കോതമംഗലം മണ്ഡലത്തിലെ കുട്ടമ്പുഴ പഞ്ചായത്തില്‍ കല്ലേലിമേട്, കുഞ്ചിപ്പാറ, വാരിയം, തലവച്ചപാറ, തേര, ഉറിയംപെട്ടി തുടങ്ങിയ ആദിവാസി മേഖലകളില്‍ വൈദ്യുതീകരണം നടത്തിയിട്ടില്ല എന്ന കാര്യം ശ്രദ്ധയില്‍ പെട്ടിട്ടുണ്ടോ;

മേല്‍ പറഞ്ഞ പ്രദേശങ്ങളിലെ വൈദ്യുതീകരണം സംബന്ധിച്ച നിലവിലെ സ്ഥിതി വിശദമാക്കാമോ;

ഏകദേശം 600 ഓളം ആദിവാസി കുടുംബങ്ങള്‍ താമസിക്കുന്ന മേല്‍ പറഞ്ഞ കോളനികളില്‍ അടിയന്തരമായി വൈദ്യുതി എത്തിക്കുന്നതിനു വേണ്ട നടപടി സ്വീകരിക്കുമോ; വിശദമാക്കാമോ?

2016 മുതല്‍ 2021 വരെയുള്ള കാലയളവില്‍ വൈദ്യുതി വകുപ്പ് ആലത്തൂര്‍ മണ്ഡലത്തില്‍ നടപ്പിലാക്കിയ വിവിധ പദ്ധതികളുടെ വിശദവിവരം ലഭ്യമാക്കുമോ?

തിരൂര്‍ നിയോജകമണ്ഡലത്തിലെ വൈദ്യുതി ക്ഷാമം പരിഹരിക്കുന്നതിന് നടപ്പിലാക്കി വരുന്ന പദ്ധതികളുടെ വിശദ വിവരം ലഭ്യമാക്കുമോ;

വെങ്ങലൂര്‍ സ്വിച്ചിംഗ് സ്റ്റേഷന്‍ പ്രവൃത്തി നിലവില്‍ ഏത് ഘട്ടത്തിലാണെന്ന് വ്യക്തമാക്കുമോ;

തിരൂര്‍ പൂക്കയില്‍ 110 കെ.വി. യില്‍ നിന്ന് 220 കെ.വി. യായി അപ്ഗ്രേഡ് ചെയ്യുന്ന പ്രവൃത്തി ഏത് ഘട്ടത്തിലാണെന്ന് വ്യക്തമാക്കാമോ?

ഇലക്ട്രിക് വാഹനങ്ങളുടെ വ്യാപനത്തിന് അനിവാര്യമായ ചാര്‍ജിംഗ് സ്റ്റേഷനുകള്‍ സ്ഥാപിക്കുന്നതിന് കെ. എസ്. ഇ. ബി. യും അനെര്‍ട്ടും സ്വീകരിച്ചിട്ടുള്ള നടപടികള്‍ എന്തെല്ലാമെന്ന് വ്യക്തമാക്കുമോ;

പാലക്കാട് - കോഴിക്കോട് ദേശീയപാതയില്‍ ചാര്‍ജ്ജിംഗ് സ്റ്റേഷനുകള്‍ സ്ഥാപിക്കുന്നതിന് നടപടി സ്വീകരിക്കുമോ; വിശദാംശം നല്‍കുമോ?

മങ്കട നിയോജക മണ്ഡലത്തില്‍ വൈദ്യുതി വകുപ്പ് മുഖേന നടപ്പിലാക്കി വരുന്ന പദ്ധതികള്‍ ഏതൊക്കെയാണ്; ഓരോന്നിന്റെയും വിശദാംശം ലഭ്യമാക്കുമോ;

മണ്ഡലത്തില്‍ അടിയന്തരമായി നടപ്പിലാക്കണമെന്ന് വൈദ്യുതി വകുപ്പ് വിലയിരുത്തിയിട്ടുള്ള പദ്ധതികള്‍ ഏതൊക്കെയാണ്; ഇതിനായി വകുപ്പ് എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കുമോ;

കഴിഞ്ഞ സര്‍ക്കാരിന്റെ കാലത്ത് വൈദ്യുതി വകുപ്പ് മുഖേന മണ്ഡലത്തില്‍ നടപ്പിലാക്കിയ പദ്ധതികള്‍ സംബന്ധിച്ച വിശദാംശം ലഭ്യമാക്കുമോ?

