2018-19, 2019-20 വർഷങ്ങളിൽ സംസ്ഥാനത്തെ ആകെ മത്സ്യ ലഭ്യത എത്ര ടൺ ആയിരുന്നുവെന്ന് അറിയിക്കുമോ;

മത്സ്യലഭ്യത കുറയുന്ന പക്ഷം, ആയത് വർദ്ധിപ്പിക്കുന്നതിനായി ഉൾനാടൻ മത്സ്യ കൃഷി ഉൾപ്പെടെ എന്തൊക്കെ നടപടികളാണ് സ്വീകരിച്ചു വരുന്നതെന്ന് വ്യക്തമാക്കാമോ?

ശക്തമായ കടലാക്രമണവും മറ്റ് പ്രതികൂല സാഹചര്യങ്ങളും നിമിത്തം മത്സ്യത്തൊഴിലാളികളുടെ ജീവിതം വളരെ പ്രതിസന്ധിയിലാണെന്ന് കരുതുന്നുണ്ടോ;

പ്രതികൂല സാഹചര്യങ്ങളെ അതിജീവിക്കുന്നതിനും മത്സ്യത്തൊഴിലാളികളുടെ ദുരിതം അകറ്റുന്നതിനും സ്വീകരിച്ചുവരുന്ന നടപടികള്‍ എന്തെല്ലാമെന്ന് വിശദമാക്കാമോ?

കൊല്ലം പരവൂർ തെക്കുംഭാഗത്ത് മിനി ഫിഷിംഗ് ഹാർബർ സ്ഥാപിക്കുന്നതിനായുള്ള സെന്‍ട്രല്‍ വാട്ടര്‍ ആന്റ് പവര്‍ റിസര്‍ച്ച് സ്റ്റേഷന്റെ പഠനം പൂർത്തിയാക്കി റിപ്പോർട്ട് സമർപ്പിച്ചിട്ടുണ്ടോയെന്ന് വിശദമാക്കാമോ;

ഹാർബർ നിർമ്മാണത്തിനായി പരിസ്ഥിതി പഠനം ആരംഭിച്ചിട്ടുണ്ടോ; ഉണ്ടെങ്കിൽ എന്ന് ആരംഭിച്ചുവെന്നും റിപ്പോർട്ട് സമർപ്പിച്ചിട്ടുണ്ടോയെന്നും വ്യക്തമാക്കാമോ ;

പരിസ്ഥിതി പഠന റിപ്പോർട്ട് കിട്ടിക്കഴിഞ്ഞാൽ ഹാർബറിന്റെ നിർമ്മാണം തുടങ്ങുന്നതിനായി എന്തെല്ലാം നടപടിക്രമങ്ങൾ പൂർത്തിയാക്കാനുണ്ടെന്ന് അറിയിക്കാമോ ?

സംസ്ഥാനത്തിന്റെ തീരദേശ മേഖല തീവ്ര കടല്‍ക്ഷോഭം കാരണം പ്രതിസന്ധിയിലാണെന്ന കാര്യം സര്‍ക്കാര്‍ ഗൗരവമായി പരിഗണിച്ചിട്ടുണ്ടോ;

സമഗ്ര തീരദേശ വികസനത്തിനായി സംസ്ഥാന സര്‍ക്കാര്‍ പദ്ധതി തയ്യാറാക്കിയിട്ടുണ്ടോ; വിശദാംശം നല്‍കുമോ;

തീരദേശ മണ്ണൊലിപ്പ് തടയുന്നതിന് എന്തെല്ലാം പദ്ധതികളാണ് ആവിഷ്ക്കരിച്ചിട്ടുളളത്; വിശദമാക്കുമോ?

തിരൂര്‍ നിയോജകമണ്ഡലത്തില്‍ ഭരണാനുമതി ലഭിച്ചതും പ്രവൃത്തി പൂര്‍ത്തിയാകാത്തതുമായ തീരദേശ റോഡുകള്‍ എതൊക്കെയാണെന്ന് അറിയിക്കുമോ; പ്രസ്തുത റോഡുകളുടെ പണികള്‍ ഇപ്പോള്‍ ഏത് ഘട്ടത്തിലാണെന്ന് വ്യക്തമാക്കാമോ;

പ്രവൃത്തി നിർവ്വഹിക്കേണ്ട റോഡുകളുടെയും ഭരണാനുമതിക്കായി സര്‍ക്കാരിന് സമര്‍പ്പിച്ച റോഡുകളുടെയും ലിസ്റ്റും എസ്റ്റിമേറ്റ് തുകയും അറിയിക്കുമോ?

സംസ്ഥാനത്ത് കോവിഡ് മഹാമാരി പടര്‍ന്ന് പിടിച്ചതിന്റെ മറവില്‍ വില്‍പ്പനയ്ക്ക് കൊണ്ടുവന്ന ഭക്ഷ്യയോഗ്യമല്ലാത്ത മത്സ്യങ്ങള്‍ പല സ്ഥലത്തു നിന്നും പിടിച്ചെടുത്തത് ശ്രദ്ധയില്‍പ്പെട്ടിട്ടുണ്ടോ;

എങ്കില്‍ സംസ്ഥാനത്തുളളതും മറ്റ് സംസ്ഥാനങ്ങളില്‍ നിന്നും കൊണ്ടുവരുന്നതുമായ വില്‍പ്പനയ്ക്കുളള മത്സ്യങ്ങള്‍ ഭക്ഷ്യയോഗ്യമാണോ എന്ന് പരിശോധിക്കുന്നതിന് എന്തെങ്കിലും പദ്ധതികള്‍ നടപ്പിലാക്കിയിട്ടുണ്ടോ; വ്യക്തമാക്കുമോ;

ഇല്ലെങ്കില്‍ ആയത് ഭക്ഷ്യയോഗ്യമാണോ എന്ന് കൃത്യമായി പരിശോധിക്കുന്നതിന് അടിയന്തര നടപടികള്‍ സ്വീകരിക്കുമോയെന്ന് വ്യക്തമാക്കുമോ?

അയല്‍ സംസ്ഥാനങ്ങളി‍ല്‍ നിന്നും രാസപദാര്‍ത്ഥങ്ങള്‍ കലര്‍ന്നതും പഴകിയതുമായ മത്സ്യം വന്‍തോതില്‍ എത്തിക്കുന്നതായ വിവരം സര്‍ക്കാരിന്റെ ശ്രദ്ധയിൽപ്പെട്ടിട്ടുണ്ടോ;

ആരോഗ്യത്തിന് ഏറ്റവും ഹാനികരമായ ഇത്തരം മത്സ്യങ്ങളുടെ വില്‍പ്പന തടയുന്നതിന് ഫലപ്രദമായ എന്തെല്ലാം നടപടികളാണ് നിലവിൽ സ്വീകരിച്ചുവരുന്നതെന്ന് വിശദീകരിക്കാമോ?

