മുൻ സർക്കാരിന്റെ കാലം മുതൽ നാളിതുവരെ ഓരോ ബഡ്ജറ്റിലും ഫിഷറീസ് മേഖലയ്ക്കായി നീക്കിവെച്ച തുക എത്രയാണ്; അതില്‍ അനുവദിച്ച തുക എത്രയെന്നും ചെലവഴിച്ച തുക എത്രയെന്നും വിശദമാക്കാമോ?

മത്സ്യത്തൊഴിലാളികളുടെ ക്ഷേമം ഉറപ്പാക്കുന്നതിനായി മത്സ്യ ബോര്‍ഡ് പദ്ധതികളില്‍ നടപ്പാക്കിയ പരിഷ്കരണങ്ങള്‍ എന്തെല്ലാമെന്ന് വിശദമാക്കാമോ;

മത്സ്യത്തൊഴിലാളികളുടെ സാമൂഹിക സാമ്പത്തിക വിവരശേഖരണവുമായി ബന്ധപ്പെട്ട് നടക്കുന്ന സര്‍വേ എന്നത്തേക്ക് പൂര്‍ത്തീകരിക്കുവാനാണ് ലക്ഷ്യമിടുന്നത്; ഈ സര്‍വേയുടെ ഭാഗമായി എന്തെല്ലാം വിവരങ്ങളാണ് ശേഖരിക്കുന്നത്; വ്യക്തമാക്കാമോ;

പ്രസ്തുത സർവേയിലൂടെയുള്ള വിവരശേഖരണം ഏതെല്ലാം രൂപത്തില്‍ പ്രയോജനപ്പെടുത്താനാണ് ലക്ഷ്യമിടുന്നത്; വിശദമാക്കാമോ?

കേരളത്തിന്റെ മൊത്തം ആഭ്യന്തര ഉൽപാദനത്തില്‍ മത്സ്യ മേഖലയുടെ പങ്ക് എത്രയെന്നും അത് വര്‍ധിപ്പിക്കുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്നും വിശദമാക്കാമോ;

മുന്‍കാലങ്ങളില്‍ നിന്നും വ്യത്യസ്തമായി ഉല്പാദന മേഖലയില്‍ മത്സ്യകൃഷിയുടെ വിഹിതം വര്‍ധിച്ചിട്ടുണ്ടോയെന്നും ഇല്ലെങ്കില്‍ ഇതു വർദ്ധിപ്പിക്കുന്നതിനായി എന്ത് നടപടിയാണ് സ്വീകരിക്കാനുദ്ദേശിക്കുന്നതെന്നും വ്യക്തമാക്കുമോ;

മത്സ്യത്തൊഴിലാളികളുടെ പ്രതിശീര്‍ഷ വരുമാനത്തില്‍ കുറവ് വരുന്നതായി ശ്രദ്ധയില്‍പ്പെട്ടിട്ടുണ്ടോ; അത് വര്‍ദ്ധിപ്പിക്കുന്നതിന് എന്ത് നടപടിയാണ് സ്വീകരിക്കാനുദ്ദേശിക്കുന്നതെന്ന് വിശദമാക്കുമോ?

2024 മെയ് മാസം 20-ന് പെരിയാറിൽ വ്യവസായിക മാലിന്യങ്ങൾ ഒഴുകിയെത്തിയതിനെ തുടർന്ന് മത്സ്യകൃഷിക്ക് നാശം സംഭവിച്ച കൂട് മത്സ്യകർഷകർക്ക് നഷ്ടപരിഹാരം നൽകിയിട്ടുണ്ടോ; ഇല്ലെങ്കിൽ നഷ്ടപരിഹാര വിതരണത്തിന് അടിയന്തര നടപടി സ്വീകരിക്കുമോ; വിശദാംശം നൽകുമോ?

ഈ സര്‍ക്കാര്‍ അധികാരത്തില്‍ വന്നതു മുതല്‍ നാളിതുവരെ മത്സ്യബന്ധന വകുപ്പിന്റെ കീഴില്‍ പയ്യന്നൂര്‍ മണ്ഡലത്തില്‍ അനുവദിച്ച പദ്ധതികളും തുകയും അവ ഓരോന്നിന്റെയും നിലവിലെ സ്ഥിതിയും വിശദമാക്കാമോ?

'ശുചിത്വ സാഗരം സുന്ദരതീരം' പദ്ധതി എന്താണെന്ന് വിശദമാക്കാമാേ; പ്രസ്തുത പദ്ധതി പ്രകാരം മാലിന്യം എങ്ങനെ നിര്‍മ്മാര്‍ജനം ചെയ്യാനാണ് ഉദ്ദേശിക്കുന്നത്;

പ്രസ്തുത പദ്ധതി നടപ്പിലാക്കിത്തുടങ്ങിയിട്ടുണ്ടാേ; തീരദേശം കേന്ദ്രീകരിച്ച് നടപ്പിലാക്കുന്ന പ്രസ്തുത പദ്ധതിയില്‍ ഫിഷറീസ് വകുപ്പിന് പുറമെ മറ്റ് ഏതൊക്കെ വകുപ്പുകളെ ഉള്‍പ്പെടുത്തിയാണ് നടപ്പിലാക്കാന്‍ ഉദ്ദേശിക്കുന്നതെന്ന് വിശദമാക്കാമാേ?

പ്രധാനമന്ത്രി മത്സ്യസമ്പദ യോജന പദ്ധതി പ്രകാരം, പര്യാപ്തമായ കേന്ദ്ര സഹായം സംസ്ഥാനത്തിന് ലഭിക്കുന്നുണ്ടോ;

സംസ്ഥാനം സമര്‍പ്പിച്ചിട്ടുള്ള എല്ലാ പദ്ധതികള്‍ക്കും അംഗീകാരം ലഭിച്ചിട്ടുണ്ടോ; ഇനിയും അംഗീകാരം ലഭിക്കാനുള്ള പദ്ധതികളുടെ വിവരം ലഭ്യമാക്കുമോ;

2020 മുതല്‍ 2025 വരെയുള്ള കാലഘട്ടത്തിൽ പ്രസ്തുത പദ്ധതികള്‍ക്കായി എന്തു തുക കേന്ദ്ര സഹായം ലഭിച്ചിട്ടുണ്ടെന്നും ഇനി എന്തു തുക ലഭിക്കാനുണ്ടെന്നുമുള്ള വിശദ വിവരം ലഭ്യമാക്കുമോ?

സംസ്ഥാനത്ത് 2016 മുതൽ നാളിതുവരെ കിഫ്‌ബി മുഖേന തീരദേശ വികസനത്തിനായി എത്ര തുകയുടെ വികസന പ്രവർത്തനങ്ങളാണ് നടത്തിയിട്ടുള്ളതെന്ന് അറിയിക്കാമോ;

പിറവം മണ്ഡലത്തില്‍ 2016 മുതല്‍ നാളിതുവരെ തീരദേശവികസനവുമായി ബന്ധപ്പെട്ട് എത്ര തുകയുടെ വികസന പ്രവര്‍ത്തനങ്ങളാണ് നടപ്പിലാക്കിയിട്ടുള്ളതെന്ന് വ്യക്തമാക്കുമോ;

ഈ മണ്ഡലത്തില്‍ പുതിയ ഏതെല്ലാം പ്രവര്‍ത്തികൾ നടപ്പിലാക്കാന്‍ പരിഗണനയിലുണ്ടെന്ന് വ്യക്തമാക്കാമോ?

സംസ്ഥാനത്ത് അക്വാകള്‍ച്ചര്‍ പ്രൊമോട്ടര്‍, അക്വാകള്‍ച്ചര്‍ കോര്‍ഡിനേറ്റര്‍ എന്നീ നിലകളില്‍ പ്രവര്‍ത്തിക്കുന്ന എത്ര പേരാണുള്ളതെന്ന് വിശദമാക്കാമോ;

പ്രസ്തുത പ്രൊമോട്ടര്‍/കോര്‍ഡിനേറ്റര്‍മാരുടെ ജോലി എന്തെല്ലാമെന്ന് വിശദമാക്കാമോ;

തിരുവനന്തപുരം ജില്ലയില്‍ എത്ര പേര്‍ പ്രസ്തുത ജോലി ചെയ്യുന്നുണ്ടെന്ന് വിശദമാക്കാമോ; എവിടെയെല്ലാമാണെന്ന് വ്യക്തമാക്കാമോ?

