സംസ്ഥാനത്ത് മത്സ്യത്തൊഴിലാളികളുടെ വരുമാനം വര്‍ദ്ധിപ്പിച്ച് ആപേക്ഷിക പിന്നാക്കാവസ്ഥ പരിഹരിക്കുന്നതിന് നടത്തുന്ന പ്രധാന പ്രവര്‍ത്തനങ്ങള്‍ എന്തൊക്കെയാണ്;

ഇടത്തട്ടുകാരെ ഒഴിവാക്കി വില നിര്‍ണ്ണയത്തിന് മത്സ്യത്തൊഴിലാളികള്‍ക്ക് അവകാശം നല്‍കുന്ന നിയമം കാര്യക്ഷമമായി നടപ്പിലാക്കാന്‍ വേണ്ട ഇടപെടല്‍ നടത്തുന്നുണ്ടോ; വിശദമാക്കാമോ;

പരമ്പരാഗത മത്സ്യത്തൊഴിലാളികളെ മത്സ്യബന്ധന യാനങ്ങളുടെയും ഉപകരണങ്ങളുടെയും ഉടമസ്ഥരാക്കുന്നതിനുള്ള പദ്ധതികളെക്കുറിച്ച് അറിയിക്കാമോ?

സംസ്ഥാനത്ത് എല്ലാ പട്ടികജാതി, ലക്ഷംവീട് കോളനികളിലും അംബേദ്കര്‍ ഗ്രാമം പദ്ധതി നടപ്പാക്കാന്‍ നടപടി സ്വീകരിക്കുമോ;

പട്ടികജാതി വിഭാഗക്കാരുടെ എണ്ണത്തിന് പകരം കോളനികളുടെ പിന്നാക്കാവസ്ഥ മാനദണ്ഡമാക്കി പദ്ധതികള്‍ ആവിഷ്കരിക്കാന്‍ നടപടി കൈക്കൊള്ളുമോ;

പല കോളനികളിലും യഥാര്‍ത്ഥ ഉടമകള്‍ക്ക് പകരം കൈവശക്കാരായ ആളുകൾ താമസക്കാരായുള്ള സാഹചര്യത്തിൽ ഇവർക്ക് ഉടമസ്ഥാവകാശം നല്‍കുന്നതിന് നടപടി സ്വീകരിക്കുമോ; ഉടമസ്ഥാവകാശം ഇല്ലാത്തതിന്റെ പേരില്‍ ആനുകൂല്യങ്ങള്‍ ലഭിക്കുന്നതിനുള്ള മാനദണ്ഡങ്ങളില്‍ നിന്നും പുറത്താകുന്ന അവസ്ഥയ്ക്ക് പരിഹാരം കണ്ടെത്തുമോ;

കോളനികളുടെ നവീകരണം നടത്തുമ്പോള്‍ അടിസ്ഥാന സൗകര്യ വികസനത്തിന് മുന്‍തൂക്കം നല്‍കുമോ; ഇരട്ട വീടുകളായവ ഒറ്റ വീടുകളാക്കി മാറ്റുന്നതിന് നടപടി സ്വീകരിക്കുമോ?

ദേശീയോദ്യാനങ്ങളുടെയും വന്യജീവി സങ്കേതങ്ങളുടെയും ഒരു കിലോമീറ്റർ ചുറ്റളവിൽ ബഫർ സോണായി പ്രഖ്യാപിച്ചുകൊണ്ടുള്ള സുപ്രീം കോടതി വിധി സംസ്ഥാനത്തെ മലയോര കർഷകരെ പ്രതികൂലമായി ബാധിക്കുമെന്ന കാര്യം ഗൗരവത്തോടെ കാണുന്നുണ്ടോ;

പ്രസ്തുത വിഷയത്തിൽ സംസ്ഥാനം ഫയൽ ചെയ്ത റിവ്യൂ പെറ്റീഷൻ സുപ്രീം കോടതിയുടെ പരിഗണനയ്ക്ക് വരുന്നതിനുമുമ്പായി ബഫർ സോണുകളിൽ സമഗ്രമായ സർവ്വേ നടത്തി ജനവാസ കേന്ദ്രങ്ങൾ അടയാളപ്പെടുത്തി മേഖലയിൽ ഉണ്ടാകാനിടയുള്ള പ്രത്യാഘാതങ്ങൾ ബോധ്യപ്പെടുത്തുന്നതിന് തയ്യാറാകുമോ;

റിവ്യൂ പെറ്റീഷൻ പരിഗണിക്കുമ്പോൾ സംസ്ഥാനത്തിന് അനുകൂലമായ സാഹചര്യം ഒരുക്കുന്നതിന് ശാസ്ത്രീയ അടിത്തറയുള്ള പഠന റിപ്പോർട്ട് അനിവാര്യമായതിനാൽ വനം, റവന്യു, കൃഷി, തദ്ദേശ സ്വയംഭരണ വകുപ്പുകളുടെ ഏകോപനത്തോടെ സർവ്വേ നടത്തി പഠന റിപ്പോർട്ട് പ്രസിദ്ധീകരിക്കുവാൻ അടിയന്തര നടപടി സ്വീകരിക്കുമോ; വിശദാംശം നൽകുമോ?

