സംസ്ഥാനത്തിന്റെ തീരദേശ വേലിയേറ്റ മേഖലയില്‍ നിന്നും അന്‍പത് മീറ്റര്‍ പരിധിയ്ക്കുള്ളില്‍ അധിവസിക്കുന്ന മുഴുവന്‍ ജനവിഭാഗങ്ങളെയും സുരക്ഷിതമേഖലയില്‍ പുനരധിവസിപ്പിക്കുന്ന പുനര്‍ഗേഹം പദ്ധതിയുടെ വിശദാംശം ലഭ്യമാക്കാമോ;

പ്രസ്തുത പുനരധിവാസ പദ്ധതിയില്‍ ഉള്‍പ്പെടുത്തി ഇതുവരെ എത്ര വീടുകള്‍ പൂര്‍ത്തീകരിച്ച് നല്‍കിയിട്ടുണ്ടെന്നും അതിനായി ചെലവഴിച്ച തുകയുടെയും വിശദാംശം ലഭ്യമാക്കുമോ;

പദ്ധതിയിലേക്കുള്ള ഗുണഭോക്താക്കളെ കണ്ടെത്തുന്നതിനും പദ്ധതിയ്ക്കാവശ്യമായ സ്ഥലം കണ്ടെത്തുന്നതിനും നിലവില്‍ സ്വീകരിച്ചിട്ടുള്ള നടപടിക്രമങ്ങള്‍ എന്തെല്ലാമെന്ന് അറിയിക്കുമോ;

തീരദേശ ജനതയുടെ സമഗ്രമായ വികസനത്തിനുതകുന്ന പദ്ധതിയെന്ന നിലയില്‍ പുനര്‍ഗേഹം പദ്ധതി കൂടുതല്‍ വ്യാപിപ്പിക്കുന്നതിന് ഉദ്ദേശിക്കുന്നുണ്ടോ; എങ്കില്‍ വിശദമാക്കുമോ?

സംസ്ഥാനത്ത് വിദ്യാഭ്യാസത്തിലൂടെ സാമൂഹിക മുന്നേറ്റം കൈവരിക്കുക എന്ന ലക്ഷ്യം മുന്‍നിര്‍ത്തി പട്ടികജാതി വിദ്യാര്‍ത്ഥികളുടെ വിദ്യാഭ്യാസത്തെ പ്രോത്സാഹിപ്പിക്കുന്നതിന് എന്തെല്ലാം പദ്ധതികള്‍ നടപ്പിലാക്കിയിട്ടുണ്ടെന്ന് വിശദമാക്കാമോ;

പൊതു പരീക്ഷകളില്‍ മികവാര്‍ന്ന വിജയം കരസ്ഥമാക്കിയ പട്ടികജാതി വിദ്യാര്‍ത്ഥികള്‍ക്ക് വകുപ്പ് നടപ്പിലാക്കി വരുന്ന പ്രോത്സാഹന സമ്മാനം ലഭിക്കുന്നതിനായി എത്ര അപേക്ഷകള്‍ ലഭിച്ചിട്ടുണ്ട്;

പ്രസ്തുത അപേക്ഷകളിന്മേല്‍ നടപടി സ്വീകരിച്ചിട്ടുണ്ടോ; എങ്കില്‍ വ്യക്തമാക്കാമോ?

പ്രൊഫഷണല്‍ വിദ്യാഭ്യാസ യോഗ്യതയുള്ള പട്ടികജാതി/പട്ടികവര്‍ഗ്ഗ വിഭാഗത്തില്‍പ്പെട്ട യുവതീ യുവാക്കളുടെ മികച്ച ഭാവിയ്ക്കായി രൂപം നല്‍കിയ ട്രേസ് പദ്ധതിയുടെ വിശദാംശം ലഭ്യമാക്കാമോ;

ഇതുവരെയായി എത്ര പേര്‍ ഈ പദ്ധതിയുടെ ഗുണഭോക്താക്കളായി മാറിയെന്ന് വ്യക്തമാക്കാമോ;

പ്രസ്തുത പദ്ധതിയുടെ പ്രവര്‍ത്തനങ്ങള്‍ കൂടുതല്‍ വിപുലീകരിക്കാന്‍ ഉദ്ദേശിക്കുന്നുണ്ടോ; വിശദമാക്കാമോ?

സംസ്ഥാനത്തെ തീരദേശത്ത് വേലിയേറ്റ രേഖയില്‍ നിന്നും അന്‍പത് മീറ്റര്‍ പരിധിയ്ക്കുള്ളില്‍ കടലാക്രമണ ഭീഷണിയില്‍ കഴിയുന്ന മുഴുവന്‍ ജനവിഭാഗങ്ങളെയും സുരക്ഷിത മേഖലയില്‍ പുനരധിവസിപ്പിക്കുന്നതിനുള്ള പുനര്‍ഗേഹം പദ്ധതി ഉദ്ദേശിച്ച ലക്ഷ്യം കൈവരിച്ചിട്ടുണ്ടോയെന്ന് വ്യക്തമാക്കാമോ;

പ്രസ്തുത പദ്ധതിയുടെ കീഴില്‍ എത്ര വീടുകള്‍ നാളിതുവരെ പൂര്‍ത്തിയാക്കിയിട്ടുണ്ടെന്നും എത്രയെണ്ണം ഇനിയും നിര്‍മ്മിക്കാന്‍ ഉദ്ദേശിക്കുന്നുണ്ടെന്നും വ്യക്തമാക്കാമോ;

പുനര്‍ഗേഹം പദ്ധതിയില്‍ ഭേദഗതി ആവശ്യമാണെന്ന് കരുതുന്നുണ്ടോ; എങ്കില്‍ വിശദമാക്കാമോ;

പ്രസ്തുത പദ്ധതി വഴി പുനരധിവസിക്കപ്പെടുന്നവര്‍ക്ക് വീടിന് പുറമെ മറ്റെന്തെങ്കിലും നഷ്ടപരിഹാരം നല്‍കുവാന്‍ ഉദ്ദേശിക്കുന്നുണ്ടോ; എങ്കില്‍ വിശദമാക്കാമോ?

