സംസ്ഥാനത്ത് വനാശ്രിത വ്യവസായങ്ങളും ഉല്പന്നങ്ങളും സംസ്ഥാനത്തിന്റെ സാമ്പത്തിക വളര്‍ച്ചയില്‍ പങ്ക് വഹിക്കുന്നുണ്ടോയെന്ന് വിലയിരുത്തിയിട്ടുണ്ടോ; വിശദമാക്കുമോ;

സംസ്ഥാനത്തും ഇന്ത്യയിലും വിദേശത്തും ഉള്ള വിപണികള്‍ മുഖേന വനവിഭവങ്ങളും അവയുടെ മൂല്യവര്‍ദ്ധിത ഉല്പന്നങ്ങളും വില്പന നടത്തുന്നതിന് ഏര്‍പ്പെടുത്തിയിട്ടുള്ള സൗകര്യങ്ങള്‍ അറിയിക്കാമോ; ഇത്തരം ഉല്പന്നങ്ങള്‍ ഓണ്‍ലൈന്‍ പ്ലാറ്റ്‌ഫോം മുഖേന വിപണനം ചെയ്യുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ;

പേപ്പര്‍ പള്‍പ്പ്, പ്ലൈവുഡ്, പെന്‍സില്‍ വുഡ് എന്നിവയുടെ അസംസ്‌കൃത വസ്തുവായ മരങ്ങള്‍ സംസ്ഥാനത്ത് വ്യാവസായിക അടിസ്ഥാനത്തില്‍ കൃഷി ചെയ്യുന്നുണ്ടോ; എങ്കിൽ അത് വിപണി ആവശ്യകതയ്ക്ക് പര്യാപ്തമായ അളവില്‍ ലഭിക്കുന്നുണ്ടോ; അറിയിക്കുമോ;

കൂടുതലായി കൃഷി ചെയ്യേണ്ട ഇനം തടികളുടെ ഉല്പാദനം വര്‍ദ്ധിപ്പിക്കുന്നതിന് സ്വീകരിച്ചിട്ടുള്ള നടപടികള്‍ അറിയിക്കാമോ; വനമേഖല, സോഷ്യല്‍ ഫോറസ്ട്രി, സ്വകാര്യ പ്ലാന്റേഷനുകള്‍ എന്നിവ തമ്മില്‍ ബന്ധിപ്പിച്ച് വ്യാവസായിക, കാര്‍ഷിക വനവത്കരണ പരിപാടികള്‍ക്ക് രൂപം നല്‍കുമോയെന്ന് വ്യക്തമാക്കുമോ?

ഉറപ്പായും സംരക്ഷിക്കപ്പെടേണ്ട വനവൃക്ഷങ്ങളിലേക്ക് കയ്യേറ്റം വരാതിരിക്കാന്‍ വനേതര വൃക്ഷങ്ങള്‍ വ്യാവസായികമായി വളര്‍ത്തുന്നതിന് നയരൂപീകരണം പ്രാവര്‍ത്തികമാക്കാമോ;

വീട്, ഫര്‍ണിച്ചര്‍ എന്നിവയുടെ നിര്‍മ്മാണത്തിനും വിറകിനുമായി മാത്രമുള്ള മരങ്ങള്‍ വ്യാവസായികമായി നട്ടുവളർത്തി ഉപയോഗിക്കുക വഴി വനം സംരക്ഷിക്കുന്ന വിദേശ മാതൃക സംസ്ഥാനത്തും നടപ്പാക്കാന്‍ നടപടി സ്വീകരിക്കാമോ;

സ്വകാര്യ ഭൂമിയിലും പാട്ട ഭൂമിയിലും ഇത്തരം വ്യവസായങ്ങള്‍ ആരംഭിക്കുന്നതിന് ലൈസന്‍സിങ് സംവിധാനം ഏര്‍പ്പെടുത്തുന്നതിന് നടപടി സ്വീകരിക്കാമോയെന്ന് വ്യക്തമാക്കുമോ?

സംസ്ഥാനത്ത് ജൈവ സമ്പത്ത് സംരക്ഷിക്കുന്നതിനായി നടത്തുന്ന പ്രവര്‍ത്തനങ്ങളുടെ ഫലമായി വനവല്‍ക്കരണത്തിൽ സംസ്ഥാനത്തിന് എത്രത്തോളം മുന്നേറാന്‍ കഴിഞ്ഞുവെന്നത് പരിശോധിച്ചിട്ടുണ്ടോ; വിശദമാക്കുമോ;

ജൈവ സമ്പത്തിന്റെ പരിപോഷണ പ്രവര്‍ത്തനങ്ങള്‍ക്ക് സുസ്ഥിരത കൈവരിക്കുന്നതിനായി ആസൂത്രണം ചെയ്ത് നടപ്പാക്കുന്ന പ്രവര്‍ത്തനങ്ങള്‍ സംബന്ധിച്ച് വിലയിരുത്തൽ നടത്തിയിട്ടുണ്ടോ; വിശദമാക്കുമോ;

ജൈവ സമ്പത്തിന് ഭീഷണിയായി സംസ്ഥാനത്തെ വനമേഖലയില്‍ വളര്‍ന്ന് പന്തലിക്കുന്ന അധിനിവേശ സസ്യങ്ങള്‍ സൃഷ്ടിക്കുന്ന ആഘാതം വിലയിരുത്തിയിട്ടുണ്ടോ; എങ്കില്‍ അതിനുള്ള പരിഹാരമാര്‍ഗ്ഗങ്ങള്‍ സ്വീകരിച്ചുവരുന്നുണ്ടോ; വിശദമാക്കുമോ?

സംസ്ഥാനത്ത് സാമൂഹ്യ വനവൽക്കരണത്തിനായി ആവിഷ്ക്കരിച്ച്‌ നടപ്പിലാക്കുന്ന പദ്ധതികള്‍ ഏതെല്ലാമാണെന്ന് അറിയിക്കുമോ;

പ്രസ്തുത പദ്ധതികള്‍ക്കായി നാളിതുവരെയായി ചെലവഴിച്ച തുക, അവയുടെ പുരോഗതി എന്നിവ വെളിപ്പെടുത്തുമോ;

പ്രസ്തുത പദ്ധതികളിൽ ഉള്‍പ്പെടുത്തി എവിടെയെല്ലാമാണ് വനവൽക്കരണ പരിപാടികള്‍ നടപ്പിലാക്കിയതെന്ന്‌ അറിയിക്കുമോ?

സംസ്ഥാനത്ത് കാട്ടുതീ കാരണം ഉണ്ടായിട്ടുള്ള നാശനഷ്ടങ്ങള്‍ വിലയിരുത്തിയിട്ടുണ്ടോ; വിശദമാക്കുമോ;

കാട്ടുതീ പ്രതിരോധിക്കുന്നതിനും രക്ഷാപ്രവര്‍ത്തനങ്ങള്‍ ഏകോപിപ്പിക്കുന്നതിനുമായി നടത്തുന്ന പ്രവര്‍ത്തനങ്ങള്‍ വിശദമാക്കാമോ;

കാട്ടുതീയെത്തുടര്‍ന്ന് വന്യമൃഗങ്ങള്‍ ജനവാസ മേഖലയിലേക്കിറങ്ങുന്നതിനുള്ള സാദ്ധ്യത മുന്നില്‍ക്കണ്ട് നടത്തുന്ന പ്രവര്‍ത്തനങ്ങള്‍ വിശദമാക്കുമോ;

കാട്ടുതീ ഭീഷണിയെത്തുടര്‍ന്ന് കാടിനുള്ളിലെ വിനോദസഞ്ചാര പ്രവര്‍ത്തനങ്ങള്‍ നിയന്ത്രിക്കുന്നതിന് തീരുമാനമെടുത്തിരുന്നോയെന്ന് വിശദമാക്കാമോ?

2021-22, 2022-23 വർഷങ്ങളിൽ സംസ്ഥാനത്തെ വന പ്രദേശങ്ങളിലുണ്ടായ പ്രധാന തീപിടുത്തങ്ങളുടെ വിവരങ്ങൾ ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം ഗ്രീന്‍ ഗ്രാസ് പദ്ധതിയില്‍ ഉള്‍പ്പെടുത്തി എന്തെല്ലാം പ്രവര്‍ത്തനങ്ങളാണ് നടത്തിയിട്ടുള്ളതെന്ന് വ്യക്തമാക്കുമോ;

പദ്ധതിയുടെ നടത്തിപ്പിനായി എത്ര തുക അനുവദിച്ചുവെന്ന് വ്യക്തമാക്കുമോ; വിശദവിവരം നല്‍കുമോ?