മത്സ്യഫെഡ് ആരംഭിച്ച മൊബൈൽ മീൻ വിപണന സംവിധാനമായ അന്തിപ്പച്ചയിൽ സാമ്പത്തിക ക്രമ​ക്കേട് നടന്നതായി കണ്ടെത്തിയിട്ടുണ്ടോ; എങ്കില്‍ വ്യക്തമാക്കുമോ;

സാമ്പത്തിക ക്രമ​ക്കേടുകൾ സംബന്ധിച്ച അന്വേഷണത്തിൽ കുറ്റക്കാരായി കണ്ടെത്തിയവർക്കെതിരെ നടപടി സ്വീകരിച്ചിട്ടുണ്ടോ; എങ്കിൽ വിശദാംശം നൽകുമോ;

ഇത്തരം സംഭവങ്ങൾ ആവർത്തിക്കാതിരിക്കാൻ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

സംസ്ഥാനത്ത് പട്ടിക ഗോത്രവര്‍ഗ്ഗ സഹകരണസംഘങ്ങള്‍, സഹകരണ ഫാമുകള്‍ തുടങ്ങിയവയുടെ ശാക്തീകരണത്തിനും വിപുലീകരണത്തിനും പദ്ധതിയുണ്ടോ;

ഗോത്ര ജീവിതക്കാഴ്ചകള്‍ വിനോദസഞ്ചാരവുമായി സമന്വയിപ്പിച്ചുകൊണ്ട് വയനാട് പൂക്കോട് ആരംഭിച്ച എന്‍ ഊര് ഗോത്ര പൈതൃക ഗ്രാമം പദ്ധതിയുടെ വിശദാംശം അറിയിക്കാമോ;

സാംസ്കാരികോദ്ഗ്രഥനത്തിനും വരുമാനദായകമായ മികച്ച തൊഴില്‍ അവസരങ്ങള്‍ ലഭ്യമാക്കുന്നതിനും സഹായകരമായ പ്രസ്തുത പദ്ധതി മറ്റു പ്രദേശങ്ങളില്‍ കൂടി നടപ്പാക്കാന്‍ ഉദ്ദേശിക്കുന്നുണ്ടോ; വന വിഭവങ്ങള്‍ക്കും ഗോത്രവര്‍ഗ്ഗക്കാരുടെ ഉല്പന്നങ്ങള്‍ക്കും മികച്ച വിപണി ഉറപ്പാക്കാന്‍ പരിപാടിയുണ്ടോ; വിശദമാക്കാമോ?

സംരക്ഷിത വന മേഖലയ്ക്ക് ഒരു കിലോമീറ്റർ ചുറ്റളവിൽ പരിസ്ഥിതി ലോല മേഖല ആയിരിക്കും എന്ന സുപ്രീം കോടതി വിധി സംസ്ഥാനത്തെ എപ്രകാരം ബാധിക്കുമെന്ന് വിലയിരുത്തിയിട്ടുണ്ടോ;

പരിസ്ഥിതി ലോല മേഖലയിൽ താമസിക്കുന്ന ജനങ്ങളുടെ ആശങ്ക അകറ്റുന്നതിന് എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നത്;

സംസ്ഥാനത്തിന്റെ പ്രത്യേക സാഹചര്യം പരിഗണിച്ച് സുപ്രീം കോടതി വിധിയിൽ നിന്നും ഇളവ് നേടാൻ നടപടി സ്വീകരിക്കുമോ?

സംസ്ഥാനത്ത് തീരശോഷണം മൂലം വീട് നഷ്ടപ്പെട്ട മത്സ്യത്തൊഴിലാളികളെ ക്യാമ്പുകളിൽ പാർപ്പിച്ചിട്ടുണ്ടോ; വ്യക്തമാക്കുമോ;

ഇവരു ​ടെ പുനരധിവാസത്തിനായി എന്തെങ്കിലും പദ്ധതി ആവിഷ്കരിച്ചിട്ടുണ്ടോ;

ഇവരെ എന്നത്തേക്ക് പൂർണ്ണമായി പുനരധിവസിപ്പിക്കാൻ കഴിയുമെന്ന് വ്യക്തമാക്കുമോ?

സംസ്ഥാനത്ത് വന്യജീവികൾ ജനവാസ മേഖലകളിലിറങ്ങി ജീവനോ സ്വത്തിനോ നാശമുണ്ടാക്കിയ സംഭവങ്ങൾ മുൻവർഷം മാത്രം പതിനായിരത്തിലധികം ആയിരുന്നെന്ന് പറയപ്പെടുന്നത് വന്യജീവി ആക്രമണത്തിന്റെ വ്യാപ്തി വെളിപ്പെടുത്തുന്ന സാഹചര്യത്തിൽ വന്യജീവി ആക്രമണം ഫലപ്രദമായി തടയാൻ പദ്ധതിരേഖ തയ്യാറാക്കിയിട്ടുണ്ടോ; എങ്കിൽ വിശദാംശം ലഭ്യമാക്കാമോ;

വന്യജീവി ആക്രമണ പ്രതിരോധത്തിൽ ജനപങ്കാളിത്തവും ‍ഡ്രോൺ ഉൾപ്പെടെയുള്ള ആധുനിക ഉപകരണങ്ങളുടെ വിനിയോഗവും സാധ്യമാക്കാൻ പരിപാടിയുണ്ടോ;