ഒരു മത്സ്യത്തൊഴിലാളിക്ക് ഒരു ദിവസം എത്ര വരുമാനം ലഭിക്കുന്നുണ്ടെന്ന കണക്ക് ലഭ്യമാണോയെന്ന് വ്യക്തമാക്കാമോ;

മത്സ്യത്തൊഴിലാളികൾക്ക് വരുമാനം ലഭിക്കാത്ത ദിവസങ്ങൾ ഏതാണെന്ന് കണ്ടെത്തിയിട്ടുണ്ടോയെന്ന് വ്യക്തമാക്കാമോ;

വരുമാനമില്ലാത്ത ദിവസങ്ങളിൽ പട്ടിണി കൂടാതെ ജീവിക്കാൻ മത്സ്യത്തൊഴിലാളികൾക്ക് വേണ്ടി ഏർപ്പെടുത്തിയിട്ടുള്ള സംവിധാനങ്ങൾ എന്താണെന്ന് വിശദമാക്കാമോ;

മത്സ്യബന്ധനത്തിന് വിലക്കില്ലാത്ത സമയത്ത് വൻ മത്സ്യക്കൂട്ടവുമായി തിരിച്ചുവരാമെന്ന പ്രതീക്ഷയോടെ ആഴക്കടലിലേക്ക് പോകുന്നവർ നിരാശയോടെ വലിയ മാനസിക പ്രയാസവും സാമ്പത്തിക നഷ്ടവും സഹിച്ച് തിരിച്ചുവരേണ്ടിവരുന്ന സന്ദർഭങ്ങളിൽ തൊഴിലാളികളെ സർക്കാരിന് എങ്ങനെ സംരക്ഷിക്കാനും ആശ്വസിപ്പിക്കാനും കഴിയുമെന്ന് ആലോചിച്ചിട്ടുണ്ടോ; വ്യക്തമാക്കാമോ?

സംസ്ഥാന ഫിഷറീസ് വകുപ്പിന്റെ പ്രവർത്തനങ്ങൾ മുൻനിർത്തി കേന്ദ്ര സര്‍ക്കാരില്‍നിന്നും പ്രസ്തുത രംഗത്തെ മികച്ച സംസ്ഥാനത്തിനുള്ള പുരസ്കാരം ലഭിച്ചിട്ടുണ്ടോയെന്ന് വ്യക്തമാക്കുമോ;

സംസ്ഥാന ഫിഷറീസ് വകുപ്പിന്റെ എന്തെല്ലാം പദ്ധതി പ്രവര്‍ത്തനങ്ങളുടെ ഫലമായാണ് പ്രവര്‍ത്തന മികവിനുള്ള ഈ അംഗീകാരം ലഭിച്ചതെന്ന് അറിയിക്കുമോ;

മുന്‍കാലങ്ങളില്‍ ഇത്തരത്തില്‍ ഫിഷറീസ് വകുപ്പിന് പുരസ്കാരങ്ങള്‍ ലഭിച്ചിട്ടുണ്ടോ; എങ്കിൽ വിശദമാക്കുമോ?

കരിമീന്‍, വരാല്‍ തുടങ്ങിയ തദ്ദേശീയ മത്സ്യക്കുഞ്ഞുങ്ങളുടെ ഉല്പാദനത്തിന് കര്‍ഷകരുമായി ചേര്‍ന്ന് നടപ്പാക്കിയ ബാക്ക് യാര്‍ഡ് സീഡ് പ്രൊഡക്ഷന്‍ യൂണിറ്റ് പദ്ധതിയുടെ പുരോഗതി വിലയിരുത്തിയിട്ടുണ്ടോ; വിശദമാക്കാമോ;

പ്രസ്തുത പദ്ധതിയിലൂടെ 2023-24 വര്‍ഷത്തില്‍ എത്ര മത്സ്യക്കുഞ്ഞുങ്ങളെ ഉല്പാദിപ്പിക്കാന്‍ കഴിഞ്ഞിട്ടുണ്ട്; ജില്ല തിരിച്ചുള്ള വിവരം ലഭ്യമാക്കുമോ;

ഇത്തരം മത്സ്യക്കുഞ്ഞ് ഉല്പാദനം നടത്തുന്ന കര്‍ഷകരെ സഹായിക്കുന്നതിന് എന്തെല്ലാം പദ്ധതികളാണ് വിഭാവനം ചെയ്തിട്ടുള്ളത്; വ്യക്തമാക്കുമോ?

രാംസര്‍ പട്ടികയില്‍ ഉള്‍പ്പെട്ടിട്ടുളള വേമ്പനാട്ട് കായല്‍ സംരക്ഷിക്കുന്നത് സംബന്ധിച്ച് കുഫോസ് സമര്‍പ്പിച്ച റിപ്പോര്‍ട്ടില്‍ നടപടി സ്വീകരിച്ചിട്ടുണ്ടോ; എങ്കില്‍ സ്വീകരിച്ചിട്ടുളള നടപടി വിശദമാക്കാമോ;

കാലാവസ്ഥാ വ്യതിയാനം മൂലമുളള തിക്തഫലങ്ങള്‍ മുന്‍പെങ്ങും ഇല്ലാത്തവിധം രൂക്ഷമായിട്ടുളളതിനാല്‍ വേമ്പനാട്ട് കായലിന്റെയും വേമ്പനാട്ട് കായലിന്റെ കെെവഴി പ്രദേശങ്ങളിലും അധിവസിക്കുന്ന ജനങ്ങളുടെ ജീവനും സ്വത്തിനും സംരക്ഷണം നല്‍കുന്നതിനായി ഇതു സംബന്ധിച്ച് സമര്‍പ്പിച്ച കുഫോസിന്റേതുൾപ്പെടെയുള്ള പഠന റിപ്പോര്‍ട്ടുകളുടെ അടിസ്ഥാനത്തില്‍ വേമ്പനാട്ട് കായല്‍ സംരക്ഷിക്കുന്നതിനായി അടിയന്തര നടപടികള്‍ സ്വീകരിക്കുമോ;

വേമ്പനാട്ട് കായലും ഇതിനോട് ചേര്‍ന്ന് കിടക്കുന്ന ചെമ്മീന്‍ കെട്ടുകള്‍ നടത്തുന്ന കൃഷിയിടങ്ങളും വേണ്ട രീതിയില്‍ സംരക്ഷിക്കാത്തതിനാലും സജ്ജീകരണങ്ങള്‍ ഏര്‍പ്പെടുത്താത്തതിനാലും വെെപ്പിന്‍, പശ്ചിമ കൊച്ചി, കൊച്ചി മേഖലകളിലെ ജനവാസകേന്ദ്രങ്ങളില്‍ മുന്‍പെങ്ങുമില്ലാത്തവിധം ഓരുവെളളം കയറുന്നതുമൂലം പൊതുജനങ്ങള്‍ നേരിടുന്ന ബുദ്ധിമുട്ടുകള്‍ക്കും നാശനഷ്ടങ്ങള്‍ക്കും ആരോഗ്യപ്രശ്നങ്ങള്‍ക്കും പരിഹാരം കാണാന്‍ തുക വകയിരുത്തിയിട്ടുണ്ടോ;

ഇല്ലെങ്കില്‍ പ്രസ്തുത പ്രദേശത്ത് താമസിക്കുന്നവരുടെ ജീവനും സ്വത്തിനും സുരക്ഷ ഉറപ്പുവരുത്തുന്നതിനാവശ്യമായ പ്രവൃത്തികള്‍ക്കായി തുക വകയിരുത്താന്‍ നടപടി സ്വീകരിക്കുമോ?

പുനര്‍ഗേഹം പദ്ധതിയില്‍ ഉള്‍പ്പെടുത്തി തിരുവനന്തപുരം ജില്ലയില്‍ എത്ര വീടുകള്‍ നിര്‍മ്മിച്ചു നല്‍കിയിട്ടുണ്ടെന്ന് വിശദമാക്കാമോ;

പ്രസ്തുത പദ്ധതിയില്‍ തിരുവനന്തപുരം ജില്ലയില്‍ എത്ര കുടുംബങ്ങള്‍ ഉള്‍പ്പെട്ടിട്ടുണ്ടെന്ന് വിശദമാക്കാമോ;

പ്രസ്തുത പദ്ധതി പ്രകാരം വര്‍ക്കല നിയോജകമണ്ഡലത്തില്‍ എത്ര കുടുംബങ്ങള്‍ ഉള്‍പ്പെട്ടിട്ടുണ്ടെന്ന് വിശദമാക്കാമോ; എത്ര പേര്‍ക്ക് വീടോ സാമ്പത്തിക ആനുകൂല്യമോ നല്‍കിയിട്ടുണ്ടെന്ന് വിശദമാക്കാമോ?

കേരളത്തിലെ വിവിധ ഫിഷിംഗ് ഹാർബറുകളുടെയും തുറമുഖങ്ങളുടെയും നിർമ്മാണവുമായി ബന്ധപ്പെട്ട് തൊഴിലും ഉപജീവന സൗകര്യങ്ങളും ആവാസ വ്യവസ്ഥയും നഷ്ടപ്പെടുന്ന മത്സ്യത്തൊഴിലാളികളുടെ പുനരധിവാസത്തിന് വേണ്ടിയുള്ള പദ്ധതികളുടെ വിശദാംശം ലഭ്യമാക്കുമോ;

ഇത്തരം നിർമ്മാണത്തിന് സ്ഥലം വിട്ടുകൊടുത്തിട്ടുള്ളവരുടെ ഉപജീവന മാർഗ്ഗം ഉറപ്പാക്കുന്നതിനുവേണ്ടിയുള്ള വ്യവസ്ഥ തുറമുഖ നിർമ്മാണ കരാറിൽ ഉൾപ്പെടുത്തിയിട്ടുണ്ടോ; വിശദാംശം ലഭ്യമാക്കുമോ;

തുറമുഖ നിർമ്മാണത്തിന് സ്ഥലം വിട്ടുകൊടുത്തിട്ടുള്ള മത്സ്യത്തൊഴിലാളികളെ പുനർഗേഹം പദ്ധതിയില്‍ ഉൾപ്പെടുത്തിയിട്ടുണ്ടോ; വിശദാംശം ലഭ്യമാക്കുമോ?