വനഭൂമിയോട് ചേര്‍ന്ന് കിടക്കുന്ന സ്വകാര്യ ഭൂമി രജിസ്റ്റര്‍ ചെയ്യുന്നതിന് വനം വകുപ്പിന്റെ നോ ഒബ്‌ജക്‌ഷൻ സർട്ടിഫിക്കറ്റിന്റെ ആവശ്യകതയുണ്ടോയെന്ന് വ്യക്തമാക്കാമോ; ഇതുമായി ബന്ധപ്പെട്ട ഉത്തരവിന്റെ പകര്‍പ്പ് ലഭ്യമാക്കാമോ;

വനാതിര്‍ത്തികളില്‍ തര്‍ക്കങ്ങളോ വ്യവഹാരങ്ങളോ നിലനില്‍ക്കാത്തതും അതിര്‍ത്തികൾ ജണ്ടകള്‍ കെട്ടി വേര്‍തിരിച്ചിട്ടുള്ളതുമായ ഭൂമിക്ക് പോലും നോ ഒബ്‌ജക്‌ഷൻ സർട്ടിഫിക്കറ്റ് ആവശ്യപ്പെടുന്ന കാര്യം ശ്രദ്ധയില്‍പ്പെട്ടിട്ടുണ്ടോ;

സ്വകാര്യ ഭൂമിയുടെ രജിസ്ട്രേഷനുവേണ്ടി നോ ഒബ്‌ജക്‌ഷൻ സർട്ടിഫിക്കറ്റിനായി പൊതുജനങ്ങള്‍ വനം വകുപ്പിന്റെ ഓഫീസുകള്‍ കയറിയിറങ്ങുന്ന അവസ്ഥ ഒഴിവാക്കാന്‍ നിര്‍ദേശം നല്‍കാമോയെന്ന് വ്യക്തമാക്കുമോ?

അഖിലേന്ത്യ സര്‍വേ പ്രകാരം സംസ്ഥാനത്തിന്റെ വന വിസ്തൃതി കുറഞ്ഞുവരുന്നതായ റിപ്പോര്‍ട്ട് ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കുമോ;

വന നശീകരണവും കയ്യേറ്റങ്ങളും തടയാന്‍ എന്തെല്ലാം നടപടികളാണ് സ്വീകരിക്കുന്നതെന്ന് അറിയിക്കുമോ;

കാട്ടുതീ തടയുവാനുള്ള ഫയര്‍ലൈന്‍ തെളിക്കുന്ന നടപടികള്‍ ആരംഭിച്ചിട്ടുണ്ടോയെന്ന് വ്യക്തമാക്കുമോ?

കേരളത്തിന്റെ വനവിസ്തൃതി എത്ര ശതമാനമാണ് എന്ന് അറിയിക്കുമോ;

പാട്ട വ്യവസ്ഥയിലെ വനഭൂമി കാലാവധി കഴിഞ്ഞിട്ടും അനധികൃതമായി കെെവശം വച്ചിരിക്കുന്നത് തിരിച്ച് പിടിക്കുന്നതിന് സ്വീകരിച്ച നടപടികള്‍ വിശദമാക്കുമോ;

ഇത്തരത്തിലുള്ള എത്ര ഹെക്ടര്‍ വനഭൂമി ഈ സര്‍ക്കാര്‍ കാലയളവില്‍ നാളിതുവരെ തിരികെ പിടിച്ചിട്ടുണ്ട് എന്നും എത്ര ഹെക്ടര്‍ വനഭൂമി തിരികെ പിടിക്കാനുണ്ട് എന്നും വ്യക്തമാക്കുമോ?

വന്യജീവി സങ്കേതങ്ങൾക്ക് ചുറ്റുമുള്ള ഒരു കിലോമീറ്റർ കരുതൽ മേഖലയിൽ നിന്ന് ഒരാളും കുടിയൊഴിപ്പിക്കപ്പെടില്ലെന്ന് സർക്കാർ നൽകിയ ഉറപ്പിന്റെ തുടർച്ചയായി പ്രസ്തുത നിർദേശം നീക്കിക്കിട്ടാൻ സ്വീകരിച്ചുവരുന്ന നടപടികൾ എന്തെല്ലാമെന്ന് അറിയിക്കാമോ;

സുപ്രീം കോടതി നിർദേശ പ്രകാരം അനിവാര്യമായി സമർപ്പിക്കേണ്ടിയിരുന്ന ഉപഗ്രഹ സർവേ റിപ്പോർട്ടിന്റെ അടിസ്ഥാനത്തിൽ ചില കേന്ദ്രങ്ങൾ ആശങ്ക ഉയർത്താൻ നടത്തിയ നീക്കം അനാവശ്യമായിരുന്നെന്ന് കരുതുന്നുണ്ടോ; വ്യക്തമാക്കുമോ;

സർക്കാർ പ്രഖ്യാപനത്തിന്റെ അടിസ്ഥാനത്തിൽ ഭൂതല സർവേ പൂർത്തീകരിച്ച് വിദഗ്ദ്ധ സമിതി റിപ്പോർട്ട് സമർപ്പിച്ചിട്ടുണ്ടോ; എത്ര നിർമ്മിതികളാണ് കരുതൽ മേഖലയിലുള്ളതെന്ന് വ്യക്തമാക്കുമോ?

2019-20, 2020-21 വർഷങ്ങളിൽ പാലോട് റെയ്ഞ്ചിൽ എത്ര കിലോമീറ്റർ വനാതിർത്തി ജണ്ട നിർമ്മിച്ച് വേർതിരിക്കാൻ അവശേഷിച്ചിരുന്നുവെന്ന് വർഷം തിരിച്ച് വിവരം ലഭ്യമാക്കാമോ;

2019-20, 2020-21 വർഷങ്ങളിൽ പാലോട് റെയ്ഞ്ചിൽ നിർമ്മിച്ച ജണ്ടകളുടെ എണ്ണവും അതിനായി ചെലവഴിച്ച തുകയും വർഷം തിരിച്ച് ലഭ്യമാക്കാമോ;

പ്രസ്തുത കാലയളവിൽ പാലോട് റെയ്ഞ്ചിൽ നിർമ്മിച്ച ജണ്ടകളിൽ എത്രയെണ്ണം വനം വിജിലൻസ് വിഭാഗം പരിശോധിച്ചുവെന്നും അതിൽ എത്രയെണ്ണത്തിന് നിർമ്മാണ അപാകത ഉള്ളതായി കണ്ടെത്തിയെന്നും വെളിപ്പെടുത്തുമോ?

കോഴിക്കോട് ജില്ലയിലെ കൂരാച്ചുണ്ട്, കോട്ടൂർ, കായണ്ണ, കാന്തലാട് വില്ലേജുകളിൽ വനാതിർത്തി നിശ്ചയിച്ചിട്ടുണ്ടോ; എങ്കിൽ എപ്പോഴാണ് അതിർത്തി പൂർണ്ണമായും നിശ്ചയിച്ചിട്ടുള്ളതെന്നും എന്തിന്റെ അടിസ്ഥാനത്തിലാണ് അതിർത്തി നിശ്ചയിച്ചിട്ടുള്ളതെന്നും അറിയിക്കാമോ;

പ്രസ്തുത വില്ലേജുകളിൽ റവന്യൂ, വനം വകുപ്പുകളുടെ ജോയിന്റ് സർവേ പൂർത്തീകരിച്ചതാണോ; ഇല്ലെങ്കിൽ ഏതൊക്കെ വില്ലേജുകളിലാണ് സർവേ ഇനിയും പൂർത്തീകരിക്കാനുള്ളതെന്ന വിശദാംശം അറിയിക്കാമോ;

പ്രസ്തുത വില്ലേജുകളിൽ പരാതിക്കാരായ എല്ലാ കർഷകരുടെയും ഭൂമി സംബന്ധിച്ച പ്രശ്നങ്ങൾക്ക് സർവേ നടത്തി പരിഹാരം കണ്ടിട്ടുണ്ടോ; വിശദാംശം ലഭ്യമാക്കാമോ?

വനഭൂമി സംരക്ഷിക്കുന്നതിന് നിലവിൽ സ്വീകരിച്ചുവരുന്ന നടപടികൾ വിശദമാക്കുമോ;

സ്വകാര്യ വനം പതിച്ച് നൽകുന്നതുമായി ബന്ധപ്പെട്ട് എന്തെങ്കിലും നടപടി സ്വീകരിക്കാൻ ഉദ്ദേശിക്കുന്നുണ്ടോ; എങ്കില്‍ വിശദാംശം ലഭ്യമാക്കുമോ;

വനത്തോട് ചേർന്ന് നിൽക്കുന്ന ഭാഗങ്ങളിൽ യഥാർത്ഥ കർഷകരെ സംരക്ഷിക്കുന്നതിനോടാപ്പം വനഭൂമി കയ്യേറുന്നില്ലെന്ന് ഉറപ്പുവരുത്തുന്നതിന് സ്വീകരിക്കാന്‍ ഉദ്ദേശിക്കുന്ന നടപടികൾ വ്യക്തമാക്കുമോ?