കാട്ടുപന്നികളെ ക്ഷുദ്രജീവിയായി പ്രഖ്യാപിച്ച് അനിയന്ത്രിത വംശവർദ്ധനവ് നിയന്ത്രിക്കുന്നതിന് കേന്ദ്ര സർക്കാർ അനുമതി നൽകാത്ത സാഹചര്യത്തിൽ കൃഷിഭൂമിയിലിറങ്ങുന്ന കാട്ടുപന്നികളെ വെടിവച്ച് കൊല്ലാനുള്ള അനുമതി നൽകാൻ തദ്ദേശ സ്വയംഭരണ സ്ഥാപനങ്ങൾക്ക് അധികാരം നൽകിയത് ഏറെ പ്രയോജനപ്രദമാകുമെന്ന് കരുതുന്നുണ്ടോ; കാട്ടുപന്നികളെ വെടിവച്ച് കൊല്ലുന്നതിനുള്ള വ്യവസ്ഥകൾ എന്തെല്ലാമാണെന്ന് വെളിപ്പെടുത്താമോ?

മത്സ്യബന്ധന ബോട്ടുകളിൽ ഉപയോഗിക്കുന്ന ഡീസൽ, പെട്രോൾ, സി.എൻ.ജി., എൽ.എൻ.ജി., മണ്ണെണ്ണ തുടങ്ങിയ ഇന്ധനങ്ങൾക്ക് സബ്‌സിഡി ലഭ്യമാക്കുവാൻ മുൻകൈയെടുക്കുമോ; ഇതുമായി ബന്ധപ്പെട്ട് എന്തൊക്കെ നടപടികളാണ് സ്വീകരിച്ചിരിക്കുന്നതെന്ന് അറിയിക്കാമോ;

മത്സ്യബന്ധന ബോട്ടുകളില്‍ ഉപയോഗിക്കുന്ന ഡീസൽ, പെട്രോൾ എന്നിവയ്ക്ക് ഈടാക്കുന്ന റോഡ് സെസ് ഒഴിവാക്കുവാനും ഉല്പാദനച്ചെലവിന് അനുസൃതമായി മത്സ്യത്തൊഴിലാളികൾക്ക് കുറഞ്ഞ നിരക്കിൽ മണ്ണെണ്ണ നൽകുവാനും സംസ്ഥാനത്തിനുള്ള മണ്ണെണ്ണ വിഹിതം വർദ്ധിപ്പിക്കുവാനും കേന്ദ്രത്തിൽ സമ്മർദ്ദം ചെലുത്തുമോ;

മത്സ്യബന്ധന ബോട്ടുകൾക്ക് സംസ്ഥാന സർക്കാർ മണ്ണെണ്ണ സബ്സിഡി നൽകുന്നുണ്ടോ; വിശദാംശങ്ങൾ നൽകാമോ;

സബ്‌സിഡി നൽകുന്നതിൽ സർക്കാർ കുടിശിക വരുത്തിയിട്ടുണ്ടോ എന്ന് വ്യക്തമാക്കാമോ?

സംസ്ഥാനത്ത് സിനിമ വ്യവസായം നേരിടുന്ന പ്രശ്നങ്ങള്‍ പരിഹരിക്കാന്‍ സർക്കാർ നടത്തിയ ഇടപെടലുകളെക്കുറിച്ച് അറിയിക്കാമോ;

സിനിമാരംഗത്ത് പ്രവര്‍ത്തിക്കുന്നവര്‍ക്കിടയില്‍ വ്യാപകമെന്ന് പറയപ്പെടുന്ന മയക്കുമരുന്ന്‌ ഉപയോഗം തുടങ്ങിയ ആശാസ്യമല്ലാത്ത പ്രവണതകള്‍ ഉന്മൂലനം ചെയ്യുന്നതിന് ഇടപെടല്‍ നടത്തുമോ;

സിനിമാരംഗത്തെ സ്ത്രീകള്‍ നേരിടുന്ന ലൈംഗിക, സാമ്പത്തിക ചൂഷണങ്ങള്‍ അവസാനിപ്പിക്കാന്‍ ഏത് വിധത്തില്‍ ഇടപെടാന്‍ ഉദ്ദേശിക്കുന്നുവെന്ന് അറിയിക്കാമോ?

മത്സ്യത്തൊഴിലാളികളില്‍ നിന്ന് സംഭരിക്കുന്ന മീന്‍ വില്‍ക്കുന്നതിന്റെ മറവില്‍ മത്സ്യഫെഡിൽ അഴിമതി നടന്നു എന്ന ആരോപണം ശ്രദ്ധയിൽപ്പെട്ടിട്ടുണ്ടോ;

ഈ അഴിമതി സംബന്ധിച്ച് സർക്കാർ അന്വേഷണം നടത്തിയിട്ടുണ്ടോ; എങ്കില്‍ അന്വേഷണത്തിന്റെ പ്രധാന കണ്ടെത്തലുകൾ എന്തൊക്കെ എന്ന് വ്യക്തമാക്കാമോ;

ഉന്നത ഉദ്യോഗസ്ഥരുടെ ഒത്താശയില്ലാതെ ഇത്തരമൊരു അഴിമതി നടത്താൻ സാധിക്കില്ല എന്നിരിക്കെ രണ്ടു ജീവനക്കാരുടെ മേല്‍ മാത്രം കുറ്റം ആരോപിച്ച് മറ്റുള്ളവരെ രക്ഷിക്കാനുള്ള ശ്രമമാണ് നടത്തുന്നത് എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത തട്ടിപ്പിനെക്കുറിച്ച് സമഗ്ര അന്വേഷണം നടത്തി കുറ്റവാളികളെ നിയമത്തിന് മുന്നില്‍ കൊണ്ടുവരാൻ നടപടികൾ സ്വീകരിക്കുമോ എന്ന് വ്യക്തമാക്കാമോ?