പാര്‍ലമെന്ററി ജനാധിപത്യത്തിന്റെ മൂല്യങ്ങള്‍ യുവതലമുറയ്ക്ക് പകര്‍ന്ന് നല്‍കുന്നതിന് സ്കൂള്‍, കോളേജ് തലങ്ങളില്‍ ഫോറം ഫോര്‍ ഡെമോക്രസി ആന്റ് സോഷ്യല്‍ ജസ്റ്റിസ് (എഫ്.ഡി.എസ്.ജെ.) രൂപീകരിച്ചിട്ടുണ്ടോ; വ്യക്തമാക്കാമോ;

എഫ്.ഡി.എസ്.ജെ.-ന്റെ നേതൃത്വത്തില്‍ എന്തൊക്കെ പ്രവര്‍ത്തനങ്ങളാണ് നടന്നുവരുന്നതെന്ന് വിശദമാക്കാമോ;

സ്റ്റുഡന്റ് സഭയുടെ പ്രവര്‍ത്തനങ്ങളുടെ വിശദാംശം ലഭ്യമാക്കുമോ?

ഓരുജലം, തണ്ണീര്‍ത്തടങ്ങള്‍, കായലുകള്‍ എന്നിവയില്‍ ചെമ്മീന്‍ കൃഷി ചെയ്യുന്നതിന് നിലവില്‍ തടസ്സങ്ങള്‍ ഉള്ളതായി ശ്രദ്ധയില്‍പ്പെട്ടിട്ടുണ്ടോ; എങ്കിൽ വിശദമാക്കാമോ;

ഒരു നെല്ലും ഒരു മീനും പദ്ധതി വിജയകരമായി നടത്തിയിരുന്ന പ്രദേശങ്ങളിൽ നിലവിലുള്ള രീതിയില്‍ മത്സ്യകൃഷി നടത്തുവാന്‍ നിയമതടസ്സങ്ങള്‍ നിലവിലുണ്ടോ; എങ്കില്‍ ആയത് പരിഹരിക്കുന്നതിന് സ്വീകരിച്ച നടപടികള്‍ വ്യക്തമാക്കുമോ;

തരിശ് നിലങ്ങളിലും കായല്‍ പ്രദേശങ്ങളിലും അത്യുല്പ്പാദന ശേഷിയുള്ള വനാമി പോലുള്ള ചെമ്മീന്‍ കൃഷി വ്യാപകമാക്കുവാന്‍ നടപടി സ്വീകരിക്കുമോ;

ഇപ്പോള്‍ മറ്റ് സംസ്ഥാനങ്ങളില്‍ നിന്നുമാണ് സംസ്കരണത്തിന് ആവശ്യമായ ചെമ്മീന്‍ കൊണ്ടുവരുന്നതെന്ന വിവരം ശ്രദ്ധയില്‍പ്പെട്ടിട്ടുണ്ടോ; എങ്കിൽ വിശദാംശം നൽകുമോ?

ആഴക്കടല്‍ മത്സ്യബന്ധനത്തിന്റെ സാധ്യതകള്‍ പ്രയോജനപ്പെടുത്തുവാന്‍ എന്തൊക്കെ പദ്ധതികളാണ് ആവിഷ്കരിച്ചിട്ടുള്ളത്; വ്യക്തമാക്കാമോ;

ആഴക്കടല്‍ മത്സ്യബന്ധനത്തിന് പോകുന്ന തൊഴിലാളികള്‍ക്ക് എന്തെല്ലാം സുരക്ഷാ സംവിധാനങ്ങളാണ് ഒരുക്കിയിട്ടുള്ളതെന്ന് വിശദമാക്കാമോ;

ആഴക്കടല്‍ മത്സ്യബന്ധനത്തിന് പോകുന്ന ബോട്ടുകളില്‍ ബയോ ടോയ്‍ലറ്റ് സംവിധാനം നിര്‍ബന്ധമാക്കിയിട്ടുണ്ടോ; എങ്കില്‍ അവ സ്ഥാപിക്കുന്നതിന് സബ്സിഡി നല്‍കുന്നുണ്ടോ; വിശദമാക്കാമോ;

സംസ്ഥാനത്ത് ഇപ്പോള്‍ നിയമപരമായി ആഴക്കടല്‍ മത്സ്യബന്ധനം നടത്തുന്ന എത്ര യാനങ്ങള്‍ ഉണ്ട്; ഇവയെല്ലാം കേരളത്തില്‍ രജിസ്റ്റര്‍ ചെയ്തവയാണോ; അല്ലെങ്കില്‍ അത്തരത്തിലുള്ള എത്ര യാനങ്ങള്‍ ഉണ്ടെന്ന് വ്യക്തമാക്കാമോ?

