പ്രണയം നിരസിച്ചതിന് പെൺകുട്ടികളെ ശല്യം ചെയ്യുന്ന കേസുകളിൽ പോലീസ് മൃദുസമീപനം സ്വീകരിക്കുന്നുവെന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതിനെ ഗൗരവമായി കാണുന്നുണ്ടോയെന്ന് വ്യക്തമാക്കാമോ;

ചിയ്യാരം സ്വദേശി നീതു എന്ന ഇരുപത്തിരണ്ട് വയസ്സുകാരിയെ പ്രണയം നിരസിച്ചതിന്റെ പേരിൽ പെട്രോൾ ഒഴിച്ച് കൊലപ്പെടുത്തിയതും മലപ്പുറം ഏലംകുളത്ത് യുവതിയെ കുത്തിക്കൊലപ്പെടുത്തിയതുമായ കേസുകളെത്തുടർന്ന് സമാനമായ സംഭവങ്ങൾ തടയാൻ കൈക്കൊണ്ട നടപടികൾ വിശദമാക്കുമോ;

കോതമംഗലത്ത് ഡെന്റൽ കോളേജ് വിദ്യാർത്ഥിനിയായിരുന്ന മാനസ വെടിയേറ്റ് കൊല്ലപ്പെടുന്നതിന് മുൻപ് രാഖിലിനെ പ്രതിയാക്കി പോലീസിൽ പരാതി നല്കിയിരുന്നോ; എങ്കില്‍ പ്രസ്തുത പരാതിയിൽ എന്ത് നടപടികളാണ് സ്വീകരിച്ചതെന്ന് അറിയിക്കുമോ?

സംസ്ഥാനത്ത് കൊവിഡ് അതിജീവനത്തിനുള്‍പ്പെടെ തദ്ദേശ സ്വയംഭരണസ്ഥാപനങ്ങള്‍ നടത്തിയ പ്രവര്‍ത്തനങ്ങൾ കൂടുതല്‍ ശാക്തീകരിക്കാനുദ്ദേശിക്കുന്നുണ്ടോ;

കൊവിഡ് അതിജീവനം ലക്ഷ്യമാക്കി പന്ത്രണ്ടിന പരിപാടികള്‍ പ്രഖ്യാപിച്ച് നടപ്പാക്കിയിരുന്നോ; പുതുതായി പ്രഖ്യാപിച്ച നൂറുദിന പരിപാടിയുടെ ഭാഗമായി തദ്ദേശ സ്വയംഭരണസ്ഥാപനങ്ങള്‍ ഏറ്റെടുത്തു നടത്താന്‍ നിശ്ചയിച്ചിട്ടുള്ള പ്രവൃത്തി മേഖലകള്‍ ഏതെല്ലാമാണ്;

വകുപ്പിനുകീഴിൽ പ്രവർത്തിക്കുന്ന സന്നദ്ധസേനയുടെ സഹകരണത്തോടെ സാന്ത്വന പരിചരണം ഏറ്റെടുത്ത് നടത്താന്‍ തീരുമാനിച്ചിട്ടുണ്ടോ; വ്യക്തമാക്കാമോ?

കഴിഞ്ഞ സര്‍ക്കാര്‍ ഐ. ടി. മേഖലയില്‍ സൃഷ്ടിച്ച വികസനത്തിന്റെ തുടര്‍ച്ചയായി ഈ സര്‍ക്കാര്‍ എന്തെല്ലാം പ്രവര്‍ത്തനങ്ങള്‍ക്കാണ് ഊന്നൽ നല്‍കുന്നതെന്നറിയിക്കാമോ;

ഐ. ടി. വ്യവസായ രംഗത്തെ ലോകോത്തര കമ്പനികളെയുള്‍പ്പെടെ സംസ്ഥാനത്തേക്ക് ആകര്‍ഷിക്കുന്ന രീതിയില്‍ മികച്ച അടിസ്ഥാനസൗകര്യങ്ങളും വ്യവസായ അന്തരീക്ഷവും സൃഷ്ടിക്കാനായിട്ടുണ്ടോ;

ഐ. ടി. വ്യവസായത്തിലൂടെ സംസ്ഥാനത്ത് പരമാവധി തൊഴില്‍ സാധ്യതകള്‍ സൃഷ്ടിക്കുന്നതിനായി സര്‍ക്കാര്‍ ഐ. ടി. പാര്‍ക്കുകളുടെ വികസനത്തിനും പ്രത്യേക സാമ്പത്തിക മേഖലയിലും നടത്തുന്ന പ്രവര്‍ത്തനങ്ങള്‍ വിശദമാക്കാമോ?

മറ്റ് സംസ്ഥാനങ്ങളിൽ കൊവിഡ് രണ്ടാം തരംഗം അവസാനിക്കുമ്പോഴും കേരളത്തിൽ കൊവിഡ് കേസുകളുടെ എണ്ണം കുറയാതെ നിൽക്കുന്നതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ കാരണം വിശദമാക്കാമോ;

അശാസ്ത്രീയമായ ലോക്ഡൗണും എല്ലാ വിഭാഗം ജനങ്ങൾക്കും വാക്‌സിൻ ലഭ്യമാക്കുന്നതിലെ പോരായ്മയും കൊവിഡ് കേസുകൾ ഉയർന്ന് നിൽക്കുന്നതിന് കാരണമായിട്ടുണ്ടെന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ വ്യക്തമാക്കാമോ;

സാമൂഹ്യ പ്രതിരോധശേഷി (Herd Immunity) കൈവരിച്ച് മാത്രമേ കൊവിഡിനെ പൂർണ്ണമായി നിയന്ത്രണ വിധേയമാക്കാൻ കഴിയുകയുള്ളൂവെന്ന് കരുതുന്നുണ്ടോ; വിശദമാക്കാമോ?