2016-2021 വരെയുള്ള കാലഘട്ടത്തില്‍ വൈദ്യുതോല്പാദനത്തില്‍ എത്ര വളര്‍ച്ച കൈവരിക്കാന്‍ സാധിച്ചെന്ന് വിശദമാക്കാമോ;

ജലവൈദ്യുതി ഉത്പാദനം, സൗരോര്‍ജ ഉത്പാദനം അടക്കമുള്ള വിവിധ മേഖലകള്‍ തിരിച്ചുള്ള കണക്കുകള്‍ ലഭ്യമാക്കാമോ?

സംസ്ഥാനത്തിന്റെ വൈദ്യുതി ഉപഭോഗത്തില്‍ നിലവിൽ എത്ര മെഗാവാട്ട് വൈദ്യുതി കേരളത്തില്‍ ഉല്പാദിപ്പിക്കുന്നുണ്ട് എന്ന് വിശദമാക്കാമോ;

കേരളത്തിനു പുറത്തുനിന്ന് ഏതൊക്കെ സ്രോതസ്സുകളില്‍ നിന്നും എത്ര മെഗാവാട്ട് വൈദ്യുതി സംസ്ഥാന സര്‍ക്കാര്‍ ഏതു നിരക്കില്‍ ലഭ്യമാക്കുന്നു എന്നും വ്യക്തമാക്കാമോ?

2016-ല്‍ സര്‍ക്കാര്‍ അധികാരത്തിലെത്തുമ്പോള്‍ വൈദ്യുതി കണക്ഷന്‍ ലഭിക്കാത്ത എത്ര വീടുകളുണ്ടായിരുന്നുയെന്ന് വ്യക്തമാക്കാമോ;

2016-2021 കാലഘട്ടത്തില്‍ പുതുതായി എത്ര വീടുകളില്‍ വൈദ്യുതി കണക്ഷന്‍ ലഭ്യമാക്കാന്‍ സാധിച്ചു എന്ന് വ്യക്തമാക്കാമോ;

നിലവില്‍ സംസ്ഥാനത്തു വൈദ്യുതി കണക്ഷന്‍ ലഭിക്കാത്ത എത്ര വീടുകളുണ്ട് എന്ന് വ്യക്തമാക്കാമോ?

സംസ്ഥാനത്തെ വൈദ്യുത ഉപഭോക്താക്കള്‍, മീറ്ററില്‍ ഉണ്ടാകുന്ന പോരായ്മ മൂലം അവരുടേതല്ലാത്ത കുറ്റത്തിന് അമിത ബില്ല് നല്‍കേണ്ട അവസ്ഥയ്ക്ക് പരിഹാരം കണ്ടെത്തുമോ;

പല ഉപഭോക്താക്കളുടെയും മീറ്ററുകള്‍ കേടായിക്കിടക്കുന്ന സാഹചര്യം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയവ മാറ്റി പുതിയവ സ്ഥാപിക്കുന്നതിന് നടപടി സ്വീകരിക്കുമോ;

ഒരിക്കല്‍ ഉയര്‍ന്ന മീറ്റര്‍ റീഡിംഗും എന്നാല്‍ തൊട്ടടുത്ത മാസം കുറഞ്ഞ റീഡിംഗും കാണിച്ചാലും, കൂടിയ സ്ലാബ് മാറാത്ത സാഹചര്യം പുന:പരിശോധിക്കുമോ; പിന്നീടൊരിക്കലും ഈ സ്ലാബില്‍ മാറ്റം വരാത്തതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതിന് പരിഹാരം കണ്ടെത്തുമോ;

സംസ്ഥാനത്ത് ഗാര്‍ഹിക ഉപഭോക്താക്കള്‍ക്ക് ത്രീ ഫെയ്സ് ലൈന്‍ സ്ഥാപിക്കുന്നതിനുള്ള മാനദണ്ഡം വ്യക്തമാക്കാമോ?

നിലവില്‍ വൈദ്യുതി ബോര്‍ഡിന് എത്ര കോടി രൂപ കുടിശ്ശിക ഇനത്തില്‍ പിരിഞ്ഞു കിട്ടാനുണ്ട്; വകുപ്പ് തിരിച്ച് വിശദാംശം നല്‍കാമോ ;

പ്രസ്തുത കുടിശ്ശിക പിരിച്ചെടുക്കുവാന്‍ എന്തൊക്കെ നടപടികള്‍ സ്വീകരിക്കുവാന്‍ ഉദ്ദേശിക്കുന്നുണ്ടെന്ന് വ്യക്തമാക്കുമോ;

നിലവില്‍ വൈദ്യുതി ബോര്‍ഡ് ലാഭത്തിലാണോ അതോ നഷ്ടത്തിലാണോ പ്രവര്‍ത്തിക്കുന്നത്; എങ്കില്‍ എത്ര കോടി രൂപയുടെ ലാഭം അല്ലെങ്കില്‍ നഷ്ടമെന്ന് വ്യക്തമാക്കുമോ;