നാടിന്റെ ബഹുസ്വരത ഉയര്‍ത്തിപ്പിടിച്ചുകൊണ്ടുള്ള സാംസ്കാരിക പ്രവര്‍ത്തനങ്ങള്‍ക്കുള്ള ഇടങ്ങള്‍ എന്ന നിലയില്‍ ആവിഷ്കരിച്ച ജില്ലകളില്‍ സാംസ്കാരിക സമുച്ചയങ്ങള്‍ എന്ന പദ്ധതി ഇപ്പോള്‍ ഏത് ഘട്ടത്തിലാണെന്ന് വ്യക്തമാക്കുമോ; ഇവ സ്ഥാപിക്കുന്നതിലൂടെ എന്തെല്ലാം കാര്യങ്ങളാണ് ലക്ഷ്യമിടുന്നത്; വിശദാംശം നല്‍കാമോ;

കേരളത്തിന്റെ പരമ്പരാഗതമായ കല-കരകൗശല വിദ്യകള്‍ സംരക്ഷിക്കാനും അറിവുകള്‍ അടുത്ത തലമുറയ്ക്ക് കൈമാറാനും കഴിയുന്നതിനുതകും വിധം പ്രശസ്തമായ ഗ്രാമങ്ങളെ സാംസ്കാരിക പൈതൃക ഗ്രാമങ്ങളായി പ്രഖ്യാപിക്കുന്ന പദ്ധതി പരിഗണനയിലുണ്ടോ; എങ്കിൽ ഇതിലൂടെ എന്തെല്ലാം കാര്യങ്ങളാണ് ലക്ഷ്യമിടുന്നതെന്ന് വിശദമാക്കാമോ?

രാജ്യത്ത് ആകെ ബാധകമായ വിധത്തില്‍ സംരക്ഷിത വനത്തോട് ചേര്‍ന്നുള്ള ഒരു കിലോമീറ്റര്‍ പ്രദേശം പരിസ്ഥിതി ലോല മേഖലയാക്കി മാറ്റണമെന്ന സുപ്രീം കോടതി വിധി സംസ്ഥാനത്തെ ജനസാന്ദ്രത ഏറിയ മലയോര പ്രദേശത്താകെ ആശങ്ക സൃഷ്ടിച്ചിട്ടുള്ളതിനാല്‍ ജനവാസമേഖലയെ ഒഴിവാക്കാന്‍ കേന്ദ്ര സര്‍ക്കാരുമായി ചര്‍ച്ച നടത്തിയിരുന്നോ;

സുപ്രീം കോടതി നിര്‍ദ്ദേശം സംസ്ഥാനത്തുണ്ടാക്കാവുന്ന ആഘാതത്തിന്റെ വ്യാപ്തി പ‍ഠന വിധേയമാക്കിയിട്ടുണ്ടോ;

സുപ്രീം കോടതി വിധി പുന:പരിശോധന തേടുന്നതും വിധിക്കെതിരെ സെന്‍ട്രല്‍ എംപവേര്‍ഡ് കമ്മിറ്റിയെ സമീപിക്കുന്നതും സംബന്ധിച്ച് ആലോചന നടത്തിയിട്ടുണ്ടോ; വ്യക്തമാക്കാമോ?

സംസ്ഥാനത്തെ നദികളിൽ കെട്ടിക്കിടക്കുന്ന ചെളിയും മണലും നീക്കം ചെയ്യുന്നത് സംബന്ധിച്ച് എന്തെങ്കിലും പഠനം നടത്തിയിട്ടുണ്ടോ; എങ്കിൽ വിശദമാക്കുമോ;

ഏതെല്ലാം നദികളിൽ മണൽ ഓഡിറ്റ് നടത്തിയിട്ടുണ്ട് എന്ന് അറിയിക്കാമോ;

നദികളിലെ ഒരു ഭാഗത്ത് അടിഞ്ഞു കൂടിക്കിടക്കുന്ന മണൽ ആഴമുള്ള ഭാഗങ്ങളിലേക്ക് മാറ്റുവാൻ നടപടി സ്വീകരിക്കുമോ?

രാജ്യത്തെ എല്ലാ വന്യജീവി സങ്കേതങ്ങൾക്കും ദേശീയ ഉദ്യാനങ്ങൾക്കും ഒരു കിലോമീറ്റർ ചുറ്റളവിൽ ഇക്കോ-സെൻസിറ്റീവ് സോൺ നിർബന്ധമാക്കണമെന്ന സുപ്രീം കോടതി ഉത്തരവ് സംരക്ഷിത വനങ്ങൾക്ക് ചുറ്റുമുള്ള ഗ്രാമങ്ങളിലെ വികസന പ്രവർത്തനങ്ങളെയും ഉപജീവന പ്രവർത്തനങ്ങളെയും ബാധിക്കുമെന്നത് ഗൗരവത്തോടെ കാണുന്നുണ്ടോ;

പ്രസ്തുത വിഷയം പരിഹരിക്കാൻ സ്വീകരിച്ച നടപടികൾ വിശദമാക്കാമോ;

ഇക്കോ-സെൻസിറ്റീവ് സോൺ നിർബന്ധമാക്കുന്നത് സംസ്ഥാനത്തെ ഇരുപതോളം പട്ടണങ്ങളെയും ഒരു ലക്ഷം കുടുംബങ്ങളെയും ബാധിക്കും എന്ന വസ്തുത നിലനിൽക്കുന്നതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതുസംബന്ധിച്ച് നിയമനിർമ്മാണം നടത്താൻ കേന്ദ്ര സർക്കാരിൽ സമ്മർദ്ദം ചെലുത്തുമോ?