കരുവന്നൂർ സർവ്വീസ്‌ സഹകരണ ബാങ്കിൽ മുന്നൂറ്റി അമ്പത് കോടി രൂപയുടെ തട്ടിപ്പ് നടന്ന സംഭവത്തിൽ പോലീസ് അന്വേഷണത്തിന്റെ പുരോഗതി വിശദമാക്കാമോ;

പ്രസ്തുത സംഭവത്തിൽ ഏതെങ്കിലും വ്യക്തികളെ അറസ്റ്റ് ചെയ്തിട്ടുണ്ടോ; എങ്കിൽ വിശദാംശം നൽകാമോ;

ഈ സംഭവത്തിൽ പോലീസിന് പരാതി ലഭിക്കുന്നത് എപ്പോഴാണെന്നും എന്തൊക്കെ വകുപ്പുകൾ ചുമത്തിയാണ് കേസ് എടുത്തിട്ടുള്ളതെന്നും വ്യക്തമാക്കാമോ;

പ്രസ്തുത സ്ഥാപനത്തിൽ 2019-ൽ തട്ടിപ്പ് കണ്ടെത്തിയിട്ടും ആയത് യഥാസമയം പോലീസിനെ അറിയിക്കാതിരുന്നത് കേസ് ഒതുക്കിത്തീർക്കാൻ നടത്തിയ ശ്രമത്തിന്റെ ഭാഗമാണെന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതുസംബന്ധിച്ച് പരിശോധിച്ചിട്ടുണ്ടോ എന്ന് വ്യക്തമാക്കാമോ?

സംസ്ഥാനത്ത് അശാസ്ത്രീയമായ ലോക്ക് ഡൗൺ കാരണം ജീവനോപാധി നഷ്ടപ്പെട്ട് ജനങ്ങൾ കഷ്ടത്തിലാകുന്നതായ ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് ഗൗരവത്തോടെ കാണുമോ;

ലോക്ക് ഡൗൺ വരുത്തിവച്ച സാമ്പത്തിക ബാധ്യത താങ്ങാൻ സാധിക്കാതെ പത്തോളം പേർ ആത്മഹത്യ ചെയ്തതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ പ്രസ്തുത സാഹചര്യത്തിൽ ലോക്ക് ഡൗണിൽ കൂടുതൽ ഇളവുകൾ നല്കാൻ തയ്യാറാകുമോ;

കൊവിഡ് മൂലം കഷ്ടത്തിലായ ജനങ്ങൾക്ക് ആശ്വാസമായി നിശ്ചിത തുക ബാങ്ക് അക്കൗണ്ടിൽ ഡയറക്റ്റ് ബെനിഫിറ്റ് ട്രാൻസ്ഫറായി നല്കാൻ തയ്യാറാകുമോ?

കൊവിഡ് മൂലം എല്ലാ മേഖലകളിലും ഉണ്ടായിരിക്കുന്ന തളര്‍ച്ചയെക്കുറിച്ച് സർക്കാർ എന്തെങ്കിലും പഠനങ്ങൾ നടത്തിയിട്ടുണ്ടോ; വിശദമാക്കാമോ;

പ്രസ്തുത വിഷയം പഠിച്ച് പരിഹാര നടപടികള്‍ സ്വീകരിക്കുന്നതിനായി കൊവിഡ് ദുരന്ത നിവാരണ കമ്മീഷന്‍ രൂപീകരിക്കാൻ തയ്യാറാകുമോ;

കൊവിഡ് മൂലം കഷ്ടത്തിലായ ചെറുകിട വ്യാപാരികള്‍, ജപ്തി ഭീഷണി നേരിടുന്നവർ, അസംഘടിത മേഖലയിലെ തൊഴിലാളികൾ എന്നിവർക്ക് ആശ്വാസം എത്തിക്കാൻ നടപടികൾ സ്വീകരിക്കുമോ; വ്യക്തമാക്കുമോ?

സംസ്ഥാനത്ത് അഴിമതി പൂര്‍ണ്ണമായി നിര്‍മ്മാര്‍ജ്ജനം ചെയ്യുന്നതിന്റെ ഭാഗമായി വിജിലന്‍സ് ആന്‍ഡ് ആന്റികറപ്ഷന്‍ ബ്യൂറോയെ ശക്തിപ്പെടുത്തുന്നതിന് നടപടി സ്വീകരിച്ചിട്ടുണ്ടോ; വ്യക്തമാക്കാമോ;

അഴിമതി സംബന്ധിച്ച് പൊതുജനങ്ങള്‍ക്കുണ്ടാകുന്ന പരാതികള്‍ സ്വീകരിക്കുന്നതിനും അവ സമയബന്ധിതമായി പരിഹരിക്കുന്നതിനും എന്തെല്ലാം സംവിധാനമാണ് നിലവിലുള്ളതെന്ന് വ്യക്തമാക്കാമോ;

അഴിമതിമുക്ത കേരളം സാക്ഷാത്ക്കരിക്കുന്നതിന്റെ ഭാഗമായി എന്തെല്ലാം ബോധവല്‍ക്കരണ പരിപാടികളാണ് നടത്തിവരുന്നതെന്ന് അറിയിക്കാമോ?

