മുസ്ലീം സമുദായത്തിന്റെ പിന്നാക്കാവസ്ഥ പരിഹരിക്കുന്നതിനായി സച്ചാര്‍ കമ്മീഷന്‍ റിപ്പോര്‍ട്ടിന്റെ അടിസ്ഥാനത്തില്‍ സര്‍ക്കാര്‍ ഇറക്കിയ ഉത്തരവ് ഹൈക്കോടതി റദ്ദാക്കിയതിനെ തുടര്‍ന്ന് പ്രസ്തുത വിഭാഗത്തിന് ആനുകൂല്യങ്ങള്‍ ലഭിക്കാത്ത അവസ്ഥയുണ്ടോ; എങ്കില്‍ ഇത് പരിഹരിക്കുന്നതിന് എന്തെല്ലാം നടപടികളാണ് സ്വീകരിച്ചതെന്ന് അറിയിക്കുമോ;

സച്ചാര്‍ കമ്മിറ്റി റിപ്പോര്‍ട്ട് നടപ്പാക്കുന്നതിനായി പ്രത്യേക ഇംപ്ലിമെന്റേഷന്‍ സെല്‍ രൂപീകരിക്കണമെന്ന നിര്‍ദ്ദേശം പരിശോധിച്ചിട്ടുണ്ടോ;

ന്യൂനപക്ഷ സമുദായത്തിന് നല്‍കി വരുന്ന ആനുകൂല്യങ്ങള്‍ ജനസംഖ്യാനുപാതികമായി അര്‍ഹതയുള്ളവര്‍ക്ക് പരാതികള്‍ക്ക് ഇട നല്‍കാത്തവിധം നടപ്പിലാക്കുന്നതിന് സ്വീകരിച്ചുവരുന്ന നടപടികള്‍ വിശദമാക്കുമോ?

സംസ്ഥാനത്ത് സ്ത്രീകൾക്കും കുട്ടികൾക്കും നേരെയുള്ള അതിക്രമങ്ങള്‍ സംബന്ധിച്ച കേസുകൾ രജിസ്റ്റർ ചെയ്യുന്നതിലും അന്വേഷണം നടത്തുന്നതിലും പോലീസിന് വീഴ്‌ച സംഭവിക്കാതിരിക്കാൻ എന്തൊക്കെ നടപടികളാണ് സ്വീകരിച്ചിട്ടുള്ളത് എന്ന് വിശദമാക്കാമോ;

വാളയാറിലും പാലത്തായിയിലും കുണ്ടറയിലും അടക്കമുള്ള കേസുകളിൽ ഉദ്യോഗസ്ഥർ വീഴ്‌ച വരുത്തിയിട്ടുണ്ടോ; എങ്കില്‍ ഇവർക്കെതിരെ നടപടി സ്വീകരിക്കാൻ തീരുമാനിച്ചിട്ടുണ്ടോ; വിശദാംശങ്ങൾ നൽകാമോ;

ടി. പി. ചന്ദ്രശേഖരൻ കേസിലെ പ്രതികൾക്ക് ജയിലുകളിൽ ഫോൺ അടക്കമുള്ള സൗകര്യങ്ങൾ ഒരുക്കിക്കൊടുക്കുന്നുവെന്ന ആരോപണത്തില്‍ ഉള്‍പ്പെട്ട ഉദ്യോഗസ്ഥരെ കണ്ടെത്തി അവർക്കെതിരെ നടപടികൾ സ്വീകരിച്ചിട്ടുണ്ടോ; വിശദാംശങ്ങൾ നൽകാമോ?

കൊവിഡ് നിയന്ത്രണങ്ങൾ കാരണം വരുമാനം നഷ്ടപ്പെട്ടവർക്ക് ദുരന്തനിവാരണ നിയമപ്രകാരം നഷ്ടപരിഹാരം അനുവദിക്കുന്ന കാര്യം പരിഗണനയിൽ ഉണ്ടോ; വിശദാംശം വ്യക്തമാക്കുമോ;

കൊവിഡ് മൂലം തൊഴിൽ സ്ഥാപനങ്ങൾ നിരന്തരം അടച്ചിടുന്ന സാഹചര്യത്തിൽ തൊഴിൽ നഷ്ടപ്പെട്ട വ്യാപാരി വ്യവസായി സമൂഹത്തിന്റെ പ്രതിസന്ധി ശ്രദ്ധയിൽപ്പെട്ടിട്ടുണ്ടോ;

വരുമാനം നിലച്ചും വായ്പ അടവുകൾ മുടങ്ങിയും പ്രതിസന്ധിയിലായ ചെറുകിട വ്യാപാരികളെയും ബ്യൂട്ടീഷൻ ഉൾപ്പെടെയുള്ള വിവിധ തൊഴിൽ മേഖലകളിൽ പ്രവർത്തിക്കുന്നവരെയും സംരക്ഷിക്കുന്നതിനായി എന്തെങ്കിലും പദ്ധതികൾ ആവിഷ്കരിച്ചിട്ടുണ്ടോ; വ്യക്തമാക്കുമോ?