കോവിഡ്-19 ന്റെ സാഹചര്യത്തില്‍ യഥാസമയം വൈദ്യുതി ബില്ലുകള്‍ അടയ്ക്കുവാന്‍ കഴിയാത്ത ഗാര്‍ഹിക ഉപഭോക്താക്കളുടെ വൈദ്യുതി കണക്ഷന്‍ വിച്ഛേദിക്കുന്നതിനു മുമ്പായി ഇത്തരം ഉപഭോക്താക്കള്‍ക്ക് മുന്‍കൂട്ടി അറിയിപ്പ് നല്‍കുന്ന കാര്യവും അവര്‍ക്ക് മതിയായ സമയം നല്‍കുന്ന കാര്യവും സര്‍ക്കാര്‍ പരിശോധിക്കുമോ; വിശദാംശം നല്‍കാമോ ?

കഴിഞ്ഞ സര്‍ക്കാരിന്റെ കാലത്ത് വൈദ്യുതി ബോര്‍ഡിന്റെ റവന്യൂ വരുമാനം, ഒ.വൈ.ഇ.സി., കണക്ഷന്‍ ഡിപ്പോസിറ്റ് ചാര്‍ജ്, മീറ്റര്‍ വാടക, മറ്റിതര വരുമാന മാര്‍ഗ്ഗങ്ങള്‍ എന്നിവയില്‍ ഓരോന്നിലും ഓരോ വര്‍ഷവും ലഭിച്ച തുക വ്യക്തമാക്കാമോ;

പ്രസ്തുത കാലയളവില്‍ കേന്ദ്രസര്‍ക്കാരില്‍ നിന്നും, ഐക്യരാഷ്ട്രസഭയുടെ പരിസ്ഥിതി ഏജന്‍സിയില്‍ നിന്നും, വിദേശ ഏജന്‍സികളില്‍ നിന്നും, മറ്റ് സ്ഥാപനങ്ങളില്‍ നിന്നും ഗ്രാന്റ്, വായ്പ തുടങ്ങിയ ഇനങ്ങളില്‍ ലഭിച്ച തുക എത്രയെന്ന് വര്‍ഷം തിരിച്ച് അറിയിക്കാമോ?

വയനാട് ജില്ലയില്‍ വെെദ്യുതി ഭവന്‍ സ്ഥാപിക്കുന്ന കാര്യം സര്‍ക്കാര്‍ പരിഗണനയിലുണ്ടോ;

ഇതുമായി ബന്ധപ്പെട്ട എന്തെങ്കിലും നടപടിക്രമങ്ങള്‍ ആരംഭിച്ചിട്ടുണ്ടോ?

സംസ്ഥാന സര്‍ക്കാരിന്റെ ഇ-വെഹിക്കിള്‍ നയപ്രകാരം ചാര്‍ജിംഗ് സ്റ്റേഷനുകള്‍ സ്ഥാപിക്കുന്നതിന് വൈദ്യുതി വകുപ്പ് നടപടി സ്വീകരിച്ചിട്ടുണ്ടോ; വിശദമാക്കാമോ;

കണ്ണൂര്‍ ജില്ലയില്‍ എവിടെയൊക്കെയാണ് ചാര്‍ജിംഗ് സ്റ്റേഷനുകള്‍ ആരംഭിക്കുവാന്‍ ഉദ്ദേശിക്കുന്നതെന്ന് അറിയിക്കുമോ?

പൊതുജനങ്ങള്‍ക്കും വിവിധ സ്ഥാപനങ്ങള്‍ക്കും അനുയോജ്യമായ അക്ഷയോര്‍ജ്ജ ഉപകരണങ്ങള്‍ തെരഞ്ഞെടുക്കാനും അവ സ്ഥാപിക്കാനും അവയുടെ പരിപാലനത്തിനും ആവശ്യമായ സാങ്കേതിക സഹായം ലഭ്യമാക്കുവാന്‍ സേവന കേന്ദ്രങ്ങള്‍ ആരംഭിക്കുന്നതിന് നടപടി സ്വീകരിച്ചിട്ടുണ്ടോ; വിശദാംശങ്ങള്‍ ലഭ്യമാക്കാമോ?