ദേശീയ ആരോഗ്യ സൂചികയില്‍ സംസ്ഥാനത്തിന് ഒന്നാം സ്ഥാനം നിലനിര്‍ത്താനായിട്ടുണ്ടോയെന്ന് വ്യക്തമാക്കാമോ;

മാതൃ, ശിശു മരണ നിരക്കില്‍ സംസ്ഥാനത്തിന് കൈവരിക്കാനായ നേട്ടം ദേശീയ ശരാശരിയുമായി താരതമ്യം ചെയ്ത് അറിയിക്കാമോ; ശിശുമരണ നിരക്ക് കുറയ്ക്കാന്‍ ആദ്യത്തെ ആയിരം ദിനങ്ങള്‍ പദ്ധതി കൂടുതല്‍ വ്യാപിപ്പിക്കാന്‍ ഉദ്ദേശിക്കുന്നുണ്ടോ;

ദരിദ്ര വിഭാഗങ്ങളില്‍പ്പെട്ടവര്‍ ഉള്‍പ്പെടെ സംസ്ഥാനത്തെ എല്ലാവരുടെയും ആരോഗ്യ പരിരക്ഷ ഉറപ്പാക്കുന്നതിന് ആവിഷ്കരിച്ചിട്ടുള്ള പദ്ധതികള്‍ എന്തെല്ലാമാണെന്ന് അറിയിക്കാമോ;

അടിയന്തര വൈദ്യസഹായം എത്തിക്കല്‍ പദ്ധതി ശാക്തീകരിക്കാന്‍ സ്വീകരിച്ചിട്ടുള്ള നടപടികള്‍ അറിയിക്കാമോ?

കൊവിഡ് രണ്ടാം തരംഗത്തിന്റെ ആഘാതത്തിലും സംസ്ഥാനത്ത് ഒരാളും പട്ടിണി കിടക്കില്ലെന്നു് ഉറപ്പുവരുത്താന്‍ ഭക്ഷ്യ വകുപ്പിന്റെ നേതൃത്വത്തില്‍ നടത്തിവരുന്ന പ്രവര്‍ത്തനങ്ങള്‍ വിശദമാക്കുമോ;

സൗജന്യ റേഷനും ഭക്ഷ്യകിറ്റും എത്ര കാലത്തേക്ക് വിതരണം ചെയ്യാനാണ് നിലവില്‍ തീരുമാനിച്ചിട്ടുള്ളതെന്ന് വ്യക്തമാക്കുമോ;

പട്ടിക ഗോത്രങ്ങളില്‍പ്പെട്ടവര്‍ക്ക് സൗജന്യ റേഷനും ഭക്ഷ്യകിറ്റും ലഭിക്കുന്നുവെന്നുറപ്പാക്കാന്‍ പ്രത്യേകം പദ്ധതി തയ്യാറാക്കിയിരുന്നോ;

ഇതര സംസ്ഥാനങ്ങളില്‍ നിന്നുള്ള തൊഴിലാളികള്‍ക്കും സൗജന്യ റേഷന്‍ നല്‍കിയിരുന്നോ; വ്യക്തമാക്കുമോ?

പ്രണയം നിരസിച്ചതിന് പെൺകുട്ടികള്‍ കൊല ചെയ്യപ്പെടുന്ന സംഭവങ്ങൾ ഉയർന്നുവരുന്ന ഗുരുതരമായ സാഹചര്യം ശ്രദ്ധയിൽപ്പെട്ടിട്ടുണ്ടോ;

കോതമംഗലത്ത് ഡെന്റൽ കോളേജ് വിദ്യാർത്ഥിനിയെ വെടിവെച്ച് കൊന്ന സംഭവത്തിന്റെ അടിസ്ഥാനത്തിൽ സമാന സംഭവങ്ങൾ ഉണ്ടാകാതിരിക്കാൻ എന്തൊക്കെ നടപടികളാണ് സ്വീകരിക്കാൻ ഉദ്ദേശിക്കുന്നത്; വിശദമാക്കാമോ;

സോഷ്യൽമീഡിയ വഴിയുളള സൗഹൃദം പിന്നീട് കൊലപാതകത്തിലേക്ക് നയിക്കുന്ന സാഹചര്യം തടയുന്നതിന് ബോധവത്കരണ പരിപാടികളും നിയമനിർമ്മാണവും നടത്താൻ മുൻകൈയ്യെടുക്കുമോ; വിശദമാക്കാമോ?

തിരുവനന്തപുരം-കാസര്‍കോട് അര്‍ദ്ധ അതിവേഗ സില്‍വര്‍ ലൈന്‍ പദ്ധതിയുമായി ബന്ധപ്പെട്ട സ്ഥലം ഏറ്റെടുക്കല്‍, പുനരധിവാസം, നഷ്ടപരിഹാരം എന്നിവ സംബന്ധിച്ച് പഠനം നടത്തിയിട്ടുണ്ടോയെന്ന് അറിയിക്കുമോ;

പ്രസ്തുത പദ്ധതി പരിസ്ഥിതിക്കുണ്ടാക്കുന്ന ആഘാതം സംബന്ധിച്ച് വിലയിരുത്തിയിട്ടുണ്ടോ; വ്യക്തമാക്കുമോ;

ഈ പദ്ധതി സംബന്ധിച്ച ആശങ്കകളും ആക്ഷേപങ്ങളും പരിശോധിക്കുന്നതിന് നടപടി സ്വീകരിക്കുമോ?