തീവ്ര കടല്‍ക്ഷോഭം മൂലം ചെല്ലാനം നിവാസികള്‍ നേരിടുന്ന ബുദ്ധിമുട്ടുകള്‍ സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ;

മുന്‍ സര്‍ക്കാരിന്റെ കാലത്ത് ചെല്ലാനത്ത് കടല്‍ക്ഷോഭവും തീരശോഷണവും ഉണ്ടായപ്പോള്‍ അവര്‍ക്ക് എന്തെല്ലാം ഉറപ്പുകളാണ് നല്‍കിയതെന്ന് വെളിപ്പെടുത്താമോ; അതില്‍ ഏതെല്ലാം ഉറപ്പുകള്‍ പ്രാവര്‍ത്തികമാക്കിയെന്ന് അറിയിക്കാമോ;

ചെല്ലാനത്തെ തീരസംരക്ഷണത്തിനായി പ്രത്യേക പാക്കേജ് ഈ സര്‍ക്കാര്‍ വിഭാവനം ചെയ്യുന്നുണ്ടോ; എങ്കില്‍ വിശദമാക്കുമോ?

2018-ലെ പ്രളയസമയത്ത് കേരളത്തിലെ വിവിധ പ്രദേശങ്ങളില്‍ സ്വന്തം ബോട്ടുകളുമായി മനുഷ്യ ജീവനുകളെ രക്ഷിക്കാനെത്തിയ മത്സ്യ തൊഴിലാളികളുടെ തകരാറിലായ ബോട്ടുകളും അനുബന്ധ ഉപകരണങ്ങളും ഉപയോഗയോഗ്യമാക്കുന്നതിനായി സര്‍ക്കാര്‍ പ്രഖ്യാപിച്ച ധനസഹായം നല്‍കിയിട്ടുണ്ടോ;

ധനസഹായം നല്‍കിയിട്ടുണ്ടെങ്കില്‍ അതിനായി ചെലവഴിച്ച തുക എത്രയാണെന്ന് അറിയിക്കുമോ;

രക്ഷാപ്രവര്‍ത്തനം നടത്തിയ മത്സ്യ തൊഴിലാളികള്‍ക്കായി മറ്റ് സഹായങ്ങള്‍ എന്തെങ്കിലും നല്‍കിയിട്ടുണ്ടോ?

ടൗട്ടേ ചുഴലിക്കാറ്റിന്റെ ഭാഗമായുണ്ടായ പേമാരിയും കടലേറ്റവും കാരണവും വന്‍നാശം വിതച്ച യാസ് ചുഴലിക്കാറ്റിന്റെ പ്രഭാവത്തിലും സംസ്ഥാനത്തെ തീരമേഖലയില്‍ വ്യാപകമായ നാശനഷ്ടം സംഭവിച്ചുവോ;

എങ്കില്‍ എപ്രകാരമുള്ള നാശനഷ്ടങ്ങളാണ് സംഭവിച്ചതെന്നും എത്ര തുകയുടെ നഷ്ടം വന്നുവെന്നും എത്ര പേര്‍ക്ക് ജീവന്‍ നഷ്ടപ്പെട്ടുവെന്നും വ്യക്തമാക്കുമോ;

ഇതുമായി ബന്ധപ്പെട്ട് തീരമേഖലയിലെ എത്ര കുടുംബങ്ങളെ മാറ്റി പാര്‍പ്പിച്ചു; അവര്‍ക്ക് എന്തൊക്കെ സഹായങ്ങള്‍ സര്‍ക്കാര്‍ നല്‍കിയെന്നും ആയതിന് എത്ര കോടി രൂപ ചെലവായി എന്നും വ്യക്തമാക്കുമോ;

മുന്‍ സര്‍ക്കാരിന്റെ പദ്ധതികളിലൊന്നായ കടലോരത്ത് നിന്നും 50 മീറ്ററിനുള്ളില്‍ താമസിക്കുന്ന മത്സ്യത്തൊഴിലാളി കുടുംബങ്ങളെ പുനരധിവസിപ്പിക്കുന്നതിനുള്ള പുനര്‍ഗേഹം പദ്ധതിയുടെ നിലവിലെ സ്ഥിതി എന്താണ്; ഇതിനായി എത്ര കോടി രൂപ നീക്കി വച്ചിട്ടുണ്ട്; എത്ര കുടുംബങ്ങളെ പുനരധിവസിപ്പിക്കാനാണ് തീരുമാനിച്ചിട്ടുള്ളത്; വ്യക്തമാക്കുമോ;

പ്രസ്തുത പുനര്‍ഗേഹം പദ്ധതി തുടര്‍ന്നും നടപ്പിലാക്കാന്‍ ഈ സര്‍ക്കാര്‍ ഉദ്ദേശിക്കുന്നുവോ; എങ്കില്‍ വിശദാംശം ലഭ്യമാക്കുമോ?

വേലിയേറ്റരേഖയ്ക്ക് 50 മീറ്ററിനുള്ളില്‍ താമസിക്കുന്ന കുടുംബങ്ങളെ സുരക്ഷിതസ്ഥാനത്തേയ്ക്ക് മാറ്റി പുനരധിവസിപ്പിക്കുന്നതിനുള്ള പുനര്‍ഗേഹം പദ്ധതി ആവിഷ്കരിച്ചിട്ടുണ്ടോ, വിശദാംശം നല്‍കുമോ;

പ്രസ്തുത പദ്ധതിയിലൂടെ ഇതിനകം എത്ര കുടുംബങ്ങളെ മാറ്റി പുനരധിവസിപ്പിക്കുവാന്‍ സാധിച്ചു;

ഇനിയും എത്ര കുടുംബങ്ങളെ മാറ്റി പാര്‍പ്പിക്കുവാനുണ്ട്;

സംസ്ഥാനത്ത് കനത്ത കടലാക്രമണവും തീരശോഷണവും വര്‍ദ്ധിച്ചുവരുന്ന സാഹചര്യത്തില്‍ ഇത്തരം കുടുംബങ്ങളെ അടിയന്തിരമായി മാറ്റി പുനരധിവസിപ്പിക്കുന്നതിന് നടപടി സ്വീകരിക്കുമോ;

ഈ പദ്ധതിയ്ക്ക് കേന്ദ്രസര്‍ക്കാരിന്റെ സാമ്പത്തികസഹായം ലഭിക്കുന്നുണ്ടോ; വിശദമാക്കുമോ?

സ്ഥിരമായി രൂക്ഷമായ കടലാക്രമണ ഭീഷണി നേരിടുന്ന മലബാര്‍ മേഖലകളിലെ മത്സ്യത്തൊഴിലാളി കുടുംബങ്ങളെ സുരക്ഷിത സ്ഥലങ്ങളിലേയ്ക്ക് മാറ്റിപാര്‍പ്പിക്കുന്നതിന് എന്തെങ്കിലും പദ്ധതി ആവിഷ്ക്കരിച്ചിട്ടുണ്ടോയെന്ന് വെളിപ്പെടുത്തുമോ; ഇല്ലെങ്കില്‍ ആവിഷ്ക്കരിക്കുന്നതിന് നടപടി സ്വീകരിക്കുമോയെന്നറിയിക്കുമോ ;

ഈ പദ്ധതിക്ക് നിശ്ചയിച്ചിരിക്കുന്ന വ്യവസ്ഥകള്‍ എന്തെല്ലാമാണെന്ന് അറിയിക്കുമോ;

ഈ പദ്ധതിയില്‍ സ്ഥലം വാങ്ങുന്നതിന് മാര്‍ക്കറ്റ് വില അനുവദിക്കുന്നതിന് നടപടി സ്വീകരിക്കുമോയെന്ന് വെളിപ്പെടുത്തുമോ?