2021 വര്‍ഷത്തോടെ ജലവൈദ്യുത പദ്ധതികളില്‍ നിന്നും 500 മെഗാവാട്ട് വൈദ്യുതി അധികമായി ഉല്പാദിപ്പിക്കുമെന്ന 2016-ലെ എല്‍. ഡി. എഫ് പ്രകടന പത്രികയിലെ വാഗ്ദാനം പൂര്‍ണ്ണമായ തോതില്‍ പ്രാവര്‍ത്തികമാക്കുന്നതിന് സാധിച്ചിട്ടുണ്ടോ;

2016 മുതല്‍ 2021 വരെയുള്ള അ‍ഞ്ച് വര്‍ഷക്കാലയളവില്‍ എത്ര മെഗാവാട്ടിന്റെ ജലവൈദ്യുത പദ്ധതികളാണ് സംസ്ഥാനത്ത് കമ്മീഷന്‍ ചെയ്തതെന്ന് അറിയിക്കുമോ;

പ്രസ്തുത കാലയളവില്‍ നിര്‍മ്മാണം ആരംഭിച്ചതും എന്നാല്‍ ഇതിനകം കമ്മീഷന്‍ ചെയ്യാത്തതുമായ ജലവൈദ്യുത പദ്ധതികള്‍ ഏതൊക്കെയാണെന്ന് അറിയിക്കുമോ; അവയുടെ നിലവിലെ സ്ഥിതി വിശദമാക്കുമോ; അവ എന്നത്തേക്ക് കമ്മീഷന്‍ ചെയ്യുന്നതിന് സാധിക്കുമെന്ന് വ്യക്തമാക്കുമോ?

മുന്‍ സർക്കാർ പട്ടാമ്പി മണ്ഡലത്തിൽ നടപ്പിലാക്കിയ പ്രധാനപ്പെട്ട പദ്ധതികളുടെ വിശദാംശങ്ങൾ അറിയിക്കാമോ;

2021-26 കാലയളവില്‍ പട്ടാമ്പി മണ്ഡലത്തിൽ നടപ്പിലാക്കാനുദ്ദേശിക്കുന്ന പ്രധാനപ്പെട്ട പദ്ധതികൾ ഉണ്ടെങ്കിൽ അവയുടെ വിശദാംശങ്ങൾ ലഭ്യമാക്കാമോ?

സൗരപദ്ധതിയില്‍ ഉള്‍പ്പെടുത്തി പുരപ്പുറ സോളാര്‍ സ്ഥാപിക്കുവാന്‍ വൈദ്യുതി വകുപ്പ് ക്ഷണിച്ച അപേക്ഷകളിന്മേൽ സ്വീകരിച്ചിട്ടുള്ള തുടര്‍ നടപടികള്‍ എന്തൊക്കെയാണെന്ന് വിശദമാക്കാമോ?

അതിരപ്പിള്ളി ജലവൈദ്യുതപദ്ധതി നടപ്പിലാക്കുന്നതിനായി സർക്കാർ കെ.എസ്.ഇ.ബിക്ക് എൻ.ഒ.സി. നൽകിയിട്ടുണ്ടോ എന്ന് അറിയിക്കുമോ; ഉണ്ടെങ്കിൽ എത്ര വർഷത്തേക്കാണ് എൻ.ഒ.സി. നൽകിയിട്ടുള്ളത്;

എൻ.ഒ.സി. നൽകുന്നതിനു മുൻപായി പൊതുജനാഭിപ്രായം ആരാഞ്ഞിട്ടുണ്ടോ; ഉണ്ടെങ്കിൽ ഏതൊക്കെ സംഘടനകളും എൻ.ജി.ഒ.കളും തദ്ദേശസ്വയംഭരണ സ്ഥാപനങ്ങളുമാണ് അഭിപ്രായങ്ങൾ നൽകിയതെന്നും അറിയിക്കുമോ;

പ്രസ്തുത പദ്ധതിക്കായുള്ള പാരിസ്ഥിതിക അനുമതി, സാങ്കേതിക-സാമ്പത്തിക അനുമതി എന്നിവ ലഭ്യമായിട്ടുണ്ടോയെന്ന് വ്യക്തമാക്കുമോ; ഇവയുടെ നടപടിക്രമങ്ങൾ ഏതുഘട്ടത്തിലാണെന്ന് അറിയിക്കുമോ?

പേരാമ്പ്ര മണ്ഡലത്തില്‍ 'ദ്യുതി' പദ്ധതി പ്രകാരം എത്ര കോടി രൂപയുടെ എന്തൊക്കെ പ്രവൃത്തികളാണ് പുരോഗമിക്കുന്നതെന്ന് വിശദമാക്കുമോ;

ആയതില്‍ ഏതൊക്കെ പ്രവൃത്തികള്‍ പൂര്‍ത്തിയായെന്നും ഇനിയും നിര്‍മ്മാണം പുരോഗമിക്കുന്ന പ്രവൃത്തികള്‍ ഏതെന്നും വിശദമാക്കുമോ?