പൊക്കാളി പാടങ്ങളില്‍ മത്സ്യ/ചെമ്മീന്‍ കൃഷി ഒരു വിളയായി നടപ്പാക്കുന്നതിന് എന്തെങ്കിലും പദ്ധതി നിലവിലുണ്ടോ;

തരിശു കിടക്കുന്ന പൊക്കാളിപ്പാടങ്ങളില്‍ വനാമി ചെമ്മീന്‍ പോലെയുള്ള അത്യുല്‍പ്പാദന ശേഷിയുള്ളതും കയറ്റുമതി മൂല്യമുള്ളതുമായ ഇനങ്ങള്‍ കൃഷി ചെയ്യുന്നതിന് പദ്ധതി ആവിഷ്ക്കരിക്കുവാന്‍ നടപടി സ്വീകരിക്കുമോ?

സംസ്ഥാനത്ത് തീരദേശ ജനങ്ങള്‍ക്ക് മത്സ്യബന്ധനത്തിന് പോകാൻ സാധിക്കാത്ത സമയങ്ങളിൽ തൊഴിലും ജീവനോപാധിയും നല്‍കാൻ എന്തൊക്കെ ഇടപെടലാണ് നടത്തുന്നതെന്ന് വിശദമാക്കാമോ;

മത്സ്യത്തൊഴിലാളി മേഖലയിലെ സ്ത്രീകൾക്ക് സ്വയം തൊഴിൽ കണ്ടെത്താനായി എന്തെങ്കിലും പദ്ധതികൾ ആവിഷ്ക്കരിച്ചിട്ടുണ്ടോ?

ഗുരുവായൂര്‍ നിയാേജകമണ്ഡലത്തിലെ സര്‍ക്കാര്‍ ഫിഷറീസ് ടെക്നിക്കല്‍ സ്കൂളില്‍ പുതിയ കെട്ടിട നിര്‍മ്മാണത്തിനായി തീരദേശ വികസന കാേര്‍പ്പറേഷന്‍ സ്വീകരിച്ച നടപടികള്‍ വിശദമാക്കാമാേ;

സ്റ്റേറ്റ് പ്ലാനില്‍ ഉള്‍പ്പെടുത്തി പ്രസ്തുത കെട്ടിട നിര്‍മ്മാണത്തിന് ആവശ്യമായ നടപടികള്‍ സ്വീകരിക്കുമാേ; വിശദമാക്കുമാേ?

ശുചിത്വസാഗരം സുന്ദരതീരം പദ്ധതിയുടെ പുരോഗതി വ്യക്തമാക്കുമോ;

ഹാര്‍ബറുകളിലെയും ലാന്‍ഡിങ് സെന്ററുകളിലെയും മാലിന്യ നിര്‍മ്മാര്‍ജനത്തിനായി എന്തെല്ലാം പദ്ധതികള്‍ ആവിഷ്കരിച്ച് നടപ്പിലാക്കി വരുന്നുവെന്ന് വിശദമാക്കുമോ;

എല്ലാ ഹാര്‍ബറുകളിലും മാലിന്യ സംസ്കരണ സംവിധാനം ഉറപ്പാക്കുന്നതിന് ലക്ഷ്യമിടുന്നുണ്ടോ; എങ്കിൽ വിശദമാക്കുമോ?

ഷിറിയ റിവർ ട്രെയ്നിംഗ് പ്രവൃത്തിക്കായി സി.ആർ.ഇസഡ് അനുമതി ലഭ്യമാക്കാനുള്ള നടപടി ഏത് ഘട്ടത്തിലാണെന്ന് വ്യക്തമാക്കുമോ?

സംസ്ഥാനത്ത് മത്സ്യകൃഷിയിലൂടെ പ്രധാനമായും ഏതെല്ലാം മത്സ്യ ഇനങ്ങളെയാണ് വളര്‍ത്തുന്നത്;

സംസ്ഥാനത്ത് ഉള്‍നാടന്‍ മത്സ്യകൃഷിയിലൂടെ ഒരു വര്‍ഷം ശരാശരി എത്ര ടണ്‍ മത്സ്യമാണ് ഉല്പാദിപ്പിക്കുന്നത്; ഇത് ആഭ്യന്തര ആവശ്യത്തിന്റെ എത്ര ശതമാനം വരുമെന്ന് വ്യക്തമാക്കുമോ;

യുവതീയുവാക്കളെ മത്സ്യകൃഷിയിലേക്ക് ആകര്‍ഷിക്കുന്നതിനും അതിലൂടെ അവര്‍ക്ക് മികച്ച വരുമാനം കണ്ടെത്താന്‍ പ്രാപ്തരാക്കുന്നതിനും എന്തെല്ലാം സാങ്കേതിക സാമ്പത്തിക സഹായങ്ങളാണ് വകുപ്പ് നല്‍കി വരുന്നത്; വിശദാംശം ലഭ്യമാക്കുമോ?

സംസ്ഥാനത്ത് ഏതെല്ലാം ഉള്‍നാടന്‍ മത്സ്യ ഇനങ്ങളാണ് വംശനാശ ഭീഷണി നേരിടുന്നതായി കണ്ടെത്തിയിട്ടുളളത്; വിശദാംശം ലഭ്യമാക്കുമോ;

ഇവയുടെ പ്രജനനം വര്‍ദ്ധിപ്പിക്കുന്നതിനും ലഭ്യത ഉറപ്പുവരുത്തുന്നതിനും പരിഗണന നല്‍കുമോ; എങ്കില്‍ എന്തെല്ലാം നടപടികളാണ് ഇതിനായി സ്വീകരിച്ചുവരുന്നത്; വിശദമാക്കുമോ?

കാലാവസ്ഥാ വ്യതിയാനങ്ങളുടെയും മറ്റും ഭാഗമായി കടല്‍ മത്സ്യസമ്പത്ത് കുറഞ്ഞ് വരുന്നത് കണക്കിലെടുത്ത് മത്സ്യ ലഭ്യത ഉറപ്പ് വരുത്തുന്നതിനായി ഉള്‍നാടന്‍ മത്സ്യകൃഷി വ്യാപകമാക്കുന്നതിനും അതിലൂടെ ശുദ്ധജല മത്സ്യങ്ങളുടെ ലഭ്യത ഉണ്ടാക്കിയെടുക്കുന്നതിനും എന്തെല്ലാം നടപടികളാണ് മത്സ്യവകുപ്പ് സ്വീകരിച്ച് വരുന്നത്; വിശദാംശം ലഭ്യമാക്കുമോ?

സംസ്ഥാനത്തിന്റെ സാമ്പത്തികമേഖലയില്‍ ഗണ്യമായ പങ്കുവഹിക്കുന്ന മത്സ്യത്തൊഴിലാളികളുടെ ജീവിത നിലവാരത്തെ സംബന്ധിച്ച് എന്തെങ്കിലും പഠനമോ വിലയിരുത്തലുകളോ നടത്തിയിട്ടുണ്ടോ; എങ്കിൽ വിശദാംശം നൽകുമോ;

മത്സ്യത്തൊഴിലാളികൾക്ക് സാമൂഹിക-സാമ്പത്തിക-ആരോഗ്യ-വിദ്യാഭ്യാസ മേഖലകളില്‍ പുരോഗതി കൈവരിക്കാൻ സഹായകമായി സ്വീകരിച്ചുവരുന്ന പ്രധാന നടപടികൾ എന്തെല്ലാമാണെന്ന് വ്യക്തമാക്കുമോ;

ഇതിനായി പുതുതായി എന്തെല്ലാം പദ്ധതികളാണ് ആവിഷ്ക്കരിക്കാൻ ഉദ്ദേശിക്കുന്നതെന്ന് വെളിപ്പെടുത്തുമോ?

കേരളത്തിലെ കടൽത്തീരങ്ങളിൽ മണൽഖനനം നടത്തുന്നതിനുള്ള കേന്ദ്രസർക്കാർ തീരുമാനം മത്സ്യത്തൊഴിലാളികളെ പ്രതികൂലമായി ബാധിക്കുന്നതിനെക്കുറിച്ച് സർക്കാരോ മറ്റ് സർക്കാർ ഏജൻസികളോ പഠനം നടത്തിയിട്ടുണ്ടെങ്കിൽ ആയതിന്റെ വിശദവിവരം ലഭ്യമാക്കാമോ?