പുനര്‍ഗേഹ് പദ്ധതി എപ്പോഴാണാവിഷ്ക്കരിച്ചതെന്നും പ്രസ്തുത പദ്ധതിക്കാവശ്യമായ തുക എത്രയാണെന്നും എങ്ങനെയാണ് ഫണ്ട് കണ്ടെത്തുന്നതെന്നും വ്യക്തമാക്കാമോ;

പ്രസ്തുത പദ്ധതി പ്രകാരം എത്ര മല്‍സ്യത്തൊഴിലാളികള്‍ക്കാണ് വീട്നിര്‍മ്മിച്ചുകൊടുക്കുന്നതെന്നും ഇതിനകം എത്രപേര്‍ക്ക് വീട് നിർമ്മിച്ച് നല്‍കിയെന്നും വ്യക്തമാക്കാമോ;

വീട് നിര്‍മ്മിച്ചു നല്‍കുന്നതിനുളള മാനദണ്ഡങ്ങള്‍ എന്തൊക്കെയാണെന്ന് വ്യക്തമാക്കാമോ;

കടല്‍തീരത്ത് താമസിക്കുന്ന മല്‍സ്യത്തൊഴിലാളികള്‍ കടലാക്രമണത്തിനു വിധേയരാകുമ്പോള്‍ അവരുടെ സുരക്ഷിതത്വമാണോ പുനര്‍ഗേഹം കൊണ്ടുദ്ദേശിക്കുന്നതെന്ന് വെളിപ്പെടുത്തുമോ;

എങ്കില്‍ കടല്‍തീരത്ത് നിന്ന് വളരെ ദൂരത്തു താമസിക്കേണ്ടി വന്നാല്‍ അത് അവരുടെ ഉപജീവനമാര്‍ഗ്ഗത്തെ ബാധിക്കുമെന്ന കാര്യം ശ്രദ്ധയില്‍പ്പെട്ടിട്ടുണ്ടോയെന്ന് വ്യക്തമാക്കാമോ?

2020-21 വര്‍ഷത്തെ ബജറ്റില്‍ ഭവന നിര്‍മ്മാണത്തിനായി മത്സ്യ തൊഴിലാളികള്‍ക്ക് എത്ര തുകയാണ് വകയിരിത്തിയിട്ടുള്ളതെന്ന് അറിയിക്കുമോ;

ഇതില്‍ എത്ര തുക ചിലവഴിച്ചുവെന്നും എത്ര വീടുകൾ നിർമ്മിച്ചുവെന്നും അറിയിക്കുമോ;

കാസര്‍കോട് ജില്ലയില്‍ ഇത്തരത്തില്‍ എത്ര വീടുകള്‍ക്കാണ് ധനസഹായം അനുവദിച്ചിട്ടുള്ളതെന്നതിന്റെ പഞ്ചായത്ത് തിരിച്ചുള്ള കണക്ക് ലഭ്യമാക്കുമോ?

തിരൂര്‍ നിയോജകമണ്ഡലത്തിലെ തീരദേശ മേഖലയില്‍ മത്സ്യത്തൊഴിലാളികളുടെ ക്ഷേമത്തിനായി എന്തൊക്കെ പദ്ധതികളാണ് നിലവിലുള്ളതെന്നും , പ്രസ്തുത പദ്ധതികള്‍ ഇപ്പോള്‍ ഏത് ഘട്ടത്തിലാണെന്നുമുള്ള വിശദാംശം ലഭ്യമാക്കുമോ;

മണ്ഡലത്തിത്തിൽ കടല്‍ക്ഷോഭം കാരണം നാശനഷ്ടം ഉണ്ടായ മത്സ്യത്തൊഴിലാളിക്കൾക്ക് നഷ്ടപരിഹാരം നല്‍കുന്നതിന് എന്തൊക്കെ നടപടികളാണ് സ്വീകരിക്കുക എന്ന് വ്യക്തമാക്കുമോ?

മത്സ്യത്തൊഴിലാളികളുടെ സമ്പാദ്യ പദ്ധതിയില്‍ നിന്നുള്ള ധനസഹായം കഴി‍ഞ്ഞ മാസം മുതല്‍ ലഭിക്കുന്നില്ല എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ;

വടകര നിയോജക മണ്ഡലത്തില്‍ എത്ര പേര്‍ക്കാണ് പ്രസ്തുത ധനസഹായം ലഭിക്കുന്നതെന്ന് അറിയിക്കുമോ;

ആയത് അടിയന്തരമായി ലഭ്യമാക്കുന്നതിനുള്ള നടപടികള്‍ സ്വീകരിക്കുമോ?

കേരളത്തിലെ തീരപ്രദേശത്ത് കഴിഞ്ഞ കുറച്ച് കാലങ്ങളായി ധാരാളം മത്സ്യത്തൊഴിലാളികള്‍ മത്സ്യബന്ധനത്തിനിടെ അപകടത്തില്‍പ്പെട്ട് മരണപ്പെട്ടുകൊണ്ടിരിക്കുന്നതും പൊഴി മുഖത്ത് വച്ചാണ് ഏറെയും അപകടങ്ങള്‍ ഉണ്ടാകാറുള്ളത് എന്ന വസ്തുതയും ശ്രദ്ധയില്‍പ്പെട്ടിട്ടുണ്ടോ;

ഇത്തരത്തില്‍ നിരന്തരമായി സംഭവിച്ച് കൊണ്ടിരിക്കുന്ന അപകടങ്ങളെക്കുറിച്ച് പഠിക്കുന്നതിനായി നാളിതുവരെയായി ഏതെങ്കിലും സമിതിയെ നിയോഗിച്ചിട്ടുണ്ടോയെന്ന് അറിയിക്കാമോ;

മേല്‍പ്പറഞ്ഞ തരത്തില്‍ അപകടങ്ങള്‍ ഉണ്ടാകുന്ന സമയങ്ങളില്‍ പ്രാഥമിക ശുശ്രൂഷ നല്‍കുന്നതിനുള്ള സംവിധാനം മത്സ്യബന്ധന കേന്ദ്രങ്ങളോട് ചേര്‍ത്ത് സ്ഥാപിച്ചിട്ടുണ്ടോയെന്ന് വ്യക്തമാക്കുമോ;

ഇത്തരത്തില്‍ അപകടത്തില്‍പ്പെടുന്ന ബോട്ടുകള്‍ക്കും മരണപ്പെടുന്ന തൊഴിലാളികളുടെ കുടുംബങ്ങള്‍ക്കും സാമ്പത്തിക സഹായം നല്‍കുന്നുണ്ടോയെന്ന് അറിയിക്കുമോ?

സംസ്ഥാനത്ത് കടലാക്രമണം മൂലമുള്ള നാശനഷ്ടം വര്‍ദ്ധിക്കുന്ന സാഹചര്യം സര്‍ക്കാര്‍ ഗൗരവമായി കണക്കിലെടുത്തിട്ടുണ്ടോ;

കടല്‍ക്ഷോഭം കൂടുതലുള്ള ചെല്ലാനം അടക്കമുള്ള സ്ഥലങ്ങളില്‍ സംരക്ഷണഭിത്തി നിര്‍മ്മാണ പ്രവര്‍ത്തനങ്ങള്‍ എന്ന് ആരംഭിക്കാനാണ് ഉദ്ദേശിക്കുന്നത്; കാലവര്‍ഷം രൂക്ഷമാകുന്നതിനു മുന്‍പ് എന്തൊക്കെ താല്‍ക്കാലിക നടപടികള്‍ സ്വീകരിക്കാന്‍ ഉദ്ദേശിക്കുന്നു; വിശദാംശങ്ങള്‍ നല്‍കാമോ;

മത്സ്യത്തൊഴിലാളികളുടെ ജീവിതം ദുരിതപൂര്‍ണ്ണമാക്കുന്ന ഈ സാഹചര്യം മറികടക്കുന്നതിന് എന്തൊക്കെ നടപടികളാണ് സ്വീകരിക്കാന്‍ ഉദ്ദേശിക്കുന്നതെന്ന് വ്യക്തമാക്കുമോ;

മറ്റ് രാജ്യങ്ങളില്‍ കടലാക്രമണം നേരിടുന്നതിന് നടപ്പിലാക്കുന്ന മാര്‍ഗ്ഗങ്ങള്‍ ഇവിടെ പ്രായോഗികമാണോ എന്ന കാര്യം പരിശോധിക്കുമോ?