വ്യാവസായിക സംരംഭങ്ങള്‍ക്ക് ഉദാരമായ വ്യവസ്ഥകളില്‍ ക്യാപ്റ്റീവ് അടിസ്ഥാനത്തില്‍ വൈദ്യുത നിലയങ്ങള്‍ക്ക് അനുമതി നല്‍കുന്ന പദ്ധതി മുന്‍ സര്‍ക്കാരിന്റെ കാലത്ത് ആരംഭിച്ചിട്ടുണ്ടോ;

അതുപ്രകാരം 2016-21 കാലയളവില്‍ എത്ര വൈദ്യുത നിലയങ്ങള്‍ക്ക് അനുമതി നല്‍കിയെന്നും ഓരോന്നും എത്ര മെഗാവാട്ട് വൈദ്യുതി ഉല്‍പാദിപ്പിക്കുന്നുവെന്നും വ്യക്തമാക്കുമോ?

മണലൂര്‍ മണ്ഡലത്തിലെ കോള്‍നിലങ്ങള്‍ വഴി സ്ഥാപിച്ചിരുന്ന വൈദ്യുതി ലൈനുകള്‍ മഴക്കാലത്ത് അപകടകരമാണെന്നതിനാല്‍ അവയെല്ലാം കോള്‍നിലങ്ങളുമായി ബന്ധപ്പെട്ട നെകിടത്ത് - കണ്ണോത്ത് - പുല്ല റോഡിലേക്കും മറ്റു റോഡുകളിലേക്കും ബണ്ടുകളിലേക്കും മാറ്റി സ്ഥാപിക്കുന്നതിനായി തയ്യാറാക്കിയ പദ്ധതിയുടെ എസ്റ്റിമേറ്റ് തുക എത്രയാണെന്ന് വ്യക്തമാക്കാമോ;

പ്രസ്തുത പദ്ധതി പ്രകാരമുള്ള പ്രവൃത്തികള്‍ ഏതൊക്കെയാണെന്ന് വിശദമാക്കാമോ;

പ്രസ്തുത പദ്ധതി എന്ന് പൂര്‍ത്തീകരിക്കും എന്ന് വിശദമാക്കുമോ?

സംസ്ഥാനത്ത് ഏതെല്ലാം ജില്ലകളില്‍ ട്രാന്‍സ്മിഷന്‍ സര്‍ക്കിള്‍ ഓഫീസുകള്‍ ഉണ്ടെന്ന് അറിയിക്കാമോ;

പ്രസ്തുത ഓഫീസുകളുടെ പ്രവര്‍ത്തനം എന്താണെന്നും ഏതെല്ലാം കാര്യങ്ങളുടെ മേൽനോട്ടമാണ് ഈ ഓഫീസ് വഹിക്കുന്നതെന്നും വ്യക്തമാക്കാമോ;

പുതിയ സബ്സ്റ്റേഷനുകള്‍ നിർമ്മിക്കുന്നതിന് ട്രാന്‍സ്മിഷന്‍ ഓഫീസുകളാണോ ചുമതല വഹിക്കേണ്ടതെന്ന് വ്യക്തമാക്കാമോ?

സംസ്ഥാനത്ത് വൈദ്യുതി ചാര്‍ജ്ജ് ഇനത്തില്‍ കുടിശ്ശികയായി പിരിഞ്ഞു കിട്ടാനുള്ള തുക എത്രയാണ്; അറിയിക്കുമോ;

കുടിശ്ശികയായി കിട്ടാനുള്ള തുക പിരിച്ചെടുക്കുന്നതിന് സ്വീകരിച്ച നടപടികള്‍ വ്യക്തമാക്കാമോ; കഴിഞ്ഞ സര്‍ക്കാരിന്റെ കാലത്ത് ഈയിനത്തില്‍ എത്ര തുക പിരിച്ചെടുത്തിട്ടുണ്ടെന്ന് വെളിപ്പെടുത്തുമോ;

ഈ ഇനത്തില്‍ കുടിശ്ശിക നല്‍കാനുള്ള സ്ഥാപനങ്ങളുടെയും വകുപ്പുകളുടെയും പേരുവിവരങ്ങള്‍, തുക എന്നിവ ജില്ല തിരിച്ച് വ്യക്തമാക്കാമോ?

ഊര്‍ജ്ജ രംഗത്ത് സേവനമേഖല കാര്യക്ഷമമാക്കുന്നതിനും വ്യവസായ മേഖലയ്ക്ക് ഉള്‍പ്പെടെ ചാര്‍ജ്ജ് കുറച്ച് തടസ്സങ്ങളില്ലാതെ വൈദ്യുതി ലഭ്യമാക്കുന്നതിനും നടപടികള്‍ ഉണ്ടാകുമോ;

ഈ രംഗത്ത് സേവനമേഖല ശക്തിപ്പെടുത്തുവാന്‍ മസ്ദൂര്‍ ഉള്‍പ്പെടെയുള്ള തസ്തികകളില്‍ കൂടുതല്‍ നിയമനം നടത്തുന്നതിന് നടപടികള്‍ ഉണ്ടാകുമോ എന്നറിയിക്കുമോ?