സംസ്ഥാനത്ത് പോലീസ് സേനയുടെ പ്രവര്‍ത്തനത്തില്‍ ആധുനികീകരണം നടത്തുന്നതിന്റെ ഭാഗമായി പോലീസ് സ്റ്റേഷനില്‍ നേരിട്ടു പോകാതെ പരാതി നല്‍കാന്‍ കഴിയുന്ന സ്മാര്‍ട്ട് കിയോസ്ക് കൂടുതല്‍ സ്ഥലങ്ങളിലേക്ക് വ്യാപിപ്പിക്കാന്‍ ഉദ്ദേശിക്കുന്നുണ്ടോ;

ആധുനിക കാലത്തിന് അനുയോജ്യമായ മികച്ച സേനയായി സംസ്ഥാനത്തെ പോലീസ് സേനയെ മാറ്റിത്തീര്‍ക്കുന്നതിന് കഴിഞ്ഞ സര്‍ക്കാര്‍ നടത്തിയതിന്റെ തുടര്‍ച്ചയായി ചെയ്യാനുദ്ദേശിക്കുന്ന നവീകരണ പ്രവര്‍ത്തനങ്ങള്‍ എന്തൊക്കെയാണ്;

ജനമൈത്രി പോലീസ് സംവിധാനം പോലീസിനെ കൂടുതല്‍ ജനകീയമാക്കാന്‍ പ്രയോജനം ചെയ്തിട്ടുണ്ടോ;

എല്ലാ പോലീസ് സ്റ്റേഷനുകള്‍ക്കും സ്വന്തമായി കെട്ടിടവും വാഹനവും ഉറപ്പാക്കാന്‍ പരിപാടിയുണ്ടോ; വ്യക്തമാക്കുമോ?

സംസ്ഥാനത്ത് ലക്ഷക്കണക്കിന് കാർഡുടമകൾക്ക് ജൂൺമാസ കിറ്റ് നല്‍കാതെയും ജൂലൈമാസ കിറ്റ് നിഷേധിച്ചും സെര്‍വര്‍ കേട് വരുത്തിയും റേഷന്‍ വിതരണം അട്ടിമറിക്കുന്നതായുള്ള ആക്ഷേപം ശ്രദ്ധയിൽപ്പെട്ടിട്ടുണ്ടോ;

പന്ത്രണ്ട് ലക്ഷം കുടുംബങ്ങള്‍ കിറ്റ് വാങ്ങാന്‍ ബാക്കിയുളളപ്പോള്‍ ജൂൺമാസ കിറ്റ് വിതരണം അവസാനിപ്പിക്കാന്‍ സിവില്‍ സപ്‌ളൈസ് ഡയറക്ടര്‍ ഉത്തരവിറക്കിയത് ഏത് സാഹചര്യത്തിലാണെന്ന് വ്യക്തമാക്കുമോ;

സെര്‍വര്‍ തകരാര്‍ മൂലം നിരവധി കുടുംബങ്ങള്‍ക്ക് റേഷന്‍ സാധനങ്ങളും കിറ്റും ലഭിക്കാത്ത സാഹചര്യത്തിൽ ആയത് പരിഹരിച്ച് റേഷൻ വിതരണം സുഗമമാക്കുന്നതിന് അടിയന്തര നടപടി സ്വീകരിക്കുമോ; വ്യക്തമാക്കുമോ?

കഴിഞ്ഞ സര്‍ക്കാരിന്റെ കാര്യക്ഷമമായ പ്രവര്‍ത്തനങ്ങളുടെ ഫലമായി ഇന്ത്യയിലെ ഏറ്റവും അഴിമതി കുറഞ്ഞ സംസ്ഥാനമാക്കി കേരളത്തെ മാറ്റാന്‍ സാധിച്ചിട്ടുണ്ടോ;

സര്‍ക്കാര്‍ സര്‍വ്വീസിലെയും പൊതുരംഗത്തെയും അഴിമതി നിര്‍മ്മാര്‍ജ്ജനം ചെയ്യുകയെന്ന ലക്ഷ്യത്തോടെ അഴിമതിമുക്ത കേരളം പദ്ധതി പ്രാവര്‍ത്തികമാക്കിയിട്ടുണ്ടോ;

സര്‍ക്കാര്‍ സേവനങ്ങള്‍ സുതാര്യവും ജനങ്ങളുടെ അവകാശവുമാക്കി അഴിമതിക്കുള്ള സാഹചര്യങ്ങള്‍ ഇല്ലാതാക്കാന്‍ ഉദ്ദേശിക്കുന്നുണ്ടോ;

വിജിലന്‍സ് ആന്റ് ആന്റി കറപ്ഷന്‍ ബ്യൂറോയെ ശക്തിപ്പെടുത്താന്‍ സ്വീകരിച്ചിട്ടുള്ള നടപടികള്‍ അറിയിക്കാമോ?