മത്സ്യഫെഡിന്റെ അന്തിപ്പച്ച പദ്ധതിയുടെ പ്രവര്‍ത്തന പുരോഗതി വിശദമാക്കാമോ; ഇതുമായി ബന്ധപ്പെട്ട ക്രമക്കേടുകള്‍ സംബന്ധിച്ച് അന്വേഷണം പൂര്‍ത്തീകരിച്ചിട്ടുണ്ടോ; വിശദമാക്കാമോ?

കയ്പമംഗലം മണ്ഡലത്തില്‍ പുനര്‍ഗേഹം പദ്ധതിയില്‍ എത്ര ഗുണഭോക്താക്കള്‍ ഉണ്ട്; വ്യക്തമാക്കാമോ;

ഗുണഭോക്താക്കളുടെ ലിസ്റ്റില്‍ നിന്നും എത്ര ഗുണഭോക്താക്കള്‍ക്ക് ആനുകൂല്യം ലഭിച്ചിട്ടുണ്ടെന്ന് വിശദമാക്കാമോ;

പുനര്‍ഗേഹം പദ്ധതിയുടെ ലിസ്റ്റില്‍പെടാത്ത അര്‍ഹരായവരെ പ്രസ്തുത ലിസ്റ്റില്‍ ഉള്‍പ്പെടുത്തുന്നതിനാവശ്യമായ നടപടി സ്വീകരിക്കുമോ; വിശദമാക്കാമോ?

അഷ്ടമുടിക്കായലില്‍ മണ്ണടിഞ്ഞ് ആഴം കുറയുന്നതും കയ്യേറ്റവും നിമിത്തം മത്സ്യസമ്പത്തിന് കുറവ് വന്നിട്ടുള്ളതായി ശ്രദ്ധയില്‍പ്പെട്ടിട്ടുണ്ടോ; മത്സ്യബന്ധനത്തെ ആശ്രയിച്ച് കഴിയുന്ന തൊഴിലാളികള്‍ നേരിടുന്ന ബുദ്ധിമുട്ട് പരിഹരിക്കുന്നതിന് നടപടി സ്വീകരിക്കുമോ?

സംസ്ഥാനത്ത് മത്സ്യ മേഖലയില്‍ അനുബന്ധ തൊഴിലുകളില്‍ ഏര്‍പ്പെട്ട് ഉപജീവനം നയിക്കുന്ന തൊഴിലാളികളുടെ വിവര ശേഖരണം നടത്തിയിട്ടുണ്ടോ; ഇവരുടെ ക്ഷേമത്തിനായി പദ്ധതികള്‍ ആവിഷ്കരിച്ചിട്ടുണ്ടോ; വിശദമാക്കുമോ?

ആരോഗ്യ-വിദ്യാഭ്യാസ മേഖലകളിൽ മത്സ്യത്തൊഴിലാളി സമൂഹം പിന്നാക്കാവസ്ഥ നേരിടുന്നുവെന്ന ആക്ഷേപം പരിശോധിച്ചിട്ടുണ്ടോ;

ഈ പിന്നാക്കാവസ്ഥ പരിഹരിക്കുന്നതിനായി നടപ്പാക്കുന്ന പദ്ധതികൾ എന്തെല്ലാമാണെന്ന് വിശദമാക്കാമോ;

തീരദേശ മേഖലകളിൽ വീട്, ശുദ്ധജലം, വിദ്യാഭ്യാസം, തൊഴിൽ എന്നിവ ഉറപ്പുവരുത്താനായി നടപ്പിലാക്കിയ പദ്ധതികൾ എന്തെല്ലാമെന്ന് വിശദമാക്കുമോ?

ജനകീയ മത്സ്യകൃഷി പദ്ധതിയിൽ കോർഡിനേറ്റർമാരായി നിയമിക്കപ്പെട്ടവരുടെ വേതനം കുടിശ്ശിക ആയിട്ടുള്ളത് ഗൗരവത്തോടെ കാണുന്നുണ്ടോ; ഇത് അടിയന്തരമായി വിതരണം ചെയ്യുന്നതിന് നടപടി സ്വീകരിക്കുമോ;

പ്രസ്തുത പദ്ധതി പ്രകാരം മത്സ്യകർഷകർക്ക് ലഭിക്കേണ്ട സബ്സിഡി മുഴുവൻ വിതരണം ചെയ്തിട്ടുണ്ടോ; സബ്സിഡി വിതരണം ചെയ്യുന്നതിന് അടിയന്തര നടപടി സ്വീകരിക്കുമോ; വിശദമാക്കുമോ?

ഈ സർക്കാരിന്റെ കാലയളവിൽ ധനകാര്യ ഇൻസ്പെക്ഷൻ വിഭാഗം മത്സ്യബന്ധന വകുപ്പുമായി ബന്ധപ്പെട്ട് നടത്തിയ പരിശോധനകളുടെ പ്രധാന കണ്ടെത്തലുകൾ എന്തൊക്കെയാണെന്ന് അറിയിക്കാമോ;

ഇതിൽ മത്സ്യഫെഡുമായി ബന്ധപ്പെട്ട കണ്ടെത്തലുകൾ ഉണ്ടായിരുന്നോ; എങ്കിൽ അതിന്മേൽ നാളിതുവരെ വകുപ്പ് സ്വീകരിച്ച നടപടികൾ വിശദമാക്കുമോ?

മുനക്കക്കടവ് ഫിഷ് ലാന്റിംഗ് സെന്ററിന്റെ വിപുലീകരണത്തിനായി സ്ഥലം ഏറ്റെടുക്കുന്നതിനുവേണ്ടി സ്വീകരിച്ച നടപടികള്‍ വിശദമാക്കാമോ;

പ്രസ്തുത സെന്ററില്‍ അനുവദിച്ച ഫ്ലോട്ടിംഗ് ജെട്ടിയുടെ നിര്‍മ്മാണത്തിന്റെ നിലവിലെ സ്ഥിതി വ്യക്തമാക്കാമോ?

മഞ്ചേശ്വരം മത്സ്യബന്ധന തുറമുഖം പൂർണ തോതിൽ സജ്ജമാകാത്തത് ശ്രദ്ധയിൽപ്പെട്ടിട്ടുണ്ടോ;

പ്രസ്തുത തുറമുഖത്തിൽ നടപ്പിലാക്കാൻ ഉദ്ദേശിക്കുന്ന അടിസ്ഥാന ഭൗതിക സൗകര്യങ്ങളുടെ വിശദ വിവരങ്ങൾ ലഭ്യമാക്കുമോ;

പ്രസ്തുത പ്രവൃത്തികൾ എപ്പോൾ തുടങ്ങാൻ കഴിയുമെന്ന് വ്യക്തമാക്കുമോ?

അഴീക്കോട് മണ്ഡലത്തില്‍ മത്സ്യബന്ധന വകുപ്പിന്റെ കീഴില്‍ നടത്തുന്ന പ്രവൃത്തികള്‍ ഏതൊക്കെയാണെന്ന് അറിയിക്കാമോ;

പ്രസ്തുത പ്രവൃത്തികളുടെ നിലവിലെ സ്ഥിതി അറിയിക്കാമോ?

മത്സ്യത്തൊഴിലാളികള്‍ക്ക് മണ്ണെണ്ണ സബ്‌സിഡി ലഭ്യമാക്കുന്നുണ്ടോ; സബ്സിഡി ഇനത്തിൽ എത്ര മാസത്തെ കുടിശ്ശിക മത്സ്യത്തൊഴിലാളികൾക്ക് നൽകാനുണ്ടെന്ന് വ്യക്തമാക്കാമോ;

മത്സ്യഫെഡ് വഴി നല്‍കുന്ന മണ്ണെണ്ണ ആവശ്യത്തിന് ലഭിക്കുന്നില്ല എന്ന പരാതി ശ്രദ്ധയിൽപ്പെട്ടിട്ടുണ്ടോ; എങ്കിൽ ഇത് പരിഹരിക്കാൻ സ്വീകരിച്ച നടപടികൾ വിശദമാക്കാമോ;

മത്സ്യത്തൊഴിലാളികൾക്ക് അനുവദിക്കുന്ന മണ്ണെണ്ണയുടെ സബ്‌സിഡി ഉയർത്തി നൽകുന്നതിന് നടപടി സ്വീകരിക്കുമോ; വ്യക്തമാക്കുമോ?