കോവിഡ് മഹാമാരിയുടെ പശ്ചാത്തലത്തില്‍ ഹെല്‍ത്ത് ഇന്‍സ്പെക്ടര്‍, പബ്ലിക് ഹെല്‍ത്ത് നേഴ്സ് എന്നീ തസ്തികകള്‍ നിലവില്‍ ഇല്ലാത്ത പ്രാഥമികാരോഗ്യ കേന്ദ്രങ്ങളില്‍ ഇതുമൂലം പൊതുജനങ്ങള്‍ക്ക് ഉണ്ടാകുന്ന ബുദ്ധിമുട്ടുകള്‍ പരിഹരിക്കാന്‍ ഈ തസ്തികകള്‍ അടിയന്തരമായി അനുവദിക്കുന്നതിന് നടപടികള്‍ സ്വീകരിക്കുമോ; വ്യക്തമാക്കാമോ?

വിവിധ കേസ്സുകളിൽ പോലീസ് പിടികൂടുന്ന ബസ്സുകള്‍ ഉള്‍പ്പെടെയുള്ള വാഹനങ്ങള്‍ റോഡുകളുടെ വശങ്ങളില്‍ പാര്‍ക്ക് ചെയ്യുന്നത് പൊതുജനങ്ങള്‍ക്ക് ഏറെ ബുദ്ധിമുട്ടുണ്ടാക്കുന്നതായി പരാതികള്‍ ഉയര്‍ന്നു വന്നിട്ടുണ്ടോ; വ്യക്തമാക്കുമോ;

എങ്കില്‍ ഇവ അടിയന്തരമായി നീക്കം ചെയ്യുന്നതിന് കര്‍ശന നിര്‍ദ്ദേശം നല്‍കുമോ;

വാഹനങ്ങള്‍ വിട്ടു നല്‍കുന്നതിന് നിയമപ്രശ്നം ഉള്ള പക്ഷം വേറെ സ്ഥലം കണ്ടെത്തി അവിടേയ്ക്ക് മാറ്റുന്നതിന് നിര്‍ദ്ദേശം നല്‍കുമോയെന്ന് അറിയിക്കുമോ?

സംസ്ഥാനത്തെ കോവിഡ് പ്രതിരോധ പ്രവര്‍ത്തനങ്ങള്‍ വിലയിരുത്തിയ കേന്ദ്ര ആരോഗ്യ വകുപ്പ് അധികൃതര്‍ തൃപ്തി പ്രകടിപ്പിച്ചിരുന്നോ; സംസ്ഥാനത്ത് കോവിഡ് പ്രതിരോധത്തിനും ചികിത്സക്കും ഏര്‍പ്പെടുത്തിയിട്ടുള്ള ക്രമീകരണങ്ങള്‍ വിശദമാക്കാമോ;

കേന്ദ്ര ആരോഗ്യ വകുപ്പുമന്ത്രിയുടേതായി മാധ്യമങ്ങള്‍ റിപ്പോര്‍ട്ട് ചെയ്ത പ്രകാരമുള്ള പ്രസ്താവനയില്‍ വാക്സിന്‍ നല്‍കുന്നതില്‍ കേരളത്തിലെ സ്ഥിതി മോശമാണെന്ന രീതിയില്‍ അഭിപ്രായപ്പെട്ടത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇക്കാര്യത്തിലെ നിജസ്ഥിതി രാജ്യത്തെ പൊതുസാഹചര്യവുമായി താരതമ്യം ചെയ്തിട്ടുണ്ടോ; വ്യക്തമാക്കുമോ;

സംസ്ഥാനത്ത് എല്ലാവര്‍ക്കും നല്‍കാന്‍ ആവശ്യമായ അളവില്‍ വാക്സിന്‍ ലഭ്യമാക്കാന്‍ കേന്ദ്ര സര്‍ക്കാരിനോട് ആവശ്യപ്പെട്ടിരുന്നോ; കേന്ദ്ര സര്‍ക്കാരില്‍ നിന്നും വേണ്ടത്ര ഡോസ് വാക്സിന്‍ ലഭിച്ചിട്ടുണ്ടോ;

കോവിഡ് പ്രതിരോധത്തിലും വാക്സിന്‍ വിതരണത്തിലും കേന്ദ്രത്തിനുണ്ടായ വീഴ്ച മറച്ചുവയ്ക്കുക എന്ന ലക്ഷ്യത്തോടെ സംസ്ഥാനത്തെക്കുറിച്ച് അടിസ്ഥാനരഹിതമായ പ്രസ്താവനകള്‍ നടത്തുന്നത് അവസാനിപ്പിക്കണമെന്ന് കേന്ദ്ര സര്‍ക്കാരിനോട് ആവശ്യപ്പെടുമോ?