സംസ്ഥാനത്ത് ആവര്‍ത്തിച്ചുണ്ടായ പ്രളയവും കോവിഡ് രോഗ വ്യാപനവും ഊര്‍ജ്ജമേഖലയെ എപ്രകാരമെല്ലാമാണ് പ്രതികൂലമായി ബാധിച്ചിട്ടുള്ളതെന്ന് പരിശോധിച്ചിട്ടുണ്ടോ;

ലോക് ഡൗണ്‍ സമയത്ത് സംസ്ഥാനത്ത് വൈദ്യുതിയുടെ ഉപഭോഗത്തില്‍ ഗണ്യമായ വ്യത്യാസം ഉണ്ടായിട്ടുണ്ടോ;

ലോക് ഡൗണ്‍ കാലയളവില്‍ വൈദ്യുതി ബില്‍ അടയ്ക്കുന്നത് സംബന്ധിച്ച് എന്തെല്ലാം ഇളവുകളാണ് അനുവദിച്ചിട്ടുള്ളതെന്ന് അറിയിക്കാമോ?

സോളാര്‍ എനര്‍ജി പദ്ധതിയുടെ നിലവിലെ അവസ്ഥ വ്യക്തമാക്കാമോ?

വീടുകളില്‍ പുരപ്പുറ സൗരോര്‍ജ പ്ലാന്റുകള്‍ സ്ഥാപിക്കുക വഴി വൈദ്യുതി ഉല്‍പാദനം എത്രത്തോളം വര്‍ദ്ധിപ്പിക്കാനാണ് ഉദ്ദേശിക്കുന്നത്;

പ്രസ്തുത പദ്ധതിക്ക് കേന്ദ്രസര്‍ക്കാരില്‍ നിന്ന് എന്തെല്ലാം സഹായങ്ങളാണ് ലഭിക്കുന്നതെന്ന് വ്യക്തമാക്കാമോ;

പ്രസ്തുത പദ്ധതി കൂടുതല്‍ ആകര്‍ഷകമാക്കുവാന്‍ സ്വീകരിച്ചുവരുന്ന നടപടികള്‍ എന്തെല്ലാമെന്ന് വിശദമാക്കുമോ?

2016-ലെ എല്‍.ഡി.എഫ്. പ്രകടന പത്രികയില്‍ വാഗ്ദാനം നല്‍കിയ പുതിയ താപോര്‍ജ്ജ പ്ലാന്റുകള്‍ സ്ഥാപിക്കുവാന്‍ മുന്‍ സര്‍ക്കാരിന് സാധിച്ചിട്ടുണ്ടോ;

ഉണ്ടെങ്കില്‍ ആയതിന്റെ വിശദാംശം നല്‍കാമോ?

സംസ്ഥാനത്തിന്റെ പല ഭാഗത്തും പൊട്ടിവീണ വൈദ്യുതിക്കമ്പിയില്‍ നിന്ന് ഷോക്കേറ്റ് മരണം സംഭവിക്കുന്ന കാര്യം സര്‍ക്കാരിന്റെ ശ്രദ്ധയില്‍പെട്ടിട്ടുണ്ടോ;

വൈദ്യുതിക്കമ്പിപൊട്ടി വീഴുമ്പോള്‍ ഉടന്‍തന്നെ വൈദ്യുതി വിച്ഛേദിക്കുന്നതിന് നടപടി സ്വീകരിക്കുന്നില്ല എന്ന ആക്ഷേപം പരിശോധിച്ചിട്ടുണ്ടോ;

ഇത്തരം അപകടങ്ങള്‍ ആവര്‍ത്തിക്കാതിരിക്കാന്‍ എന്തെല്ലാം നടപടികളാണ് സ്വീകരിച്ചുവരുന്നതെന്നു വിശദമാക്കുമോ?

പൊട്ടിവീണ വൈദ്യുതി ലൈനില്‍ നിന്നും ഷോക്കേറ്റ് മരണമടയുന്നതായ സംഭവങ്ങള്‍ ഈ അടുത്ത കാലത്ത് റിപ്പോര്‍ട്ട് ചെയ്തിട്ടുണ്ടോയെന്ന് അറിയിക്കുമോ;

സാധാരണക്കാരുടെ സുരക്ഷിതത്വം ഉറപ്പാക്കുന്നതിനും അപകടങ്ങള്‍ കുറയ്ക്കുന്നതിനും സ്വീകരിച്ചുവരുന്ന നടപടികള്‍ വിശദമാക്കുമോ?