കോതമംഗലം നിയോജകമണ്ഡലത്തിലെ കീരമ്പാറ ഗ്രാമപ്പഞ്ചായത്തിലെ കൂരിക്കുളം ഇക്കോ ഹാച്ചറിയുടെ നിര്‍മ്മാണവുമായി ബന്ധപ്പെട്ട് ഇതുവരെ പൂര്‍ത്തീകരിച്ച പ്രവൃത്തികള്‍ എന്തെല്ലാമെന്ന് വ്യക്തമാക്കാമോ;

എന്തെല്ലാം നിര്‍മ്മാണ പ്രവര്‍ത്തനങ്ങളാണ് ഇവിടെ നടന്നു വരുന്നത്; വിശദീകരിക്കാമോ;

പ്രസ്തുത ഇക്കോ ഹാച്ചറിയുടെ പ്രവര്‍ത്തനങ്ങള്‍ വിശദീകരിക്കാമോ;

പ്രസ്തുത ഹാച്ചറി പൊതുജനങ്ങള്‍ക്ക് ഉപയോഗപ്രദമായ രീതിയില്‍ പൂര്‍ണ്ണമായി പ്രവര്‍ത്തനസജ്ജമാക്കുന്നതിനാവശ്യമായ നടപടികള്‍ സ്വീകരിക്കുമോ; വ്യക്തമാക്കുമോ?

സംസ്ഥാനത്ത് എത്ര ഫിഷ് ഫാമുകള്‍ക്കാണ് കോസ്റ്റല്‍ അക്വകള്‍ച്ചര്‍ അതോറിറ്റി ലൈസന്‍സ് ലഭ്യമായിട്ടുള്ളതെന്ന് ജില്ല തിരിച്ച് ലഭ്യമാക്കാമോ;

സി.എ.എ. ലൈസന്‍സ് ലഭ്യമാക്കുന്നതിനുള്ള കാലതാമസം ഒഴിവാക്കുന്നതിന് എന്ത് നടപടിയാണ് സ്വീകരിച്ചിട്ടുള്ളത് വ്യക്തമാക്കാമോ;

സി.എ.എ. ലൈസന്‍സ് ഉള്ള എത്ര ഫാമുകളാണ് കേരളത്തില്‍ വനാമി ചെമ്മീന്‍ കൃഷി നടത്തി വരുന്നതെന്ന് ഫാം വിസ്തൃതി ഉള്‍പ്പെടെയുള്ള വിവരം ലഭ്യമാക്കുമോ ?

ഗുരുവായൂര്‍ നിയോജക മണ്ഡലത്തില്‍ എം.എല്‍.എയുടെ പ്രത്യേക വികസന ഫണ്ട് ഉപയോഗിച്ച് നടപ്പിലാക്കുന്ന അന്തിപ്പച്ച പദ്ധതിയുടെ നിലവിലെ സ്ഥിതി വിശദമാക്കാമോ;

പ്രസ്തുത പദ്ധതി എന്നത്തേക്ക് ആരംഭിക്കാന്‍ കഴിയുമെന്ന് വിശദമാക്കാമോ?

കല്ലാനോട് ഫിഷ് ഹാച്ചറിയില്‍ എത്ര മത്സ്യക്കുളങ്ങളാണ് നിലവിലുളളത്; ഇവിടെ പ്രതിവര്‍ഷം എത്ര മത്സ്യക്കുഞ്ഞുങ്ങളെ ഉല്പാദിപ്പിക്കുന്നുണ്ട്; വിശദമാക്കാമോ;

കല്ലാനോട് ഫിഷ് ഹാച്ചറിയുടെ രണ്ടാംഘട്ട വികസനപ്രവൃത്തിയുടെ പുരോഗതി അറിയിക്കാമോ; പ്രസ്തുത പ്രവൃത്തി എപ്പോള്‍ പൂര്‍ത്തീകരിക്കാന്‍ കഴിയും; എത്ര കോടി രൂപയുടെ പ്രവൃത്തിയാണ് നിലവില്‍ നടന്നുകൊണ്ടിരിക്കുന്നത്; വിശദമാക്കാമോ?

മത്സ്യസമ്പത്ത് വർദ്ധിപ്പിക്കുന്നതിന്റെ ഭാഗമായി ഗുണമേന്മയുളള മത്സ്യക്കുഞ്ഞുങ്ങളും മത്സ്യതീറ്റയും ലഭ്യമാക്കാൻ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നത്; വ്യക്തമാക്കുമോ;

മത്സ്യങ്ങളെ ബാധിക്കുന്ന രോഗങ്ങൾ കണ്ടെത്തുന്നതിനും രോഗവ്യാപനം തടയുന്നതിനും പദ്ധതികൾ ആവിഷ്ക്കരിച്ചിട്ടുണ്ടോ; വിശദമാക്കുമോ?

കുട്ടനാട്ടിലെ കായൽ പാടശേഖരങ്ങളിൽ കൂടുതൽ നാടൻ മത്സ്യ ലഭ്യത ഉറപ്പുവരുത്തുന്നതിന് സ്വീകരിച്ചിട്ടുള്ള നടപടികൾ എന്തെല്ലാമെന്ന് വ്യക്തമാക്കുമോ;

ഉൾനാടൻ മത്സ്യത്തൊഴിലാളികൾക്ക് നൽകിവരുന്ന വിവിധ സേവനങ്ങൾ കാലോചിതമായി പരിഷ്കരിക്കുന്നതിന് നടപടികൾ ഉണ്ടാകുമോ; എങ്കിൽ വിശദാംശം ലഭ്യമാക്കുമോ?

പാറശാല മണ്ഡലത്തിലെ ഏതെല്ലാം മത്സ്യ മാർക്കറ്റുകളാണ് ആധുനിക മത്സ്യ മാർക്കറ്റുകളായി ഉയർത്തുന്നതിന് തെരഞ്ഞെടുത്തിട്ടുള്ളതെന്ന് വ്യക്തമാക്കാമോ;

കിഫ്ബി ഫണ്ട് വിനിയോഗിച്ച് മത്സ്യ മാർക്കറ്റുകളെ ആധുനിക മത്സ്യ മാർക്കറ്റുകളായി ഉയർത്തുന്നതിന് നിശ്ചയിച്ചിട്ടുള്ള നിബന്ധനകൾ എന്തൊക്കെയാണ്; വിശദാംശം അറിയിക്കാമോ;

പനച്ചമൂട് മത്സ്യമാർക്കറ്റ് നവീകരണ പ്രവൃത്തിയുടെ പുരോഗതി അറിയിക്കാമോ; ഇതിന്റെ ഭാഗമായി എന്തൊക്കെ പ്രവൃത്തികളാണ് നടപ്പാക്കുന്നതെന്ന് അറിയിക്കാമോ; പ്രസ്തുത പ്രവൃത്തികള്‍ എന്നത്തേക്ക് ആരംഭിക്കാനാകുമെന്നും എന്നത്തേക്ക് പൂർത്തിയാക്കാനാകുമെന്നും അറിയിക്കാമോ?

കേന്ദ്രസർക്കാർ കേരള തീരങ്ങളിൽ നടത്തുന്നതിന് നിശ്ചയിച്ചിട്ടുള്ള ആഴക്കടൽ ഖനനത്തിനെതിരെ സംസ്ഥാനം കേന്ദ്രവുമായി ഏതൊക്കെ തരത്തിൽ എന്നൊക്കെയാണ് ആശയവിനിമയം നടത്തിയിട്ടുള്ളതെന്നും അവയുടെ പകർപ്പും ലഭ്യമാക്കുമോ;

അനന്തകാലമായി വരുമാന സ്രോതസ്സായി നിലകൊള്ളുന്നതും തുടർന്നും വരുമാന സ്രോതസ്സായി വളരെക്കാലം നിലനിർത്താൻ കഴിയുന്നതുമായ മത്സ്യ സമ്പത്തിനും സമുദ്രജീവ ആവാസവ്യവസ്ഥയ്ക്കും കടുത്ത ആഘാതം ഏൽപ്പിക്കുന്നതും ദീർഘകാല ഫലം പരിശോധിച്ചാൽ ആഴക്കടൽ ഖനനം കൊണ്ടുണ്ടാകുന്ന വരുമാനത്തെ മറികടക്കാൻ കഴിയുന്നതാണ് മത്സ്യസമ്പത്തിൽ നിന്നുള്ള വരുമാനം എന്നും കരുതുന്നുണ്ടോ;

എങ്കിൽ ആഴക്കടൽ ഖനനം കൊണ്ടുണ്ടാകാൻ ഇടയുള്ള പരിസ്ഥിതി ആഘാതം ശാസ്ത്രീയമായി പഠിക്കുന്നതിനും പഠന റിപ്പോർട്ട് യുദ്ധകാലാടിസ്ഥാനത്തിൽ തയ്യാറാക്കി കേന്ദ്രസർക്കാരിന് സമർപ്പിക്കുന്നതിനും നടപടി സ്വീകരിക്കുമോ?

ആലപ്പുഴ മണ്ഡലത്തില്‍ കടല്‍ ക്ഷോഭത്തിലും മറ്റും തകര്‍ന്ന മത്സ്യബന്ധനയാനങ്ങളുടെ നഷ്ടപരിഹാരത്തിനായി എത്ര പേര്‍ അപേക്ഷ സമര്‍പ്പിച്ചിട്ടുണ്ട്; വിശദാംശം ലഭ്യമാക്കാമോ;

പ്രസ്തുത അപേക്ഷകളിന്‍മേല്‍ സ്വീകരിച്ച നടപടി വിശദമാക്കാമോ; നഷ്ടപരിഹാരം എപ്പോള്‍ ലഭ്യമാക്കാന്‍ സാധിക്കുമെന്ന് വ്യക്തമാക്കാമോ?