തിരുവനന്തപുരം തോന്നയ്ക്കലില്‍ പ്രവര്‍ത്തനം ആരംഭിച്ചിട്ടുള്ള വൈറോളജി ഇന്‍സ്റ്റിറ്റ്യൂട്ടിന്റെ പ്രവര്‍ത്തനം ഏതുവരെയായെന്ന് അറിയിക്കാമോ;

ഈ സ്ഥാപനത്തില്‍ എത്ര പേരെ നിയമിച്ചുവെന്നും ഏതെല്ലാം തസ്തികകളിലാണെന്നും വ്യക്തമാക്കുമോ;

കോവിഡ് വ്യാപനം കൂടിക്കൊണ്ടിരിക്കുന്ന സാഹചര്യം പരിഗണിച്ച് ഈ സ്ഥാപനത്തിന്റെ പ്രവര്‍ത്തനം ത്വരിതഗതിയിലാക്കാന്‍ നടപടി സ്വീകരിക്കുമോ?

ക്യാന്‍സര്‍ രോഗികള്‍ ഏറെയുള്ള മലപ്പുറം ജില്ലയില്‍ ക്യാന്‍സര്‍ ചികിത്സയ്ക്കായി എന്തെല്ലാം സംവിധാനങ്ങളാണ് ഏര്‍പ്പെടുത്തിയിരിക്കുന്നതെന്ന് വ്യക്തമാക്കുമോ;

ഇവിടെ നിലവിലുള്ള സംവിധാനങ്ങള്‍ പര്യാപ്തമല്ല എന്നത് ശ്രദ്ധയില്‍പ്പെട്ടിട്ടുണ്ടോ;

ജില്ലയുടെ പിന്നോക്കാവസ്ഥ കണക്കിലെടുത്ത് ഒരു ക്യാന്‍സര്‍ ആശുപത്രി അടിയന്തരമായി തുടങ്ങുന്നതിന് നടപടി സ്വീകരിക്കുമോ?

സംസ്ഥാനത്ത് പൊതുവിതരണ ശൃംഖലയില്‍ കൂടുതല്‍ സുതാര്യതയും വിശ്വാസ്യതയും ഉറപ്പ് വരുത്തുന്നതിന് എന്തെല്ലാം നടപടികളാണ് ഈ സര്‍ക്കാര്‍ സ്വീകരിച്ചിട്ടുളളതെന്ന് വ്യക്തമാക്കാമോ;

റേഷന്‍ സാധനങ്ങളുടെ തിരിമറി, പൂഴ്ത്തിവയ്പ്, കരിഞ്ചന്ത എന്നിവ തടയുന്നതിന് എന്തെല്ലാം പരിശോധനാ സംവിധാനങ്ങളാണ് നിലവിലുളളതെന്ന് അറിയിക്കാമോ;

ക്രമക്കേടുകള്‍ കണ്ടുപിടിക്കുന്നതിനും ഒഴിവാക്കുന്നതിനും പൊതുവിതരണ രംഗത്ത് സോഷ്യല്‍ ഓഡിറ്റിംഗ് നടപ്പിലാക്കാന്‍ നടപടി സ്വീകരിച്ചിട്ടുണ്ടോ; വിശദാംശം നല്‍കുമോ?

സുസ്ഥിര വികസന സൂചികയില്‍ കേരളം തുടര്‍ച്ചയായി മൂന്നാം വര്‍ഷവും ഒന്നാം സ്ഥാനം കരസ്ഥമാക്കുന്നതിനായി നടത്തിയ പ്രവര്‍ത്തനങ്ങള്‍ എന്തെല്ലാമായിരുന്നു എന്ന് അറിയിക്കുമോ;

നെെപുണി പോഷണത്തിലൂടെ അഭ്യസ്തവിദ്യരായ യുവജനങ്ങള്‍ക്ക് തൊഴിലവസരങ്ങള്‍ സൃഷ്ടിക്കുന്നതിനായി എന്തെല്ലാം പദ്ധതികളാണ് ആസൂത്രണം ചെയ്തുവരുന്നതെന്ന് അറിയിക്കുമോ;

സുസ്ഥിര വികസന സൂചികയില്‍ 2020-21 ല്‍ ഒന്നാം സ്ഥാനത്തെത്തിയ കേരളത്തിന് നിതി ആയോഗ് നല്‍കിയ വികസന രേഖയുടെ വിശദാംശങ്ങള്‍ വ്യക്തമാക്കുമോ?

കോവിഡ് പശ്ചാത്തലത്തില്‍ സംസ്ഥാനത്ത് സ്വകാര്യ മേഖലയില്‍ ഉള്‍പ്പെടെ കൂടുതല്‍ മെഡിക്കല്‍ കോളേജുകള്‍ ആരംഭിക്കുന്നതിന് നടപടികള്‍ ഉണ്ടാകുമോ; എങ്കില്‍ വിശദാംശം ലഭ്യമാക്കുമോ;

ആരോഗ്യ മേഖലയെ ശക്തിപ്പെടുത്താന്‍ സർക്കാർ എന്തെല്ലാം പുതിയ പദ്ധതികള്‍ ആരംഭിക്കുമെന്ന് വ്യക്തമാക്കുമോ?