കാസര്‍ഗോഡ് ജില്ലയിലെ കീഴൂര്‍ ഫിഷറീസ് സ്റ്റേഷന്‍ കെട്ടിടം പണി പൂര്‍ത്തിയായിട്ട് എത്ര മാസമായി; വിശദാംശങ്ങള്‍ അറിയിക്കാമോ;

മത്സ്യബന്ധനത്തിനിടെ അപകടത്തില്‍പ്പെടുന്ന തൊഴിലാളികളെ സഹായിക്കുന്നതിന് മറ്റ് ജില്ലകളെ ആശ്രയിക്കേണ്ട സ്ഥിതിയാണ് നിലവിലുളളതെന്ന വിഷയം ശ്രദ്ധയില്‍പ്പെട്ടിട്ടുണ്ടോ ; വിശദാംശങ്ങള്‍ അറിയിക്കാമോ;

ജീവനക്കാരെ നിയമിച്ച് കീഴൂര്‍ ഫിഷറീസ് സ്റ്റേഷൻ ആരംഭിക്കുന്നതിനുള്ള നടപടി സ്വീകരിക്കുമോ; വിശദാംശങ്ങള്‍ അറിയിക്കാമോ?

കോവിഡ്-19 ന്റെയും പേമാരിയുടെയും പശ്ചാത്തലത്തില്‍ മത്സ്യത്തൊഴിലാളികള്‍ അനുഭവിക്കുന്ന ബുദ്ധിമുട്ടുകള്‍ ശ്രദ്ധയില്‍പ്പെട്ടിട്ടുണ്ടോ; ഉണ്ടങ്കില്‍ അവരെ അടിയന്തരമായി സഹായിക്കുവാന്‍ എന്തൊക്കെ നടപടികള്‍ സ്വീകരിക്കുമെന്ന് വ്യക്തമാക്കുമോ;

കടലാക്രമണത്തില്‍ വീടുകള്‍ തകര്‍ന്ന മത്സ്യത്തൊഴിലാളികളെ യുദ്ധകാലാടിസ്ഥാനത്തില്‍ പുനരധിവസിപ്പിക്കുന്നതിന് നടപടികള്‍ ഉണ്ടാകുമോ; എങ്കില്‍ വിശദാംശം ലഭ്യമാക്കുമോ;

പ്രകൃതി ദുരന്തങ്ങളില്‍ ഒരു സൈന്യം ആയി പ്രവര്‍ത്തിച്ചവരും കേരളത്തിന് വിദേശനാണ്യം നേടിത്തരുന്ന വരുമായ മത്സ്യത്തൊഴിലാളികള്‍ക്ക് കൂടുതല്‍ ആനുകൂല്യങ്ങള്‍ നല്‍കുന്ന കാര്യം പരിഗണിക്കുമോ?

സംസ്ഥാനത്ത് 10 വര്‍ഷം മുമ്പുള്ള തീരപ്രദേശങ്ങളുടെ വിസ്തൃതി എത്രയായിരുന്നു എന്നും ആയത് നിലവില്‍ എത്രയാണ് എന്നും വ്യക്തമാക്കുമോ;

നിലവില്‍ കടലാക്രമണ/അതിരൂക്ഷ കടലാക്രമണ ഭീഷണി നേരിടുന്ന പ്രദേശ വിസ്തൃതി എത്രയാണെന്നും പ്രസ്തുത പ്രദേശങ്ങളില്‍ എത്ര മത്സ്യത്തൊഴിലാളി കുടുംബങ്ങള്‍ താമസിക്കുന്നുവെന്നും വ്യക്തമാക്കുമോ;

സംസ്ഥാനത്തിന്റെ തീരദേശ ശോഷണം കുറയ്ക്കുന്നതിനും കടലാക്രമണത്തില്‍ നിന്നും കരയെയും മത്സ്യത്തൊഴിലാളി കുടുംബങ്ങളെയും സംരക്ഷിക്കുന്നതിനുമായി സര്‍ക്കാര്‍ സമയബന്ധിതമായി നടപ്പാക്കാന്‍ ഉദ്ദേശിക്കുന്ന പദ്ധതികള്‍ എന്തെല്ലാമാണെന്ന് വ്യക്തമാക്കുമോ;

ഇതുമായി ബന്ധപ്പെട്ട് കൊച്ചി മണ്ഡലത്തിലുള്‍പ്പെടുന്ന ചെല്ലാനം തീരത്ത് സര്‍ക്കാര്‍ എന്തെല്ലാം പ്രവര്‍ത്തനങ്ങള്‍ നടത്താന്‍ ഉദ്ദേശിക്കുന്നുവെന്ന് അറിയിക്കുമോ?

മത്സ്യ സമ്പത്തിന്റെ സുസ്ഥിരത ഉറപ്പാക്കുന്നതിന് എന്തെല്ലാം നടപടികളാണ് സ്വീകരിക്കാന്‍ ഉദ്ദേശിച്ചിട്ടുള്ളതെന്ന് വ്യക്തമാക്കാമോ?

2020 ഫെബ്രുവരിയില്‍ കൊച്ചിയില്‍ നടന്ന ഗ്ലോബല്‍ ഇന്‍വെസ്റ്റേഴ്സ് മീറ്റ് അസന്‍ഡ് 2020 - ല്‍ ആഴക്കടല്‍ മത്സ്യബന്ധന പദ്ധതിക്കായി ഇ.എം.സി.സി എന്ന അമേരിക്കന്‍ കമ്പനിയുമായി സര്‍ക്കാര്‍ ധാരണാപത്രം ഒപ്പുവച്ചിരുന്നോ;

പ്രസ്തുത ധാരണാപത്രത്തിന്റെ അടിസ്ഥാനത്തില്‍ നാലു മദര്‍ ഷിപ്പുകളും 400 ട്രോളറുകളും നിര്‍മ്മിക്കുന്നതിന് പ്രസ്തുത കമ്പനിയുടെ പ്രതിനിധികളുമായി ഷിപ്പിംഗ് ആന്റ് ഇന്‍ലാന്‍ഡ് നാവിഗേഷന്‍ കോര്‍പ്പറേഷൻ കരാര്‍ ഒപ്പുവച്ചിരുന്നോ;

മുന്‍സര്‍ക്കാരിലെ മത്സ്യബന്ധനവും കശുവണ്ടിവ്യവസായവും വകുപ്പുമന്ത്രിയും ഇ.എം.സി.സി പ്രതിനിധികളും തമ്മില്‍ അമേരിക്കയില്‍ നടത്തിയ ചര്‍ച്ചയുടെ അടിസ്ഥാനത്തിലാണോ ആഴക്കടല്‍ മത്സ്യബന്ധനത്തിനായി ഇ.എം.സി.സി അസന്‍ഡില്‍ പദ്ധതി സമര്‍പ്പിച്ചതെന്ന് വ്യക്തമാക്കുമോ;

പ്രസ്തുത പദ്ധതി സംബന്ധിച്ച് ഫിഷറീസ് വകുപ്പിന്റെ പക്കലുള്ള ഫയലിന്റെ പകര്‍പ്പ് മേശപ്പുറത്ത് വയ്ക്കുമോ?