സംസ്ഥാനത്ത് പ്രളയ ഭീഷണി നേരിടുന്നതിനായി പ്രധാന നദികളെ അടിസ്ഥാനമാക്കി മാസ്റ്റർ പ്ലാൻ തയ്യാറാക്കിയിട്ടുണ്ടോ; ഇല്ലെങ്കിൽ ആയതിന് നടപടി സ്വീകരിക്കുമോ;

നദീതടവുമായി ബന്ധപ്പെട്ട പ്രവൃത്തികൾ ഏകോപിപ്പിക്കുന്നതിനായി സംസ്ഥാനതല റിവർ അതോറിറ്റി രൂപീകരി​ക്കേണ്ടതിന്റെ ആവശ്യകത പരിശോധിച്ചിട്ടുണ്ടോ; എങ്കിൽ ഇതുസംബന്ധിച്ച് സ്വീകരിക്കാൻ ഉദ്ദേശിക്കുന്ന നടപടികൾ വിശദമാക്കുമോ?

കാലാവസ്ഥ വ്യതിയാനവും മത്സ്യത്തിന്റെ ലഭ്യതക്കുറവും പരമ്പരാഗത മത്സ്യത്തൊഴിലാളികളെ ഗുരുതരമായ പ്രതിസന്ധിയിലാക്കിയിരിക്കുന്നതായി ശ്രദ്ധയില്‍പ്പെട്ടിട്ടുണ്ടോ; എങ്കിൽ ഇത് ഗൗരവത്തോടെ കാണുന്നുണ്ടോ;

മണ്ണെണ്ണ വില ക്രമാതീതമായി ഉയരുന്നതും ഇന്ധന വില ഉയർന്ന് നിൽക്കുന്നതും മത്സ്യത്തൊഴിലാളികളുടെ ജീവിതം കൂടുതൽ പ്രതിസന്ധിലാക്കിയിട്ടുള്ളതായി വിലയിരുത്തിയിട്ടുണ്ടോ;

മത്സ്യത്തൊഴിലാളികൾ കടുത്ത പ്രതിസന്ധി നേരിടുന്ന ഈ കാലഘട്ടത്തിൽ ധനകാര്യ വകുപ്പുമായി ചേർന്ന് ബോട്ടുകളിൽ ആവശ്യമായ ഇന്ധനത്തിന് സംസ്ഥാന നികുതിയിൽ ഇളവ് ലഭ്യമാക്കാൻ വകുപ്പ് മുൻകൈയെടുക്കുമോ എന്ന് വ്യക്തമാക്കാമോ; ഇല്ലെങ്കിൽ കാരണം വിശദമാക്കാമോ?

സംസ്ഥാനത്ത് പട്ടികജാതി, പട്ടികഗോത്രങ്ങളില്‍പ്പെട്ടവരുടെ സാമൂഹിക, സാമ്പത്തിക വികസനത്തിന് അടിസ്ഥാനമായ മാനവ വിഭവശേഷി വികസനം സാധ്യമാക്കുന്നതിനുവേണ്ടി ആവിഷ്കരിച്ചിട്ടുള്ള പദ്ധതികള്‍ എന്തെല്ലാമാണ്;

പ്രൊഫഷണല്‍ കാേഴ്സുകള്‍ ഉള്‍പ്പെടെ പഠിക്കുന്ന പട്ടികജാതി, പട്ടികവര്‍ഗ്ഗ വിദ്യാര്‍ത്ഥികളുടെ താരതമ്യേന ഉയര്‍ന്ന തോതിലുള്ള കൊഴിഞ്ഞുപോക്ക് കുറയ്ക്കുന്നതിനും കോവിഡാനന്തരം ഇത് കൂടുതല്‍ രൂക്ഷമാകാതിരിക്കുന്നതിനും പ്രത്യേകം ശ്രദ്ധ പതിപ്പിക്കുന്നുണ്ടോ;

പട്ടികജാതി, പട്ടികവര്‍ഗ്ഗ വിദ്യാര്‍ത്ഥികള്‍ക്ക് ഡിജിറ്റല്‍ പഠന സൗകര്യങ്ങള്‍ ഒരുക്കുന്നതിനുവേണ്ടി നടപ്പിലാക്കിയ കാര്യങ്ങള്‍ എന്തെല്ലാമായിരുന്നുവെന്ന് അറിയിക്കാമോ?