ഡബ്ള്യൂ.പി.സി. നമ്പർ 16/13/2011 ലെ ഹൈക്കോടതി വിധി പ്രകാരം നിക്ഷിപ്ത വനഭൂമി അര്‍ഹരായവര്‍ക്ക് പതിച്ച് കൊടുക്കുന്നതിൽ തീരുമാനം എടുക്കാന്‍ കോടതി സര്‍ക്കാരിന് നിര്‍ദേശം നല്‍കിയിട്ടുണ്ടോ; വിശദാംശം ലഭ്യമാക്കാമോ;

പ്രസ്തുത വിഷയം സംബന്ധിച്ച് ഇ2/283/2021-എഫ്.ഡബ്ള്യൂ.എൽ.ഡി. നമ്പർ ഫയല്‍ സര്‍ക്കാരിന്റെ പരിഗണനയിലുണ്ടോ;

പ്രസ്തുത ഫയലിലെ നടപടിയുടെ ഭാഗമായി സര്‍ക്കാര്‍ കക്ഷികളെ വിസ്തരിച്ചിട്ടുണ്ടോ; എങ്കില്‍ അതെന്നാണെന്ന് അറിയിക്കാമോ;

പ്രസ്തുത ഫയലിന്മേൽ എന്തെങ്കിലും തീരുമാനം എടുത്തിട്ടുണ്ടോ; ഇല്ലെങ്കില്‍ കാലതാമസത്തിന്റെ കാരണം അറിയിക്കാമോ; വിശദാംശം ലഭ്യമാക്കാമോ?

സോഷ്യല്‍ ഫോറസ്ട്രി വിഭാഗത്തിന്റെ നേതൃത്വത്തിലുള്ള ട്രീ കമ്മിറ്റികളുടെ പ്രവര്‍ത്തനങ്ങളും കമ്മിറ്റിയിലെ അംഗങ്ങളുടെ വിശദാംശവും അറിയിക്കാമോ;

പ്രസ്തുത കമ്മിറ്റിയുടെ തീരുമാനങ്ങളിൻമേൽ ഏതെങ്കിലും അംഗത്തിന് വീറ്റോ അധികാരമുണ്ടോയെന്ന് അറിയിക്കാമോ;

വീറ്റോ അധികാരമുള്ള അംഗങ്ങള്‍ വര്‍ഷങ്ങളോളം തുടര്‍ച്ചയായി പ്രവര്‍ത്തിക്കുന്നത് ഏത് ചട്ട പ്രകാരമാണെന്ന് അറിയിക്കാമോ; സംസ്ഥാനത്ത് വര്‍ഷങ്ങളോളം സ്ഥിരമായി പ്രസ്തുത കമ്മിറ്റികളില്‍ ഉള്‍പ്പെട്ട് പ്രവര്‍ത്തിക്കുന്ന അംഗങ്ങളുടെ വിശദാംശം ജില്ല തിരിച്ച് അറിയിക്കാമോ;

പൊതുമരാമത്ത് റോഡരികില്‍ അപകടകരമായി നില്‍ക്കുന്ന മരങ്ങള്‍ മുറിച്ച് മാറ്റുന്നതിന് ലഭിക്കുന്ന അപേക്ഷകള്‍ നിരസിക്കുകയും അതേ മരങ്ങള്‍ മൂലം അപകടങ്ങള്‍ ഉണ്ടാകുകയും ചെയ്യുമ്പോള്‍, അപ്രകാരമുണ്ടാകുന്ന നഷ്ടത്തിന് പ്രസ്തുത കമ്മിറ്റിയ്ക്ക് ബാധ്യത ഏര്‍പ്പെടുത്തുന്നത് പരിഗണനയിലുണ്ടോ; അറിയിക്കുമോ;

പ്രസ്തുത തീരുമാനത്തില്‍ യാതൊരു പങ്കുമില്ലാത്ത പൊതുമരാമത്ത് വകുപ്പിലെ ഉദ്യോഗസ്ഥര്‍ അത്തരം അപകടങ്ങള്‍ക്ക് നഷ്ടപരിഹാരം നല്‍കാന്‍ ബാധ്യതപ്പെടുന്നത് ഏത് ചട്ടത്തിന്റെ അടിസ്ഥാനത്തിലാണെന്ന് അറിയിക്കാമോ?

വനവാസികളായ ആദിവാസി സമൂഹങ്ങളുടെ ഉപജീവനമാര്‍ഗം മെച്ചപ്പെടുത്തുന്നതിന് വനം വകുപ്പ് ബന്ധപ്പെട്ട മറ്റ് വകുപ്പുകളുമായും ഏജന്‍സികളുമായും സഹകരിച്ച് ആസൂത്രണം ചെയ്തിട്ടുള്ള പരിപാടികളും സ്വീകരിച്ചുവരുന്ന നടപടികളും വിശദമാക്കാമോ?

ഇടുക്കി ജില്ലയില്‍ ഏതൊക്കെ സ്കൂളുകളിലാണ് വിദ്യാവനം പദ്ധതി നടപ്പിലാക്കുന്നതെന്ന് അറിയിക്കാമോ; ജില്ലയിലെ പദ്ധതിയുടെ പുരോഗതി സംബന്ധിച്ച വിശദാംശം ലഭ്യമാക്കാമോ;

പ്രസ്തുത പദ്ധതി നടപ്പിലാക്കുന്നതിനായി ജില്ലയിലെ ഏതൊക്കെ സ്കൂളുകളില്‍ നിന്നാണ് അപേക്ഷ ലഭിച്ചിരുന്നത്; അവയില്‍ ഏതൊക്കെ അനുവദിച്ചിട്ടുണ്ട്; അറിയിക്കാമോ?

മാവേലിക്കര നിയോജക മണ്ഡലത്തിലെ ഏതെല്ലാം സ്കൂളുകളിലാണ് വിദ്യാവനം പദ്ധതി നടപ്പിലാക്കിയിട്ടുള്ളതെന്നും അവയുടെ വിശദാംശവും ലഭ്യമാക്കുമോ; പ്രസ്തുത പദ്ധതിയിലൂടെ ഏതെല്ലാം ഇനം വൃക്ഷങ്ങളാണ് വച്ച് പിടിപ്പിച്ചിട്ടുള്ളതെന്ന് അറിയിക്കുമോ;

സാമൂഹ്യ വനവൽക്കരണത്തിന്റെ ഭാഗമായി നടത്തിവരുന്ന വൃക്ഷസമൃദ്ധി, അമൃതവനം, നഗരവനം തുടങ്ങിയ പദ്ധതികള്‍ മാവേലിക്കര മണ്ഡലത്തില്‍ എവിടെയെല്ലാം നടപ്പിലാക്കിയിട്ടുണ്ടെന്ന് വിശദമാക്കുമോ;

പ്രസ്തുത പദ്ധതികള്‍ മണ്ഡലത്തിലെ എല്ലാ പ്രദേശങ്ങളിലും നടപ്പിലാക്കുവാന്‍ നടപടി സ്വീകരിക്കുമോയെന്ന് വ്യക്തമാക്കുമോ?

നിര്‍ദിഷ്ട ആനക്കാംപൊയില്‍-കള്ളാടി-മേപ്പാടി തുരങ്കപാത പദ്ധതി പ്രാവര്‍ത്തികമാക്കുന്നതിന് കേന്ദ്ര വനം മന്ത്രാലയത്തിന് വനം വകുപ്പ് അപേക്ഷ സമര്‍പ്പിച്ചിട്ടുണ്ടോ; വിശദാംശം ലഭ്യമാക്കുമോ;

പ്രസ്തുത വിഷയത്തിൽ കേന്ദ്ര വനം മന്ത്രാലയം എന്തൊക്കെ വിശദീകരണങ്ങളാണ് ആവശ്യപ്പെട്ടിട്ടുള്ളതെന്ന് വ്യക്തമാക്കുമോ;

പ്രസ്തുത തുരങ്ക പാത പദ്ധതിയ്ക്കായി കേന്ദ്ര വനം മന്ത്രാലയത്തിന് സമർപ്പിച്ച അപേക്ഷയുടെ നിലവിലെ സ്ഥിതി വ്യക്തമാക്കാമോ;

പ്രസ്തുത പദ്ധതി പ്രാവർത്തികമാക്കുന്നത് മൂലം വനഭൂമി നഷ്ടപ്പെടാത്ത സാഹചര്യത്തില്‍ പകരം ഭൂമി നൽകാനുള്ള വ്യവസ്ഥ ഒഴിവാക്കുന്നതിന് നടപടി സ്വീകരിക്കുമോ?