വര്‍ഷം കഴിയുന്തോറും സംസ്ഥാനത്ത്മത്സ്യലഭ്യതയില്‍ ഇടിവുണ്ടാകുന്നത് ശ്രദ്ധയില്‍പെട്ടിട്ടുണ്ടോ;ഉണ്ടെങ്കിൽ ആയതു പരിഹരിക്കുവാന്‍ സര്‍ക്കാര്‍ സ്വീകരിക്കുവാന്‍ ഉദ്ദേശിക്കുന്ന നടപടികൾ എന്തൊക്കെയാണെന്ന് വ്യക്തമാക്കുമോ;

സംസ്ഥാനത്ത് ദിനംപ്രതി ആവശ്യമുള്ള മത്സ്യത്തിന്റെ അളവെത്ര എന്നും നിലവിലെ മത്സ്യലഭ്യതയുടെ അളവ് എത്ര എന്നും വ്യക്തമാക്കുമോ:;

ഇതരസംസ്ഥാനങ്ങളില്‍ നിന്നും ദിനംപ്രതി കേരളത്തില്‍ എത്തുന്ന മത്സ്യത്തിന്റെ അളവെത്ര;ഏതൊക്കെ ഇതര സംസ്ഥാനങ്ങളില്‍ നിന്നാണ് ഇത്തരത്തില്‍ മത്സ്യം എത്തുന്നത്; ഇതിന്റെ ഗുണനിലവാരം പരിശോധിക്കുവാന്‍ എന്തൊക്കെ സംവിധാനങ്ങള്‍ സംസ്ഥാനത്തുണ്ട്; എന്നിവ സംബന്ധിച്ച വിശദാംശം ലഭ്യമാക്കുമോ;

സംസ്ഥാനം എന്നത്തേയ്ക്ക് മത്സ്യലഭ്യതയില്‍ സ്വയം പര്യാപ്തത കൈവരിക്കുവാന്‍ കഴിയുമെന്നാണ് സര്‍ക്കാര്‍ പ്രതീക്ഷിക്കുന്നതെന്നു വിശദമാക്കുമോ ?

കാലാവസ്ഥാ വ്യതിയാനം മൂലം കേരള തീരത്ത് മത്സ്യസമ്പത്തില്‍ കുറവുണ്ടായതായി കണ്ടെത്തിയിട്ടുണ്ടോ;

മത്സ്യ സമ്പത്ത് വര്‍ദ്ധിപ്പിക്കുന്നതിന് എന്തെങ്കിലും നടപടി സ്വീകരിച്ചിട്ടുണ്ടോ; വിശദാംശം നല്‍കുമോ;

പൊതുമേഖലയില്‍ ഫിഷ് മീല്‍ കമ്പനികള്‍ ആരംഭിക്കാനുള്ള നീക്കം മത്സ്യ സമ്പത്ത് വന്‍ തോതില്‍ കുറയുന്നതിന് ഇടയാക്കുമെന്ന ആശങ്ക പരിഹരിക്കുന്നതിലേയ്ക്കായി സ്വീകരിച്ച നടപടികള്‍ എന്തെല്ലാമാണെന്ന് അറിയിക്കുമോ ?

ട്രോളിംഗ് കാലത്ത് ഉണ്ടാകാനിടയുള്ള മത്സ്യ ക്ഷാമവും, വിലക്കയറ്റവും, പിടിച്ചുനിര്‍ത്തുന്നതിന് എന്തൊക്കെ നടപടികളാണ് സ്വീകരിക്കുന്നതെന്ന് വിശദമാക്കുമോ;

ട്രോളിംഗ് സമയത്ത് മറ്റു സംസ്ഥാനങ്ങളില്‍ നിന്നും പഴകിയതും, രാസവസ്തുക്കള്‍ ചേര്‍ത്തതുമായ മത്സ്യവരവ് തടയുന്നതിന് വേണ്ടി എന്തൊക്കെ നടപടികളാണ് നടപ്പിലാക്കുന്നതെന്ന് വിശദമാക്കുമോ;

ഉള്‍നാടന്‍ മത്സ്യ സമ്പത്ത് വര്‍ദ്ധിപ്പിക്കുന്നതിനായി എന്തൊക്കെ നടപടികളാണ് സ്വീകരിക്കുന്നതെന്ന് വ്യക്തമാക്കാമോ;

ഉള്‍നാടന്‍ മത്സ്യകൃഷി വ്യാപിപ്പിക്കാനായി എന്തെങ്കിലും പുതിയ പദ്ധതി ഈ സര്‍ക്കാര്‍ ഉദ്ദേശിക്കുന്നുണ്ടോ; എങ്കില്‍ വിശദമാക്കുമോ?

ടൗട്ടേ ചുഴലിക്കാറ്റിന്റെ ഭാഗമായുണ്ടായ പേമാരിയും കടലേറ്റവും കാരണവും വൻ നാശം വിതച്ച യാസ് ചുഴലിക്കാറ്റിന്റെ പ്രഭാവത്തിലും കൊച്ചി മണ്ഡലത്തിലെ ചെല്ലാനം ഗ്രാമത്തിലെ നൂറുകണക്കിന് കുടുംബങ്ങൾ ദുരിതക്കയത്തിലാണെന്ന കാര്യം ശ്രദ്ധയില്‍പ്പെട്ടിട്ടുണ്ടോ ;

ചെല്ലാനം മേഖലയില്‍ അടിക്കടി ഉണ്ടാകുന്ന രൂക്ഷമായ കടല്‍ക്ഷോഭവുമായി ബന്ധപ്പെട്ട് ചെല്ലാനം തീരദേശ നിവാസികള്‍ നേരിടുന്ന എല്ലാത്തരം പ്രശ്നങ്ങളും പഠിച്ച് ചെല്ലാനത്തെ മാതൃകാ മത്സ്യഗ്രാമം ഉള്‍പ്പെടെയുള്ള മാതൃകാ തീരദേശപ്രദേശമായി മാറ്റുന്നതിന് അടിന്തര നടപടികള്‍ സ്വീകരിക്കുമോ; വിശദാംശം വ്യക്തമാക്കുമോ?

നീണ്ടകര മത്സ്യബന്ധന തുറമുഖം മുതല്‍ ദളവാപുരം വരെയുള്ള കായല്‍ പ്രദേശത്തിന്റെ ആഴം കൂട്ടുന്നതിന് 10 കോടി രൂപ അനുവദിച്ച പ്രവൃത്തിയുടെ നിര്‍മ്മാണപ്രവര്‍ത്തനങ്ങള്‍ ആരംഭിച്ചിട്ടുണ്ടോ; പ്രസ്തുത പദ്ധതി വേഗം പൂര്‍ത്തീകരിയ്ക്കുന്നതിന് ആവശ്യമായ നടപടി സ്വീകരിയ്ക്കുമോ?

