകുന്ന വർധനവ് സംബന്ധിച്ച വിശദാംശം ലഭ്യമാക്കുമോ?

2022-23, 2023-24 എന്നീ വർഷങ്ങളില്‍ സംസ്ഥാനത്തെ ആഭ്യന്തര വൈദ്യുതി ഉല്പാദനത്തിൽ ഗണ്യമായ കുറവുണ്ടാകാനുള്ള സാഹചര്യം വ്യക്തമാക്കാമോ;

ആഭ്യന്തര വൈദ്യുതി ഉല്പാദനം വർദ്ധിപ്പിക്കുന്നതിൽ സ്വീകരിക്കാൻ ഉദ്ദേശിക്കുന്ന നടപടികൾ വിശദമാക്കാമോ;?

വൈദ്യുതിക്ഷാമം രൂക്ഷമായ മലപ്പുറം, കാസർഗോഡ് ഇടുക്കി ജില്ലകളിൽ പ്രത്യേക പാക്കേജ് നടപ്പിലാക്കാൻ ഉദ്ദേശിക്കുന്നുണ്ടോ;

പ്രസ്തുത ജില്ലകളിൽ പുതിയ സബ് സ്റ്റേഷനുകൾ, ട്രാൻസ്ഫോമറുകൾ, വൈദ്യുത ലൈനുകളുടെ വിപുലീകരണം എന്നിവയ്ക്ക് തുക വകയിരുത്തിയിട്ടുണ്ടോ; വിശദമാക്കുമോ?

സംസ്ഥാനത്ത് തടസ്സരഹിതമായി വൈദ്യുതി വിതരണം നടത്തുന്നതിനായി ഭൂഗർഭ കേബിൾ വഴി വൈദ്യുതി എത്തിക്കുന്ന പദ്ധതി ആവിഷ്കരിച്ചിട്ടുണ്ടോയെന്ന് അറിയിക്കാമോ;

പ്രസ്തുത പദ്ധതി നിലവിൽ എവിടെയെല്ലാമാണ് നടപ്പിലാക്കാൻ ഉദ്ദേശിക്കുന്നതെന്നും അത് സംസ്ഥാനമൊട്ടാകെ വ്യാപിപ്പിക്കുവാൻ നടപടി സ്വീകരിക്കുമോ എന്നും വിശദമാക്കുമോ?

വെെദ്യുതിവിതരണ ലെെന്‍ കേബിളാക്കുന്ന പദ്ധതി പ്രകാരം നാദാപുരം നിയോജകമണ്ഡലത്തില്‍ നടപ്പാക്കുന്ന പ്രവര്‍ത്തനങ്ങള്‍ വിശദമാക്കുമോ;

പ്രസ്തുത നിയോജകമണ്ഡലത്തിലെ സര്‍ക്കാര്‍ സ്ഥാപനങ്ങളിലും പൊതു വിദ്യാലയങ്ങളിലും സോളാര്‍ പാനല്‍ സ്ഥാപിക്കുന്ന പദ്ധതിയുടെ നിലവിലെ സ്ഥിതി വിശദമാക്കാമോ?

വേനൽക്കാലത്ത് പീക്ക് അവറുകളിൽ വർധിച്ച തോതില്‍ വെെദ്യുതി ഉപയോഗിക്കുന്നത് മൂലമുള്ള ഓവർലോഡ് കാരണം ട്രാൻസ്ഫോമറുകളിൽ ഭൂരിഭാഗവും തകരാറിലാകുന്നതിനാൽ നിലവിലുള്ള ട്രാൻസ്ഫോമറുകളുടെ ശേഷി വർദ്ധിപ്പിക്കുവാന്‍ നടപടി സ്വീകരിച്ചിട്ടുണ്ടോ;

എങ്കിൽ അതിനായി സ്വീകരിച്ചിട്ടുള്ള നടപടി വ്യക്തമാക്കാമോ;

വെെപ്പിൻ മണ്ഡലത്തിലെ സെക്ഷനുകളിൽ നിന്നും ട്രാൻസ്ഫോമറുകളുടെ ശേഷി വർദ്ധിപ്പിക്കുന്നതിനായി പ്രപ്പോസൽ ലഭിച്ചിട്ടുണ്ടോ; പ്രസ്തുത പ്രപ്പോസലിൽ സ്വീകരിച്ചിട്ടുള്ള നടപടി വ്യക്തമാക്കാമോ?

സംസ്ഥാനത്ത് മാറിക്കൊണ്ടിരിക്കുന്ന വികസന സാഹചര്യത്തെ നേരിടുന്നതിനും കൂടുതല്‍ വ്യവസായങ്ങള്‍ നടപ്പിലാക്കുന്നതിന് ആവശ്യമായി വരുന്ന അധിക വൈദ്യുതി ഉല്പാദിപ്പിക്കുന്നതിനും എന്തെല്ലാം പദ്ധതികളാണ് ആവിഷ്കരിക്കാന്‍ ഉദ്ദേശിക്കുന്നതെന്ന് വിശദമാക്കാമോ?

അടുത്ത മൂന്ന് പതിറ്റാണ്ട് കാലത്തെ വൈദ്യുതി ആവശ്യകത നിറവേറ്റാന്‍ കഴിയുന്ന രീതിയിലുള്ള പ്രവര്‍ത്തനങ്ങള്‍ വൈദ്യുതി പ്രസരണ മേഖലയില്‍ പൂര്‍ത്തിയാക്കുവാന്‍ നടപടികള്‍ സ്വീകരിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

പുനരുപയോഗ ഊര്‍ജ്ജ സ്രോതസ്സുകളില്‍ നിന്നുള്ള വൈദ്യുതിയുടെ പ്രസരണം സുഗമമാക്കുന്നതിനായി അത്യന്താധുനിക സംവിധാനങ്ങളോടെയുള്ള പ്രസരണ ശൃംഖല ഉറപ്പ് വരുത്തുവാന്‍ നടപടി സ്വീകരിച്ചിട്ടുണ്ടോ; വിശദമാക്കാമോ;

പാര്‍ശ്വവല്‍ക്കരിക്കപ്പെട്ട ജനവിഭാഗങ്ങള്‍ക്കും ആദിവാസി സമൂഹങ്ങള്‍ക്കും വെളിച്ചം എത്തിക്കാന്‍ സ്വീകരിച്ചിട്ടുള്ള നടപടികള്‍ എന്തെല്ലാമാണ്; വിശദമാക്കുമോ;

സ്വകാര്യവൽക്കരണത്തെ പ്രോത്സാഹിപ്പിക്കുന്ന കേന്ദ്ര സർക്കാർ നയത്തിന്റെ ഭാഗമായി വൈദ്യുതി വില കൂടുന്ന വര്‍ത്തമാനകാല സാഹചര്യത്തിലും പാവപ്പെട്ടവർക്കും പ്രത്യേക പരിഗണന അർഹിക്കുന്നവർക്കും നൽകുന്ന വൈദ്യുതി ഇളവുകൾ സംസ്ഥാനം നിലനിർത്തുന്നുണ്ടോ; വിശദമാക്കാമോ?

ഇടുക്കി രണ്ടാംഘട്ട വൈദ്യുത പദ്ധതിയ്ക്ക് കേന്ദ്രാനുമതി ലഭിച്ചിട്ടുണ്ടോ; പ്രസ്തുത പദ്ധതി നടപ്പാക്കുന്നതിന് സ്വീകരിച്ച നടപടികള്‍ വ്യക്തമാക്കാമോ;

പദ്ധതി മുഖേന എത്ര മെഗാവാട്ട് വൈദ്യുതി ഉല്പാദിപ്പിക്കാനാണ് ലക്ഷ്യമിടുന്നത്; വിശദമാക്കാമോ;

തൊടുപുഴ നിയോജകമണ്ഡലത്തില്‍ പുതിയ സബ്‍സ്റ്റേഷന്‍ അനുവദിക്കുന്നതിനുള്ള നടപടി ഏത് ഘട്ടത്തിലാണെന്ന് അറിയിക്കാമോ?

ഈ സര്‍ക്കാരിന്റെ കാലത്ത് തളിപ്പറമ്പ് മണ്ഡലത്തില്‍ വൈദ്യുതി വകുപ്പ് നടപ്പിലാക്കിക്കൊണ്ടിരിക്കുന്നതും പൂര്‍ത്തീകരിച്ചതുമായ പദ്ധതികള്‍ വിശദമാക്കാമോ;

പ്രസ്തുത കാലയളവിൽ തളിപ്പറമ്പ് മണ്ഡലത്തില്‍ വിവിധ പദ്ധതികള്‍ക്കായി അനുവദിച്ച തുക എത്രയെന്ന് വ്യക്തമാക്കാമോ; അവ ഓരോന്നിന്റെയും പ്രവര്‍ത്തന പുരോഗതി വിശദമാക്കാമോ?

കെ.എസ്.ഇ.ബി.യില്‍ നിലവില്‍ എത്ര സബ് എഞ്ചിനീയര്‍മാരുടെ ഒഴിവുണ്ടെന്ന് അറിയിക്കാമോ; പ്രസ്തുത ഒഴിവുകള്‍ പി.എസ്.സി.ക്ക് റിപ്പോര്‍ട്ട് ചെയ്യാനുള്ള നടപടികള്‍ സ്വീകരിക്കുമോ; വിശദമാക്കാമോ;

കെ.എസ്.ഇ.ബി.യിലെ സബ് എഞ്ചിനീയര്‍മാരുടെ ഒഴിവുകള്‍ സമയബന്ധിതമായി നികത്തുന്നതിന് സ്വീകരിക്കുന്ന നടപടിക്രമങ്ങള്‍ എന്തൊക്കെയെന്ന് അറിയിക്കാമോ?

താഴേക്കോട് സബ് സ്റ്റേഷന്‍ പരിധിയില്‍ വോള്‍ട്ടേജ് ക്ഷാമം നിലനില്‍ക്കുന്ന കാര്യം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് പരിഹരിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കുമോ;

കരിങ്കല്ലത്താണി ടൗണിലെ വൈദ്യുതി മുടക്കവും വോള്‍ട്ടേജ് ക്ഷാമവും പരിഹരിക്കുന്നതിനായി ഡെഡിക്കേറ്റഡ് ഫീഡര്‍ സ്ഥാപിക്കുന്നതിന് നടപടി സ്വീകരിക്കുമോ?