സില്‍വര്‍ലൈന്‍ പദ്ധതിക്ക് കേന്ദ്ര സര്‍ക്കാരില്‍ നിന്ന് തത്വത്തില്‍ അംഗീകാരം ലഭിച്ചിട്ടുണ്ടോ;

പദ്ധതിക്കായുള്ള വിദേശ വായ്പ തിരിച്ചടവ് സംബന്ധിച്ച് കേന്ദ്ര സര്‍ക്കാര്‍ എന്തെങ്കിലും നിബന്ധനകള്‍ വച്ചിരുന്നോ; സംസ്ഥാനം ഇക്കാര്യത്തില്‍ സ്വീകരിക്കാന്‍ ഉദ്ദേശിക്കുന്ന നിലപാട് വ്യക്തമാക്കാമോ;

ജനസാന്ദ്രത കുറഞ്ഞ പ്രദേശങ്ങളിലൂടെയാണോ റെയില്‍പാതയുടെ വിന്യാസമെന്ന് അറിയിക്കുമോ; ഇതിനായി എത്ര ഹെക്ടര്‍ ഭൂമി ഏറ്റെടുക്കേണ്ടി വരുമെന്നാണ് കണക്കാക്കിയിരിക്കുന്നതെന്ന് വ്യക്തമാക്കാമോ?

വെള്ളിയാഴ്ചയിലെ ജുമാ നമസ്കാരത്തിന് മുസ്‌ലിം പള്ളികളും ഞായറാഴ്ച പ്രാര്‍ത്ഥനകള്‍ക്കായി ക്രൈസ്തവ ദേവാലയങ്ങളും ക്ഷേത്രങ്ങളും തുറന്ന് പ്രവര്‍ത്തിക്കുന്നതിനുള്ള അനുമതി നല്‍കാന്‍ നടപടി സ്വീകരിക്കുമോ?

മഴക്കാലത്ത് ജലജന്യ, കൊതുകുജന്യ രോഗങ്ങള്‍ വ്യാപകമാകാതിരിക്കാന്‍ എന്തെല്ലാം പ്രതിരോധ പ്രവര്‍ത്തനങ്ങളാണ് നടത്തി വരുന്നതെന്ന് വ്യക്തമാക്കാമോ;

ഇതു സംബന്ധിച്ച് പൊതുജനങ്ങള്‍ക്ക് ബോധവത്ക്കരണം നല്‍കുന്നതിനും ആരോഗ്യപ്രവര്‍ത്തകരുടെ സേവനം കൂടുതല്‍ കാര്യക്ഷമമാക്കുന്നതിനും എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

പകര്‍ച്ചവ്യാധി പ്രതിരോധ പ്രവര്‍ത്തനങ്ങളില്‍ പൊതുജന പങ്കാളിത്തം ഉറപ്പു വരുത്തുന്നതിന് എന്തെല്ലാം നിർദ്ദേശങ്ങളാണ് നല്‍കിയിട്ടുള്ളതെന്ന് അറിയിക്കാമോ?

സംസ്ഥാനത്ത് പൊതു വിപണിയിലെ വിലക്കയറ്റം പിടിച്ചുനിർത്തുന്നതിൽ നിർണ്ണായക പങ്ക് വഹിക്കുന്ന സപ്ലൈ​കോയുടെ പ്രവർത്തനം വിലയിരുത്തിയിട്ടുണ്ടോ; വിശദമാക്കാമോ;

സപ്ലൈ​കോ സൂപ്പർ മാർക്കറ്റുകളും ഔട്ട് ലെറ്റുകളും നവീകരിക്കുന്ന കാര്യം പരിഗണനയിലുണ്ടോ; വിശദീകരിക്കാമോ;

കാര്യക്ഷമമായ വിപണി ഇടപെടൽ നടത്തുന്നതിനായി സപ്ലൈ​കോയുടെ സൂപ്പർ മാർക്കറ്റുകളും ഔട്ട് ലെറ്റുകളും ഉപഭോക്തൃ സൗഹൃദമാക്കുവാൻ നടപടി സ്വീകരിക്കുമോ;

സപ്ലൈ​കോ സൂപ്പർ മാർക്കറ്റുകളിലും ഔട്ട് ലെറ്റുകളിലും നിലവാരമുള്ള സ്ത്രീ സൗഹൃദ ടോയ് ലെറ്റ് സൗകര്യങ്ങൾ ഏർപ്പെടുത്താൻ നടപടി സ്വീകരിക്കുമോ?

സംസ്ഥാനത്ത് സ്റ്റാർട്ടപ്പ് മിഷനുകൾക്ക് കീഴിൽ പ്രവർത്തിക്കുന്ന സ്റ്റാർട്ടപ്പുകളുടെ പ്രവർത്തന മികവ് അവലോകനം ചെയ്യാറുണ്ടോയെന്ന് അറിയിക്കാമോ;

സർക്കാരിന്റെ അടിസ്ഥാന സൗകര്യം ഉപയോഗിക്കുകയും മറ്റ് ആനുകൂല്യങ്ങൾ സ്വീകരിക്കുകയും ചെയ്തിട്ടും യാതൊരു ഉൽപാദനക്ഷമതയും കാണിക്കാതിരിക്കുന്ന സ്റ്റാർട്ടപ്പ് കമ്പനികൾക്കെതിരെ സ്റ്റാർട്ടപ്പ് മിഷൻ നടപടി സ്വീകരിച്ചിട്ടുണ്ടോ;