കൊവിഡ് മഹാമാരിയുടെ പശ്ചാത്തലത്തിൽ വാക്സിൻ സമത്വം പ്രാവർത്തികമാക്കുന്നതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

വാക്സിൻ സമത്വം പ്രാവർത്തികമാക്കുന്നതിനായി സംസ്ഥാനത്തിന് ആവശ്യമായ അളവിൽ വാക്സിൻ നൽകുവാൻ കേന്ദ്രസർക്കാർ സ്വീകരിച്ചിട്ടുള്ള നടപടികൾ വിശദമാക്കാമോ;

വാക്സിൻ സമത്വത്തിനായി സംസ്ഥാന സർക്കാർ വാക്സിനേഷൻ രജിസ്ട്രേഷന്‍ ക്യാമ്പയിനിന് അനുമതി നൽകിയിട്ടുണ്ടോ; വിശദമാക്കാമോ;

എങ്കില്‍ പ്രസ്തുത ക്യാമ്പയിന്‍ എന്നത്തേയ്ക്ക് പൂർത്തിയാക്കാനാണ് ലക്ഷ്യമിട്ടിട്ടുള്ളതെന്ന് വെളിപ്പെടുത്താമോ;

വാക്സിനേഷനുമായി ബന്ധപ്പെട്ട് സ്പോട്ട് രജിസ്ട്രേഷ​ന്റെ കാര്യത്തിൽ മാനദണ്ഡങ്ങൾ കൃത്യമായി പാലിക്കപ്പെടുന്നുവെന്ന് ഉറപ്പുവരുത്തുവാൻ നടപടികൾ സ്വീകരിച്ചിട്ടുണ്ടോ; വിശദമാക്കാമോ?

ദീർഘകാലത്തെ പ്രവാസ ജീവിതം കഴിഞ്ഞ് തിരിച്ചെത്തിയ പ്രവാസികള്‍ക്ക് ആജീവനാന്തം ചികിത്സാസഹായം നല്‍കുന്നതിന് നടപടി സ്വീകരിക്കുമോ;

തിരിച്ചെത്തിയ പ്രവാസി മലയാളികള്‍ക്ക് നല്‍കുന്ന ആനുകൂല്യങ്ങള്‍ വർദ്ധിപ്പിക്കുന്നതിന് എന്തൊക്കെ നടപടികള്‍ സ്വീകരിക്കുമെന്ന് വ്യക്തമാക്കാമോ;

പ്രവാസി മലയാളികളുടെ പ്രശ്നങ്ങള്‍ സമയബന്ധിതമായി പരിഹരിക്കുന്നതിന് പ്രത്യേക പദ്ധതി നടപ്പാക്കുമോ എന്ന് വ്യക്തമാക്കാമോ?

തിരുവനന്തപുരം വിമാനത്താവളത്തിന്റെ നടത്തിപ്പ് ഈ മേഖലയില്‍ മുന്‍ പരിചയമില്ലാത്തതായി പറയപ്പെടുന്ന അദാനി ഗ്രൂപ്പിന് നൽകിയത് ശ്രദ്ധയിൽപ്പെട്ടിട്ടുണ്ടോ;

വിവിധ പദ്ധതികൾക്കായി ആയിരത്തി അഞ്ഞൂറ് കോടി രൂപയും പുതിയ ടെർമിനൽ നിർമ്മാണത്തിനായി അറുന്നൂറ് കോടി രൂപയും ചെലവഴിച്ച് അതിന്റെ പ്രവൃത്തികൾ പുരോഗമിക്കുമ്പോൾ പ്രസ്തുത വിമാനത്താവളം സ്വകാര്യ വ്യക്തിക്ക് കൈമാറുന്നതിനെതിരെ എന്ത് നടപടി സ്വീകരിച്ചുവെന്ന് വ്യക്തമാക്കുമോ;

ലാഭത്തിൽ പ്രവർത്തിച്ചുകൊണ്ടിരുന്ന ഡൽഹി, മുംബൈ വിമാനത്താവളങ്ങൾ സ്വകാര്യ വ്യക്തിയെ ഏൽപ്പിച്ചതിലൂടെ നടന്നിട്ടുള്ളതായി പറയപ്പെടുന്ന ചൂഷണങ്ങളുടെയും സംഭവിച്ച നഷ്ടത്തിന്റെയും അടിസ്ഥാനത്തിൽ തലസ്ഥാനത്തെ വിമാനത്താവളത്തിന് സമാനഗതി ഉണ്ടാകാതിരിക്കാൻ സർക്കാർ എന്തെങ്കിലും നടപടി സ്വീകരിക്കാന്‍ ഉദ്ദേശിക്കുന്നുണ്ടോ; വ്യക്തമാക്കുമോ?

കുറ്റവും ശിക്ഷയും സംബന്ധിച്ച ആധുനികകാല കാഴ്ചപ്പാടിനനുസരിച്ച് സംസ്ഥാനത്തെ ജയിലുകളുടെ ഭരണനിർവ്വഹണം പരിഷ്ക്കരിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ജനോപകാരപ്രദമായ കാര്യങ്ങൾക്ക് തടവുകാരുടെ മനുഷ്യ വിഭവശേഷി ഉപയോഗപ്പെടുത്തി എന്തെല്ലാം പ്രവർത്തനങ്ങൾ നടത്തുന്നുണ്ട്; വിശദമാക്കുമോ;

ജയിലുകളിലെ മനുഷ്യാവകാശ ലംഘനങ്ങള്‍, സുരക്ഷാ വീഴ്ചകൾ എന്നിവ ഒഴിവാക്കുന്നതിന് നടപടികൾ സ്വീകരിച്ചിട്ടുണ്ടോ; വിശദമാക്കാമോ;

ജയിലുകളിൽ ആവശ്യമായ ചികിത്സാ സൗകര്യങ്ങള്‍ ഉറപ്പുവരുത്തുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