മലപ്പുറം നിയോജക മണ്ഡലത്തിലെ പുല്‍പ്പറ്റ പഞ്ചായത്തിലെ പൂക്കൊളത്തൂര്‍ കേന്ദ്രമാക്കി വൈദ്യുതി ബോര്‍ഡിന്റെ പുതിയ സെക്ഷന്‍ ഓഫീസ് ആരംഭിക്കുവാന്‍ നടപടി സ്വീകരിക്കുമോ;

മഞ്ചേരി നോര്‍ത്ത്, വള്ളുവമ്പ്രം, കിഴിശ്ശേരി സെക്ഷന്‍ വിഭജിച്ച് ആവശ്യത്തിലധികം ഉപഭോക്താക്കളുള്ള പൂക്കൊളത്തൂര്‍ കേന്ദ്രമാക്കി പുതിയ സെക്ഷന്‍ ആരംഭിക്കുന്നതിന് എന്തെങ്കിലും തടസ്സങ്ങളുണ്ടോയെന്നറിയിക്കാമോ;

പ്രദേശവാസികളുടെ ഏറെ നാളത്തെ ആവശ്യമെന്ന നിലയില്‍ അനുകൂല നടപടികള്‍ സ്വീകരിക്കുമോ?

കോതമംഗലം മണ്ഡലത്തിലെ കവളങ്ങാട്, പല്ലാരിമംഗലം എന്നീ പഞ്ചായത്തുകളിലെ ആയിരക്കണക്കിന് ആളുകള്‍ വൈദ്യുത സംബന്ധമായ ആവശ്യങ്ങള്‍ക്ക് കോതമംഗലം നം.2 സെക്ഷനെ ആണ് സമീപിക്കുന്നത് എന്ന കാര്യം ശ്രദ്ധയില്‍പ്പെട്ടിട്ടുണ്ടോ;

വലിയ ഭൂപ്രദേശങ്ങള്‍ ഉൾക്കൊള്ളുന്ന ഈ രണ്ട് പഞ്ചായത്തുകളിലെ ജനങ്ങള്‍ക്ക് സഹായകരമാകുന്ന തരത്തില്‍ മണ്ഡലത്തിലെ ഊന്നുകല്‍ കേന്ദ്രീകരിച്ച് പുതിയ സെക്ഷന്‍ ഓഫീസ് ആരംഭിക്കുന്ന കാര്യം പരിഗണിക്കുമോ; വിശദമാക്കാമോ?

തൃക്കരിപ്പൂര്‍ മണ്ഡലത്തിലെ നീലേശ്വരം കേന്ദ്രീകരിച്ച് കെ.എസ്.ഇ.ബി ഡിവിഷന്‍ ഓഫീസ് അനുവദിക്കാന്‍ നടപടികള്‍ ഉണ്ടാകുമോ;

ഇതിനാവശ്യമായ സ്ഥലവും കെട്ടിടവും സൗജന്യമായി ഏര്‍പ്പെടുത്താന്‍ മുന്‍സിപ്പാലിറ്റി തയ്യാറായതിനാല്‍ ഡിവിഷന്‍ ഓഫീസ് അനുവദിക്കുമോ?

കാസര്‍ഗോഡ് ജില്ലയില്‍ കുറ്റിക്കല്‍ 110 കെ.വി. സബ് സ്റ്റേഷന്റെ പ്രവൃത്തി ഇതുവരെ ആരംഭിച്ചിട്ടില്ലെന്ന വിവരം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത പ്രവൃത്തി ആരംഭിക്കാനുള്ള നിലവിലുള്ള തടസ്സം എന്താണെന്ന് വിശദമാക്കാമോ;

തടസ്സങ്ങള്‍ നീക്കി പ്രസ്തുത പ്രവൃത്തി എന്ന് തുടങ്ങാനാവും എന്ന് അറിയിക്കാമോ?

കാസര്‍കോ‍‍ട് ജില്ലയില്‍ എത്ര ഇലക്ട്രിക്കല്‍ സെക്ഷന്‍ ഓഫീസുകള്‍ നിലവിലുണ്ടെന്ന് വ്യക്തമാക്കാമോ;

നിലവിലുള്ള ഉപഭോക്താക്കളുടെ എണ്ണം സെക്ഷന്‍ ഓഫീസ് തിരിച്ച് വ്യക്തമാക്കാമോ;

ഉപഭോക്താക്കളുടെ എണ്ണം എത്രയാകുമ്പോഴാണ് സെക്ഷന്‍ ഓഫീസ് വിഭജിക്കുന്നതെന്ന് വ്യക്തമാക്കാമോ;