വടകര നിയോജക മണ്ഡലത്തിലെ ചോമ്പാല മത്സ്യമാര്‍ക്കറ്റിനോടനുബന്ധിച്ച് സ്ഥാപിച്ചിട്ടുള്ള ബയോഗ്യാസ് പ്ലാന്റ് പ്രവര്‍ത്തനം ആരംഭിച്ചത് എന്നാണെന്നും ഇതിനായി സര്‍ക്കാര്‍ എത്ര തുകയാണ് ചെലവഴിച്ചതെന്നും അറിയിക്കുമോ;

പ്രസ്തുത ബയോ ഗ്യാസ് പ്ലാന്റിന്റെ തുടര്‍പ്രവര്‍ത്തനങ്ങള്‍ക്കായി എന്തൊക്കെ സംവിധാനങ്ങളാണ് ഒരുക്കിയിരുന്നതെന്ന് വെളിപ്പെടുത്തുമോ;

പ്ലാന്റ് പ്രവര്‍ത്തനം ആരംഭിച്ചതിനുശേഷം ഏതാനും ദിവസങ്ങള്‍ മാത്രമാണ് യഥാവിധി പ്രവര്‍ത്തിപ്പിച്ചിട്ടുള്ളത് എന്ന വസ്തുത ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കിൽ പ്രസ്തുത പ്ലാന്റ് പൂര്‍ണ്ണ തോതില്‍ പ്രവര്‍ത്തിപ്പിക്കുന്നതിന് എന്തൊക്കെ നടപടികള്‍ കൈക്കൊള്ളുമെന്ന് അറിയിക്കുമോ?

കണ്ണൂര്‍ ജില്ലയിലെ പുതിയങ്ങാടി പാലക്കോട് അഴിമുഖത്ത് പുലിമുട്ടുകള്‍ നിര്‍മ്മിച്ചുകൊണ്ട് പുഴയിലെ നീരൊഴുക്ക് സുഗമമാക്കുന്നതിനും മത്സ്യബന്ധനയാനങ്ങള്‍ക്ക് അപകടരഹിതമായി അഴിമുഖത്തുകൂടി ലാന്റിംഗ് സെന്ററിലേക്ക് കയറിയിറങ്ങുന്നതിനുമായി റീബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി ഭരണാനുമതി ലഭിച്ച പദ്ധതിയുടെ പ്രവൃത്തി എപ്പോള്‍ ആരംഭിക്കാന്‍ കഴിയും;

ഇതുമായി ബന്ധപ്പെട്ട് എന്തൊക്കെ നിര്‍മ്മാണ പ്രവൃത്തികളാണ് നടപ്പിലാക്കാന്‍ ഉദ്ദേശിക്കുന്നത്; വിശദമാക്കാമോ?

നെയ്യാറ്റിൻകര പൊഴിയൂര്‍ തീരദേശത്ത് നിര്‍മ്മിക്കുന്ന മത്സ്യബന്ധന തുറമുഖത്തിന്റെ ഡി.പി.ആർ. പൂര്‍ത്തീകരിച്ചോ;

തുറമുഖത്തിന്റെ പ്രവൃത്തിയുടെ ടെണ്ടര്‍ നടപടി എപ്പോള്‍ പൂര്‍ത്തീകരിക്കാൻ കഴിയും എന്ന് വിശദമാക്കാമോ;

കടലാക്രമണത്തില്‍ നഷ്ടപ്പെട്ട തീരം സംരക്ഷിക്കുന്നതിന് മേല്പറഞ്ഞ തുറമുഖത്തിന്റെ പ്രവൃത്തിയുമായി ബന്ധപ്പെട്ട് നടപടി സ്വീകരിക്കാൻ കഴിയുമോ?

ഗുരുവായൂര്‍ നിയോജക മണ്ഡലത്തിലെ കടപ്പുറം പഞ്ചായത്തിലെ മുനക്കടവ് ഫിഷ് ലാന്റിംഗ് സെന്റര്‍, മിനി ഹാര്‍ബറായി ഉയര്‍ത്തുന്നതിനുള്ള പദ്ധതി പരിഗണനയിലുണ്ടോ;

പദ്ധതിക്കായി സ്ഥലം ഏറ്റെടുത്തിട്ടും ഫിഷ് ലാന്റിംഗ് സെന്റര്‍ മിനി ഹാര്‍ബറായി ഉയര്‍ത്താത്തതിന്റെ കാരണം വെളിപ്പെടുത്തുമോ?

കടലിന്റെ അടിത്തട്ടില്‍ അടിഞ്ഞു കൂടുന്ന പ്ലാസ്റ്റിക് മാലിന്യങ്ങള്‍ നീക്കം ചെയ്യുന്നതിന് വേണ്ടി ആവിഷ്ക്കരിച്ചിട്ടുള്ള ശുചിത്വ സാഗരം പദ്ധതി, ഏതെല്ലാം വകുപ്പുകളുടെ നേതൃത്വത്തിലാണ് നടപ്പിലാക്കി വരുന്നതെന്ന് അറിയിക്കാമോ;

നിലവില്‍ ഏതെല്ലാം പ്രദേശങ്ങളിലാണ് പ്രസ്തുത പദ്ധതി നടപ്പിലാക്കി വരുന്നതെന്ന് വ്യക്തമാക്കാമോ;

ഐക്യരാഷ്ട്ര സംഘടനയുടെയും വേള്‍ഡ് എക്കണോമിക് ഫോറത്തിന്റെയും പ്രത്യേക പരാമര്‍ശം നേടിയ പ്രസ്തുത പദ്ധതി എല്ലാ മത്സ്യബന്ധന തുറമുഖങ്ങളിലേയ്ക്കും വ്യാപിപ്പിക്കുന്നതിന് നടപടി സ്വീകരിക്കുമോ?

ഫിഷറീസ് വകുപ്പിന് കീഴില്‍ തീരദേശറോഡ് പുനരുദ്ധാരണപദ്ധതിയില്‍ ഉള്‍പ്പെടുത്തി വള്ളിക്കുന്ന് മണ്ഡലത്തിലെ പുഴയോര പഞ്ചായത്തുകളില്‍ നാശോന്മുഖമായ റോഡുകള്‍ നവീകരിക്കുന്നതിന് നടപടികള്‍ സ്വീകരിക്കുമോ;

നിലവില്‍ കടലില്‍ നിന്ന് എത്ര കിലോമീറ്റർവരെയുള്ള റോഡുകളെയാണ് ഈ പദ്ധതിയില്‍ പരിഗണിക്കുന്നത്; ഇതു സംബന്ധിച്ചുള്ള ഉത്തരവുകളുടെ പകര്‍പ്പ് ലഭ്യമാക്കാമോ?

വള്ളിക്കുന്ന് മണ്ഡലത്തിലെ വള്ളിക്കുന്ന് പഞ്ചായത്തിൽ കഴിഞ്ഞ സര്‍ക്കാരിന്റെ കാലത്ത് തീരദേശ വികസന കോര്‍പ്പറേഷന്‍ വഴി നടപ്പിലാക്കിയ പദ്ധതികളുടെ വിശദാംശങ്ങള്‍ ലഭ്യമാക്കാമോ;

വള്ളിക്കുന്ന് പഞ്ചായത്തിലെ അരിയല്ലൂര്‍ മിനി സ്റ്റേഡിയം പുനരുദ്ധാരണത്തിന് ഫണ്ട് അനുവദിക്കുന്നതിനായി തീരദേശ വികസന കോര്‍പ്പറേഷന്‍ വഴി തയ്യാറാക്കിയ പ്രപ്പോസലിന്മേൽ സ്വീകരിച്ച നടപടികള്‍ വ്യക്തമാക്കാമോ?