ജയിലുകളില്‍ നിയമവിരുദ്ധമായ പ്രവര്‍ത്തനങ്ങള്‍ നടക്കുന്നില്ല എന്ന് ഉറപ്പുവരുത്തുന്നതിന്റെ ഭാഗമായി ആവശ്യമായ ഉദ്യോഗസ്ഥരുടെ സേവനം ലഭ്യമാക്കുന്നതിന് നടപടികൾ സ്വീകരിച്ചിട്ടുണ്ടോ; വിശദമാക്കാമോ;

ജയിലുകളുടെ പ്രവർത്തനം കാര്യക്ഷമമാക്കുന്നതിന് ആവശ്യമായ സുരക്ഷാ ഉപകരണങ്ങളും മെറ്റൽ ഡിറ്റക്ടർ, സ്കാനർ, സി. സി. ടി. വി. തുടങ്ങിയ സംവിധാനങ്ങളും ഏർപ്പെടുത്താൻ നടപടി സ്വീകരിച്ചിട്ടുണ്ടോ; വിശദമാക്കാമോ?

ഭാരത സര്‍ക്കാര്‍ നല്‍കി വരുന്ന പത്മ പുരസ്‌കാരങ്ങളുടെ മാതൃകയില്‍ കേരളത്തില്‍ പുതിയ പുരസ്‌കാരം ഏര്‍പ്പെടുത്താന്‍ നടപടി സ്വീകരിക്കുമോ;

സംസ്ഥാനത്ത് വ്യത്യസ്ത മേഖലകളില്‍ പ്രാഗത്ഭ്യവും വ്യക്തിമുദ്രയും പതിപ്പിച്ചവരെ ആദരിക്കുന്നതിന് പ്രസ്തുത പുരസ്‌കാരം ഗുണം ചെയ്യുമെന്ന് കരുതുന്നുണ്ടോ; വ്യക്തമാക്കാമോ?

സ്റ്റാർട്ടപ്പുകൾ ആരംഭിക്കാനുദ്ദേശിക്കുന്ന യുവ സംരംഭകർക്ക് സ്റ്റാർട്ടപ്പ് മിഷനിലൂടെ എന്തെല്ലാം സഹായങ്ങളാണ് നൽകി വരുന്നതെന്ന് വിശദമാക്കാമോ;

സംസ്ഥാനത്തെ സ്റ്റാർട്ടപ്പുകൾക്ക് അന്താരാഷ്ട്ര നിലവാരത്തിലുള്ള അടിസ്ഥാന സൗകര്യങ്ങൾ ഒരുക്കുന്നതിന് നടപടികൾ സ്വീകരിച്ചിട്ടുണ്ടോ; വിശദമാക്കാമോ;

പുതിയ സ്റ്റാർട്ടപ്പ് സംരംഭകർക്ക് സഹായകരമാകുന്ന രീതിയിൽ സേവനങ്ങൾ ഓൺലൈനായി ലഭ്യമാക്കാൻ പദ്ധതിയുണ്ടോ; വിശദാംശം ലഭ്യമാക്കാമോ;

കേരളത്തിലെ സ്റ്റാർട്ടപ്പ് വ്യവസായ സംരംഭങ്ങളിൽ വനിതാ സംരംഭകരുടെ പങ്കാളിത്തം വർദ്ധിച്ചിട്ടുണ്ടോ; വിശദമാക്കാമോ?

രോഗികളുടെ ദുരിതം മുതലെടുത്ത് സാമ്പത്തിക ചൂഷണം നടത്തുന്ന വന്‍ വ്യവസായമായി രാജ്യത്തെ മിക്ക സ്വകാര്യ ആശുപത്രികളും മാറിക്കഴിഞ്ഞെന്ന സുപ്രീം കോടതിയുടെ വിമര്‍ശനം ശ്രദ്ധയില്‍പ്പെട്ടിട്ടുണ്ടോ;

സംസ്ഥാനത്ത് സ്വകാര്യ ആശുപത്രികളിലെ സാമ്പത്തിക ചൂഷണം നിയന്ത്രിക്കുന്നതിന് പര്യാപ്തമായ എന്തൊക്കെ നിയമങ്ങളാണ് നിലവിലുള്ളതെന്ന് വ്യക്തമാക്കുമോ;

ഈ മേഖലയില്‍ കൂടുതല്‍ കര്‍ശന നിയന്ത്രണങ്ങള്‍ കൊണ്ടുവരുന്നതിന് നടപടികള്‍ സ്വീകരിക്കുമോയെന്ന് വ്യക്തമാക്കുമോ?

കൊവിഡ് മഹാമാരിയെത്തുടര്‍ന്ന് നാട്ടിലേക്ക് മടങ്ങാന്‍ നിര്‍ബന്ധിതരായവരുടെ ബാഹുല്യം പരിഗണിച്ച് പ്രവാസി ക്ഷേമത്തിനായുള്ള വിവിധ പദ്ധതികള്‍ ഊര്‍ജ്ജിതമാക്കിയിരുന്നോ;

തിരികെയെത്തുന്ന പ്രവാസികളുടെ സംരംഭകത്വ സഹായത്തിനായി നടപ്പാക്കിവരുന്ന നോര്‍ക്ക ഡിപ്പാര്‍ട്ട്മെന്റ് പ്രോജക്റ്റ് ഫോര്‍ റിട്ടേണ്‍ എമിഗ്രന്‍സ് വിപുലീകരിച്ചിട്ടുണ്ടോ; സംരംഭങ്ങള്‍ ആരംഭിക്കാൻ ഉദ്ദേശിക്കുന്നവർക്ക് ഈ പദ്ധതി വഴി എന്തെല്ലാം സഹായങ്ങള്‍ നല്‍കുന്നുണ്ടെന്ന് അറിയിക്കാമോ;

പ്രവാസികള്‍ക്കായുള്ള സാന്ത്വന പദ്ധതി പ്രകാരം എത്ര പേര്‍ക്ക് സഹായം ലഭ്യമാക്കി എന്നതിന്റെ കണക്കുകൾ ലഭ്യമാണോ; വ്യക്തമാക്കാമോ?