മത്സ്യത്തൊഴിലാളികളില്‍ നിന്ന് സംഭരിക്കുന്ന മീന്‍ വില്‍ക്കുന്നതിന്റെ മറവില്‍ കൊല്ലം ജില്ലയിലെ മത്സ്യഫെഡിൽ നടന്നതായി ആരോപിക്കപ്പെടുന്ന തട്ടിപ്പിന് സമാനമായി മറ്റ് ജില്ലകളിലും തട്ടിപ്പ് നടന്നിട്ടുണ്ടോ എന്ന കാര്യം അന്വേഷണ വിധേയമാക്കിയിട്ടുണ്ടോ;

ഇത് സംബന്ധിച്ച് അന്തിപ്പച്ച വാഹനങ്ങളില്‍ മീന്‍ വില്‍ക്കുന്ന കൊല്ലം ജില്ലയിലെ സ്ത്രീ തൊഴിലാളികള്‍ പരാതി നല്‍കിയിട്ടും നടപടി എടുക്കാത്തതിന്റെ കാരണം വിശദമാക്കാമോ;

പത്തനംതിട്ട ജില്ലയിൽ നിന്നും സമാനമായ പരാതി ലഭിച്ചിരുന്നോയെന്നും അതിന്മേൽ എന്തൊക്കെ നടപടികളാണ് സ്വീകരിച്ചതെന്നും വിശദമാക്കാമോ;

സമാനമായ തട്ടിപ്പുകളെക്കുറിച്ച് സമഗ്ര അന്വേഷണം നടത്തി കുറ്റവാളികളെ നിയമത്തിന് മുന്നില്‍ കൊണ്ടുവരാൻ നടപടി സ്വീകരിക്കുമോ എന്ന് വ്യക്തമാക്കാമോ?

മണ്ണെണ്ണയുടെയും ഡീസലിന്റെയും വിലവർദ്ധനവ് സംസ്ഥാനത്തെ മത്സ്യബന്ധന മേഖലയെ പ്രതികൂലമായി ബാധിച്ചിട്ടുണ്ടോയെന്ന് പരിശോധിച്ചിട്ടുണ്ടോ;

മത്സ്യബന്ധനത്തിനാവശ്യമായ ഇന്ധനം ന്യായവിലയ്ക്ക് ലഭ്യമാക്കുന്നതിന് സ്വീകരിക്കാൻ ഉദ്ദേശിക്കുന്ന നടപടികൾ വ്യക്തമാക്കുമോ;

തമിഴ്‍നാട്, കർണ്ണാടക സർക്കാരുകൾ സബ്സിഡി നിരക്കിൽ മണ്ണെണ്ണ നൽകുന്നതുപോലെ സംസ്ഥാനത്തും നൽകാൻ നടപടിയെടുക്കുമോ; എങ്കിൽ വിശദാംശം നൽകുമോ?

മണ്ണെണ്ണ വില വര്‍ദ്ധനവും മത്സ്യ ലഭ്യതയുടെ കുറവും കാരണം നിരവധി ബോട്ടുടമകളും തൊഴിലാളികളും കടക്കെണിയില്‍ അകപ്പെട്ടിരിക്കുന്നതായി ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കുമോ;

മണ്ണെണ്ണ വില വര്‍ദ്ധന കാരണം തൊഴിലില്ലാതെ കഷ്ടപ്പെടുന്ന തീരദേശ മേഖലയ്ക്ക് പ്രത്യേക മണ്ണെണ്ണ പാക്കേജ് നടപ്പിലാക്കാന്‍ ഉദ്ദേശിക്കുന്നുണ്ടോയെന്ന് വ്യക്തമാക്കാമോ;

സംസ്ഥാനത്ത് മണ്ണെണ്ണ സബ്സിഡി അനുവദിക്കുന്നുണ്ടോ; എങ്കില്‍ വിശദാംശം ലഭ്യമാക്കാമോ?

സംസ്ഥാനത്ത് പരമ്പരാഗത മത്സ്യത്തൊഴിലാളികളുടെ വളളങ്ങൾക്ക് നൽകി വരുന്ന മണ്ണെണ്ണ വളരെ അപര്യാപ്തമാണെന്നത് ശ്രദ്ധയിൽപ്പെട്ടിട്ടുണ്ടോ; വ്യക്തമാക്കുമോ;

മണ്ണെണ്ണയുടെ ലഭ്യത വർദ്ധിപ്പിക്കുവാൻ എന്തെങ്കിലും പദ്ധതി ആവിഷ്കരിക്കാൻ ഉദ്ദേശിക്കുന്നുണ്ടോ; എങ്കിൽ വിശദാംശം നൽകുമോ;

ഒരു ലിറ്റർ മണ്ണെണ്ണ ഇരുപത്തിയഞ്ച് രൂപനിരക്കിൽ നൽകണമെന്ന തൊഴിലാളികളുടെ ആവശ്യത്തിൻമേൽ എന്ത് നടപടി സ്വീകരിച്ചു എന്ന് വ്യക്തമാക്കുമോ?

പരിസ്ഥിതി ലോല പ്രദേശങ്ങള്‍ക്ക് സമീപമുള്ള ബഫര്‍ സോണ്‍ നിര്‍ണ്ണയം സംബന്ധിച്ച സുപ്രീം കോടതി വിധി ജനവാസ മേഖലകളില്‍ ഉയര്‍ത്തുന്ന ആശങ്കകള്‍ അകറ്റുവാന്‍ സംസ്ഥാന സര്‍ക്കാര്‍ സ്വീകരിച്ചുവരുന്ന നടപടികള്‍ വിശദമാക്കുമോ?