കോഴിക്കോട് ജില്ലയിലെ പന്തീരങ്കാവില്‍ 110 കെ.വി. സബ്സ്റ്റേഷന്‍ ആരംഭിക്കുന്നതിനായി എത്ര ഏക്കര്‍ സ്ഥലം ഏറ്റെടുക്കുന്നതിനാണ് തീരുമാനിച്ചിട്ടുള്ളതെന്നും ഭൂമി ഏറ്റെടുക്കല്‍ നടപടികള്‍ ഏത് ഘട്ടത്തിലാണെന്നും വ്യക്തമാക്കാമോ;

റവന്യൂ വകുപ്പ് ഭൂമിയുടെ വില നിശ്ചയിച്ച് നല്‍കിയിട്ടുണ്ടോ; എങ്കില്‍ സ്ഥലം ഏറ്റെടുക്കാനുള്ള തുക റവന്യൂ വകുപ്പിന് കൈമാറിയിട്ടുണ്ടോ; വിശദമാക്കാമോ?

സംസ്ഥാനത്തെ കഴിഞ്ഞ മൂന്ന് മാസത്തെ ശരാശരി വെെദ്യുതി ഉപഭോഗവും ഉല്പാദനവും എത്ര ആയിരുന്നുവെന്നും ഇവ തമ്മിലുളള അന്തരം പരിഹരിക്കാൻ സ്വീകരിച്ച നടപടികൾ എന്തൊക്കെയെന്നും വിശദമാക്കാമോ;

ഉയർന്ന ഗുണമേന്മയുള്ള തടസ്സമില്ലാത്ത വെെദ്യുതി വിതരണം ലക്ഷ്യമാക്കി ഭാവിയിൽ ഉപയോഗിക്കുന്നതിനായി ട്രാൻസ്ഫോർമറുകളുടേയും മറ്റ് ഉപകരണങ്ങളുടേയും സംഭരണം കെ.എസ്.ഇ.ബി. നടത്തിയിട്ടുണ്ടോ; എങ്കിൽ ഇവയുടെ ഓരോന്നിന്റേയും സ്റ്റോക്ക് സംബന്ധിച്ച നിലവിലെ അവസ്ഥ വിശദാംശങ്ങൾ സഹിതം ലഭ്യമാക്കാമോ?

സംസ്ഥാനത്ത് നിലവില്‍ എത്ര ഇലക്ട്രിക് വെഹിക്കിള്‍ ചാര്‍ജിംഗ് സ്റ്റേഷനുകളാണ് ഉള്ളത്; വിശദവിവരം ലഭ്യമാക്കാമോ;

സ്വകാര്യ സംരംഭകര്‍ക്ക് ചാര്‍ജിംഗ് സ്റ്റേഷനുകള്‍ ആരംഭിക്കുന്നതിനായി ചാര്‍ജിംഗ് മെഷീന് സബ്സിഡി നല്‍കുന്നതിനുള്ള പദ്ധതി ആരംഭിച്ചിട്ടുണ്ടോ; എങ്കില്‍ എത്ര സംരംഭകര്‍ നിലവില്‍ പദ്ധതിയുടെ ഭാഗമായിട്ടുണ്ടെന്ന് വിശദമാക്കാമോ;

കെ.എസ്.ഇ.ബി. അടക്കമുള്ള സ്വകാര്യ കമ്പനികളുടെ ഇലക്ട്രിക് വെഹിക്കിള്‍ ചാര്‍ജിംഗ് സ്റ്റേഷനുകളിലെ നിരക്കുകള്‍ സംബന്ധിച്ച വിശദാംശങ്ങള്‍ നല്‍കാമോ; ഈ നിരക്ക് ഏകീകരിക്കുന്നതിന് നടപടി സ്വീകരിക്കുമോ?

കൈപ്പമംഗലം നിയോജകമണ്ഡലത്തിലെ ചില കുടുംബങ്ങൾക്ക് ഉപയോഗിക്കുന്നതിലധികം തുകയ്ക്കുള്ള വൈദ്യുതി ബില്ല് ലഭിക്കുന്നതായുള്ള പരാതികൾ ലഭിച്ചിട്ടുണ്ടോ;

വളരെ സാധാരണക്കാരായ ഇവർ ഹൗസ് വയറിങ് നടത്തിയപ്പോൾ ഉണ്ടായിട്ടുള്ള ചില അപാകതകൾ നിമിത്തമാണ് ഇത്തരം അധിക ബില്ലാകുന്നതെന്ന കാര്യം ശ്രദ്ധയിപ്പെട്ടിട്ടുണ്ടോ; എങ്കിൽ ഇത് പരിഹരിക്കാൻ എന്തെല്ലാം നടപടികളാണ് സ്വീകരിച്ചിട്ടുള്ളത്;

വൈദ്യുതി ഉപയോഗവും അതിൽ ശ്രദ്ധിക്കേണ്ട കാര്യങ്ങളെയും കുറിച്ച് മണ്ഡലത്തിലെ തനത് വിദ്യാഭ്യാസ പദ്ധതിയായ അക്ഷരകൈരളിയുടെ ഉപവിഭാഗമായ സ്വരക്ഷയുമായി ചേർന്ന് വിദ്യാലയങ്ങളിൽ എന്തെല്ലാം പരിപാടികളാണ് ആവിഷ്കരിക്കാൻ ഉദ്ദേശിക്കുന്നത്; വിശദമാക്കാമോ ?

അമ്പലപ്പുഴ കെ.എസ്.ഇ.ബി. ഇലക്ട്രിക്കൽ സെക്ഷന്റെ പരിധിയില്‍ വരുന്ന വിവിധ തരത്തിലുള്ള ഗാർഹിക,വ്യാവസായിക ഉപഭോക്താക്കളുടെ എണ്ണം ഇനം തിരിച്ച് വ്യക്തമാക്കാമോ; പ്രസ്തുത സെക്ഷന്റെ വിസ്തൃതി എത്രയാണ്; സെക്ഷന്റെ പരിധിയില്‍ നിന്നും സേവനം നൽകി വരുന്ന പഞ്ചായത്തുകളുടെയും വാര്‍ഡുകളുടെയും എണ്ണം എത്രയാണെന്ന് അറിയിക്കാമോ;

ഓരോവർഷവും പ്രസ്തുത ഇലക്ട്രിക്കൽ സെക്ഷന്റ പരിധിയില്‍ വരുന്ന ഉപഭോക്താക്കളുടെ എണ്ണത്തിൽ വർധനവുണ്ടാകുന്നത് ശ്രദ്ധയിൽപെട്ടിട്ടുണ്ടോ; തന്മൂലം ജീവനക്കാർക്കുണ്ടാകുന്ന ബുദ്ധിമുട്ട് ഒഴിവാക്കുന്നതിനും ഉപഭോക്താക്കള്‍ക്ക് മികച്ച സേവനം നൽകുന്നതിനുമായി പ്രസ്തുത ഇലക്ട്രിക്കൽ സെക്ഷൻ വിഭജിച്ച് തോട്ടപ്പള്ളി കേന്ദ്രമായി ഒരു പുതിയ ഇലക്ട്രിക്കൽ സെക്ഷൻ അനുവദിക്കുന്നതിനുള്ള നടപടി സ്വീകരിക്കുമോ?

വര്‍ക്കല മണ്ഡലത്തിലെ വര്‍ക്കല സെക്ഷനിലെ ചെറുകുന്നം പ്രദേശത്ത് കെ.എസ്.ഇ.ബി. സ്ഥാപിച്ചിട്ടുള്ള ട്രാന്‍സ്ഫഫോര്‍മര്‍ മാറ്റി സ്ഥാപിക്കണമെന്ന് ആവശ്യപ്പെട്ട് അപേക്ഷകള്‍ ലഭിച്ചിട്ടുണ്ടോ; എങ്കില്‍ ആയത് അനുയോജ്യമായ സ്ഥലത്തേക്ക് മാറ്റി സ്ഥാപിക്കുമോ;

പ്രസ്തുത ട്രാന്‍സ്ഫഫോര്‍മര്‍ മാറ്റി സ്ഥാപിക്കണമെന്നാവശ്യപ്പെട്ട് എത്ര അപേക്ഷകള്‍ ലഭിച്ചിട്ടുണ്ട്; വിശദമാക്കാമോ;

നിലവിലെ ട്രാന്‍സ്ഫഫോര്‍മറിന് സമീപത്തുള്ള വീട്ടുകാര്‍ക്ക് ട്രാന്‍സ്ഫഫോര്‍മര്‍ തടസ്സം സൃഷ്ടിക്കുന്നത് ശ്രദ്ധയില്‍പ്പെട്ടിട്ടുണ്ടോ?

സംസ്ഥാനത്ത് കെ.എസ്.ഇ.ബി.യുടെ നിയന്ത്രണത്തില്‍ സ്ഥാപിച്ചിട്ടുള്ള ഇലക്ട്രിക് വാഹന ചാർജിംഗ് സ്റ്റേഷനുകളുടെ പ്രവർത്തന പുരോഗതി വിലയിരുത്തിയിട്ടുണ്ടോ; വിശദമാക്കാമോ;

വാമനപുരം മണ്ഡലത്തില്‍ വിവിധ സ്ഥലങ്ങളില്‍ കെ.എസ്.ഇ.ബി. സ്ഥാപിച്ചിട്ടുള്ള ചാർജിംഗ് സ്റ്റേഷനുകളില്‍ ഓരോന്നിലും നാളിതുവരെ എത്ര വാഹനങ്ങള്‍ ചാർജ് ചെയ്തിട്ടുണ്ടെന്നും ഓരോ ചാർജിംഗ് സ്റ്റേഷനിൽ നിന്നും ലഭിച്ച വരുമാനം എത്രയാണെന്നും വിശദമാക്കാമോ?

നിലവിലെ സര്‍ക്കാര്‍ അധികാരത്തില്‍ വന്നശേഷം കായംകുളം മണ്ഡലത്തില്‍ വൈദ്യുതി വകുപ്പ് നടപ്പാക്കിയ പദ്ധതികള്‍ ഏതൊക്കെയെന്നും അതിനായി എത്ര രൂപ വിനിയോഗിച്ചിട്ടുണ്ടെന്നും വിശദമാക്കാമോ?