കാസര്‍ഗോഡ് ഡി.എഫ്.ഒ. യുടെ കീഴില്‍ വരുന്ന റെയ്ഞ്ചുകളില്‍ നിലവില്‍ എത്ര വന സംരക്ഷണ സമിതികള്‍ പ്രവര്‍ത്തിക്കുന്നുണ്ടെന്നും അവ ഏതൊക്കെ സ്ഥലങ്ങളിലാണെന്നും വിശദമാക്കാമോ;

2016 മുതല്‍ നാളിതുവരെ പ്രസ്തുത സമിതികള്‍ മുഖാന്തിരം നടപ്പിലാക്കിയിട്ടുള്ള പദ്ധതികള്‍ വിശദമാക്കാമോ?

മലബാറിലെ ക്ഷേത്രങ്ങൾക്ക് അനുബന്ധമായി നിലകൊളളുന്ന കാവുകളെ സംരക്ഷിക്കുന്നതിന് വനം വകുപ്പിന് പ്രത്യേക പദ്ധതികള്‍ നിലവിലുണ്ടോ; എങ്കില്‍ വിശദാംശം നല്‍കാമോ;

ഇത്തരം കാവുകളെ സംരക്ഷിക്കുന്നതിന് വകുപ്പ് ഫണ്ട് അനുവദിക്കുന്നുണ്ടോയെന്ന് വിശദമാക്കുമോ?

റീബില്‍ഡ് കേരള ഡെവലപ്മെന്റ് സ്വയം സന്നദ്ധ പുനരധിവാസ പദ്ധതിലേയ്ക്ക് എത്ര അപേക്ഷകള്‍ ലഭിച്ചിട്ടുണ്ടെന്നും അതിൽ എത്ര എണ്ണം തീര്‍പ്പാക്കിയിട്ടുണ്ടെന്നും അറിയിക്കാമോ; പ്രസ്തുത പദ്ധതിയുടെ പുരോഗതി വിശദമാക്കാമോ;

പദ്ധതിയുടെ ഭാഗമായി പുനരധിവസിക്കപ്പെട്ട കുടുംബങ്ങളുടെയും അനുവദിച്ച തുകയുടെയും ജില്ല തിരിച്ചുള്ള കണക്ക് ലഭ്യക്കുമോ?

സംസ്ഥാനത്ത് വനാധിഷ്ഠിത ഇക്കോ ടൂറിസം പ്രോത്സാഹിപ്പിക്കുന്നതിന്റെ സാധ്യതകള്‍ പരിശോധിച്ചിട്ടുണ്ടോ; വ്യക്തമാക്കുമോ;

വനാശ്രിത സമൂഹത്തിന് പ്രയോജനപ്രദമായ വിധത്തില്‍ ഇക്കോ ടൂറിസം പദ്ധതികള്‍ വികസിപ്പിക്കാന്‍ നടപടി സ്വീകരിക്കുമോ; വിശദമാക്കുമോ;

2016-17 മുതല്‍ ഇക്കോ ടൂറിസം ഡയറക്ടറേറ്റ് നടപ്പാക്കിയ പദ്ധതികള്‍ വിശദമാക്കുമോ;

ഇക്കോ ടൂറിസം പദ്ധതികള്‍ വനത്തെ ആശ്രയിച്ച് ജീവിക്കുന്ന ജനവിഭാഗങ്ങളുടെ ഉപജീവനം മെച്ചപ്പെടുത്തുമെന്നും വനാശ്രിതത്വം കുറയ്ക്കുമെന്നും പരിസ്ഥിതി അവബോധം വര്‍ദ്ധിപ്പിക്കുമെന്നും വിലയിരുത്തിയിട്ടുണ്ടോയെന്ന് വ്യക്തമാക്കുമോ?

ചാലക്കുടി ഫോറസ്റ്റ് ഡിവിഷനിലെ വെള്ളികുളങ്ങര റെയിഞ്ചിന് കീഴിലുള്ള താത്ക്കാലിക ഫാേറസ്റ്റ് വാച്ചര്‍മാര്‍ക്ക് മാസങ്ങളായി ശമ്പളം നല്‍കാത്തത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത ജീവനക്കാർക്ക് ശമ്പളം അതത് മാസങ്ങളില്‍ വിതരണം ചെയ്യുന്നതിന് എന്തെങ്കിലും തടസ്സങ്ങള്‍ നിലവിലുണ്ടോ;

എങ്കിൽ തടസ്സങ്ങള്‍ നീക്കി പ്രസ്തുത ജീവനക്കാർക്ക് ശമ്പള കൂടിശ്ശിക ഉടന്‍ നല്‍കുന്നതിനും അതത് മാസങ്ങളില്‍ തന്നെ ശമ്പളം അനുവദിച്ച് നൽകുന്നതിനും ആവശ്യമായ അടിയന്തര നടപടി സ്വീകരിക്കുമോ;

പ്രസ്തുത ജീവനക്കാർക്ക് പണിയെടുക്കുന്ന മുഴുവന്‍ ദിവസങ്ങളിലെയും വേതനം അനുവദിച്ച് നല്‍കുന്നതിന് ആവശ്യമായ നടപടി സ്വീകരിക്കുമോയെന്ന് വ്യക്തമാക്കുമോ?

വനം വകുപ്പില്‍ സുപ്പര്‍ ന്യുമററി തസ്തികയില്‍ സ്ഥിരപ്പെടുത്തിയ താൽക്കാലിക ജീവനക്കാരുടെ ആശ്രിതര്‍ക്ക് സമാശ്വാസ തൊഴില്‍ ദാന പദ്ധതി പ്രകാരം ജോലി നേടാൻ അര്‍ഹത ഉണ്ടോ എന്ന് വ്യക്തമാക്കുമോ; വിശദവിവരം നല്‍കുമോ;

കൊല്ലം ജില്ലയില്‍ താൽക്കാലിക വാച്ചറായി ജോലി ചെയ്തിരുന്ന ജീവനക്കാരന്റെ ആശ്രിതയ്ക്ക് ക്ലാര്‍ക്ക് തസ്തികയില്‍ സമാശ്വാസ തൊഴില്‍ ദാന പദ്ധതി പ്രകാരം ജോലി നല്‍കാന്‍ സര്‍ക്കാര്‍ ഉത്തരവ് നല്‍കിയിട്ടുണ്ടോ; എങ്കില്‍ എന്ത് അടിസ്ഥാനത്തിലാണ് പ്രസ്തുത ജോലി നല്‍കിയത് എന്ന് വെളിപ്പെടുത്തുമോ;

ഇതിന്റെ അടിസ്ഥാനത്തില്‍ വനം വകുപ്പില്‍ താൽക്കാലികമായി ജോലി ചെയ്തിരുന്ന ജീവനക്കാരുടെ ആശ്രിതരുടെയെല്ലാം അപേക്ഷകള്‍ പരിശോധിച്ച് സമാശ്വാസ തൊഴില്‍ ദാന പദ്ധതി പ്രകാരം ജോലി നല്‍കുവാന്‍ നടപടി സ്വീകരിക്കുമോ; വിശദമാക്കുമോ?

വന്യമൃഗങ്ങള്‍ കാടിറങ്ങുന്നത് ദിനംപ്രതി വര്‍ധിക്കുമ്പോഴും മുപ്പത്തിയാറ് വനം ഡിവിഷനുകള്‍ക്കായി ആകെ പതിനഞ്ച് റാപിഡ് റെസ്പോണ്‍സ് ടീമുകള്‍ മാത്രമാണുള്ളതെന്ന കാര്യം ശ്രദ്ധയില്‍പ്പെട്ടിട്ടുണ്ടോ; എങ്കില്‍ റാപിഡ് റെസ്പോണ്‍സ് ടീമുകളുടെ എണ്ണം വര്‍ധിപ്പിക്കുന്നതിന് നടപടി സ്വീകരിക്കുമോ; വ്യക്തമാക്കാമോ?