സംസ്ഥാനത്തെ അഭ്യസ്തവിദ്യരായ പട്ടികജാതി/പട്ടികവര്‍ഗ്ഗ വിഭാഗത്തിലെ യുവതീയുവാക്കളെ ഒരേ സമയം തൊഴില്‍ സംരഭകരും തൊഴില്‍ദാതാക്കളുമാക്കുന്നതിന് കേരള എംപവര്‍മെന്റ് സൊസൈറ്റി ആരംഭിച്ചിട്ടുണ്ടോ; വിശദാംശം ലഭ്യമാക്കുമോ;

മെച്ചപ്പെട്ട വരുമാനവും സ്വാശ്രയത്വവും ലഭിക്കുന്നതിനായി സൊസൈറ്റിയുടെ പ്രവര്‍ത്തനം വ്യാപിപ്പിക്കുവാന്‍ ഉദ്ദേശിക്കുന്നുണ്ടോ; വ്യക്തമാക്കാമോ;

പ്രസ്തുത സൊസൈറ്റിയുടെ പ്രവര്‍ത്തനം വ്യാപിപ്പിച്ച് കൂടുതല്‍ പേര്‍ക്ക് തൊഴില്‍ അവസരങ്ങള്‍ ലഭ്യമാക്കുവാന്‍ വേണ്ട നടപടി സ്വീകരിക്കുമോ; വ്യക്തമാക്കാമോ?

വന്യജീവി ആക്രമണ സാധ്യതയുള്ള മേഖലയില്‍ താമസിക്കുന്ന പട്ടികജാതി/പട്ടികവര്‍ഗ്ഗ വിഭാഗങ്ങള്‍ക്കായി ഇന്‍ഷുറന്‍സ് പരിരക്ഷ നല്‍കുന്നതിനാവശ്യമായ നടപടി സ്വീകരിക്കാന്‍ വനം വകുപ്പ് ഉദ്ദേശിക്കുന്നുണ്ടോ; എങ്കില്‍ വിശദാംശം അറിയിക്കുമോ;

ഇക്കോ ടൂറിസം മേഖല സന്ദര്‍ശിക്കുന്നവര്‍ക്കും വനം വകുപ്പില്‍ താല്ക്കാലിക ജോലി ചെയ്യുന്ന ജീവനക്കാര്‍ക്കും ഇന്‍ഷുറന്‍സ് പരിരക്ഷ നല്‍കി വരുന്നുണ്ടോ;

വന്യജീവി ആക്രമണം നേരിടാനിടയുള്ള എല്ലാവര്‍ക്കും ഇന്‍ഷുറന്‍സ് പരിരക്ഷ ഉറപ്പ് വരുത്തുന്നതിന് പദ്ധതി രൂപീകരിക്കാന്‍ ഉദ്ദേശിക്കുന്നുണ്ടോ; വിശദമാക്കാമോ?

സംസ്ഥാനത്തെ തീര​പ്രദേശത്തിന്റെ അറുപത്തിമൂന്ന് ശതമാനവും കടലാക്രമണ ഭീഷണി നേരിടുന്നത് ശ്രദ്ധയിൽപ്പെട്ടിട്ടുണ്ടോ;

കടലാക്രമണം തടയുന്നതിന് സ്വീകരിച്ചുവരുന്ന നടപടികൾ ഫലപ്രദമാണോ; ഇല്ലെങ്കിൽ കാരണം പരിശോധിച്ചിട്ടുണ്ടോ;

തീരശോഷണത്തിന് ആനുപാതികമായി തീരത്തിന്റെ പുന:സ്ഥാപനം നടത്തുന്നതിന് പദ്ധതി ആവിഷ്കരിക്കാൻ ഉദ്ദേശിക്കുന്നുണ്ടോ; എങ്കിൽ വിശദമാക്കുമോ;

തീര സംരക്ഷണത്തിന് പ്രായോഗികവും സുസ്ഥിരവുമായ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

കടലില്‍ മത്സ്യബന്ധനത്തിന് പോകുന്ന യാനങ്ങളുടെയും മത്സ്യത്തൊഴിലാളികളുടെയും കൃത്യമായ എണ്ണം അറിയുന്നതിന് എന്തെങ്കിലും സാങ്കേതിക സംവിധാനം നിലവിലുണ്ടോ; വ്യക്തമാക്കാമോ;

കടലില്‍ മരണപ്പെടുന്ന മത്സ്യത്തൊഴിലാളികളുടെ കുടുംബങ്ങളെ സഹായിക്കുന്നതിനുള്ള അടിയന്തര സഹായത്തിന് പുറമെ സുസ്ഥിരമായ ജീവനം സാധ്യമാകുന്ന പദ്ധതികള്‍ നിലവിലുണ്ടോ; ഇല്ലെങ്കില്‍ അത്തരം പദ്ധതികളെ കുറിച്ച് ആലോചിക്കുമോ; വിശദമാക്കാമോ;

കടലില്‍ കാണാതാകുന്ന മത്സ്യത്തൊഴിലാളികള്‍ മരണപ്പെട്ടതായി സ്ഥിരീകരിക്കുന്നതിന് നിലവിലുളള മാനദണ്ഡം അനുസരിച്ച് എത്ര വര്‍ഷം കഴിയണമെന്ന് വ്യക്തമാക്കാമോ;

മരണം സ്ഥിരീകരിക്കുന്നതിനുള്ള കാലാവധി കുറയ്ക്കുന്നത് സംബന്ധിച്ച് എന്തെങ്കിലും നടപടി സ്വീകരിക്കുവാന്‍ ഉദ്ദേശിക്കുന്നുണ്ടോ; വ്യക്തമാക്കാമോ?