ആർട്ടിഫിഷ്യൽ ഇന്റലിജൻസ്, ക്വാണ്ടം കമ്പ്യൂട്ടിംങ്, ക്രിപ്റ്റോ കറൻസി തുടങ്ങിയ അതിനൂതന സാങ്കേതിക മേഖലകളിൽ ഗവേഷണങ്ങൾ നടത്തി വരുന്ന സ്റ്റാർട്ടപ്പുകൾ സ്റ്റാർട്ടപ്പ് മിഷന് കീഴിലുണ്ടോ; ഉണ്ടെങ്കിൽ എന്തൊക്കെ ആനുകൂല്യങ്ങളാണ് ഇത്തരം കമ്പനികൾക്ക് നൽകാനുദ്ദേശിക്കുന്നതെന്ന് വ്യക്തമാക്കാമോ;

ഇല്ലെങ്കിൽ കേരളത്തിലെ മിടുക്കരായ വിദ്യാർത്ഥികളെ തെരഞ്ഞെടുത്ത് പ്രസ്തുത മേഖലകളിൽ വിദഗ്ദ്ധ പരിശീലനം നൽകി കേരളത്തെ അതിനൂതന സാങ്കേതിക വിദഗ്ദ്ധരുടെ ടെക്നോളജി ഹബ്ബാക്കി മാറ്റുവാൻ സ്റ്റാർട്ടപ്പ് മിഷന് പദ്ധതിയുണ്ടോ?

സംസ്ഥാനത്തെ ആരോഗ്യ സ്ഥാപനങ്ങളെ ദേശീയ ഗുണനിലവാര അംഗീകാരം നേടിയെടുക്കത്തക്ക തരത്തില്‍ മികവുള്ളതാക്കി മാറ്റാനായിട്ടുണ്ടോ; ഇതുവരെ എത്ര സ്ഥാപനങ്ങള്‍ക്ക് നാഷണൽ ക്വാളിറ്റി അഷ്വറൻസ് സ്റ്റാന്റേർഡ് അംഗീകാരം ലഭിച്ചു; എന്‍.ക്യു.എ.എസ്. അംഗീകാരം ലഭിക്കുന്നതിനുള്ള മാനദണ്ഡങ്ങള്‍ എന്തൊക്കെയാണ്; വിശദമാക്കാമോ;

രാജ്യത്തെ ഏറ്റവും മികച്ച പ്രാഥമികാരോഗ്യ കേന്ദ്രങ്ങള്‍ക്കും ജില്ലാ ആശുപത്രിക്കും താലൂക്ക് ആശുപത്രിക്കും ഉള്ള അംഗീകാരം സംസ്ഥാനത്തിന് ലഭിച്ചിട്ടുണ്ടോ;

സംസ്ഥാനത്തെ മെഡിക്കല്‍ കോളേജുകളെ എയിംസ് നിലവാരത്തിലേക്കുയര്‍ത്തുന്നതിന് നടത്തുന്ന പ്രവര്‍ത്തനങ്ങള്‍ എന്തെല്ലാമാണെന്ന് വ്യക്തമാക്കാമോ?

സംസ്ഥാനത്ത് അഞ്ച് വര്‍ഷം കൊണ്ട് ഇരുപത് ലക്ഷം പേര്‍ക്ക് ഡിജിറ്റല്‍ പ്ലാറ്റ്ഫോം വഴി തൊഴില്‍ നല്‍കുകയെന്ന പ്രഖ്യാപിത ലക്ഷ്യം കൈവരിക്കുന്നതിന് കെ-ഡിസ്ക് പദ്ധതി രേഖ തയ്യാറാക്കിയിട്ടുണ്ടോ;

ഡിജിറ്റല്‍ സമ്പദ്‍ വ്യവസ്ഥയില്‍ നിന്നും പാവപ്പെട്ടവര്‍ പുറന്തള്ളപ്പെടാതിരിക്കാന്‍ ഏര്‍പ്പെടുത്തുന്ന അടിസ്ഥാനസൗകര്യ വികസന പദ്ധതിയെ കുറിച്ച് അറിയിക്കാമോ;

സമ്പൂര്‍ണ്ണ ഡിജിറ്റല്‍ സാക്ഷരത കൈവരിക്കുന്നതിനായി പദ്ധതി രൂപീകരിച്ചിട്ടുണ്ടോ; വിശദമാക്കാമോ;

കഴിഞ്ഞ സര്‍ക്കാര്‍ പ്രഖ്യാപിച്ച ഐ. ടി. നയത്തിന്റെ അടിസ്ഥാനത്തില്‍ ഈ സര്‍ക്കാര്‍ ഐ. ടി. മേഖലയില്‍ എന്തെല്ലാം ആശയങ്ങള്‍ക്കാണ് ഊന്നല്‍ നല്‍കാന്‍ ഉദ്ദേശിക്കുന്നത്; വ്യക്തമാക്കുമോ?

