സുഭിക്ഷ കേരളം പദ്ധതിയിലൂടെ തരിശുനിലങ്ങളില്‍ പുതിയതായി കൃഷിയിറക്കിയതിന്റെ ഫലമായി പാലക്കാട് ജില്ലയിലെ നെല്‍കൃഷിയില്‍ എത്ര വര്‍ദ്ധനവുണ്ടായെന്ന് വിശദമാക്കാമോ;

വെള്ളപ്പൊക്കത്തില്‍ നിന്നും കോള്‍നിലങ്ങളെ സംരക്ഷിക്കുന്നതിനായി എന്തെല്ലാം നടപടികള്‍ സ്വീകരിച്ച് വരുന്നു; വിശദമാക്കാമോ?

സംസ്ഥാനത്തിന്റെ ഭൂവിനിയോഗ ക്രമത്തിലും വിള ക്രമത്തിലും വന്ന മാറ്റം സംസ്ഥാനത്തെ ഭക്ഷ്യ സുരക്ഷയ്ക്കും പാരിസ്ഥിതിക സുസ്ഥിരതയ്ക്കും ഗുരുതരമായ ഭീഷണി ഉയര്‍ത്തുന്ന സാഹചര്യം ഉണ്ടായിട്ടുണ്ടോ എന്ന് പരിശോധിച്ചിട്ടുണ്ടോ;

സംസ്ഥാനത്തെ മൊത്തം കൃഷി വിസ്തൃതിയിലും ഒന്നില്‍ കൂടുതല്‍ പ്രാവശ്യം കൃഷി ഇറക്കുന്ന സ്ഥലത്തിന്റെ വിസ്തൃതിയിലും കുറവ് ഉണ്ടാകുന്നതും കാര്‍ഷികേതര ആവശ്യങ്ങള്‍ക്കുള്ള ഭൂവിനിയോഗം വര്‍ദ്ധിക്കുന്നതും ഗൗരവത്തോടെ പരിഗണിച്ചിട്ടുണ്ടോ;

ഇക്കാര്യത്തിൽ കർഷകരെ ബോധവൽക്കരിച്ചുകൊണ്ട് പാരിസ്ഥിതിക സുസ്ഥിരത നിലനിർത്താൻ സ്വീകരിച്ച നടപടികൾ വിശദമാക്കാമോ?

സംസ്ഥാനത്ത് പച്ചക്കറി ഉല്പാദനത്തില്‍ സ്വയം പര്യാപ്തത കൈവരിക്കുന്നതിനായി എന്തെല്ലാം പദ്ധതികളാണ് നടപ്പിലാക്കുന്നതെന്ന് വിശദമാക്കുമോ;

പച്ചക്കറി കൃഷിചെയ്യുന്ന കര്‍ഷകര്‍ക്ക് നിലവില്‍ എന്തെല്ലാം ആനുകൂല്യങ്ങളാണ് നല്‍കുന്നതെന്ന് അറിയിക്കുമോ;

കൃഷി വകുപ്പിന്റെ ഇടപെടലിലൂടെ പച്ചക്കറി കൃഷിയില്‍ മുന്‍ വര്‍ഷങ്ങളെക്കാള്‍ പുരോഗതിയുണ്ടാക്കാനായിട്ടുണ്ടോ; വ്യക്തമാക്കുമോ;

ഓണത്തിന് ഒരു മുറം പച്ചക്കറി എന്ന പേരില്‍ പദ്ധതി ആരംഭിച്ചിട്ടുണ്ടോ; വിശദാംശം വെളിപ്പെടുത്തുമോ?

കര്‍ഷകര്‍ക്ക് അവരുടെ ഉല്പന്നങ്ങൾക്ക് അനുയോജ്യമായ വിപണി കണ്ടെത്തി മതിയായ വില ലഭ്യമാക്കുന്നതിന് സഹായകരമായി എന്തൊക്കെ നടപടികളാണ് സ്വീകരിക്കുക എന്ന് വ്യക്തമാക്കുമോ;

കര്‍ഷകര്‍ക്ക് സഹായകരമായി അവരുടെ കൃഷികളുടെയും വിപണികളെയും സംബന്ധിച്ച് സമഗ്ര സർവ്വേ നടത്തി പദ്ധതികള്‍ ആസൂത്രണം ചെയ്യുന്നത് പരിഗണനയിലുണ്ടോ; വിശദവിവരം ലഭ്യമാക്കുമോ?

ഇതര സംസ്ഥാനങ്ങളില്‍ നിന്ന് വരുന്ന വിഷലിപ്തമായ പച്ചക്കറികളുടെ ഉപയോഗം മൂലം ജനങ്ങളുടെ ആരോഗ്യം അപകടത്തിലാകുന്നുവെന്നും ക്യാന്‍സര്‍ മുതലായ മാരക രോഗങ്ങള്‍ വര്‍ദ്ധിക്കുന്നുവെന്നും കണ്ടെത്തിയിട്ടുള്ളതായി ശ്രദ്ധയില്‍പ്പെട്ടിട്ടുണ്ടോ;

അടുത്ത അഞ്ച് വര്‍ഷത്തിനുള്ളില്‍ അന്‍പതിനായിരം ഹെക്ടര്‍ സ്ഥലത്ത് ജെെവ കൃഷി വ്യാപിപ്പിക്കുന്നതിന് കഴിഞ്ഞ സർക്കാർ ലക്ഷ്യമിട്ടിരുന്നോ; എങ്കില്‍ അത് നടപ്പിലാക്കാൻ സാധിച്ചിട്ടുണ്ടോയെന്ന് വ്യക്തമാക്കാമോ;

ജെെവ കൃഷി പ്രോത്സാഹിപ്പിക്കുന്നതിനും അതിലൂടെ സുരക്ഷിത ഭക്ഷണം ഉറപ്പുവരുത്തുന്നതിനും കൃഷി വകുപ്പ് പ്രത്യേക ഊന്നല്‍ നല്‍കുമോ?

കൃഷി ഭവന്‍ മുഖേന കൊപ്ര സംഭരണം നടപ്പിലാക്കാന്‍ നടപടി സ്വീകരിക്കുമോ; വ്യക്തമാക്കുമോ?

കേരളത്തിന്റെ ഔദ്യോഗിക പഴമായ ചക്കയുടെ ഉല്പാദനം ഏത് ജില്ലയിലാണ് കൂടുതലായിട്ടുള്ളത്; ഉല്പാദന വിവരം ജില്ല തിരിച്ച് അറിയിക്കാമോ;

ചക്കയുടെ മൂല്യ വര്‍ദ്ധിത ഉല്പന്നങ്ങള്‍ നിര്‍മ്മിക്കുന്നതിനും വിപണനം നടത്തുന്നതിനുമായി സ്വീകരിച്ചുവരുന്ന നടപടികള്‍ വിശദമാക്കാമോ;

പ്രമേഹരോഗികള്‍ക്ക് ഏറ്റവും അനുയോജ്യമായ ഭക്ഷണമായി ചക്കയുടെ വിവിധ ഉല്പന്നങ്ങളെ കണ്ടെത്തിയിട്ടുണ്ടോ; ഇതുമായി ബന്ധപ്പെട്ട് കേരളത്തില്‍ ഏതെങ്കിലും തരത്തിലുള്ള ക്ലിനിക്കല്‍ സ്റ്റഡി നടത്തിയിട്ടുണ്ടോ; വ്യക്തമാക്കാമോ;

ചക്കയുടെ ഉപയോഗ സാധ്യതകളെക്കുറിച്ച് ശാസ്ത്രീയമായ അറിവ് ലഭിക്കുന്നതിനായി ഒരു ക്ലിനിക്കല്‍ സ്റ്റഡി നടത്തുന്നതിന് തയ്യാറാകുമോ; വ്യക്തമാക്കാമോ?

നെന്മാറ നിയോജക മണ്ഡലത്തിലെ കാക്കയൂര്‍ പൊന്നുമംഗലം നെല്ലുുല്പാദക പാടശേഖര സമിതിയുടെ പ്രദേശത്ത് ആര്‍.ഐ.ഡി.എഫ് പദ്ധതി പ്രകാരം കാഡകനാല്‍ നവീകരണത്തിന് എത്ര തുകയാണ് അനുവദിച്ചിട്ടുള്ളതെന്ന് വിശദമാക്കുമോ;

ഈ പ്രവൃത്തിയുടെ നിലവിലെ സ്ഥിതി എന്താണെന്ന് സര്‍ക്കാര്‍ വിശദമാക്കുമോ;

ഈ പ്രവൃത്തി എന്ന് പൂര്‍ത്തീകരിക്കാന്‍ കഴിയുമെന്ന് വിശദമാക്കുമോ?

ഈ സര്‍ക്കാര്‍ അധികാരത്തില്‍ വന്ന ശേഷം ചങ്ങനാശ്ശേരി നിയോജകമണ്ഡലത്തില്‍ ആര്‍.ഐ.ഡി.എഫ്. പദ്ധതിയില്‍ ഉള്‍പ്പെടുത്തി അനുവദിച്ച പ്രവൃത്തികളുടെ വിശദവിവരം നല്‍കുമോ;

ഓരോ പ്രവൃത്തിക്കും അനുവദിച്ച തുക എത്രയെന്നും നിലവിലെ സ്ഥിതിയും വ്യക്തമാക്കുമോ; ഉത്തരവുകളുടെ പകര്‍പ്പ് ലഭ്യമാക്കുമോ?

കേരഗ്രാമം പദ്ധതിയില്‍ കടപ്ലാമറ്റം-മരങ്ങാട്ടുപള്ളി പഞ്ചായത്തുകളെ സംയുക്തമായി ഉള്‍പ്പെടുത്തുന്നതിന് 05.12.2021-ല്‍ വകുപ്പ് മന്ത്രിക്ക് പെറ്റീഷന്‍ നമ്പര്‍ 1522/വി.ഐ.പി./മി/ അഗ്രി/2021 പ്രകാരം നല്‍കിയ പരാതിയില്‍ സ്വീകരിച്ച നടപടികള്‍ വിശദമാക്കാമോ;

കാര്‍ഷിക മേഖലയായ കടുത്തുരുത്തി നിയോജകമണ്ഡലത്തിലെ കടപ്ലാമറ്റം, ഉഴവൂര്‍, മരങ്ങാട്ടുപള്ളി പഞ്ചായത്തുകളെ ഈ പദ്ധതിയില്‍ ഉള്‍പ്പെടുത്തി കര്‍ഷകര്‍ക്ക് ആശ്വാസം പകരുന്നതിനായുള്ള നടപടികള്‍ സ്വീകരിക്കുമോ;

കേരഗ്രാമം പദ്ധതിയില്‍ ഉള്‍പ്പെടുന്നതിനായുള്ള മാനദണ്ഡങ്ങള്‍ എന്തെല്ലാമെന്ന് വിശദമാക്കാമോ?