സംസ്ഥാനത്ത് വനവിഭവങ്ങളുടെ അഭിവൃദ്ധിയും സ്ഥിരലഭ്യതയും ഉറപ്പാക്കി നിയമാനുസൃതവും നീതിപൂര്‍വ്വകവുമായ വിധം വനവിഭവങ്ങള്‍ വിനിയോഗിക്കാനും വനങ്ങള്‍ സംരക്ഷിക്കാനും ദീര്‍ഘകാല പദ്ധതികള്‍ ആവിഷ്കരിക്കാന്‍ കഴിഞ്ഞിട്ടുണ്ടോ;

വനാശ്രിത സമൂഹമെന്ന നിലയ്ക്ക് തകര്‍ന്നുപോയ ആദിവാസികളുടെ കൂട്ടായ്മ ശക്തിപ്പെടുത്താനും സാഹചര്യമനുസരിച്ച് പുനരാവിഷ്ക്കരിക്കാനും പ്രത്യേക പദ്ധതികളുടെ ആവശ്യകത വിലയിരുത്തിയിട്ടുണ്ടോ; വിശദമാക്കുമോ;

തടിയിതര വനവിഭവ പരിപാലനത്തിന് അനുയോജ്യമായ ഊരുകള്‍ തെരഞ്ഞെടുക്കുന്നതിന് പ്രത്യേക നടപടികള്‍ സ്വീകരിച്ചിട്ടുണ്ടോ; എങ്കില്‍ വ്യക്തമാക്കുമോ;

ആദിവാസി വനസംരക്ഷണ സമിതിയുടെ പ്രവര്‍ത്തനങ്ങള്‍ യഥാസമയം അവലോകനം ചെയ്യുന്നതിനും നിയന്ത്രിക്കുന്നതിനും പ്രത്യേക സംവിധാനം വികസിച്ചിപ്പിട്ടുണ്ടോ;

അപൂര്‍വ്വവും വംശനാശ ഭീഷണി നേരിടുന്നതുമായ ഔഷധ സസ്യങ്ങളും പ്രത്യേക ജൈവ മേഖലകളും സംരക്ഷിക്കാന്‍ സ്വീകരിച്ച നടപടികള്‍ വിശദമാക്കാമോ?

പട്ടികജാതി/പട്ടികവര്‍ഗ്ഗ വിഭാഗത്തില്‍പ്പെട്ട ജനങ്ങള്‍ വസിക്കുന്ന പൂര്‍ണ്ണ സുരക്ഷിതത്വവും മതിയായ സൗകര്യവുമില്ലാത്ത വീടുകള്‍ നവീകരിക്കുന്നതിനായി സേഫ് പദ്ധതി ആവിഷ്കരിച്ചിട്ടുണ്ടോ; പ്രസ്തുത പദ്ധതിയുടെ വിശദാംശം ലഭ്യമാക്കാമോ;

സേഫ് പദ്ധതി പ്രകാരം ഇതുവരെ എത്ര വീടുകള്‍ നവീകരിച്ചിട്ടുണ്ടെന്ന് വ്യക്തമാക്കാമോ;

ഏതെല്ലാം പ്രവൃത്തികള്‍ക്കാണ് പ്രസ്തുത പദ്ധതിയുടെ ആനുകൂല്യം ലഭിക്കുന്നതെന്ന് വ്യക്തമാക്കാമോ;

വീട് പൂര്‍ണ്ണമായും വാസയോഗ്യമാക്കുവാന്‍ പട്ടികജാതി/പട്ടികവര്‍ഗ്ഗ വിഭാഗങ്ങള്‍ക്ക് വീടൊന്നിന് നല്‍കുന്ന ധനസഹായമെത്രയെന്ന് വ്യക്തമാക്കാമോ?

കാലാവസ്ഥാ വ്യതിയാനത്തിന്റെ ഭാഗമായി തീരദേശങ്ങളിലെ രൂക്ഷമായ കടലാക്രമണവും അതുമൂലം ഉണ്ടാകുന്ന തീരശോഷണവും കാരണം ജനങ്ങൾക്കുണ്ടാകുന്ന കഷ്ടനഷ്ടങ്ങള്‍ ശ്രദ്ധയിൽപ്പെട്ടിട്ടുണ്ടോ; എങ്കില്‍ വിശദമാക്കുമോ;

കടലാക്രമണം അതീവ രൂക്ഷമായ മേഖലകളിൽ സുസ്ഥിര തീരസംരക്ഷണം ഉറപ്പാക്കുന്നതിനുവേണ്ടി ടെട്രോപോഡുകൾ ഉപയോഗിച്ച് സംരക്ഷണഭിത്തി നിർമ്മിക്കുന്ന പ്രവർത്തനങ്ങളുടെ സ്ഥിതി വിശദമാക്കുമോ;

കടലാക്രമണം തടയുന്നതിന് എറണാകുളം ജില്ലയിലെ ചെല്ലാനം മേഖലയിൽ സ്ഥാപിച്ച ടെട്രോപോഡുകൾ ഉപയോഗിച്ചുള്ള തീരസംരക്ഷണരീതി സംസ്ഥാനത്താകമാനം നടപ്പാക്കുവാന്‍ ഉദ്ദേശിക്കുന്നുണ്ടോയെന്ന് അറിയിക്കുമോ;

തീരസംരക്ഷണം ഉറപ്പാക്കുന്നതിന് വേണ്ടി കേന്ദ്ര സർക്കാരിൽ നിന്നും സമയബന്ധിതമായി സഹായങ്ങൾ ലഭിക്കുന്നില്ല എന്ന പരാതി ശ്രദ്ധയിൽപ്പെട്ടിട്ടുണ്ടോ; എങ്കില്‍ വിശദമാക്കുമോ?