പുനര്‍ഗേഹം പദ്ധതിയുടെ പ്രാരംഭത്തില്‍ ഉണ്ടായിരുന്ന നിര്‍വ്വഹണ മാര്‍ഗ്ഗനിര്‍ദ്ദേശം, അര്‍ഹതാ മാനദണ്ഡങ്ങള്‍ എന്നിവയില്‍ എന്തെല്ലാം ഭേദഗതികളാണ് കൊണ്ടുവന്നിട്ടുള്ളത്;

ആയവ നടപ്പാക്കുമ്പോള്‍ വന്ന മാറ്റങ്ങള്‍ വ്യക്തമാക്കാമോ?

വർക്കല മണ്ഡലത്തിൽ തീരദേശ റോഡുകളുടെ നിലവാരമുയർത്തുന്നതിന് മുൻ സർക്കാരിന്റേയും, നിലവിലെ സർക്കാരിന്റേയും കാലവയളവുകളിൽ ഹാർബർ എഞ്ചിനിയറിംഗ് വകുപ്പ് മുഖേന എത്ര പ്രവൃത്തികൾക്ക് ഭരണാനുമതി നൽകിയിട്ടുണ്ടെന്നും പ്രസ്തുത പ്രവൃത്തികളുടെ നിലവിലെ പുരോഗതിയും വിശദമാക്കാമോ;

ഭരണാനുമതി ലഭിച്ച എത്ര പ്രവൃത്തികൾക്ക് സാങ്കേതികാനുമതി നൽകി ടെണ്ടർ ചെയ്യുവാനുണ്ടെന്ന് വിശദമാക്കാമോ;

സാങ്കേതികാനുമതി നൽകി ടെണ്ടർ ചെയ്യുവാൻ പ്രവൃത്തികളുണ്ടെങ്കിൽ അതിനുവേണ്ട അടിയന്തര നടപടികൾ സ്വീകരിക്കുമോ?

മുതലപ്പൊഴി ഹാര്‍ബറിൽ അപകടങ്ങള്‍ ഒഴിവാക്കുന്നതിന് സ്വീകരിച്ചിട്ടുളള നടപടി വിശദമാക്കാമോ;

മുതലപ്പൊഴിയില്‍ അടിഞ്ഞുകൂടിയിട്ടുളള മണ്ണ് യഥാസമയം മാറ്റുന്നതിന് സ്വീകരിച്ചിട്ടുളള നടപടി വ്യക്തമാക്കാമോ?

അപകടങ്ങൾ പതിവായ മുതലപ്പൊഴി അഴിമുഖത്ത് മണ്ണ് അടിഞ്ഞുകൂടിയ സാഹചര്യം ശ്രദ്ധയിൽപ്പെട്ടിട്ടുണ്ടോ;

എങ്കില്‍ അടിഞ്ഞു കൂടിയ മണ്ണ് നീക്കം ചെയ്യാൻ നടപടികൾ സ്വീകരിക്കാത്തതിന്റെ കാരണം വിശദമാക്കാമോ;

മുതലപ്പൊഴി അഴിമുഖത്ത് അടിഞ്ഞുകൂടിയ മണ്ണ് നീക്കം ചെയ്യാൻ അടിയന്തര നടപടികൾ സ്വീകരിക്കുമോ?

കണ്ണൂര്‍ ജില്ലയിലെ കല്ല്യാശ്ശേരി മണ്ഡലത്തില്‍ ഹാര്‍ബര്‍ എഞ്ചിനീയറിംഗ് വകുപ്പ് മുഖേന നിര്‍മ്മാണം നടന്നുകൊണ്ടിരിക്കുന്ന തീരദേശ റാേഡുകളുടെ വിശദാംശം ലഭ്യമാക്കാമാേ;

മണ്ഡലത്തിലെ ഏതാെക്കെ തീരദേശ റാേഡുകളുടെ വിശദമായ എസ്റ്റിമേറ്റുകളാണ് ഭരണാനുമതിക്കായി സമര്‍പ്പിച്ചിട്ടുള്ളത്; അവയുടെ നിലവിലെ സ്ഥിതി അറിയിക്കാമാേ?

കൊയിലാണ്ടി ഹാർബറിലേക്കുള്ള പ്രധാന ഗതാഗത മാർഗ്ഗമായ കൊയിലാണ്ടി-കാപ്പാട് റോഡ് പുതുക്കി പണിയുന്നതിനാവശ്യമായ നടപടികൾ സ്വീകരിക്കാത്തത് ശ്രദ്ധയിൽപ്പെട്ടിട്ടുണ്ടോ;

പ്രസ്തുത റോഡ് പുതുക്കി പണിയുന്നതിന് ആവശ്യമായ നടപടികൾ സ്വീകരിക്കുമോ; വിശദമാക്കാമോ?

മാവേലിക്കര വള്ളിക്കുന്നം ഗ്രാമപഞ്ചായത്തിലെ കാണിപ്പുഴ-പള്ളിമുക്ക് റോഡിന്റെ നിര്‍മ്മാണത്തിനായി മത്സ്യബന്ധന വകുപ്പ് സ്വീകരിച്ച നടപടികള്‍ വിശദമാക്കുമോ?

കണ്ണൂര്‍ ജില്ലയിലെ പയ്യന്നൂരില്‍ പ്രവര്‍ത്തിച്ചുവരുന്ന ഫിഷറീസ് കോളേജിന് പുതിയ കെട്ടിടം നിര്‍മ്മിക്കുന്നതിനുള്ള നടപടികള്‍ ഏത് ഘട്ടത്തിലാണെന്ന് വ്യക്തമാക്കാമോ;

കെട്ടിട നിര്‍മ്മാണത്തിന് തുക വകയിരുത്തിയിട്ടുണ്ടോ; എങ്കിൽ അറിയിക്കാമോ?

കണ്ണൂര്‍ ജില്ലയില്‍ സാംസ്കാരിക വകുപ്പിന്റെ കീഴില്‍ നടക്കുന്ന പ്രവൃത്തികളുടെ വിശദാംശം നല്‍കാമോ;

പ്രസ്തുത പ്രവൃത്തികളുടെ ഓരോന്നിന്റെയും നിലവിലെ സ്ഥിതി സംബന്ധിച്ച വിവരം അറിയിക്കാമോ?

ഈ സര്‍ക്കാര്‍ അധികാരത്തില്‍ വന്ന ശേഷം സാംസ്കാരിക വകുപ്പ് കോട്ടയം ജില്ലയില്‍ നടപ്പിലാക്കിയിട്ടുള്ള പ്രവൃത്തികൾ എന്തെല്ലാമാണെന്ന് വ്യക്തമാക്കുമോ;

ഏതെല്ലാം പ്രവൃത്തികള്‍ക്കാണ് തുക അനുവദിച്ചതെന്നും ആയതില്‍ എത്ര തുക ചെലവഴിച്ചുവെന്നും മണ്ഡലം തിരിച്ച് വ്യക്തമാക്കുമോ; ഉത്തരവുകളുടെ പകര്‍പ്പ് ലഭ്യമാക്കുമോ?

അഴീക്കോട് മണ്ഡലത്തില്‍ ബഡ്ജറ്റ് ഫണ്ടില്‍ അനുവദിച്ചിട്ടുള്ള ചെറുശ്ശേരി സ്മാരക നിര്‍മ്മാണ പ്രവൃത്തിയുടെ നിലവിലെ സ്ഥിതി അറിയിക്കാമോ;

പ്രസ്തുത പ്രവൃത്തിയ്ക്ക് ഭരണാനുമതി ലഭ്യമായിട്ടുണ്ടോ; വിശദാംശം നല്‍കാമോ;

ഈ പ്രവൃത്തിയ്ക്ക് ഭരണാനുമതി നല്‍കുന്നതിന് കാലതാമസം ഉണ്ടാകുന്നത് ശ്രദ്ധയില്‍പ്പെട്ടിട്ടുണ്ടോ; ഭരണാനുമതി ത്വരിതഗതിയില്‍ ലഭ്യമാക്കുന്നതിന് നാളിതുവരെ എന്തെങ്കിലും നടപടികള്‍ സ്വീകരിച്ചിട്ടുണ്ടോ?

പട്ടാമ്പി മണ്ഡലത്തില്‍ ഉള്‍പ്പെടുന്ന രായിരനെല്ലൂര്‍ തീര്‍ത്ഥാടന കേന്ദ്രം സംരക്ഷിക്കുന്നതിന് സംസ്കാരിക വകുപ്പ് നടപടി സ്വീകരിച്ചിട്ടുണ്ടോ; ഇല്ലെങ്കില്‍ ആയതിന് നടപടി സ്വീകരിക്കുമോയെന്ന് വ്യക്തമാക്കാമോ?