ഫോറസ്റ്റ് വകുപ്പിലെ യൂണിഫോം വിഭാഗത്തിൽപ്പെട്ട ഉദ്യോഗസ്ഥർക്ക് സംസ്ഥാന സർക്കാർ ജീവനക്കാരുടെ സിവിൽ സർവീസ് കായിക മേളയിൽ പങ്കെടുക്കുവാൻ അനുവാദം നൽകിയിട്ടുണ്ടോ; എങ്കിൽ പ്രസ്തുത ഉത്തരവിന്റെ പകർപ്പ് ലഭ്യമാക്കാമോ;

വനം വകുപ്പ് മേലധികാരികളുടെ അനുമതിയില്ലാതെ യൂണിഫോം വിഭാഗത്തിൽപ്പെട്ട ഉദ്യോഗസ്ഥർ സിവിൽ സർവീസ് മീറ്റിൽ പങ്കെടുക്കുന്നത് ശ്രദ്ധയിൽപ്പെട്ടിട്ടുണ്ടോ; എങ്കിൽ ആയതിന് എന്ത് നടപടി സ്വീകരിച്ചു എന്ന് വിശദമാക്കാമോ;

ഏതെങ്കിലും കോടതിയുടെ ഇടക്കാല ഉത്തരവ് നിലവിലുള്ളപ്പോള്‍ അതിന്റെ പൂർണ വിധി വരുന്നതിന് മുന്‍പ് യൂണിഫോം ഉദ്യോഗസ്ഥർ സിവിൽ സർവീസ് കായിക മേളയിൽ പങ്കെടുത്തിട്ടുണ്ടോ; വ്യക്തമാക്കാമോ;

പ്രസ്തുത ജീവനക്കാർക്ക് കോടതിയിൽ പോകുന്നതിന് വനം വകുപ്പിന്റെ അനുമതി ലഭിച്ചിരുന്നോയെന്ന് വ്യക്തമാക്കാമോ;

നിലവിൽ അനുമതിനേടാനുള്ള എത്ര കേസുകൾ വനം വകുപ്പിന്റെ പരിഗണനയിൽ ഉണ്ട്; ആയതിന്റെ നിജസ്ഥിതി വ്യക്തമാക്കാമോ?

പാലക്കാട് ജില്ലയില്‍ വനാവകാശ നിയമപ്രകാരം കൈവശരേഖ ലഭിക്കാനുള്ള അപേക്ഷകരെ സംബന്ധിച്ച വിവരങ്ങള്‍ പ‍ഞ്ചായത്ത് അടിസ്ഥാനത്തില്‍ ലഭ്യമാക്കാമോ?

സംസ്ഥാനത്ത് വനം വകുപ്പിന്റെ കീഴില്‍ എത്ര ചെക്ക് പോസ്റ്റുകളാണ് നിലവില്‍ പ്രവര്‍ത്തിക്കുന്നതെന്നും എത്ര ജീവനക്കാരാണ് ഓരോ ചെക്ക് പോസ്റ്റിലും ഉള്ളതെന്നും പട്ടിക തിരിച്ച് വിവരം ലഭ്യമാക്കുമോ;

വനം വകുപ്പിന്റെ കീഴിലുള്ള ചെക്ക് പോസ്റ്റുകളില്‍ ഏതെല്ലാം സ്ഥലങ്ങളിലാണ് റോഡിന് കുറുകെ പോസ്റ്റ് സ്ഥാപിച്ച് വാഹനങ്ങളേയും വ്യക്തികളേയും തടഞ്ഞ് പരിശോധിച്ച് വിവരങ്ങള്‍ രജിസ്റ്ററില്‍ രേഖപ്പെടുത്തുന്നതെന്ന് വിശദമാക്കാമോ;

വനം വകുപ്പിന്റെ ചെക്ക് പോസ്റ്റുകളില്‍ സംസ്ഥാനത്തിന് അകത്തും പുറത്തും നിന്നും വരുന്ന വാഹനങ്ങള്‍ പരിശോധനയ്ക്ക് എത്തുമ്പോള്‍ താല്‍ക്കാലിക വാച്ചര്‍മാരെ ഉപയോഗിച്ച് പരിശോധന നടത്തുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ വിശദാംശം ലഭ്യമാക്കുമോ;

ചെക്ക് പോസ്റ്റുകളില്‍ വാഹനം പരിശോധനയ്ക്ക് വിധേയമാക്കാത്തതും വാഹനങ്ങളുടെ വിവരം രേഖപ്പെടുത്താത്തതും ശ്രദ്ധയില്‍പ്പെട്ടിട്ടുണ്ടോ; എങ്കിൽ ഇത്തരത്തില്‍ പ്രവര്‍ത്തിക്കുന്ന ചെക്ക് പോസ്റ്റുകള്‍ നിര്‍ത്തലാക്കി ജിവനക്കാരെ മറ്റ് സ്റ്റേഷനുകളിലേയ്ക്കോ എന്‍ഫോഴ്സ്മെന്റിന്റെ ഭാഗമാക്കി മാറ്റുന്നതിനോ ഉള്ള നടപടി സ്വീകരിക്കുമോ; വിശദാംശം ലഭ്യമാക്കുമോ;

ചെക്ക് പോസ്റ്റ് വഴി കടന്ന് പോകുന്ന വാഹനങ്ങള്‍ നിര്‍ത്തി രേഖകള്‍ പരിശോധിക്കാതെ 24 മണിക്കൂറും ജീവനക്കാരെ ഡ്യൂട്ടിക്ക് മാത്രം നിയോഗിച്ച് പ്രവര്‍ത്തിക്കുന്ന ചെക്ക് പോസ്റ്റുകള്‍ കൊണ്ട് വനം വകുപ്പ് ലക്ഷ്യം വയ്ക്കുന്നത് എന്തെന്ന് വ്യക്തമാക്കാമോ?

കാട്ടുതീ പടരുന്നത് തടയുന്നതിനായി കഴിഞ്ഞ സാമ്പത്തിക വർഷം ബഡ്ജറ്റിൽ എത്ര തുക അനുവദിച്ചിട്ടുണ്ടെന്നും എത്ര തുക ചെലവഴിച്ചിട്ടുണ്ടെന്നും നടപ്പ് സാമ്പത്തിക വർഷം എത്ര തുക അനുവദിച്ചിട്ടുണ്ടെന്നും വ്യക്തമാക്കുമോ?

പുനലൂർ നിയോജക മണ്ഡലത്തിലെ ഇടമൺ 34 ലെ ഫോറസ്റ്റ് കോംപ്ലക്സിന്റെ ഉദ്ഘാടനം കഴിഞ്ഞ് ഒന്നര വർഷമായിട്ടും തുറന്നുപ്രവർത്തനം ആരംഭിച്ചിട്ടില്ലെന്ന കാര്യം ശ്രദ്ധയിൽപ്പെട്ടിട്ടുണ്ടോ;

ബീറ്റ് ഫോറസ്റ്റ് സ്റ്റേഷനൊപ്പം വനവിഭവങ്ങൾ ശേഖരിച്ച് വിപണനം നടത്താൻ ലക്ഷ്യമിട്ട് ഇരുപത് ലക്ഷം രൂപ മുടക്കി നിർമ്മിച്ച ഫോറസ്റ്റ് കോംപ്ലക്സ് കെട്ടിടം തുറന്ന് പ്രവർത്തിപ്പിക്കാത്തതിന്റെ കാരണം വ്യക്തമാക്കാമോ?

വനമേഖലയിലേക്ക് അഗ്നിശമന വാഹനങ്ങൾ വേഗത്തിൽ കടന്നു ചെല്ലുവാൻ കഴിയുന്ന തരത്തിലുള്ള റോഡുകളുടെ അഭാവം, കാട്ടുതീ പ്രതിരോധത്തെ ദോഷകരമായി ബാധിക്കുന്നുണ്ടോ; എങ്കില്‍ ഇതിന് പരിഹാരം കാണാൻ എന്ത് നടപടി സ്വീകരിക്കുമെന്ന് വ്യക്തമാക്കുമോ?

2006 -ലെ കേന്ദ്ര വനാവകാശ നിയമത്തിലെ വകുപ്പ് 4(2)- ൽ പരാമർശിക്കുന്ന പുനരധിവാസ വ്യവസ്ഥകൾ എന്തൊക്കെയാണെന്ന് വ്യക്തമാക്കുമോ;

കേരളത്തിലെ ട്രൈബൽ സെറ്റിൽമെന്റുകളിൽ നിന്ന് പുനരധിവാസം നടത്തുമ്പോൾ മേൽപ്പറഞ്ഞ പുനരധിവാസ വ്യവസ്ഥകൾ പാലിക്കുന്നുണ്ടോ; ഇതിനായി എന്തെല്ലാം ക്രമീകരണങ്ങളാണ് ഏർപ്പെടുത്തിയിട്ടുള്ളതെന്ന് വ്യക്തമാക്കുമോ;

വനാവകാശ നിയമത്തിലെ വ്യവസ്ഥകൾക്ക് വിരുദ്ധമായി പുനരധിവാസം നടത്തുന്നതിലൂടെ പട്ടികവർഗ്ഗ വിഭാഗങ്ങളുടെ അവകാശങ്ങൾ നിഷേധിക്കുന്നതായി ശ്രദ്ധയിൽപ്പെട്ടിട്ടുണ്ടോ; എങ്കിൽ ഈ പ്രവണത അവസാനിപ്പിക്കുന്നതിന് അടിയന്തര നടപടി സ്വീകരിക്കുമോയെന്ന് വ്യക്തമാക്കുമോ?