കെ.എസ്.ഇ.ബി.യിൽ ട്രാൻസ്ഫോർമറുകളുടെ ലഭ്യതക്കുറവുണ്ടോ; എങ്കിൽ അതിനുള്ള കാരണം എന്താണെന്ന് അറിയിക്കുമോ;

ട്രാൻസ്ഫോർമർ ക്ഷാമം മൂലം പണമടച്ച സംരംഭകർക്ക് ട്രാൻസ്ഫോർമർ നൽകാൻ കഴിയാത്ത സാഹചര്യം നിലവിലുണ്ടോ;

വ്യവസായ സംരംഭങ്ങൾക്ക് ചട്ടങ്ങൾ നിഷ്കർഷിക്കുന്ന പ്രകാരമുള്ള വൈദ്യുതി ലഭ്യമാക്കാൻ സാധിക്കാതെ വരുന്നത് സംസ്ഥാനത്തെ വ്യാവസായിക വളർച്ചയ്ക്ക് തടസ്സമാകുമെന്ന് കരുതുന്നുണ്ടോ; വ്യക്തമാക്കുമോ;

പീക് അവറുകളില്‍ ട്രാൻസ്ഫോർമറുകളുടെ ലഭ്യതക്കുറവ് മൂലം അതിന്റെ കപ്പാസിറ്റിയിൽ അധികം ലോഡ് ഉണ്ടാകുന്ന പ്രദേശങ്ങളിൽ വൈദ്യുതി വിതരണം സുഗമമല്ലാതാകുന്നതും തടസ്സപ്പെടുന്നതുമായ സാഹചര്യം ശ്രദ്ധയിൽപ്പെട്ടിട്ടുണ്ടോ;

ട്രാൻസ്ഫോർമർ ക്ഷാമം കാരണം പൊതു ട്രാൻസ്ഫോർമറുകളില്‍ കപ്പാസിറ്റി കൂട്ടി കണക്ഷൻ നൽകുന്നത് സംരംഭകർക്ക് നഷ്ടം ഉണ്ടാക്കുമെന്ന പരാതി പരിശോധിക്കുകയുണ്ടായോ;

എങ്കിൽ ട്രാൻസ്ഫോർമർ ക്ഷാമം മൂലമുള്ള പരാതികൾ പരിഹരിക്കുന്നതിനായി എന്തൊക്കെ അടിയന്തര നടപടികൾ സ്വീകരിക്കുന്നതിനാണ് ഉദ്ദേശിക്കുന്നത്; വിശദമാക്കുമോ?

ഉപഭോക്താക്കളില്‍ നിന്നും കെ.എസ്.ഇ.ബി. അധികമായി സെക്യൂരിറ്റി ഡെപ്പോസിറ്റ് തുക ആവശ്യപ്പെടുന്നതിന്റെ മാനദണ്ഡം വിശദമാക്കുമോ;

അധിക സെക്യൂരിറ്റി ഡെപ്പോസിറ്റ് തുകയിന്മേലുളള പലിശ കണക്കാക്കുന്നത് എങ്ങനെയാണെന്ന് വ്യക്തമാക്കുമോ?

നിലവിലെ സര്‍ക്കാര്‍ അധികാരത്തില്‍ വന്നതിനു ശേഷം നാളിതുവരെ ഒറ്റപ്പാലം മണ്ഡലത്തില്‍ കെ.എസ്.ഇ.ബി. മുഖേന നടപ്പാക്കിയ പദ്ധതികള്‍ ഏതെല്ലാമെന്നും അതിനായി ചെലവഴിച്ച തുക എത്രയൊക്കെയാണെന്നും വ്യക്തമാക്കാമോ;

പ്രസ്തുത മണ്ഡലത്തില്‍ കെ.എസ്.ഇ.ബി.യുടെ കീഴില്‍ എത്ര സ്ഥലമാണ് ഉള്ളതെന്നും ഈ സ്ഥലങ്ങളില്‍ ഏതൊക്കെ സ്ഥാപനങ്ങളാണ് പ്രവൃത്തിക്കുന്നതെന്നുമുള്ള വിവരം ലഭ്യമാക്കാമോ?

സംസ്ഥാനത്തെ വൈദ്യുതി വിതരണരംഗത്ത് നടപ്പിലാക്കി വരുന്ന മാറ്റങ്ങള്‍ എന്തെല്ലാമാണെന്ന് വ്യക്തമാക്കുമോ; ഇതു വഴി വൈദ്യുതി ലാഭിക്കാന്‍ സാധിച്ചിട്ടുണ്ടോയെന്ന് വ്യക്തമാക്കുമോ; വൈദ്യുതി വിതരണത്തിനിടെ സംഭവിക്കുന്ന അപകടങ്ങള്‍ നിയന്ത്രക്കുവാന്‍ ഈ മാറ്റങ്ങളിലൂടെ സാധിച്ചിട്ടുണ്ടോ; വ്യക്തമാക്കുമോ?

സംസ്ഥാനത്ത് വൈദ്യുത വാഹനങ്ങളുടെ എണ്ണത്തില്‍ ഉണ്ടായിട്ടുള്ള വര്‍ധനവിന് ആനുപാതികമായി ചാര്‍ജിംഗ് ഇന്‍ഫ്രാസ്ട്രക്ചര്‍ ഒരുക്കുവാന്‍ സാധിച്ചിട്ടുണ്ടോ; വിശദമാക്കുമോ;

ഗ്രീന്‍ ഹൗസ് വാതകങ്ങളുടെ അളവ് കുറയ്ക്കുന്നത് ലക്ഷ്യമിട്ട് സംസ്ഥാനത്ത് ഗ്രീന്‍ ഹൈഡ്രജന്‍ ഹബ്ബുകള്‍ സ്ഥാപിക്കുവാന്‍ തീരുമാനമെടുത്തിട്ടുണ്ടോ; ഗ്രീന്‍ ഹൈഡ്രജന്‍ ഹബ്ബുകള്‍ സ്ഥാപിക്കുമ്പോള്‍ ഈ മേഖലയില്‍ ഉണ്ടാകുന്ന മറ്റ് പ്രയോജനങ്ങള്‍ എന്തൊക്കെയാണെന്ന് വിശദമാക്കുമോ;

പ്രസ്തുത ലക്ഷ്യത്തിലേയ്ക്കുള്ള ഒരു പുതിയ ചുവടുവയ്പ്പെന്ന നിലയില്‍ കാര്‍ബണ്‍ ക്രെഡിറ്റ് വിപണി എന്ന ആശയം പരിഗണനയിലുണ്ടോ; വിശദമാക്കുമോ?

സമീപ കാലത്ത് വൈദ്യുതി വകുപ്പിന് കേന്ദ്രത്തിൽ നിന്ന് ഫണ്ട് ലഭിച്ചിട്ടുണ്ടോ; ഇല്ലെങ്കില്‍ ഫണ്ട് നൽകാൻ കേന്ദ്രം സമ്മതിച്ചിട്ടുണ്ടോ; വ്യക്തമാക്കാമോ;

എങ്കിൽ എത്ര രൂപയുടെ ഫണ്ടാണെന്ന് വിശദമാക്കാമോ;

പ്രസ്തുത ഫണ്ട് ഏതൊക്കെ പ്രവൃത്തികൾക്കാണ് ചെലവഴിക്കുന്നതെന്ന് ജില്ല തിരിച്ചു വ്യക്തമാക്കാമോ;

ഈ ഫണ്ട് പൂർണ്ണമായി ചെലവാക്കാൻ കഴിഞ്ഞാൽ വൈദ്യുതി മേഖലയിൽ ഉണ്ടാകുന്ന മാറ്റങ്ങൾ എന്തൊക്കെയാണെന്ന് ജില്ല തിരിച്ച് വിശദമാക്കാമോ?

വൈദ്യുതി ബില്‍ അടയ്ക്കാത്തതിനാല്‍ 2023 മാര്‍ച്ച് 1 മുതല്‍ നാളിതുവരെ വയനാട് ജില്ലയിൽ എത്ര ഗാര്‍ഹിക കണക്ഷനുകള്‍ വിഛേദിച്ചിട്ടുണ്ട്;

ഇപ്രകാരം വിഛേദിച്ചതില്‍ എത്ര കണക്ഷനുകള്‍ പുന:സ്ഥാപിച്ച് നല്‍കിയിട്ടുണ്ട്;

കണക്ഷന്‍ വിഛേദിക്കപ്പെട്ട പട്ടികവര്‍ഗ്ഗ കുടുംബങ്ങളുടെ എണ്ണം വ്യക്തമാക്കാമോ;

കണക്ഷന്‍ പുന:സ്ഥാപിക്കാത്ത പട്ടികവര്‍ഗ്ഗ കുടുംബങ്ങളുടെ എണ്ണം വ്യക്തമാക്കാമോ?

അംഗന്‍ജ്യോതി പദ്ധതി കൂടുതല്‍ പ്രദേശങ്ങളിലേക്ക് വ്യാപിപ്പിക്കുന്നതിന് ഉദ്ദേശിക്കുന്നുണ്ടോ; വിശദമാക്കുമോ;

നിലമ്പൂര്‍ നിയോജക മണ്ഡലത്തിലെ ഏതെങ്കിലും അങ്കണവാടിയിൽ അംഗന്‍ജ്യോതി പദ്ധതിയോ നെറ്റ് സീറോ പദ്ധതിയോ നടപ്പിലാക്കുന്നുണ്ടോ; ഉണ്ടെങ്കില്‍ തദ്ദേശസ്ഥാപനമടക്കമുളള വിശദാംശം ലഭ്യമാക്കുമോ;

കാര്‍ബണ്‍ ന്യൂട്രല്‍ സംസ്ഥാനമാക്കുന്നതിന് നിലവില്‍ നടപ്പിലാക്കുന്ന പദ്ധതികളുടെ വിശദാംശം ലഭ്യമാക്കുമോ; അവയിലേതെങ്കിലും നിലമ്പൂര്‍ നിയോജക മണ്ഡലത്തില്‍ നടപ്പിലാക്കുന്നുണ്ടെങ്കില്‍ വിശദാംശം ലഭ്യമാക്കാമോ?

ഉ‍ഡുപ്പി-കരിന്തളം 400 കെ.വി. പദ്ധതിയുടെ ഭാഗമായി ഭൂമിയും കാര്‍ഷിക വിളകളും നഷ്ടപ്പെടുന്നവര്‍ക്കുളള നഷ്ടപരിഹാരം നല്‍കുന്നതിനുളള നടപടികള്‍ സ്വീകരിച്ചിട്ടുണ്ടോ;

കാസർഗോഡ് ജില്ലയിൽ പുതിയ സെക്ഷന്‍ ഓഫീസ് ആരംഭിക്കുന്നതിന് ഉദ്ദേശിക്കുന്നുണ്ടോ; എങ്കില്‍ അതിനുള്ള മാനദണ്ഡങ്ങള്‍ എന്തൊക്കെയാണ്?