സംസ്ഥാന സർക്കാർ കൊവിഡ് മരണങ്ങൾ മറച്ചു വയ്ക്കുന്നു എന്ന ആക്ഷേപം ശ്രദ്ധയിൽപ്പെട്ടിട്ടുണ്ടോ; എങ്കില്‍ ഇത് പരിഹരിക്കാൻ എന്തെങ്കിലും നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കുമോ;

വിവരാവകാശനിയമം വഴി 13 .07.2021-ന് ഇൻഫർമേഷൻ കേരള മിഷനില്‍ നിന്നും ലഭിച്ച കൊവിഡ് മരണങ്ങളുടെ കണക്കിലും ആരോഗ്യ വകുപ്പിന്റെ കണക്കിലും ഏഴായിരം മരണങ്ങളുടെ വ്യത്യാസം ഉണ്ടായതായി ശ്രദ്ധയിൽപ്പെട്ടിട്ടുണ്ടോ; എങ്കില്‍ ഇതിന് ഇടയാക്കിയ കാരണങ്ങൾ വിശദമാക്കാമോ;

കൊവിഡ് മരണങ്ങൾ ശരിയായ രീതിയിൽ കണക്കാക്കുന്നതിൽ ആരോഗ്യ വകുപ്പിന് വീഴ്ച സംഭവിച്ചിട്ടുണ്ടോ; എങ്കില്‍ കാരണം വിശദമാക്കാമോ?

പാശ്ചാത്യ രാജ്യങ്ങളിൽ മാത്രം സംഭവിക്കാറുള്ള തോക്ക് ഉപയോഗിച്ചുള്ള കൊലപാതകം സംസ്ഥാനത്ത് ഉണ്ടാകുന്ന സാഹചര്യം അന്വേഷണ വിധേയമാക്കിയിട്ടുണ്ടോ;

കോതമംഗലത്ത് ഡെന്റൽ കോളേജ് വിദ്യാർത്ഥിനിയായിരുന്ന മാനസയെ രാഖില്‍ എന്ന യുവാവ് വെടിവെച്ചുകൊന്ന സംഭവത്തിൽ തോക്കിന്റെ ഉറവിടം കണ്ടെത്താൻ പോലീസിന് സാധിച്ചിട്ടുണ്ടോ; ഉണ്ടെങ്കിൽ വിശദാംശങ്ങൾ നൽകാമോ;

സംസ്ഥാനത്ത് ഓൺലൈൻ പോർട്ടലുകൾ, ഡാർക്ക് വെബ് തുടങ്ങിയവയിൽ നിന്നും അനധികൃതമായി തോക്കുകൾ വാങ്ങുവാന്‍ സാധിക്കും എന്നത് വസ്തുതയാണോ ; ഇത് സംബന്ധിച്ച് എന്തെങ്കിലും പരാതികൾ പോലീസിന് ലഭിച്ചിട്ടുണ്ടോ; വിശദമാക്കാമോ;

സംസ്ഥാനത്ത് തോക്കിന് ലൈസൻസ് അനുവദിക്കുന്നതിനുള്ള മാനദണ്ഡങ്ങൾ വ്യക്തമാക്കാമോ?

സംസ്ഥാനത്ത് സ്ത്രീകളുടെ കരുത്തുറ്റ സാമൂഹിക സംഘടനാ സംവിധാനം എന്ന നിലയിൽ കുടുംബശ്രീയുടെ പ്രവർത്തനമേഖല വിപുലീകരിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ഇ-കൊമേഴ്സ് മേഖലയുടെ വളർച്ചാസാധ്യത കണക്കിലെടുത്ത് ഈ രംഗത്ത് കുടുംബശ്രീയുടെ പ്രവര്‍ത്തന പുരോഗതി വിലയിരുത്തിയിട്ടുണ്ടോ; വിശദാംശം നല്‍കാമോ;

കുടുംബശ്രീയുടെ ഇ-കോമേഴ്സ് പ്രവര്‍ത്തനം വിപുലീകരിക്കുന്നതുമായി ബന്ധപ്പെട്ട് നിലവിലുള്ള ക്ലേശ ഘടകങ്ങള്‍ എന്തെല്ലാമാണെന്ന് വ്യക്തമാക്കാമോ;

കുടുംബശ്രീ സംരംഭകര്‍ക്ക് നേരിട്ട് ഇ-കൊമേഴ്സ് സൈറ്റുകളില്‍ ഉല്‍പന്നങ്ങള്‍ വില്പന നടത്തുവാന്‍ ക്രമീകരണം ഏര്‍പ്പെടുത്തിയിട്ടുണ്ടോ; വിശദമാക്കാമോ;

ഇ-കൊമേഴ്സ് രംഗത്ത് കുടുംബശ്രീയുടെ പ്രവർത്തനം വിപുലീകരിക്കുന്നതിന് നടപടികൾ പരിഗണനയിലുണ്ടോ; വിശദീകരിക്കാമോ?