മുതലപ്പൊഴിയിലെ ഹാര്‍ബറിൽ രൂപപ്പെട്ടിരിക്കുന്ന മണല്‍ത്തിട്ടകൾ ഡ്രഡ്ജ് ചെയ്ത് നീക്കി മൗത്തിലെയും ചാനലിലെയും ആഴം കൂട്ടാൻ ഹാർബർ എഞ്ചിനീയറിങ് വകുപ്പും അദാനി കമ്പനിയും കരാറിൽ ഏർപ്പെട്ടിരുന്നോയെന്ന് വ്യക്തമാക്കാമോ;

പ്രസ്തുത കരാർ പ്രകാരം എന്തൊക്കെ നടപടികളാണ് അദാനി കമ്പനി സ്വീകരിക്കേണ്ടതെന്ന് വ്യക്തമാക്കാമോ;

ഹാര്‍ബറിൽ രൂപപ്പെട്ടിരിക്കുന്ന മണല്‍ത്തിട്ടകൾ ഡ്രഡ്ജ് ചെയ്ത് നീക്കി മൗത്തിലെയും ചാനലിലെയും ആഴം അഞ്ച് മീറ്റര്‍ ആയി നിലനിർത്താൻ അദാനി കമ്പനിയെ ചുമതലപ്പെടുത്തിയിരുന്നോ എന്ന് വ്യക്തമാക്കാമോ;

2021-ന് ശേഷം അദാനി കമ്പനി ഈ പ്രവൃത്തികൾ ചെയ്തിരുന്നില്ല എന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ വിശദമാക്കാമോ?

സംസ്ഥാനത്ത് ശുദ്ധജല ഗുണനിലവാര പരിശോധനയ്ക്കായി ഏത് പദ്ധതിയാണ് സജ്ജമാക്കിയിട്ടുള്ളതെന്ന് വ്യക്തമാക്കാമോ;

പ്രസ്തുത പദ്ധതിയുടെ ഉദ്ദേശ്യലക്ഷ്യങ്ങള്‍ വിശദമാക്കുമോ;

പ്രസ്തുത പദ്ധതി ഏതെല്ലാം ഏജന്‍സികളുടെ സഹകരണത്തോടെയാണ് നടപ്പാക്കാനുദ്ദേശിക്കുന്നതെന്ന് അറിയിക്കുമോ;

പ്രസ്തുത പദ്ധതി നടപ്പിലാക്കുന്നതിന് ഏര്‍പ്പെടുത്തിയിട്ടുള്ള സംവിധാനങ്ങളുടെ വിശദാംശം നല്‍കുമോ; എന്തെല്ലാം സഹായങ്ങളാണ് പദ്ധതിക്ക് ലഭ്യമാക്കുന്നതെന്ന് വിശദമാക്കുമോ?

മനുഷ്യ-വന്യജീവി സംഘര്‍ഷം ലഘൂകരിക്കുന്നതിനുള്ള മാര്‍ഗ്ഗങ്ങള്‍ അടങ്ങിയ അഞ്ച് വര്‍ഷക്കാലയളവിലേക്കുള്ള പദ്ധതി കേന്ദ്ര സര്‍ക്കാരിന്റെ അനുമതിക്കായി സമര്‍പ്പിച്ചിട്ടുണ്ടോ; പ്രസ്തുത പദ്ധതി സംബന്ധിച്ച് കേന്ദ്രസര്‍ക്കാരില്‍ നിന്നുള്ള പ്രതികരണം ലഭ്യമായിട്ടുണ്ടോ; വിശദവിവരം അറിയിക്കുമോ;

ജനവാസ മേഖലകളിലിറങ്ങി ആക്രമണം നടത്തുന്ന വന്യജീവികളെ നിയന്ത്രിക്കുന്നതില്‍ കേന്ദ്ര നിയമത്തിലുള്ള അപ്രായോഗിക നിയന്ത്രണങ്ങളും തടസ്സങ്ങളും നീക്കാന്‍ എന്തെല്ലാം നടപടികളാണ് സ്വീകരിച്ചിരിക്കുന്നതെന്ന് അറിയിക്കാമോ;

വനത്തേയും വന്യജീവികളേയും പരിസ്ഥിതിയേയും സംരക്ഷിക്കുക എന്ന ഭരണഘടനാപരമായ കര്‍ത്തവ്യത്തോടൊപ്പം മനുഷ്യന്റെ ജീവനും സ്വത്തിനും സംരക്ഷണം നല്‍കത്തക്കവിധത്തിലുള്ള പ്രായോഗികമായ നടപടികള്‍ സ്വീകരിക്കുന്നതില്‍ നിലവിലെ കേന്ദ്ര നിയമത്തിലെ വ്യവസ്ഥകള്‍ എങ്ങനെയാണ് തടസ്സമായിരിക്കുന്നതെന്ന് വിശദമാക്കാമോ?

മത്സ്യകൃഷിക്ക് ഇന്‍ഷുറന്‍സ് പരിരക്ഷ ഏര്‍പ്പെടുത്തുന്ന കാര്യം പരിഗണിക്കുമോ;

മുന്‍കാലങ്ങളില്‍ ഉണ്ടായിരുന്ന ഇന്‍ഷുറന്‍സ് പരിരക്ഷ പദ്ധതി തുടരുന്നതിന് കഴിയാത്ത സാഹചര്യം ഉണ്ടായിട്ടുണ്ടോ; എങ്കില്‍ ഇത് പരിഹരിക്കുന്നതിന് എന്ത് നടപടി സ്വീകരിച്ചിട്ടുണ്ട്; വ്യക്തമാക്കുമോ;

കര്‍ഷകര്‍ക്ക് ഗുണനിലവാരമുള്ള മത്സ്യവിത്ത് ലഭ്യമാക്കുന്നതിനായി എന്തെല്ലാം പദ്ധതികളാണ് മത്സ്യവിത്ത് കേന്ദ്രം മുഖേന നടപ്പാക്കി വരുന്നതെന്ന് വിശദമാക്കുമോ?