ഈ സർക്കാർ അധികാരത്തില്‍ വന്നതിനുശേഷം പൂർത്തിയാക്കിയ ജലവൈദ്യുത പദ്ധതികള്‍ ഏതെല്ലാമാണെന്നും എത്ര യൂണിറ്റ് വൈദ്യുതിയാണ് ഇതിലൂടെ അധികമായി ഉല്പാദിപ്പിക്കാന്‍ സാധിച്ചിട്ടുള്ളതെന്നും വിശദമാക്കാമോ;

നിർമ്മാണത്തിലിരിക്കുന്ന പദ്ധതികള്‍ ഏതെല്ലാമെന്നും അവ എന്നത്തേക്ക് പൂർത്തീകരിക്കാനാകുമെന്നും അറിയിക്കാമോ?

ദ്യുതി പദ്ധതി വിശദീകരിക്കാമോ; സംസ്ഥാനത്ത് ദ്യുതി പദ്ധതി പ്രകാരം നടപ്പിലാക്കിയ പ്രവർത്തനങ്ങളുടെ വിശദാംശം നൽകുമോ;

പ്രസ്തുത പദ്ധതി പ്രകാരം മലപ്പുറം നിയോജക മണ്ഡലത്തിൽ നടപ്പിലാക്കിയതും പുതുതായി നടപ്പിലാക്കാൻ ഉദ്ദേശിക്കുന്നതുമായ പ്രവൃത്തികൾ എന്തെല്ലാമെന്നത് സംബന്ധിച്ച വിശദാംശങ്ങൾ വെളിപ്പെടുത്തുമോ?

ജലാശയങ്ങളിൽ ഫ്ലോട്ടിംഗ് സോളാർ പദ്ധതി നടപ്പിലാക്കുന്നതിന് സ്വീകരിച്ചിട്ടുള്ള നടപടികൾ എന്തെല്ലാമാണെന്ന് വിശദമാക്കുമോ?

സാമ്പത്തികമായി പിന്നാക്കം നില്‍ക്കുന്ന കുടുംബങ്ങള്‍ക്ക് വെെദ്യുതി കണക്ഷന്‍ നല്‍കുന്നതിന് ഇലക്ട്രിക് പോസ്റ്റുകളും അനുബന്ധ വസ്തുക്കളും ആവശ്യമായി വരുമ്പോള്‍ അവ സൗജന്യമായോ ഇളവുകളോടെയോ അനുവദിക്കുന്നതിന് കെ.എസ്.ഇ.ബി.യ്ക്ക് എന്തെങ്കിലും പദ്ധതി നിലവിലുണ്ടോ; എങ്കില്‍ വിശദാംശം നല്‍കാമോ;

ലെെഫ് പദ്ധതി പ്രകാരവും സന്നദ്ധ സംഘനകളും മറ്റും മുഖേനെയും വീട് നിര്‍മ്മിച്ച് നല്‍കുമ്പോള്‍ പ്രസ്തുത വീടുകള്‍ക്ക് വെെദ്യുതി കണക്ഷൻ നൽകുന്നതിൽ എന്തെങ്കിലും ഇളവുകള്‍ നിലവിലുണ്ടോ; എങ്കില്‍ വിശദാംശം നല്‍കാമോ?

ആലപ്പുഴ ജില്ലയില്‍ എത്ര ഇലക്ട്രിക് വെഹിക്കിള്‍ ചാർജിംഗ് സ്റ്റേഷനുകള്‍ ഉണ്ടെന്നും അവ എവിടെയെല്ലാമാണ് സ്ഥാപിച്ചിട്ടുള്ളതെന്നുമുള്ള വിവരം ലഭ്യമാക്കാമോ;

സ്വകാര്യ സംരംഭകർക്ക് ചാർജിംഗ് സ്റ്റേഷനുകള്‍ ആരംഭിക്കുവാന്‍ സബ്സിഡി നല്‍കുന്ന പദ്ധതി നിലവിലുണ്ടോയെന്നും ആയത് പ്രകാരം എത്ര പേര്‍ പ്രസ്തുത സംരംഭം ആരംഭിച്ചിട്ടുണ്ടെന്നും വ്യക്തമാക്കുമോ?

പേരാമ്പ്ര മണ്ഡലത്തിൽ ദ്യുതി പദ്ധതി പ്രകാരം 2016 മുതൽ പൂർത്തിയാക്കിയ പ്രവൃത്തികൾ വിശദമാക്കാമോ; ഇതിനായി എത്ര രൂപ ചെലവഴിച്ചുവെന്ന് അറിയിക്കാമോ;

മണ്ഡലത്തിലെ ചില പ്രദേശങ്ങളിൽ വോൾട്ടേജ് ക്ഷാമം നിലനിൽക്കുന്നു എന്ന പരാതി ശ്രദ്ധയിൽപ്പെട്ടിട്ടുണ്ടോ; എങ്കിൽ ഇത് പരിഹരിക്കുന്നതിന് എന്ത് നടപടി സ്വീകരിക്കുമെന്ന് വിശദമാക്കാമോ?

2022-23, 2023-24 വര്‍ഷങ്ങളില്‍ കുന്നത്തുനാട് മണ്ഡലത്തില്‍ വൈദ്യുതി വകുപ്പ് നടപ്പിലാക്കിയ പ്രധാന പ്രവൃത്തികള്‍ ഏതൊക്കെയാണെന്നും ഓരോ പ്രവൃത്തിക്കും എത്ര തുക വീതമാണ് അനുവദിച്ചിട്ടുള്ളതെന്നും വിശദമാക്കാമോ;

പ്രസ്തുത പ്രവൃത്തികളുടെ നിലവിലെ സ്ഥിതി സംബന്ധിച്ച വിശദാംശം ലഭ്യമാക്കുമോ;

2024-25 വര്‍ഷത്തില്‍ ഏതെല്ലാം പുതിയ പദ്ധതികളാണ് മണ്ഡലത്തില്‍ നടപ്പില്‍ വരുത്താന്‍ ഉദ്ദേശിക്കുന്നതെന്ന് അറിയിക്കാമോ?

സംസ്ഥാനത്ത് വൈദ്യുതി ഉല്പാദന മേഖലകളില്‍ കാര്‍ബണ്‍ ന്യൂട്രാലിറ്റിയെന്ന ലക്ഷ്യം മുന്‍നിര്‍ത്തിയുള്ള പ്രവര്‍ത്തനങ്ങള്‍ക്ക് തുടക്കം കുറിച്ചിട്ടുണ്ടോ; വിശദമാക്കുമോ;

കാര്‍ബണ്‍ ന്യൂട്രാലിറ്റി കൈവരിക്കുന്നതിനും പാരമ്പര്യേതര ഊര്‍ജ്ജ ഉല്പാദനം പ്രോത്സാഹിപ്പിക്കുന്നതിനുമായി നടപ്പാക്കുന്ന പദ്ധതികള്‍ വിശദമാക്കാമോ;

സംസ്ഥാനത്ത് ഊര്‍ജ്ജ ഉല്പാദനത്തിനൊപ്പം ഉപഭോക്താക്കള്‍ക്ക് വരുമാനം കൂടി ലഭ്യമാകുന്ന തരത്തില്‍ പദ്ധതികള്‍ തയ്യാറാക്കിയിട്ടുണ്ടോ; വിശദമാക്കുമോ?

സംസ്ഥാനത്ത് എത്ര ജലവൈദ്യുത പദ്ധതികളാണ് നിര്‍മ്മാണത്തിലുള്ളതെന്ന് വ്യക്തമാക്കാമോ;

പ്രസ്തുത പദ്ധതികള്‍ ആരംഭിച്ചത് എന്ന് മുതലാണെന്ന് വിശദമാക്കുമോ;

പ്രസ്തുത പദ്ധതികള്‍ സമയബന്ധിതമായി പൂര്‍ത്തീകരിക്കാന്‍ കഴിയാത്തതിന്റെ കാരണം വിശദമാക്കുമോ;

ഈ പദ്ധതികള്‍ എന്നത്തേക്ക് പൂര്‍ത്തീകരിക്കാന്‍ കഴിയുമെന്ന് വ്യക്തമാക്കുമോ?

ചാത്തന്നൂർ നിയോജക മണ്ഡലത്തിൽ എം.എൽ.എ.യുടെ പ്രത്യേക വികസന ഫണ്ട് വിനിയോഗിച്ച് നടപ്പിലാക്കി വരുന്ന ഗ്രാമവെളിച്ചം പദ്ധതി പ്രകാരം പൂയപ്പള്ളി ഗ്രാമ പഞ്ചായത്തിന്റെ വിവിധ പ്രദേശങ്ങളിൽ കെ.എസ്.ഇ.ബി. കുണ്ടറ എക്സിക്യൂട്ടീവ് എഞ്ചിനീയറുടെ നിർവഹണ ചുമതലയിൽ തെരുവ് വിളക്കുകൾ സ്ഥാപിക്കുന്ന നടപടികളുടെ നിലവിലെ സ്ഥിതി വ്യക്തമാക്കാമോ;

പ്രസ്തുത പദ്ധതി ഉടൻ നടപ്പിലാക്കുന്നതിന് കെ.എസ്.ഇ.ബി. നടപടികൾ സ്വീകരിച്ചിട്ടുണ്ടോ; വിശദമാക്കാമോ ?

തിരൂരങ്ങാടി മുനിസിപ്പാലിറ്റിയിൽ കക്കാട് മുതൽ കാച്ചടി വരെയുള്ള പ്രദേശത്തെ ഹൈടെൻഷൻ ലൈൻ മാറ്റി സ്ഥാപിക്കണമെന്നാവശ്യപ്പെട്ട് നൽകിയ നിവേദനം ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

പ്രസ്തുത പ്രവൃത്തി പൂർത്തീകരിക്കുന്നതുമായി ബന്ധപ്പെട്ട വിശദവിവരങ്ങൾ ലഭ്യമാക്കാമോ?

സംസ്ഥാനത്ത് വര്‍ഷത്തില്‍ ആകെ എത്ര മെഗാവാട്ട് വൈദ്യുതിയാണ് ഉല്പാദിപ്പിക്കുന്നതെന്ന് വ്യക്തമാക്കാമോ;

വര്‍ഷത്തില്‍ ശരാശരി എത്ര മെഗാവാട്ടാണ് ആവശ്യമായി വരുന്നതെന്ന് വിശദമാക്കാമോ;

ഇത് ഏതൊക്കെ രീതിയിലാണ് കണ്ടെത്തുന്നതെന്ന് വ്യക്തമാക്കാമോ;

ഗാര്‍ഹിക ഉപഭോക്താക്കള്‍ക്ക് യൂണിറ്റിന് എത്ര രൂപ നിരക്കിലാണ് വൈദ്യുതി നല്‍കുന്നതെന്നും ഈ ഇനത്തില്‍ നല്‍കിവരുന്ന വൈദ്യുതിക്ക് യൂണിറ്റിന് എത്ര രൂപ വീതമാണ് സര്‍ക്കാര്‍ ചെലവഴിക്കുന്നതെന്നും വിശദമാക്കാമോ?