പയ്യന്നൂരില്‍ പ്രവര്‍ത്തിക്കുന്ന ഫിഷറീസ് യൂണിവേഴ്സിറ്റിയുടെ ഉത്തരമേഖല കേന്ദ്രത്തിന് കെട്ടിടം നിര്‍മ്മിക്കുവാന്‍ സ്വന്തമായി ഭൂമി ഏറ്റെടുക്കുന്നതിനുള്ള നടപടികള്‍ ഏത് ഘട്ടത്തിലാണെന്ന് വിശദമാക്കാമോ;

പ്രസ്തുത ഭൂമി ഏറ്റെടുക്കല്‍ ത്വരിതപ്പെടുത്തുന്നതിന് ആവശ്യമായ നടപടി സ്വീകരിക്കുമോ?

ഫിഷറീസ് സര്‍വ്വകലാശാലയില്‍ ഉന്നത അക്കാദമിക തസ്തികകളിലേക്ക് നിയമനം നടത്തുന്നത് സംബന്ധിച്ച് ദേശീയ പത്രങ്ങളില്‍ പരസ്യം നൽകണമെന്ന യു.ജി.സി വ്യവസ്ഥ ലംഘിച്ച് നിയമനങ്ങള്‍ നടത്തിയിട്ടുണ്ടോ; വിശദാംശം ലഭ്യമാക്കാമോ;

സര്‍വ്വകലാശാലയില്‍ അടുത്തിടെ നടന്ന ഫിഷറിസ് ഡീന്‍, റിസര്‍ച്ച് ഡയറക്ടർ എന്നീ തസ്തികകളിലേക്കുള്ള നിയമനങ്ങള്‍ ഏതെല്ലാം ചട്ടങ്ങളുടെയും സര്‍ക്കാര്‍ ഉത്തരവുകളുടെയും അടിസ്ഥാനത്തിലാണെന്ന് വ്യക്തമാക്കാമോ;

ഇപ്രകാരം നിയമനം ലഭിച്ചത് ആര്‍ക്കൊക്കെയാണ്; വിശദാംശങ്ങൾ ലഭ്യമാക്കുമോ;

ഫിഷറീസ് സര്‍വ്വകലാശാലയിലെ ഉന്നതരുടെ ബന്ധുക്കളെയാണ് പ്രസ്തുത തസ്തികകളില്‍ നിയമിച്ചിട്ടുള്ളത് എന്ന പരാതി ലഭിച്ചിട്ടുണ്ടോ; ഉണ്ടെങ്കിൽ വിശദാംശം വെളിപ്പെടുത്താമോ?

അവശ കലാകാര പെന്‍ഷന്‍ മുടങ്ങാതെ ലഭിക്കുന്നതിനുള്ള നടപടി ക്രമങ്ങള്‍ വ്യക്തമാക്കാമോ;

പെൻഷൻ ലഭിക്കുന്നതിന് ലൈഫ് സര്‍ട്ടിഫിക്കറ്റും അതിനു വേണ്ടിയുള്ള പ്രത്യേക ഫോമുകളും ഉപയോഗിക്കണമെന്ന വ്യവസ്ഥ ഇപ്പോള്‍ നിലവിലുണ്ടോ;

അവശ കലാകാര പെന്‍ഷന്‍ വര്‍ദ്ധിപ്പിക്കുന്ന കാര്യം സര്‍ക്കാരിന്റെ പരിഗണനയില്‍ ഉണ്ടോ എന്നറിയിക്കാമോ?

ഇരിക്കൂര്‍ നിയോജകമണ്ഡലത്തിലെ കെ.ജി.സുബ്രഹ്മണ്യം കലാഗ്രാമത്തിന്റെ വികസനപ്രവര്‍ത്തനങ്ങള്‍ക്ക് പുതിയ പദ്ധതികള്‍ എന്തെങ്കിലും നടപ്പാക്കാന്‍ ഉദ്ദേശിക്കുന്നുണ്ടോ എന്ന് അറിയിക്കുമോ;

കലാഗ്രാമത്തോടനുബന്ധിച്ച് ഒരു ഫൈനാർട്സ് കോളേജ് സ്ഥാപിക്കുന്നതിനുള്ള നിര്‍ദ്ദേശങ്ങള്‍ സര്‍ക്കാരിന്റെ പരിഗണനയിലുണ്ടോ;

എങ്കില്‍ ആയതിന്റെ നടപടിക്രമങ്ങള്‍ ഏത് ഘട്ടത്തിലാണെന്ന് വെളിപ്പെടുത്താമോ?

മഞ്ചേശ്വരം ഗോവിന്ദപെെ സ്മാരക കമ്മിറ്റിക്ക് വാര്‍ഷിക ഗ്രാന്റായി എത്ര തുകയാണ് നല്‍കിവന്നിരുന്നതെന്ന് അറിയിക്കുമോ;

പ്രസ്തുത കമ്മിറ്റിക്ക് നല്‍കി വന്നിരുന്ന ഗ്രാന്റ് തുക നിലവില്‍ നിര്‍ത്തലാക്കിയിട്ടുണ്ടോ;

പ്രസ്തുത കമ്മിറ്റിക്ക് നല്‍കുന്നതിന് എത്ര തുകയാണ്കുടിശ്ശികയുള്ളത്; ഏതൊക്കെ ആവശ്യങ്ങള്‍ക്കാണ് ഇത് വിനിയോഗിക്കുന്നത്; ഗ്രാന്റ് അനുവദിക്കുന്നതിന് നടപടി സ്വീകരിക്കുമോ?

സംസ്ഥാനത്തെ ഏഴ് ജില്ലകളില്‍ സഹകരണ കൂട്ടായ്മ സംഘടിപ്പിച്ച് യുവകലാകാരന്മാരെ സഹായിക്കുന്നതിന് സാംസ്കാരിക വകുപ്പ് പദ്ധതി ആവിഷ്ക്കരിച്ചിട്ടുണ്ടോ; അറിയിക്കുമോ;

പ്രസ്തുത പദ്ധതിയുടെ വിശദാംശം ലഭ്യമാക്കുമോ?

കോവിഡ് പ്രതിസന്ധി മൂലം കേരളത്തില്‍ നിരവധി കലാകാരന്മാര്‍ക്ക് കഴിഞ്ഞ 15 മാസമായി തൊഴില്‍ നഷ്ടമായിരിക്കുന്നതിനാല്‍ ഇവരുടെ കുടുംബങ്ങള്‍ ഇന്ന് നിത്യപട്ടിണിയിലും പലരും ആത്മഹത്യയുടെ വക്കിലുമാണെന്ന കാര്യം ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ഈ പ്രതിസന്ധിയിൽ ഇവരെ സഹായിക്കുന്നതിന് ഏതെല്ലാം പദ്ധതികളാണ് ആവിഷ്കരിച്ചിട്ടുള്ളതെന്ന് വ്യക്തമാക്കാമോ?