സംസ്ഥാനത്ത് ജലജീവന്‍ മിഷന്‍ പ്രവർത്തനങ്ങളുടെ പുരോഗതി വിശദമാക്കാമോ;

ജലജീവന്‍ മിഷന്‍ മുഖേന കണക്ഷനുകള്‍ നല്കുന്ന പ്രവൃത്തികള്‍ക്ക് ദേശീയപാത വിഭാഗത്തിന്റെ അനുമതി സമയബന്ധിതമായി ലഭിക്കാറുണ്ടോ; വിശദമാക്കാമോ;

ദേശീയപാത വിഭാഗത്തിന്റെ അനുമതിയുടെ അഭാവം കൊണ്ടുമാത്രം ജലജീവന്‍ മിഷനുകീഴില്‍ ആയിരക്കണക്കിന് കണക്ഷനുകള്‍ നല്കുന്നതില്‍ തടസം നേരിടുന്ന സാഹചര്യം മറികടക്കാന്‍ സ്വീകരിച്ചിട്ടുള്ള നടപടികള്‍ വിശദമാക്കാമോ;

ഇത് സംബന്ധിച്ച് കേന്ദ്ര ഉപരിതല ഗതാഗത മന്ത്രാലയവുമായി നടത്തിയ ആശയവിനിമയങ്ങളുടെയും ചര്‍ച്ചകളുടെയും വിശദാംശം അറിയിക്കാമോ;

ദേശീയപാതാ വിഭാഗത്തിന്റെ അനുമതി ലഭിക്കുന്നതിനുള്ള തടസങ്ങള്‍ പരിഹരിച്ച് ജലജീവന്‍ പദ്ധതി സമ്പൂർണ്ണമാക്കുമോ; വിശദമാക്കുമോ?

പട്ടികജാതി വിഭാഗത്തിലെ വിദ്യാര്‍ത്ഥികളെ സമൂഹത്തിന്റെ ഉന്നതിയിലേക്ക് ഉയര്‍ത്തിക്കൊണ്ടുവരുന്നതിന് സ്വീകരിച്ചുവരുന്ന നടപടികള്‍ വിശദമാക്കാമോ;

പിന്നാക്ക വിഭാഗത്തിലെ വിദ്യാര്‍ത്ഥികള്‍ക്ക് കേന്ദ്ര സര്‍ക്കാര്‍ നിര്‍ത്തലാക്കിയ പ്രീ-മെട്രിക് സ്കോളര്‍ഷിപ്പ് പദ്ധതിയ്ക്ക് പകരം പുതിയ പദ്ധതി ആവിഷ്കരിച്ച് നടപ്പിലാക്കിയിട്ടുണ്ടോ എന്ന് വ്യക്തമാക്കാമോ;

പട്ടികജാതി/പട്ടികവര്‍ഗ്ഗ വിഭാഗങ്ങളില്‍പ്പെട്ട വിദ്യാര്‍ത്ഥികള്‍ക്ക് നല്‍കുന്ന ആനുകൂല്യങ്ങള്‍ വര്‍ദ്ധിപ്പിക്കുന്നതിന് പദ്ധതിയുണ്ടോ; വിശദമാക്കാമോ?

മുതലപ്പൊഴി ഹാർബറിന്റെ അശാസ്ത്രീയമായ നിർമ്മാണം മൂലം അഴിമുഖത്ത് കടലിൽ നിന്നും കരയിലേക്ക് തിരയടിക്കുന്ന സമയങ്ങളിൽ ചുഴികൾ രൂപപ്പെടുന്നത് കാരണം മത്സ്യബന്ധന ബോട്ടുകൾ ചുഴിയിൽപെട്ട് തലകീഴായി മറിയുന്ന സംഭവങ്ങള്‍ പതിവാകുന്നത് ശ്രദ്ധയിൽപ്പെട്ടിട്ടുണ്ടോ;

ഈ വർഷം ജൂൺ, ജൂലൈ മാസങ്ങളിൽ മാത്രം മുതലപ്പൊഴിയിൽ പതിനേഴോളം അപകടങ്ങൾ ഉണ്ടായി എന്നതും നിരവധി മത്സ്യത്തൊഴിലാളികൾ മരണമടഞ്ഞു എന്നതും ഗൗരവത്തോടെ കാണുന്നുണ്ടോ;

മുതലപ്പൊഴിയിൽ ഉണ്ടാകുന്ന അപകടങ്ങൾ ഒഴിവാക്കാൻ അടിയന്തര നടപടികൾ സ്വീകരിക്കുമോ; വിശദമാക്കുമോ;

മുതലപ്പൊഴി ഹാര്‍ബര്‍ നിര്‍മ്മാണത്തിലെ അപാകതകള്‍ ശാശ്വതമായി പരിഹരിക്കാൻ നടപടികൾ സ്വീകരിക്കുമോയെന്ന് വ്യക്തമാക്കാമോ?

സംസ്ഥാനത്തെ ജലാശയങ്ങളുടെ ഡിജിറ്റല്‍ രൂപം തയ്യാറാക്കുന്നതിന് നടത്തി വരുന്ന പ്രവര്‍ത്തനങ്ങള്‍ ഫലപ്രാപ്തിയിലെത്തിയിട്ടുണ്ടോ; വിശദമാക്കുമോ;

മറ്റ് വകുപ്പുകള്‍ക്ക് കൂടി ഉപയോഗപ്പെടുത്താനാകുന്ന വിധത്തിലാണോ ഇത് തയ്യാറാക്കിയിട്ടുളളത്; വിശദാംശം നല്‍കുമോ;

വിവിധ ജലസ്രോതസ്സുകളുടെ പരിപാലനം ഉറപ്പാക്കി ജലലഭ്യതയും ഉപയോഗവും അടിസ്ഥാനമാക്കി തയ്യാറാക്കുന്ന ജലബജറ്റ് പദ്ധതിയുടെ പുരോഗതി വിലയിരുത്തിയിട്ടുണ്ടോ; വിശദാംശം നല്‍കുമോ?