ഔദ്യോഗിക ജോലിക്കിടെ കാട്ടാനയുടെ ആക്രമണം മൂലം മരണപ്പെട്ട കോഴിക്കോട് മുക്കം സ്വദേശി ഹുസെെന്റെ കുടുംബത്തിന് ഇതുവരെ നല്‍കിയിട്ടുള്ള സഹായം വിശദമാക്കുമോ;

പ്രസ്തുത കുടുംബത്തിനെ സഹായിക്കുന്നതിന് മരിച്ച വ്യക്തിയുടെ ഭാര്യയ്ക്ക് ജോലി നല്‍കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോയെന്നും പ്രസ്തുത അപേക്ഷയുടെ നിലവിലെ സ്ഥിതി എന്താണെന്നും വ്യക്തമാക്കുമോ?

ട്രൈബൽ സെറ്റിൽമെന്റുകളിൽ നിന്നും ആദിവാസി കുടുംബങ്ങളെ പുനരധിവസിപ്പിക്കുന്നതിന് വനം വകുപ്പ് പദ്ധതി നടപ്പാക്കുന്നുണ്ടോ; ഉണ്ടെങ്കിൽ പ്രസ്തുത പദ്ധതിയുടെ വിശദാംശം വ്യക്തമാക്കുമോ ;

ഈ പദ്ധതിക്കായി ഫണ്ട് ലഭിക്കുന്ന മാർഗങ്ങൾ ഏതൊക്കെയാണ്; പ്രസ്തുത പദ്ധതിക്കായി മുൻ സർക്കാരിന്റെ കാലം മുതൽ നാളിതുവരെ എത്ര തുക ലഭിച്ചിട്ടുണ്ട്; എത്ര തുക ചെലവഴിച്ചിട്ടുണ്ട്; വ്യക്തമാക്കുമോ;

പ്രസ്തുത പദ്ധതി പ്രകാരം ആദിവാസികളുടെ പുനരധിവാസത്തിനായി ഭൂമി കണ്ടെത്തുന്നതിനുള്ള മാനദണ്ഡങ്ങൾ എന്തൊക്കെയാണെന്ന് വിശദമാക്കാമോ; ഇപ്രകാരം നാളിതുവരെ എത്ര ഏക്കർ ഭൂമി കണ്ടെത്തി വാങ്ങിയിട്ടുണ്ടെന്ന് ഇതിനായി ചെലവഴിച്ച തുക, വാങ്ങിയ ഭൂമിയുടെ സർവേ നമ്പർ എന്നിവ ഉൾപ്പെടെ വിശദമാക്കുമോ?

സംസ്ഥാനത്ത് നടപ്പിലാക്കി വരുന്ന പ്രോജക്റ്റ് ഗ്രീൻ ഗ്രാസിന്റെ പ്രവർത്തന പുരോഗതി അറിയിക്കാമോ;

പ്രസ്തുത പദ്ധതിയുമായി ബന്ധപ്പെട്ട് രൂപീകരിച്ച ടാസ്ക് ഫോഴ്സിന്റെ പ്രവർത്തനങ്ങൾ സംബന്ധിച്ച വിശദാംശം ലഭ്യമാക്കാമോ;

പരിസ്ഥിതിയെ ദോഷകരമായി ബാധിക്കുന്ന തരത്തിൽ മാലിന്യ നിക്ഷേപം നടത്തുന്നവർക്കെതിരെ കർശന ശിക്ഷ നടപടികൾ സ്വീകരിക്കുന്നതിനായി കേരള ഫോറസ്റ്റ് ആക്റ്റിൽ ഭേദഗതി വരുത്താൻ ഉദ്ദേശിക്കുന്നുണ്ടോയെന്ന് വ്യക്തമാക്കുമോ?

വട്ടിയൂര്‍ക്കാവ് നിയോജക മണ്ഡലത്തില്‍ വനം വകുപ്പിന് കീഴിലുള്ള സ്ഥാപനങ്ങള്‍ ഏതൊക്കെയെന്നും അവയുടെ ഫോണ്‍ നമ്പര്‍, മേല്‍വിലാസം, ഇ-മെയില്‍ വിലാസം, ജീവനക്കാരുടെ ഔദ്യോഗിക മൊബൈല്‍ നമ്പരുകള്‍ എന്നിവയും ലഭ്യമാക്കാമോ;

മേല്‍പ്പറഞ്ഞ സ്ഥാപനങ്ങളില്‍ അനുവദിക്കപ്പെട്ടിട്ടുള്ള സ്ഥിരം തസ്തികകള്‍, അവയുടെ എണ്ണം, ഒഴിവുള്ള തസ്തികകള്‍ എന്നിവ വ്യക്തമാക്കാമോ;

പ്രസ്തുത മണ്ഡലത്തിലെ മേല്‍പ്പറഞ്ഞ സ്ഥാപനങ്ങളില്‍ കരാര്‍/താല്‍ക്കാലിക/ദിവസവേതന/അന്യത്രസേവന വ്യവസ്ഥയില്‍ ജോലി ചെയ്യുന്നവരുണ്ടോ; എങ്കില്‍ അത് സംബന്ധിച്ച വിശദാംശം ലഭ്യമാക്കാമോ;

മേല്‍പ്പറഞ്ഞ സ്ഥാപനങ്ങളില്‍ നിന്ന് ലഭ്യമാകുന്ന സേവനങ്ങള്‍, ടി സേവനങ്ങള്‍ ലഭ്യമാകുന്നതിനുള്ള മുന്നുപാധികള്‍/രേഖകള്‍ ഏതൊക്കെയെന്നും സേവനങ്ങള്‍ ലഭ്യമാക്കുന്നതിനുള്ള സമയപരിധി എത്രയെന്നും വിശദമാക്കാമോ?

ആലത്തൂര്‍ നിയോജക മണ്ഡലത്തില്‍ വനമേഖലയോട് ചേര്‍ന്ന് താമസിക്കുന്നവര്‍ക്ക് പട്ടയം വിതരണം ചെയ്യുന്നതിന് വനം വകുപ്പിന്റെ ഭാഗത്ത് നിന്നും എന്തെങ്കിലും തടസ്സങ്ങള്‍ നിലനില്‍ക്കുന്നുണ്ടോ; എങ്കില്‍ വിശദാംശം ലഭ്യമാക്കാമോ;

പ്രസ്തുത തടസ്സങ്ങള്‍ പരിഹരിക്കുന്നതിനായി സ്വീകരിച്ച നടപടികള്‍ വ്യക്തമാക്കാമോ?

അമ്പലപ്പുഴയില്‍ എത്ര ഭൂമിയാണ് വനം വകുപ്പിന് കെെമാറി ലഭിച്ചതെന്ന് അറിയിക്കാമോ; പ്രസ്തുത ഭൂമിയില്‍ എന്തൊക്കെ പദ്ധതികള്‍ നടപ്പാക്കാനാണ് ലക്ഷ്യമിട്ടിട്ടുള്ളത്; ഇതില്‍ ഏതെങ്കിലും പദ്ധതിയ്ക്ക് അനുമതി ലഭ്യമായിട്ടുണ്ടോ; ഓരോ പദ്ധതിയുടെയും വിശദാംശവും അവയുടെ നിലവിലെ പ്രവര്‍ത്തന പുരോഗതിയും ലഭ്യമാക്കുമോ?

കൂത്തുപറമ്പ് നിയോജക മണ്ഡലത്തില്‍ വനം വകുപ്പിന്റെ അധീനതയില്‍ വനത്തിന് പുറത്ത് റോഡുകളോ കിണറുകളോ മറ്റ് സ്ഥാപനങ്ങളോ നിലവിലുണ്ടോയെന്ന് വിശദമാക്കുമോ;

തൃപ്രങ്ങോട്ടൂര്‍ ഗ്രാമപഞ്ചായത്തിലെ സെന്‍ട്രല്‍ പൊയിലൂരില്‍ കച്ചേരി പ്രദേശത്തുള്ള കുഴല്‍ കിണര്‍ വനം വകുപ്പിന്റെ അധീനതയിലുള്ളതാണോ; എങ്കില്‍ പ്രസ്തുത കുഴല്‍ കിണറില്‍ നിന്നും വെള്ളമെടുക്കുന്ന മുപ്പതോളം കുടുംബങ്ങള്‍ക്ക് ടാങ്കും മോട്ടോറും സ്ഥാപിക്കുന്നതിന് ഫണ്ട് അനുവദിക്കുമോ; വിശദമാക്കുമോ;

പ്രസ്തുത കുഴല്‍ കിണര്‍ പഞ്ചായത്തിന് കൈമാറുന്നതിന് തടസ്സങ്ങളെന്തെങ്കിലും നിലവിലുണ്ടോ; ഇല്ലെങ്കില്‍ ആയത് കൈമാറുന്നതിന് നടപടി സ്വീകരിക്കുമോയെന്ന് വിശദമാക്കുമോ?