വർദ്ധിച്ച വൈദ്യുത ഉപഭോഗം മൂലം കഴിഞ്ഞ വേനല്‍ക്കാലത്ത് വിതരണ ശൃംഖലയ്ക്ക് താങ്ങാന്‍ കഴിയുന്നതില്‍ കൂടുതല്‍ ലോഡ് വന്നതിന്റെ ഫലമായി വടക്കേ മലബാറില്‍ വൈദ്യുതി വിതരണം തടസ്സപ്പെടുന്ന നില ഉണ്ടായത് കണക്കിലെടുത്ത്‌ അടുത്ത വര്‍ഷം വിതരണ ശൃംഖല ശക്തിപ്പെടുത്താന്‍ ആവശ്യമായ പദ്ധതികള്‍ നടപ്പിലാക്കുന്ന വിഷയം പരിഗണിക്കുമോ; വിശദാംശങ്ങൾ അറിയിക്കാമോ;

പ്രാദേശികാടിസ്ഥാനത്തില്‍ വിതരണ ശൃംഖലയില്‍ ഉണ്ടാകുന്ന പ്രശ്നങ്ങള്‍ കണ്ടെത്താന്‍ ആവശ്യമായ നടപടികള്‍ സ്വീകരിക്കുമോ; അറിയിക്കാമോ?

സംസ്ഥാനത്ത് ഏതെല്ലാം ജലവെെദ്യുത പദ്ധതികള്‍ വെെദ്യുതി ഉല്പാദനം നടത്തുന്നുവെന്ന് അറിയിക്കാമോ;

പ്രസ്തുത പദ്ധതികളില്‍ നിന്നും ഉല്പാദിപ്പിക്കുന്ന ഒരു യൂണിറ്റ് വെെദ്യുതിക്ക് എത്ര രൂപ ചെലവ് വരുമെന്ന് അറിയിക്കാമോ?

പുതുതായി വൈദ്യുതി കണക്ഷൻ എടുക്കുമ്പോഴുള്ള ഫീസുകളിൽ വർദ്ധനവ് വരുത്തിയിട്ടുണ്ടോ; എങ്കില്‍ ഏതൊക്കെ ഇനങ്ങൾക്കാണ് ഫീസ് വർദ്ധനവ് വരുത്തിയിട്ടുള്ളതെന്ന് അറിയിക്കാമോ;

പ്രസ്തുത ഫീസ് വർദ്ധനവ് എന്ന് മുതലാണ് പ്രാബല്യത്തിൽ വന്നിട്ടുള്ളതെന്നും ഓരോ ഇനത്തിലുമുണ്ടായ വർദ്ധനവും വർദ്ധനവ് വരുത്തുന്നതിന് മുൻപ് ഉണ്ടായിരുന്ന ഫീസ് എത്ര വീതമാണെന്നും അറിയിക്കാമോ;

ഉപയോഗിക്കുന്ന പോസ്റ്റുകളുടെ എണ്ണവും ലൈൻ വലിക്കുന്ന ദൂരവും കണക്കാക്കിയാണോ കണക്ഷൻ ചെലവ് നിശ്ചയിക്കുന്നത്; എങ്കിൽ മിനിമം കണക്ഷൻ ഫീസിന് പുറമെ വലിക്കേണ്ടിവരുന്ന ഓരോ മീറ്റർ ദൂരത്തിനും ഓരോ അധിക പോസ്റ്റിനും സ്റ്റേ ഉൾപ്പെടെയുള്ള മറ്റ് ഇനങ്ങൾക്കും ഈടാക്കുന്ന നിലവിലെ നിരക്കുകളും വർദ്ധനവിന് മുൻപുള്ള നിരക്കുകളും അറിയിക്കാമോ;

പോസ്റ്റിന്റെ എണ്ണവും ലൈനിന്റെ നീളവും കണക്കാക്കി ഫീസിടാക്കുന്നതിന് പകരം കിലോവാട്ട് അടിസ്ഥാനത്തിൽ ചെലവ് കണക്കാക്കണമെന്ന് ചട്ടങ്ങളിൽ പരാമർശിച്ചിട്ടുണ്ടോ; വിശദാംശം ലഭ്യമാക്കുമോ?

സംസ്ഥാനത്ത് അനാഥാലയങ്ങൾക്ക് വൈദ്യുതി നിരക്കിൽ എന്തെങ്കിലും ഇളവുകൾ അനുവദിച്ചു നൽകിയിട്ടുണ്ടോ; വിശദമാക്കാമോ;

ഇത്തരത്തിലുള്ള ഏതെല്ലാം സ്ഥാപനങ്ങൾക്ക് നിലവിൽ വൈദ്യുതി നിരക്കിൽ ഇളവ് നൽകിവരുന്നുണ്ട്; വ്യക്തമാക്കാമോ;

വൈദ്യുതി നിരക്കിൽ ഇളവ് ആവശ്യപ്പെട്ടുകൊണ്ട് അപേക്ഷകൾ ലഭിച്ചിട്ടുണ്ടോ; അതിൻമേലുള്ള നടപടി ക്രമങ്ങൾ നിലവിൽ ഏത് ഘട്ടത്തിലാണ്;

അനാഥാലയങ്ങൾക്ക് വൈദ്യുതി നിരക്ക് കുറച്ചു നൽകുന്ന കാര്യത്തിൽ നയം രൂപീകരിക്കാൻ ഉദ്ദേശിക്കുന്നുണ്ടോ; ഉണ്ടെങ്കിൽ ഇക്കാര്യത്തിലുളള നിലപാട് വിശദമാക്കാമോ?

നെന്മാറ മണ്ഡലത്തിലെ എലവഞ്ചേരി പഞ്ചായത്തില്‍ എം.എല്‍.എയുടെ മണ്ഡലം ആസ്തി വികസന ഫണ്ട് വിനിയോഗിച്ച് നടപ്പിലാക്കുന്ന സമ്പൂര്‍ണ തെരുവ് വിളക്ക്‌ പദ്ധതിയുടെ പ്രവൃത്തി ഏത് ഘട്ടം വരെയായി എന്ന് വിശദമാക്കുമോ;

പ്രസ്തുത പ്രവൃത്തിയുമായി ബന്ധപ്പെട്ട് നിലവില്‍ എന്തെങ്കിലും തടസ്സങ്ങള്‍ ഉണ്ടോ; എങ്കില്‍ ആയത് പരിഹരിക്കാന്‍ എന്തെല്ലാം നടപടികളാണ് സ്വീകരിച്ചതെന്ന് വിശദമാക്കുമോ;

പ്രസ്തുത പദ്ധതി എന്ന് പൂര്‍ത്തീകരിക്കാന്‍ കഴിയുമെന്ന് വിശദമാക്കുമോ?

നിലവിലെ സർക്കാർ അധികാരത്തില്‍ വന്നതിനുശേഷം തിരുവനന്തപുരം ജില്ലയിലെ ഏതെല്ലാം പട്ടികവർഗ്ഗ സങ്കേതങ്ങളാണ് വൈദ്യുതീകരിച്ചിട്ടുള്ളത്; ജില്ലയില്‍ വൈദ്യുതീകരിക്കാന്‍ ശേഷിക്കുന്ന പട്ടികവർഗ്ഗ സങ്കേതങ്ങൾ ഏതെല്ലാമാണെന്ന് വ്യക്തമാക്കാമോ?

വൈദ്യുതി ഉപയോഗം നിയന്ത്രിക്കുന്നതിനായി വകുപ്പിനുകീഴില്‍ പദ്ധതികള്‍ നടപ്പിലാക്കിയിട്ടുണ്ടോ; എങ്കില്‍ വിശദാംശം നല്‍കാമോ?

സംസ്ഥാനത്ത് നിലവില്‍ വൈദ്യുതിയുടെ ഒരു മാസത്തെ ശരാശരി ഉപയോഗം എത്ര യൂണിറ്റാണെന്ന് വിശദമാക്കാമോ;

സംസ്ഥാനത്തിന്റെ ഒരു മാസത്തെ ആഭ്യന്തര ഉല്പാദനം എത്ര യൂണിറ്റ് വൈദ്യുതിയാണെന്നും സംസ്ഥാനത്തിന്റെ ഉപയോഗത്തിനായി ഒരോ മാസവും പുറത്തു നിന്ന് വാങ്ങുന്നത് എത്ര യൂണിറ്റ് വൈദ്യുതിയാണെന്നും വിശദമാക്കാമോ?

പുരപ്പുറ സോളാര്‍ പദ്ധതിയുടെ ഭാഗമായി എത്ര ഇടങ്ങളില്‍ സോളാര്‍ സ്ഥാപിച്ചുവെന്ന് അറിയിക്കാമോ;

പുരപ്പുറ സോളാര്‍ പദ്ധതിയിലൂടെ ഒരു മാസം ശരാശരി എത്ര യൂണിറ്റ് വെെദ്യുതി ഉല്പാദിപ്പിക്കുന്നുണ്ടെന്നും അതില്‍ എത്ര യൂണിറ്റ് കെ.എസ്.ഇ.ബി. ഗ്രിഡിലേയ്ക്ക് ലഭിക്കുന്നുണ്ടെന്നും വ്യക്തമാക്കുമോ?

കാസർഗോഡ് ജില്ലയിലെ എത്ര സർക്കാർ സ്ഥാപനങ്ങളിലും വിദ്യാലയങ്ങളിലും സൗരോർജ പ്ലാന്റുകൾ സ്ഥാപിച്ചിട്ടുണ്ട്; കണക്കുകൾ നൽകാമോ;

ഇവയിലൂടെ പ്രതിമാസം എത്ര യൂണിറ്റ് വൈദ്യുതിയാണ് ഉല്പാദിപ്പിക്കുന്നതെന്ന് വിശദമാക്കാമോ;

എത്ര വീടുകളിലും വിദ്യാലയങ്ങളിലും സർക്കാർ സ്ഥാപനങ്ങളിലുമാണ് സൗരോർജ പ്ലാന്റുകൾ സ്ഥാപിക്കാൻ അപേക്ഷ ലഭിച്ചതെന്ന് വിശദമാക്കാമോ?