സംസ്ഥാനത്തെ മുഴുവന്‍ ഗ്രാമീണ ഭവനങ്ങളിലും കുടിവെളള കണക്ഷന്‍ ലഭ്യമാക്കുന്നതിനായി നടപ്പാക്കിവരുന്ന ജലജീവന്‍ പദ്ധതിയുടെ പ്രവര്‍ത്തന പുരോഗതി അവലോകനം നടത്തിയിട്ടുണ്ടോ; വിശദാംശം നല്‍കുമോ;

പ്രസ്തുത പദ്ധതി സമയബന്ധിതമായി പൂര്‍ത്തിയാക്കുന്നതിനും തടസ്സങ്ങള്‍ പരിഹരിച്ച് പദ്ധതി പ്രവര്‍ത്തനം സുഗമമായി മുന്നോട്ട് കൊണ്ടുപോകുന്നതിനും നടത്തുന്ന ഇടപെടലുകള്‍ വിശദമാക്കുമോ;

പ്രസ്തുത പദ്ധതി എന്നത്തേയ്ക്ക് പൂര്‍ത്തീകരിക്കുവാന്‍ കഴിയുമെന്ന് വ്യക്തമാക്കുമോ?

പട്ടികവർഗ്ഗ വികസന വകുപ്പിൽ എസ്.ടി. പ്രമോട്ടർമാരുടെ നിയമനത്തിന് മാനദണ്ഡം നിശ്ചയിച്ചിട്ടുണ്ടോ; എങ്കിൽ വിശദമാക്കുമോ;

പ്രമോട്ടർമാരുടെ താല്ക്കാലിക നിയമനങ്ങൾ നടത്തുന്നത് എപ്രകാരമാണെന്ന് അറിയിക്കുമോ;

പ്രമോട്ടർമാരുടെ നിയമനത്തിൽ മാനദണ്ഡങ്ങൾ പാലിക്കുന്നില്ല എന്നത് സംബന്ധിച്ച പരാതികൾ പരിശോധിച്ചിട്ടുണ്ടോ; എങ്കിൽ സ്വീകരിച്ച നടപടികൾ വിശദമാക്കുമോ?

വയനാട് മുട്ടിലില്‍ അനധികൃതമായി മരം മുറിച്ചുകടത്തിയ സംഭവത്തിന്മേലുള്ള അന്വേഷണ പുരോഗതി വിശദമാക്കുമോ;

പ്രസ്തുത സംഭവത്തിന്മേലുള്ള അന്വേഷണം ത്വരിതഗതിയിൽ അല്ല നടക്കുന്നതെന്നും ഇത് പ്രതികളെ സഹായിക്കാനാണ് എന്നുമുള്ള ആരോപണം ശ്രദ്ധയിൽപ്പെട്ടിട്ടുണ്ടോ; വ്യക്തമാക്കാമോ;

കേസിന്മേലുള്ള അന്വേഷണത്തെ തുടര്‍ന്ന് ഏതെങ്കിലും ഉദ്യോഗസ്ഥര്‍ക്കെതിരെ നടപടി സ്വീകരിച്ചിട്ടുണ്ടോ; വിശദാംശം നല്‍കുമോ;

പ്രസ്തുത സംഭവത്തില്‍ കുറ്റക്കാരെന്ന് കണ്ടെത്തിയ ഉദ്യോഗസ്ഥരെ സസ്‌പെൻഡ് ചെയ്യുകയും പിന്നീട് തിരിച്ചെടുക്കുകയും ചെയ്ത സംഭവങ്ങൾ ഉണ്ടായിട്ടുണ്ടോ; എങ്കിൽ കാരണം വിശദമാക്കുമോ?

സമുദ്രമത്സ്യ സമ്പത്തിന്റെ സുസ്ഥിരമായ നിലനിൽപ്പിനും മത്സ്യത്തൊഴിലാളികളുടെ സുരക്ഷയ്ക്കും വേണ്ടി മൺസൂൺകാല ട്രോളിംഗ് നിരോധനം കാര്യക്ഷമമായി നടപ്പിലാക്കുന്നതിന് സാധിച്ചിട്ടുണ്ടോ; വിശദമാക്കുമോ;

കേരള തീരത്തെ മത്സ്യസമ്പത്ത് സുസ്ഥിരമായി നിലനിർത്തുന്നതിന് മൺസൂൺകാല ട്രോളിംഗ് നിരോധനം സഹായകമായിട്ടുണ്ടോ എന്നത് സംബന്ധിച്ച് ശാസ്ത്രീയമായ പഠനങ്ങൾ നടത്തിയിട്ടുണ്ടോ; വ്യക്തമാക്കുമോ;

ട്രോളിംഗ് നിരോധനത്തോടനുബന്ധിച്ച് തൊഴിലും വരുമാനവും നഷ്ടപ്പെടുന്ന മത്സ്യത്തൊഴിലാളികൾക്ക് നൽകിവരുന്ന സഹായങ്ങൾ എന്തെല്ലാമെന്ന് വിശദമാക്കുമോ;

ട്രോളിംഗ് നിരോധന കാലത്തും മത്സ്യം സുലഭമായി ലഭ്യമാക്കുന്നതിന് ഉൾനാടൻ ശുദ്ധജല മത്സ്യ സമ്പത്ത് വർദ്ധിപ്പിക്കുന്നതിനായി സ്വീകരിച്ചുവരുന്ന നടപടികള്‍ വിശദമാക്കുമോ?