കോഴിക്കോട് ജില്ലയിലെ ഒളവണ്ണ ഗ്രാമപഞ്ചായത്തിലെ വൈക്കം മുഹമ്മദ് ബഷീര്‍ സ്മാരകം ഉള്‍പ്പെടെയുള്ള ഷാര്‍ജ പ്രോജക്ട് പദ്ധതി നടപ്പിലാക്കുന്നതിന് സ്ഥലം ഏറ്റെടുക്കാന്‍ തീരുമാനമെടുത്തിരുന്നോ; വ്യക്തമാക്കുമോ;

ഈ പദ്ധതിയുടെ നിലവിലെ സ്ഥിതി സംബന്ധിച്ച വിശദാംശം ലഭ്യമാക്കാമോ?

നവോത്ഥാന നായകരുടെ പേരില്‍ ജില്ലകളില്‍ നവോത്ഥാന കേന്ദ്രങ്ങള്‍ ആരംഭിക്കുന്ന പദ്ധതി പ്രകാരം പാലക്കാട് ജില്ലയില്‍ എവിടെയാണ് നവോത്ഥാന കേന്ദ്രം ആരംഭിക്കുന്നതിന് നടപടി സ്വീകരിച്ചിട്ടുള്ളതെന്ന് അറിയിക്കാമോ; വിശദമാക്കാമോ?

ജി.ഒ.(പി)നം. 29/2011/സി.എല്‍.എ.ഡി തീയതി 01-03-2011 പ്രകാരം കേരള കലാമണ്ഡലത്തിൽ 15 വർഷത്തെ സേവനം പൂർത്തിയാക്കിയ 33 അധ്യാപകരുടെ യു.ജി.സി. ശമ്പള പരിഷ്കരണം നടപ്പിലാക്കിയതില്‍ അപാകതകൾ ഉണ്ടെന്ന് ഫോറം ഓഫ് കലാമണ്ഡലം യൂണിവേഴ്സിറ്റി റിട്ടയേര്‍ഡ് ടീച്ചേഴ്സ് (എഫ്.കെ.യു.ആര്‍.റ്റി) എന്ന സംഘടന നൽകിയ പരാതി ശ്രദ്ധയിൽപ്പെട്ടിട്ടുണ്ടോ;

യു.ജി.സി. ശമ്പള പരിഷ്കരണം ബാധകമായവർക്ക് യഥാസമയം അപാകതകളില്ലാതെ ശമ്പള പരിഷ്കരണം ലഭ്യമാകാത്തതിനാൽ കലാമണ്ഡലത്തിലെ തന്നെ സംസ്ഥാന സർക്കാറിന്റെ ശമ്പള പരിഷ്കരണ ആനുകൂല്യങ്ങൾ ലഭിച്ച ക്ലാസ് 4 ജീവനക്കാർക്ക് ലഭിച്ച ഡി.സി.ആര്‍.ജി, പെൻഷൻ കമ്മ്യൂട്ടേഷൻ ആനുകൂല്യങ്ങളുടെ പകുതി പോലും മേല്‍പ്പറഞ്ഞ യു.ജി.സി. അധ്യാപകർക്ക് റിട്ടയര്‍മെന്റ് സമയത്ത് ലഭിച്ചില്ല എന്ന പരാതി പരിശോധിച്ച് ഇത് സംബന്ധിച്ച അപാകതകള്‍ അടിയന്തരമായി പരിഹരിക്കുന്നതിന് നടപടികള്‍ സ്വീകരിക്കുമോ; വിശദാംശം ലഭ്യമാക്കാമോ?

തരൂര്‍ മണ്ഡലത്തിലെ കാവശ്ശേരി ഗ്രാമപഞ്ചായത്തിലെ ഇന്ദുചൂഡന്‍ സ്മാരക സാംസ്കാരിക നിലയത്തിന്റെ പ്രവൃത്തി ഏത് ഘട്ടത്തിലാണെന്ന് അറിയിക്കാമോ?

ഒറ്റപ്പാലം മണ്ഡലത്തിലെ ലക്കിടി കുഞ്ചന്‍ നമ്പ്യാര്‍ സ്മാരകത്തിനായി സാംസ്കാരിക വകുപ്പ് തുക അനുവദിച്ചിട്ടുള്ള ഏതെല്ലാം പ്രവൃത്തികള്‍ നിലവിലുണ്ടെന്ന് വ്യക്തമാക്കുമോ; പ്രസ്തുത പ്രവൃത്തികളുടെ നിലവിലെ സ്ഥിതി വിശദമാക്കാമോ?

സാംസ്കാരിക ക്ഷേമനിധി ബോര്‍ഡ് നല്‍കിവരുന്ന പെന്‍ഷന്‍ എത്രയാണെന്നും ഈ പെന്‍ഷന്‍ എത്രപേര്‍ക്ക് നല്‍കുന്നുണ്ടെന്നും അറിയിക്കാമോ;

പ്രസ്തുത പെന്‍ഷനുവേണ്ടി പുതിയതായി എത്ര അപേക്ഷകള്‍ ലഭിച്ചിട്ടുണ്ടെന്ന് അറിയിക്കാമോ?

സിനിമകൾ കാണുന്നതിന് സെൻസർ ബോർഡിന്റെ സർട്ടിഫിക്കറ്റിൽ നിഷ്കർഷിക്കുന്ന പ്രായപരിധി മാനദണ്ഡം തീയേറ്ററുകൾ പാലിക്കുന്നുണ്ടോയെന്ന് പരിശോധിക്കുന്നതിന് സംവിധാനമുണ്ടോ;

പ്രസ്തുത സംവിധാനം നിലവിലില്ലെങ്കിൽ ആയത് നടപ്പിലാക്കുമോയെന്ന് അറിയിക്കാമോ?

വയലൻസ് പ്രമേയമാക്കിയുള്ളതും പല രംഗങ്ങളിലും ലഹരി ഉപയോഗിക്കുന്നതുമായുള്ള ചലച്ചിത്രങ്ങള്‍ യുവാക്കളിലും കുട്ടികളിലും ആക്രമണോത്സുകതയ്ക്കും ലഹരി ഉപയോഗിക്കുന്നതിനും പ്രചോദനമാകുന്നുവെന്ന സാമൂഹിക വിമർശനം ശ്രദ്ധയിൽപ്പെട്ടിട്ടുണ്ടോ;

കുട്ടികളെയും യുവാക്കളെയും സ്വാധീനിക്കുന്ന വിധത്തിലുള്ള ഇത്തരം സീനുകൾ സിനിമകളിൽ നിന്നും നീക്കം ചെയ്യുന്നതിന് സെൻസർ ബോർഡുകൾക്ക് നിർദ്ദേശം നൽകുമോ; വ്യക്തമാക്കുമോ;

ഇത്തരം രംഗങ്ങൾ സ്വമേധയാ നീക്കുന്നതിനും ഭാവിയിൽ ഇത്തരം ദൃശ്യങ്ങളുള്ള ചലച്ചിത്രങ്ങൾക്ക് പ്രാധാന്യം നൽകാതിരിക്കാനും ചലച്ചിത്ര മേഖലയിലെ വിവിധ സംഘടനകളുമായി ചർച്ച ചെയ്യുന്നതിന് നടപടി സ്വീകരിക്കുമോ?

സമൂഹത്തിൽ വർദ്ധിച്ചു വരുന്ന ലഹരി മരുന്ന് ഉപയോഗത്തിനും അക്രമങ്ങൾക്കും ചില സിനിമകൾ പ്രചോദനമാണെന്നുള്ള ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ പ്രസ്തുത വിഷയത്തിൽ സര്‍ക്കാരിന്റെ നിലപാട് വ്യക്തമാക്കാമോ;

സിനിമകളില്‍ കണ്ടുവരുന്ന ലഹരി ഉപയോഗവും വയലന്‍സ് ദൃശ്യങ്ങളും നിയന്ത്രിക്കുന്നതിന് എന്തെങ്കിലും നടപടി സ്വീകരിക്കാന്‍ ഉദ്ദേശിക്കുന്നുണ്ടോ; എങ്കിൽ വിശദമാക്കാമോ?

ഈ സര്‍ക്കാര്‍ അധികാരത്തിൽ വന്നതിനുശേഷം ഏറനാട് മണ്ഡലത്തില്‍ യുവജനകാര്യ വകുപ്പും യുവജന ക്ഷേമ ബോര്‍ഡും എന്തെല്ലാം പദ്ധതികളാണ് നടപ്പിലാക്കിയിട്ടുള്ളതെന്ന് വിശദമാക്കുമോ;

പ്രസ്തുത പദ്ധതികളുടെ നിലവിലെ സ്ഥിതി വ്യക്തമാക്കുമോ;

പ്രസ്തുത മണ്ഡലത്തില്‍ പുതിയതായി നടപ്പിലാക്കുവാന്‍ ഉദ്ദേശിക്കുന്ന പദ്ധതികളുടെ വിശദാംശം ലഭ്യമാക്കുമോ?