ഗാര്‍ഹികമായി ഓണ്‍ ഗ്രിഡ് സോളാര്‍ ഉപയോഗിക്കുന്നവര്‍ക്ക് ഉപയോഗം കഴിഞ്ഞ് മിച്ചം വരുന്ന വൈദ്യുതിക്ക് നിലവില്‍ നല്‍കുന്ന ഇന്‍സെന്‍റ്റീവ് എത്രയാണ് ; അത് നല്‍കുന്ന നിലവിലെ രീതി വിശദമാക്കാമോ;

ഇപ്രകാരം തുക ലഭിക്കുന്നതിന് ഉപഭോക്താവ് കെ.എസ്.ഇ.ബി. സെക്ഷന്‍ ഓഫീസില്‍ അപേക്ഷ നല്‍കേണ്ടതുണ്ടോ; കെ.എസ്.ഇ.ബി.കാലാകാലങ്ങളില്‍ നിശ്ചയിക്കുന്ന നിരക്ക് ഉപഭോക്താവിന് അപേക്ഷ നല്‍കാതെ തന്നെ നല്‍കുന്ന രീതി അവലംബിക്കാമോയെന്ന് വ്യക്തമാക്കാമോ;

ഓണ്‍ ഗ്രിഡ് സോളാര്‍ സ്ഥാപിക്കുന്ന സമയത്ത് ഉപഭോക്താവില്‍ നിന്നും സെക്യൂരിറ്റി ഡെപ്പോസിറ്റ് വാങ്ങുന്നുണ്ടോ;എങ്കില്‍ അത് തിരികെ നല്‍കാറുണ്ടോ; തിരികെ നല്‍കുന്നതിന്റെ നിബന്ധനകള്‍ സംബന്ധിച്ച വിശദാംശങ്ങള്‍ നല്‍കാമോ?

കൂടുതൽ സൗരോർജ്ജ നിലയങ്ങൾ സ്ഥാപിക്കുന്നതിലൂടെ ഉപയോക്താക്കൾക്ക് കുറഞ്ഞ നിരക്കിൽ വൈദ്യുതി വിതരണം ചെയ്യുന്നതിനും വൈദ്യുതിക്ഷാമം പരിഹരിക്കുന്നതിനും കഴിയുമോയെന്ന് വ്യക്തമാക്കാമോ;

സൗരോർജ്ജ നിലയങ്ങളിലൂടെയുള്ള വൈദ്യുതോല്പാദനം വർദ്ധിപ്പിക്കുന്നതിന് കെ.എസ്.ഇ.ബി. സ്വീകരിക്കാൻ ഉദ്ദേശിക്കുന്ന നടപടികൾ വിശദമാക്കുമോ?

പുരപ്പുറ സോളാർ പദ്ധതി പ്രകാരം ഉല്പാദിപ്പിക്കുന്ന ഊർജ്ജത്തിന് 2024 ഏപ്രിൽ ഒന്ന് മുതൽ വൈദ്യുതി തീരുവ വര്‍ദ്ധിപ്പിക്കുന്നതിന് തീരുമാനിച്ചിട്ടുണ്ടോ;

എങ്കിൽ പ്രസ്തുത വര്‍ദ്ധനവ് പിൻവലിക്കുന്നതിന് നടപടി സ്വീകരിക്കുമോ;

പുനരുപയോഗിക്കുന്ന ഊർജസ്രോതസ്സുകളെ പിന്തുണയ്ക്കുന്നതിന്റെ ഭാഗമായി ഓണ്‍ ഗ്രിഡ് ഉപഭോക്താക്കൾക്ക് കെ.എസ്.ഇ.ബി. നല്കുന്ന ഫിക്സഡ് ചാർജിന്റെ മാനദണ്ഡങ്ങൾ പുനർനിർണ്ണയിക്കാൻ സർക്കാർ ഉദ്ദേശിക്കുന്നുണ്ടോ?

പുരപ്പുറ സോളാർ പ്ലാന്റുകളിലൂടെ പ്രതിദിനം സംസ്ഥാനത്ത് ഉൽപ്പാദിപ്പിക്കുന്ന വെെദ്യുതിയുടെ അളവ് ഓൺഗ്രിഡ്, ഓഫ്ഗ്രിഡ് എന്ന വിധത്തിൽ തരംതിരിച്ച് ലഭ്യമാക്കുമോ;

പുരപ്പുറ സോളാർ പ്ലാന്റുകൾ സ്ഥാപിക്കുന്നതിന് നിലവിൽ ലഭ്യമാകുന്ന സബ്സിഡി സംബന്ധിച്ച വിശദാംശങ്ങൾ ലഭ്യമാക്കുമോ;

പുരപ്പുറ സോളാർ പ്ലാന്റുകൾ സ്ഥാപിച്ച് കെ.എസ്.ഇ.ബി. യുടെ ഓൺഗ്രിഡ് പദ്ധതിയില്‍ ചേ‍ന്നിട്ടുള്ള ഗാർഹിക ഉപഭോക്താക്കൾ ഉല്പാദിപ്പിക്കുന്ന വെെദ്യുതിക്കും ഉപയോഗിക്കുന്ന വെെദ്യുതിക്കുമുള്ള നിരക്കുകൾ വിശദമാക്കാമോ;

സോളാർ പ്ലാന്റുകൾ സ്ഥാപിച്ച് സ്വന്തമായി വെെദ്യുതി ഉല്പാദിപ്പിച്ച് ഉപയോഗിക്കുന്നവർ നൽകേണ്ട വെെദ്യുതി തീരുവ സംബന്ധിച്ച വിവരങ്ങളും പ്രസ്തുത വെെദ്യുതി തീരുവ വർദ്ധിപ്പിക്കുന്നത് സംബന്ധിച്ച്‌ ശിപാർശ ഉണ്ടെങ്കിൽ ആയതിന്റെ വിശദാംശങ്ങളും ലഭ്യമാക്കാമോ?

ഈ സര്‍ക്കാരിന്റെ കാലത്ത് വിന്‍ഡ് എനര്‍ജി മുഖേന സംസ്ഥാനത്ത് എത്ര വൈദ്യുതി ഉല്പാദിപ്പിച്ചുവെന്ന് വിശദമാക്കുമോ;

വിന്‍ഡ് എനര്‍ജി പ്രോത്സാഹിപ്പിക്കുന്നതിനായി എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കുമോ?

കെ.എസ്.ഇ.ബി. ജീവനക്കാർക്കും കരാർ തൊഴിലാളികള്‍ക്കും ജോലിസമയത്ത് അപകടം സംഭവിക്കാതിരിക്കാന്‍ എന്തൊക്കെ നടപടികളാണ് സ്വീകരിച്ചിട്ടുള്ളത്;

ഇതിനായി കൈക്കൊണ്ട നടപടികള്‍ പ്രകാരം അപകടങ്ങള്‍ കുറച്ചുകൊണ്ടുവരാന്‍ കഴിഞ്ഞിട്ടുണ്ടോ; വിശദമാക്കാമോ?

മുന്‍ സര്‍ക്കാരിന്റെ കാലയളവിലും ഈ സര്‍ക്കാര്‍ അധികാരത്തില്‍ വന്നശേഷവും വൈദ്യുതി കുടിശികയിനത്തിൽ വൻ തുക അടയ്ക്കാനുള്ള സർക്കാർ ഓഫീസുകളും പൊതുമേഖലാ സ്ഥാപനങ്ങളും ഏതൊക്കെയാണെന്നും എത്ര തുക കുടിശ്ശികയുണ്ടെന്നും വ്യക്തമാക്കാമോ;

പ്രസ്തുത കുടിശിക ഈടാക്കുന്നതിന് എന്തൊക്കെ നടപടി സ്വീകരിച്ചിട്ടുണ്ടെന്ന് വ്യക്തമാക്കാമോ?

കൊണ്ടോട്ടി മണ്ഡലത്തിൽപ്പെട്ട കൊണ്ടോട്ടി, മുണ്ടക്കുളം, എടവണ്ണപ്പാറ, കാരാട്, പുളിക്കൽ എന്നീ ഇലക്ട്രിസിറ്റി ഓഫീസുകളുടെ കീഴില്‍ എത്ര ഉപഭോക്താക്കളാണുള്ളതെന്ന് സെക്ഷൻ ഓഫീസ് തിരിച്ച് കണക്ക് ലഭ്യമാക്കുമോ;

പ്രസ്തുത ഓഫീസുകളിൽ നിലവിൽ എത്ര ഉദ്യോഗസ്ഥർ ഉണ്ടെന്നും ഏതെല്ലാം തസ്തികകൾ ഒഴിഞ്ഞ് കിടക്കുന്നുവെന്നുമുള്ള വിശദാംശം സെക്ഷൻ തിരിച്ച് ലഭ്യമാക്കുമോ;

നിലവിലെ സെക്ഷൻ ഓഫീസുകൾ വിഭജിച്ചും ജീവനക്കാരുടെ ഒഴിവുള്ള തസ്തികകൾ നികത്തിയും ഉപഭോക്താക്കൾക്ക് ആവശ്യമായ സേവനം ലഭ്യമാക്കാൻ നടപടി സ്വീകരിക്കുമോ?

പയ്യന്നൂര്‍ മേഖലയിലെ കെ. എസ്. ഇ. ബി. സബ് സ്റ്റേഷനുകളുടെ ശേഷി പരമാവധിയിലെത്തിയിട്ടുള്ളതിനാൽ ഭാവിയിലെ ഉപയോഗം നികത്താന്‍ കഴിയുന്ന വിധത്തിൽ പുതിയ സബ്സ്റ്റേഷനുകള്‍ ആരംഭിക്കുന്നതിനാവശ്യമായ നടപടികള്‍ സ്വീകരിക്കുമോ; വിശദമാക്കാമോ?

ഇരിക്കൂര്‍ മണ്ഡലത്തിലെ തിമിരി വില്ലേജില്‍ 110 കെ.വി. സബ്സ്റ്റേഷൻ സ്ഥാപിക്കുന്നതുമായി ബന്ധപ്പെട്ട പ്രവര്‍ത്തനം ഏത് ഘട്ടത്തിലാണെന്ന് വ്യക്തമാക്കാമോ; വിശദാംശം അറിയിക്കാമോ?

പുതുക്കാട് മണ്ഡലത്തിലെ വരന്തരപ്പിള്ളി പഞ്ചായത്തില്‍ സബ്സ്റ്റേഷന്‍ നിര്‍മ്മാണത്തിന് കെ.എസ്.ഇ.ബി. നടപടി സ്വീകരിച്ചിട്ടുണ്ടോ;

എങ്കില്‍ പ്രസ്തുത നടപടികള്‍ ഏത് ഘട്ടത്തിലാണെന്ന് അറിയിക്കാമോ?