മുതലപ്പൊഴിയിലെ ഹാര്‍ബര്‍ നിര്‍മ്മാണത്തിലെ അപാകതകള്‍ കാരണമുണ്ടായ അപകടങ്ങളിൽ ജൂലൈ മാസത്തിൽ മാത്രം നാല് മത്സ്യത്തൊഴിലാളികൾ മരിച്ചത് ഗൗരവത്തോടെ കാണുന്നുണ്ടോ; വിശദമാക്കാമോ;

കഴിഞ്ഞ രണ്ട് വർഷമായി മുതലപ്പൊഴിയിൽ അപകടങ്ങൾ ഇല്ലാതാക്കാൻ സ്വീകരിച്ച നടപടികൾ വിശദമാക്കാമോ;

ഹാർബറിൽ രൂപപ്പെട്ടിരിക്കുന്ന മണല്‍ത്തിട്ടകൾ ഡ്രഡ്ജ് ചെയ്ത് നീക്കി മത്സ്യബന്ധന ബോട്ടുകളുടെ സഞ്ചാരം സുഗമമാക്കാന്‍ അടിയന്തര നടപടികള്‍ സ്വീകരിക്കുമോ; കഴിഞ്ഞ രണ്ട് വർഷങ്ങളിലായി ഇക്കാര്യത്തില്‍ സ്വീകരിച്ച നടപടികൾ എന്തെല്ലാമാണ്; വിശദമാക്കാമോ?

സംസ്ഥാനത്തെ ഭൂരഹിത പട്ടികജാതി വിഭാഗത്തില്‍പ്പെട്ടവര്‍ക്കുള്ള പുനരധിവാസ പദ്ധതി പ്രകാരം സര്‍ക്കാര്‍ വാങ്ങി നല്‍കുന്ന ഭൂമി കൈമാറ്റം ചെയ്യുന്നതിനുള്ള വ്യവസ്ഥകള്‍ പരിഷ്കരിക്കുവാന്‍ തീരുമാനിച്ചിട്ടുണ്ടോ; വിശദമാക്കാമോ;

എങ്കില്‍ എത്ര വര്‍ഷങ്ങള്‍ക്ക് ശേഷമാണ് ഈ മാനദണ്ഡങ്ങള്‍ പരിഷ്കരിക്കുന്നത് എന്ന് വ്യക്തമാക്കാമോ;

ഉപയോഗയോഗ്യമല്ലാത്ത ഭൂമിയാണ് പട്ടികജാതി വിഭാഗത്തില്‍പ്പെട്ടവര്‍ക്ക് നല്‍കുന്നതെന്ന പരാതി പരിഹരിക്കുവാന്‍ സ്വീകരിച്ച നടപടി എന്താണെന്നും ഇതുസംബന്ധിച്ച് പുതുതായി എന്തെങ്കിലും വ്യവസ്ഥകള്‍ ഏര്‍പ്പെടുത്തിയിട്ടുണ്ടോയെന്നും വിശദമാക്കാമോ?

കേരള തീരത്ത് അപകടരഹിത മത്സ്യബന്ധനം ഉറപ്പാക്കുന്നതിനായി സ്വീകരിച്ച നടപടികൾ വിശദമാക്കുമോ;

മത്സ്യത്തൊഴിലാളികള്‍ക്ക് കടല്‍രക്ഷാ ഉപകരണങ്ങളും ദിശാ സഹായ ഉപകരണങ്ങളും നല്‍കുന്ന പദ്ധതികള്‍ നടപ്പിലാക്കിയിട്ടുണ്ടോ; വിശദമാക്കുമോ;

മത്സ്യബന്ധനത്തില്‍ ഏര്‍പ്പെടുന്നവരുമായി ആശയവിനിമയം നടത്തുന്നതിന് വെരി ഹൈ ഫ്രീക്വന്‍സി (വി.എച്ച്.എഫ്.) ഹാൻഡ് സെറ്റുകള്‍ നല്‍കുന്ന പദ്ധതി നടപ്പാക്കുവാൻ ഉദ്ദേശിക്കുന്നുണ്ടോ; വ്യക്തമാക്കാമോ?

വന്യജീവി ശല്യം, ഇക്കോ സെന്‍സിറ്റീവ് സോണ്‍ അതിര്‍ത്തി, കാട്ടു പന്നികളെ വെര്‍മിന്‍ ആയി പ്രഖ്യാപിക്കല്‍ എന്നീ വിഷയങ്ങളില്‍ അടിയന്തര നടപടി ആവശ്യപ്പെട്ട് കേന്ദ്ര സര്‍ക്കാരിന് നിവേദനം നല്‍കിയിട്ടുണ്ടോ; ഇക്കാര്യത്തില്‍ കേന്ദ്ര സര്‍ക്കാരില്‍ നിന്നും എന്തെങ്കിലും പ്രതികരണം ലഭ്യമായിട്ടുണ്ടോ;

സംസ്ഥാനത്ത് സര്‍പ്പ ആപ്പിന്റെ പ്രവര്‍ത്തനം ആരംഭിച്ചത് മുതല്‍ ഉണ്ടായ പുരോഗതി വിശദമാക്കാമോ;

മൂന്നാര്‍ ഡിവിഷനിലെ കുറിഞ്ഞിമല സങ്കേതത്തില്‍ 12 വര്‍ഷത്തിലൊരിക്കല്‍ പൂക്കുന്ന സസ്യമായ നീലക്കുറിഞ്ഞി ചെടികളുടെ സംരക്ഷണത്തിന് നടപടികള്‍ സ്വീകരിച്ചിട്ടുണ്ടോ?