സംസ്ഥാനത്തിന്റെ അടിസ്ഥാന സൗകര്യ വികസനത്തിന് കേന്ദ്ര റോഡ് ഗതാഗത ഹെെവേ മന്ത്രിയുമായി നടന്ന ചര്‍ച്ചയില്‍ ഏതൊക്കെ പദ്ധതികള്‍ക്കാണ് അംഗീകാരം ആവശ്യപ്പെട്ടത്;

സംസ്ഥാനത്തെ ഏതെല്ലാം റോഡുകളെയാണ് ഭാരത് മാല പദ്ധതിയില്‍ ഉള്‍പ്പെടുത്തണമെന്ന് ആവശ്യപ്പെട്ടിട്ടുള്ളത്;

ഇക്കാര്യത്തില്‍ കേന്ദ്ര സര്‍ക്കാര്‍ തീരുമാനം അറിയിച്ചിട്ടുണ്ടോ;

വിഴിഞ്ഞം തുറമുഖം പ്രവര്‍ത്തന സജ്ജമാകുമ്പോഴുണ്ടാകുന്ന വികസന സാധ്യത കണക്കിലെടുത്ത് പ്രഖ്യാപിച്ചിട്ടുള്ള വിഴിഞ്ഞം-പാരിപ്പള്ളി റിംഗ് റോഡ് പദ്ധതി ദേശീയപാത അതോറിറ്റി ഏറ്റെടുക്കണമെന്ന ആവശ്യത്തോട് കേന്ദ്ര സര്‍ക്കാര്‍ അനുകൂലമായി പ്രതികരിച്ചിട്ടുണ്ടോ എന്ന് അറിയിക്കാമോ?

സ്കൂളുകളില്‍ ഉച്ചക്കഞ്ഞിക്ക് നല്‍കുന്നതിനുള്ള അരി വലിയതുറ ഗോഡൗണില്‍ കെട്ടിക്കിടന്ന് നശിച്ചതായി കണ്ടെത്തിയിട്ടുണ്ടോ;

എങ്കില്‍ എത്ര രൂപയുടെ എത്ര കിലോ അരിയാണ് നശിച്ചതെന്നറിയിക്കാമോ;

ഇതിന് ഉത്തരവാദികളായവരില്‍ നിന്നും നഷ്ട പരിഹാരം ഈടാക്കുന്നതിന് നടപടി സ്വീകരിച്ചിട്ടുണ്ടോ; വിശദാംശം നല്‍കുമോ?

കോവിഡ് വ്യാപനത്തിന്റെ പശ്ചാത്തലത്തിൽ പി.പി.ഇ. കിറ്റ്, മാസ്ക്, സാനിറ്റൈസർ തുടങ്ങിയവയ്ക്ക് അമിത വില ഈടാക്കുന്നതായി ശ്രദ്ധയിൽപ്പെട്ടിട്ടുണ്ടോ;

ഇത്തരത്തിൽ അമിത വില ഈടാക്കുന്നവർക്കെതിരെ ലീഗൽ മെട്രോളജി വകുപ്പ് നടപടികൾ സ്വീകരിച്ചിട്ടുണ്ടോ; എങ്കില്‍ വ്യക്തമാക്കാമോ;

ഉപഭോക്തൃ ചൂഷണം തടയുന്നതിനായി വകുപ്പിൽ നിന്നും ലഭിക്കുന്ന സേവനങ്ങളെക്കുറിച്ച് ജനങ്ങളെ ബോധവൽക്കരിക്കുവാൻ നടപടികൾ സ്വീകരിച്ചിട്ടുണ്ടോ; എങ്കില്‍ വിശദമാക്കാമോ;

വകുപ്പിന്റെ സേവനങ്ങൾ ജനങ്ങൾക്ക് ഓൺലൈനായി ലഭ്യമാക്കുവാനുള്ള നടപടികൾ പരിഗണനയിലുണ്ടോ; എങ്കില്‍ വിശദീകരിക്കാമോ;

വകുപ്പിന്റെ ജില്ല ഓഫീസുകൾ വാടക കെട്ടിടത്തിൽ പ്രവർത്തിക്കുന്നുണ്ടോ; എങ്കിൽ പ്രസ്തുത ഓഫീസുകൾക്ക് സ്വന്തമായി കെട്ടിടം നിർമ്മിക്കുന്നതിനുള്ള നടപടി സ്വീകരിക്കുമോ?

ശ്രീമതി കെ. കെ. രമ എം.എൽ.എ.യുടെ മകനെയും ആര്‍.എം.പി.ഐ. സംസ്ഥാന സെക്രട്ടറിയെയും അപായപ്പെടുത്തുമെന്ന ഭീഷണിക്കത്ത് എം.എല്‍.എ.യുടെ ഓഫീസില്‍ ലഭിച്ചതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതുസംബന്ധിച്ച കേസിന്റെ അന്വേഷണ പുരോഗതി വ്യക്തമാക്കാമോ ;

രാമനാട്ടുകര സ്വർണക്കടത്ത് കേസുമായി ബന്ധപ്പെട്ട് തട്ടിക്കൊണ്ടുപോയ അഷ്റഫിനെ ടി. പി. ചന്ദ്രശേഖരൻ വധക്കേസിലെ പ്രതികളിൽ ഒരാൾ ഫോണില്‍ വിളിച്ചു ഭീഷണിപ്പെടുത്തി എന്ന പരാതിയിൽ അന്വേഷണം നടത്തിയിട്ടുണ്ടോ; വിശദമാക്കാമോ?