തൃശൂര്‍ ജില്ലയില്‍ കാട്ടാനയുടെയും വന്യമൃഗങ്ങളുടെയും ശല്യം നിരന്തരം ഉണ്ടാകുന്ന വാഴാനി വനമേഖലയില്‍ പ്രതിരോധ പ്രവര്‍ത്തനങ്ങള്‍ക്കായി സ്വീകരിച്ച നടപടികള്‍ വിശദീകരിക്കാമോ;

കാട്ടാന/വന്യമൃഗ ആക്രമണം പ്രതിരോധത്തിനായി വടക്കാഞ്ചേരി, മച്ചാട് ഫോറസ്റ്റ് റെയ്ഞ്ചുകള്‍ കേന്ദ്രീകരിച്ച് രൂപീകരിച്ചിട്ടുള്ള റാപ്പിഡ് റെസ്പോന്‍സ് ടീമിന് വനമേഖലകളില്‍ ചെന്നെത്തുന്നതിനുള്ള ഗെറ്റവേ/ക്യാമ്പർ വെഹിക്കിള്‍ അനുവദിക്കുന്ന കാര്യം പരിഗണനയില്‍ ഉണ്ടോ;

മേല്‍പ്പറഞ്ഞ റാപ്പിഡ് റെസ്പോന്‍സ് ടീമിന് വനമേഖലകളില്‍ ചെന്നെത്തുന്നതിന് പ്രസ്തുത വെഹിക്കിള്‍ അനുവദിക്കുന്നതിനായി എം.എല്‍.എ. ഫണ്ട് പ്രയോജനപ്പെടുത്തുന്നതിന് തടസ്സങ്ങള്‍ ഉള്ളതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയത് പരിഹരിക്കുന്നതിനുള്ള നടപടി സ്വീകരിക്കുമോയെന്ന് വ്യക്തമാക്കുമോ?

വന്യജീവികൾ ജനവാസ മേഖലയിൽ ഇറങ്ങി കാർഷികോല്പന്നങ്ങൾ നശിപ്പിക്കുന്നത് കണക്കിലെടുത്ത് അവയ്ക്ക് ഇഷ്ടപ്പെട്ട വിഭവങ്ങൾ വിളയുന്ന മരങ്ങൾ കാട്ടിൽ തന്നെ വച്ചുപിടിപ്പിക്കണം എന്ന നിർദേശം ഉണ്ടായിട്ടുണ്ടോ; എങ്കിൽ ആയതിന്മേൽ എന്തു നടപടി സ്വീകരിച്ചു എന്ന് വ്യക്തമാക്കാമോ;

വേനൽക്കാലത്ത് കാട്ടിനുളളിൽ ജല ലഭ്യത ഉറപ്പ് വരുത്തുന്നതിന് എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം വന്യജീവി ആക്രമണം മൂലം മരണമടയുന്നവര്‍ക്കും പരിക്കേല്‍ക്കുന്നവര്‍ക്കും വനം വകുപ്പ് നല്‍കിവരുന്ന ധനസഹായം ഒറ്റപ്പാലം മണ്ഡലത്തില്‍ ആര്‍ക്കെങ്കിലും ലഭിച്ചിട്ടുണ്ടോ; എങ്കില്‍ ആയത് എത്ര പേര്‍ക്ക് ലഭിച്ചിട്ടുണ്ടെന്നും അനുവദിച്ച തുക എത്രയെന്നും വിശദമാക്കാമോ?

ജനവാസ മേഖലയിൽ പ്രശ്നങ്ങൾ സൃഷ്ടിക്കുന്ന കാട്ടാന ഉൾപ്പെടെയുള്ള വന്യമൃഗങ്ങളെ പിടിക്കുന്നതിനായി മുൻ സർക്കാരിന്റെ കാലം മുതൽ നാളിതുവരെ എത്ര ടാസ്ക് ഫോഴ്സ് രൂപീകരിച്ചിട്ടുണ്ട്; ഏതൊക്കെ വിഭാഗങ്ങളിൽ നിന്ന് എത്ര പേരെ ഉൾപ്പെടുത്തിയാണ് ഓരോ ടാസ്ക് ഫോഴ്‌സും രൂപീകരിച്ചിട്ടുള്ളതെന്ന് വ്യക്തമാക്കുമോ;

ഓരോ ടാസ്ക് ഫോഴ്സിന്റെയും പ്രവർത്തനത്തിനായി നാളിതുവരെ എത്ര തുക ചെലവഴിച്ചിട്ടുണ്ട്; എത്ര ടാസ്ക് ഫോഴ്സുകൾ ദൗത്യം വിജയകരമായി പൂർത്തീകരിച്ചിട്ടുണ്ട്; ദൗത്യം പൂർത്തീകരിക്കാൻ സാധിക്കാത്ത എത്ര ടാസ്ക് ഫോഴ്‌സുകൾ ഉണ്ട്; അവ ഏതൊക്കെ; വിശദാംശം ലഭ്യമാക്കുമോ?

ഇടുക്കിയിലെ ആക്രമണകാരികളായ കാട്ടാനകളെ തുരത്തുന്നതിന് പ്രത്യേക ദൗത്യസംഘം രൂപീകരിച്ചിട്ടുണ്ടോ;

ചിന്നക്കനാല്‍, ശാന്തന്‍പാറ ഗ്രാമ പഞ്ചായത്തുകളിലെ ആക്രമണകാരികളായ ഒറ്റയാന്‍മാരുടെ സ്വഭാവ സവിശേഷതകള്‍ മനസിലാക്കിക്കൊണ്ട് അവയെ പിടികൂടാനുള്ള പ്രത്യേക നടപടികൾ സ്വീകരിച്ചിട്ടുണ്ടോ; വിശദമാക്കാമോ;

പ്രസ്തുത ഗ്രാമ പഞ്ചായത്തുകളിലെ ആക്രമണകാരികളായ കാട്ടാനകളെ പിടികൂടുന്നതിന് എന്തൊക്കെ മുന്നൊരുക്കങ്ങളാണ് നടത്തിയിരിക്കുന്നതെന്ന് വ്യക്തമാക്കാമോ?

ഇടുക്കി ജില്ലയിലെ ജനവാസ മേഖലയിൽ പ്രശ്നങ്ങൾ സൃഷ്ടിക്കുന്ന അരിക്കൊമ്പൻ എന്ന പേരിൽ അറിയപ്പെടുന്ന കാട്ടാനയെ പിടിക്കുന്നതിനായി പ്രത്യേക ടാസ്ക് ഫോഴ്സ് രൂപീകരിച്ചിട്ടുണ്ടോ; ഏതൊക്കെ വിഭാഗങ്ങളിൽ നിന്നുള്ള എത്ര പേരാണ് പ്രസ്തുത ടാസ്ക് ഫോഴ്‌സിൽ ഉൾപ്പെട്ടിട്ടുള്ളതെന്ന് അറിയിക്കാമോ;

പ്രസ്തുത ആനയെ പിടികൂടുന്നതിനായി പ്രത്യേകം ആക്ഷൻ പ്ലാൻ തയ്യാറാക്കിയിട്ടുണ്ടോ; വിശദാംശം ലഭ്യമാക്കുമോ;

പ്രസ്തുത ടാസ്ക് ഫോഴ്സ് എന്നാണ് പ്രവർത്തനമാരംഭിച്ചതെന്നും നാളിതുവരെ ടാസ്ക് ഫോഴ്‌സിന്റെ പ്രവർത്തനത്തിനായി എത്ര തുക ചെലവഴിച്ചിട്ടുണ്ടെന്നും വ്യക്തമാക്കുമോ?