നഗരകൃഷി പ്രോത്സാഹിപ്പിക്കുന്നതിനായി നടത്താന്‍ ഉദ്ദേശിക്കുന്ന പദ്ധതികള്‍ എന്തൊക്കെ എന്ന് വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്ന ശേഷം വാമനപുരം മണ്ഡലത്തില്‍ കൃഷി വകുപ്പ് മുഖേന ഏതൊക്കെ പദ്ധതികള്‍ക്കാണ് ഫണ്ട് അനുവദിച്ചിട്ടുള്ളതെന്ന് വിശദമാക്കാമോ;

പദ്ധതിയുടെ പേര്, തുക, എത്ര പേര്‍ക്ക് ഇത് പ്രയോജനം ചെയ്തു എന്നുള്ള വിവരങ്ങള്‍ കൃഷി ഭവന്‍ അടിസ്ഥാനത്തില്‍ വിശദമാക്കാമോ?

മറ്റ് സംസ്ഥാനങ്ങളില്‍ നിന്നും കേരളത്തിലേക്ക് എത്തിക്കുന്ന പച്ചക്കറികളിലും മറ്റും മനുഷ്യജീവന് അപകടകരമായ നിലയില്‍ കീടനാശിനി പ്രയോഗം നടത്തിയിട്ടുള്ളതാണെന്ന കാര്യം ശ്രദ്ധയില്‍പ്പെട്ടിട്ടുണ്ടോ;

ഇത് കണ്ടെത്തുന്നതിനും വിഷരഹിത പച്ചക്കറി ലഭ്യമാക്കുന്നതിനും കൃഷി വകുപ്പ് എന്തൊക്കെ നടപടികളാണ് സ്വീകരിച്ചിട്ടുള്ളത്;

കേരളത്തിന്റെ അതിര്‍ത്തി ചെക്ക് പോസ്റ്റുകളില്‍ തന്നെ പരിശോധനയിലൂടെ വിഷസാന്നിദ്ധ്യം കണ്ടെത്തി അവയുടെ വിതരണം തടയാന്‍ കഴിയുമോ; ഇതിന് എന്തൊക്കെ നടപടികളാണ് സ്വീകരിക്കാന്‍ ഉദ്ദേശിക്കുന്നത്?

ഇതര സംസ്ഥാനങ്ങളിൽ നിന്നും കൊണ്ടുവരുന്ന പച്ചക്കറികളുടെ ഗുണനിലവാരവും അവയിലെ അവശിഷ്ട കീടനാശിനികളുടെ അളവും പരിശോധിക്കുന്നതിന് എന്തൊക്കെ നടപടികളാണ് സ്വീകരിച്ചിട്ടുള്ളത്?

സംസ്ഥാനത്ത് വിഷരഹിത പച്ചക്കറി ഉല്പാദിപ്പിക്കുന്നതിന് കർഷകർക്ക് എന്തൊക്കെ സഹായങ്ങളാണ് നല്‍കുന്നത്;

ചെറുപ്പക്കാരെ പച്ചക്കറി കൃഷിയിലേക്ക് കൂടുതലായി ആകർഷിക്കുന്നതിന് എന്തെങ്കിലും പുതിയ പദ്ധതി ആവിഷ്കരിച്ചിട്ടുണ്ടോ;

ക്യാൻസർ പോലുള്ള മാരകരോഗങ്ങള്‍ ബാധിക്കുന്നതിന് പ്രധാന കാരണം മറ്റ് സംസ്ഥാനങ്ങളില്‍ നിന്ന് കൊണ്ടുവരുന്ന വിഷലിപ്തമായ പച്ചക്കറിയാണെന്ന വസ്തുതയുടെ വെളിച്ചത്തില്‍ ജനങ്ങളെ കൂടുതല്‍ ഇതിനെക്കുറിച്ച് ബോധവല്‍ക്കരിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

നെല്‍ കര്‍ഷകര്‍ക്ക് ആവശ്യമായ ഫാക്ടംഫോസ്, പൊട്ടാഷ് എന്നീ വളങ്ങളുടെ വില ക്രമാതീതമായി വര്‍ദ്ധിച്ചത് കര്‍ഷകരെ പ്രതിസന്ധിയിലാക്കിയിട്ടുള്ള കാര്യം സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ;

വില വര്‍ദ്ധനവ് മൂലമുള്ള പ്രതിസന്ധി പരിഹരിക്കുന്നതിന് കര്‍ഷകര്‍ക്ക് രാസവള സബ്സിഡി ഉള്‍പ്പെടെ ധനസഹായം നല്‍കുന്ന കാര്യം സര്‍ക്കാര്‍ പരിഗണിക്കുമോ; വിശദമാക്കാമോ?

മണലൂര്‍ മണ്ഡലത്തിലെ കോള്‍ ചാലുകളില്‍ നിന്നും എക്കല്‍ നീക്കം ചെയ്യുന്നതിന്റെ ഭാഗമായി ബണ്ടുകളില്‍ നിക്ഷേപിച്ച മണ്ണ് നിരപ്പാക്കാത്തതുമൂലം കര്‍ഷകര്‍ക്ക് വിത്തും, വളവും, മറ്റ് സംവിധാനങ്ങളും പാടശേഖരങ്ങളില്‍ എത്തിക്കുന്നതിനുള്ള ഗതാഗത സൗകര്യം തടസ്സപ്പെട്ടിട്ടുള്ളത് ശ്രദ്ധയില്‍പ്പെട്ടിട്ടുണ്ടോ;

ഈ വര്‍ഷത്തെ കൃഷി സുഗമമാക്കുന്നതിന് പ്രസ്തുത തടസ്സം നീക്കം ചെയ്യുന്നതിന് ആവശ്യമായ അടിയന്തര നടപടി സ്വീകരിക്കുമോ; വിശദാംശങ്ങള്‍ അറിയിക്കാമോ?

ഈ സർക്കാർ അധികാരത്തിൽ വന്ന ശേഷം നെൽ കൃഷിയുടെ ഉല്പാദനവും ഉല്പാദന ക്ഷമതയും വർദ്ധിപ്പിക്കുന്നതിന് എന്തെല്ലാം നടപടി സ്വീകരിച്ചിട്ടുണ്ട്;

തരിശിടുന്ന പാടശേഖരങ്ങളിൽ കൃഷി ചെയ്യുന്ന പ്രത്യേക പദ്ധതി പ്രകാരം എത്ര ഹെക്ടർ സ്ഥലത്ത് കൃഷി ചെയ്യാൻ സാധിച്ചിട്ടുണ്ട്; വിശദമാക്കുമോ?

ഒരേക്കറിൽ നെൽകൃഷി ഇറക്കുന്നതിനും വളമിടൽ, കളപറിക്കൽ, കൊയ്ത്ത് തുടങ്ങിയ അനുബന്ധ പ്രവർത്തനങ്ങൾക്കുമായി എത്ര രൂപ ചെലവ് വരുമെന്നാണ് സർക്കാർ കണക്കാക്കിയിട്ടുള്ളത്; വ്യക്തമാക്കാമോ;

ഇക്കഴിഞ്ഞ വർഷമുണ്ടായ മഴയിലും വെള്ളപ്പൊക്കത്തിലും നെൽകൃഷി നശിച്ചവർക്ക് ഒരേക്കറിന് എത്ര രൂപ നിരക്കിലാണ് നഷ്ടപരിഹാരം വിതരണം ചെയ്തതെന്ന് വ്യക്‌തമാക്കാമോ;

നെൽ കൃഷി നാശത്തിന് നഷ്ടപരിഹാരം നൽകുന്നതിനായി നിശ്ചയിച്ചിട്ടുള്ള മാനദണ്ഡങ്ങൾ എന്തൊക്കെയാണെന്ന് വിശദമാക്കുമോ;

പ്രസ്തുത മാനദണ്ഡങ്ങൾ പ്രകാരം നെൽ കൃഷി നാശത്തിന് നിശ്ചയിച്ചിട്ടുള്ള നഷ്ടപരിഹാര തുക എത്രയാണ്; പ്രസ്തുത തുക കൃഷി ചെലവിന് ആനുപാതികമാണെന്ന് കരുതുന്നുണ്ടോ;

ഇല്ലായെങ്കിൽ പ്രസ്തുത മാനദണ്ഡങ്ങളിൽ കാലാനുസൃതമായ മാറ്റങ്ങൾ വരുത്തുന്നതിനും നഷ്ടപരിഹാരത്തുക വർദ്ധിപ്പിക്കുന്നതിനുമാവശ്യമായ അടിയന്തര നടപടികൾ സ്വീകരിക്കുമോ; വ്യക്തമാക്കാമോ?

സംസ്ഥാനത്ത് വിവിധ സ്ഥലങ്ങളില്‍ കൊയ്ത നെല്ലുകൾ സംഭരിക്കാൻ മൂന്നാഴ്ചയിൽ കൂടുതൽ സമയം വൈകിയത് കാരണം കർഷകർക്കുണ്ടായ നഷ്ടം ശ്രദ്ധയിൽപ്പെട്ടിട്ടുണ്ടോ;

നഷ്ടം സംഭവിച്ച കർഷകരുടെ നഷ്ടം നികത്തുന്നതിന് നടപടികൾ സ്വീകരിക്കുമോ; കൃത്യ സമയത്ത് തന്നെ നെല്ല് കൊയ്ത് സംഭരിക്കുന്നതിന് നടപടി സ്വീകരിക്കുമോ?

കുട്ടനാട്ടിലെ എല്ലാ പാടശേഖരങ്ങളുടെയും പുറം ബണ്ടുകളില്‍ ട്രാക്ടര്‍ റോഡ് നിര്‍മ്മിക്കുന്നതിന് നടപടികള്‍ സ്വീകരിക്കുമോ; ഇത്തരം നിര്‍മ്മാണത്തിലൂടെ മടവീഴ്ച തടയാന്‍ കഴിയുമെന്നത്‌ പരിഗണിച്ച് പുറം ബണ്ടുകളില്‍ ട്രാക്ടര്‍ റോഡ് നിര്‍മ്മിക്കുന്നതിന് യുദ്ധകാലാടിസ്ഥാനത്തില്‍ ഒരു പദ്ധതി നടപ്പാക്കുമോ?