സംസ്ഥാനത്ത് കോവിഡ് സൃഷ്ടിച്ച പ്രത്യേക സാഹചര്യത്തില്‍ പൊതുവിതരണ ശൃംഖല കാര്യക്ഷമമാക്കുന്നതിനും എല്ലാവര്‍ക്കും ഭക്ഷ്യധാന്യം ലഭ്യമാക്കുന്നുവെന്ന് ഉറപ്പ് വരുത്തുന്നതിനും സ്വീകരിച്ച നടപടികള്‍ അറിയിക്കാമോ;

റേഷന്‍ കടകളുടെ ഭൗതിക സാഹചര്യം മെച്ചപ്പെടുത്തുന്നതിന് പദ്ധതിയുണ്ടോ;

പൊതുവിതരണ ശൃംഖല അഴിമതി മുക്തമാക്കുന്നതിനും റേഷന്‍ വ്യാപാരികള്‍ക്ക് സൗജന്യ ഭക്ഷ്യധാന്യ വിതരണത്തിനുള്‍പ്പെടെ ലഭിക്കേണ്ട കമ്മീഷന്‍ സമയബന്ധിതമായി നല്‍കുന്നതിനും നടപടിയെടുത്തിട്ടുണ്ടോ; വിശദമാക്കുമോ?

സംസ്ഥാനത്ത് മാലിന്യ നിർമ്മാര്‍ജ്ജന പ്രശ്നങ്ങള്‍ പരിഹരിക്കുന്നതിന് ഈ സര്‍ക്കാര്‍ എന്തെല്ലാം നടപടികളാണ് സ്വീകരിക്കാനുദ്ദേശിക്കുന്നതെന്ന് വ്യക്തമാക്കാമോ;

മാലിന്യങ്ങള്‍ ഉറവിടത്തില്‍ തന്നെ സംസ്കരിക്കുന്നത് സംബന്ധിച്ച് പൊതുജനങ്ങളെ ബോധവത്കരിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് അറിയിക്കാമോ;

ഖരമാലിന്യ പരിപാലനത്തിനായി കേന്ദ്രാവിഷ്കൃത പദ്ധതികള്‍ സംസ്ഥാനത്ത് നടപ്പിലാക്കി വരുന്നുണ്ടോ; എങ്കില്‍ വിശദാംശം നല്‍കുമോ?

സംസ്ഥാനത്ത് സ്ത്രീധന-ഗാര്‍ഹിക പീഡനങ്ങള്‍ നിയന്ത്രിക്കുന്നതിന് വിവരം തേടി പിങ്ക് പോലീസ് വീട്ടില്‍ എത്തുന്ന പദ്ധതി ആരംഭിച്ചിട്ടുണ്ടോ;

സൈബര്‍ ഇടങ്ങളിലും പൊതു, സ്വകാര്യ സ്ഥലങ്ങളിലും സ്ത്രീസുരക്ഷ ഒരുക്കുന്നതിന് എന്തെല്ലാം നടപടികള്‍ സ്വീകരിക്കാന്‍ ഉദ്ദേശിക്കുന്നുവെന്ന് അറിയിക്കാമോ;

സ്ത്രീകള്‍ക്കും കുട്ടികള്‍ക്കുമെതിരെയുള്ള അതിക്രമങ്ങള്‍ തടയുന്നതിനും അവരെ സുരക്ഷിതരാക്കുന്നതിനും നിര്‍ഭയ കേരളം സുരക്ഷിത കേരളം പദ്ധതി നടപ്പിലാക്കിവരുന്നുണ്ടോ; വിശദമാക്കാമോ?

സംസ്ഥാനത്ത് പബ്ലിക് സര്‍വ്വീസ് കമ്മീഷന്റെ പ്രവര്‍ത്തനങ്ങള്‍ കൂടുതല്‍ സുതാര്യവും വേഗത്തിലുമാക്കുന്നതിന് കഴിഞ്ഞ സര്‍ക്കാര്‍ നടപ്പാക്കിയ പ്രവര്‍ത്തനങ്ങള്‍ എന്തെല്ലാമായിരുന്നുവെന്ന് വിശദമാക്കാമോ;

സംസ്ഥാന ചരിത്രത്തിലെ ഏറ്റവും കൂടുതല്‍ നിയമനങ്ങള്‍ നടത്തുന്നതിന് കഴിഞ്ഞ സര്‍ക്കാരിന്റെ കാലയളവില്‍ പി.എസ്.സി.-യ്ക്ക് കഴിഞ്ഞിട്ടുണ്ടോ;

ഈ സര്‍ക്കാര്‍ അധികാരത്തില്‍ വന്നതിനുശേഷം പി.എസ്.സി. വഴിയുളള നിയമന നടപടികള്‍ കൂടുതല്‍ കാര്യക്ഷമതയോടെയും സമയബന്ധിതമായും നടത്തുന്നതിന് ആവശ്യമായ നിര്‍ദ്ദേശങ്ങള്‍ നല്‍കിയിട്ടുണ്ടോ;

ഉദ്യോഗാര്‍ത്ഥികള്‍ക്ക് കൂടുതല്‍ സഹായകരമായ തരത്തില്‍ പി. എസ്. സി. യുടെ പ്രവര്‍ത്തനങ്ങള്‍ കാലാനുസൃതമായി നവീകരിക്കുന്നതിന് നടപടി സ്വീകരിക്കുമോ?