ചാലക്കുടി മണ്ഡലത്തിലെ മലക്കപ്പാറയില്‍ വൈദ്യുതി വിതരണത്തില്‍ തുടര്‍ച്ചയായി തടസ്സങ്ങൾ ഉണ്ടാകുന്നതും വോള്‍ട്ടേജ് ക്ഷാമം നേരിടുന്നതും ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ഇത് പരിഹരിക്കുന്നതിന് എന്തെല്ലാം നടപടികളാണ് സ്വീകരിക്കാന്‍ ഉദ്ദേശിക്കുന്നതെന്ന് വെളിപ്പെടുത്തുമോ;

അതിരപ്പിള്ളിയില്‍ സബ്സ്റ്റേഷന്‍ സ്ഥാപിക്കേണ്ടതിന്റെ ആവശ്യകത ശ്രദ്ധയില്‍പ്പെട്ടിട്ടുണ്ടോ; ഇതിനായി എന്തെങ്കിലും നടപടികള്‍ സ്വീകരിച്ചിട്ടുണ്ടോ?

വാഴൂർ 110 കെ.വി സബ്സ്റ്റേഷന്‍ നിർമ്മാണം ഇപ്പോള്‍ ഏത് ഘട്ടത്തിലാണെന്നും എന്നത്തേക്ക് കമ്മീഷന്‍ ചെയ്യുന്നതിനാണ് ലക്ഷ്യമിടുന്നതെന്നും അറിയിക്കാമോ;

പ്രസ്തുത പദ്ധതിയുടെ നിർമ്മാണത്തിന് അനുവദിച്ച തുക എത്രയെന്നും പദ്ധതിക്ക് ആവശ്യമായ സ്ഥലം ഏറ്റെടുത്തതിന് ചെലവായ തുക എത്രയെന്നും അറിയിക്കാമോ;

ഈ സബ്സ്റ്റേഷന്റെ പ്രയോജനം ലഭിക്കുന്ന പ്രദേശങ്ങള്‍ ഏതൊക്കെയെന്നും പ്രസ്തുത പ്രദേശങ്ങള്‍ ഇപ്പോള്‍ ഏതൊക്കെ സബ്സ്റ്റേഷനുകളുടെ പരിധിയിലാണ് സ്ഥിതി ചെയ്യുന്നതെന്നും അറിയിക്കാമോ?

വെെപ്പിൻ മണ്ഡലത്തിൽ ചെറായി-ഞാറയ്ക്കൽ 110 കെ.വി. ഡി.സി. ലെെൻ (14.1 കീ.മി) നിർമ്മാണ പ്രവൃത്തിയുടെ നിലവിലെ സ്ഥിതിയും ഞാറയ്ക്കൽ 66 കെ.വി. സബ്സ്റ്റേഷന്റെ ശേഷി 110 കെ.വി. ആയി വർദ്ധിപ്പിക്കുന്ന പ്രവൃത്തിയുടെ നിലവിലെ സ്ഥിതിയും വിശദമാക്കാമോ?

വടക്കാഞ്ചേരിയില്‍ എങ്കക്കാട് 110 കെ.വി. സബ് സ്റ്റേഷന് സമീപമുളള ചാര്‍ജിംഗ് സ്റ്റേഷന്‍ സ്ഥാപിച്ച് വളരെ നാളുകളായിട്ടും പ്രവര്‍ത്തനക്ഷമമല്ലാതിരിക്കുന്നത് ശ്രദ്ധയില്‍പ്പെട്ടിട്ടുണ്ടോ;

നിര്‍മ്മാണം പൂര്‍ത്തീകരിച്ചിട്ടും പ്രസ്തുത ചാര്‍ജിംഗ് സ്റ്റേഷന്‍ പ്രവര്‍ത്തനക്ഷമമാകാത്തതിന്റെ കാരണം വിശദമാക്കാമോ;

പ്രസ്തുത ചാര്‍ജിംഗ് സ്റ്റേഷന്‍ പ്രവര്‍ത്തനക്ഷമമാക്കുന്നതിനുള്ള നടപടികള്‍ സ്വീകരിക്കാമോ;

ചാര്‍ജിംഗ് സ്റ്റേഷന്‍ സ്ഥാപിച്ചെങ്കിലും പ്രവര്‍ത്തനക്ഷമമാക്കുവാന്‍ കാലതാമസമെടുക്കുന്നതിനാല്‍ പ്രസ്തുത സ്റ്റേഷനും അതിലെ മെഷിനറിയും അനുബന്ധ സംവിധാനങ്ങളും സ്ഥലവും സംരക്ഷിക്കുന്നതിനുള്ള നടപടികള്‍ സ്വീകരിക്കാമോ;

പ്രസ്തുത ചാര്‍ജിങ് സ്റ്റേഷനോടനുബന്ധിച്ച് കഫെറ്റീരിയ പോലുള്ള പദ്ധതികള്‍ നടപ്പിലാക്കാന്‍ ആലോചിക്കുന്നുണ്ടോ?

ഒറ്റപ്പാലം മണ്ഡലത്തില്‍ കടമ്പഴിപ്പുറത്ത് സബ് സ്റ്റേഷന്‍ സ്ഥാപിക്കുന്നതിന് ഇറിഗേഷന്‍ വകുപ്പിന്റെ സ്ഥലം വിട്ടു നല്‍കുവാന്‍ കഴിയില്ലെന്നും പകരം പാട്ട വ്യവസ്ഥയിൽ സ്ഥലം ആവശ്യമെങ്കിൽ അതിനായി അപേക്ഷ സമർപ്പിക്കാമെന്നുമുള്ള ഇറിഗേഷന്‍ വകുപ്പിന്റെ അറിയിപ്പ് ശ്രദ്ധയില്‍പ്പെട്ടിട്ടുണ്ടോ;

എങ്കില്‍ പാട്ട വ്യവസ്ഥയില്‍ സ്ഥലം ലഭിക്കുന്നതിനുള്ള അപേക്ഷ നല്‍കിയിട്ടുണ്ടോ; ഇല്ലെങ്കില്‍ എന്തുകൊണ്ട്; വിശദ വിവരങ്ങള്‍ ലഭ്യമാക്കാമോ?

കൊയിലാണ്ടി നഗരത്തിലെയും സമീപ പ്രദേശങ്ങളിലെയും വെെദ്യുതിക്ഷാമം പരിഹരിക്കുന്നതിന് വിഭാവനം ചെയ്ത കൊയിലാണ്ടി 110 കെ.വി. സബ്സ്റ്റേഷന്റെ നിർമ്മാണ പുരോഗതി വിലയിരുത്തിയിട്ടുണ്ടോ;

പ്രസ്തുത പദ്ധതിയുടെ നിലവിലെ സ്ഥിതി അറിയിക്കാമോ;

പ്രസ്തുത പദ്ധതി നടപ്പിലാക്കാന്‍ കാലതാമസം നേരിടുന്ന സാഹചര്യത്തില്‍ ബദല്‍ മാര്‍ഗ്ഗങ്ങള്‍ സ്വീകരിക്കുന്നത് പരിഗണനയിലുണ്ടോ?

മഞ്ചേശ്വരം മണ്ഡലത്തിലെ പൈവളിഗെയിൽ പുതിയ 110 കെ.വി. സബ്‍സ്റ്റേഷൻ നിർമ്മിക്കുന്നത് പരിഗണനയിൽ ഉണ്ടോ; പ്രസ്തുത പദ്ധതിയുടെ ചെലവ് എത്രയാണെന്ന് കണക്കാക്കിയിട്ടുണ്ടോ; വിശദവിവരം ലഭ്യമാക്കുമോ;

പ്രസ്തുത പദ്ധതിയുടെ ഭാഗമായി എന്തൊക്കെ പ്രവൃത്തികളാണ് വിഭാവനം ചെയ്തിട്ടുള്ളതെന്ന് വ്യക്തമാക്കുമോ;

പ്രസ്തുത പദ്ധതി കൊണ്ടുള്ള ഭൗതിക നേട്ടങ്ങൾ എന്താണെന്നും ആയത് എപ്പോൾ തുടങ്ങാൻ കഴിയുമെന്നും വിശദമാക്കുമോ?

മണലൂര്‍ മണ്ഡലത്തിലെ വിവിധ കെ.എസ്.ഇ.ബി.ഓഫീസുകളിലെ ജീവനക്കാരുടെ എണ്ണം സംബന്ധിച്ച വിശദാംശം സ്ഥാപനാടിസ്ഥാനത്തില്‍ ലഭ്യമാക്കാമോ;

പ്രസ്തുത ഓഫീസുകളില്‍ ജീവനക്കാരുടെ ഒഴിവുകള്‍ നിലവിലുണ്ടോ; എങ്കില്‍ ഏതെല്ലാം തസ്തികകളില്‍ ഒഴിവ് നിലവിലുണ്ടെന്ന് സ്ഥാപനങ്ങള്‍ തിരിച്ച് വ്യക്തമാക്കാമോ;

നിലവിലുള്ള ഒഴിവുകള്‍ നികത്തുന്നതിന് നടപടി സ്വീകരിച്ചിട്ടുണ്ടോ; വിശദാംശം ലഭ്യമാക്കാമോ?

2023 -2024 വർഷവും 2024-25 ലെ ആദ്യ രണ്ട് മാസങ്ങളിലുമായി കെ.എസ്.ഇ.ബി. യിൽ നിന്ന് വിവിധ തസ്തികകളിലായി എത്ര ജീവനക്കാർ വിരമിച്ചുവെന്നും അതിൽ എത്ര ഒഴിവുകൾ നിയമനത്തിനായി പി.എസ്.സി. ക്ക് റിപ്പോർട്ട് ചെയ്തുവെന്നുമുള്ള കണക്കുകൾ നൽകാമോ;

നിലവിലെ കണക്കുകൾ പ്രകാരം കെ.എസ്.ഇ.ബി.യിൽ എത്ര ജീവനക്കാരുടെ കുറവ് വന്നിട്ടുണ്ടെന്ന് അറിയിക്കാമോ; അതിലേക്ക് കരാർ നിയമനം നടത്തുന്നതിന് തീരുമാനമെടുക്കുകയോ നടപടികൾ സ്വീകരിക്കുകയോ ചെയ്തിട്ടുണ്ടോയെന്ന്‌ വ്യക്തമാക്കാമോ;

2023 -24 വർഷത്തിൽ വിവിധ തസ്തികകളിലായി പി.എസ്.സി, ആശ്രിത നിയമനം, സ്പോർട്സ് ക്വോട്ട, കരാർ വ്യവസ്ഥ എന്നിവ മുഖേന കെ.എസ്.ഇ.ബി.യിൽ നിയമനം ലഭിച്ച ജീവനക്കാരുടെ കണക്കുകൾ നൽകാമോ?