സംസ്ഥാനത്ത് നെല്‍ കൃഷി പ്രോത്സാഹിപ്പിക്കുന്നതിന്റെയും നെല്‍വയലുകള്‍ സംരക്ഷിച്ചുനിര്‍ത്തി പാരിസ്ഥിതിക സന്തുലനം ഉറപ്പുവരുത്തുന്നതിന്റെയും ഭാഗമായി നെല്‍വയല്‍ ഉടമകള്‍ക്ക് സഹായം നല്കുന്ന പദ്ധതി നിലവിലുണ്ടോ; വിശദാംശങ്ങള്‍ ലഭ്യമാക്കാമോ;

നെല്ലുത്പാദനവും ഉല്പാദനക്ഷമതയും വര്‍ദ്ധിപ്പിക്കുന്നതിനും തരിശുഭൂമി കൃഷിയോഗ്യമാക്കുന്നതിനുമായി എന്തെല്ലാം നടപടികള്‍ സര്‍ക്കാര്‍ സ്വീകരിച്ചിട്ടുണ്ട്; വിശദാംശങ്ങള്‍ നല്‍കുമോ; തരിശിടല്‍ ഒഴിവാക്കുന്നതിനായി ആരംഭിച്ച തരിശുരഹിത പഞ്ചായത്ത് സ്കീം സംസ്ഥാനത്ത് എത്രത്തോളം ഫലപ്രദമായി നടപ്പാക്കാന്‍ കഴിഞ്ഞിട്ടുണ്ട്; വ്യക്തമാക്കാമോ?

ഈ സര്‍ക്കാരിന്റെ കാലയളവില്‍ നെല്‍കൃഷി വികസനത്തിന്റെ പ്രവേഗം വര്‍ദ്ധിപ്പിക്കുന്നതിനായി സ്വീകരിച്ച നടപടികള്‍ അവലോകനം ചെയ്തിട്ടുണ്ടോ; വിശദമാക്കുമോ;

സുസ്ഥിര നെല്‍കൃഷി വികസനം എന്ന ഘടക പദ്ധതിയില്‍ നെല്‍കൃഷി ചെയ്യുന്ന മുഴുവന്‍ കര്‍ഷകര്‍ക്കും ആനുകൂല്യം ലഭ്യമാക്കുന്നതുമായി ബന്ധപ്പെട്ട് നടത്തിയ പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; വിശദമാക്കുമോ;

ഒരുപൂ കൃഷി ഇരുപൂ കൃഷിയിലേക്ക് മാറ്റുക, കരനെല്‍ കൃഷി, തരിശ് കൃഷി എന്നീ പരിപാടികളിലൂടെ നെല്‍കൃഷി വിസ്തൃതി വികസനം സാദ്ധ്യമാക്കുന്നതിനായി നടത്തിയിട്ടുള്ള പ്രവര്‍ത്തനങ്ങള്‍ സംബന്ധിച്ച വിശദാംശം നല്‍കാമോ?

വടക്കാഞ്ചേരി മണ്ഡലത്തില്‍ കേരഗ്രാമം പദ്ധതിയില്‍ ഉള്‍പ്പെടുത്തിയ പഞ്ചായത്തുകള്‍ ഏതെല്ലാമാണെന്ന് വ്യക്തമാക്കാമോ;

പ്രസ്തുത പദ്ധതി പ്രകാരം മണ്ഡലത്തിലെ വിവിധ പഞ്ചായത്തുകള്‍ക്ക് അനുവദിച്ച തുകയും, ആയതിന്റെ ചെലവ് സംബന്ധിച്ച വിശദാംശങ്ങളും വ്യക്തമാക്കാമോ?

കോട്ടക്കല്‍ മണ്ഡലത്തില്‍ ഏതൊക്കെ പഞ്ചായത്തുകളിലാണ് കേരഗ്രാമം പദ്ധതി നടപ്പിലാക്കിയിട്ടുള്ളതെന്ന് അറിയിക്കുമോ;

മണ്ഡലത്തില്‍ നിലവില്‍ കേരഗ്രാമം പദ്ധതി നടപ്പിലാക്കിയിട്ടുള്ള പഞ്ചായത്തുകളിലെ എത്ര കര്‍ഷകര്‍ക്ക് എന്തെല്ലാം ആനുകൂല്യങ്ങള്‍ ലഭിക്കുന്നുണ്ടെന്ന് വിശദമാക്കുമോ;

കേര കൃഷിയും അനുബന്ധ വ്യവസായങ്ങളും വളരെ നല്ല രീതിയില്‍ നടക്കുന്ന വളാഞ്ചേരി നഗരസഭ, കോട്ടക്കല്‍ നഗരസഭ, മാറാക്കര പഞ്ചായത്ത് എന്നിവിടങ്ങളില്‍ കൂടി കേരഗ്രാമം പദ്ധതി ആരംഭിക്കുന്നതിന് സമര്‍പ്പിച്ച നിവേദനത്തിന്മേല്‍ സ്വീകരിച്ച നടപടികള്‍ വിശദമാക്കുമോ; ഇവിടങ്ങളില്‍ പദ്ധതി നടപ്പിലാക്കുവാന്‍ നടപടി സ്വീകരിക്കുമോ?

സര്‍ക്കാര്‍ പ്രഖ്യാപിച്ച ഉല്പാദന ചെലവിന്റെ ഒന്നര ഇരട്ടി വില നിശ്ചയിച്ച് പച്ചതേങ്ങ സംഭരിക്കുമെന്ന വാഗ്ദാനം എപ്പോള്‍ നടപ്പിലാക്കുമെന്ന് വ്യക്തമാക്കുമോ;

ഗ്രാമപഞ്ചായത്തുകള്‍ തോറും പച്ചതേങ്ങ സംഭരിക്കുന്ന സംവിധാനം ഒരുക്കുന്ന കാര്യം പരിഗണനയിലുണ്ടോ; വിശദമാക്കാമോ;

കഴിഞ്ഞ ആറ് വര്‍ഷമായി പച്ചതേങ്ങ സംഭരണം നിലച്ചത് കാരണം സംസ്ഥാനത്തെ നാളികേര കര്‍ഷകര്‍ക്കുണ്ടായ നഷ്ടം എത്രയാണെന്ന് വ്യക്തമാക്കുമോ?

ഈ സർക്കാർ അധികാരത്തിൽ വന്നതിനു ശേഷം കേരഗ്രാമം പദ്ധതി നടപ്പിലാക്കുന്നതിന് തിരഞ്ഞെടുത്ത പ്രദേശങ്ങൾ ഏതൊക്കെയാണെന്ന് അറിയിക്കാമോ;

പ്രസ്തുത പദ്ധതി പ്രകാരം എന്തൊക്കെ സേവനങ്ങളാണ് കർഷകർക്ക് ലഭിക്കുന്നതെന്ന്‌ അറിയിക്കാമോ?

ആലത്തൂര്‍ മണ്ഡലത്തിലെ ഏതൊക്കെ പഞ്ചായത്തുകളെ ഇതുവരെ കേരഗ്രാമം പദ്ധതിയില്‍ ഉള്‍പ്പെടുത്തിയെന്നും എന്തൊക്കെ കാര്യങ്ങള്‍ ചെയ്തുവെന്നും വിശദമാക്കാമോ;

പുതുതായി ഏതെങ്കിലും ഗ്രാമപഞ്ചായത്തുകളെ കേരഗ്രാമം പദ്ധതിയില്‍ ഉള്‍പ്പെടുത്താന്‍ തെരഞ്ഞെടുത്തിട്ടുണ്ടോ എന്ന് അറിയിക്കാമോ?

സംസ്ഥാനത്ത് നാളികേരത്തിന്റെ 'ഉല്‍പാദനം' കുറഞ്ഞ് വരുന്നതായി ശ്രദ്ധയില്‍പ്പെട്ടിട്ടുണ്ടോ;

നിലവിലുള്ള നാളികേരകൃഷി സംരക്ഷിക്കുന്നതിനായി കര്‍ഷകര്‍ നേരിടുന്ന സാമ്പത്തിക ബുദ്ധിമുട്ടുകള്‍ പരിഹരിക്കുന്നതിന് നടപടി സ്വീകരിക്കുമോ;

നാളികേരകൃഷി പ്രോത്സാഹിപ്പിക്കുവാന്‍ എന്തെല്ലാം നടപടികളാണ് സ്വീകരിച്ചിട്ടുള്ളത്; വിശദമാക്കാമോ;

നല്ലയിനം നാളികേര തൈകള്‍ കര്‍ഷകര്‍ക്ക് വിതരണം ചെയ്യാന്‍ നടപടി സ്വീകരിക്കുമോ?

സംസ്ഥാനത്ത് തെങ്ങ് കൃഷിയുടെ വിസ്തൃതി കഴിഞ്ഞ കുറച്ച് വർഷങ്ങളായി കുറഞ്ഞ് വരുന്നത് ശ്രദ്ധയിൽപ്പെട്ടിട്ടുണ്ടോ; എങ്കിൽ ഇതിന്റെ കാരണം വ്യക്തമാക്കുമോ;

സംസ്ഥാനത്തിന്റെ മൊത്തം കൃഷി വിസ്തൃതിയുടെ എത്ര ശതമാനമാണ് നിലവിലുള്ള തെങ്ങ് കൃഷിയെന്നും 2011-12 ൽ ഇത്‌ എത്ര ശതമാനമായിരുന്നു എന്നും വ്യക്തമാക്കുമോ;

സംസ്ഥാനത്തെ പ്രധാന വിളകളിൽ ഒന്നായ തെങ്ങ് കൃഷിയുടെ വിസ്തൃതിയിലും ഉല്പാദനം, ഉല്പാദനക്ഷമത എന്നിവയിലും വലിയ കുറവ് ഉണ്ടാകുന്ന സാഹചര്യത്തിൽ തെങ്ങ് കൃഷി പ്രോത്സാഹിപ്പിക്കുന്നതിന് പ്രത്യേക സബ്സിഡി നൽകുന്നത് ഉൾപ്പെടെ എന്തൊക്കെ നടപടികൾ സ്വീകരിക്കുമെന്ന് വ്യക്തമാക്കുമോ; വിശദാംശം നൽകുമോ?

നാളികേരത്തിന്റെ വിലയിടിവ് നേരിടുന്ന കര്‍ഷകരെ സഹായിക്കുന്നതിനായി കൂടുതല്‍ സംഭരണ കേന്ദ്രങ്ങള്‍ ആരംഭിക്കുന്നതിനും നടപടിക്രമങ്ങള്‍ ലഘൂകരിക്കുന്നതിനും നടപടികള്‍ സ്വീകരിക്കുമോ; വ്യക്തമാക്കുമോ?