സംസ്ഥാനത്ത് ജലജീവന്‍ പദ്ധതി പ്രകാരം 21 ലക്ഷം കുടുംബങ്ങൾക്ക് കുടിവെള്ളമെത്തിക്കുന്ന പദ്ധതിയുടെ പ്രവർത്തന പുരോഗതി വിശദമാക്കാമോ;

പ്രസ്തുത പദ്ധതി പൂർണ്ണമായും തദ്ദേശസ്വയംഭരണ സ്ഥാപനങ്ങൾ വഴിയാണോ നടപ്പിലാക്കുന്നതെന്ന് വ്യക്തമാക്കാമോ;

സംസ്ഥാനത്ത് കൂടുതലായി നല്‍കുന്ന കുടിവെള്ള കണക്ഷനുകള്‍ക്ക് ആവശ്യമായ ജല സ്രോതസ്സുകള്‍ നിലവിലുണ്ടോ; കൂടുതല്‍ ജലസ്രോതസ്സുകള്‍ കണ്ടെത്തുന്നതിന് നടപടി സ്വീകരിക്കുമോയെന്ന് അറിയിക്കാമോ;

പ്രസ്തുത പദ്ധതിയിലൂടെ തീരദേശ, മലയോര മേഖലകളിലെ കുടിവെള്ള ക്ഷാമം പൂര്‍ണ്ണമായും പരിഹരിക്കാൻ കഴിയുമോയെന്ന് വ്യക്തമാക്കാമോ;

വിദൂര വന മേഖലകളിലെ പട്ടികവര്‍ഗ്ഗ കോളനികളില്‍ പ്രാദേശിക സ്രോതസ്സുകൾ ഉപയോഗപ്പെടുത്തി ജലജീവന്‍ പദ്ധതി വിപുലീകരിക്കുമോയെന്ന് അറിയിക്കാമോ?

സംസ്ഥാനത്ത് ഭവനരഹിതരായ മത്സ്യത്തൊഴിലാളികള്‍ക്ക് വീട് നിര്‍മ്മിച്ച് നല്‍കുന്നതിനുള്ള പദ്ധതി പ്രകാരം എത്ര പേര്‍ക്കാണ് വീടിന് അര്‍ഹതയുള്ളതായി കണ്ടെത്തിയിട്ടുള്ളതെന്ന് വ്യക്തമാക്കുമോ; ഇവരുടെ ഭവന നിര്‍മ്മാണത്തിനായി എന്തെല്ലാം കാര്യങ്ങള്‍ ചെയ്തിട്ടുണ്ടെന്ന് വിശദമാക്കാമോ;

കടലാക്രമണ ഭീഷണി നേരിടുന്ന പ്രദേശങ്ങളില്‍ വസിക്കുന്നവരെ മാറ്റിത്താമസിപ്പിക്കുന്നതിനുള്ള പുനര്‍ഗേഹം പദ്ധതിയുടെ പുരോഗതി അറിയിക്കാമോ;

നിര്‍ദ്ദിഷ്ട പ്രദേശങ്ങളില്‍ നിന്നും മാറ്റിപ്പാര്‍പ്പിക്കേണ്ടവരില്‍ എത്ര കുടുംബങ്ങള്‍ അതിന് തയ്യാറായിട്ടുണ്ടെന്നുള്ള വിവരം ലഭ്യമാക്കുമോ?

മത്സ്യഫെഡില്‍ വ്യാപകമായ പിന്‍വാതില്‍ നിയമനം നടന്നു എന്ന ആരോപണം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് അന്വേഷണ വിധേയമാക്കിയിട്ടുണ്ടോയെന്ന് വ്യക്തമാക്കാമോ;

2016 ഓഗസ്റ്റ് മുതൽ 2021 ഓഗസ്റ്റ് വരെ 342 നിയമനങ്ങൾ മത്സ്യഫെഡിൽ നടന്നു എന്നത് വസ്തുതയാണോ; എങ്കിൽ ചട്ടങ്ങൾ പാലിച്ചുകൊണ്ടാണോ പ്രസ്തുത നിയമനങ്ങള്‍ നടത്തിയതെന്ന് വ്യക്തമാക്കാമോ;

മത്സ്യഫെഡിലെ കോടിക്കണക്കിന് രൂപയുടെ ഇടപാടുകള്‍ കൈകാര്യം ചെയ്യുന്നത് പിന്‍വാതിൽ നിയമനം നേടിയവരാണെന്ന ആരോപണം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് ഗൗരവത്തോടെ കാണുന്നുണ്ടോ; പിന്‍വാതിൽ നിയമനം നേടിയവരാണ് അഴിമതി നടത്തിയത് എന്നത് വസ്തുതയാണോ; വ്യക്തമാക്കാമോ;

മത്സ്യത്തൊഴിലാളികളില്‍ നിന്നും സംഭരിച്ചതെന്ന പേരില്‍ അയല്‍ സംസ്ഥാനങ്ങളില്‍ നിന്നും മീന്‍ എത്തിക്കുന്നു എന്ന ആരോപണം ശ്രദ്ധയിൽപ്പെട്ടിട്ടുണ്ടോ; എങ്കിൽ ആയത് പാവപ്പെട്ട മത്സ്യത്തൊഴിലാളികളെ എപ്രകാരമാണ് ബാധിക്കുന്നതെന്ന് വ്യക്തമാക്കാമോ?