ഉപഭോക്താക്കളുടെ എണ്ണത്തിനുപുറമേ സെക്ഷന്‍ ഓഫീസ് വിഭജിക്കാന്‍ മറ്റ് മാനദണ്ഡങ്ങള്‍ ഉണ്ടോ; ഉണ്ടെങ്കില്‍ വിശദാംശം നല്‍കാമോ;

കാസര്‍കോ‍‍ട് ജില്ലയില്‍ പ്രസ്തുത മാനദണ്ഡങ്ങള്‍ അനുസരിച്ച് വിഭജിക്കാവുന്ന സെക്ഷന്‍ ഓഫീസുകള്‍ ഏതൊക്കെയാണെന്നും വിഭജനം എപ്പോള്‍ ഉണ്ടാകുമെന്നും വ്യക്തമാക്കാമോ?

ഇരിക്കൂര്‍ നിയോജകമണ്ഡലത്തില്‍ ശ്രീകണ്ഠാപുരം 110 കെ വി സബ്സ്റ്റേഷനോട് ചേര്‍ന്ന് അനുവദിച്ച ഓഫീസ് കോംപ്ലക്സ് നിര്‍മ്മാണത്തിനുള്ള നടപടിക്രമങ്ങള്‍ ഏത് ഘട്ടത്തിലാണെന്നും എന്നത്തേക്ക് പൂർത്തീകരിക്കാ൯ സാധിക്കുമെന്നും അറിയിക്കാമോ;

ആലക്കോട് 33 കെവി സബ്സ്റ്റേഷന്‍ 110 കെവി സബ്സ്റ്റേഷനായി ഉയര്‍ത്താന്‍ നാളിതുവരെയായി എന്തെങ്കിലും നടപടികള്‍ സ്വീകരിച്ചിട്ടുണ്ടോയെന്ന് അറിയിക്കുമോ?

കോട്ടക്കല്‍ നിയോജക മണ്ഡലത്തിലെ 110 കെ.വി സബ്‍സ്റ്റേഷന്‍ നിര്‍മ്മാണവുമായി ബന്ധപ്പെട്ട് സ്വീകരിച്ച നടപടികള്‍ അറിയിക്കുമോ;

പ്രസ്തുത സബ്‌സ്റ്റേഷൻ നിർമാണപദ്ധതിക്കായി സ്‌ഥലം ഏറ്റെടുക്കുന്നതുമായി ബന്ധപ്പെട്ട നടപടികള്‍ ആരംഭിച്ചിട്ടുണ്ടോ; വിശദമാക്കുമോ;

പദ്ധതി അടിയന്തരമായി ആരംഭിക്കുവാന്‍ നടപടി സ്വീകരിക്കുമോ?

മറയൂര്‍ 66 കെ.വി. സബ് സ്റ്റേഷനുമായി ബന്ധപ്പെട്ട പ്രവൃത്തികള്‍ നിലവില്‍ ഏത് ഘട്ടത്തിലാണെന്ന് വ്യക്തമാക്കാമോ;

പ്രസ്തുത പദ്ധതി സമയബന്ധിതമായി നടപ്പിലാക്കുന്നതിന് സ്വീകരിച്ചിട്ടുള്ള നടപടികള്‍ എന്തൊക്കെയാണെന്ന് വ്യക്തമാക്കാമോ?

കെ.എസ്.ഇ.ബി.യില്‍ ഡേറ്റാ എന്‍ട്രി ഓപ്പറേറ്റര്‍, ഹെല്‍പ്പര്‍ എന്നീ തസ്തികകളില്‍ നിയമനം നടത്തുന്നുണ്ടോ;

പി.എസ്.സി. എംപ്ലോയ്മെന്റ് എക്സ്ചേഞ്ച് എന്നിവ വഴിയല്ലാതെ ഏതെങ്കിലും ഏജന്‍സിയെ പ്രസ്തുത നിയമനങ്ങള്‍ക്കായി ചുമതലപ്പെടുത്തിയിട്ടുണ്ടോ;

ചുമതലപ്പെടുത്തിയിട്ടുണ്ടെങ്കില്‍ അതിന്റെ സാഹചര്യം വിശദമാക്കുമോ?

മഞ്ചേശ്വരം മണ്ഡലത്തിലെ വിവിധ കെ.എസ്.ഇ.ബി സെക്ഷന്‍ ഓഫീസുകളില്‍ ഉദ്യോഗസ്ഥരുടെ എത്ര ഒഴിവുകളാണ് നിലവിലുള്ളത് എന്ന് അറിയിക്കാമോ;

ഉദ്യോഗസ്ഥരുടെ ഒഴിവുകള്‍ നികത്തുന്നതിന് അടിയന്തിര നടപടി സ്വീകരിക്കുമോ; വ്യക്തമാക്കാമോ?