സംസ്ഥാനത്ത് തോട്ടവിളകളുടെ സംരക്ഷണത്തിനും മൂല്യവർദ്ധനവ് ഉറപ്പാക്കുന്നതിനും കാര്യക്ഷമമായ പദ്ധതികൾ നിലവിലില്ല എന്ന കാര്യം ഗൗരവത്തോടെ കാണുന്നുണ്ടോ;

റബ്ബർ, കാപ്പി തുടങ്ങിയ തോട്ടവിളകളുടെ കൃഷിവിസ്തൃതി സംസ്ഥാനത്ത് കുറഞ്ഞു വരുന്ന കാര്യം ശ്രദ്ധയിൽപ്പെട്ടിട്ടുണ്ടോ; വിശദാംശം നൽകുമോ;

തോട്ടവിളകളുടെ സംരക്ഷണത്തിനും മൂല്യ വർദ്ധനവിനും പുനർ നടീലിനും ഉല്പാദന ക്ഷമത വർദ്ധനവിനും ഉതകുന്ന പദ്ധതികൾ ആവിഷ്കരിച്ച് നടപ്പാക്കുമോ; വിശദാംശം നൽകുമോ?

കാര്‍ഷികോല്പന്നങ്ങളുടെ മൂല്യ വര്‍ദ്ധനവിനും കര്‍ഷകരുടെ വരുമാനം വര്‍ദ്ധിപ്പിക്കുന്നതിനും എസ്.എഫ്.എ.സി. വഴി പദ്ധതികള്‍ നടപ്പിലാക്കിയിട്ടുണ്ടോ; എങ്കില്‍ ഇതിന്റെ വിശദവിവരം നല്‍കുമോ?

ചെറുകിട നാമമാത്ര കര്‍ഷകര്‍ക്കുള്ള കാര്‍ഷിക സൗജന്യ വൈദ്യുത പദ്ധതിയുടെ ഗുണഭോക്തൃ പട്ടിക പുതുക്കി അനര്‍ഹരെ ഒഴിവാക്കുന്നതിനായി തൃശ്ശൂര്‍ ജില്ലയില്‍ നടത്തിയ കര്‍മ്മ പരിപാടിയുടെ വിശദാംശങ്ങള്‍ നല്‍കുമോ;

ഈ നടപടി പൂര്‍ത്തീകരിച്ചിട്ടുണ്ടോ; ലിസ്റ്റ് പ്രസിദ്ധീകരിച്ചിട്ടുണ്ടെങ്കില്‍ അത് എന്നാണെന്ന് അറിയിക്കുമോ;

ലിസ്റ്റ് പ്രസിദ്ധീകരിക്കുന്നതിന് മുമ്പ് അനര്‍ഹരുടെ പട്ടിക കെ.എസ്.ഇ.ബി. ക്ക് കൈമാറിയിട്ടുണ്ടോ;

ഇതിന്റെ അടിസ്ഥാനത്തില്‍ കര്‍ഷകര്‍ക്ക് കെ.എസ്.ഇ.ബി.യില്‍ നിന്ന് പലിശ സഹിതം കുടിശ്ശിക അടയ്ക്കുന്നതിന് നോട്ടീസ് ലഭിച്ച വിവരം ശ്രദ്ധയില്‍പ്പെട്ടിട്ടുണ്ടോ;

ഗുണഭോക്തൃ പട്ടികയില്‍ നിന്ന് അനര്‍ഹരായി കണ്ടെത്തി ഒഴിവാക്കിയ കണക്ഷനുകളുടെ എണ്ണം കൃഷി ഭവന്‍ തിരിച്ച് നല്‍കുമോ;

ഇപ്രകാരം ഒഴിവാക്കിയ കണക്ഷനുകള്‍ക്ക് ഏത് തീയതി വരെ സൗജന്യ വൈദ്യുതി ഉണ്ടായിരിക്കുമെന്ന കാര്യം അറിയിക്കുമോ?

കൃഷി വകുപ്പിന്റെ നിയന്ത്രണത്തില്‍ കുരുമുളക് സമിതികള്‍ പ്രവര്‍ത്തിക്കുന്നുണ്ടോ; സമിതിയുടെ രൂപീകരണ മാനദണ്ഡവും, ഉദ്ദേശലക്ഷ്യവും വ്യക്തമാക്കുമോ;

സംസ്ഥാനത്ത് നിലവില്‍ എത്ര സമിതികളാണ് പ്രവര്‍ത്തിക്കുന്നത്; ജില്ല തിരിച്ച് വ്യക്തമാക്കുമോ?

ഈ സര്‍ക്കാര്‍ അധികാരമേറ്റതിനു ശേഷം നാളിതുവരെ മഴക്കെടുതിയും മറ്റ് പ്രകൃതിക്ഷോഭവും മൂലം കാര്‍ഷിക മേഖലയ്ക്കുണ്ടായ നഷ്ടങ്ങളും കര്‍ഷകര്‍ക്കുണ്ടായ ദുരിതവും സംബന്ധിച്ച വിശദാംശം ലഭ്യമാക്കുമോ;

ഇവരെ സഹായിക്കാനായി സര്‍ക്കാര്‍ സ്വീകരിച്ച നടപടികള്‍ എന്തെല്ലാമെന്നും ഇതിനായി കേന്ദ്ര സഹായം ലഭ്യമായോയെന്നുമുള്ള വിശദാംശം വ്യക്തമാക്കുമോ?

2021-22 കാലയളവില്‍ സംസ്ഥാനത്തെ കര്‍ഷകര്‍ക്ക് പ്രകൃതിക്ഷോഭ ദുരിതാശ്വാസ ഇനത്തില്‍ എത്രകോടി രൂപ നല്‍കി എന്ന് അറിയിക്കുമോ;

ഇതിനായി ഏതെല്ലാം ഫണ്ടുകളില്‍ നിന്ന് എത്ര രൂപ വീതം നല്‍കി എന്ന് വിശദമാക്കുമോ?

തിരുവല്ല നിരണത്ത് നെല്‍ കര്‍ഷകന്‍ ആത്മഹത്യ ചെയ്ത സംഭവം സർക്കാർ ഗൗരവത്തോടെ കാണുന്നുണ്ടോ ;

കൃഷി ആവശ്യത്തിന് ബാങ്കില്‍ നിന്ന് എടുത്ത വായ്പ തിരിച്ചടക്കാൻ നിവൃത്തിയില്ലാതെയാണ് ആത്മഹത്യ ചെയ്തതെന്നത് പരിശോധിച്ചിരുന്നോ ;

സമാനമായ സംഭവങ്ങൾ ആവർത്തിക്കാതിരിക്കുന്നതിന് സ്വീകരിച്ച നടപടികൾ വിശദമാക്കാമോ ?

പൂഞ്ഞാര്‍ നിയോജകമണ്ഡലത്തില്‍ 2021 ഒക്ടോബറിലുണ്ടായ കനത്ത മഴയെത്തുടര്‍ന്നുണ്ടായ പ്രളയത്തിലും ഉരുള്‍പൊട്ടലിലും മണ്ണിടിച്ചിലിലും കൃഷിഭൂമിക്കും കാര്‍ഷികവിളകൾക്കും ഉണ്ടായ നാശനഷ്ടങ്ങൾക്ക് കര്‍ഷകര്‍ക്ക് അർഹമായ നഷ്ടപരിഹാരം ലഭ്യമാക്കിയിട്ടുണ്ടോ; വിശദാംശം ലഭ്യമാക്കുമോ;

മണ്ഡലത്തിൽ മഴക്കെടുതിമൂലം തകർന്ന കൃഷി ഭൂമികൾ വീണ്ടും കൃഷിയോഗ്യമാക്കുന്നതിനായി എന്തെല്ലാം നടപടികൾ സ്വീകരിച്ചിട്ടുണ്ടെന്ന് വ്യക്തമാക്കുമോ;

കര്‍ഷകര്‍ക്കുണ്ടായ നഷ്ടങ്ങള്‍ പരിഹരിക്കുന്നതിനും തുടര്‍കൃഷിക്ക് ആവശ്യമായ സാഹചര്യം ഒരുക്കുന്നതിനും മണ്ണിടിച്ചിലുണ്ടായ സ്ഥലങ്ങളിലെ കൃഷി ഭൂമികൾ സംരക്ഷിക്കുന്നതിനും ആവശ്യമായ നടപടികള്‍ സ്വീകരിക്കുമോയെന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്ന ശേഷം ഇരിക്കൂര്‍ മണ്ഡലത്തില്‍ മഴക്കെടുതിയില്‍ കൃഷിനാശം സംഭവിച്ച കര്‍ഷകര്‍ക്ക് നല്‍കിയ നഷ്ടപരിഹാര തുക എത്രയെന്ന് പഞ്ചായത്തടിസ്ഥാനത്തില്‍ വ്യക്തമാക്കാമോ;

നഷ്ടപരിഹാരം ലഭിക്കുന്നതിനുവേണ്ടി അപേക്ഷിച്ച എല്ലാ കര്‍ഷകര്‍ക്കും തുക അനുവദിച്ചിട്ടുണ്ടോ; ഇല്ലെങ്കില്‍ നഷ്ടപരിഹാരതുക നല്‍കാത്തതിന്റെ കാരണവും, എത്ര പേര്‍ക്ക് നല്‍കാനുണ്ടെന്നും വ്യക്തമാക്കാമോ?

പേരാമ്പ്ര മണ്ഡലത്തില്‍ കോഴിക്കോട് ജില്ലാ പഞ്ചായത്തിന്റെ കീഴിലുള്ള കൂത്താളി കൃഷി ഫാം പൂർണ്ണമായും കൃഷിയുക്തമാക്കുന്നതിന് എന്തൊക്കെ പ്രൊപ്പോസലുകൾ നിലവിലുണ്ടെന്ന് വ്യക്തമാക്കുമോ ;

കഴിഞ്ഞ സർക്കാരിന്റെ കാലത്ത് പ്രസ്തുത ഫാമുമായി ബന്ധപ്പെട്ട് മന്ത്രിതലത്തിലെടുത്ത എന്തൊക്കെ തീരുമാനങ്ങൾ ഉണ്ടായിരുന്നെന്നും എന്തൊക്കെ നടപ്പിൽ വരുത്തിയെന്നും അറിയിക്കാമോ?