പൈതൃക ടൂറിസം പദ്ധതിയില്‍ ഉള്‍പ്പെടുത്തി സാംസ്കാരിക വകുപ്പ് നടപ്പിലാക്കിവരുന്ന പദ്ധതികള്‍ ഏതൊക്കെയാണെന്ന് വ്യക്തമാക്കുമോ;

തിരുവമ്പാടി കുടിയേറ്റ സ്മാരക പദ്ധതി നടപ്പിലാക്കുന്നതിന് നടപടി സ്വീകരിക്കുമോ എന്ന് വ്യക്തമാക്കുമോ?

കേരളത്തിന്റെ അതുല്യമായ സംസ്കാരം പ്രോത്സാഹിപ്പിക്കുന്നതിനും പ്രചരിപ്പിക്കുന്നതിനുമായി എല്ലാ ഗ്രാമങ്ങളിലും ചെറു നഗരങ്ങളിലും സാംസ്കാരിക സമുച്ചയങ്ങളും തിയേറ്റര്‍ ശൃംഖലകളും കലാ സാംസ്കാരിക ഗ്രാമീണ കേന്ദ്രങ്ങളും സ്ഥാപിക്കുമെന്ന പ്രഖ്യാപനം പ്രാവര്‍ത്തികമാക്കിയിട്ടുണ്ടോ;

എങ്കില്‍ ഇതിനകം എത്ര സാംസ്കാരിക സമുച്ചയങ്ങളും തിയേറ്റര്‍ ശൃംഖലകളും സ്ഥാപിച്ചുവെന്ന് വ്യക്തമാക്കുമോ;

ഇതിനായി എത്ര തുക വീതമാണ് മുന്‍ സര്‍ക്കാര്‍ വകയിരുത്തിയിരുന്നതെന്ന് അറിയിക്കുമോ?

നാദാപുരം മണ്ഡലത്തില്‍ കെ.എസ്.എഫ്.ഡി.സി മിനി തിയേറ്റര്‍ ആരംഭിക്കുന്നതിന് എന്തൊക്കെ നടപടികള്‍ സ്വീകരിച്ചിട്ടുണ്ടെന്ന് വിശദമാക്കാമോ ?

നെയ്യാറ്റിൻകര നിയോജകമണ്ഡലത്തില്‍ അനുവദിച്ച കെ.എസ്.എഫ്.ഡി.സി - തീയേറ്ററിന്റെ നിര്‍മ്മാണ പ്രവൃത്തിയുടെ നിലവിലെ അവസ്ഥ എന്തെന്ന് വ്യക്തമാക്കാമോ;

ആയതിന്റെ ഡി.പി.ആര്‍ പൂര്‍ത്തീകരിച്ചിട്ടുണ്ടോ; എത്ര കോടി രൂപയുടെ ഡി.പി.ആര്‍ ആണ് കിഫ്ബിയില്‍ നല്‍കിയതെന്ന് വിശദമാക്കാമോ?

മുന്‍സര്‍ക്കാരിന്റെ കാലത്ത് ഇടതുപക്ഷ അനുഭാവികളായ താല്കാലിക ജീവനക്കാരെ സ്ഥിരപ്പെടുത്തണമെന്നാവശ്യപ്പെട്ട് ചലച്ചിത്ര അക്കാദമി ചെയര്‍മാന്‍ സര്‍ക്കാരിന് കത്ത് നല്‍കിയിട്ടുണ്ടോ; എങ്കില്‍ ആരെയെല്ലാം ഏതെല്ലാം തസ്തികയില്‍ നിയമിക്കണമെന്നാവശ്യപ്പെട്ടാണ് കത്ത് നല്‍കിയത് എന്നതിന്റെ വിശദാംശം ലഭ്യമാക്കുമോ;

പ്രസ്തുത കത്തിന്മേല്‍ സ്വീകരിച്ച തുടര്‍നടപടികള്‍ എന്തെല്ലാമാണെന്ന് വിശദമാക്കുമോ;

ചലച്ചിത്ര അക്കാദമിയില്‍ കഴിഞ്ഞ സര്‍ക്കാരിന്റെ കാലത്ത് സ്ഥിരനിയമനം നല്‍കിയ ജീവനക്കാരുടെ വിശദാംശം ലഭ്യമാക്കുമോ?

സംസ്ഥാനത്ത് യുവജനങ്ങളുടെ ക്ഷേമത്തിനും ഉന്നമനത്തിനുമായി ആവിഷ്കരിക്കുവാന്‍ ഉദ്ദേശിക്കുന്ന പദ്ധതികള്‍ എന്തെല്ലാമാണെന്ന് വ്യക്തമാക്കാമോ;

ഈ രംഗത്ത് കേരള യുവജനക്ഷേമ ബോര്‍ഡ് നടത്തുന്ന പ്രവര്‍ത്തനങ്ങള്‍ കൂടുതല്‍ കാര്യക്ഷമമാക്കുവാന്‍ നടപടി സ്വീകരിക്കുമോ;

അഭ്യസ്തവിദ്യരായ യുവജനങ്ങള്‍ക്ക് മത്സരപരീക്ഷകളില്‍ വിജയം കൈവരിക്കുന്നതിന് യുവജനക്ഷേമ ബോര്‍ഡിന്റെ ആഭിമുഖ്യത്തില്‍ സംഘടിപ്പിച്ചു വരുന്ന പരിശീലന പരിപാടികള്‍ കൂടുതല്‍ മെച്ചപ്പെടുത്തുന്നതിന് നടപടി സ്വീകരിക്കുമോ?

യുവജനക്ഷേമ വകുപ്പ് മുഖേന കുന്നത്ത് നാട് മണ്ഡലത്തില്‍ നടപ്പിലാക്കിവരുന്ന പ്രവര്‍ത്തികള്‍ എന്തെല്ലാമാണെന്ന് വിശദമാക്കാമോ;

ഇതില്‍ ഓരോ പ്രവര്‍ത്തിയുടേയും നിലവിലെ സ്ഥിതി വ്യക്തമാക്കാമോ;

ഇനിയും പൂര്‍ത്തീകരിക്കാത്ത പദ്ധതികള്‍ എതെല്ലാമെന്നും, എന്തുകൊണ്ടാണ് പ്രസ്തുത പ്രവര്‍ത്തികളുടെ പൂര്‍ത്തീകരണം വെെകുന്നതെന്നും വ്യക്തമാക്കാമോ;

മുഴുവന്‍ പ്രവര്‍ത്തികളും വേഗത്തില്‍ പൂര്‍ത്തീകരിക്കുന്നതിനുവേണ്ട നടപടി സ്വീകരിക്കുമോ എന്ന് വ്യക്തമാക്കാമോ?

തദ്ദേശസ്വയംഭരണ സ്ഥാപനങ്ങളിലെ യൂത്ത് കോ-ഓര്‍ഡിനേഷന്‍ കൗണ്‍സിലുകള്‍, യൂത്ത് കോ-ഓര്‍ഡിനേറ്റര്‍, യൂത്ത് സെന്ററുകള്‍ എന്നിവ ശക്തിപ്പെടുത്തുന്നതിനും പ്രകൃതി ദുരന്തങ്ങള്‍ നേരിടുന്നതിനും കൃഷി, സാംസ്കാരികം തുടങ്ങിയ മേഖലകളില്‍ യുവജനങ്ങളുടെ സജീവ പങ്കാളിത്തം ഉറപ്പാക്കുന്നതിനുമുള്ള അടിയന്തര നടപടികള്‍ സ്വീകരിക്കുമോയെന്ന് വ്യക്തമാക്കാമോ?