വന്യജീവികള്‍ ജനവാസ മേഖലകളിലേയ്ക്ക് പതിവായി എത്തി ജനങ്ങളുടെ ജീവനും സ്വത്തിനും വ്യാപകമായി ഭീഷണിയുയര്‍ത്തുന്ന സാഹചര്യം പഠിക്കുന്നതിനും പ്രശ്നപരിഹാരങ്ങള്‍ക്കായി ശാസ്ത്രീയമായ പദ്ധതികള്‍ ആവിഷ്ക്കരിച്ച് നടപ്പാക്കുന്നതിനും ആവശ്യമായ നടപടികള്‍ സ്വീകരിക്കുമോയെന്ന് വ്യക്തമാക്കുമോ;

പുതുക്കാട് നിയോജക മണ്ഡലത്തില്‍പ്പെട്ട പാലപ്പിള്ളി റെയിഞ്ചിന് കീഴിലുള്ള പ്രദേശങ്ങളിൽ അടിയ്ക്കടിയുണ്ടാകുന്ന വന്യജീവി ആക്രമണം തടയുന്നതിനും ആക്രമണങ്ങള്‍ക്ക് ഇരയായവര്‍ക്ക് ധനസഹായം നല്‍കുന്നതിനും നടപടി സ്വീകരിക്കുമോയെന്ന് വ്യക്തമാക്കുമോ?

വന്യജീവി ശല്യം നിയന്ത്രിയ്ക്കുന്നതിനായി കേന്ദ്രസർക്കാർ അനുവദിച്ച ഫണ്ട് മുഴുവനായും ചെലവാക്കാൻ കഴിയാത്ത സാഹചര്യം സംസ്ഥാനത്ത് നിലവിലുണ്ടോ;

2010 മുതല്‍ ഈ ഇനത്തിൽ കേന്ദ്രത്തിൽ നിന്നും ലഭിച്ച തുകയിൽ നാളിതുവരെ ചെലവാക്കാനാകാത്ത ആകെ തുക എത്രയാണെന്ന് അറിയിക്കാമോ;

പ്രസ്തുത കാലയളവില്‍ ഏതൊക്കെ വർഷങ്ങളില്‍ അനുവദിക്കപ്പെട്ട തുകയാണ് ഇപ്രകാരം ചെലവാക്കാനാകാത്തതെന്നും ഓരോ വർഷവും അനുവദിച്ച തുകയും ചെലവാക്കാതെ ബാക്കിയായ തുകയും എത്ര വീതമാണെന്നും അറിയിക്കുമോ;

ഈ തുകകൾ ചെലവാക്കാനാകാത്തതിന്റെ കാരണങ്ങൾ എന്തൊക്കെയാണെന്ന് വിശദമാക്കുമോ;

വന്യമൃഗ ആക്രമണങ്ങള്‍ വർദ്ധിച്ചുവരുന്ന സാഹചര്യത്തിൽ വന്യമൃഗ ശല്യം നിയന്ത്രിക്കുന്നതിനായി കേന്ദ്രസർക്കാർ അനുവദിക്കുന്ന ഫണ്ടുകൾ പൂർണ്ണമായും ഫലപ്രദമായും സംസ്ഥാനത്ത് ചെലവഴിക്കുന്നതിന് എന്തൊക്കെ അടിയന്തര നടപടികൾ കൈക്കൊള്ളുമെന്ന് അറിയിക്കുമോ?

കോതമംഗലം നിയോജക മണ്ഡലത്തില്‍ കുട്ടമ്പുഴ ഗ്രാമപഞ്ചായത്തില്‍ പൂയംകുട്ടി വനത്തില്‍ ഉറിയംപെട്ടി ആദിവാസി കോളനിയിലെ പൊന്നപ്പന്‍ ചിന്നസ്വാമി കാട്ടുപോത്തിന്റെ ആക്രമണത്തില്‍ മരിച്ചത് ശ്രദ്ധയില്‍പ്പെട്ടിട്ടുണ്ടോ;

കാട്ടുപോത്തിന്റെ ആക്രമണത്തില്‍ മരിച്ച പൊന്നപ്പന്‍ ചിന്നസ്വാമിയുടെ കുടുംബത്തിന് അടിയന്തര ധനസഹായം ലഭ്യമാക്കുന്നതിന് വേണ്ട നടപടി സ്വീകരിച്ചിട്ടുണ്ടോ; വിശദമാക്കാമോ;

ഇല്ലെങ്കിൽ നഷ്ടപരിഹാര തുക അടിയന്തരമായി ലഭ്യമാക്കുന്നതിന് വേണ്ട നടപടി സ്വീകരിക്കുമോയെന്ന് വിശദമാക്കാമോ?

എറണാകുളം ജില്ലയിലെ കോടനാട് കപ്രിക്കാട് മിനി മൃഗശാലയില്‍ ഇല്ലാത്ത മൃഗങ്ങള്‍ക്ക് ആഹാരം നല്‍കിയ വകയില്‍ പണം തട്ടിയ സംഭവം ശ്രദ്ധയില്‍പ്പെട്ടിട്ടുണ്ടോ; ആയതിന്റെ വിശദാംശം ലഭ്യമാക്കുമോ;

തട്ടിപ്പ് നടന്ന കാലഘട്ടത്ത് മൃഗശാലയിലെ ചുമതല വഹിച്ച ഉദ്യോഗസ്ഥര്‍ ആരെല്ലാമെന്നും ഇപ്പോള്‍ ആ ഉദ്യോഗസ്ഥര്‍ ഏതൊക്കെ സ്ഥലങ്ങളില്‍ ഏതൊക്കെ തസ്തികകളില്‍ ജോലി നോക്കുന്നുവെന്നും വ്യക്തമാക്കാമോ;

തട്ടിപ്പ് സംബന്ധിച്ച് ഏതെങ്കിലും തരത്തിലുള്ള അന്വേഷണം വനം വകുപ്പ് നടത്തിയിട്ടുണ്ടോ; എങ്കില്‍ അന്വേഷണത്തിലെ കണ്ടെത്തലുകള്‍ എന്തെല്ലാമെന്ന് വിശദമാക്കാമോ;

വനം വകുപ്പിന്റെ കണ്ടെത്തലിന്റെ അടിസ്ഥാനത്തിൽ എത്ര രൂപയുടെ വെട്ടിപ്പ് നടന്നുവെന്നും ഇതിന്റെ ഉത്തരവാദി ആരാണെന്നും വ്യക്തമാക്കാമോ;

പ്രസ്തുത തട്ടിപ്പില്‍ വ്യാജരേഖകള്‍ ചമയ്ക്കല്‍, തെളിവ് നശിപ്പിക്കല്‍, ഔദ്യോഗിക പദവി ദുര്‍വിനിയോഗം ചെയ്യല്‍ എന്നീ കുറ്റകൃത്യങ്ങള്‍ നടന്നതായി വകുപ്പ് തല അന്വേഷണത്തില്‍ തെളിഞ്ഞിട്ടുണ്ടോ; എങ്കില്‍ പ്രസ്തുത കേസ് എഫ്.ഐ.ആര്‍.രജിസ്റ്റര്‍ ചെയ്ത് പോലീസ് അന്വേഷണം നടത്തുവാന്‍ നിര്‍ദേശം നല്‍കുമോയെന്ന് വ്യക്തമാക്കുമോ?

കോതമംഗലം നിയോജക മണ്ഡലത്തിലെ തട്ടേക്കാട് പക്ഷി സങ്കേതത്തിന്റെ ഒരു കിലോമീറ്റര്‍ ചുറ്റളവിലുള്ള ബഫർ സോണിലെ നിര്‍മ്മിതികളുടെ എണ്ണം കണ്ടെത്തുന്നതിന് വിദഗ്‌ദ്ധ സമിതിയെ നിയോഗിച്ചിട്ടുണ്ടോ; വിശദമാക്കാമോ;

പ്രസ്തുത വിദഗ്‌ദ്ധ സമിതി ബഫര്‍സോണിലെ നിര്‍മ്മിതികളെ കുറിച്ച് റിപ്പോര്‍ട്ട് നല്കിയിട്ടുണ്ടോ; വിശദമാക്കാമോ;

പ്രസ്തുത വിദഗ്‌ദ്ധ സമിതി സമര്‍പ്പിച്ച റിപ്പോര്‍ട്ട് പ്രകാരം എത്ര നിര്‍മ്മിതികള്‍ കണ്ടെത്തിയിട്ടുണ്ടെന്ന് വിശദമാക്കാമോ;

കുട്ടമ്പുഴ, കീരംപാറ ഗ്രാമപഞ്ചായത്തുകള്‍ പ്രസ്തുത നിര്‍മ്മിതികളുടെ കണക്കെടുത്തിട്ടുണ്ടോ; വിശദമാക്കാമോ;

കുട്ടമ്പുഴ, കീരംപാറ ഗ്രാമപഞ്ചായത്തുകളും വിദഗ്‌ദ്ധ സമിതിയും എടുത്ത നിര്‍മ്മിതികളുടെ കണക്കുകൾ തമ്മില്‍ അന്തരം നിലനില്ക്കുന്നുണ്ടോ; എങ്കില്‍ അത് പരിഹരിക്കുവാന്‍ നടപടി സ്വീകരിക്കുമോയെന്ന് വിശദമാക്കാമോ?