സംസ്ഥാനത്ത് ദേശീയ ഭക്ഷ്യ ഭദ്രത നിയമം ഫലപ്രദമായി നടപ്പിലാക്കുന്നതിനായി ഈ സര്‍ക്കാര്‍ എന്തെല്ലാം നടപടികളാണ് സ്വീകരിക്കാനുദ്ദേശിക്കുന്നതെന്ന് അറിയിക്കാമോ;

ഇതിന്റെ ഭാഗമായി റേഷന്‍ കടകളെ വൈവിധ്യവത്കരിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ;

കൊവിഡ് രോഗ വ്യാപനത്തിന്റെ പശ്ചാത്തലത്തില്‍ പൊതുജനങ്ങള്‍ക്ക് ബുദ്ധിമുട്ട് ഉണ്ടാകാത്ത രീതിയില്‍ റേഷന്‍ കടകളുടെ പ്രവര്‍ത്തന സമയത്തില്‍ വരുത്തിയിട്ടുള്ള ക്രമീകരണങ്ങള്‍ എപ്രകാരമാണെന്ന് വ്യക്തമാക്കാമോ?

സംസ്ഥാനത്ത് യുവജനങ്ങള്‍ക്കിടയില്‍ ലഹരിയുടെ ഉപയോഗം ഇല്ലാതാക്കുന്നതിന് ഈ സര്‍ക്കാര്‍ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

സ്കൂള്‍, കോളേജ് തലങ്ങളില്‍ ലഹരി വിരുദ്ധ ക്ലബ്ബുകളുടെ പ്രവര്‍ത്തനങ്ങള്‍ കൂടുതല്‍ വിപുലമാക്കുവാന്‍ നിര്‍ദ്ദേശം നല്‍കിയിട്ടുണ്ടോയെന്ന് അറിയിക്കാമോ;

ലഹരിയുടെ ഉപയോഗത്തിനെതിരെ പൊതുജനങ്ങള്‍ക്ക് ബോധവത്ക്കരണം നല്‍കുന്നതിന് നവമാധ്യമങ്ങള്‍ ഉള്‍പ്പെടെയുള്ള വിവിധ മാധ്യമങ്ങളിലൂടെ എന്തെല്ലാം സന്ദേശ പ്രചരണ പരിപാടികളാണ് സംഘടിപ്പിച്ച് വരുന്നതെന്ന് വ്യക്തമാക്കാമോ?

കൊവിഡിന്റെ അനന്തര ഫലങ്ങളെക്കുറിച്ച് പഠിക്കുവാനും നിരീക്ഷിക്കുവാനും ആരോഗ്യവകുപ്പ് എന്തെങ്കിലും നടപടികള്‍ സ്വീകരിച്ചിട്ടുണ്ടോ; വിശദാംശം നല്‍കുമോ;

കൊവിഡാനന്തര ചികിത്സാ രീതികള്‍ പ്രതിപാദിക്കുന്ന മാര്‍ഗ്ഗരേഖകള്‍ വൈദ്യശാസ്ത്രത്തിന്റെ വിവിധ വിഭാഗങ്ങള്‍ക്ക് അനുസൃതമായി തയ്യാറാക്കുവാൻ ഒരു റിസര്‍ച്ച് സെല്‍ രൂപീകരിക്കുന്ന കാര്യം പരിഗണിക്കുമോ;

ശ്വാസകോശ പ്രശ്നങ്ങള്‍, നാഡീരോഗങ്ങള്‍, ഫംഗസ് രോഗങ്ങള്‍ എന്നിവയുടെ വ്യാപനം നിയന്ത്രിക്കുന്നതിന് ഊന്നല്‍ കൊടുത്തുള്ള പ്രത്യേക പഠനം നടത്തുവാൻ നിര്‍ദ്ദേശം നല്‍കുമോ?

സംസ്ഥാനത്ത് എല്ലാ വിഭാഗം ജനങ്ങളും റേഷന്‍ കടകളെ കൂടുതലായി ആശ്രയിക്കുന്ന നിലവിലെ സാഹചര്യത്തില്‍ റേഷന്‍ കടകള്‍ വഴി കൂടുതല്‍ ഭക്ഷ്യധാന്യങ്ങള്‍ വിതരണം ചെയ്യുന്നതിന് ആലോചനയുണ്ടോ; വിശദമാക്കുമോ;

റേഷന്‍ കടകളിലെ ഇ-പോസ് മെഷീന്‍ വഴി മെെക്രോ എ. ടി. എം. സംവിധാനം ആരംഭിക്കുന്നതിന് വിവിധ ബാങ്കുകളുമായി ചര്‍ച്ച നടത്തിയിട്ടുണ്ടോയെന്ന് വെളിപ്പെടുത്തുമോ;

റേഷന്‍ വ്യാപാരികള്‍ക്ക് നിലവില്‍ ലഭിക്കുന്ന കമ്മീഷന്‍ എത്രയാണെന്നും കൂടുതല്‍ വില്പന നടത്തുന്ന റേഷന്‍ വ്യാപാരികള്‍ക്ക് അധിക കമ്മീഷന്‍ ലഭിക്കുന്നതിനുളള അവസരമുണ്ടോയെന്നും അറിയിക്കുമോ?