ഭൂവിസ്തൃതി കൊണ്ട് ഏഷ്യയിലെ ഏറ്റവും വലിയ വിത്തുകൃഷിത്തോട്ടമായ മലപ്പുറം ജില്ലയിലെ മുണ്ടേരിയില്‍ ഫാം ടൂറിസം നടപ്പാക്കുന്നതുമായി ബന്ധപ്പെട്ട് ഏതെങ്കിലും പദ്ധതികള്‍ കൃഷി വകുപ്പ് മുഖാന്തിരം സമര്‍പ്പിച്ചിട്ടുണ്ടോ; വിശദമാക്കാമോ; ഇല്ലെങ്കില്‍ ഈ കാര്യം സര്‍ക്കാര്‍ പരിഗണിക്കുമോ;

മുണ്ടേരി വിത്തുകൃഷിത്തോട്ടത്തില്‍ ഫാം ടൂറിസം പദ്ധതി നടപ്പാക്കണമെന്ന് ആവശ്യപ്പെട്ട് ഗവണ്‍മെന്റ് ഫാം വര്‍ക്കേഴ്സ് യൂണിയന്‍ (സി.ഐ.ടി.യു.) മുണ്ടേരി യൂണിറ്റ് സെക്രട്ടറി കൃഷി ഡയറക്ടര്‍മാര്‍ക്കും കൃഷി മന്ത്രിക്കും നല്‍കിയ നിവേദനങ്ങളില്‍ സ്വീകരിച്ച നടപടികള്‍ വിശദമാക്കാമോ;

പ്രസ്തുത വിത്തുകൃഷിത്തോട്ടം ഫാം ടൂറിസത്തിന് അനുയോജ്യമാണോ എന്ന പഠനം നടത്തുന്നതിനും വിശദമായ പദ്ധതി രേഖ തയ്യാറാക്കുന്നതിനും നടപടി സ്വീകരിക്കുമോ; വ്യക്തമാക്കാമോ?

കൃഷി ഭൂമിയില്‍ കൃഷി ഇറക്കാതെ തരിശുഭൂമിയാക്കി വെക്കുന്നതിനെതിരെ എന്തൊക്കെ നടപടികളാണ് സ്വീകരിച്ച് വരുന്നതെന്ന് വിശദമാക്കാമോ;

നാദാപുരം മണ്ഡലത്തില്‍ ഗ്രാമ പഞ്ചായത്ത് വാര്‍ഡ്‌ തിരിച്ച് തരിശു ഭൂമിയുടെ കണക്ക് എടുത്തിട്ടുണ്ടോ; എങ്കില്‍ കണക്ക് ലഭ്യമാക്കാമോ?

കേരളത്തിലെ കാര്‍ഷിക ഉല്പന്നങ്ങള്‍ ബ്രാന്‍ഡ് ചെയ്ത് ലോകവിപണിയില്‍ അവതരിപ്പിക്കാന്‍ നടപടി സ്വീകരിക്കാമോ;

തായ്‌ലാന്റ് മാതൃകയില്‍ കാര്‍ഷിക ഉല്പന്നങ്ങള്‍ ഡ്രൈ ചെയ്ത് കേരള ബ്രാന്‍ഡ് ആയി അവതരിപ്പിക്കുന്നതിന് സര്‍ക്കാര്‍ പുതിയ സംവിധാനം ഏര്‍പ്പെടുത്തുമോ;

സര്‍ക്കാര്‍ സംവിധാനത്തില്‍ അഫിലിയേറ്റ് ചെയ്യുന്നതിന് സാധാരണ കര്‍ഷകര്‍ക്കും അവസരം നല്കി പദ്ധതി താഴെത്തട്ടിലേക്ക് വ്യാപിപ്പിക്കുന്നതിന് നടപടി സ്വീകരിക്കുമോ;

സീസണ്‍ സമയത്ത് സുലഭമായി ലഭിക്കുന്ന കാര്‍ഷിക ഉല്പന്നങ്ങള്‍ കേടാകാതെ സൂക്ഷിക്കുന്നതിന് സംവിധാനമില്ല എന്ന വലിയ വെല്ലുവിളിയെ നേരിടുന്നതിന് ഇത്തരം ഡ്രൈയിംഗ് സമ്പ്രദായത്തിന് സാധിക്കുമെന്നതിനാല്‍ അവയെ പ്രോത്സാഹിപ്പിക്കാന്‍ നടപടി സ്വീകരിക്കാമോ?

കയ്പമംഗലം നിയോജകമണ്ഡലത്തിലെ മതിലകത്ത് സ്ഥിതിചെയ്യുന്ന ലാഭകരമായി പ്രവർത്തിച്ചുവരുന്ന അഗ്രോ സർവീസ് സെന്റർ കൂടുതൽ വിപുലമാക്കുന്നതിനാവശ്യമായ ആധുനിക യന്ത്രസാമഗ്രികളും അതിനുള്ള പരിശീലനവും നൽകുന്നതിന് കൃഷി വകുപ്പ് എന്തെല്ലാം നടപടികളാണ് സ്വീകരിച്ചു വരുന്നത്;

പ്രസ്തുത സ്ഥാപനത്തിലെ വിറ്റുവരവ് ഒരു കോടി രൂപയിലധികം ആയതിനാല്‍ ജി.എസ്.ടി കണക്കാക്കുന്നതിന് ആവശ്യമായ അക്കൗണ്ടിംഗ് സാമഗ്രികളും സോഫ്റ്റ്‌വെയറുകളും ലഭ്യമാക്കുന്നതിന് കൃഷിവകുപ്പ് എന്തെല്ലാം നടപടികളാണ് സ്വീകരിച്ചിരിക്കുന്നത് ;

പ്രസ്തുത സ്ഥാപനത്തില്‍ നിന്നും ഉൽപ്പന്നങ്ങളും വിത്തുകളും തൈകളും വിൽക്കുന്നതിന് അനുയോജ്യമായ വാഹനം വാങ്ങി നൽകുന്നതിന് കൃഷി വകുപ്പ് നടപടികൾ സ്വീകരിക്കുമോ;

ഇവിടെ ഉല്പാദിപ്പിക്കുന്ന കാർഷികോൽപ്പന്നങ്ങൾ വിൽക്കുന്നതിനും,വിദ്യാലയങ്ങളിൽ പ്രദർശനം നടത്തുന്നതിനും ആവശ്യമായ നടപടികൾ സ്വീകരിക്കുമോ ;

അഗ്രോ സർവീസ് സെന്ററിന്റെ വിപുലീകരണത്തിന് ആവശ്യമായ എന്തെല്ലാം നടപടികളാണ് സ്വീകരിക്കാന്‍ കഴിയുക?

കുന്നത്തുനാട് മണ്ഡലത്തില്‍ സ്മാര്‍ട്ട് ക‍ൃഷി ഭവനായി തെരഞ്ഞെടുത്ത കൃഷി ഭവന്‍ ഏതാണെന്ന് വ്യക്തമാക്കാമോ;

പ്രസ്തുത കൃഷി ഭവനില്‍ എന്തെല്ലാം അടിസ്ഥാന സൗകര്യങ്ങളും സേവനങ്ങളുമാണ് സജ്ജമാക്കുന്നതെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്ന ശേഷം കൃഷി ഭവനുകളുടെ അടിസ്ഥാന സൗകര്യ വികസനത്തിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ; വിശദാംശം നല്‍കുമോ;

ചങ്ങനാശ്ശേരി നിയോജക മണ്ഡലത്തിലെ ഏതെല്ലാം കൃഷി ഭവനുകളെയാണ് സ്മാര്‍ട്ട് കൃഷി ഭവനുകളാക്കി ഉയര്‍ത്തിയിട്ടുള്ളതെന്ന് വ്യക്തമാക്കുമോ?

ആലത്തൂര്‍ നിയോജകമണ്ഡലത്തില്‍ സ്മാര്‍ട്ട് കൃഷിഭവന്‍ പദ്ധതിയുടെ ഭാഗമായി തെരഞ്ഞെടുക്കപ്പെട്ട കൃഷിഭവന്റെ വിവരങ്ങള്‍ വ്യക്തമാക്കാമോ?

കാര്‍ഷികോല്പാദന വിപുലീകരണത്തിനായി നല്ലയിനം നടീല്‍ വസ്തുക്കള്‍ ലഭ്യമാക്കുന്നതിനും ധനസഹായ പദ്ധതികള്‍, യന്ത്രവത്കരണം, കീട നിയന്ത്രണം തുടങ്ങിയ സേവനങ്ങള്‍ ലഭ്യമാക്കുന്നതിനുമായി കൃഷി ഭവനുകള്‍ക്കുള്ള പ്രാധാന്യം പരിഗണിച്ച് അവയുടെ പ്രവര്‍ത്തനം മികവുറ്റതാക്കാന്‍ നടപടിയെടുത്തിട്ടുണ്ടോ; സ്മാര്‍ട്ട് കൃഷി ഭവന്‍ പദ്ധതിയുടെ വിശദാംശം ലഭ്യമാക്കാമോ;

കാര്‍ഷിക സേവനങ്ങള്‍ കര്‍ഷക സൗഹൃദമാക്കുന്നതിന് ഡിജിറ്റൈസേഷന്‍ നടപ്പിലാക്കിയിട്ടുണ്ടോ; എങ്കില്‍ ഇതിന്റെ മെച്ചങ്ങള്‍ എന്തൊക്കെയാണ്;

കര്‍ഷകര്‍ക്കെല്ലാം പ്രത്യേക തിരിച്ചറിയല്‍ നമ്പര്‍ നല്‍കി സേവനങ്ങള്‍ ഓണ്‍ലൈന്‍ പോര്‍ട്ടല്‍ വഴിയാക്കുന്നതിനുള്ള പ്രവര്‍ത്തനങ്ങള്‍ ആരംഭിച്ചിട്ടുണ്ടോ?

പൂഞ്ഞാർ മണ്ഡലത്തിലെ ഏതെല്ലാം കൃഷിഭവനുകളാണ് സ്മാർട്ട് കൃഷിഭവനുകളാക്കാൻ തീരുമാനിച്ചിട്ടുള്ളതെന്ന് വ്യക്തമാക്കുമോ;

പ്രസ്തുത കൃഷിഭവനുകളെ സ്മാർട്ട് കൃഷിഭവനുകളാക്കുന്നതിനായി സ്വീകരിച്ചിരിക്കുന്ന നടപടികൾ വിശദമാക്കുമോ?

ചാത്തന്നൂർ മണ്ഡലത്തിൽ സ്മാർട്ട് കൃഷിഭവന്റെ ഭാഗമായി ഏതെങ്കിലും കൃഷിഭവൻ തെരഞ്ഞെടുത്തിട്ടുണ്ടോയെന്ന് വ്യക്തമാക്കാമോ ;

സ്മാർട്ട് കൃഷിഭവനുകളുടെ അടിസ്ഥാന സൗകര്യ വികസനത്തിനായി കൃഷി വകുപ്പ് വിനിയോഗിക്കുന്ന തുക തദ്ദേശ സ്വയംഭരണ സ്ഥാപനങ്ങൾ വഹിക്കേണ്ട തുക എന്നിവ സംബന്ധിച്ചും ജനപ്രതിനിധികളുടെ ഫണ്ട് വിനിയോഗിക്കുന്നത് സംബന്ധിച്ചും മാർഗ്ഗനിർദ്ദേശങ്ങൾ ഉണ്ടെങ്കിൽ ആയതിന്റെ പകർപ്പ് ലഭ്യമാക്കാമോ ?