സംസ്ഥാനത്ത് ജൈവ-അജൈവ മാലിന്യ സംസ്കരണത്തിന് ജനകീയപങ്കാളിത്തം ഉറപ്പുവരുത്തിക്കൊണ്ട് തദ്ദേശസ്ഥാപനങ്ങള്‍ നടത്തുന്ന പ്രവര്‍ത്തനങ്ങള്‍ അറിയിക്കാമോ; അവ പൂര്‍ണ്ണമായും ഫലപ്രാപ്തി കൈവരിച്ചിട്ടുണ്ടോ; എത്ര തദ്ദേശസ്ഥാപനങ്ങള്‍ സമ്പൂര്‍ണ്ണ ശുചിത്വ പദവി കൈവരിച്ചിട്ടുണ്ടെന്ന് അറിയിക്കുമോ;

അജൈവ മാലിന്യ സംസ്കരണത്തിന് കേന്ദ്രീകൃത സൗകര്യങ്ങളുടെ ആവശ്യകത കണക്കിലെടുത്ത് ക്ലീന്‍ കേരള കമ്പനി നടത്തുന്ന പ്രവ‍ര്‍ത്തനങ്ങള്‍ എന്തൊക്കെയെന്ന് അറിയിക്കാമോ;

സീറോ വേസ്റ്റ് ഓണ്‍ ഗ്രൗണ്ട് പദ്ധതി പ്രാവര്‍ത്തികമായിട്ടുണ്ടോ; വിശദമാക്കാമോ?

സംസ്ഥാനത്ത് പൊതുവിപണിയില്‍ അവശ്യസാധനങ്ങളുടെ വിലവര്‍ദ്ധനവ് പരിശോധിക്കുന്നതിനും പരിഹാരമാര്‍ഗ്ഗങ്ങള്‍ നിര്‍ദ്ദേശിക്കുന്നതിനും പ്രൈസ് മോണിറ്ററിംഗ് സെല്ലുകള്‍ രൂപീകരിച്ച് പ്രവര്‍ത്തനം നടത്തി വരുന്നുണ്ടോ;

വിലക്കയറ്റത്തിന്റെ യാഥാര്‍ത്ഥ കാരണം മനസ്സിലാക്കി അത് പരിഹരിക്കുന്നതിനാവശ്യമായ വിഷയങ്ങള്‍ ചര്‍ച്ച ചെയ്ത് തീരുമാനിക്കുന്നതിനായി സംസ്ഥാനത്തെ ഓപ്പണ്‍ മാര്‍ക്കറ്റ് വ്യാപാരികളുടെയും വ്യാപാരി പ്രതിനിധികളുടെയും യോഗം വിളിച്ചുചേര്‍ത്ത് വിലക്കയറ്റം നിയന്ത്രണ വിധേയമാക്കുന്നതിനുള്ള നടപടികള്‍ സ്വീകരിച്ചു വരുന്നുണ്ടോ;

ഉത്സവ കാലങ്ങളില്‍ പൊതുജനങ്ങള്‍ക്ക് സൗജന്യനിരക്കില്‍ അവശ്യ സാധനങ്ങള്‍ ലഭ്യമാക്കുന്നതിന് പ്രത്യേക വിപണന മേളകളും ചന്തകളും സംഘടിപ്പിക്കുവാന്‍ നിര്‍ദ്ദേശം നല്‍കിയിട്ടുണ്ടോ?

സംസ്ഥാനത്ത് ഗ്രാമപഞ്ചായത്തുകളുടെ കാര്യശേഷി വര്‍ദ്ധിപ്പിക്കുന്നതിനും പ്രവര്‍ത്തനങ്ങള്‍ കൂടുതല്‍ ശാക്തീകരിക്കുന്നതിനുമായി രാഷ്ട്രീയ ഗ്രാമസ്വരാജ് അഭിയാന്‍ നടപ്പിലാക്കി വരുന്നുണ്ടോയെന്ന് അറിയിക്കുമോ;

പ്രസ്തുത പദ്ധതിയുടെ ഉദ്ദേശലക്ഷ്യങ്ങള്‍ എന്തൊക്കെയാണെന്ന് വ്യക്തമാക്കാമോ;

പദ്ധതി പ്രവര്‍ത്തനങ്ങളില്‍ പൊതുജന പങ്കാളിത്തം ഉറപ്പാക്കുന്നതിനും ഗ്രാമസഭകളെ ശക്തിപ്പെടുത്തുന്നതിനും ത്രിതല പഞ്ചായത്തുകളുടെ സ്ഥാപനശേഷി, കാര്യശേഷി എന്നിവ വികസിപ്പിക്കുന്നതിനും എന്തെല്ലാം കാര്യങ്ങളാണ് ഇതില്‍ ഉള്‍പ്പെടുത്തിയിരിക്കുന്നതെന്ന് അറിയിക്കാമോ?