വൈദ്യുതി വകുപ്പിൽ എറിയാട് ഡിവിഷനിൽ ആവശ്യത്തിന് ജീവനക്കാരില്ല എന്നുള്ളത് ശ്രദ്ധയിൽപ്പെട്ടിട്ടുണ്ടോ;

ഇവിടെ വിരമിച്ച ജീവനക്കാരെ ദിവസ വേതന അടിസ്ഥാനത്തിൽ നിയമിക്കുന്നതിനു പകരം യോഗ്യതയുള്ള പുതിയ ജീവനക്കാരെ താൽക്കാലിക അടിസ്ഥാനത്തിൽ നിയമിക്കാനുള്ള നടപടി സ്വീകരിക്കുമോ?

കോന്നി മണ്ഡലത്തില്‍ കെ.എസ്.ഇ.ബി.യുടെ അധീനതയിലുള്ള ആനത്തോട്, പമ്പ ,മൂഴിയാര്‍, കക്കി അണക്കെട്ടുകളില്‍ ടൂറിസം പദ്ധതികള്‍ ആവിഷ്ക്കരിക്കുന്നത് ആലോചനയിലുണ്ടോ; എങ്കിൽ അതിന്റെ വിശദവിവരങ്ങള്‍ നല്‍കാമോ?

ഹൈഡൽ ടൂറിസം മേഖലയുടെ വികസനത്തിനായി സ്വീകരിച്ചിരിക്കുന്ന നടപടികൾ വിശദമാക്കുമോ;

കഴിഞ്ഞ അഞ്ചു വർഷത്തെ ഹൈഡൽ ടൂറിസം രംഗത്തെ പുരോഗതി വിശദമാക്കുമോ;

പ്രസ്തുത മേഖലയുടെ വികസനത്തിനായി നടപ്പിലാക്കുവാൻ ഉദ്ദേശിക്കുന്ന പുതിയ പദ്ധതികൾ ഏതെല്ലാമാണെന്ന് വ്യക്തമാക്കുമോ?

വൈദ്യുതി വിച്ഛേദിക്കുന്നത് സംബന്ധിച്ച് യാതൊരു മുന്നറിയിപ്പും നല്‍കാതിരുന്നത് കാരണം ഊഷ്മാവില്‍ വ്യതിയാനം ഉണ്ടായി പൗൾട്രി ഫാമിലെ വളര്‍ച്ചയെത്തിയ കോഴികള്‍ ചത്തതിനുളള നഷ്ടപരിഹാരം അനുവദിക്കണമെന്നാവശ്യപ്പെട്ട് കോട്ടക്കല്‍ ശ്രീ അബ്ദുള്ള, തുടിമ്മല്‍, മേച്ചേരിപ്പറമ്പ്, ഇരിമ്പിളിയം, മലപ്പുറം എന്നയാള്‍ സമര്‍പ്പിച്ച അപേക്ഷയിന്‍മേല്‍ കെ‌. എസ്‌. ഇ‌. ബി. സ്വീകരിച്ച നടപടികളുടെ വിശദാംശം ലഭ്യമാക്കുമോ?

ഇലക്ട്രിക് പോസ്റ്റുകളില്‍ കൂടി സ്വകാര്യ ടെലിവിഷൻ ചാനലുകള്‍ക്കും മറ്റും കേബിള്‍ വലിക്കുന്നതിന് അനുമതി നല്‍കിയിട്ടുണ്ടോ;

എങ്കില്‍ എന്തെല്ലാം നിബന്ധനകളാണ് ഇതിനായി പാലിക്കേണ്ടത്;

അശാസ്ത്രീയമായി കേബിളുകള്‍ വലിക്കുന്നത് മൂലം അപകടം ഉണ്ടാകുന്നത് ശ്രദ്ധയില്‍പ്പെട്ടിട്ടുണ്ടോ;

എങ്കിൽ ഇതിനെതിരെ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ?

പുതുക്കാട് മണ്ഡലത്തിൽ ഇ-വാഹനങ്ങള്‍ ചാര്‍ജ് ചെയ്യുന്നതിന് വേണ്ടി എത്ര വൈദ്യുതി ചാര്‍ജിംഗ് സ്റ്റേഷനുകള്‍ അനുവദിച്ചിട്ടുണ്ടെന്നും അവയില്‍ ഏതെല്ലാം പ്രവര്‍ത്തന സജ്ജമായെന്നും അറിയിക്കാമോ;

മുഴുവന്‍ ചാര്‍ജ്ജിംഗ് സ്റ്റേഷനുകളും പ്രവര്‍ത്തനക്ഷമമാക്കി ഉദ്ഘാടനം ചെയ്യുന്നതിനാവശ്യമായ നടപടികള്‍ സ്വീകരിക്കുമോ;

ഇക്കാര്യത്തില്‍ ഉണ്ടായ കാലതാമസം ശ്രദ്ധയില്‍പെട്ടിട്ടുണ്ടോയെന്ന് വ്യക്തമാക്കുമോ?

സംസ്ഥാനത്ത് സോളാര്‍ വൈദ്യുത ഉല്പാദനത്തില്‍ വര്‍ദ്ധനവ് കൈവരിക്കാന്‍ കഴി‍ഞ്ഞിട്ടുണ്ടോ; എങ്കിൽ കഴി‍ഞ്ഞ അഞ്ച് വര്‍ഷക്കാലമായി പ്രതിവര്‍ഷം എത്ര യൂണിറ്റ് വീതം വൈദ്യുതിയാണ് ഉല്പാദിപ്പിച്ചിരുന്നതെന്ന് വിശദമാക്കുമോ?

കാര്‍ഷിക പമ്പുകള്‍ സൗരോർജ്ജത്താൽ പ്രവർത്തിപ്പിക്കുന്നതിന് എന്തെല്ലാം നടപടികളാണ് സ്വീകരിച്ചുവരുന്നതെന്ന് വ്യക്തമാക്കാമോ;

കര്‍ഷകരുടെ പമ്പ് സെറ്റുകള്‍ പ്രവര്‍ത്തിപ്പിക്കാന്‍ സൗജന്യ സോളാര്‍ നിലയം അനുവദിക്കുന്നതിന് പദ്ധതി ആവിഷ്കരിച്ചിട്ടുണ്ടോ; എങ്കില്‍ വിശദമാക്കാമോ?

അക്ഷയ ഊര്‍ജ്ജോല്പാദന പദ്ധതികള്‍ പ്രോത്സാഹിപ്പിക്കുന്ന കാര്യത്തില്‍ നിലപാട് വ്യക്തമാക്കാമോ;

സൗരോര്‍ജ്ജ പദ്ധതികളുടെ സ്ഥാപിതശേഷി വര്‍ദ്ധിപ്പിക്കുവാന്‍ ഉദ്ദേശിക്കുന്നുണ്ടോ; എങ്കില്‍ വിശദാംശം ലഭ്യമാക്കാമോ;

സോളാര്‍ ആന്റ് വിൻഡ് ഹൈബ്രിഡ് പവര്‍ പ്ലാന്റുകള്‍ പരിഗണനയിലുണ്ടോ; എങ്കില്‍ വിശദാംശം നല്‍കാമോ;

വൈദ്യുതി ബോര്‍ഡ്, അനര്‍ട്ട് എന്നീ സ്ഥാപനങ്ങളുടെ നേതൃത്വത്തില്‍ സൗരോര്‍ജ്ജ ഉല്പാദനം വര്‍ദ്ധിപ്പിക്കുന്നതിനുള്ള ഒരു ബൃഹദ് പദ്ധതി നടപ്പിലാക്കുന്ന കാര്യത്തില്‍ നിലപാട് വ്യക്തമാക്കാമോ?

വീടുകളിലും സ്ഥാപനങ്ങളിലുമായി സര്‍ക്കാര്‍ നടപ്പാക്കുന്ന സോളാര്‍ വെെദ്യുത പദ്ധതി സംബന്ധിച്ച് നടക്കുന്ന തെറ്റായ പ്രചാരണങ്ങള്‍ ശ്രദ്ധയില്‍പ്പെട്ടിട്ടുണ്ടോ; എങ്കില്‍ അത്തരം പ്രചാരണങ്ങള്‍ക്കെതിരായ ബോധവല്‍ക്കരണ പരിപാടികള്‍ ആരംഭിക്കുമോ;

സോളാര്‍ വെെദ്യുത പദ്ധതിയ്ക്ക് നൽകുന്ന സബ്സിഡി യഥാസമയം അനുവദിച്ചു നല്‍കുന്നതിന് നടപടി സ്വീകരിക്കുമോ?

ഈ സർക്കാർ അധികാരത്തിൽ വന്നതിനു ശേഷം സംസ്ഥാനത്ത് പുരപ്പുറ സോളാർ പദ്ധതിയിയിലൂടെ എത്ര മെഗാവാട്ട് വെെദ്യുതി ഉല്പാദിപ്പിക്കാൻ കഴിഞ്ഞിട്ടുണ്ട്; വിശദമാക്കുമോ ;

പുരപ്പുറസോളാർ പദ്ധതി വ്യാപിപ്പിക്കുന്നതിനും ഊർജ ഉല്പാദനം വർദ്ധിപ്പിക്കുന്നതിനുമായി എന്തെല്ലാം നടപടികളാണ് സ്വീകരിച്ചുവരുന്നത്; വിശദമാക്കാമോ;

ബാലുശ്ശേരി മണ്ഡലത്തിൽ പ്രസ്തുത പദ്ധതി ഏതൊക്കെ സ്ഥാപനങ്ങളിലും വീടുകളിലുമാണ് നടപ്പിലാക്കിയിട്ടുള്ളതെന്ന് വിശദമാക്കാമോ?

അനെർട്ടില്‍ നിന്നും 2024-ൽ എത്ര പേർ വിരമിച്ചിട്ടുണ്ടെന്നും വിരമിച്ചവരിൽ ആരെങ്കിലും ജോലിയിൽ തുടരുന്നുണ്ടോയെന്നും തുടരുന്നുണ്ടെങ്കില്‍ ആയതിന്റെ കാരണം എന്തെന്നും വിശദമാക്കാമോ?

പുരപ്പുറ സോളാര്‍ പദ്ധതിയില്‍ 2024-ല്‍ എത്ര ഗാ‍ർഹിക ഉല്പാദകര്‍ അപേക്ഷ സമർപ്പിച്ചിട്ടുണ്ട്; അതില്‍ എത്ര അപേക്ഷകള്‍ക്ക് അംഗീകാരം നല്‍കിയിട്ടുണ്ട് ; വിശദമാക്കാമോ;

പ്രസ്തുത പദ്ധതി കൂടുതല്‍ ആകര്‍ഷകമാക്കാനും വ്യാപിപ്പിക്കുവാനും ഉദ്ദേശിക്കുന്നുണ്ടോ; വിശദമാക്കാമോ?