കോങ്ങാട് നിയോജക മണ്ഡലത്തില്‍ കൃഷി വകുപ്പിന് കീഴിലുള്ള ഓഫീസുകളുടെയും സ്ഥാപനങ്ങളുടെയും വിവരം പഞ്ചായത്ത് തിരിച്ച് നല്‍കാമോ;

പ്രസ്തുത ഓഫീസുകളിലെ കേഡര്‍സ്ട്രെങ്ത് , ഒഴിവുകള്‍ എന്നിവ സംബന്ധിച്ച വിശദാംശം നല്‍കാമോ?

സംസ്ഥാനത്തെ കൃഷി ഭവനുകളെ സ്മാര്‍ട്ട് കൃഷി ഭവനുകള്‍ ആക്കുന്നതുമായി ബന്ധപ്പെട്ട് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ;

കര്‍ഷകര്‍ക്ക് ആവശ്യമായ ക്ലാസുകളും വിവര-വി‍ജ്ഞാന-സാങ്കേതിക സഹായങ്ങളും കൃഷി ഭവനുകളില്‍ തന്നെ ഒരുക്കി കര്‍ഷക സൗഹൃദ കൃഷി ഭവനുകള്‍ ആക്കുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കുമോ?

കരുനാഗപ്പള്ളി കോക്കനട്ട് നഴ്സറിയിൽ 18 വർഷമായി ജോലി ചെയുകയും 12 വർഷമായി കാഷ്വൽ ജീവനക്കാരായി ജോലി നോക്കുകയും ചെയ്യുന്ന 22 പേരെ സ്ഥിരപ്പെടുത്തുന്നതിനുള്ള നടപടി സ്വീകരിക്കുമോ ; ആയതിന് എന്തെങ്കിലും തടസ്സം ഉണ്ടോ ; എങ്കില്‍ അത് പരിഹരിക്കാൻ സർക്കാർ സ്വീകരിച്ച നടപടികൾ എന്തെല്ലാമെന്ന് വിശദീകരിക്കാമോ ;

പ്രസ്തുത ജീവനക്കാരെ അഞ്ചൽ ജില്ലാ കൃഷി ഫാമിലേക്ക് മാറ്റി നിയമിക്കുന്നതിന് എന്തെങ്കിലും തടസ്സം ഉണ്ടോ; എങ്കിൽ ആയതിനുള്ള കാരണം വിശദമാക്കാമോ?

വയനാട് ജില്ലയിൽ കൃഷി വകുപ്പിന് കീഴിൽ ആകെ എത്ര ജീവനക്കാർ ഉണ്ടെന്നുള്ള വിവരം ലഭ്യമാക്കാമോ;

ഇതിൽ എത്ര സ്ഥിരം ജീവനക്കാരും താൽക്കാലിക ജീവനക്കാരും ഉണ്ടെന്ന വിവരം ലഭ്യമാക്കാമോ;

താൽക്കാലിക തസ്തികയിൽ ജോലി ചെയ്യുന്നവരില്‍ 10 വർഷത്തിലധികമായി തുടരുന്നവരുണ്ടോ; എങ്കിൽ ഏതെല്ലാം തസ്തികകൾ, ഓഫീസ് തുടങ്ങിയ വിവരവും ലഭ്യമാക്കാമോ?

കൃഷി വകുപ്പിൽ ലേബർ ഓഫീസർ തസ്തിക നിലവിലുണ്ടോ; എങ്കിൽ നിയമനത്തിനുള്ള യോഗ്യതയും മാനദണ്ഡവും അറിയിക്കാമോ;

പ്രസ്തുത തസ്തികയിൽ ഇപ്പോൾ നിയമനം നടത്തിയിട്ടുണ്ടോ; ഇല്ലെങ്കിൽ കാരണം അറിയിക്കാമോ?

ഗുരുവായൂര്‍ നിയോജകമണ്ഡലത്തിലെ കൃഷിഭവനുകളില്‍ ഏതെല്ലാം തസ്തികകള്‍ ഒഴിഞ്ഞുകിടക്കുന്നുവെന്നതിന്റെ വിശദാംശം ലഭ്യമാക്കാമോ;

പ്രസ്തുത തസ്തികകളില്‍ ജീവനക്കാരെ നിയമിക്കുന്നതിന് നടപടി സ്വീകരിക്കുമോ;

നഗരസഭകളിലെ കൃഷിഭവനുകളില്‍ കൃഷിഓഫീസര്‍ ഉണ്ടായിട്ടും അഗ്രികള്‍ച്ചര്‍ ഫീല്‍ഡ് ഓഫീസര്‍മാരെ നിര്‍വ്വഹണ ഉദ്യോഗസ്ഥനായി നിയമിക്കുന്നത് ശ്രദ്ധയില്‍പ്പെട്ടിട്ടുണ്ടോ; നിര്‍വ്വഹണ ഉദ്യോഗസ്ഥന്മാരാകുന്നതിന് വിമുഖത കാണിക്കുന്ന കൃഷിഓഫീസര്‍മാര്‍ക്കെതിരെ നടപടി സ്വീകരിക്കുമോ?

കൃഷി വകുപ്പിന്റെ നിയന്ത്രണത്തിലുള്ള സോയില്‍ ടെസ്റ്റിംഗ് ലാബുകളിലെ അസിസ്റ്റന്റ് സോയില്‍ കെമിസ്റ്റ് തസ്തികയിലേക്കുള്ള പ്രൊമോഷനുമായി ബന്ധപ്പെട്ട് 12.02.2021-ല്‍ വരുത്തിയ സ്പെഷ്യല്‍ റൂള്‍ ഭേദഗതിയിന്മേല്‍ ആക്ഷേപം ലഭ്യമായിട്ടുണ്ടോ; ഇത് പരിഹരിക്കാന്‍ സ്വീകരിച്ച നടപടികള്‍ വിശദമാക്കുമോ?

കൃഷി വകുപ്പില്‍ അഗ്രിക്കള്‍ച്ചറല്‍ സബോര്‍ഡിനേറ്റ് സ്പെഷ്യല്‍ റൂള്‍സ് രൂപീകരണവുമായി ബന്ധപ്പെട്ട് കരട് സ്പെഷ്യല്‍ റൂള്‍സ് തയ്യാറാക്കിയിട്ടുണ്ടോ; എങ്കില്‍ ആയത് നടപ്പിലാക്കുവാന്‍ നാളിതുവരെ സ്വീകരിച്ച നടപടികള്‍ വിശദമാക്കുമോ?

നിലവിലെ കേരഫെഡ്‌ എം.ഡി.യുടെ നിയമനം നടന്ന തീയതിയും എത്ര പേര്‍ പങ്കെടുത്ത ഇന്റര്‍വ്യൂവില്‍ നിന്നാണ്‌ എം.ഡി. യെ തിരഞ്ഞെടുത്തത്‌ എന്നതും വിശദമാക്കാമോ; എം.ഡി.യുടെ ശമ്പളം, നിയമന കാലാവധി തുടങ്ങിയവ നിശ്ചയിച്ചിട്ടുണ്ടോ; നിലവിലെ എം.ഡി.ക്കെതിരെ വിജിലന്‍സ്‌ അന്വേഷണം നടക്കുന്നുണ്ടോ;

2000 ന്‌ ശേഷം നാളിതു വരെ എത്രപേര്‍ക്ക്‌ പി.എസ്‌.സി. വഴി കേരഫെഡിൽ നിയമനം നല്‍കി; നിലവില്‍ കരാര്‍, ദിവസവേതനാടിസ്ഥാനത്തില്‍ എത്ര പേര്‍ കേരഫെഡില്‍ ജോലി ചെയ്യുന്നു; ഇതില്‍ ഈ വര്‍ഷം എത്ര പേരെ സ്ഥിരമാക്കാന്‍ തീരുമാനം എടുത്തിട്ടുണ്ട്‌;

2016 ല്‍ കേരഫെഡില്‍ നിന്നും പുറത്താക്കിയ അതെ എം.ഡി.ക്ക്‌ വീണ്ടും നിയമനം നല്‍കിയിട്ടുണ്ടോ; എങ്കില്‍ എന്ത്‌ കൊണ്ട്‌?

പാറശ്ശാല മണ്ഡലത്തില്‍ കൊല്ലയില്‍ ഗ്രാമപഞ്ചായത്തിലെ കുളത്തറയ്ക്കല്‍ ഏലാ കേന്ദ്രീകരിച്ച് കൃഷിവകുപ്പിന്റെ പദ്ധതിയില്‍ ഉള്‍പ്പെടുത്തി റൈസ് മില്‍ സ്ഥാപിക്കുന്നതിനായി സമര്‍പ്പിച്ചിരുന്ന പ്രൊപ്പോസലിന്മേല്‍ സ്വീകരിച്ചിട്ടുള്ള നടപടികള്‍ എന്തൊക്കെയാണെന്ന് അറിയിക്കാമോ; പ്രസ്തുത പദ്ധതി എന്നത്തേക്ക് ആരംഭിക്കാന്‍ കഴിയും എന്ന് അറിയിക്കാമോ;

പ്രസ്തുത മണ്ഡലത്തില്‍ നിലവില്‍ എത്ര ഫാര്‍മേഴ്സ് പ്രൊഡ്യൂസേഴ്സ് സൊസൈറ്റികള്‍ പ്രവര്‍ത്തിക്കുന്നുണ്ട്; പഞ്ചായത്ത് തിരിച്ചുള്ള വിശദാംശങ്ങള്‍ അറിയിക്കാമോ; പ്രസ്തുത സൊസൈറ്റികള്‍ക്ക് കൃഷി വകുപ്പില്‍ നിന്നും എന്തൊക്കെ സഹായങ്ങളാണ് ലഭ്യമാക്കുന്നത്; വിവരങ്ങള്‍ അറിയിക്കാമോ;

പ്രസ്തുത നിയോജകമണ്ഡലത്തിലെ കൃഷി ഭവനുകളുടെ അടിസ്ഥാന സൗകര്യ വികസനവുമായി ബന്ധപ്പെട്ട് നടപ്പിലാക്കുന്ന പദ്ധതികള്‍ എന്തൊക്കെയാണെന്ന് വിശദമാക്കാമോ?

കയ്പമംഗലം നിയോജകമണ്ഡലത്തിലൂടെ ഒഴുകുന്ന പെരുംതോട് വലിയതോടിന്റെ വശങ്ങളിൽ ജനകീയ സഹകരണത്തോടെ ചേന, ചേമ്പ്, മരച്ചീനി തുടങ്ങിയ ഭൂഖാണ്ഡങ്ങൾ കൃഷി ചെയ്യുന്നതിനുള്ള പദ്ധതി രൂപീകരിക്കാൻ നടപടികൾ സ്വീകരിക്കുമോ; വിശദമാക്കാമോ?