സംസ്ഥാനത്ത് ജലജീവന്‍ മിഷന്‍ ഇതുവരെ കൈവരിച്ച നേട്ടം വിശദമാക്കാമോ; എത്ര ശതമാനം വീടുകള്‍ക്ക് പൈപ്പ് കണക്ഷന്‍ നല്‍കിയിട്ടുണ്ടെന്ന് വ്യക്തമാക്കാമോ;

ജലസ്രോതസ്സുകളുടെ ലഭ്യതയും സുസ്ഥിരതയും പരിപാലനവും സംരക്ഷണവും ഉറപ്പ് വരുത്തുന്നതിന് ചെയ്തുവരുന്ന കാര്യങ്ങള്‍ എന്തെല്ലാമാണ്;

പദ്ധതി നിര്‍വ്വഹണം തടസ്സരഹിതമായി നടക്കുന്നുവെന്ന് ഉറപ്പുവരുത്താന്‍ ഏര്‍പ്പെടുത്തിയിട്ടുള്ള ക്രമീകരണം അറിയിക്കാമോ;

പദ്ധതിക്കുവേണ്ടി റോഡ് മുറിക്കുന്നതുമായി ബന്ധപ്പെട്ട പ്രശ്നങ്ങള്‍ പരിഹിക്കുന്നതിന് ഏകോപന സംവിധാനം ഏര്‍പ്പെടുത്തിയിട്ടുണ്ടോ?

വന മേഖലയ്ക്ക് ഒരു കിലോമീറ്റർ ചുറ്റളവിൽ പരിസ്ഥിതി ലോല മേഖലയായി പ്രഖ്യാപിക്കണമെന്ന സുപ്രീം കോടതി ഉത്തരവിനെതിരെ സ്വീകരിച്ച നടപടികൾ വിശദമാക്കാമോ;

സുപ്രീം കോടതി വിധി പുന:പരിശോധിക്കുന്നതിന് സമാന സാഹചര്യമുള്ള മറ്റ് സംസ്ഥാനങ്ങളോടൊപ്പം ഹർജി നൽകുവാൻ തയ്യാറാകുമോ;

വനമേഖലയ്ക്ക് ചുറ്റുമുള്ള പ്രദേശം ജനവാസ മേഖലയാണെന്ന സംസ്ഥാനത്തെ പ്രത്യേക സാഹചര്യം കണക്കിലെടുത്ത് സുപ്രീം കോടതി വിധി മറികടക്കുവാന്‍ ആവശ്യമായ നിയമനിര്‍മ്മാണം നടത്തുവാന്‍ കേന്ദ്ര സര്‍ക്കാരില്‍ സമ്മര്‍ദ്ദം ചെലുത്തുമോ?

സംസ്ഥാനത്ത് പട്ടികജാതി‌-പട്ടികവര്‍ഗ്ഗ വിഭാഗങ്ങളിലെ മുഴുവന്‍ കുടുംബങ്ങള്‍ക്കും ഭൂമിയും വീടും ഉറപ്പാക്കുന്നതിനായി ഈ സര്‍ക്കാരിന്റെ കാലയളവില്‍ നടത്തിയിട്ടുള്ള പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; വിശദമാക്കുമോ;

നവകേരള കര്‍മ്മപദ്ധതിയിലുള്‍പ്പെട്ട ലൈഫ് ഭവന പദ്ധതി പ്രകാരം പട്ടികജാതി-പട്ടികവര്‍ഗ്ഗ വിഭാഗങ്ങളില്‍പ്പെട്ട ഭുമിയുള്ളവര്‍ക്ക് വീട് നിര്‍മ്മിക്കുന്നതിനും ഭൂരഹിതര്‍ക്ക് ഭവന സമുച്ചയമോ ഹൗസിംഗ് ക്ലസ്റ്ററുകളോ വീടുകളോ നിര്‍മ്മിച്ച് നല്‍കുന്നതിനുമായി ഈ സര്‍ക്കാര്‍ നടത്തിയിട്ടുള്ള പ്രവര്‍ത്തനങ്ങള്‍ സംബന്ധിച്ച വിശദാംശം നല്‍കുമോ;

വനാവകാശ നിയമ പ്രകാരം ഈ സര്‍ക്കാരിന്റെ കാലത്ത് ഇത് സംബന്ധിച്ച് നടത്തിയിട്ടുള്ള പ്രവര്‍ത്തനങ്ങള്‍ വിശദമാക്കുമോ?

കേന്ദ്ര സര്‍ക്കാര്‍ നീല സമ്പദ് വ്യവസ്ഥയെന്ന പേരില്‍ തീരക്കടല്‍ മത്സ്യബന്ധന അനുമതിയിലും കടന്നുകയറ്റം നടത്താന്‍ പോകുന്നതായുള്ള വാര്‍ത്ത മത്സ്യത്തൊഴിലാളികളെ ആശങ്കയിലാഴ്ത്തിയെന്ന കാര്യം പരിശോധിച്ചിരുന്നോ;

തീരദേശ മത്സ്യത്തൊഴിലാളികളുടെ ദാരിദ്ര്യ നിര്‍മ്മാര്‍ജനത്തിന് സംസ്ഥാന സര്‍ക്കാര്‍ നടത്തുന്ന ക്ഷേമ, വികസന പ്രവര്‍ത്തനങ്ങള്‍ എന്തൊക്കെയെന്ന് വിശദമാക്കാമോ;

മത്സ്യത്തൊഴിലാളി കുടുംബങ്ങള്‍ക്ക് ബദല്‍ ഉപജീവന പദ്ധതി ആവിഷ്കരിച്ചിട്ടുണ്ടോ എന്ന് വ്യക്തമാക്കുമോ?