മുന്‍ സർക്കാരിന്റെയും ഈ സർക്കാരിന്റെയും കാലത്ത് കേരള സംസ്ഥാന യുവജന ക്ഷേമ ബോർഡിൽ നിന്നും സെവൻ സ്റ്റാർ ഗ്രാഫിക്, അഴകത്ത് വീട്, വേങ്കവിള, പഴകുറ്റി പി.ഒ., നെടുമങ്ങാട് എന്ന സ്ഥാപനത്തിന് വിവിധ കരാറുകളിലും കോണ്‍ട്രാക്ട് വര്‍ക്കുകളിലുമായി ആകെ എത്ര രൂപ അനുവദിച്ചു നല്‍കിയിട്ടുണ്ടെന്നുള്ള വിവരം ഇനം, തീയതി, തുക എന്നിവ തിരിച്ച് ലഭ്യമാക്കുമോ;

പ്രസ്തുത സ്ഥാപനത്തിന് കേരള സംസ്ഥാന യുവജനക്ഷേമ ബോർഡിൽ നിന്നും വർക്കുകൾ/കോൺട്രാക്ടുകൾ/കരാറുകൾ എന്നിവ നൽകിയത് സ്റ്റോർ പർച്ചേസ്/കേരള ഫിനാൻഷ്യൽ കോഡ് എന്നീ ചട്ടങ്ങള്‍ പ്രകാരമുള്ള എല്ലാ നടപടിക്രമങ്ങളും പാലിച്ചാണോയെന്ന് അറിയിക്കാമോ;

പ്രസ്തുത സ്ഥാപനത്തിന് യുവജനക്ഷേമ ബോർഡിൽ നിന്നും വിവിധ കരാറുകളും വർക്കുകളും മറ്റും നൽകിയത് ഇവരുടെ മുൻപരിചയം കണക്കിലെടുത്താണോയെന്ന് അറിയിക്കാമോ; അല്ലെങ്കിൽ എന്ത് മാനദണ്ഡങ്ങളുടെ അടിസ്ഥാനത്തിലാണ് വർക്കുകൾ നൽകിയിട്ടുള്ളതെന്ന് അറിയിക്കാമോ?

മുൻ സർക്കാരിന്റെ കാലം മുതൽ നാളിതുവരെ യുവജനകമ്മീഷന്റെ പ്രവര്‍ത്തനങ്ങള്‍ക്കായി അനുവദിച്ച തുക സാമ്പത്തിക വര്‍ഷാടിസ്ഥാനത്തില്‍ ലഭ്യമാക്കുമോ; ഇതില്‍ ശമ്പളം, മറ്റു പദ്ധതികള്‍ എന്നിങ്ങനെ ഓരോ വര്‍ഷവും കമ്മീഷന്‍ ചെലവഴിച്ച തുക എത്രയാണെന്ന് ഇനം തിരിച്ച് ലഭ്യമാക്കുമോ?

യുവജനങ്ങൾ ലഹരിയിലേക്കും അമിത മദ്യപാനത്തിലേക്കും തിരിയുന്നതിന്റെ കാരണം യുവജനകാര്യ വകുപ്പ് പരിശോധനാ വിധേയമാക്കിയിട്ടുണ്ടോ;

യുവജനങ്ങൾക്കിടയിൽ ലഹരി വ്യാപനം തടയുന്നതിന്റെ ഭാഗമായി നടത്തുന്ന ഇടപെടൽ എന്തൊക്കെയാണെന്നും ഇവ കാര്യക്ഷമമാണോയെന്നും വ്യക്തമാക്കുമോ;

യുവജനങ്ങൾക്കിടയിൽ ലഹരി വ്യാപനം വർദ്ധിക്കുന്നത് തടയാനായി വകുപ്പ് സ്വീകരിക്കാനുദ്ദേശിക്കുന്ന നടപടികൾ വിശദമാക്കാമോ?

സംസ്ഥാനത്ത് യുവാക്കൾ നടത്തുന്ന ക്രൂരമായ അതിക്രമങ്ങൾ വർധിക്കുന്നത് യുവജനകാര്യ വകുപ്പിന്റെ ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

യുവാക്കളുടെ ഇടയിൽ കുറ്റകൃത്യങ്ങൾ വർധിക്കുന്നത് തടയാൻ മറ്റു വകുപ്പുകളുമായി ചേർന്ന് യുവജനകാര്യ വകുപ്പ് കർമ്മ പരിപാടികൾ ആവിഷ്കരിച്ചു നടപ്പിലാക്കുമോ; വിശദമാക്കുമോ?

കേരള സംസ്ഥാന യുവജനക്ഷേമ ബോർഡിൽ നിന്നും പുറത്തിറക്കിയിരുന്ന യുവത മാസികയുമായി ബന്ധപ്പെട്ട് ബോർഡിലെ ഒരു ജീവനക്കാരൻ ബിനാമി സ്ഥാപനം വഴി സാമ്പത്തിക ക്രമക്കേട് നടത്തിയതായുള്ള ആരോപണം ശ്രദ്ധയിൽപ്പെടുകയോ ആയത് സംബന്ധിച്ച് പരാതി ലഭിക്കുകയോ ചെയ്തിട്ടുണ്ടോ; എങ്കിൽ ആയതിന്മേൽ എന്തെല്ലാം നടപടികൾ സ്വീകരിച്ചു എന്നറിയിക്കാമോ;

ഇതുമായി ബന്ധപ്പെട്ട് എന്തെങ്കിലും അന്വേഷണം നടത്തിയിട്ടുണ്ടോ; ഇല്ലെങ്കിൽ കാരണം വ്യക്തമാക്കാമോ;

പ്രസ്തുത സംഭവവുമായി ബന്ധപ്പെട്ട് വിജിലൻസിൽ നിന്നും എന്തെങ്കിലും നിർദ്ദേശം ലഭിച്ചിട്ടുണ്ടോ; എങ്കിൽ പ്രസ്തുത നിർദ്ദേശത്തിന്മേൽ സ്വീകരിച്ച നടപടി റിപ്പോർട്ടുകളുടെ പകർപ്പ് ലഭ്യമാക്കാമോ?

യുവജന കമ്മീഷന്റെ ഉദ്ദേശ്യലക്ഷ്യങ്ങൾ വ്യക്തമാക്കുമോ;

യുവജനങ്ങൾക്കിടയിൽ വർദ്ധിച്ചുവരുന്ന ലഹരി ഉപയോഗം, മാനസിക സംഘർഷം, അതിക്രമങ്ങൾ എന്നിവ നിയന്ത്രിക്കുന്നതിനായി കമ്മീഷൻ നടത്തുന്ന ഇടപെടലുകൾ വിശദമാക്കുമോ;

കമ്മീഷന്റെ പ്രവർത്തനങ്ങള്‍ കാര്യക്ഷമമാക്കാനായി സ്വീകരിക്കാനുദ്ദേശിക്കുന്ന നടപടികൾ അറിയിക്കുമോ?

ഈ സർക്കാർ യുവജനങ്ങൾക്കായി തൊഴിൽ സംരംഭക പദ്ധതികൾ നടപ്പിലാക്കിയിട്ടുണ്ടോ; എങ്കിൽ വിശദമാക്കാമോ;

യുവജനങ്ങളുടെ ഉന്നമനത്തിനായി എന്തൊക്കെ സെമിനാറുകൾ നടത്തിയിട്ടുണ്ടെന്ന് വ്യക്തമാക്കാമോ?

സംസ്ഥാനത്ത് യുവജനങ്ങൾക്കും വിദ്യാർത്ഥികൾക്കുമിടയിൽ വർദ്ധിച്ചുവരുന്ന മയക്കുമരുന്ന് ഉപയോഗം തടയാൻ യുവജനക്ഷേമ വകുപ്പ് സ്വീകരിച്ചുവരുന്ന നടപടികൾ എന്തെല്ലാമാണെന്ന് വ്യക്തമാക്കുമോ;

ലഹരി വസ്തുക്കളുടെ വർദ്ധിച്ചുവരുന്ന ഉപയോഗം മൂലം സമൂഹത്തിലുണ്ടാകുന്ന അരക്ഷിതാവസ്ഥ മാറ്റുന്നതിനായി യുവജന സംഘടനകളെ ശക്തിപ്പെടുത്തുന്നതിന് എന്തെല്ലാം നടപടികൾ സ്വീകരിക്കുമെന്ന് വ്യക്തമാക്കുമോ;

മയക്കുമരുന്ന് ഉപയോഗം പോലുള്ള സാമൂഹ്യവിപത്തുകള്‍ക്കെതിരെ വാർഡുകൾ കേന്ദ്രീകരിച്ച് യുവജന ജാഗ്രതാ സമിതികൾ രൂപീകരിക്കാൻ നടപടി സ്വീകരിക്കുമോ; എങ്കിൽ വിശദാംശം ലഭ്യമാക്കുമോ?