വടക്കാഞ്ചേരി നിയോജകമണ്ഡലത്തിലെ കോള്‍ കൃഷിയുമായി ബന്ധപ്പെട്ട നിര്‍മ്മാണ പ്രവൃത്തികള്‍ ഏതെല്ലാമെന്ന് വ്യക്തമാക്കാമോ;

മാക്രോ ലെവല്‍ കോള്‍ മാനേജ്മെന്റില്‍ നിന്ന് മെെക്രോ ലെവലില്‍ ഉള്ള കോള്‍ മാനേജ്മെന്റിലേക്ക് കൊണ്ടുവരുന്നതിനെടുത്ത നടപടികള്‍ വിശദമാക്കാമോ;

പടവുകളിലെ ഉള്‍ച്ചാല്‍, കിട, റാമ്പ് സ്ലൂയിസ് എന്നിവയുടെ കണക്കും സബ്മേഴ്സിബിള്‍ പമ്പുകള്‍ കമ്മീഷന്‍ ചെയ്തവയുടെ ലിസ്റ്റും ലഭ്യമാക്കാമോ;

ഹെെലെവല്‍ കനാല്‍ നിര്‍മ്മാണത്തിലെ നിലവിലെ സ്ഥിതി വ്യക്തമാക്കാമോ?

ഈ അടുത്തകാലത്ത് കാസർഗോഡ് പ്രിൻസിപ്പൽ അഗ്രികൾച്ചർ ഓഫീസറുടെ കാര്യാലയത്തിൽ വിജിലൻസ് ആന്റ് ആന്റി കറപ്ഷ്ൻ ബ്യൂറോയുടെ പരിശോധന ഉണ്ടായിരുന്നോ എന്ന് വ്യക്തമാക്കാമോ;

പരിശോധനയിൽ കണ്ടെത്തിയ ക്രമക്കേടുകൾ എന്തൊക്കെയാണെന്ന് വ്യക്തമാക്കാമോ;

അഗ്രിക്കൾച്ചർ ഡിപ്പാർട്മെന്റ് എപ്പോഴെങ്കിലും കാസർഗോഡ് ഫ്ലവർ ഷോ നടത്തിയിരുന്നോ;

എങ്കിൽ പ്രസ്തുത ഫ്ലവർ ഷോ ആരാണ് സംഘടിപ്പിച്ചതെന്നും ഇതിനുള്ള ചെലവ് എങ്ങനെയാണ് കണ്ടെത്തിയതെന്നും വ്യക്തമാക്കാമോ;

ഫ്ലവർ ഷോ നടത്തിയ വകയിൽ ഉണ്ടായ കടം തീർക്കാൻ കർഷകരിൽ നിന്ന് 5.52 ലക്ഷം രൂപ പിരിച്ചെടുത്തതായി വിജിലൻസ് കണ്ടെത്തിയതായ വാർത്ത ശരിയാണോ എന്ന് വ്യക്തമാക്കാമോ;

ഫ്‌ളവർ ഷോ നടത്തിയതും അതുമൂലം ഉണ്ടായ കടം തീർക്കുന്നതിന് കർഷകരിൽ നിന്ന് പണപ്പിരിവ് നടത്തിയതും നിയമാനുസൃതമാണോ; അല്ലായെങ്കിൽ വകുപ്പുതല അന്വേഷണം നടത്തി കുറ്റക്കാർക്കെതിരെ നടപടികൾ സ്വീകരിക്കുമോ; വ്യക്തമാക്കാമോ?

കൈപ്പമംഗലം മണ്ഡലത്തിലെ തളിർ പദ്ധതിക്ക്‌ ആവശ്യമായ വിത്തും വളവും സൗജന്യമായി നൽകുന്നതിന് കൃഷി വകുപ്പ് നടപടികൾ സ്വീകരിക്കുമോ; വ്യക്തമാക്കുമോ;

പദ്ധതിയ്ക്കാവശ്യമായ സാങ്കേതിക സഹായവും കൃഷി വിജ്ഞാനവും കൃഷി ഓഫീസർമാർ മുഖേന നൽകുന്നതിന് നിർദ്ദേശം നൽകുമോ;

പ്രസ്തുത പദ്ധതി വിജയകരമാക്കുന്നതിന് കൃഷിവകുപ്പിന്റെ മറ്റ് എന്തെല്ലാം സഹായങ്ങളാണ് ലഭ്യമാക്കുക എന്ന് വ്യക്തമാക്കാമോ?

എടത്തിരുത്തി ഗ്രാമപഞ്ചായത്തിലെ പാടശേഖരങ്ങൾ കോൾ നിലമായി പരിഗണിക്കണമെന്ന് പ്രാദേശിക കർഷകർ ആവശ്യപ്പെടുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയത് പരിഗണിക്കുമോ;

ഇതു സംബന്ധിച്ച് എന്തെങ്കിലും നടപടികൾ സ്വീകരിച്ചു വരുന്നുണ്ടെങ്കിൽ ആയത്‌ അറിയിക്കുമോ?

തിരൂരങ്ങാടി നിയോജകമണ്ഡലത്തിലെ നന്നമ്പ്ര പഞ്ചായത്തിൽപെട്ട മോര്യകാപ്പ് കാർഷിക പദ്ധതിയുടെ നവീകരണവുമായി ബന്ധപ്പെട്ട പുരോഗതികൾ വിശദമാക്കാമോ;

ഈ പദ്ധതിയുടെ നിർവഹണവുമായി ബന്ധപ്പെട്ട് ബഹു. കൃഷി വകുപ്പ് മന്ത്രി വിളിച്ചു ചേർത്ത എം.എൽ.എ. യുടെയും, ഉദ്യോഗസ്ഥരുടെയും യോഗതീരുമാനപ്രകാരം സ്വീകരിച്ച നടപടികൾ വിശദമാക്കാമോ;

പ്രസ്തുത പദ്ധതിയുടെ നിർവഹണത്തിൽ എന്തെല്ലാം നടപടികളാണ് ഇനി പൂർത്തീകരിക്കാനുള്ളത് എന്നും പദ്ധതി എന്നേക്ക് പൂർത്തീകരിക്കാനാകും എന്നും വിശദമാക്കാമോ;

പ്രസ്തുത പദ്ധതിയുടെ പൂർത്തീകരണത്തിന് തടസ്സങ്ങള്‍ നിലവിലുണ്ടോ; പദ്ധതിക്കെതിരെ എന്തെങ്കിലും പരാതികൾ ലഭിച്ചിട്ടുണ്ടോ; വിശദീകരിക്കാമോ?

മാവേലിക്കര നിയാേജക മണ്ഡലത്തിലെ തഴക്കര കുടിവെള്ള പദ്ധതിയുടെ ഭാഗമായുള്ള ശുദ്ധജല ടാങ്ക് കൃഷി വകുപ്പിന്റെ ഉടമസ്ഥതയിലുള്ള ജില്ലാ കൃഷി താേട്ടത്തില്‍ സ്ഥാപിക്കുവാന്‍ അനുമതി നല്‍കുന്നതിനുള്ള നടപടികള്‍ സ്വീകരിക്കുമോ; വിശദമാക്കുമാേ?

പയ്യന്നൂർ അഗ്രോസർവ്വീസ് സെന്ററിന്റെ അടിസ്ഥാന സൗകര്യം മെച്ചപ്പെടുത്തുന്നതിനുള്ള പ്രോജക്ട് തയ്യാറാക്കി ആര്‍.കെ.വി.വൈ. പദ്ധതിയിൽ ഉൾപ്പെടുത്തുന്നതിനായി സ്റ്റേറ്റ് ലെവൽ സാങ്ഷനിംഗ് കമ്മിറ്റിയുടെ അംഗീകാരത്തിനായി സമർപ്പിച്ചിട്ടുണ്ടോ; വ്യക്തമാക്കാമോ;

പ്രസ്തുത കമ്മിറ്റി 2022-23 വർഷം അംഗീകാരം നൽകിയ പദ്ധതികൾ ഏതെല്ലാമാണെന്ന് വിശദമാക്കാമോ;

പ്രസ്തുത പദ്ധതിക്ക് ഈ സാമ്പത്തികവർഷം തന്നെ ഭരണാനുമതി നൽകാൻ ആവശ്യമായ നടപടികൾ സ്വീകരിക്കുമോ?

മണലൂര്‍ മണ്ഡലത്തിലെ കോള്‍ നിലങ്ങളുടെ വികസനത്തിനായി റീബില്‍ഡ് കേരള പദ്ധതി പ്രകാരം എന്തെല്ലാം പ്രവൃത്തികളാണ് നടപ്പാക്കുന്നതെന്ന് വിശദമാക്കാമോ;

പ്രസ്തുത പദ്ധതി പ്രകാരം ഏതെല്ലാം നിര്‍മ്മാണ പ്രവൃത്തികള്‍ പൂര്‍ത്തീകരിച്ചു; വിശദമാക്കാമോ;

പൂര്‍ത്തീകരിക്കാനുള്ള പ്രവൃത്തികൾ, അവയുടെ നിലവിലെ സ്ഥിതി എന്നിവ സംബന്ധിച്ച വിശദാംശം നല്‍കാമോ;

പ്രസ്തുത പ്രവൃത്തികള്‍ എന്ന് പൂര്‍ത്തീകരിക്കാനാകുമെന്ന് അറിയിക്കാമോ?

സംസ്ഥാനത്തു നടപ്പിലാക്കാന്‍ ഉദ്ദേശിക്കുന്ന കൃഷിശ്രീ സെന്ററുകളുടെ പ്രവര്‍ത്തനങ്ങള്‍ എന്താണെന്ന് വിശദമാക്കാമോ;

പ്രസ്തുത സെന്ററുകള്‍ എവിടെയെല്ലാമാണ് ആരംഭിക്കുന്നതെന്ന് വ്യക്തമാക്കുമോ;

കാര്‍ഷിക പ്രാധാന്യമുള്ള തിരുവമ്പാടി മണ്ഡലം കേന്ദ്രീകരിച്ച് കൃഷിശ്രീ സെന്റര്‍ അനുവദിക്കുന്നതിന് നടപടികള്‍ സ്വീകരിക്കുമോ?

സംസ്ഥാനത്ത് ഭക്ഷ്യ സ്വയം പര്യാപ്തത കൈവരിക്കാന്‍ കാര്‍ഷിക രംഗത്ത് ഈ സര്‍ക്കാര്‍ നടപ്പാക്കുന്ന പരിഷ്കാരങ്ങളെയും സേവനങ്ങളെയും സംബന്ധിച്ച വിശദാംശം വ്യക്തമാക്കുമോ;

ഇതിന്റെ അടിസ്ഥാനത്തില്‍ സംസ്ഥാനത്തിന് എപ്പോള്‍ ഭക്ഷ്യ സ്വയം പര്യാപ്തത കൈവരിക്കുവാന്‍ സാധിക്കുമെന്നാണ് കണക്കാക്കുന്നത്; വ്യക്തമാക്കുമോ;

കാര്‍ഷിക രംഗത്തേയ്ക്ക് പുതുതലമുറയെ ആകര്‍ഷിക്കുന്നതിന് എന്തൊക്കെ പദ്ധതികള്‍ക്ക് തുടക്കം കുറിക്കാന്‍ ഉദ്ദേശിക്കുന്നു; വ്യക്തമാക്കുമോ?

സംസ്ഥാനത്ത് പച്ചക്കറി കൃഷി വ്യാപിപ്പിക്കുന്നതിന് എന്തൊക്കെ നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ;

ഓണം ലക്ഷ്യമാക്കി മാത്രമല്ലാതെ സ്ഥിരമായി എല്ലാ പൊതുവിദ്യാഭ്യാസ സ്ഥാപനങ്ങളിലും പച്ചക്കറി കൃഷി പ്രോത്സാഹിപ്പിക്കുന്നതിന് എന്തൊക്കെ നടപടികള്‍ സ്വീകരിക്കാനാണ് ഉദ്ദേശിക്കുന്നത്;

സര്‍ക്കാര്‍ സ്ഥാപനങ്ങളുടെയും മറ്റ് വകുപ്പുകളുടെയും സ്ഥലങ്ങളില്‍ പൊതുജനങ്ങള്‍ക്ക് പച്ചക്കറി കൃഷി ചെയ്യാന്‍ താല്പര്യമുണ്ടെങ്കില്‍ ആയതിന് അവസരം നല്‍കാന്‍ നടപടി സ്വീകരിക്കുമോ; വിശദമാക്കാമോ?

വൈപ്പിന്‍ നിയോജക മണ്ഡലത്തിലെ കാര്‍ഷിക മേഖലക്കും മത്സ്യമേഖലക്കും ഉപകാരപ്രദമാവുമായിരുന്ന നബാര്‍‍ഡ് ആര്‍.ഐ.ഡി.എഫ്. XX-ല്‍ ഉള്‍പ്പെട്ട ജൈവ വൈപ്പിന്‍ പദ്ധതിയുടെ ദീര്‍ഘിപ്പിച്ച പൂര്‍ത്തീകരണ കാലാവധി എന്നാണ് അവസാനിച്ചത്;

ഈ പദ്ധതിക്ക് കേരള തീരദേശ പരിപാലന അതോറിറ്റിയുടെ സി.ആര്‍.ഇസഡ്. ക്ലിയറന്‍സ് എന്നാണ് ലഭ്യമായത്;

സി.ആര്‍.ഇസഡ്. ക്ലിയറന്‍സ് ലഭ്യമാകുന്നതില്‍ കാലതാമസം നേരിട്ടിട്ടുണ്ടോ; എങ്കില്‍ കാരണം വ്യക്തമാക്കാമോ;

05.06.2020 ന് കേരള തീരദേശ പരിപാലന അതോറിറ്റിക്ക് മുന്‍പാകെ പാരിസ്ഥിതികാനുമതിക്ക് ആവശ്യമായ റിപ്പോര്‍ട്ടുകള്‍ അവതരിപ്പിക്കപ്പെട്ടിട്ടും തുടര്‍ നടപടികള്‍ സമയബന്ധിതമായി സ്വീകരിക്കുന്നതിന് കാലതാമസം നേരിട്ടതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ കാരണം വിശദമാക്കാമോ;

36 കോടി രൂപയുടെ പ്രസ്തുത പദ്ധതി നഷ്ടപ്പെടുവാനുള്ള കാരണം സംബന്ധിച്ച് എന്തെങ്കിലും തരത്തിലുള്ള അന്വേഷണം നടത്തിയിട്ടുണ്ടോ;

ഇല്ലെങ്കില്‍ വൈപ്പിന്‍ കരയെന്ന ദ്വീപ് മണ്ഡത്തിലെ മത്സ്യത്തൊഴിലാളികള്‍ അടക്കമുള്ള സാധാരണ ജനവിഭാഗം അനുഭവിച്ചു കൊണ്ടിരിക്കുന്ന ബുദ്ധിമുട്ടുകള്‍ പരിഗണിച്ച് ടി പദ്ധതി നഷ്ടമായത് സംബന്ധിച്ച് അന്വേഷണം നടത്തി ഉത്തരവാദികളായവർക്കെതിരെ നടപടി സ്വീകരിക്കുമോ?

ആര്‍.ഐ.ഡി.എഫ്. ഉപയോഗപ്പെടുത്തി സ്മാര്‍ട്ട് കൃഷിഭവന്‍ പദ്ധതി നടപ്പാക്കാന്‍ ഉദ്ദേശിക്കുന്നുണ്ടോ; വിശദമാക്കാമോ;

എങ്കില്‍ പദ്ധതിയുടെ ലക്ഷ്യവും അതില്‍ ഉള്‍പ്പെടുത്തിയിട്ടുള്ള വികസന പ്രവര്‍ത്തനങ്ങളും അവയ്ക്കായി അനുവദിക്കുന്ന തുകയും വിശദീകരിക്കാമോ?

സംസ്ഥാനത്ത് മുന്‍ സര്‍ക്കാരിന്റെയും (2016-21) ഈ സര്‍ക്കാരിന്റെയും കാലയളവുകളില്‍ പച്ചക്കറി ഉല്പാദനത്തില്‍ സ്വയം പര്യാപ്തത നേടുന്നതിന് സ്വീകരിച്ച നടപടികളിന്മേലുള്ള പുരാേഗതി വിശദമാക്കാമാേ?

ആര്‍.ഐ.ഡി.എഫ്. - XXIII, XXIV, XXV എന്നിവയില്‍ ഉള്‍പ്പെടുത്തി ആലത്തൂര്‍ മണ്ഡലത്തില്‍ അനുവദിച്ച പ്രവൃത്തികളുടെ വിശദവിവരം ലഭ്യമാക്കുമോ;

പ്രസ്തുത പ്രവൃത്തികളുടെ നിലവിലെ സ്ഥിതി വ്യക്തമാക്കുമോ?

ഭക്ഷ്യ വിളകളിൽ നിന്നും ഭക്ഷ്യേതര വിളകളിലേക്ക് മാറിയതിനാലും കാർഷികേതര ആവശ്യങ്ങൾക്കായി ഉപയോഗിക്കുന്ന കൃഷി ഭൂമിയുടെ വിസ്തൃതി വർദ്ധിച്ചതിനാലും സംസ്ഥാനത്തെ കാർഷിക മേഖലയിൽ ഉണ്ടായിട്ടുള്ളതായി പറയപ്പെടുന്ന പ്രതിസന്ധി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത്‍ ഗൗരവത്തോടെ കാണുന്നുണ്ടോ; വിശദാംശം നൽകുമോ;

ഭൂവിനിയോഗത്തിലും വിള ക്രമത്തിലും വന്ന മാറ്റങ്ങൾ സംസ്ഥാനത്തിന്റെ ഭക്ഷ്യസുരക്ഷയ്ക്ക് വെല്ലുവിളി ഉയർത്തുന്ന സാഹചര്യത്തിൽ ആയത് പരിഹരിക്കുന്നതിനായി എന്തൊക്കെ നടപടികൾ സ്വീകരിക്കുമെന്ന് വ്യക്തമാക്കുമോ;

കൃഷിയോഗ്യമായ പാഴ്‌ ഭൂമികളിലും തരിശ് ഭൂമിയിലും ഭക്ഷ്യ വിളകൾ കൃഷി ചെയ്യുന്നതിന് ആവശ്യമായ പദ്ധതി തയ്യാറാക്കുമോ; വിശദാംശം നൽകുമോ?

സംസ്ഥാനത്ത് യഥാസമയം യന്ത്രവല്‍ക്കരണം നടത്താതിരുന്നതാണ് നെല്‍കൃഷി മുതലായ കാര്‍ഷിക മേഖലകളിൽ ഉല്പാദനം കുറയുന്നതിന് കാരണമെന്ന് കണ്ടെത്തിയിട്ടുണ്ടോ; വ്യക്തമാക്കാമോ;

യന്ത്രങ്ങള്‍ പ്രവര്‍ത്തിപ്പിക്കുന്നതിന് വൈദഗ്ദ്ധ്യമുള്ള തൊഴിലാളികളുടെ അഭാവമാണ് യന്ത്രവല്‍ക്കരണത്തിന് തടസ്സമായതെന്ന് കണ്ടെത്തിയിട്ടുണ്ടോ;

കൃഷിയിടങ്ങള്‍ യന്ത്രവല്‍ക്കരിക്കുവാന്‍ മിഷന്‍ രൂപീകരിക്കുന്നതിന് തീരുമാനിച്ചിട്ടുണ്ടോയെന്ന് വിശദമാക്കാമോ;

എങ്കില്‍ മിഷന്‍ രൂപീകരിക്കുന്നതിലൂടെ വൈദഗ്ദ്ധ്യമുള്ള തൊഴിലാളികളെ ലഭ്യമാക്കുവാന്‍ സാധിക്കുമോയെന്ന് വ്യക്തമാക്കാമോ?

2019-ല്‍ നടപ്പാക്കിയ ശമ്പള പരിഷ്കരണത്തിന്റെ ആനുകൂല്യങ്ങൾ കേരള കാർഷിക സർവ്വകലാശാലയിലെ തൊഴിലാളികൾക്കും തൊഴിലാളി വിഭാഗത്തില്‍ നിന്നുള്ള പെൻഷന്‍കാർക്കും നല്‍കിയിട്ടുണ്ടോ; ഇല്ലെങ്കില്‍ കാരണം വ്യക്തമാക്കാമോ;

പ്രസ്തുത വിഭാഗക്കാർക്ക് ശമ്പളം/ പെൻഷൻ പരിഷ്കരണം അവസാനമായി നടപ്പിലാക്കിയത് എന്നാണെന്ന് വിശദമാക്കാമോ;

കേരള കാർഷിക സർവ്വകലാശാലയിൽ നിന്നും പിരിഞ്ഞവർക്ക് പെൻഷൻ കുടിശ്ശിക നൽകാൻ ഉണ്ടോ; എങ്കിൽ ഏതൊക്കെ വിഭാഗങ്ങൾക്ക് എത്ര കാലത്തെ കുടിശ്ശിക നല്കാൻ ബാക്കിയുണ്ടെന്ന് വിശദമാക്കാമോ;

കുടിശ്ശിക വിതരണം ചെയ്യാൻ നടപടികൾ സ്വീകരിച്ചിട്ടുണ്ടോ; എങ്കിൽ വിശദാംശം നൽകാമോ?